الفصل السادس

رواية مختلفة الجزء السادس 6 بقلم وتين خالد مختلفةرواية مختلفة الحلقة السادسة ‏أنا نسيت اعرفكم بيا! -أنا موج حالياً عندي 27 سنة خريجة كلية تمريض ، كلية ولا اختارتها و لا حبيتها و مكنتش ضمن اهتماماتي ، بس دخلتها و ابتديت ادرس فيها ، و الغريبة اني كنت شاطرة بشهادة كل الدكاترة

‏بس مكتفتش بكدة كنت عايزة اعمل الحاجة الي بحبها و هي تصميم الديكور ، فعلشان كدة ابتديت آخد كورسات بجانب دراستي الاصلية و خدت منحة تصميم تابعة لجامعة في لندن و اتخرجت منها بتقدير عالي . ‏~~~~~~~~~~~~~~~~~~~~~~~~~~~~~~~~ (Flash back) ‏موج : كانت الساعة قربت على اتنين بعد نص الليل، و الطوارئ هادية بشكل غريب. ‏كنت براجع ملفات المرضى قبل ما ابتدي مذاكرة لما فجأة سمعت صوت عربية إسعاف واقفة بعنف قدام الباب

‏في ثواني اتفتح الباب، و دخل المسعفين بسرير عليه راجل كبير في السن، ملامحه شاحبة بشكل يخوف ‏وراه مباشرة كان فيه شاب في أواخر العشرينات تقريبًا، بيجري جنب السرير بخطوات متلخبطة كأنه مش حاسس بالأرض تحت رجليه ‏~لو سمحتوا… حد يطمني عليه… بالله عليكم ‏كان صوته مبحوح و نفسه متقطع من كتر الجري ‏المسعفين كملوا طريقهم ناحية غرفة الإنعاش، و الشاب فضل ماشي وراهم، عينه مثبتة على الراجل طول الوقت.

‏لاحظت إنه كل شوية يضغط على شفايفه بقوة و يهز راسه كأنه بيمنع نفسه ينهار ‏~يا دكتور… جدي هيبقى كويس صح؟ ‏سأل أول دكتور شافه قدامه، لكن الدكتور كان مركز مع الراجل الكبير و مردش عليه ‏وقتها شفت دموع لمعت في عينه بسرعة، فلف وشه الناحية التانية و مسحها قبل ما تنزل ‏أول ما وصلوا قدام غرفة الإنعاش وقفوه برا ‏*حضرتك استنى هنا مينفعش تدخل ‏مسك طرف السرير في آخر لحظة كأنه مش عايز يسيبه ‏~أنا هاجي معاه… دقيقة بس…

‏*مينفعش يا فندم ‏اتقفلت الأبواب قدامه -و انا كنت بجهز نفسي علشان داخلة الغرفة لقيته جري عليا و هو بيقول ‏~يا آنسة …من فضلك ممكن تبقي تطمنيني على جدي -حضرتك اهدى الاول ..هو بإذن الله هيبقى كويس …عن اذنك بقى لان ورايا شغل -سيبته و دخلت الاوضه و كنت مسؤولة عن قياس العلامات الحيوية لجسمه ‏لقيت فيه نبض بس ضعيف و الضغط منخفض ركبنا ليه انا و الإستف اكسجين و بدأنا نتابع النبض و ضغط الدم و كان كل واحد بيعمل حاجة مختلفة

عند الشاب : فضل واقف مكانه ثواني، باصص للباب المقفول ‏بعدها نزل على أقرب كرسي وهو حاطط إيده على راسه ‏كان بيحاول يبقى قوي، لكن رجله كانت بتتهز من التوتر ، كل شوية يبص للباب و يرجع يبص للأرض، و بين الثانية والتانية كان بياخد نفس عميق كأنه بيحارب دموعه. ‏*الدكتور : موج روحي طمني اهل المريض برا انه خلاص بقى كويس -مفيش غير شاب الي معاه ‏*لا زمان اهله كلهم وصلوا برا

-خرجت و بالفعل لقيت ممر المستشفى مليان ناس ..كان واضح من كُتر الناس و القلق الي ظاهر عليهم ان الراجل محبوب جداً ‏جري عليا الشاب أول ما خرجت، وكان معاه سِت مش كبيرة اوى ممكن نقول في الخمسينات ،و كان وراها راجلين واحد كبير في السن و التاني شاب وشوية أفراد من العيلة ‏~جدي عامل إيه؟ طمنيني بالله عليكي -بصيتله بهدوء و قلت: ‏الحمد لله، حالته استقرت دلوقتي والدكتور بيتابع معاه ، لكن لسه محتاج ملاحظة شوية

‏غمض عينيه للحظة كأنه أخيراً قدر ياخد نفسه و قال : ‏~يعني هو بخير؟ -اه هو الحمد لله بقى كويس ، بس لازم تستنوا الدكتور يخرج يشرحلكم تفاصيل حالته ‏كلهم اتطمنوا عليه ، و الست قالت : ‏~الحمد لله… الحمد لله يا رب ‏ولأول مرة من ساعة ما دخل الشاب المستشفى، ملامحه هديت شوية ‏كنت لسه هلف وأرجع شغلي، لكنه ناداني بسرعة : ‏~استني… شكراً ليكي ‏بصيتله باستغراب و انا عاقدة حواجبي : ‏~أنا عارف إن ده شغلك… بس شكراً إنك طمنتيني ‏هزيت

راسي باقتضاب و قلت : العفو ‏وسبته ورجعت لقسم الطوارئ اشوف شغلي و كتن باقيلي ساعات قليلة و اخلص الشيفت ‏عدت ساعات الشيفت ببطء رهيب و انا كنت هموت و انام ، سريري وَحشني ، ولما قربت الشمس تطلع كنت ‏خارجة من القسم بعد ليلة طويلة ومتعبة ‏وأنا ماشية ناحية الباب الرئيسي لمحته واقف عند مكتب الاستقبال و كان تقريباً بيخلص اجراءات المستشفى ‏والراجل الكبير التاني كان موجود معاه ، لقيت الراجل الكبير شاوله بعينه عليا و انا اتفاجئت

‏انه أول ما بص عليا اعتدل في وقفته وقال: ‏~آنسة موج -استغربت إنه عرف اسمي بس قلت : أيوة ..في حاجة؟ ‏ابتسم ابتسامة بسيطة و قال : ‏~جدي فاق… وحبيت أشكرك قبل ما تمشي ‏بصيتله ثواني ورديت : -أهم حاجة إنه بقى كويس ‏هز راسه بابتسامة خفيفة ، وأنا كملت طريقي لبرا المستشفى في طريقي للبيت و سريري العزيز ‏~~~~~~~~~~~~~~~~~~~~~~~~~~~~~~~~ ‏عدت الايام الباقية عادي شبه بعضها بعافر مع شغلي

‏لحد ما في يوم لقيت مدير المستشفى طالبني في مكتبه ! ‏يمكن كانت غريبة بالنسبة ليا لاني مدخلتش مكتب المدير او طلبني قبل كدة ، فطبيعي اتخضيت و قلت انا عملت مصيبة ! ‏وصلت لباب مكتب مدير المستشفى و خبطت و لما سمعت اذنه بدخولي دخلت المكتب -حضرتك طلبتني ‏*اه …بصي يا آنسة موج ، انتِ بقالك شغالة معانا ست شهور بالظبط و الصراحة اثبتي معانا كفاءتك في المدة القصيرة دي ‏كمل و هو بيشاور على الراجل الكبير و الشاب بتوع المرة الي فاتت

‏*فبشمهندس أدهم محمد نبيل المهدي و صادق باشا عايزينك تبقي الممرضة الخاصة بنبيل باشا في بيته -اتصدمت من القرار ده فقولت : الصراحة يا فندم انا اتفاجئت و الصراحة حاسة ان القرار من مناسب معايا ‏*طيب بصي انا مليش دعوة ..عندك بشمهندس أدهم اتكلمي معاه ‏~اتكلم

أدهم : بصي يا آنسة موج زي ما انتِ عارفة جدي جه المستشفى من اسبوع و هو الحمد لله ابتدى يتعافى و هو مريض قلب و والدتي هي الي كانت بتديله ادويته بس قصرت معاه غصب عنها في الفترة الأخيرة و ده سبب من اسباب الي خلاه يتعَب ، فاحنا طالبين منِك تاخدي بالك منه و بمواعيد ادويته و نظام اكله -و الله أنا متفهمة قلقكم عليه بس… ‏اتدخل عمو الكبير و عرفت طبعاً ان اسمه صادق : يا بنتي انتِ هتاخدي المرتب الي عايزاه و الي تعوزيه هيحصل

-لا و الله مش بتكلم على فلوس انا كل الحكاية ان هيبقى صعب اني آخد بالي من نبيل باشا و انا الصراحة لسة بدرس حاجة معينة و هروح البيت و كدة و الصراحة أنا لو قصرت معاه في حاجة او خصله حاجة بسببي مش هسامح نفسي ‏~أدهم : ميهمكيش حاجة خالص ..انتِ ساكنة فين و مع مين من أهلك -لا الحقيقة أنا والدي متوفي و مامتي مش موجودة

‏~أنا آسف و الله مكنتش اعرف…اصل انا مسألتش عن تفاصيل حياتِك الخاصة ، سألت بس عن شغلك من دكتور حازم و هو شكرلنا فيكي -لا عادي ولا بهم حضرتك ..حصل خير ‏~يعني افهم من كلامك انك عايشة لوحدك صح -اه ‏~طيب بسيطة اهي…انتِ هيبقى ليكي اوضتك الخاصة في بيت جدو هو عنده جناحه لوحده في الدور الاول من القصر ، و اوعدك محدش هيزعجك و لو معجبكيش حاجة او في حد ضايقك انا موجود قوليلي

-فكرت شوية و لقيت انه تمام ليه مجربش و لو معجبنيش همشي عادي ، مش هخسر حاجة لو جربت -تمام موافقة ‏~خلاص جدو هيخرج انهاردة لو تقدري تجهزي نفسك على الساعة 9 كدة يبقى تمام ، هاجي اخدك انا من تحت بيتك او ابعتلك السواق -تمام مناسب معايا الميعاد ‏~شكراً جداً يا آنسة موج مقدماً..مش آنسة بردو ولا في حد في حياتك -رفعت حاجبي من تدخله و انا بقول: و هل دي بردو من شروط تواجدي مع نبيل باشا ‏~حَك

رقبته باحراج شوية : لا والله مش قصدي اضايقك -على العموم اه آنسة و مفيش حد في حياتي ‏~تمام ..هنتظرك في الميعاد الي قولتلك عليه -خرجت من المكتب و انا مش مصدقة أن حياتي يعتبر اتشقلبت في ربع ساعة بس ! ‏~~~~~~~~~~~~~~~~~~~~~~~~~~~~~~ ‏طلعت من المستشفى و روحت بيتي ، اكيد مش هبيع البيت لان لسة بحس بروح بابا ، سابني بدري اوي و انا كنت لسة محتجاله ‏مامتي مكنتش بتحب بابا ، كانت بتحب فلوسه بس !

-بابايا زي اي عيله من الصعيد شرطوا عليه يتجوز بنت عمه تبعاً لعادة البنت لابن عمها ، مكنوش بيحبوا بعض بس كان بينهم احترام ، هو قالها انه بيحب واحدة تانية و هي ساعتها تفهمته و قالتله كمل معاها و متسبهاش و هي كانت سبب في اقناع ابو بابا انه يتجوز تاني بحِجة انها مش عارفة تجبله ولد او حتى طفل يشيل اسم العيلة و هي مكنتش عندها اي مشاكل في الخلفة ، و بالرغم من كدة شافت اهانات كتير بسبب الي قالته ، و بابا كان بيحاول على قد ما يقدر محدش يزعلها

‏راح اتجوز ماما و الي اكتشف بعد كدة لما حصلتله ازمة في الشغل انها بتحب فلوسه و بس ، كانت بتعمل مشاكل كتير و كل همها انها تجيب اغلى الحاجات و مستواها ميقلش ‏و للأسف انا جيت على الدنيا و ماما مكنتش عايزة تخلف من بابا ، او تخلف اصلا لانها خايفة على شكلها و جسمها ، مشوفتش منها أي حب او اهتمام ، انا الي كنت بطلب الحاجة بلساني ، بعدتني خالص عن عيلة بابا ، و اصرت عليه يجيبلها بيت لوحدها

‏بابا مات و انا في نص سنة تالتة ثانوي و اكتشفت انه كان كاتب البيت ده باسمي و بقية املاكه لمراته التانية ، مسابش لمامتي حاجة ، و هي مستنتش كتير و خلصت عِدتها و راحت اتجوزت و.. سابتني ، مسألتش عليا و لا بصت ان في بنت محتجاها .. في بنت محتاجة حضن امان بعد ما امانها راح -مسحت دموعي الي نزلت و انا باخد صورة بابا معايا ‏خلصت تجهيز شنطي و لقيت حد بيتصل بيا ، رديت : -الو ‏~الو…آنسة موج معايا -اه اتفضل

‏~انا السواق الخاص ببشمهندس ادهم…حبيت ابلغك اني وصلت و تحت البيت -تمام خلاص نازلة ‏~لا بعد اذنك انا هطلع آخد شنط و حاجة حضرتك لان بشمهندس ادهم بلغني بكدة -تمام إتفضل -طلع السواق خد شنطي و نزلهم للعربية و انا ركبت معاه و في طريقي للقصر. ‏»»»»»»»»»»»»»»»»»»»»»»»»»»»»»»»»»»»»»»»