الفصل السابع

رواية مختلفة الجزء السابع 7 بقلم وتين خالد مختلفةرواية مختلفة الحلقة السابعة -وصلت القصر و كان كبير و فَخم ‏أول ما العربية عدت من البوابة الحديد الضخمة ، لقيت نفسي ببص على الجنينة الواسعة و عيوني بتلمع بانبهار ، كانت مليانة ورد كتير اوي و أشجار متنسقة بعناية ، وفي النص نافورة كبيرة صوت الميه فيها كان مِدي المكان هدوء و راحة ‏العربية كملت لحد ما وقفت قدام باب المدخل الرئيسي ‏ونزل السواق بسرعة فتحلي الباب

‏*اتفضلي يا آنسة موج -شكراً ‏نزلت وأنا ببص للقصر من تحت لفوق، وكان واضح إنه مبني على طراز كلاسيكي ، بأعمدة رخام ضخمة وشبابيك طويلة ‏السواق نَزل شُنطي من العربية وقالي : ‏*اتفضلي معايا جوا، بشمهندس أدهم مستني حضرتك ‏هزيت راسي بهدوء ومشيت وراه ، و دخلت ‏المكان كله كان شيك و راقي ‏*اتفضلي اقعدي بشمهندس أدهم زمانه نازل -تمام ..معلش تعبتك معايا ‏*ولا تعب ولا حاجة ده شغلي

‏السواق خلص كلامه و خرج و انا فضلت قاعدة ، مكملتش دقيقة و سمعت صوت خطوات حد بينزل من على السلم ‏رفعت عيني ولقيت أدهم نازل وهو لابس قميص أسود وبنطلون قماش رمادي ، أول ما لمحني وقف قدامي وقال: ‏~حمد لله على السلامة يا آنسة موج -الله يسلم حضرتك ‏~نادى على حد من الخدم و كان اسمها مِنة ‏البنت جت و كانت شابة في اوائل العشرينات ‏*اتفضل يا بشمهندس ‏~معلش خدي آنسة موج لأوضتها …آنسة موج هي الممرضة بتاعة جدي الي قولت عليها

البنت ابتسمت و هي بتقول : اهلا بحضرتك..تعالي معايا -ابتسمتلها بهدوء ‏بس قبل ما اتحرك أدهم اتكلم ‏~معلش يا مِنة خدي انتِ شُنطها وديها للأوضة بتاعتها و جهزي ليها اي حاجة هتحتاجها كمل و هو بيوجه كلامه ليا : و معلش استني علشان محتاج اتكلم معاكي الاول ‏مِنة طلعت شنطي و انا فضلت واقفة معاه

‏~احم..بصي انتِ اعتبري نفسك ان البيت بقى بيتك خلاص لازم تتأقلمي عليه لانك هتعيشي هِنا زي ما انتِ عارفة بس هيبقى في شوية حاجات لازم اقولك عليها علشان ميحصلش مشاكل -فِضلت واقفة قدامه و أنا مش طايقة نفسي ، الموضوع طلع كبير اوي أنا عايزة ارجع بيتي ‏~اول حاجة بعد اذنك ممنوع تجيبي حد من اصحابك او اهلك غير لما تاخدي اذن من جدو أو مِني -ابتسمت بضيق و انا بقوله : لا متقلقش معنديش صحاب او قرايب

‏~ماشي… أنا بعرفك بس، وتاني حاجة، جدي مريض قلب، وأي حاجة تضايقه أو تعصبه حاولي تتجنبيها على قد ما تقدري و انا هِنا مش بقصد افعال منِك بس ، لا اي حد يحاول يعصبه حاولي انتِ كمان تنهي النقاش ده علطول -أكيد… ده شغلي من الأساس ‏هز راسه وقال: ‏~وتالت حاجة… لو احتجتي أي حاجة في أي وقت، سواء تخص شغلك أو حتى تخص إقامتك هنا او اي حاجة بلغيني -تمام ‏سكت ثواني، وكأنه بيفكر هيقول حاجة، لكنه اكتفى بالي قاله فقال:

‏~يلا… تعالي أعرفك على جدو ‏مشيت وراه، وطلعنا السلم للدور الأول. الممر كان طويل ‏وعلى الجانبين صور قديمة للعيلة ، عيلة المهدي ‏وقف قدام باب كبير وخبط عليه مرتين، و سمع صوت من جوا قال: ‏*اتفضل ‏فتح الباب، ودخلنا ‏لقيت نبيل باشا قاعد على كرسي جنب الشباك و لابس نضارة ، و قدامه كتاب وفنجان شاي ‏أول ما شافنا ابتسم وقال: ‏*أهلًا يا بنتي… نورتي البيت ‏ابتسمت باحترام و قلت :

-ده بنور حضرتك يا نبيل باشا ، و ألف سلامة على حضرتك ‏~الله يسلمك يا بنتي… تعالي اقعدي ‏قعدت على الكرسي اللي قدامه، وهو بصلي كام ثانية وقال: ‏~أدهم قالي إنك وافقتي تيجي، وأحب أشكرك -مفيش شكر يا فندم، ده واجبي ‏ابتسم وهو بيقول: ‏~من النهارده مفيش “يا فندم” او “باشا” و الكلام الرسمي ده ، انتِ خلاص بقيتي حفيدتي ، قوليلي علطول جدو زي ما أدهم بيناديني ‏ابتسمت بخفة وقلت : -شكراً لحضرتك و الله ده من زوقك ، حاضر… يا نبيل با….

‏*ضحك بخفة و قال : ها..احنا لسة بنقول ايه -ضحكت انا كمان و قلت : حاضر يا جدو ‏*بص لأدهم و قال : سيبنا لوحدنا شوية يا أدهم ‏أدهم هز راسه وخرج من الأوضة ‏بصلي وقال بهدوء : ‏~بصي يا بنتي… أنا جبتك هنا علشان تبقي ممرضة و تخلي بالك مني ، لكن قبل أي حاجة اعتبريني راجل كبير في سن جِدك ، ولو احتجتي أي حاجة متتردديش تقوليلي

‏الكلام خرج منه بهدوء و حِنية ، أول ما سمعته افتكرت حِنية بابا عليا ، وحسيت بغصة في قلبي ، محسيتش بحِنية حد من بعد موته ‏فابتسمت ابتسامة صغيرة وأنا بحاول أخبي اللي جوايا و قلت : -شكرًا يا جدو …و إن شاء الله أكون عند حسن ظنكم ‏*ربت على ايدي و هو بيقول : و أنا متأكد من ده.. ‏يلا روحي اوضتك و ارتاحي شوية -خرجت من اوضته و لقيت مِنة مستنياني ‏خرجت من أوضة جدو، ولقيت مِنة واقفة مستنياني برة ‏أول ما شافتني ابتسمت وقالت:

‏*اتفضلي يا آنسة موج، هوري حضرتك أوضتك ‏ابتسمتلها وأنا بمشي جنبها -على فكرة… بلاش حضرتك و آنسة دول ‏بصتلي باستغراب. ‏*أومال أقول إيه؟ -إحنا يعتبر قريبين من بعض في السن ، فمتحسسنيش إني أكبر منك… قوليلي موج علطول وخلاص ‏ابتسمت بخجل وقالت: ‏*طيب يا… موج -ضحكت وأنا بهز راسي و أنا بقولها : شوفتي… أهو كدة احسن ‏بدأنا نمشي في الممر، وأنا ببص حواليّا على تفاصيل القصر ‏قلت وأنا ببص للوحات المعلقة:

-القصر كبير أوي… أكيد بتتوهوا فيه ‏ضحكت مِنة وقالت: ‏*أنا أول ما اشتغلت هنا كنت بتوه فعلًا، بس مع الوقت حفظته ، ده المكان الي اتربيت فيه فطبيعي اكون حفظاه ‏وصلنا قدام باب أبيض كبير ‏طلعت مفتاح من جيبها وفتحته ‏* بصي دي أوضتك ‏دخلت ووقفت مكاني من كتر اندهاشي ‏الأوضة كانت واسعة جداً ، فيها سرير كبير، و دريسينج روم ، وتسريحة، ومكتب، وفي آخرها بلكونة بتطل على الجنينة. -دي أوضة كبيرة عليا اوي ‏ضحكت مِنة و قالت :

‏*دي أوضة الضيوف بقالها كتير مقفولة و محدش بيدخلها ، وبشمهندس أدهم أمر تتجهز مخصوص ليكي ‏لفيت أبص في الأوضة -أنا كنت متخيلة هقعد في أوضة صغيرة جنب أوضة جدو ‏*لا خالص… حضرتك… أقصد إنتِ هتقيمي هنا فلازم ‏تحسي ان دي اوضتك بجد ‏بصتلها بابتسامة و قلت : -يختااي..لسه بتقولي حضرتك ‏حطت إيديها على بقها وهي بتضحك و قالت: ‏*حقك عليا… هحاول أتعود ‏ضحكت أنا كمان، وحسيت إن وجودها هيهون عليا شوية وُجودي هِنا

‏ساعدتني أحط الشنط ، وقبل ما تخرج وقفت عند الباب وقالت: ‏*على فكرة… العشا بعد حوالي ساعة. لو احتجتي أي حاجة رني على الرقم ده ، و هجيلك علطول ‏هزيت راسي و قلت : -شكرًا يا مِنة تعبتك معايا ‏ابتسمت وخرجت، وسابتني لوحدي ‏بصيت للأوضة مرة تانية، وبعدها قعدت على طرف السرير، وأنا لسه مش مستوعبة إن ده هيبقى مكاني من النهارده. ‏~~~~~~~~~~~~~~~~~~~~~~~~~~~~~~~~ ‏مر اسبوع على وجودي في القصر

‏أنا و مِنة بقينا اصحاب جداً ، و طلعت في تالتة ثانوي ‏و اتعرفت كمان على مامتها و كان اسمها بهيرة كانت كبيرة الخدم في البيت و حقيقي كانت ست طيبة جداً و كانت معتبراني زي بنتها ‏لكن مامت ادهم كانت بتتعامل معايا على قد الحاجة ، مكُنتش بختلط بيها كتير اصلاً ‏حِفظت مواعيد ادوية جدو و يومي كله بقى ماشي بنظام ثابت و روتيني

‏جدو كان شخص هادي و طيب بشكل يخليك ترتاحله و تحبه ، و كل يوم كنت بكتشف فيه حاجة جديدة بتخليني احترمه اكتر ‏أما أدهم فكان اغلبية الوقت مشغول ، كان بيرجع من برا متأخر ، مكنتش بقابله غير لما بييجي يقعد مع جدو او يطمن عليه مني ‏~~~~~~~~~~~~~~~~~~~~~~~~~~~~~~~~ -في يوم كنت قاعدة في الجنينة بعد ما جدو اخد علاجه و اطمنت انه نام

-بقيت احب اقعد فيها جداً ، مكان مريح بالنسبة ليا وسط ريحة الورد الي بتنتشر مع نسمات الهوا ، بقعد على الأرض و اسيب شعري على ضهري ، و بستسلم للهوا البارد و هو بيطير شعري بحرية ‏كنت بشرب أيس كوفي و كنت لسة هفتح الرواية و اقرأ فيها شوية بس قاطعني حد بيقعد جنبي فاتخضيت -خضتني ..قول اي حاجة قبل ما تقعد حتى ‏~ضحك و هو بيقول : حقك عليا مقصدش اخضك.. بس ايه الي مصحيكي لغاية دلوقتي؟ -مفيش ..بحب اقعد في الجنينة بليل اكتر

‏~امم اجواء بقى و كدة -ضحكت بخفة و انا بقوله : اه يعني ببقى مبسوطة و انا بعمل كدة ‏~طيب ما تعزمي عليا و وريني بتشربي ايه -ايه ده انتَ عينك فيه ولا ايه..على العموم ده أيس كوفي خد دوق لو مش بتقرف تشرب مكان حد يعني ‏~مع اني مش بحبه و ضد فكرة الي عمل القهوة الساقعة دي بس هاتي ادوق ..ده انتِ الي عملاه؟ -اه دوق بس و هيعجبك ‏~طالما انتِ الي عملاه يبقى هيعجبني -اتكسفت شوية من كلامه و لفيت وشي ‏~قال

و هو بيتلذذ بالطعم : امم …طعمه حلو فعلاً..ابقي اعملي حسابي معاكي المرة الجاية -قولتلك هيعجبك ..هو انا بشوفك فين علشان اعملك المرة الجاية ‏~لا ما خلاص دي هتبقى عادة كل يوم .. هاجي أونسك في قعدتك هِنا و اجوائِك -يعني ملقتش غيري يعني الي تقعد معاها…ده أنا مملة جداً علفكرة ‏~مين قال كدة بس..ده جدو باعني و بقى بيقعد معاكي انتِ بدالي ‏~كمل بتسلية : قولت بقى يا واد يا أدهم شوف ايه سر بيعة جدك ليك و جرب بنفسك

-ماشي براحتك ..بس اتفاق ، أنا عليا الأيس كوفي و انتَ عليك الكلام و الحَكاوي لإني مبلاقيش حاجة اتكلم فيها ‏~خلاص اتفاقنا ‏~~~~~~~~~~~~~~~~~~~~~~~~~~~~~~~~ ‏ومن بعد اليوم ده أنا و أدهم قربنا من بعض و اتصاحِبنا و اكتشفت انه ظابط في الجهاز الأمني للمخابرات ، زي باباه بس هو حب المِهنة و دخلها برضاه ، و عرفت ان مامته مش موافقة على الشغلانة دي و بتقوله ان هي واخدة كل وقته مع هي و الهندسة و مخلياه مش عارف يشوف حياته

-كان بيحكيلي عن حاجات كتير و أنا كمان حكيتله عن حياتي ، و شجعني اقدم في منحة للتصميم و هو كان بيجهزلي ورق المنحة و التقديم بتاعها ‏~جاهزة …بكرة اول يوم ليكي في دراسة المنحة و الي بعدها هتتنقلي نقلة جبارة -جاهزة و متحمسة جداً…بجد شكراً يا أدهم لوقفتك معايا بجد مش عارفة اشكرك ازاي

‏~متشكرينيش أنا معملتش حاجة ، انتِ بنت شاطرة و طموحة و قدامك حِلم بتجري وراه و لازم تحققيه .. لو عايزة فعلاً تشكريني يبقى أنا اول كلاينت تتعاملي معاه بعد ما تتخرجي -قولت بعفوية من غير ما افكر : بس كدة ..من عيوني طبعاً ‏~يسلمولي عيونِك الحلوين -اتصدمت من غَزله الصريح و برقت و احمريت و انا مش مستوعبة الي قاله ‏~ايه ايه خلاص مالك بقيتي حَمرة كدة ليه ..أنا مقزلتش حاجة يعني أنا بقول الي شايفه -انتَ مش محترم يا أدهم

‏قولت كِدة و سيبته و جريت على جوا ‏~سمعته بيقول و هو بيضحك ‏~براحة على نفسك يا قطة علشان متقعيش ‏~~~~~~~~~~~~~~~~~~~~~~~~~~~~~~~~ ‏في يوم كُنت قاعدة أنا و جدو في الجنينة هو كان بيشرب شاي و أنا كنت قاعدة بذاكر ‏ف الوقت ده دَخل أدهم من بوابة القصر و هو بيقول: ‏~مساء الخير ‏*رد جدو و قال : مساء النور .. تعالى يا واد اقعد معايا شوية ‏~قعد أدهم و هو بيفك زراير كُم القميص و هو بيقول :

‏~كدة كدة كنت جاي اقعد معاك علشان هقولك على حاجة ‏*قول خير ان شاء الله ‏~أنا طالِع مأمورية بعد بكرة و همشي الفجر ‏*تاني يا أدهم و جاي تقولي دلوقتي ..كان ناقص تقولي قبل ما تسافِر و انتَ ماشي ‏~لا والله يا جدو ..كل الحكاية ان مش أنا الي كُنت هطلع ، كان واحد زميلي تاني بس هو لسة متعافاش من اصابته المرة الي فاتت ‏*و أمك عرفِت بالكلام ده ولا لسة

‏~لا لسة ..انتَ عارفها من ساعة ما رجعت باصابة في رحلي المرة الي فاتت و هي رافضة الموضوع و بتقولي افرض كنت رحت مني ‏*ما انتَ هتفضل تأجل في الموضوع ده لحد امتى يعني؟ -لقيتهم نسيوا اني موجودة خالص و بيتكلموا باريحية فقولت و انا بلم حاجتي : احم…عن اذنكم انا هدخل جوا ‏*ما تخليكي قاعدة ، احنا مبنقولش حاجة خاصة يعني -لا أنا اصلا خلصت الي ورايا خلاص ‏*تمام على راحتِك و أنا شوية و هطلع

-سيبتهم و طلعت أنام لخد ما ييجي ميعاد دوا جدو ‏~موضوع ايه يا جدو الي بأجله؟ ‏*متستهبلش يا أدهم ، انتَ مش ناوي تتجوز ‏~يا جدو أنا مش عايز أدخل واحدة في حياتي و أنا مش ضامن عُمري ‏*الأعمار بيد الله يا حبيبي ، شوف الي عايزها او خلي امك تدور ‏~لا أنا الصراحة كل الي ماما بتعرفني عليهم مفيش واحدة فيهم حسيت انها مناسبة ليا ‏*خلاص فكك من أمك و سوف انتَ الي تعجبَك ‏~تمام…لما أرجع بقى ابقى اشوف

‏*ماشي يا حبيبي ..أدخل ريح دلوقتي و أنا هبقى اقول لأمك بكرة على حوار المأمورية ده ملكش دعوة انتَ ‏~عملت فيا خير و الله أصل انا مش قادر لكلامها الي مفيش منه أول من آخر الصراحة … يلا تصبح على خير ‏*و انتَ من أهله ‏~~~~~~~~~~~~~~~~~~~~~~~~~~~~~~ ‏~ده يُعتبر آخر أيس كوفي اشربه معاكي قبل ما أسافر ..و يا عالم هشربه تاني ولا -متقولش كِدة ..ربنا يرجعك بالسلامة لعيلتك ‏~خايفة عليا يعني؟ -ارتبكت

و انا بقول : لا طبعاً مش كدة اااا..بطل اسألتك دي بقى يا إما هسيبك و اطلع انام و انا لما بصدق ‏~ماشي ليكي يوم يا موج ..ليكي يوم ‏وبعدين ده انتِ تلاقيكي لما تصدقي اني مشيت و هتاخدي راحتك بقى -ضحكت و أنا بقول : الصراحة اه و هقرأ بقى رواياتي الي انتَ مش بتحبها -لقيته سرحان و مردش عليا فعملت بايدي قدام وشه و انا بقول: ايه رحت فين ؟ ‏~ضحكتك هتوحشني أوي -رميت عليه كوباية الماية

و انا بقوم من جنبه و بقول: تصدق انتَ بارد اوي و أنا مش هقعد معاك تاني اصلا أنا غلطانة اني بقعد معاك من الاول ‏وسيبته و طلعت و انا بضحك على شكله المصدوم ‏~اااه..يا بنت المجنونة ، انتِ غرقتيني ، منِك لله يا موج -ده كان آخر لقاء لينا و بعديها سافر الفجر زي ما قال ‏~~~~~~~~~~~~~~~~~~~~~~~~~~~~~ ‏عدى الاسبوع ببطئ رهيب ‏القصر كان هادي و ممل بشكل غريب في غياب أدهم ‏و جدو أول سؤال بيسأله بعد ما بيصحى ‏*لسة أدهم مرجعش

‏و أرد عليه بنفس الإجابة -لسة يا جدو ‏كانت الساعة قربت على اربعة الفجر ، كُنت لسة صاحية و مش جايلي نوم خالص ‏سمعت صوت عربية وقفت قدام القصر بهدوء ‏طلعت من البلكونة اشوف مين ‏لقيت أدهم طالع من العربية و ماشي بخطوات بطيئة و دخل من باب القصر ‏نِزلت بسرعة و أنا بقابله ‏اتفاجئت لما لقيت ايده متجبسة و ملامحه باين عليها الارهاق -أدهم..ايه الي حصل لدراعك ‏~رد بتعب : موج ! ‏ده شَرخ بسيط مفيش حاجة متقلقيش

‏كان لسة هيطلع على السلم بس توازنه اختل و اتخبط جامد في سور السلم ‏~اااه ‏صرخة مكتومة طلعت منه معرفتش سببها و لقيته وقف مكانه و هو بيغمض عينيه بألم و ملامحه باين عليها الانزعاج -أدهم مالك ..ايه الي وَجعَك ‏و في أقل من ثانية و قبل ما يرد عليا لاحظت بقعة دم بدئت تظهر بوضوح عند ضهره مكان الخبطة ! ‏»»»»»»»»»»»»»»»»»»»»»»»»»»»»»»»»»»»»»»»»»»»