الفصل التاسع

رواية مختلفة الجزء التاسع 9 بقلم وتين خالد مختلفةرواية مختلفة الحلقة التاسعة -سبتهم و طلعت اوضتي ‏قعدت على طرف سريري و انا بحاول استوعب الي حصل من شوية ..جواز ايه ؟ -أنا واحدة جت القصر ده تشتغل مهنتها ..آخد بالي من راجل كبير في السن ، و بعد شهر و نص بالظبط يقرر جوازي من حفيده!! ‏ده حتى مخدش رأيي او حتى اتقدملي ، ده قرر كل حاجة من نفسه و جاي يبلغني في الآخر!

‏قمت و أنا بمشي رايحة و جاية في الاوضة بعصبية و أنا بفكر هعمل ايه ‏ما أنا طبعاً مينفعش اوافق.. حتى لو كان عندي اعجاب بأدهم ‏مستنتش كتير و جبت شنطتي و ابتديت اطلع هدومي و حاجتي و احطها جوا الشنطة ‏قطع افكاري و حركتي صوت خبط على الباب و بعدين دخلِت مِنة منه ‏~موج.. انتِ كويسة؟ -اه ..تعالي يا مِنة ‏~انتِ بتعملي ايه يا موج؟ -زي ما انتِ شايفة..همشي ‏~أنا عِرفت الي حصل تحت -و ايه رأيك؟

‏~بصراحة مش عارفة ..اكيد انتِ متفاجأة و مش عارفة تفكري ، متخديش قرار وقت عصبيتك علشان ميبقاش غلط -لا ما أنا مش هفضل مستنية لغاية ما اتجوز بالطريقة دي ..مِنة أنا ما اعرفهمش ولا اقربلهم علشان يفرضوا عليا رأيهم ولا يتحكموا فيا زي ما هما عايزين ‏~طيب بصي متفكريش من الناحية دي ..فكري من ناحية انت عايزة أدهم ولا لا ، متقبلاه كزوج ليكي ولا مش هتقدري -سكت و انا بفكر في كلامها و معرفتش ارد

‏~فكري كويس يا موج و حتى لو مش موافقة قولي كدة بس متمشيش و خلاص -مِنة ..أنا رافضة فكرة الجواز نفسها ولا بالطريقة الي هيفرضوها عليا ولا اي طريقة تانية ..و يمكن ده بسبب الحاجات الي مريت بيها ، أنا مش واثقة في نفسي و لا هقدر اثق في شريك ليا في العلاقة

‏~موج..أنا عارفة الي مريتي بيه خلاكي تخافي من الارتباط بشكل عام و مش بقول ان خوفك ملوش سبب ، بس متخليش الماضي هو الي يقرر مستقبلك ، ادي لنفسك فرصة تفكري بهدوء ، و لما تاخدي قرار يبقى علشان ده الي انتِ مقتنعة بيه مش علشان خوفك هو الي اختاره ‏~كملت و هي بتطبطب على ايدي : أنا مش بقولك وافقي و مش بقولك ارفضي ، مل الي بقوله متخديش قرار و انتِ مفكرتيش كويس و مخضوضة ، فكري بعيداً عن كل الضغط ‏~~~~~~~~~~~~~~~~~~~~~~~~~~~~~~~

‏بعد ما منة خرجت من الأوضة، رجع الهدوء يسيطر على المكان من تاني ‏بصيت للساعة.. ده ميعاد دوا جدو ‏خدت نفس عميق ، وبعدها خرجت من أوضتي واتجهت لأوضته ‏خبطت بهدوء ‏*ادخلي يا موج ‏دخلت وأنا بابتسم ابتسامة بسيطة و قلت : ‏ـ معاد الدوا ‏ابتسم وهو بيقفل الكتاب اللي كان بيقراه ‏*تعالي اقعدي الأول -لا لازم تاخد العلاج الأول و اقيس ضغطك ‏حضرتله العلاج وكوباية الماية، واستنيت لحد ما أخده كله ‏بعدها قست ضغطه واتطمنت إنه طبيعي

‏وأنا بجمع الأجهزة علشان اخرج ، سمعت صوته ‏*موج ‏لفيتله. ‏ـ أيوة يا جدو؟ ‏بصلي شوية، وبعدين قال بهدوء: ‏*أنا عارف إنك زعلانة من اللي حصل على السفرة ‏نزلت راسي و أنا بقول ‏ـ الصراحة اه ..و حسيت انكم بتتحكموا فيا ‏ابتسم ابتسامة خفيفة ‏*وده حقك ‏سكت ثواني، وبعدها كمل: ‏*بس أنا عايزك تعرفي إني مخدتش القرار ده لمجرد إنه جه في دماغي فجأة يعني -بصيتله باستغراب ‏*أنا سألت عنك ‏ـ سألت… عني؟ ‏*هز راسه و هو بيقول : آه..

‏عرفت إنك بنت محترمة، ومتربية، وسمعت عن أخلاقك من ناس كتير ‏وبعدين أنا اكتشفت حاجة استغربت منها ‏سكت لحظة وهو بيبتسم ‏*طلعت أعرف والدك -اتسعت عيني بعدم تصديق و قولت :حضرتك تعرف بابا؟ ‏ابتسم بحنين ‏*اشتغلنا مع بعض سنين طويلة ‏كان راجل محترم وكلمته بميزان و اصيل ‏يمكن ظروف الشغل فرقتنا بعدين، لكن عمره ما اتغير في نظري ‏تنهد وهو بيبصلي. ‏*بس الغريبة… إني مكنتش أعرف إن عنده بنت قمر زيك

‏احمر وشي من الكسوف ونزلت بصري للأرض ‏ابتسم وهو بيكمل: ‏*ولو والدك كان لسه عايش.. والله كنت هروحله بنفسي ‏وأخد أدهم معايا وأطلب إيدك منه ‏رفعت عيني له ببطء، وأنا مش لاقية كلام أقوله ‏ابتسم بحنان أبوي و كمل : ‏*أنا مش بقولك الكلام ده علشان أضغط عليكي ، ‏أنا بس عايزك تعرفي إن اختياري ليكي مكانش لأي سبب ممكن تكوني فكرتي فيه..‏أنا اخترتك لأني شايفك تستحقي تبقي واحدة في البيت ده ‏ولو وافقتوا… هفرح بيكي زي ما هفرح بأدهم

‏ولو رفضتي فمكانك عندي عمره ما هيتغير ، برغم اني ممكن ازعل شوية بس ده قرارك ‏فضلت ساكتة، ودموعي كانت قريبة تنزل -ابتسمت ابتسامة صغيرة وأنا بقول بصوت هادي: شكراً يا جدو ‏بعد ما خرجت من أوضة جدو، فضلت أمشي في ممرات القصر من غير هدف و نِزلت على الجنينة.. يمكن لما احس بهواها اقدر افكر كويس -كل كلمة قالهالي كانت بتلف في دماغي ، أول مرة أحس إن حد بيفكر فيا بالطريقة دي ‏وأنا سرحانة… ‏سمعت صوت أدهم ورايا ‏~موج ‏لفيت له

‏وقف قدامي وسكت ثواني، وكأنه بيدور على بداية للكلام ‏وبعدين قال بهدوء: ‏~أنا عارف إن اللي حصل اتحطيتِ فيه فجأة ‏هزيت راسي ‏ـ وأنا كمان عارفة إنك اتفاجئت زَيّي ‏ابتسم ابتسامة خفيفة ‏~يعني مش زيك اوي -مش فاهمة..تقصد ايه؟ ‏~بعدين..مش مهم دلوقتي ‏سكتنا لحظة. ‏وبعدين قال: ‏~بصي… أنا مش هحاول أقنعك توافقي ‏ولو قرارك الرفض… ‏فعادي ..دي حياتِك و انتِ حرة فيها ‏كمل بنفس الهدوء:

‏~لأن الجواز لو اتبنى على إجبار… هيفشل من أول يوم ‏سؤال خرج مني من غير تفكير ‏ـ وإنت… موافق؟ ‏أخذ نفسًا هادئًا، ثم قال: ‏~مش مهم رأيي ..علشان انت لو اتكلمت هقول كلام كتير جداً، ربنا يسهل و يقدم الي فيه الخير ‏سكت شوية قبل ما يكمل. ‏~لكن بشرط عايز قرارك لو وافقتي يكون بشرط… ‏ميبقاش في يوم تحسي إنك اتجوزتيني غصب عن ارادتك ‏فضلت أبصله ثواني ‏و بعدين هزيت راسي و انا ببتسم

‏حسيت إن القرار مبقاش مخوف زي الأول ، لأن الشخص اللي قدامي مبيفرضش نفسه عليا ‏قال بهدوء: ‏~خدي وقتك…وأيًا كان قرارك، هحترمه ‏سابني ومشي ‏تاني يوم… ‏دخلت أوضة جدو فلقيت أدهم كمان موجود ‏بصلنا جدو بابتسامة وهو بيقول : ‏*طلبتكوا علشان عايز اعرف رأيكوا ‏*ها… فكرتوا؟ ‏بصيت لأدهم و هو كمان بصلي ‏ابتسمنا نفس الابتسامة الهادية و أدهم بصلي و هو بيهز راسه براحة و بيغمض عينه ‏كإنه بيقولي : (اتكلمي و متخافيش) ‏خدت نَفس

طويل و قلت : -موافقة ‏ضحك جدو من قلبه وهو بيقول: ‏*الحمد لله ‏*الحمد لله إن ربنا طمن قلبي قبل ما أموت ‏بعدها بأيام قليلة… ‏اتكتب كتابنا في جو عائلي بسيط ‏بقيت رسمياً مِرات أدهم محمد نبيل المَهدي ‏مامت أدهم مكنتش مبسوطة بس كانِت بتحاول تِفرح بابنها انه اتجوز و خلاص ‏وبعدها اتعمل فرح هادي اقتصر على الأقارب والمعارف ‏*يلا خُد يا أدهم عروستَك و اطلعوا على الجناح بتاعكم فوق ‏قال كدة جدو بعد ما روحنا

‏أدهم اتفق معايا اننا هنقعد في القصر لحد ما بيتنا يجهز زي ما أنا عايزة نظامه ‏طِلعنا أنا و أدهم و أنا كنت متوترة شوية ..يمكن خايفة من الي جاي قال أدهم بعد ما فتح الباب: اتفضلي -دخلت و وقفت في زاوية كدة و أنا ببصله ‏~خد نَفس بصوت عالي و قال : فاهِم نظراتِك دي ‏كمل و هو بيقول : اطلعي فوق اختاري الأوضة الي تحبيها و ارتاحي و خدي شاور و متفكريش كتير و أنا مش هزعجك

-هزيت راسي بهدوء و مسكت فستاني و طلعت على السلم ، اختارت اول اوضة قابلتني ، دخلت علطول الحمام غيرت الفستان و خدت شاور و لبست بيجامة ‏قعدت ارتاح شوية على السرير بعد كدة نِزلت لقيت أدهم لسة بهدومه و قاعد على الكنبة و مرجع راسه لورا و شكله كان سرحان لدرجة انه محسش بيا لما وقفت قدامه -احم..أدهم ‏~رفع راسع و قال و هو بيبص عليا: نعم با موج..في حاجة؟ -لا أنا بس كُنت عايز اتكلم معاك ‏~شاور بعينه و قال : طيب تعالي اقعدي -قعدت

و خدت نفس و قلت : بُص أنا مش هقدَر اديك حقوقَك كاملة كزوج يعني دلوقتي..سيبني بس اتعود الأول ‏~فاهمك و مقدر خوفك ..خُدي وقتِك ‏~حبيت بس اقولِك على حاجة -اتفضَل قول

‏~أنا الي عرضت فكرة جوازي منِك على جدي..قبل ما تتكلمي او تعترضي .. طبعاً انا مقولتِش بالطريقة الي حصلت بيها جوازتنا دي ، أنا بس قولتله اني عايز اتجوزك و هو وافق جداً، بعدين اتفاجئت بالي عمله ساعة ما اتكلم على السُفرة ، بس رجعت و اتكلمت معاه و فهمني ان ماما مكنتش هتوافق الا بالطريقة دي لو كنت قلت من نَفسي اني عايز اتجوزك كانت هترفض و كان ممكن تعمل حاجات تانية ضدك

‏بس بُصي يمكن تتفاجئي بس أنا نَفسي معرفش ازاي و امتى ..أنا بَحبِك يا موج و مُستعِد اعمل اي حاجة علشان متبعديش عَني ..معرفش حبيتِك امتى و انتِ مبقالكيش كتير في حياتي ..بس الي اعرفه اني احب افضل جنبك العُمر كله..مش عايزك تخافي مِني ، أنا هَديكي وقتك تِفكري براحتِك لحد ما تبقي مستعدة نكون زوج و زوجة بجد ، و أنا مش هضغط عليكي ابداً -كُنت بسمع كلامه و أنا صدمتي بتزيد كُل شوية ، معرفتش اتكلم او اقول حاجة غير -أنا هطلع أنام

أدهم : طِلعت اوضتها و أنا حسيت ان حِمل كبير من عليا اتشال ، مكنتش مستني منها اي رد ..طلعت أنا كمان اوضتي و غيرت هدومي و نمت (Back) (Back) ‏~~~~~~~~~~~~~~~~~~~~~~~~~~~~~~~~ -لقيت تليفوني بيرن و كان رقم مش متسجل بس رديت -الو ‏~عاملة ايه دلوقتي -شيلت التليفون من على ودني و بصيت عليه،و قلت بهمس : اوفف مش كُنت سجلت الرقم علشان مردش -الحمد لله احسن يا بشمهندس ‏~طيب كويس..أنا بس قلت اطمن عليكي

-مُتشكرة لحضرتك..مكنش ليه لازمة -ملقتش في رد تاني ببص لقيته قفل التليفزن في وشي.. هو عبيط! ‏أدهم : طبيعي قفلت في وشها علشان لو كُنت اتكلمت كُنت قلت حاجات كتير ، و هزقتها على بشمهندس دي ، بس افتكرت ان ده الي لازم يحصل و بالذات انها متجوزة و انا هحاول ابعِد ~~~~~~~~~~~~~~~~~~~~~~~~~~~ ‏موج : شوية و صغنوني صحي عملتله فطار و قعدت معاه ‏تليفوني رن و كانت خالتو..رديت عليها -الو يا خالتو ‏~الو يا حبيبتي عاملة ايه

-الحمد لله يا خالتو ‏~دايماً يا رب ..بما انك اجازة و كدة ، هاتي تميم و تعالوا باتوا عندي ، و قبل ما تتكلمي متعمليش حِجة ان أكير موجود …أمير سافر افجر اصلا -ايه ده بجد..ربنا يرجعهولك بالسلامة ‏~يا رب..ها هتيجي -ما هي نرمين موجودة، و أخاف تضايق من وُجودي ‏~طيب ايه رأيك بقى لما اقولِك ان نرمين نَفسها هي صاحبة الفكرة و قالتلي اكلمك -قولت و أنا متفاجئة : بجد ..انتِ متأكدة من الي بتقوليه ‏~اه و الله بكلمك بجد..ها هتيجي

-ماشي هلبس تميم و اجهَز و آجي ‏~خلاص مستنياكي -قفلت معاها المكالمة و انا لسة مستغربة ، معقول نرمين الي قالت كدة ..يا رب يكون ربنا هداها و ابتدت تفكر بعقل شوية ‏~مامي أنا عايز لعبة زي دي تاني ..دي اتكسرت -بصيت على اللعبة و الي كانت اكيد عربية من عربياته ، و كانت فعلا عَجلِتها مكسورة -خلاص يا روحي هبقى اجيبلك غيرها ‏~اوكي ..اداني بوسة في خدي و رِجع يكمل لعب تاني

-لَبست تميم و جِهزت و ونزلت من البيت.. الي هيشوفني دلوقتي ممكن يقول عليا مسافرة اسبوعين او اسبوع ميعرفش اني هقعد يوم او يومين بس ‏~وصلت عند خالتو، و دخلت غيرت هدومي ، و كان خلاص تميم و عُمر اندمجوا مع بعض ..شوية و الغدا اتحط و اكلنا و نرمين كانت بتتعامل عادي ، كنا قاعدين بليل مع بعض و أنا كُنت بخلص ورق الشغل و بشرب معاهم شاي ‏~ما تسيبي يا بت الحاجة دي و اقعدي معانا -قربت اخلصهم اصلا

‏~بقالك فترة شايفاكي تعبانة و مُرهقة و بتيجي على نَفسك بزيادة علشان خاطر تميم -لا مفيش حاجة بتتعبني قُصاد فرحته و اني اشوفه كويس قدام عيني ‏بعد شوية وقت اتكلمِت خالتو : ‏~احم..موج -نعم يا خالتو ‏~مش ناوية يا حبيبة خالتك تفتحي قلبك و تدي لنفسك فرصة تانية -بصتلها باستغراب و قولت بقليل من الحدة : مش فاهمة تُقصدي ايه ‏~لا فاهمة يا موج ، بطلي تستعبطي..يا حبيبتي انتِ لسة صغيرة -لا مش عايزة كفاية كدة ‏~قالت

بعصبية : يعني ايه ما انتِ محتاجة راجل يربي معاكي ابنك ..مش هتعرفي تربيه لوحدك ..الولد بيكبر و هيبقى محتاج يبقى في حياته راجل يكون بمثابة الاب -رديت عليها و أنا بحاول متعصبش ولا اعيط: تميم أنا هعرف اربيه كويس ..هو انا اشتكتلك من حاجة ما أنا كويسة اهو ‏~لا مش كويسة ، انا شايفاكي مش كويسة ،انتِ كدة بتضيعي شبابك بايدك ..مش هتعرفي تشيلي الحِمل لوحدك ، المسؤولية كل يوم بتكبر -قولت بتعب : خلاص يا خالتو

‏~لا مش خلاص ..بطلي تهربي..مش كفاية ان ابوه لحد انهاردة ميعرفش ان ليه ابن في الدنيا دي!! ‏»»»»»»»»»»»»»»»»»»»»»»»»»»»»»»»»»»»»»