رواية ملاك الشيخ جراح الفصل السابع عشر 17 - بقلم ~yaqeen.hassan~

‏وشعرتُ بأن رقّة قلبه كالطمأنينة الدافئة التي تحتضنُني عندما كان كل شيءٍ حولي يُشعرني بالفزع.

لتنسون النجمة وعلقو على الفقرات 💕

#الكاتبة : yaqeen. Hassan
#مـلاك _ الـشيـخ _ جـراح
#البارت _السادس عشر

ملاك : كاعدة وعمو علي يشرحلي المادة مركزة والعب بالقلم بحلكي حركتي المفضلة وشعري رافعتة كباية ونازلة منها خصل وضعي مزري

جنة كاعدين بالنطبخ عمة دتلملم حتة تروح تنام نور نامت اصلا واني كاعدة وكوة مفتحة عيوني

فات جراح سلم وكعد جابتلة عمة جاي وكام يشرب واحس نضراتة مركزة علية توترت وعدلت كعدتي تناسيت وجودة جان اسمع صوتة يحجي

جراح : شيلي القلم من حلكج مو زين

علي : هية شبقت بي اكلتة

ملاك : يااا مماكلتة والله بس العب بي

جراح : اي ميصير مواد كيمايئة هاي تسوي تسمم

علي : صح حجية ذبي

ملاك : ذبيتة وكمل شرح

علي : يلة خلصت اروح انام

ملاك ؛ متاكد تنام

علي : معليج انتي ام كفشة

ملاك :بتسمتلة وبستة بخدة _ شكرا علاوي هنيال مرتك عليك

علي :العفو وروحي مدحيني كبالها مو كبالي

ملاك : تدلل اذا ما صبغك صبغ كون ماصار ولا استوة

علي : ههههه موتقصرين يلة تصبحون على خير

جراح : وانتة بخير

ملاك : وانتة بخير _ راح واني دالم ملازمي والكتب

جراح :باجر الخط ميجي اني اوصلكم

ملاك : ليش

جراح : والله ماكعدت حققت وياه رجال جبير كال ماكدر اجي ماكو داعي اسئلة

ملاك : اي شبيك شكتلك اني اووي

جراح : احجي عدل وبطلي مياعة

ملاك : ممتمايعة وحجي عدل مابي شي

ملاك : اخذت ملازمي وداطلع جان سيحبني من ايدي واني خفيفة وكعت بحضة من الصدمة فتحت عيوني على وسعهة مصدومة وهوة باوع بعيوني وخزرني ودفعني قوي وكام طلع

ضليت صافنة هذا شبي خبال اي والله

بس والله فشلة خرب انة شلون وية فشلاتي الهييي

صعدت فوك نمت

وجان احلم بماما وبااباا جانو جايين باتجاهي بس اكو سور كبير حاجزني يعني صاير بيناتننة

تقربت منهم واني ابجي

_ بابا ماماااا

الاب : شلونج يا نور عيني

ملاك : موزينة بلياكم اخذوني يمكم

الام : لا لا لتحجين هيج حياتج اهم وراج مستقبل حلو

ملاك : ماريد هذا المستقبل اريدكم انتو

الاب : بوية  سامحي ترا سعادتج وياه

ملاك : م منو الي اسامحة

الاب : تعرفي انتي سامحي حتى ترتاحين

ملاك : بااااباااا منوووو باااابااااا لتروححح مامااا لتروحييين حبابةةةة مامااااااااااااا

_ شهكت قوي واني اكوم من الجرباية باوعت جاسر بصفي وعمة تمسح على راسي ونور كاعدة يم رجلي واني عركي يصب رغم ان شتا

شهكت وحطيت ايدي على وجهي وابجي قوي حضني جاسر

جاسر : اشش جان كابوس اهدي يروحي اهدي اشششش

ملاك :ضليت ابجي بحضنة وكلامهم احسة يفتر باذني

ضلو يحجون واني بين الغافية والصاحية فتحت عيني شوية لمحتة بالباب واكف ومبين يوجهة الخوف مادري تخيل او اني جنت نايمة بس الي شفتة منة بتسامة منة كان يكلي اشش نامي اني يمج ماعرف شلون حسيت ان هيج كلي

بس كلبي هوة الكالي غمضت عييني وغفيت واني متمسكة بجاسر

نمت بعمق محسيت غير الصبح

كعدت وشفت روحي بحضن جاسر خطية نايم وهوة كاعد يعني ممتمدد كمت على كيف وهوة ماتحرك

رجعت شعري لورا وكعدت اتذكر الحلم

شنو الي صار منو اللي اسامحة دنجت راسي احس رح انفجر سمعت صوت جاسر تحرك باوعلي وكام عبالك فز لزمني من وجهي

جاسر : ها هم حلمتي

ملاك  :لا توني صحيت اسفة نومتك هيج نومة عوجة

جاسر : اهم شي انتي شبيج شحلمتي

ملاك : بابا وماما جوني وبابا يكلي سامحي كتلة منو يكلي سامحي انتي تعرفي سامحي حتى ترتاحين
جاسر : معرفتي منو

ملاك :لا فزيت واني اكلة منو

جاسر: ملاك جراح انتي متشيلين بكلبج على شخص وجراح هوة الوحيد اللي شلتي بكلبج علي لهاللحضة سامحتيني وما سامحتي

ملاك : لا لا معقوله جراح بعدين اني مو شايلة علي اني كارهتة وحتى ماريد اشيل بكلبي علي من كرهي اني معتبرتة ولا شي بحياتي

جاسر : مثل ما سامحتيني سامحي

ملاك : لو اموتتتت ما اسامحةة لوو اموتتت

جاسر : تمام تمام براحتج يلة كومي بدلي وروحي لدوامج تاخرتي

ملاك : تذكرت ان هوة رح ياخذني رجعت مددت وكلت _ ماداوم ماعندي شي مهم

جاسر : تنهد _ براحتج

ملاك : طلع واني حضنتت المخدة ونزلت دمعة حارة على خدي غمضت ورجعتلي الذكريات كل جلدة نطبعت على جسمي وكل لحضة الم حسيتهة رجعت على بالي باوعت للكاع واني اتذكر شكلي من جنت اشوف روحي بالمراية شلون جنت منتهية وجسمي ينزف

ذكريات هواي حملتهة وياي للمستقبل من فاجعة اهلي لهاي الفاجعة مو سهل الانسان ينسة شي ياذي ابد مو سهل

واني مانسيت ولا رح انسى

______________

نغم : بديت اجهز للعرس لان تفقنة نسوي قريب بنص السنة رحت سبوع كامل يوم ورا يوم نجهز اني ومامنا ومريم ومرات ويانة نور بس ملاك متكدر تجي لان دراستها

علي شحجي عنة ماعرف شخصيتة احسها غامضة مو من النوع اللي يهتم هوااااي ويعبر عن مشاعرة

اني بخيالي فارس احلامي يهتم بية لابسط تفاصيلي ويعبرلي عن حبة القصص اثرت بية هواي وجنت اتخيل الخطوبة هيج

بس مصار هيج جان يخابرني كل يومين المراسلة اني مرات اراسلة وهوة مرات يراسل ومن اكلة يكلي دوامي يتعب

عذرتة وادري بشغلة صعب

جانت مكالمتة عالم ثاني من يسولف ويحجي احس اهيم بصوتة جنة نحجي تقريبا 3 ساعاتت يوم الخميس يدكلي ب12 نضل لل3 نسولف لان عندة عطلة اتونس هواي وياه بس محادثتنة مابيها اي رومانسية عبالك احجي وية اخوية ماعرف مرات اضوج وممرات اكول يجوز مو من النوع اللي يعبر او يحب يثبت بافعالة

بيوم كالي نطلع بدلت لبست

نزلت جوة انتضرة يجي سمعت الهورن وطلعت باوعلي ورفع حاجبة كلت بكلبي شي طنكر

ركبت وحجيت _ هلوو

علي : هلا

نغم : شلونك

علي : بخير وانتي

نغم : تمام

علي : همم

نغم : ساق ومحجة شي اني احس ضجت كولش يعني احتة طالعين شهالكئابة هاي كلت خلي اشوفة شبي _ علي

علي : ننعم

نغم : شبيك

علي : شبية

نغم : شو ضايج شنوو زعلان مني

علي : اي وهية هاي الناقصة اكعد اتزعل عليج هة

نغم: ضجت هواي من طريقة حجية بس كلت خلي اشوف _ زين شبيك بس شفتني مو الصبح خابرتني وكتلي وجنت مابيك شي

علي : نغم ابوج شافج من طلعتيي

نغم : اي ليش السؤال

علي : يعني عادي عندة تطلعين بهالبس هذا

نغم : ليش شبي لبسي

علي : تضحكين علية انتي شنو شبي شفي شلون كصيف وكل جسمج مبين من جوا يعني حتة بالسيارة ماكدر اخليج تريديني اطلع افرفر بيج

نغم : علي هذا لبسي اذا معاجبك كول لتكعد تستهزاء وتحجي حجي مو حلو بحقي

علي : اسفين عمي جرحناج خاف بس من طلعتي بهذا لبسج ما حجيتي شي

نغم : لبسيي مابييي شيي وابوية واخوية راضين اذا معاجبك احجي بطريقة مال اوادم مو تستهزء وتعيب عيب علي تحجي علية هيج

علي : اي ست نغم اي علي حسج تعاي اخذيلج راشدي

نغم : لا والله اخلاقي متسمحلي

علي : نغمممم

نغم : هااا شنووو رح تضربني

علي : نغم تجفي الشر

نغم: رح اتجفاه بس رجعني للبيت حتى هيج طلعة ماريدهة

علي : ستغفر الله انة صوجي

نغم : اي والله الصوج منك

علي : لتضلييين ترادديننن

نغم : لتصيححح

علي : اصيححح ونصصص واكسررر راسجججج لا عبالججج محترمججج معناه اخليييج تجاوزييين

نغم : باوعت علي نكلب جذريا ضحكت   درت وجهي للجامة وواني دموعي تنزل بهدوء بدت حياتج نغم بدت من هاللحضة

رجعني للييت داريد انزل شفت الباب مقفولة ضليت كاعدة بس في سبيل ما اباوعلة او احجي وياه

علي : من باجر تطلعين تشترين لبس طويل انة اكدر اجبرج على العباية بس رح احترم رايج لبسج تطولي ياما كلمنن يروح بطريق

نغم : لعد روح بطريقك وعوفني مالة داعي تتحجج بالبس واضح انك مغصوب علية ولتبرر لان كلشي بين فتحلي الباب

علي : خوش تدللين

نغم : فتحهة ونزلت واني امسح بدموعي فتت للبيت شافتني ماما نصدمت تقربت حضنتهة واني ابجي
عمري كلة محد صيح علية ولا احد جرحني هيج مابيوم احد كلي لبسي غلط حسسني كاني طالعة بالشارع عريانة ملابسة شي جان يكدر يتفاهم وياي بس لا هوةة ختار الصياح وعدم التفاهم ضليت ابجي وماما تريد تعرف شبية _ رح اصعد انام لتكعدوني

الام : غير افهم شبيج ياماما

نغم : بعدين ماما بعدين

علي : نزلت منة السيارة واني حركت ومشيت وحسيت حطير من السرعة احس دمي فاير من لبسهة كل مفاتن جسمها ضاهرة وتكلي مابي شي لبسي انة غبي لان فكرت ازوج ايي غبييي جبت شلعان الكلب لروحي كوة

اهخخخ اللله شوكت ارتاح

_______ ___

ملاك : كاعدين بالحديقة  اني ونور نسولف جان يفوت عمو علي نزل من سيارتة والدخاان يطلع من عيونة فات طاير للبيت وركع الباب

نور : مو علساس يطلع وية نغم

ملاك : خاف تعاركو

نور : هههه الله اليستر الله اعلم شسوت بعمنة

ملاك : اي والله يمكن جلطتة 

نور : تعبانة اريد العطلة تجي

ملاك : لعد اني شكول هففف والله طلعت روحي تدرين اتمنى هيج  اطفر للسنة السادسة

نور : هوة عود اني بعدني سنة شحال انتي بعد سنتين

ملاك : مكتئبة من هالسنتين احس حتصير سودة

نور : ضمي احساسج وتفائلي بالخير

ملاك : نشالله تعدي على خير _ حجيتهة ونفتحت الباب الخارجية ةفاتت
سيارة جراح 

نزل يمشي وعاكد حواجبة كالعادة تقرب علينة واني دنجت راسي

جراح : شعدكم هنا

نور : زهكنة من الدراسة وطلعنة نتنفس

جراح : جيبيلي شماغي من فوك اريد اطلع

نور : تمام

جراح : راحت وهوة كعد بصفي واني ملتهية بالموبايل اكلب بي

فجا جان يجر موبايلي ضليت مصدومة عكد حواجبة اكثر وكام يكلب بي يفوت للواتساب وللانستا عفتة صراحة لان اريد اشوف وين يوصل بهاذا تحكمة

_ خلصت

جراح : شراد منج حازم اليوم بالكلية

ملاك: فتحت عيوني مصدومة واتتت شمدريي هذا _ ه ها

جراح :شراد منج جاوبي مداحجي هندي اني

ملاك : نطاني الملزمة

جراح  : اي اللملزمة وضل واكف وياج ربع ساعة

ملاك : انتة شمدريك

جراح : من احجي وياج لتجاوبيني بسؤال كليلي شحجة ورا منطاج الملزمة

ملاك : ن نطيتة الفلوس وسئلني على الامتحان وجاوبتة

جراح : والامتحان يخلي يكعد يتوسل بيج

ملاك : ضليت مصدومة عبالك يعرف هوة شحاجي وياي بس ديختبرني

هاي قبل كم يوم حازم هذا اللي  وياي بالكلية دائما يضايقني اجة ونطاني الملزمة اخذتهة وضل يحجي وياي وعترفلي   وكالي اخليج تفكرين حجيت لعمة مريم ولنور  بس حتة يكللي شجاوبة بس متوقعت يعرف

_ لوين تريد توصل ترا مو شغلة هاي عاد تراقبني اني اعرف حدودي واهلي ربوني زين

جراح : انة كتلج من اول يوم عيوني عليج واي اختلاط بشباب ماريد وانتي ماشالله عليج واكفة دك سوالف وياه

ملاك : سوالفيشش هوة عترفليي _  سكتت وردت اغم روحي جفصتهة باوعلي ورفع حاجبة

جراح  : عترفلج حلو جا مو جان يسال على  الامتحان

ملاك : جراح شتريد انتة تعرف هوةة شكلي فشكو كاعد تسال

جراح : انة شكتلج مو كتلج وحذرتج وانتي ما سمعتي تحذيري كلية بعد ماكو فاهمة

ملاك : شنوو ماكو بكيفككك هية

جراح : اي بكيفييي ونصص

ملاك : اني شعلية هوة عترفلي شنو ذنبي انيي

جراح : ذنبج ان كعدتي تفكرين ليش ما نطيتي رفض بساع لو عجبج تفكرين

ملاك : شدتحجي انتة من كل عقلك

جراح  : اي لعد شنو تفسير تصرفج  هااا شنو

ملاك :  كمت حجيت واني عيوني كامت تكت دموع _ والله ماعرفت شحجي عفتة وسئلت عمة مريم شمعرفني اني شلون احجي وياه وشون ارفضة تلبكت يعني تووقع اني ممكن يكون عندي شي وياه هاي ثاني مرة تضلمننيي كافييي

جراح : انة مضلمتج بس شنو طلاب القسم يفسرون وكفتج وياااا هاااا تريدين تصيرين علج بحلوكهم

ملاك : ميهموني الطلاب طز بيهم اني اعرف ممسوية غلط

جراح : ملاكككك شعندج وياه

ملاك :ضليت صافنة بوجهة مصدومة

جراح : جاوبي شو سكتييي

ملاك : شدتحجي انتة

جراح :  شعندج وياه ليش يتقربلج اذا انتي رافضتة  الرجال ميتقربي اذا مايشوف وجه من البنية

ملاك : انتة دتستوعب كلامكككك دتتهمنييي عندي شي وياههه صدكك تحجييي

جراح : اي اتهمج لان داشوف لعيني اللي ديصير وانة مو غبي حتة تعبر علية هالسوالف

ملاك : انتة ربيتني _ حجيت واني  اشهك ودموعي غركت وجهي

جراح : الضاهر ماعرفت اربي

ملاك : رفعت ايدي واني احجي واشهك من البجي _ و واللله  والللله ما اسامحكككك  لو اشوفككك تموت كبال عيونييي على اتهاماتككك هاييي اني ممجبورة ابرللك ولا رح اهتم اذا راقبتني راقبنييي يلةة وضل طول العمر راقبني ورح يجي يوم وتعرف  ان انت ضلمتني وتهمتني بابشع اتهام وبوكتهة لو تموت كبالي وتاخذ اخر انفاسك ما اسامحكككك ياجراحححح وروح بابا وماما ما اسامحكككك

_ عفتة ومشيت دافوت شفت نور واكفة مصدومة عبرتهة وصعدت لغرفتي قفلت الباب وكمت ابجي واشهككك بقوة احس روحي دتتكطع من حجية  ماعرف ليش هيج يشوفني وهوة اللي رباني على  ايدة

تعبت والله بلة هذا يستاهل اسامحة كل مرا يجي يطعني بشي اقوى يخليني انزف لفترة اطول

ليش هيج جراح ليش تكسرني تعبت والله....

____________

نغم : ضليت كاعدة فوك ابجي بعدين مددت ونمت

كعدت بالليل ب9 غسلت ونزلت  جانو  كاعدين على  التلفزيون

الاب : ها بابا شو ما طلعتو

نغم  : صار عندة شغل وكال غير مرة

فاروق : الله يساعدة صدك المستشفى واكفة علي يروح منا ويجي منا

الام : العشة بالمطبخ روحي اكلي

نغم : تمام _ رحت للمطبخ كعدت قربت  اللكمة لحلكي جان اتذكر ذبيتهة وصفنت  فاتت ماما

الام : شبيج بنيتي سولفيلي شسوالج علي

نغم : سولفت لماما كلشي لان ماكدر اكتم بعد وماعندي احد اشكيلة غيرهة

الام : تنهدت _ ماعرف شحجي والومج لو الومة

باعي يمة  ثنينكم غلطتو  هوة غلط لان ميصير يحاجيج بهاي الطريقة الجارحة واللي محد يتقبلهة جان المفروض يحجي وياج بهدوء ويفهمج بس هوة مادري شجاه

ومن جهة ثانية انتي غلطانة هم  ميصير تعاندي يايمة هاذا رجلج مو فاروق وتعاندي وهيج شغلة مابيهة عناد انتي تربيتي بيئة مختلفة عن بيئتهم هنا يعني حيشوفوج شي غريب هنا لبسج  بالنسبة الهم مو مناسب وعلي الولد ابن شيوخ وابو شيخ ومعروف حتى بغداد  يعني الشيوخ انتي تعرفيهم شلون نسوانهم 

بس هوة مجبرج على العباية اللي اني اصلا من اول ما جوي ومكالو على العباية وستغربت من مطلبو يعني عرفتهم ناس مثقفة 

نغم هوة رجلج ومن غيرتة عليج يريدج  تغيرين طريقة لبسج  وانتي لبسج مو مناسب هنا مو اكلج مو مستور لا مستور بس مو مناسب لبيئتهم

وهاي شغلة الانفصالل شيليهة من بالج تنفصلون على  هيج شي تافه

نغم : ماما نقهرت من تصرفة جان يكدر يحجي مثل الناس بس هوة قرر يجرحني احسن الة

الام : يرجعلج صدكيني ويرجع متندم همات بس انتضري انتي لتحجين شي هسة وعوفي لبسج من باجر نطلع اشتريلج اشياء طويلة بس اللي يعجبج انتي ما اجبرج على شي ميعجبج

نغم :تمام

الام : اعرف تغيرت هواي حياتج من يوم جيتنة لهنا بس شسوي بعد

نغم : لا ماما اهم شي راحتكم وين جنة هناك ووين صرنة هنا

_ طبعا احنة مو جنة بغداد جنة عايشين بايجار فاروق من تخرج من التحليلات وتعين ضلينة الراتب كوة يكفي وبابا جان كاسب فصديقة بالبصرة كالة تعال ونفتح مختبر وتصير شريكي وتوفيلي الفلوس بعدين 

وصدك بابا كال عيشتنة هنا صعبة  بعنة حصتنة من بيت جدي وفاروق سحب سلفة على راتبة وشترينة بيتنا هذا وبدة فاروق يشتغل بالمستشفى وباللمختبر وعشنة هنا احسن من خنكتنة هناك وحتى بابا   فاروق ميخلي يطلع يكلة انت تعبت ارتاح

بس بابا هم مكدر من البقة  من البيت اجر محل وفتح محل غذائية  ويشتغل بي والحمد الله عشنة

حجي ماما ريحني كمت وصعدت للغرفة فتحت تصوير المهر صافنة  علي وساعة ابتسم وساعة ابجي احبة هواي ومستعدة اتقبلة بكامل عيوبة

بس  لو يبطل برود لو يحجي وياي مثل الاوادم 

رجعت نمت بعد ماشبعت بجي  ورجعت لحياتي  الطبيعية بدون علي وبدون خطبة لا شفتة ولا سمعت صوتة واني همات من قهري كمت امنع نفسي ان اتذكرة

شتريت ملابس. طويلة وصار لبسي استر بس متغيرت كشختي واناقتي  

مر سبوعين ومشفتة  لحد ما جتي امة ومريم طلعت سلمت عليهن وكعدنة نسولف

ام علي : نغومة علي حاجاني البارحة وكال العرس يصير ورا امتحانات نص السنة احسن من نهاية السنة  والتاخير مو بالحكم تزوجو وكملي يمنة احسن

ام نغم : اي والله احسن التاخير يسوي مشاكل

مريم : هوة كالج  يعني نكمل الجهاز قبل الامتحانات

نغم : اي اي كالي  وهوة كتلة نكملة بهذا الاسبوع لان مبقة شي للامتحانات

مريم : خوش اني يومية اجي اخذج انتي وخالة ونروح نكمل وهمات نشوف البدلات والصالون وهاي السوالف

نغم : اي نشالله _ ضليت اغلي بداخلي على هالموقف السخيف للي ضليت بي يعني فوك ميعتذر يقدم العرس بدون اذني راحن وصعدت فوك شون تصرفاتت يالله مستفز شون حكمل وياه حياتي هذا حتخبل وين بطل القصص اللي اتمناه اني ليش ما اجة

ورا العشة كاعدين نشرب جاي ونسولف نفتح الموضوع وبابا كال اي احسلللكم من التاخير
وديكمل جان تندك الباب كام فاروق فتحهة وكال رجلج اجة.....

يتبع.....

__________________

اتمنى يعجبكم البارت 💕

انتضروني بارت جديد 💕

#الكاتبة : yaqeen. Hassan
#مـلاك _ الـشيـخ _ جـراح