رواية ملاك الشيخ جراح الفصل السادس عشر 16 - بقلم ~yaqeen.hassan~

‏إنها من ذلك النوع الذي لا يمكن أن تُحب بعدها أبدًا، إنها تأتي لتكون الأخيرة .

لتنسون النجمة وعلقو على الفقرات 💕

#الكاتبة : yaqeen. Hassan
#مـلاك _ الـشيـخ _ جـراح
#البارت _الخامس عشر

نغم : واكفة كدام المراية لابسة الفستان الابيض اللي رح اعقد بي صافنة ومبتسمة  طالعة حلوة عيوني مرسومة بالوان ترابية ومسحوبة بايلاينر حمرة حمرة حتة تتناسق وية الفستان اللي رح ابدل بي  شعري ضل نفسة فليتة واخذت خصلتين برمتهم ونفشتهم وشكلتهم ثنينهم بماشة ذهبية تخبل بيهة ورود

كعدت وصافنة واتخيل الاحداث اجتي بالي القصص اللي اقراها ياترا هيج رح يصير وهيج رح اعيش

طلعت دفتري وكتبت ( حياه جديدة تبدي من هاليوم.... حلوة او مرة ماعرف  بس اتمنى تكون حلوة ومثل ما اني اتخيلهة ) سديت الدفتر بعد ماكتبت التاريخ والساعة احب الاحداث المهمة بحياتي ادونها بدفتر

نزلت جوة شافني فاروق بتسم وفتحلي ايدة تقربت حضنتتة واني كوة حابسة دموعي

فاروق : طالعة اميرة 

نغم ؛ حلوة

فاروق : تخبلين  ياروح اخوج شنو حتخبلين علي اليوم

نغم؛ هههههه   يوم الالك ونفرح بيك

فاروق : والله عنست اني شو انتي اصغر مني وتزوجتي راح دوري اني

نغم : ههههه لا لا تبقى انتة الاصل نشالله اشوفلك حماتي

فاروق : الله وايدج عمي اي شي يجي نعمة

نغم : هههههههه

_ دنسولف ونفتحت الباب وصوت ناس فاتو عماتي وخالاتي الساعة جانت ب3 توهم يلة وصلو لان كلهم بغداد واحنة بالبصرة

سلمت عليهم وباركولي ب4  سمعنة صوت السيارات حسيت كلبي وكف توترت كلش وخفت باوعت الماما اريدهة يمي

لكيته  مخبوصة بالاستقبال ضليت اتنفس واهدي روحي فاتن النسوان  سلمت على مرت اخو  اللي هية ام نور وامة ونور وملاك ومريم ذولة الاعرفهم اما الباقين بدت امة تعرفني عنهن

كعدت وجتي ملاك يمي هية ونور كاشخات طالعات يخبلن

ملاك : فدوا لله عمو حينجلط

نور : طالعة تموتين والنبي

نغم : اخجل انييي

ملاك؛ هههه خجلت ام كفشة

نغم : رح اكوملج والله

ملاك : هههه لا كعدي

نغم : شوية وصاحو خلي تكعد يم الباب حيعقدون اني هنا دق نافوس الخطر عندي تمنيت اكلهم بطلت بس الفاس وكع وين بالراس ماكو رجعة

كعدت وبدة الشيخ يقرا  دنجت وغمضت والشال فوكاية عشت هاللحضة بكل معانيها صح خايفة بس كلت متنعاد شكو اخاف بيهة اني قررت

كالها اكثر من مرا الة وهوة يردد وراه انطا الموافقة ورجع علية هم عادهة اكثر من مرة

وكال اخير مرة  وماما اشرتلي اجاوب 

_ نعم انت وكيلي

كلتها برجفة وغمضت حسيت بالهلاهل الجكليت ينطش وصوت المباركات بالاستقبال   كمت وطلعت رجلية من المي باركولي كلهم ورحت دابدل جتي نور وملاك وياي

نور ؛ شنو شعورج

نغم : ماعرف فرحانة على خايفة ومتوترة

ملاك : جذابة تلكيهة تهلهل بداخلهة

نغم : انتي رح اكوملج اكتلج والله سدي السحاب وسكتي

ملاك : تمام عمي سكتنة انوب تشكينة لعلاوي

نغم : : بتسمت عالى سوالفها _ وكفت كبال المراية اعدل روحي جنت لابسة هذا الفستان

  عدلت وشعري وطلعنة فوتونا للاستقبال كعدت على الكوشة  جابن الصواني والكيكة والذهب واني مدنجة ومتوترة 
كالن حيفوت العريس  

كمت وكفت اول مفات تلكو بالجكليت والهلاهل تقرب باس راس امة وايدهة  اخذتلة نضرة ونصدمت بشكلة طالع يخبل لابس بنطرون اسود قميص ابيض وسترة ماروني شعرة مرفوع وعطرة ملة الصالة ولحيتة اللي مرتبة وخفيفة مو طويلة من باوعلي وتقرب علية دنجحت راسي و كلبي يدك سريع دنج باس راسي  وهمس بصوت

علي : مبروك 

نغم : الله يبارك بيك _ ضلن عماتة يغنن ويركصن وملاك ونور همات يدبجن وياهن وامة تفر بعبايتهة وتركص بتسمت عليهم وهوة همات مبتسم 

__________________

علي : صحيت الصبح ضايج مدري شبية ابد مفرحان احس موديني للاعدام بالي ام خزرة يي هذا لقبهة لان مااعرف اسمهة اكول ليش مو هية العروس شيصير لو هية وتسجل باسمي اهخخ حسيت الم بكلبي

تنفست ووكلت امري على الله وكمت غسلت ونزلت كلها فرحانة واني اريد شوية فرحة بداخلي الكة ماكو احس داخونهة رغم هية الله يعلم وينهة عايشة ميتة مادري بس شعور يكلي انتة تخونهة  

من لتمينة على السفرة بين سوالفهم حسيت بالفرحة شوية شفت امي مدمعة يمكن الشي اللوحيد اللي مصبرني فرحة امي وادري بيهة تتمنة تشوف اطفالي بدلت ورحنة وعقدنة واني كلت خلاص صارت مرتي لازم اتقبلها فتت وصارت عيوني على قطعة ثلج واكفة صح شايف بياض بس مثل بياضها مشايف ملاك بيضة  وام خزرة بيضة

بس هاي لا هاي تختلف جد تختلف مدنجة واباوع على كتافها اللي ضاهرة من الفستان سبحان الخالقها شعرهة اللي كاسر لون بشرها  شلون طالع عليهة ستغفرت ربي وفتت كمنة دالبسهة

نطوني الحلقة ولمست ايدهة جان باردة باوعت لبياضها ابيض من ذيج بس محسيت بشعور اللي حسيتة وية ذيج

لبستهة الحلقة وهية دتلبسني باوعت ايدهة يم ايدي طلعت اني عبد اسود 

رفعت راسها ولتقت نضراتنة بلعت ريكي وصفنت بعيونهة سبحان السواها بعدين نتبهت وهية دنجت لبستهة الكلادة وعطرها حسيتة فات باعماق اعماق جسمي

باوعت الذهب شلون على ركبتهة معكوس  وية بياضهة حسيت عركت للبسته باقي الاشياء وقطعنة الكيكة وسوينة هاي الاشياء كلها وكعدنة كل واحد كعد بزاوية عود يخلونة وحدنة نحجي بس وين عيونهن علينة ويحجن وية اكبالهن

وهية مدنجة وتفرك بايدة قربت ايدي واخذت ايدهة جان باردة كلش

حطيتة بين اصابيعي وهية احسهة ترجف  ورا شوية كامن يطلعن حتى يخلونة وحكدنة فرغ الاستقبال  واني وياها وحدنة

همست بصوت ناصي _ طالعة حلوة

نغم : حسيت كلبي يريد يوكف من حجة رجفة سرت بجسمي _ ششكرا

علي :  حاولت اكسر الصمت اللي محاوطنا _ شلوني اني طالع حلو

نغم : بتسمت وهزيت راسي ودنجت

علي : شنو هاي اريد اسمع صوتج

نغم : اي طالع حلو

علي : تمام شكرا

نغم : نتضرتة يتغزل يحجي اي شي خرب لعد سوالف القصص وينهن  معقولة نغشيت لو هاي دعوة ماما تحققت

علي : ابدي جهزي من هسة لان العرس قريب نسوي

نعم : بس مو بعد وكت

علي : لا ماريد فترة الخطوبة تطول لان عندي شغل اني وما فارغ

نغم : ما فارغ _ حجيتهة باستغراب

علي؛ اي مو عندي شغل بغداد فماريد اتقيد اريد لعرس بسرعة حتى نستقر

نغم : يعني تستمر روحاتك لبغداد

علي : طبعا بوية هذة شغلي

نغم : دنجت راسي يعني منن هسة حيعوفني ضجت كولش  _ بس حسيت بايدة ترفع وجهي من حنجي باوعلي ولتقت عيونة ضليت هايمة بيهن شكد حلو يالله معقولة تزوجت واحد هلكد حلو اني ممصدكة والله

حسيت انفاسة علت وصدرة صار يرتفع ووينزل تقرب مني وهوة يغمض عيونة واخذني بوسة بشفافي نستني كلشي داير مدايرنة جسمي حسيتة  رجف بايدة محسيت باللوقت الة لمن حتاجيت للنفس بتعد وهوة  يتنفس قوي بتسم بوجهي ورفع راسة طبع بوسة على كصتي  وكام وخلاني مصدومة شصار  شسوة   كمت وكفت وهوة  دك الباب  فاتت ملاك

علي ؛ سويلي مجال اطلع

ملاك : لاا عمو تعال نطك لقطات الكم للذكرى

علي : ملاك مو وكتهة

ملاك؛ لا عمو حباب شنو مو وكتهة تعال بس كم صورة

نغم؛ : جنت مدوخنة وما احس عبالك مبنجة جرتنة ملاك وكفنة يم الكوشة طلعت صور سسوينة مثلهن وطكت هواي صور بالاخير كالتله سوي مثل هاي

حط ايدة على خصري واني ايدي حطيتهة على كتفة   صورتنة وحط جبينة على جبيني وانفاسة صارت تضرب بوجهي  طولنة هواي بهالوضعية ضل صافن بوجهي واحس انفاسة ثكلت

ملاك : عمو احم احم خلصنة

نغم ؛ حسيتة فز ووخر

علي : خلي اطلع جراح ينتضرني

نغم ؛ طلع بسرعة عبالك احد يركض وراه  واني صافنة

ملاك : والله سطرتي لعمو بجمالج

نعم : كعدت على الكوشة وصافنة ةشصار غمضت عيوني وكلبي يدك سريع

ملاك : شبيج يول

نغم : مابية

ملاك : اي واضح ههههههههه

نغم :: ملاك نجبي _ طلعت وهية تضحك شوية وفاتن وبدن يركصن وكوموني وياهم شبعنة ركص   تونست صدك قبل ليطلعون  ملاك سجلت رقمة بموبايلي وراحت

كعدت شوية وية خالاتي وكعدن يمدحن بين

ـ والله يخبل صدك مبين خوش ولد

_ اي والله صاك العبي نغم

نغم : بتسمت على حجيهن  

الام : اي والله شلون ولد وهاي العوبة تكلي جبير

العمة :  يا دادة  جنة العافية والله لو رافضتة جان غميتهة بوجههة

نغم : هسة حتكعدون تغمون وتحجون علية مو عقدنة

العمة : اني داكول لو رافضة

نغم : ههههه  عمي وافقت  يلة رح اروح اسبح متت تعب

صعدت لغرفتي سبحت وطلعت شمرت روحي على الجرباية مبتسمة واتذكر نضراتة وشكلة وهيبتة اهخخ شكلي وكعت بحبك من اول نضرة

______________

ملاك : رجعنا للبيت اني ونور فتنة للاستقبال وكمنة نركص ونهوس اي شي  فات عمو علي   جرينا وكمنة نركص كبالة هوة صافن علينة ويضحك

_ اخوناااا خوشش اخوووو يستاهللللل الهوسةةةةة كللللللللللللوووووش

خليل : كلللللللليش العبييييي ولجججججج

ملاك : فات خليل يهلهل ويدبج تكابلو هوة ونور

نور : هذااااا لعبنةةةة ولا تكولللل استهتارررر

خليل: عمييييي رشششش الدربونةةةةة جتككككك مرتككككك الخاتونةةةةة

ملاك : يمة تونسنة ونسة مو طبيعية وعمو علي واكف يضحك علينة شوية وسمعنة صوت كمزنة تلاثتنة

جراح : لكككككك خليللللللل

ملاك : كمزنتة ووكفنة مثل الاصطفاف خليل كدام ونور ورا واني بالاخير

جراح : متستحييي بلة شطولككك وكاعد تدبجج بنص النسواننن وانتنننن  وين كاعدات تركصنن فضحتنةةةة

علي : هيج احسللكم

خليل : والكعبة مو صوجك صوج اليركصلك امشو بنات نشوف غير عرس

ملاك : تقدم ديطلع جان جراح يضربة بعلباتة  قوي

جراح : اثكلللل شوية

خليل : الف مرا كتلك عفت الثكل الك خليني ملطلط احسن

ملاك : طلع وجراح هز ايدة وراح _ علاوي ترا نطيت رقمك للعروس دك عليهة اسولف

علي : انتي مستهترة صايرا فد مرة

ملاك : هاي فوك ما افكر بمصلحتك

علي : مشكورة متقصرين

ملاك ؛ طلع  اني حجيت _ عائلة متعصبة ميتحملون شقة 

جاسر : وانتي  منين ليش

ملاك : درت وجهي وشهكت وحضنتة صارلة سبوعين بغداد مشفتة 

جاسر : مشتاقلج حيوانة

ملاك : اني اكثر والله لتروح بعد هلكد

جاسر : شسوي تاخرت علمود الفرع الجديد

ملاكز؛ يعني خلص

جاسر  اي خلصناه الحمد الله

ملاك : بتسمتلة كل ما اباووع علي افتخر بي واتخيل لو ماما عايشة جانت شكد فخرت بي وبابا جان رفع راسة بينة  ترحمتلهم  وطبيت سويتلة اكل لان احنة تعشينة لفات بهيج عزايم جدو يدز لفات حتة محد يتعبب لان عددنة كبير

نغم : صافنة علة موبايلي ياترا حيدز لو يدك ضليت انتضر الليل كلة ماكو تالي ايست ونمت

كلت يجوز يستحي او بعدة ممتعود  ثاني يوم مر وثالث يوم ومر اسبوع واني مدازلي اي رسالة

بلش داومي يبدي داومت طبيعي بلبسي المعتاد  من طلعت برة لكيتة واكف لابس بنطرون نيلي وبدي  ابو الركبة نيلي وسترة بني غامق  مكس الالوان يخبل وشعرة مرفوع ونضارات هيبتة تحجي عنة تقرب علية
وحجة برجولة

علي : سلام عليكم

نغم ؛ عليكم السلام

علي : شلونج

نغم : تمام وانتة

علي : بخير خلصتي محاضرات

نغم : اي جنت اريد اروح لملاك

علي : عوفي ملاك تعالي يلة نتغدة سوة

نغم : بتسمت مدلي ايدة لزمتهة حسيت بدفو بيهة جنة بشهر 11 الجو بارد بس ايدة دافية 

مشينة وعيون الناس احسها علينا لان ماعندي علاقات بقسمنة فمحد يعرف شي عني اغلب وقتي يم ملاك

ركبت السيارة وساق

علي : شلونج بالدوام

نغم : زينة

علي  : اذا تواجهين صعوبة  او تردين تفهمين شي كليلي اوديج لحيدر او لجاسر يساعدوج

نغم :  منو حيدر

علي  : ابن اخوية

نغم : ها هذا اللي ويا جاسر

علي : اي شريك وياه بشغل

نغم : هسة اني مضبطة المواد بس السنة الاخيرة كلها تكول تموت

علي : ماكو شي يموت باعي انتي كل ما تعبرين مرحلة رح تاخذين مواضيع ومعلومات تنخزن بعقلج فمادة السنة الوراها تكون  اعلى من المعلومات هاي وهم تاخذين وتخزنين والسنة الوراها ذالك يعني انتي مدتدرسين شي مستحيل لا بس ان شي اصعب من اللي درستي هاي السنة

نغم :  اني اصلا جان حلمي هندسة بس من طلعت معدل عالي بابا مارضة وكال مابيهة مستقبل بالعراق يعني شهادتج تروح على الخالي بلاش

علي : يلة بكل الاحوال لو مهندسة جان شغلتج وية جراح واذا صيدلانية وية جاسر وحيدرر وتلحكج نور
نغم : وانتة وية ملاك

علي : اي وية ملوكة

نغم : علي شلون توفو اهلهة

علي : جر حسرة _ بحادث سيارة جانو طالعين يروحون للدكتورة لان جانت حامل بس الله اخذهن ما رجعهم

نغم : الله يرحمهم 

علي : يرحم  موتاج... اي شتريدين تتغدين

نغم : بكيفك

علي :  تاكلين سمج لو تكرهي

نغم : لا ليش اكرهة

علي :  مادري متعود على البنات ميحبن هالسوالف

نغم : بالعكس احبة كولش للسمك خصوصا من يكون حامض

علي :  عيدي شنو كلتي

نغم : شكلت

علي :  ورا احبة

نغم : كتلك احبة كولش للسمك

علي : كولش وسمك مرا وحدة هههههه

نغم؛ بتسمت _ حتكعد تضحك علية هسة

علي : لا يابة شضحك عليج بس عجبتني الكلمة بحلكج

نغم : حسيت بهاي الطلعة عوضني عن تجاهلة الاسبوع اللي راح فرحت هواي رحنة اكلنة سمج وشبعنة ضحك اني اكل بالخاشوكة وهوة بيدة يباوع على  روحة ويحجي

علي : والله مكاني يمج غلط

نغم؛ ههههههه لا عادي اني هم اكل بايدي بس هسة ايدي تصير زفرة  ولان طالعين

علي : هاج ضوكي هاي اللكمة وادعيلي

نغم : بتسمت وقربت وجهي وكلني اللكمة جانت طيبة بس مركزت بيهة ركزت بي هوة عيونة اللي ضلت مركزة بعيوني ومتحركت عبالك شايف شي غريب كطعت هاللحضة لان ماتحمل  دنجت راسي

_ كولش طيبة

علي : شو بلة كولي كلش

نغم؛  شكلت على  هالكلمة ترا ما الفظ الواو هواي

علي : شايفي هواي من بغداد بس مثل لفضج الهة مختلف

نغم؛ يحجي ومبتسم وهايم بوجهي واني احس حتريت ماعرف شتصرف

بس حجيت واني انفض ايدي _ اروح واغسل واجي

________________

علي :  من يوم العقد وانة زهكان حسيت ستعجلت هواي وردت ابطل

بس ستغفرت الله ولهيت روحي بالشغل كل يوم اريد ادك عليهة احجي  وياها اتردد واذبة وانام

ماعرف شعور يكلي تقرب منهة وشعور يبعدني منضرهة ميفارك خيالي   ضليت اسبوع  اني اكابر بس  بالاخير صحيت على نفسي كلت خلاص هية مرتي

يعني اولها وتاليها تجي يمي وشححصل من حبي لام خزرة اشو هية راحت وختفت بس احلام تافهة جاي احلم

ثاني يوم

طلعت الصبح رحت لكليتهة وهاي اول مرا اطلع من شغلي خلصت عملية وطلعت شفتهة وهية تمشي جنهة عود ريحان احسهة تضوي بارجاء الكلية

خشمهة احمر من البرد  ابتسامتهة تجبرني اكزكز عليهة

ماعرف احسهة طفلة يمكن لان اشوفهة اكصر مني واصغر بالعمر بس احسهة هيج وصير مثل بنتي حتة احس اريد اكللهة تعالي بابا

تغدينة ومن دناكل ركزت بوجهة واحس ضعت تصرفاتي اني ستغربت منهة ضليت صافن بوجه سبحان الخلقهة

حسيتهة توترت وكامت واني صفنت يالله شديصير بية كل ما اشوفهة اتخبل اثكل يول شبييك كمت تراهق بهذت عمرك

رجعت تمشي بهدوء كمت غسلت اني ورجعت شربنة جاي ورجعتهة للبيت

ورحت لبيتنة واني احس مسطور من اللي ديصير مدري شبية ساعة افكر بذيج واحس متفارك خيالي من اكون وحدي

وبس اشوف نغم انثول اضل بس صافن بوجه شديصير بية خبلني جنس حوواء

_________________

نور : كاعدة وصافنة بالملزمة احس حبجي مداستوعب اي شي لمادة صعبة وحتجلطني

ضليت احاول تالي مفهمت كمت ونزلت جوة رحت لجدو _ جدو حيدر وين

الجد : ليش شتريدين منة

نور : اريدة يفهمني هاي المادة دك علي خلي يجي حباااب

الجد ؛ جاسر وين ليش

نور : جاسر اه ماعرف بس دكلي على حيدر _ جدو ياجاسر صدك تحجي انتة حفيدك حتى ميباوع بوجهي تنهدت وداريد احجي

جاسر : سلام عليكم

الجدد :  عليكم السلام اي هاي جاسر نطي خلي يشرحلج

جاسر : شكو

الجد : مادة مافاهمتهة اشرحهة الهة يلة جاعليمن صرت صيدلاني

نور : من نصير بمكان سوة احس كلبي يصير طبل حجة وهوة يكعد

جاسر : نطيني الملزمة

نور : مديتهة اله وكعدت بصفة ضل يكلب بيهة وندار علية وبدة يشرح واني ساعة عقلي وياه وساعة اهيم بصوتة وعيونة

احس نثولت بس بالاخير لكفني وحجة بصوت ناصي

جاسر : ركزي بالمادة مو بوجهي مو هاي اللي كتلتي روحج عليهة

نور : دنجت راسي بخيبة ودمعتي صارت بطارف عيني جريت الملزمة وكمت من يمة صعدت فوك

ونمت على الجرباية وحطيت راسي بالمخدة امنع شهكاتي تطلع

عبالة فرحانة عبالة مرتاحة والله كل ليلة اشبع بجي واتاذة بكل لحضة اشوفة بيهة يتجاهلني

جنت مفكرة رح يرضة بس بعد ما مرت سنين  بس طلعت غلطانة

نمت واني عيوني ما نشفت مثل كل يوم

يتبع.....

__________________

اتمنى يعجبكم البارت 💕

انتضروني بارت جديد 💕

#الكاتبة : yaqeen. Hassan
#مـلاك _ الـشيـخ _ جـراح