رواية ملحمة .. إرث سليمان الفصل الرابع والأربعون 44 - بقلم Hend_AlBoor

و ان كـان شـمـوخ كـبـريـائـي زبـيـدي
فـ الـهـيـبـة هـيـبـة دايـنـيـة

يمامة : درت ع ادارة المعلمات بالباب واكف .. مليك

مازن : يلا امشي شبيج تيبستي

ست مها ( 33 سنو سمراء بعيون بنية ذات قامة طويلة و جسم نحيل نسبيا)

: اهلاااا و سهلااا و اخيرااا معلمة

يمامة بابتسامة: السلام عليكم 

دقيقه و اختفى ..

ست مها : و عليكم السلام عيوني اتفضلي اكعدي اكعدي

مازن : يمامة اروح لو انتظرج .. شوفي اذا ماكو خط حتى ابقى ماكدر اعوفج

ست مها : اي عيوني اكو خط .. اطمن هي بامان يمنا

مازن : مشكورة .. يلا اروح محتاجة شي

يمامة : اشلون راح تروح خوما مشي

مازن : لا المعلم راح يوصلني للشارع

يمامة : تمام دير بالك ع نفسك ..

مازن : ان شاء الله .. مع السلامة

يمامة : بحفظ الله

ست مها : كمت اباوع ع ايدها ماكو لا حلقه خطوبة و لا زواج

الله يديم محبتكم عيني اي حقه يخاف عليج لعد اشكد يحبج

يمامة بابتسامة : آمين بس ترا اخوية و ابن خالي ربيت وياهم

ست مها تضحك : صددك ديلا و اني عبالي حبيبج .. اقدملج نفسي مها معلمة عربي

يمامة : اتشرفت بيج اني يمامة اختصاصي حاسبات

ست مها : الي الشرف تسلمين .. حلوو هسة تفرح بيج هجورة .. اكول

شعجب رابية ابيت خالج وين اهلج لو كاعدين ابيت واحد

يمامة : ابوية و امي انطوج عمرهم من اني صغيرة فخالي اخذني

ست مها : اوووي عيوني الله يرحمهم اووف اسفة والله

يمامة : عادي .. كلنا نموت

ست مها : اشلون الله يجازي لخالج و له الجنة لان كفل يتيمة

يمامة : الله يرحمه الحمدلله

ست مها : يبوو همين ميت و وين رحتي

يمامة : بقيت يمهم مرة خالي مو من هذا النوع يعني تعتبرني مثل بنتها

ست مها : الله يوفقها و يجازيها الجنة وج عيني نادرا اكو هيج ناس

يمامة : الدنيا بعدها بخير .. لمحت قرينها ظهر مالفتت نظره الي بقيت مركزة وياها

قرين مها : اشلونها صاحبتك

القرين : احسنلك متعرف

قرين مها : ليش خير من يا نوع من بني ادم

القرين : نوع ميخطر ع بال الخلفوك

ست مها : انتي شجااابج هنا شورطج

يمامة : يا ليش؟

ست مها : وج عيني ورا الشمس بس تدرين الحلو بيها المدير وردة متساهل و طلابها مو هواي

قرين مها : لك ليش شبيها غير افتهم

القرين : مابيها مابيها طبيعية بس حل عني ياخه

قرين مها : مثل اليمي كالعادة من تسولف تنسى الامة و تسطرني سطر ..

يمامة : كولشي يهون الحمدلله طلع تعيني ميهم بيعده او لا

ست مها : اي صح الحمدلله اكو ناس تتمنى التعين .. بيش الساعه؟؟

تباوع ع ساعتها و تطفر ..

يبووو الجرررس اخذتني السوالف ..

تركض و تدك الجرس الكهربائي و ترجع بالباب

همزين اكو كهرباء .. كومي شكوو كاعده كومي اشوفج الزعاطيط

يمامة : كمت طلعت .. وكفت مصدومة ..

ست مها : شنو رائيج ترا قليلين

يمامة بنبرة باكية : يااا قليلييين

ست مها : هااا صدك جذب

يمامة : اباوع عليهم هم و القرناء الساحة نمل نمل ماكو محط رجل ..

لا لا اقصد وكحين كولش

ست مها : يمعودة لو شايفه غير مدارس كل صف 60 طالب 70 كولي يالله

يمامة : الحمدلله ..

تلاميذ : معلمة جديدة معلمة جديدة ..

يمامة : صارو نمل كبالنا واكفين و يباوعون

ست مها : امشي لياكلوج راح يضلون هيج لحد ما تعتگين بنظرهم

يمامة ضاحكة : خطية

ست هاجر ( 29 سنة بيضة بعيون سود طويلة القامة بجسد ممتلئ نسبيا)  : هاا اجتنا معلمة

ست مها : وج اييي بالخير علينا .. اقدملج يمامة

ست هاجر : يا اهلا و سهلا اتشرفنا

يمامة : انتبهت ع مها باستغراب اني مكلت اسمي ..
الي الشرف عيوني تسلمين

القرين : مازن كاله كدامها لو نسيتي

يمامة تحدث عقلها : اها همزين بيك فايده

ست هاجر : اهم شي اختصاصها شنو ؟

يمامة : حاسبات

ست هاجر : وجججج اييييييي و اخيرااااا الفرررج

تضحك مها : مو كلتلج راح تفرح عيني هاجر رياضيات و كل المدرسة عليها راح تتقاسمن الحصص

ست هاجر : هلكت تدرين .. الله جابج عيوني

يمامة : بقيت اتمضحك و اني كولشي ممفتهمة

الحمدلله

ست مها : المهم عيوني ديري بالج تنطين عين للتلاميذ ترا ياكلوج

يمامة : اشلون

ست مها : يبقون هادئين و مستغربين منج ايام وراها اذا شافوج لينة و سهله بعد متكدرين تسيطرين ع الصف

يمامة : لعد خوما اكتلهم

ست هاجر : عيني هذولا مينكدرهم لو تطبين مسلحة فالكتل انسي

ست مها : لاا خطية مو كتل اسمعي مني .. خليج شديدة وياهم و لينة كسر و جبر .. الطفل مينضبط الا هيج و خصوصا هذولا عرب امهاتهم ميديرن بال الهم من المدرسة للشارع و من الشارع للمدرسة

يمامة : زين ليش

ست مها : و اشمدريني بين قوسين هاي المدرسة بالنسبة الهم حضانة تخلصينهم من جهالهم نص يوم و الباقي يتكفل بي الشارع

يمامة : يعني مستوياتهم

ست هاجر : تـ لـ ف .. احنا الـ علينا كدام الله نأدي واجبنا الـ ميفيد ويا شنسويله .. يمامة اذا الطالب مايتابعو اهله يجيج ناسي كولشي ثاني يوم و بهيج و لا عبالك انتي مسوية شي

يمامة : نعيدله الدرس

ست مها : و همين يرجع ثاني يوم ناسي خوما تضلين تعيدين الدرس طوب السنة .. بس اكو بيهم شطار اهاليهم تعبانين عليهم وج عيني هذولا الـ يهدوؤن اعصابي

يمامة : بقيت صافنة بس متحمسة للدروس ..

استاذ صالح ( 38 سنة اسمر بعيون بنية و شعر اسود ببعض الشيب طويل القامة نحيل الجسد )

السلام عليكم ..

المعلمات : وعليكم السلام ..

استاذ صالح : المدير راح يسوي اجتماع .. بس همتجن ويايا نحل الطلاب

ست مها : اس عيني ليش لا .. يلا يلا

تركض ع يمامة و تجرها من ايدها

كومي اشبيج صافنة ويانا تدريب اولي

يمامة : رحت وياهم وكف ع صف الرابع مجان عليهم احد اول مطبيت صاح واحد

قيااااام

الكل : عاش العراق

جلووووس

يحيى الووووطن

يمامة : احس نطرشت هسة هم يحييون القرنا ليش يصيحون وياهم

القرين : عايشين الدور انتو .. اكعععععد انت وياااه

يمامة : كام يصيح عليهم .. من يمي فزيت انت عشت الدور مو هم 

القرين : لعد مو معلم

يمامة : ابتسمت الهم

السلام عليكم

الكل : وعليكم السلام

يمامة : لطفاء ..

ست مها : يلا ست يمامة طلعيهم بالسرة ..

يمامة : كومت اول سرة

يلا قطار قطار واحد ورا الثاني ..

طلعوا يمشون بالسرا ورا صف الثالث ..

استاذ صلاح : ويااا الحاااايط .. لككك لتركض  لتوووكع

يمامة : صارت هدوء المدرسة .. رحنا كعدنا بالادارة حول ميز جبير بدا المدير يحجي الظاهر احنا تلاثة اتعينا بيها اني و معلمين اثنين واحد علوم و واحد انكليزي .. كملنا و اجه الخط طلعنا وصلني الخط لراس الشارع ..

مشيت حذيفة اباب بيتهم مبين هستوه راجع نزل من السيارة كام يباوع من فتت من يمة دنگت راسي و طبيت للبيت احس جسمي منهك .. گبل كعدت بالمطبخ مابية اصعد الدرج

روش : المنزل بدونك خالي فتاتي .. سحقا للتعليم

يمامة : باوعت عليه

ناقصني هذا الوجه

روش يتفحص وجهه : ما به وجهي .. غسلته منذ مدة لا زال بريقه ساطع

يمامة : الله يخليك حل عني متكسرررة

روش يبتسم بقوة و يهز راسه هياما بها

: جعلني ضلج

يمامة : مكفيني قريني ناقصني انت تصير ضلي

روش : انني خفيف الظل عزيزتي .. و انا مؤمن بيك ايمانا كامل
دنهش : بمن تؤمن ايها الاخرق

روش : بخالتك الشگرة .. ليش تجي باوقات ممناسبة المفروض من تشوفنا بخلوة تحترم هالشي و تنسحب

دنهش : يا خلوة هاي و قرينها بالنص

روش : لم يزعجنا كـ انت انه قرين محترم

القرين : مو جنت شيطان منافق؟

روش : من ..؟ انت .. كلا

القرين : انت هيج تكول دائما

روش : انسى ذلك يا رجل

يمامة : كافي لخاطر الله .. راسي طبل

روش : استطيع جعله ساكنا فقط بلمسة اسمحي لي

القرين : تستاهلين

يمامة : هفففففف ياااالله .. وين خالتي

يوليس يدخل للمطبخ : انها نائمة ..

ينتبه روش و دنهش للطافته في الرد .. ينظر اليهما ثم يقول بنبرة شديدة

مالذي تريدينه منها .. ما وراءك من مصائب

تدخل غدير للبيت ثم تدخل للمطبخ رافعة يديها

يمااااامتييييي .. اشكد فرحااانة ياااالله و اني اخيرا شفت ناس

يمامة : بالخير ..

ظهر قرينها جان ينبطح ع وجهه و يفتح ايدينه

قرين غدير : الاطفال لم يهدؤوا ابدا .. انهم وحوش صغيرة .. اموت ان استمر هذا الوضع

غدير : اوووويلي اتمنيت ما احل

يمامة : ولج عيني شدتحجين تعب و هاي بعدني مماخذه دروس

غدير : عادي اني همين جسمي تعب من الطريق لان طويل .. صددك وين طلعت مدرستج

يمامة : شايفة الشمس ..

غدير : اي ..

يمامة : وراها

غدير : عزا هلكد بعيده

يمامة : ساعه و نص بالسيارة كاعده

غدير : ياااا همزين مصارت بيج بواسير

يمامة : رفعت راسي عليها

امشي امشي بدلي يلا

بهمس ويا نفسها .. متفرق عنهم شي بس ع بشرية

طبيت للغرفة بدلت و مددت ع الجرباية .. هلكد ما تعبت غفيت راسا .. كعدت قريب المغرب .. رحت ع غدير طبيت غرفتها

ها شدتسوين

غدير : طبت راسها مكفوش ..

عزا هاي شنو جنتي تقاتلين لو نايمة

يمامة : اففف يمعودة اكره كعدت المغرب تخنگني ..

غدير : يا صف انطوج

يمامة : ثالث و انتي؟

غدير : رابع و خامس زين انتي بس ثالث لازم هواي معلمين

يمامة : لا بس لان ارشاد

غدير : هاا .. مدرستج مختلطة

يمامة : اي و انتي

غدير : لا بس بنات و الدوام الثاني ولد

يمامة : شدتسوين؟

غدير : داكتب خطة سنوية

نزلت راسها ع فراشي و لزمته

يمامة : يووو نسيت سالفة الخطة

غدير : مو اني دزيت الج و الي سجلين .. هاج

يمامة : رفعت راسي طلعتلي من المجر سجل جبير ..

عااااشت ايدج ..

غدير : تدللين .. تعرفين تخططين الخطة

يمامة : باوعت ع دفترها

لا .. انتي منين تعرفين

غدير : من عمو قوقل

يمامة : دخلي اصلي قبل لا اياذن المغرب و اجي فهميني عليها

غدير : تمام حب

في جزيرة التنين مملكة الرياح يقف مليك ع اطراف المملكة حيث يطل ع الغابات و تحته الغيوم و النسور التي تدور .. يقف خلفه عمر

عمر : لا اراك تذهب لعالم الانس هذه الايام

مليك : كنت هناك صباحا

عمر : فقط

مليك : عمر لا اريد ان ءأذي احدا .. و لا سيما بني ادم

عمر : و لم تؤذي؟

مليك : لا اطيق اقتراب بشري منها .. هل تفهم معنى لا اطيق؟

عمر : انك لا تفعل مليك

مليك : كنت .. الان انا عاشقا

عمر : و هل كان سبب حديثها معك  انها ظنت بلا دراية

مليك : لكنها محقة .. نعم قد اوقفت حادثا لكني كنت اتمنى اذية ذلك الادمي .. تمنيت لو لم تكن معه في ذلك اليوم

عمر : مليك؟؟!

مليك يلتفت ع عمر  : انه ايقضت ذلك الوحش بداخلي .. اما انا فاحاول السيطرة عليه بابتعادي

عمر : يا الهي ..

يهبط ابراهام مسرعا باتجاههما : انتما هنا ايها السيدان

عمر : ماذا هناك نبرة صوتك لا تبشر بالخير

ابراهام : نعم .. لقد غاروا ع قوافلنا لم يرجع منهم سوى اثنان و اجسادهم ممزقة بالجروح

يرمي مليك جسدها للخلف من فوق المملكة ليهبط ثم تتحور جناحاه و يطير

عمر : سحقااا .. سيقدم ع حماقة ذلك المتهور

يهبطان خلفه عمر و ابراهام ..

يخرج اودوم من القصر و هو يصرخ بالاومار بصوت مرتفع خلفه القائد دوماط .. يهبط مليك امامها ع مسافه و يسير باتجاهه

مليك : الم اخبرك بان لان ترسل القوفل ايها الملك

اودوم يقف عندما يصل مليك اليه

: و هل تريد ان نسجن داخل قوقعات التحصين تلك

مليك : اعلم انه مبتغاه لكن لماذا نغامر بارواحنا

اودوم : الحل ايها الملك الصغير ..؟ لا نتعبد لا نسافر ..!!؟

مليك : هل علم جماعة البون بذلك

اودوم : ارسلت لهم خطابا .. ليت رسولي يصل عالم البشر سالما

يمامة : مرة ايام ع الدوام .. اتأقلمت حسيت حياتي رجعت طبيعية نوعا ما ..

ست مها : كانو استاذ ساري عنده دبگ هنا

ست هاجر : ما فهمت

ست مها تاشر بعيونها ع يمامة تضحك ست هاجر ..

ست هاجر : ملتهية تصحح يمامة و لا تدري شكو بالدنيا

يمامة : رفعت راسي عن الدفاتر

شسوي دالحك حتى اوزعهن الهم قبل الحلة

ست مها : لتغلسين

يمامة : لا والله شنو

ست مها : استاذ ساري هواه يمج

يمامة : لاا يمعودة

ست مها : يا لا غير حجى ويايا

يمامة : بشنو

ست مها : كم سؤال عنج و عن اهلج و كذا

يمامة : ليش

ست مها : يعني ليش برائيج ولد اعزب يسأل ع بنية عزبة

يمامة : همم

ست مها : شنو رائيج بي

يمامة : من يا ناحية

ست مها : رجل .. زواج

يمامة : مادري ممنتبهتله بس ممفكرة بالزواج هسة

ست مها : انتبهي بعد انتبهي .. اشوكت تفكرين لعد هايهية كبرتي و رجال اخلاق و جمال و حسب بعد شكو

ست هاجر : و معلم وياج يعني راحة بال

يمامة : دك الجرس كمت ..

والله مادري بعد

ست مها : لا يا ام راس المحجر

استاذ علي : يلا عيني معلمات عدجن دروس

ست هاجر : اليوم مراقب الساحة عليييي يمةةةة المنضبط

استاذ علي يضحك : شعبالجن يابة

يمامة : طلعت من الادارة شايله الدفاتر ويايا .. الـ لاحظته ع ساري يوكف يكعد صفي لما اجي اعتبرت الموضوع عادي .. الظاهر مو عادي

ساري ( 27 سنة حنطاوي بعيون سود شعر رأس اسود .. ملتحي الوجه .. طويل القامه .. بجسد معتدل .. معلم انكليزي) 

بلاا كلام ااابني

يمامة : طبيت للصف جان واكف .. طلع يركض بدون ما يحجي .. حيوني الطلاب و كعدوا .. خليت الدفاتر و كمت ارتب السبورة .. و بدت رحمة الله كالعاده الهوسة و الوكاحة .. و طبعا كلهن ضعف بوجود القرناء .. راسي انسطر .. فعلا بس اول ايام عقال بعدين بينوا .. درت عليهم

اقطعععععع الكلااااام

كلهم انخرسوا .. شفت واحد ضرب اليمه

ليش تضرربه ..؟

عمار (تلميذ ): ست شك كتابي

يمامة : عندي طالب من ذوي الاحتياجات الخاصة مختل عقليا بس لان ابن معلم يعبروا ..

عوفه معليك بي ..

عمار : كوميني من يمه موتني

يمامة : هو مختل و كاعد اول رحلة حولته رابع رحلة وحده ..

رجعت للدرس اشرح و اسكت بيهم نص الدرس اشرح و نصه اكعد اسكت بلا كلام ..

استاذ سلمان ( كبير بالسن من العرب )  : السلام عليكم ست

يمامة :  مانتبهت الا من الطلاي كامو التفتت ع الباب

و عليكم السلام ..

استاذ سلمان : وينه الذيب وينه ..

يمامة : اعرف ابنه المختل عقليا .. ابتسمت

استاذ سلمان : هاي شنو ست هاي ليش مكعدته رابع رحلة

يمامة : استاذ ماكو فرق

استاذ سلمان : لا لا جان كاعد اول رحلة اني كعدته ..

يمامة : طب كومه ديكعده اول رحلة

استاذ سلمان .. اني مرشده الصف و اني معلمتهم محد له حق يتصرف بطلابي داخل الصف

استاذ سلمان : هذا ابني الذيب

يمامة : ابنك خارج المدرسة .. هنا هذا تلميذي

اشرت بيدي ع الباب ..

ممكن تتفضل

عاف ابنه و طلع زعلان ..

القرين : عفتي مناطح الجن كمتي تناطحين بشر

يمامة : جلوس ..

خلص الدوام صعدنا بالخط .. حسيت كم مرة السايق يضايقني بس تجاهلت الفكرة .. تكعد يمي مها .. مرات ارجع راسي ع الكشن و انام ..

ست مها : صارلج هواي من داومتي اشعجب متسولفين .. اول ايام كلنا بعدها جديدة

يمامة : والله راسي طبل يصير بنهاية الدوام ماتحمل احجي حرف

ست مها : حقج هو منو يجرع الثالث وكاحة الدنيا كلها بيهم .. بس حتى حسام حجى

يمامة : شحجى؟

ست مها : كال گالبه وجهها و متسلم

يمامة : ليش مو من داصعد للخط اسلم

ست مها : كلناله بعد اشمدريني

يمامة بغضب : ناقصني حسام

القرين : هه ههه اشتم ريحة مصايب

ست مها : اهدي معليج منه خلي يولي

يمامة : درت وجهي ع الجامة .. الظاهر مضايقته الي مو شك من يباوع بالمراية و من يوصلني يتقصد يسأل يريد يحجيني وياه .. بسيطة حسام افندي .. وصلني لشارعنا نزلت و ركعت باب السيارة حيل ..

ثاني يوم الصبح بـ 7 دكتلي مها طلعت امشي هو براس الشارع شفته نزل من الخط وكف يم الباب .. فتت من يمه و صعدت كأنما ماشوفه هو يوزع ابتسامات .. خلص الدوام ع خير ماحس بالوقت لان اربع دروس اني بالصف مرات حتى بالفرصه ماطلع ..

ست مها : استاذ ساري دكيت ع حسام يلا بعد خمس دقايق نحل الطلاب اشوكت يجينا

استاذ ساري : دكيتله كال اني بالطريق ..

ست مها بصوت مرتفع : ست يمااامة هيئي الطلااب

يمامة : اشرتلها بيدي و كلتلهم البسوا جنطكم .. حليناهم و طلعنا

ست مها : اليوم حسام بس ينفخ عبالك حية

يمامة : خير

ست مها : اشمدريني منو مضوجه ..

يمامة : ينزولون قبلنا ست هاجر و تلث معلمين و يبقى معلم و مها وراية ينزلون .. وصلنا للشارع العام الي يودي لشارعنا جان يوكف

حسام : (24 سنة اسمر البشرة بعيون بنية واسعه ..  طويل القامة .. نحيل الحسد .. سائق الخط)  بصوت مرتفع

يلااااا انزليييي

يمامة : استغربت مو هنا انزل .. انتبهت عليه اخاف مو علية لان عاط

حسام : متنزليييين شبيييج

يمامة : بس مو هنا انزل اني

حسام : هذااا العنددددي زززززين

يمامة : احس سخنت من القهر بالموت لزمت دموعي لان يصيح علية كدامهم و ماعرف شارد .. فتحت الباب جان تنركع لان السيارة مايلة .. نزلت داسدها

حسام : بااااااعي لجججج لتركعيهاااا لاااا انزززل اعررررف شسوووي بيييييج

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
حـمـلـة
الـفـن لـيـس احـتـكـاراً
و ذلك بـدعـم كـل انـسـان خـط قلـمـه لـيـبـدع
فـ كـمـا بـدؤوا مـن الـصـفـر بـدءنـا

اقـرؤوا قـصـة قـلـوب مـن عـاج
للـكـاتـبـة MARYAM_alhsyny

ادعـمـوا كـل مبـدع فـلا تعـلم الـسـعـادة الـتـي تنـالك لانـك اسـعـدت كـاتـب بـدعـمـك