رواية من اجل حفيدتي الفصل الحادي عشر 11 - بقلم هاجر خالد

رواية من اجل حفيدتي الفصل الحادي عشر11 مازن بصدمه: إيه دا!!! حسن: في إيه!! انت تعرف الراجل دا ؟ مازن: لأ ، بس وانا نازل من عند هارون النهارده ، شوفت الراجل دا طالع مع عاصم الجيار الشركه. حسن: يعني هارون طلع مبيلعبش لوحده . مازن: كدا المفروض نركز مع عاصم كمان مش هارون بس .

حسن: لا متشغلش بالك بعاصم كدا كدا هو مش هيعرف يتحرك غير بمساعدة هارون، اهم حاجه تركز مع هارون الفتره دي وتحاول تمسك عليه اي حاجه من البلاوي اللي بيعملها. مازن: تمام متقلقش ، هارون قريب هيقع إن شاء الله. حسن: إن شاء الله يا مازن....... أنا همشي وهبقا اتابع معاك بقا. مازن: تمام ، مع السلامه. حسن: سلام . ( نزل حسن من عند مازن وروح على البيت كانت الساعه 9 ، لقا مامته وهاجر قاعدين بيتفرجو على التلفزيون و..........

دخل حسن وقال : السلام عليكم. زينب وهاجر : وعليكم السلام. زينب: ادخل غير هدومك عقبال ما احضرلك الاكل . حسن: لا يا ماما مش جعان كلت مع مازن . زينب: طب هعمل شاي اعملك معايا . حسن: ياريت . ـ راحت زينب تعمل شاي وحسن راح قعد على الكنبه بتعب فقالت هاجر : مالك ياحسن. حسن: انا تمام بس اليوم كان طويل شويه . هاجر: معلش إني لغبطلك الدنيا النهارده. حسن: انتي عبيطه يابنتي ، مفيش لغبطه ولا حاجه المهم إنك بخير .

هاجر: شكرًا ، انا لما اجي معاك تاني ها....... قاطعها حسن وقال : لأ ما انتِ مش هتيجي معايا الشركه تاني ، على الأقل الفتره دي. هاجر: ليه؟!! حسن: كدا يا هاجر قللي خروج الفتره دي ، وحتى لما تنزلي لازم يكون في حد معاكي. هاجر بعصبيه : انا مش فاهمه في ايه بجد ، انتم من ساعة مافوقت من الحادثه وانتم عمالين تقوليلي كدا ، انا زهقت على فكره ، قولتلك قبل كدا ياحسن لو مخبيين حاجه عليا قولو بدل ما الخنقه دي . ـ حسن بعصبيه

هو كمان وصوتهم بدأ يعلى : والله واحنا عشان خايفين عليكي نبقا بنخنقك!! هاجر: ايه مبرر الخوف الزياده دا انا مش عيله صغيره ، وانتم مستغلين إني مش فاكره حاجه وبتخبو عليا . حسن: والله!! طب تمام ، عاوزه تعرفي إيه.....

عاوزه تعرفي إننا بنتهدد بيكي ، عاوزه تعرفي إن الحادثه بتاعتك كانت بفعل فاعل وإن كان زمانك مش موجوده معانا دلوقتي ، وإننا في مساومه بين إننا ندمر كل شغلنا اللي جدو بقاله سنين بيبني فيه ولا إنك تبقي علاطول معرضه للخطر ، دا اللي احنا مخبينو عليكي عشان متبقيش خايفه وتتعبي ، ها سكتي ليه دلوقتي . ـ زينب كانت واقفه جمبهم وبتسمع كل الكلام دا ومش عارفه تهدي حسن ، وهاجر كانت دموعها نازله طول ماهي

بتسمع الكلام دا فقالت: انا...... انا اسفه ، بس كان لازم تفهموني كل دا ، متخبوش عليا . حسن بصوت عالي : خبينا عليكي عشان نحميكي...... لانك لما تعرفي هتبقي قلقانه ، ولأنك غبيه مش هتعرفي تحمي نفسك ودايما بتوقعي نفسك في مشاكل ومش بتعرفي تتصرفي وبتجري عليا أو على جدو ، عرفتي ليه خبينا عليكي بقا. ـ هاجر وهي بتمسح

دموعها وبتقوم عشان تمشي : عرفت ياحسن وشكرا إنك كنت خايف عليا ، اسفه اني متقله عليك وغبيه زي ما انت بتقول ، اوعدك إني بعد كدا هعتمد على نفسي ومش هشيلك هم مشاكلي تاني ، انا ماشيه ياخالتو. ـ حسن بسرعه قبل ماهاجر تخرج من الشقه: هاجر أنا آسف ماكنش قصدي اقول دا أنا..... قاطعته هاجر وقالت: متتاسفش ياحسن انت مقولتش حاجه غلط. زينب : استني يا هاجر مش هتمشي وانتِ زعلانه كدا ياحبيبتي.

هاجر: معلش ياخالتو انا تعبانه وعاوزه انام..... تصبحو على خير. زينب : يابنتي استني بس. مردتش هاجر وقفلت الباب ومشيت دخلت شقتها فقالت زينب بلوم لحسن : عاجبك اللي حصل دا؟! حسن: مش عاجبني ياماما ومش قادر حد يلومني انا عارف إني غلطت ، بس انا كنت متعصب ومخنوق ، فكرة إني مش عارف احميها موتراني اوي وهي مش فاهمه إننا خايفين عليها .

زينب : لأ ياحسن هي فاهمه انكم خايفين عليها ، بس برضو هي ليها حق تفهم اللي بيحصل يابني ، بس مش بالطريقه بتاعتك دي . حسن: هصلحها يا ماما لاني عارف إني غلطت ، بكرا هصالحها لأنها دلوقتي مش هترضى تكلمني. زينب : بكرا اتكلم معاها ، انت عارف هاجر بتتصالح بسرعه . حسن: حاضر ، انا هقوم انام لأني تعبت النهارده. زينب: ماشي ياحبيبي...... اه صحيح يا حسن خالك جاي بكرا من السفر وهيقعد اسبوع كدا ولا حاجه في الشقه اللي فوقينا .

حسن: طبعًا هيجي هو والواد عمر الرخم دا. زينب : عيب ياحسن متقولش كدا على إبن خالك ، وبعدين اشمعنا عمر اللي مش بتبقا طايقه كدا ، دا انتو نفس السن حتى . حسن: عيل رخم مش بطيقه وكمان بيقعد يتمحلس لهاجر وانا مش بحب كدا. زينب : اههه قول كدا بقا. حسن بتهرب : انا داخل انام ياماما داخل انااام. زينب : ماشي اهرب ياخويا اهرب.

( دخل حسن اوضته وقعد شويه وبعد فتره صغيره نام، وعند هاجر كانت زعلانه وبتعيط وكانت فعلًا خايفه وبعد تفكير وعياط غلبها النوم و....... ...................................................................... " يوم جديد" ـ بيخبط الجد سليم على شقة زينب فابيفتحله حسن وبيقول بنوم: صباح الخير يا جدو في حد يصحي حد دلوقتي. الجد سليم: دلوقتي ايه الساعه 1...... وبعدين يلا فوق كدا عشان تروح تجيبلي شويه طلبات.

حسن : طلبات ايه ياجدو انا عاوز انام ، وبعدين ماترن على السوبر ماركت يجيبلك اللي انت عاوزوا. الجد سليم: لا انا بحب اجيب الحاجه بنفسي ، يلا خد ورقة الطلبات دي وروح هاتها يلا بلاش لكاعه. حسن بتأفف: حاضر ياجدو حاضر. "عند هاجر وزينب في المطبخ" هاجر: انا اللي هعمل المكرونه البشاميل ياخالتو . زينب : ماشي ياحبيبتي ، وانا هعمل هكمل لف ورق العنب بعدها احط الفراخ في الفرن . هاجر: okay. دخل الجد سليم المطبخ

وقال وهو بيشم رائحة الاكل: تسلم ايدكم الريحه جباره..... دا عبدالله ( خال هاجر وحسن) شكله مش هيفكر يسيب مصر تاني. زينب : ياريت يابابا ينوي يقعد علاطول. هاجر: هو خالو بقاله كتير مسافر ولا ايه. الجد سليم: ايوا من عشر سنين كنتي لسه صغير..... بس كان علاطول يجي في الإجازات. هاجر: متحمسه اتعرف عليه . زينب : لما كنتي صغيره كنتي علاطول تحبي تقعدي مع خالك عبدالله وهو كان بيحبك اوي وبعتبرك بنته لأنه معندوش بنات. هاجر: بجد .

الجد سليم: ايوا عندو اربع ولاد بس . هاجر بهزار : لا ربنا يكون في عونه بقا. ـ قعدو يتكلمو شويه وهما بيعملو الاكل لغاية محسن جه ودخلهم المطبخ : انا جبت كل الطلبات اهو . الجد سليم: جدع ياحسن، انا هقعد اتسلى واعمل سلطة الفواكه . هاجر: okay يا جدو وانا خلاص خلصت المكرونه هحطها في الفرن..... هو خالو هيجي امتى . زينب : يعني ساعتين كدا وهتلاقيه جيه. ـ راح حسن ناحية هاجر لأنها باين انها مضايقه منه وقال: أنا آسف.

هاجر من غير ماتبصله : ماشي. حسن: ايه يابت التناحه دي هو إيه اللي ماشي..... بقولك اسف. هاجر: ايوا المفروض اعمل إيه يعني. ـ بصلها حسن وقال بغيظ وهو بياكل من البطاطس اللي على الرخامه: ماتعمليش يا هاجر ماتعمليش. هاجر: سيب البطاطس يالا بطل طفاسه. حسن: خليكي في حالك. هاجر: ياخالتو شوفي إبنك. زينب : مترخمش عليها يا حسن. حسن: والله ماعملت حاجه. ـ بصتله هاجر وضحكت باستفزاز وقالت: يلا طرقنا بقا.

حسن: هاجر بجد متزعليش مكنتش اقصد اقول كدا والله. هاجر: اممم ماشي خلاص سامحتك. زينب من وراهم بتقول : مش بقولك بتتصالح بسرعه. هاجر: اعمل إيه ياخالتو بقا صعب عليا. حسن: والله!! هاجر: ايوا. ( حسن صالح هاجر ، ووقف معاهم في المطبخ يساعدهم وبعد وقت مش كبير خلصه الاكل وجهزو عشان يستقبلو عبدالله ، وبعد فعلا ساعتين زي مازينب قالت كان وصل و....... الجد سليم: افتح الباب ياحسن شكل خالك جه .