رواية من فجر ديسمبر الفصل العاشر 10 - بقلم Zoka 🌷

من فجـر ديـسمـبر
🍁
🍁
من بعد ماغسلت راسي رجعت لفراشي نمت كبل وجيت اكعد
الصبح مابيه حيل جسمي متكسر ضليت نايم للظهر وصوت
هالعتوي فوك راسي اعاين مامش شي هنايه ولا انه احلم
جا منين هالصوت ؟؟؟ انه اغمض عيني ويصيرهالصوت
براسي يدوي تالي كمت بيه مابيه طلعت للحديقه كعدت بالكاع
وراسي بين ايديه واريد اخلصن منه ماكو هلكت راسي سطرني
اهجس كلبي يدك براسي وماسمعن شي غير هالدوي كرهني
روحي ... تالي رديت كمت تمددت بالحجره وماحسيت الا عله
صوت عمي يمي وهوه يكعدني ...
فتحت عيني بتعب ليه ومابيه احجي ..

- شمالك بويه جنك مريض !! اخذك دكتور شنهي علتك فهمني
- تعباااان عمي
- شيوجعك كِلي
- راسي مسطور
- اشو جسمك نار غادي كوم اخذك الدكتور يله
- لا لا خلني انامن مابيه حيل
- بويه شنهي تنام نرد من الدكتور ونام كوم جسمك غادي جمره
من البارحه انته عله هالنومه هاي صار الليل وانته لا اكل ولا شرب
- عمي رحمه لاهلك خلني مابيه حيل احركن رجل
- استغفر الله ..... وينج يامره تعاي ليه
- ها عيني ابو بسام كول
- الولد مصخن سويله كمادات جيبيله شي ياكله
- يا سوده عليه اني كلت عطله ونايم ماردت اكعده ماعبالي مريض اسم الله الرحمن عليك يمه شهاب
- تحركي يلا ياامره
- اي اي صار

انه جنت اون واهجس عيني تبوخ وزردومي ياابس .. اجتي
مرت عمي انطتني شراب شربته وشربت الماي ورديت نمت
وهيه تغسل برجلي وايدي ووجهي وكل ساع تبلل وصله وتحطهه عله كصتي ... ضليت انه كل ساع انام وافز من اهجس الماي
عله جسمي ... تالي فزيت عله شي يم راسي حسيت نفس اكو يمي... فتحت عيني ولنهه ربى ..

- هااا مرتاحه بشوفتي هيج كتلج كفي عني عايني شرج شسوه
بيه ،،، اااااااه يمه من نعله عله صفحه الخلفوج ياصخمه كضيتي بيه .. انه شجابني عله سحاره مثلج مو جنت كاعد ومنجب بتركيه حضي هاااذ حضييي الاكشر فر بيه دهري وخلاني اجي لهيج
شكول .... خلصيني منج ربى خلصييييني لعنه صرتي بحياتي
لا بنومي ولا صحوتي تطلعين من هالبال الاكشر اطلعي مني
انه حتسودن

جنت احجي وانه اغمض وافتح اهجس عيني حاره لابفتحهه
ارتاح ولا بسدتهه ... عاد شفتهه هاديه كِلش وبس تعاينلي
تالي وانه مغمض هجست ايدهه عله وجهي نزلتهه من كصتي
عله عيني وضلت مخليتهه عله عيني ..جانت ايدهه بارده كلش
وانه عيني مبوخه ارتاحيت بيهه فما كتلهه وخري ولا شي
هيه بكيفهه وبهداوه نزلتهه وردت مسحت عله شعري مرتين
وانه ضليت مغمض وساكت هديت كلش بكربها مدري هيه بيهه
شي يبردني هَيج !! مدري انه اذوبن بلمستهه !!!!

شويه وهجست ايدهه عله معصمي وضغطت عليه وسحبت
عله الوريد ليفوك وردت نزلت .. تالي هجست شي حاد جرحني
عاينت ليهه نزلت ايدي وخلت الدم يسيل ..انه مادري شسكتني
هالساع هاللسان نبلع ... رديت غمضت وهيه تمسح بايدي
وتضغط عليهه لحد ماوكف الدم تالي رادت تكوم جلبت بايدهه
ورجعتهه لمكانهه وضليت لازم اصابعهه وهيه هاديه فرد نوب

حسيت الصبح عله صوت بسام وهوه يفتح بالكنتور فتحت عيني
وعاينتله يلبس رديت غمضت بس انه صاحي ... من هجسته
طلع فتحت عيني وكعدت عله حيلي .. تلمست راسي زين بارد
وجسمي زين بي حيل تذكرت ايدي عاينت مابيهه شي بس اكو
طين عليهه هاذ شجابه ؟؟؟ مسحته اريد اشوفن الجرح مامش
شي ... جا والصار ؟؟؟؟

كمت بدلت هدومي وطلعت غسلت وكبل للمطبخ عاينت عمتي
واكفه تكطع لحم ...
- صباح الخير عمه
- صباح النور شلونك يمه شون صرت
- الحمدلله زين عمه تعبتج وياي بارحه
- لا يمه شنو تعب وليدي انته
- الله يخليج اكولن عمه ربى وين
- توهه صعدت تشر الملابس
- هاا زين انه اروحن احاجيهه اريدنهه بسالفه
- خير ؟
- خير عمه خير من رخصتج

عفتهه وصعدت ليهه .. جانت تعصر بالهدوم وتنفض وتشر
اجيت ليهه ووكفت جدامهه ...
- ليش اجيتي البارحه
- شوكت
- من جنت نايم بالليل
- مااجيت
- لا اجيتي انه شفتج واذكر كلش زين شسويتي
- متوهم اني ماوصلتك ولا شفتك انته مريض ونايم اني شعندي
يمك ؟؟؟
- رببببى لاتجذبين قابل اجذب عيني
- شهاب هاي من كد ماتفكر بيه هيج تتخيل
- لاااااا انه ماتخيل انه اذكرن كلش زين شصار بالليل
زين اسألج هالطين شجابه لايدي هاا؟؟؟
- شمدريني ياطين شبيك
- انه صارلي يومين مطالع من الحجره شجاب الطين لايدي
الجرحتيهه البارحه فسري يله
- لا وصلتك ولاجرحتك
- انه مااجذب ربى انه مالي خلكج بالكوه اريدن اخلص منج
مادورلي سالفه حته اجلب بيج لجن هالشي مايتعدى بدون تفسير
زييين
- شهاب موكلتلي كفي عني وهاي عفتك بعد شتريد مني
- اريدن تحجيلي عليش جرحتي ايدي البارحه
- ياجرح شوفني
- مامش اثر للجرح عبن عليه طين
- تضحك عليه انته
- ربى احجي من صدك مااضحك عليج انه كعدت لكيت الطين
عله ايدي يابس وانه عاينتج بالليل رفعتي ونزلتي بالوريد وتالي
جرحتي ان ماشفت فحسيت واذكرهن كلش زين
- شهاااب هسه وين الجرح فهمني !!! زين اني شيجيبني يمك
بنص الليل مو بسام يمك شلون اجي !!!
- يعني ترديني اصدكج ؟
- طبعا صدك متوهم يجوز خربطه احلام او اي شي بس ماجيتك
- متاكده ماجيتي مو
- اي متاكده

عاينتلهه وهيه نظرتهه ثابته شككتني بنفسي تالي تذكرت ايدهه
من جريتهه وضليت كاض اصابيعهه ...
كربت ليهه وجريت ايدهه هي عكدت حواجبهه ورادت تحجي
اشرتلهه تسكت ... تلمست اصابيعهه نفس اللمسه قسم بالله
رديت حطيت ايدهه عله عيني نفس البروده تالي ضحكت
وهديتهه ....

- لو تقنعيني بالف حجه ماتنسيني بروده ايدج ونعومتهه
روحي يابت الناس انه اعرفن شلون الكه تفسير لليله البارحه

- عجيب انته
- بالعباس مامش عجيب غيرج
- اممم

دارت وجهه تريد تمشي كتلهه ...
- شكراً خلصتيني من هالعتوي وسحورتج هسه كفيتي عني
لجن انه ماكفن عنج ليوم اعرفن بي سرج

عاينتلي بنظرتهه صفح الجامده وتالي مشت ...  انه رغم مابالي
ميه سؤال لجن مرتاح بيه طاقه عجيبه راحه عله نشاط ...

نزلت تريكت وهيه تشرب حليب الفروله وتعاينلي وتتصفن
وانه اتبسم بوجهه وهيه تخنزر ...

ثاني يوم طلعت للشغل بالكهربائيات ويه بسام .. وهناك كعد
يقنعني احاجي نور ومارضيت ماعجبتني ابد ..
تالي رديت للبيت وهوه عنده غير شغله راح عليهه ....
اجيت اصيحن عليهه تسويلي غده ماتردلي تالي عفتهه ومشيت
رحت سبحت من طلعت لكيت عمتي حاطه الصينيه ....

اكلت ورحت نمت ماكعدت لتالي الليل عله دندنه بسام يم راسي
- وتااااالي شووون ماناااام
- ياهو يمك انته
- جم مره اكِلك انه اتسودن من صوت البسبسه هاااذ روح خابر
بره هاذ بيت شكبره عايفه وجاي فوك راسي
- هاي حجرتي انته اطلع والله يالله
- من كبر اللفك اي والله

عفته وطلعت رحت غسلت ع السنك وفتحت الثلاجه طلعتلي
شجم شغله اكليهن وتالي شفت ربى طلعت من حجره بسام
وهيه تأفف .. اجتي بالمطبخ وجان اكو كلاصين ع الكاونتر
شالتهن بعصبيه وخلتهن بالسنك واندارت علي وانه صافن عليهه

- شكو
- هه شبيج صايره نار
- معليك
- طبج مرض
- استغفر الله
- لا من صدك شجاج تكمزين هنا وهنايه
- عود هم حاسبه نفسي عندي اخوان بس للارصده يركضون
ركض للمحلات
- ههههههه علكيفج علكيفج كالبه اليوم عله اخوتج
- عوفني انته الثاني
- هيييي لتضلين تشمرين بحجيج
- اممم
- وسم هاج مدامج واكفه سويلي عشه
- ما سويلك
- عليش يمه ماتسوين
- اكلك شو جنك نسيت شسويت وياي يعني عبالك هيج عدت
اضربهه وتسكت وترجع تحاجيني عادي هيج عبالك مو
- حا شنهي يمه عوزج تتمزعلين
- اي ازعل اي وانته اصلا كلت لا توصلين يمي وفوكاهه
تكرهني وتضربني وتجي تعاي سويلي اكل وتالي تكلي انتي
شايله خشمج وعنوديه ومدري شلونج
- اكلج انتي جاي اطلعين عصبيتج بيه شني
- لااا ماطلع عصبيتي بيك بس هاي حقيقه مو هذا حجيك لو شنو
- اي حجيي
- اي بعد شكو
- لج صخمه انه ضربتج لين انتي ماتحترمين لسانج اطول منج
وانه ماكرهج انتي تنرفزيني تخلين اعصابي تفور صيري هاديه
وشوفي شلون ماحترمج واداريج
- لاااا والله اصير هاديه لعد ياهو اليجي يكلي شكد بارده
وعندج الحجي بفلوس هناا ماعجبك احجي هم ماعجبك
- انتي ماتعرفين تصرفين
- اممم
- هاذ اسلوبج الي ينرفز ويجيب الطلايب
- اي ويخليك تمد ايدك عليه شوف هو اني سكتت ماحجيت
شي لاحد مو خوفا منك تره بس اني مالي خلك هوسه
- لاااااااا لاااااا انتي مو مالج خلك انتي كفيتي ووفيتي واخذتي
حكج وزياده ،،،، اي لا تعاينيلي هيج انه كتلج هالصار بيه كله
منج مو من حد ثاني وهاي خلصنه فك بفك
- شنووو
- اي لا شنو ولا هم يحزنون ... فك بفك انه ضربتج وانتي اذيتني بسحورتج مدري شياطينج المهم هاي اثنينه اتاذينه وخلص
- مادري شتفكر انته عجيب والله
- انه كتلك من زمان .. انه اشوفنج غير عن اهلج انه شهاب يربى
مايعبر عليه شي سمعتي
- امممممم
- سوي  اكل يله
- يعني شنو هسه عود تصافينه !
- جا شني بعد شتردين
- حليب فروله من المحل
- هههههههههههههههههه بالعباس ضحكتيني شنهي بويه حليب !!
- اي حليب
- هاي هوستج عله اخوتج بهالليل  عله الحليب ؟؟
- اي لا تضل تتمضحك تروح لو لا
- بربج كليلي انتي جاهل وتردين حليب بهالليل
- اني اذا ماشربه اضل عصبيه وماعرف انام روحي تلوب عليه
جان عندي صندوك بس خلص وهالاخوه السباع يتعاجزون يطلعون
- وطاحت براسي
- مو تريد اكل تروح تجيبلي
- هههههههه انه ماشايف مره مثلج
- ولا راح تشوف
- بالعباس ماريدن اشوف مثلج يشهد الله ماريدن
- اممممم
- اسمعي حطلع اجيب وارجع الكه الاكل كامل تره ميت من جوع
- ماشي .،.. خلي اجيبلك فلوس
- انجبي وكلي يلا بله هالسوالف

عفتهه ومشيت اخذت محفظتي وطلعت وانه اضحك بله صايره
دايره بهالليل اروح اجيبن حليب لبت ال١٨ !!!
جان محل الي بالفرع معزل فمشيت لراس الشارع هناك محل مفتح .. اخذت منه اربع باكيتات حليب فروله وجبس وحب
وبطل بيبسي .....

رديت للبيت ولكيتهه توهه جاي تطفي الطباخ عاينت للصينيه
مرتبتهه وحاطه روبه وفواكه ومكليه كبه وطماطه وزلاطه
وحته خبز محميته ...
- هااا لج هاي كِله للحليب موش  الي
- لا هاي لان تصافينه حته لاتلكالك حجه عليه بعد
- ها يعني فك بفك نرجع للصفر
- اي هاي هسه صفرنه بعد لاتضل تتعارك وياي
- اي جا هوانه  شريد
- زين لعد وين الحليب
- هاج اخذي
- شو هذاا حااااار
- بويه شسويلج جبته من الصندوك مو زين لكيتلج بهالليل
- يلا شكرا ً

راحت حطته بالفريز وضلت كاعده بالكاع جدام الثلاجه وانه
بسدهه حاط الصينيه واكل ... كل ساع ناطه فاتحه الثلاجه
تشوفه برد لو بعده وترد تكعد وترد تكوم وترد تكعد ...

- خااايبه اركدي شلشتيني
- هسه شمسويتلك
- ياكايمه ياكاعده ميبرد هسه اصبري
- هاي صبرت
- هههههههه هاي انتي هيج رجيجه جدامه
- احبه

كالتهه بهداوه وتعاينلي انه جن ماي بارد وواحد صبه عله
كلبي هيج ارتخيت من سمعتهه ... تالي ردت اسيطر عله رويحتي كتلهه ...

- جبت جبس اكلي تلهي بي  بين مايبرد
- اممم ماشي

اخذت الجيس وكعدت تاكِل  وانه اعاينلهه واكِل تالي اجه حيدر
اخذ جبسهه وراح وهيه بوزت وعاينتلي وانه ساكت اعرفن
حتنفجر ...

- شفتتت هاااي الاخوان وكت الاكله روح اشتريلي مايرضى
ووكت الاشتري ياخذ ويعوفني
- هههههههههه اخذي الثاني
- ماريد خلي اكوم اشوفه برد

كمرت للثلاجه وطلعته وردت رجعته ..
- هااا مابرد
- لا برد بس ماريد
- شنهييي
- اي مو بعد طعم الجبس بحلكي خلي اروح اغسل وافرش
حته من اشربه يبقى طعمه
- هههههههخخخ روحي بويه روحي ماطلع حليب

راحت تغسل وانه اعاينلهه اشلون تكف عله اصابعهه وتعاين
بالمراه وهيه تفرج تالي اجتي شربت مي وطلعت الحليب وتربعت وكعدت جدامي وكاضته باثنين اديهه وتشرب بي

انه ماعرفن اضحك عله شكلهه الكل ساع ينكلب شي مادري
امشي ويه رويحتي الجاي تذوب شويه شويه ويه كل شربه
الهه من اعاين شلون تبلع ريكهه وحركه شفايفهه والشعر
المنثور الاحمر عله الجتف مزيد بياض الركبه ... وضلت
بنفسي اضوكن طعم هالفروله بشفتهه ...

انتبهت عله نفسي من صارت تأشرلي بحواجبهه بمعنى شكو
انه سويت نفسي اكِل وتيهت السالفه ...

- كومي سويلي جاي
- ماشي هسه
-اكِلج هاي عود صدك هَيج يأثر بيج الحليب البارد اشو جن
واحد وصب عليج دولكه ماي
- اي والله هدئت
- ههههههه سبحان مغير الاحوال

صبتلي الجاي وغسلت المواعين وانه اعاين لظهرهه دخيل محمد
شلون يشلش حالي بقدره قادر كاض روحي عنهه ...

ردت اخذت باكيتين حليب وطلعت وردت اندارت كالت ..
- تصبح على خير
- ههه وانتي من اهله

طلعت بالحديقه كعدت وانه حاط ايدي وره راسي واعاين للسمه
جنت افكر اذا ضلينه هيج متصالحين اكدر انساهه لو تزيد بالي !
وساعه اكول انه ماعاملهه زين عليش هيج ماكضن اعصابي
وياهه ؟؟؟ وارد اتيه بذاك الحسن ياعلي شكد بارد جسمهه

رحت اريد انامن مكدرت الا طلعت التشيريت واشمن بي
وبسام يعاينلي تالي كلي ..
- طلعت عاشك يول
- لااا يمعود
- شني لا جا انه ماعرفن بيك كل ليله ماتنام الا تشمشم بهالتشيرت كبل جنت اكولن عليك شاخط بس مره شميته
ريحه بنيه كلت هالزلمه عاشك ومتبهذل
- هخخخخخخخخ
- عليك علي كِلي منهي من يمتى تحبهه زين عليش ماتخابرهه
انه اشوفنك حته شحن ماتشحن تلفونك
- هههههههه مايحتاج هيه هنايه بهالبال ماتطلع منه
- ان اخووووك
- وحك الحسين اشيلنهه شيل منه وماتطلع من بالي انه ماحبهه
بس الكه رويحتي تلوبن عليهه
- هاي شلك بيهه ماتحبهه ومتنام الا عله ريحتهه جا لو تحبهه شلون يمكن تكابل بابهم وتكعد
- ههههخخخخ اصيرن مثل صادق اتصفن بالحجارات
- هههههههههه وانه اشبعن ضحك عليك جا انه الادورلك
صاكات تطلع انته خازنلك وحيده بهالبال عمي ماتكول تحجي
مخليني اتعب واتوسط هنا وهنايه
- هسه انه عاتب عليك كايلك اريدن بنت انه هيج مرتاح
- منين هاي السطرتك
- بعيده خويه بعيده مو من هنايه
- اهاااا تركيه !
- لااااع  انه ماحبن بنات مصاليخ ويتمضحكن بنص الزلم
- جا هوه اكو احله من التركيات
- بويه شبيهه العراقيه بعلي يدولبن اكبر واحد
- مثل مادولبنك
- اييي بالعباس شلت حالي انه اريدن انساهه وحك علي بس
هالبال الاكشر مايرضى
- وعليش تنساهه كول منهي ونروح نمشي عليهه ونجيبهه
من عيونهم خوتك احنه شنهي بويه نسيت
- لااا ماتكصرون لجن هيه ماتناسبني
- شنهي اهلهه زناكين تره عندك حلال يسد عين الشمس
جنك نسيته
- لك مو شغله فلوس هو انه يمتى مهتم للفلوس حته هسه اكعد
احسبن شعدهه وشعندي
- جا شنهي
- البت صغيره وطايشه وانه ماحبن هيج اريدنهه رزنه وتعرف
ادير بيت وعايله هاي كلشي ماتعرف انه ادري تشلع كلبي ماريدنهه انه ماريدنهه وحك ابو فاضل ماريدنهه لجن ماتطلع
من بالي منين ماديرن وجهي الكاهه جدامي هاي تالي الليل
الكه رجلي تاخذني لريحتهه
- خويه انته عاشك لجن مو راضي تعشك هاي مشكلتك
- لا يمعود لاتكولهه انه بالف ياعلي اريدن انسه تالي اطلع عاشك
اتسودن ومحمد
- زين اسالك بالله لو جبتلك وحده عله مواصفاتك تنساهه
- والله مادري بلكن انساهه انه ماريدنهه وحك نور محمد
حته لو اهلهه ينطوهه انه ماريدنهه
- زين جا خلي نبلش من جديد جنك ماعرفتهه وهالتشيرت
جيبه انه اضمه حته لاتدوره بعد وانه ارتبلك علاقه جديده
تنسيك الاول والتالي
- شلون ترتبهه
- معليك هاي شغلتي بس كِلي تريدهه ونس لو زواج
- لا بويه زواجيش هسه
- هااا يعني بس تكضي وكت وتنساهه وتالي تشوف التعجبك
- هو انه اريدن انساهه بس ماريدن اضحك عله بنات الوادم
- لك شبييييك هنه يردن واحد يضحك عليهن اكِلك تريدهه
تريحك وخبره لو هيج بس سوالف
- هاي شبيك بسام
- اي شني شبيه جا انه اعرفن شيدور بالك وصدكني ماتطلع
من نفسك اذا ما تجرب غيرهه انه احسك بين التريد ومستحي
بس خلهه علي انه ادبرهه ليك
- مااادري ياخوي انته شتسوي سوي بس خلي انساهه مو تجيبلي
وحده مثل نور هيج غثيثه
- هيه شني غثيثه انته ماتعرف تحاجيهه
- لك بويه شكايليك علي كل ساع ويه وحده هو انه ماحاجي
غير ويه بنات القسم بالكليه عله كد سلام شعدنه مع السلامه
هاي انه وكتي بالشغل منسيني حته النسوان كفيلك محمد
- اي بس هم شويه تلحلح انته بس شويه ها انطيهه جم جلمه
حلوه وشوف شون تصير مثل العجينه بايدك منين متجيبهه تجيك
- خلي نشوف هسه
- جيب التشيرت يله خلي اضمه
- من باجر عوفني هسه خلي انام ماريد اضلن الوب
- هههههههههههه مسودن وعلي

نطيته ظهري وانه عاصر التشيرت بايدي واشمن بي لحد
مارخت اعصابي نمت ... من كعدت الصبح مالكيته يمي
اخذه بسام ضمه كلت يلا احسن حته انجبر انساهه ...

طلعت للشغل وخلصنه اليوم من وكت للظهر ردينه للبيت
اكلنه ونمنه جان يجيني بسام يكعدني العصر ...

- ها خيرك
- كوم احاجيك
- شكو
- كوم خلي نطلع اكو جماعه منتظرينه
- منين هذول
- امشي وبعدين تعرف
- وين يامكان نروح
- كووووم لخاطر الله شكد تلح كتلك امشي وتفهم ،، تكشخ زين
- بس لا تسويلنه فاينه ولك
- اريد انسيك ههههه امشي بسرعه تاخرنه

كمت غسلت وبدلت وطلعنه هو جان متكشخ لاخر حبه انه
لبست قميص عادي ساده ويه البنطرون بس هوه ماخذ قالب
جسمي وبارز احله جيف انه صدري عريض وجتافي عدله

طلعنه لمطعم بعيد من هالمنطقه وجان مرتب وهادي صعدنه
بالطابق الثالث وهناك اخذنه كعدنه يم الشباج ...
- شني وين جماعتك
- هسه عله جيه

وره عشر دكايك طبن اثنين بنات نازعات العبي ولابسات
بناطير ضيكه وهنه حلوات مكياج وشعر سرح اسود والعطر
يفوح واظافرهن طوال ومصبغه .... بسام كام سلم عليهن وانه
سلمت ببرود وكعدنه ...

- شهاب اعرفك هالوردات منى وشهد صاحباتي
- هااا كل الهلا
- هلا بيك
- بسااام صدك خوش مفاجئه جايبه اكابري ههههههه
- جا شكلنه عيوني
- شهاب شكد عمرك
- يهمج !
- طبعا يهمني يعني شلووون لعد
- ها بغداديه
- ايي ومن الكراده هم
- هاااا وشجابج للعماره يابت الكراده
- جيت اشوف مفاجاه بسام النه وطلعت خوش تسوه الطريق
- هييي بسام شنهي الفلم منين هذني تعرفهن
- بنات ونسه شبيك
- لككككك
- شبييك تصرف طبيعي لا تفشلني وياهن
- استغفر الله
- شنو تكضوهه تبسبس
- هههه لا عيوني لاا شتطلبون

طلبنه الاكل وانه كاعد عله اعصابي هالمهجول شعرفه بهيج
شكولات !!! انه لعبت نفسي من تمضحكهن اتسودن انه من
هيج طبع مره صوتهه عالي وتتمضحك وجماله كِل وحده
لبسهه لاطش عله مفاتنهه هنه حلوات ومرتبات بس هالاخلاق
الجايفه عامه عليهن ...

- اكووول شهاب شو ذابهه ع الصامت ويانه
- اي
- شنو اي
- كملي اكلج
- هااا جنك مستعجل ههههييييي
- بسااام حبيبي مانطلع اني ضجت من الكعده
- هسه شويه ونطلع
- انتن ترجعن لبغداد لو شلون
- هههييي بعد بكيفك عيوني وين تريدنه نروح نروح بغداد
عماره ناصريه كيفك شقه بيت
- شننننهي
- شبيك شهاب شتفقنه البارحه مو كتلك هاذ احسن حل
- خاف معجبناك ياحلو
- والله مابدل اظفر منهه بيجن ولانعل ابوجن يابو الجابجن
علي وانته حسابك وياي بعدين كوم رجعهن للزبايل الاجن
منهه ورد للبيت
- شهاب اكعد نتافهم
- انه ناقص وكعدت وياك هالساعه لك هي اثول جايبلي كحاب
وجايني مكيف شكلولك علي هااا لو اريدن جان شبعت ببنات
تركيه جان شبعت بنور لك انه كتلك اريدن انسى موش ازني
يافهيم وانتن شوفن دربجن يلااا يلاااااااا
- هاي شنو بسام هيج ضيافتك خلف الله عليكم
- خااايبه وووووولي لاااا ازورك جهرتج هسه وووللللي منااا
تحررررركن شحجججججي

طردتهن وراحن وبسام يصيح وراي انه عفته ومشيت اخذنه
تكسي وردينه للبيت اول ماطبيت للكراج تعاركنه انه وياه
بالكوه كضيت نفسي حته ماافلش فجه كلت عيب انه كاعد بيتهم
عفته وطبيت بدلت هدومي وهوه راح طلع .....

طلعت وبلايه وعي صحت ..
- رببببببى وينج
- ها

انه ماجنت اريدن شي منهه بس اريدنهه كريبه هيج مني  دخيل
محمد شلون بودي احضنهه واكلهه خلصيني وابرد اعصابي
من بروده جسمهه ...

- ها شهاب رايد شي
- اي .. لا لا ماريد هيج روحي
- شهاب محتاج شي كولي
- الصراحه جنت عصبي واريدن اتعارك وياج بعدين تراجعت
- اممم زين سويت

عفتهه ومشيت مدري شلون طلعت وياي هالجذبه بس رهمت
كعدت بالديوانيه وشويه واجتي انطتني كلاص ليمون حلو وبااارد

- هذا يهدي الاعصاب حته نبقى على صلح
- عشتي ،، عندج شي
— لا
- اكعدي شويه
- شنو ليش
- هيج بس اكعدي اريدن احد يمي ضايج
- اممم ماشي

جانت تلعب بشعرهه وانه اعاينلهه واشرب ... تذكرت شلون
انتفضت من حجيهن بمجرد مافكرت اكضن غير هالربى فارت
اعصابي وسودت الدنيه بعيني ... جا انه اضلن ارواح وياهه
لو اريدنهه لو مااريدنهه ...

- ربى شلون تنسين الشي اليضوجج
- ارسم
- وتنسي
- لا بس تروح الضوجه ماانسى  بس يصير ماياثر هواي
- زين انه شسوي
- تريد تنسى شي مضوجك !
- لا شي يأذيني شي اريدنه ومااريد اخذه
- مممممممم ليش متريده
- مايناسبني
- شمدريك جربت
- لا بس هيج بالحسبان اشوفن مايناسبني
- زين جرب تاخذه حته اذا شفته ناسبك هاي بعد ترتاح
واذا ماناسبك راح تقتنع وتنساه بس بكل الاحوال لازم تجرب
حتى تحط حد وبكل الاحوال لتتندم
-  صعب حيل صعب
- بس اهون من تفكيرك اليتعب ونفسيتك المتاذيه
- زين واذا انه جربت اخذه وتالي ادمنت عليه شلون
- راح تلكه طريقه تخلي يمك دائماً
- يعني ما هده
- لا بعد اذا ناسبك وارتاحيت بي بعد ليش تعوفه
- ماتردين تعرفين شنو
- لا هذا شي خاص بيك واني مادخل بخصوصيات احد
اني بس انطي رأيي واتمنى ينفعك
-  راح افكرن بي مشكوره
- ان شاء الله يناسبك

راحت وانه ضلت بالي جلمتهه جرب تاخذه !!! يعني اذا جربت
اكربلهه يجوز تناسبني !! يجوز تصيرلي حبيبه موش بعيده ؟؟
لا لا انه شلي بيهه هاي تعل الكلب انه اتصير حبيبتي ام لسان
طويل وام السحوره !!!! بعلي اموت ولا هالسالفه تصيرن صدك
.
.
.
يتبع