رواية من فجر ديسمبر الفصل التاسع 9 - بقلم Zoka 🌷

مـن فـجـر ديسـمـبر
🍁
🍁
ضل راسي يوجعني من كد ماافكر وتالي طبيت بالديوانيه
تمددت ونمت ... كعدت عله صوت صياد وكمنه تريكنه
وطلعنه نتمشى واشوفن ربى والشيخ لوحدهم بذاك الصوب
يمشون ...
- اكولن صياد الشيخ وين رايح
- ايتمشى هوه وشمسه
- ادري بيا مجان يرحون
- ايعبرون هالزرع ويطلعون عله الجرف ومناك ياخذون المشحوف ويفترون بالماي ويردون
- هااااا كلكم تعرفون سالفتهم
- احنه مانعرف غير انهم احرار والكيف كيفهم
- هااااا اكولن امك ماتغار من هالشمسه
- هخخخخخخ جا غير طلايبهه ويه ابوي ماتسكت لجن تعودنه
عليهم امي تصيح وتعيط وتالي بجلمه من الشيخ تنخرس وترد
لمجانهه وشمسه اميره وتتمشى بكاع الشيخ حده اليفج حلجه
وياهه
- هيه هم تفتن ماتسكت
- اي ماتضم سالفه كلشي تحجي ليه
- اففففف
- اكلك عوف شمسه انه اريدن اخطب هالجمعه
- اييي بيهه الخير
- الخير يصيبك ياخوي يمتى نفرح بيك
- طويله سالفتي طووويله
- بس تجي المره تكصر سالفتك
- ههخخخخخ انته كلتهه خلهه تجي والله كريم

ضلينه نتمشى واجه نعيم ويانه وضلينه كاعدين يم النبكه
وردينه وكت الغده ... كملنه اكل وكلت اروح اشوفن جدتي
اشتاكيت الاشيهه واشوفن زهره هم ... رحت وكضيت العصريه
عدهم جانت الجده مريضه وكضتهه نايمه وتون مافهمت منهه
شي تالي رديت لبيت الشيخ ....

جان عمي حاتم متحضر حته يرد لبيته .. اجاني صياد
- شهاب خلك هنايه نحضر للمشيه ماضل شي
- لااا ياخوي امرلك الخميس انه عندي شغل تعرف انه اريدن
اجمع فليساتي مو مال اضلن كاعد ماضل شي ويخلص هالشهر
- كيفك ياخوي انطرك الخميس موش ماتجي
- لااا اجيك تدلل يلاا بالسلامه
- الله وياك

طلعنه وانه اسوق وجنت اعاينلهه من المرايه الجانبيه كل الدرب
انه اديرن عيني ليهه اريدن الكالي تفسير بوجهه ماعرفتن شي
الدور انسطرت بعينهه التضوي من تضرب الشمس بيهن

وصلنه البيت طبكت السياره ورحت لحجره بسام تمددت
وصافن ع السكف .. منهو ابو نجمه !!!! عليش الشيخ يحبهه
هالكثر ماظنن جيف تلوكله بحجيهه اشو هوه اليتلوكلهه ويدللهه
ازيد منهه جا شنهي فلمهم ؟؟؟؟

ضليت اتافف وازفر بضيك وتالي كمت بدلت وطلعت كعدت
يم عمي واتفرج تلفزيون وبالي يجيب ويودي .. اريدن اكضهه
واخليهه تكت الاول والتالي لجن ماكدرن اصلهه اخاف من رويحتي تزل جدامهه عبن انه غادي نار ماريدن اشوفنهه جدامي

جتي عمتي حطت السفره وراحت وردت طبت ربى ودنجت
تحط المواعين وانه عيني عليهه ،، ظهرهه من ينحني يشلن
حالي راحت وردت جتي مره الثانيه تحط بالمواعين وهالمره
بايدهه مدتهه لبعيد وهي مدنجه طخت صدرهه وانرفع ابيض
جماره ،، انه كمت ازخن عرك امسح بهالكصه ومايفيد تالي
طلعت بره اشمن هوا الله واتمشى وانه رويحتي ترجف عليهه
اريدن اطلعنهه من نفسي شجاني اني استهترت هيج !!!!

صاحني عمي وطبيت .. كعدت اكل ومارفعت عيني عليهه
كملت اكل بسرعه وكمت طلعت للشارع افتريت ورديت كعدت
عله الرصيف تالي كلت انه اذا اضلن هيج وحده من الاثنين
لو اكضنهه واطفي ناري وينكتب موتي عليهه لو اكرهنهه
اطلعنهه من هالبال ...

تالي طبيت جوه ورحت لبسام كبل فتحت الباب وكتله ..
- انطيني رقمهه
- هاا؟!؟؟؟ منيه
- هاي بت خال صاحبتك
- صدك تحجي شجاك !!
- ماكو شي اريدن رقمهه تنطي لو لا
- خايب اكعد خل افهمن شنهي سالفتك وجهك مدخن وهالاعصاب
عليش وادور رقم هالبت ؟؟؟ شنهي شصاير وياك شهاب
- بسام بروح العزاز كف عني وانطيني هالرقم وخليني اولي
- زين زين هسه اصبر شويه

انطاني الرقم سجلته بتلفوني وطلعت رحت للمحل شديت رصيد
وكعدت عله الرصيف ومتردد احاجيهه لو لا ؟؟؟؟
تالي دكيت اول مره مجاوبت عفتهه وضليت الوبن شلون بيه
اريدن اشغل هالبال عنهه تالي رديت دكيت جاوبت ...

- الوو منو
- السلام عليكم
- عليكم السلام منو
- انه شهاب
- هاا ياهله بيك شلونك
- الحمدلله شلونج انتي
- بكل الخير .. اكدر اعرفن عليش ذكرتني
- ضليتي بالي من حجالي عنج بسام وهذيج الايام انه جنت اشتغل
مافارغ وكلت اكملن شغلي واحاجيج
- هااا .. اي كل الهله
-انتي عليش سالتي عني
- زلمه مثلك لازم ينسال علي ماشاء الله هيبه وجمال
- ههههه
-عليش تضحك
- هيج سالفه بالي ،، اي شسمج انتي صدك ماعرفن اسمج
- هاي شنو صدك ماتعرفن اسمي وجاي تحاجيني !
- انه بس اعرفن بت خال صاحبه بسام
- بسام يعرف اسمي ماكلك
- انه ماسالت
- هااا وشعجب هسه اهتميت وسالت شغيرك ؟؟
- هسه شسمج
- نور
- حلو هالاسم
- انه عليش احسك متضايك اخافن احد ماذي كلبك وهيج مخنوك
- لا بس تعبان جنت طالع بالسلف ورديت تعبان
- اسم الله عليك من التعب
- ياصف انتي
- خامس ادبي
- هاا عاد شاطره لا
- زينه يعني ع كد النجاح
- همه اهل الادبي كلهم هيج
- اي احنه مانتعب نفسنه هسه ضامينهه للسادس
- الله يوفقج
- للكل ان شاء الله ،، انه ماعرفن شي عليك احجيلي شوي عنك
- شتردين تعرفين يعني
- عمرك شتدِرس اهلِك
- عمري ٢٤ عندي اخت وحده من امي واخوان ٣ من ابوي
امي متوفيه
- الله يرحمهه
- يرحم الجميع .. انه ادرس تحليلات بتركيه هاي اخر سنه لي
- هاا يعني شوكت ترد لتركيه
- ع الشهر الجاي
- وماترجع بعد
- لا اردن من اكمل السنه
- ان شاءالله ،، شلونه تركيه حلوه
- اي حلوه وجوهه بارد حلو
- ماتاخذني وياك
- اهلج يرضون
- اهلي يردون الجايهم من الباب ويرضون
- هااا اي جا انطري اليجيج وكليله ياخذج
- يعني انته شنو صفتك هسه وياي
- صديق ماترديني صديق
- هاا تفاجات
-انه مالعبن عله بنات الناس مال اجذب عليج واكلج حبيتج
وانعجبت بيج هاي جذب انه لا شايفج ولا اعرفن شي عليج
- جا عليش تحاجيني
- كتلج صديق هيج انه اريدن احاجي حد واجيت عليج
- مو كتلك انته بيك شي انه اعرفن هاليجون هالشكل ملجومين
ويردون ينسون ويكضون وكت
- انه دايخ بسالفه واريدن اشيلنهه من بالي لا ملجوم ولا شي
- يعني كلبك فارغ
- اي فارغ
- اي زين كلشي ولا تطلع السالفه يم الكلب بغيرهن بلكي اكدر
اساعدنك لجن هنايه انه ماكدرن بعد
- لاا انتي خليج احجي وانه انسه سالفتي
- اممممم منين احجيلك
- استغفر الله
- شبيك
- روحي نور بعدين نحجي
- شجاك  فهمني
-كتلج روحي شنهي بويه ماتسمعين
- اووي شبيك انته يله رايحه باي

سديته وضليت ازفر بزهك يعني حته هنايه تطلعيلي اشردن
منين انه من بلاج علي .....
طبيت جوه وشوبه واجاني بسام ...
- هاي انته شبيك
- شكو
- عليش هالشكل تحاجي البت شنهي بويه مو انته دكيت رجل
تريد رقمهه تالي هيج تطردهه شنهي شجاك
- مالي خلك وماطكتهه تموع مدري شلونهه خليهه تولي
كللهه خلي تمسح الرقم وتولي
- لا بالعباس انته موش خالي شجاك اليوم تعارك خيالك
- تسودنت انه تسودنت ززززيييين
- هاي شبيك شهاب اول مره انه اشوفنك هالشكل شصايرلك
- عوفني واليرحم اهلك
- جنك طحت بالحب هخخخخخخ
- اسم الله هاي العايزه هو انه هيج وخيوطي راح يتكطعن النوب
اذا اطيحن اتسودن فرد نوب
- هاااااشفت طلعت السالفه بيهه بنت منهي هاي الدولبتك
- امشي منااا بسام لاكو بنت ولاصخام انه هيج حسباتي تجيب
وتودي
- بالقران مااامش اليوم اذا ماعرفن شنهي سالفتك
- يطبك مرض انه اكومن انام وانته ضل هنايه تلفن
- هاي شبييك يول مو جاي نحجي وين وليييت
- تصبح عله خير

رحت تمددت وضليت اتكلب ماجاي تطلع من هالبال الاكشر
كمت طلعت التيشيرت واخذته وتمددت شميته وغمضت وضليت
اتخيلهه لحد مانمت ...

كعدت الفجر ولكيت التيشيرت بعده بسدي كمت شمرته وضليت
افرك بوجهي .. شجاني ياربي شذبت سحر علي وشدهتني هيج
انه اكرهنهه اريدن اخلصن منهه الدور صرت ماانامن اذا مو
عله ريحتهه !!!!

طلعت سبحت وكعدت بالحديقه وطلع عمي سلم علي ومشه
لشغله .. رد طلع بسام هم لشغله وحيدر ينام للظهر محد اله
شغل بي ... وانه صافن واكطع بالحشيش سمعت صوتهه
تحجي ويه امهه .. ضليت مركز بصوتهه بس ماردت اديرن
وجهي ليهه ... رديت شفتهه جدامي ..

- صباح الخير
- صباح النور
- تجي تتريك ويانه
- لا ماريد
- بيك شي !

رفعت راسي ليهه وانه احسن شي كابت عله صدري ومذبل
وجهي وكل رويحتي ..
- لا ماكو شي
- مامصدكتك بس على راحتك

راحت وانه صرت اكطعن بالحشيش بكل عصبيه اطلعي من
باااالي اطلعععععي انه اكرهنج عليش تسودنت عليج هيج !!!

- شهاااب
- صبرك ربي ..هاااا
- هاك تلفونك يدك
- جيبي

عاينت هاذ رقم نور جاوبتهه ..
- هاا شكو
- شني عيني شني شكو جايه اسال عليك
- مشكوره رايده شي بعد
- شبيك شهاب شني مايصير اسلمن عليك
- لا مايصير مالي خلكج وانسي هالرقم امسحي وانسي انه حاجيتج زييييين لا دكين بعد تره تشوفين شي مايعجبج
- انته واحد مريض
-اي لاتكربين علي ولي يلا

سديته وشمرته انه روحي ماطايكهه تجيني هاي ...
كمت طبيت جوه وفتحت التلفزيون اريدن التهي بشي ضليت
متمدد واكلب بالقنوات ... اجتي ربى وشايله سطل ماي ووصله

- راح انظف
مارديتلهه وضليت اكلب بالقنوات .. وهيه تمسح بالاخشاب
وصلت للقنفه النايم عليهه ..
- شهاب حول هناك خلي انظف هاي
- بعدين متشوفيني متمدد
- هسه شبيك هيه نفس القنفه هياتهه
- ماكوم
- واني اريد امسحهه شلون ؟؟؟
- امسحيهه احد لازمج
- هاا هيج يعني
- اي هيج
-زين لعد راح انظف فوكاك

مارديتلهه وهيه يم راسي تكربت تمسح اليده وخرت شويه
وردت تكربت للتاج صار جسمهه كريب كلش مني شويه
ويطخ راسي ببطنها ... تدوهنت بالعباس وانه اشوفن ظهرهه
محني هيج جدامي وبيني وبينه شبر ..اريدنهه بحضني تعبت
اقاومنهه .. جريتهه من زندها وكربتها ليه هيه عكدت حواجبهه
وصفنت بوجهي وانه عيني شرار غاديه ..

- جاي تلعبين بالنار يربى
- شبيك شهاب شسويتلك

مارديتلهه وضليت انفخ نفسي الحار بوجهه وانه بين الذايب
والكاره تالي دفعتهه ..
- طلعي منا يلاااا لاتشوفيني وجهج
- تخبلت انته شبيك
- رببببببببببببى ولي من وجهههههههي وليييي

طلعت وسدت الباب حيل وانه شلت الريمونت وركعته بالباب
جسمي يرجف رجيف يريدهه وعكلي يكطع بنفسه حته ينسه
ورويحتي ذبلت وتعبت من المماطل بهالسالفه انه زلمه حدي
عندي ياابيض يااسود لو اريدنهه واخذنهه ليه لو اعوفنهه بحال
سبيلهه ... لجن ماكادر اسيطر عله جهه كلهه تثور جدامهه

كمت طبيت للحجره بسرعه بدلت هدومي واخذت محفظتي
وطلعت اكو قاعه حديد ببعد شارعين ..رحتلهه مشي وانه
اهجس رجلي تجدح عله هالكاع من كد هالنار الي بيه ..

طبيت ليهم وجانت فارغه تفاهمت ويه الولد كتله اريدن ساعتين
بس ورحت لجيس الملاكمه .. لبست الجفوف وكمزت مرتين
وبالثالثه بديت اضربن بي ... وضليت اضربن بهالجيس بكل
اعصاب طلعت كل حركتي بي .. لا وكفت ولاارتاحيت اريدن
اخلص من هالمعارك البين عكلي ساعه يريد وساعه يكره ويكرهني بنفسي جيف انه اخون الامانه ... وكاره روحي
من كثر الملامه ... اريدن ارسالي عله بر تعبت من الروج
الي يجيب ويودي بهالفكر ...

وكفت وانه ازخن عرك ونفسي سريع جاني المدرب انطاني
بطل مي خذيته شربته ..

- جنك متمرس عله الملاكمه
- اي
- اي مبين عليك رياضي بيا قاعه جنت تتدرب
- جنت بنادي بتركيه وهالعضلات من الشغل خويه موش من
الحديد
- هاااااا شتشتغل
- عندي كاع بالحرث والزرع ربيت هالعضل
- زين زين والملاكمه
- هاي بالنادي
- استمر لاتوكف وراك خوش مستقبل بهالجسم
- الله كريم
- كمل كمل باكيلك ساعه

ذبيت الماي عله وجهي وشعري ورديت لبست الجفوف
وريت تخيلته نصي الثاني اليريدنهه واضربن بي حته يتوب
وينسه وكضه كل حيلي عله هالضرب تالي كعدت بالكاع
ومدنج راسي بين رجليه واتنفس سريع ...

لحد ماهديت يلا كمت مسحت العرك وطلعت رديت للبيت
تعبان ايدي اهجس نملت مابيه احركنهه .. كعدت بالحجره
وصحت ...

- ربببببى تعاي ليه
- هاا
- طلعيلي ملابس مابيه حيل اكوم
- وين جنت ليش هلكد عركان
- بلا حجي زايد طلعيهن خلي اسبح كتلج مابيه حيل
- اممم
- وسم ربى مابيه حيلج
- هسه اني شكلت
- دخيلك ربي خفي ايدج

دزيتهه تعلكهن بالحمام ورحت انه وراهه من شفتهه طلعت
طبيت سبحت بمي دافي وطولت بالحمام بس صافن والمي
عله جسمي اريدنه يفك وهالعكل يلين جزعت منه ....

تالي طلعت لكيتهم يصبون الغده كعدت بالديوانيه بس انه
وامهه وحيدر كلت زين ماشوفهه ... شويه وطبت وبيدهه
ماعون ركي وكعدت يم امهه وتعاين للتلفزيون وتاكل وانه
عيني بلايه وعي تراقب حركتهه ايدهه من اصابعهه لحد
حد الردان الي بنص الزند والوريد المايل للزراك مبين من
جلدهه من نظره واحسن بنعومه هالجلد جا شلون اذا كضيته !!

دخيلك ياربي انه جاي انازع جدامهه ووراهه خلصني منهه
جنت اردد هالحجي بداخلي وانه اكل ...

كملنه غده واجتي امهه جابت الجاي شربنه وانه رحت تمددت
اريدن النوم يجي لعيني ماكو .. تالي كمت طلعت ماكو احد
عمتي نامت هالوكت اعرفنهه وحيدر يطلع للعبه وهالصخمه
مدري وين ولت ...

رحت للمطبخ ماعرفن شريد بس يمكن ادورنهه ..
تالي شفتهه طلعت من الحمام والمنشفه عله راسهه والوجه
احمر رادت اصعد صحتهه ...

- ربى
- هاا
-تعاي ليه
- شتريد
- اريدن كلاص عصير اهجس دايخ شويه
- هااا
- اييي اشو واكفه بعدج تحركي يلا

اجتي للمطبخ وانه كعدت عله الكرسي واعاينهه تطلع البرتقال
- حطي وياه ليمون هم
- ماشي

كعدت تعصر والمنشفه تميل كل شويه هيه مسويتهه جبل
فوك راسهه تالي شالتهه وذبتهه عله الكاونتر وضل شعرهه
المبلل نازل منا ومنا ... انه كمت ابلعم جا شنهي ربي انه
اريدن انسه وانته تحليهه بعيني كل ساع ...

- لمي شعرج
- هسه اكمل والمه
- حتتمرضين شعرج ينكط ماي والبنكه مفتوحه
- ماعلي شي
- عنوديه
-امم
-رببببى
- ها شهاب
- انه جم دوب اضلن اكلج لتاممين جدامي
- انته شكو تضوج مني
- انه اضوج من سوالفج التعاندين بيهه
- تره مجايه يمك وممعاندتك بشي مو كتلي ماريد اشوف وجهج
هاي اروح منك تصيحني وتضل تعيط عليه
- انتي تستفزين
- شهاااب
- شكو
- شنو التريده بالضبط فهمني

صفنت بوجهه واريدن اكللهه خلصيني منج طلعي من هالبال
الكه رويحتي تلوب عله هالخدود الحمر المنمشه جريت نفس
واستغفرت ربي انه تعبني هالتناقض البيه ...

- ماكمل هالكلاص
- اي كمل احطلك شكر لو لا
- لا جيبي هيج
- ثلج
- انتي ثلجتي ميحتاج بعد جيبي
- هاك بعد تريد شي
- لا
- يعني اروح ماشوفك وجهي بعد مو
- اي
- ماشي

درت عيني منهه وهيه مشت انه كلت خلهه تروح ماريدن
الشيطان يغلبني واحنه لوحيدنه .. جريت العصيرمره وحده
وكمت رديت لحجرتي ....

ضليت افكر انه مامرت بت بفكري هيج .. حته من جنت بتركيه
اشوفنهن مصاليخ واحاجيهن واكعد وياهن لجن مادنت نفسي
عله وحده بيهن ... جنت اشوفنهن وصخات وماكضن مره
كاضهه غيري وحته المحترمات والزينات هم مادنت نفسي عليهن ... انه هاي اول مره اشتهي بت هيج .. بالعباس جاي
انازع حته اكضن رويحتي عنهه ....

ضليت هالجم يوم اتجنبهه وهيه ماتشوفني وجهه الا بالضروره
انه كل ليله مانامن اذا مالكاهه بحلمي واكضن هالتيشيرت واشمن بي حته بسام انتبه علي ويكلي مسودن تشمشم بهدومك ...

وصار الخميس وكلنه تحضرنه حته نروحن للسلف لخطبه
صياد ... والعصر مشينه ليهم ...
انه يم الشيخ انزلن عيني مستحي جيف انه ماكدرن عله رويحتي
جدام مملوكته ... وبس يصيرن مجال اطلع اشغل نفسي بشي
لحد الليل شفتهم طبو الديوانيه وانه روحي تلوبن اريد اشوفنهم
لجن عاندت نفسي وضليت بمجاني ماردت ازيدن عله نفسي
خلهه شويه شويه انساهه ماريدن احتك بيهه بعد ...

ثاني يوم الكل مخبوص بالغده الشيخ ذبح والوادم التمت والشيوخ
من الديره والعمام كلهه هنايه ... كمل الغده وتحضرت السيارات
ومشينه لبيت عمنه عمران صاير بنهايه السلف ...

جان صياد متكشخ والضحكه شاكه وجهه ومامصدك ..
طبينه ليهم وكعدنه ويه زلمهم وعقدو وصار لازم يطب عليهم
يلبس نيشانهه انه انسحبت ليم المطبخ وطب هو والشيخ
دكيت باب المطبخ اريدن  شي اشربه مامش احد كلهه جوه
تعاين العرسان عاد دفعت الباب وطبيت رحت للميز اخذ
قوطيه واشوفن ربى كاعده يم الدرج ...

لابسه ثوب نيلي طويل ورافعه شعرهه ومنزله خصل منه
وكاضه كتاب بايدهه صغير ومدنجه تقرا ..
صحتلهه واندارت علي تتمعلج اشرتلهه تجي ...
اجتي وتتمشى باالكعب الوردي وحجلهه مبين رفيع وهالثوب
مخصر تخصير عليهه وكلاده شمس الشيخ تضوي بركبتهه
زنودهه تلالي .. والكحل مكبر هالعين الزركه ...
كربت ليهه وانه ناااار مشتعل ...

- انتي ماتجوووزين
- هسه شمسويه
- عليش هاللبس
- شبي
- شنهو شبي توارين جسمج للوادم انتي يمتى تجوزين اله
اكطع متونج يلا
- هاي شبيك شهاب اني اصلا مطبيت هاي مو شفتني وحدي
هنا بعد شكو تحجي منو شاف
- هاي مو انه طبيت وشفتج لو طاب غيري وشايفج شلووون
هاااا شني ماعدهم اخوه هنايه مايطبلهم ابن عم ابن خال هيج
مأمنه جنابج
- اي مأمنه
- امشي البسي شي يسترج
- تره لبسي مستور
- وهالزنود استغفر الله يابت الناس استري عله رويحتج
وطبي حطي شي عله جسمج
- اني راح اطب ومعليك بيه بعد زين تره كاعده بيت مو بشارع
وكلهه نسوان لتضل تنك فوك راسي
- اكسرررره لراااسج هاااذ لا عبالج عفتج هالجم يوم تكومين
تبخترين بكيفج ... وشنهي بويه النسوان ماتعاين
- شهاااب
- من احترك شهاااب وخلص منج ان شاء الله امشي ولي
جوه ان شفت خيالج مار من هنايه اكصنهه لرجلج سمعتتتي
- لااا هوايه شايف نفسك انته
- بالعباس انتي حتجيبين اجلج

سمعتهم بدو يطلعون كتلهه ..
- خمس دكايك والكاج لابسه عباتج وهنايه واكفه زززززيييين
- مااارجع راح انضل يم البنات امي كالت
- وانه كلت خمس دكااايك سمعتتتي حجيب السياره واجي
- انتو شكوووو تدخل كتلك ماروووح تره بيت عمي واريد ابقى شعليك انته
- من تسترين نفسج تضلين هنايه ببيت عمج تضلين بهاللبس
هسه اردج للبيت اختاري
- شهاب والله حكول للشيخ عليك حيل زودتهه اليسمعك يكول
مصلخه وكاعده تره حالي حال البنات هاي مو زهره هم لابسه
مثلي شو محجيت عليهه هاي مو رباب وغزاله مبدعات بلبسهن
شو محجيت بس عليه لسانك شطوله
- انه ماشفتهن لو شايفهن هم مايسلمن من الساني لا تجرين وتعرين تمشين لو شلون
- اني راح اروح هسه خاف تجيني حجايه من هالنسوان
هنه ميصدكن يلكن زله عليه بس نتحاسب بالبيت
- خخخخخ خوفتيني
- اي تره اني طكت روحي منك خلي نحط حد
- وانه بزعت منج نرجع ونتحاسب وهسه تمشين تلبسين
عباتج وتكعدين هنايه بس تذبيهه اردج للبيت
- اااافففففف للككككككك انته مصيبه بلوه اجتي على راااااسي
روووح رووووح
- ماكو مصيبه غيرج
- امممممممم
- وسسسسم ولي منااااا

مشت وانه اشوفن النسوان تلصلص بعيونهه علينه تالي كلت
اسد حلوكهن .. صحت مرت عمي حاتم واجتي وانه عليت
صوتي حته اسمعهن .....

- عمه انتي كايله لربى تضلون هنايه
- اي كلت انضل حفله بنات وملتمين النسوان عليمن راجعين
هناك نضل يم البنيات وللمغرب نرجع
-  اي مو انه صحتهه لربى هسه وكتلهه تحضرو حته اردكم
للبيت وياي وهيه مارضت تريد تضل هنايه
- مدري شعجب الله هاديهه ورادت تبقى جنت اقنع بيهه وماترضى
- هاااا هيج الحجي زين جا صيحيلي زهره عمه
- اي هسه

راحت وانه عرفت تريد تخلص مني ماتريد تضل ،،، اجتي
زهره  هم لابسهه مثل ربى بس هاي ردان واحمر ..
- ها خويه ردتني
- اي تعاي كربي
- اي
- ترحين لربى وتكليلهه امشي نكعد يم العروس وغصب عنهه
تاخذيهه زين
- خويه هيه متكعد ويانه نعرفهه عليش افلشن نفسي وياهه
- زهره سوي مثل ماكتلج وبلا حجي زايد يلااا بساع امشي
ولتجيبين طاريي زين
- زين خويه

راحت وانه جريت ماعون الكيك وفتحت القوطيه ودنجت اكل
حته اشيلن العين من علي ... وره شويه طلعت ربى وزهره
زهره تعاينلي وانه اعاين لربى ضلت معانده ومالبست شي
انه الج ياصخمه ......
صارت عينهه بعيني خزرتهه وذبيت الماعون وطلعت للزلم
اخذت صياد والشيخ وابوي وصلتهم للبيت وضليت الوبن
تالي سمعت عمي حاتم يدز بمحمد اخوي حته يجيبهم من بيت
عمي عمران .. شفت محمد راح يشغل السياره رحت ليه ..

- محمد جيب السويج انه عندي شغله واريدن السياره
- مو اروحن اجيب بيت عمي حاتم
- هسه انه اكملن شغلتي وامرن اجيبهم يلا لا تاخرني
- هاك بعد احسن

شغلت السياره وطلعت ليهم وصلت وضليت ادكن هورن بالباب
طلعت بنيه صغيره كتلهه تصيحهم وراحت ركض ...

تعطلو وانه ضليت ادك هورن وطلعت مرت عمي ركض
وربى تتبختر بمشيتهه صعدن وره ...
- وين زهره ؟؟
- ها يمه ماعبالنه انته جاي هسه اصيحهه
- لاا خليج ربى انزلي صيحيه
- امم

فتحت الباب ونزلت وتاخرت ضليت ادك هورن لحد ماطلعن
كعدت زهره يمي وهنه وره ... انه حواجبي مافكت .. وصلت
زهره لبيتنه ونزلت وهنه ضلن بالسياره ..
خابرت عمي حاتم ...
- ها شهاب
- اكلك عمي انه راح اردن الاهل للبيت هنايه كلهه زلم عليمن
ضالين
- هاااا انته وين هسه
- بيتنه وصلت زهره وهسه حطلع للولايه كبل ماتضلم
- يلا خوش خوش ردهم
- مع السلامه

سديت الخط وصعدت بالسياره حركت وطلعت ع الشارع العام
جان عمتي كالت ..
- شنو وين طالع شهاب
- اردكم البيت هسه عمي كالي ردهم
- شنووو غراضنه هناك بقت
- شهاب رجعني ماريد اروح للبيت
- غراضكم يجيبوهه لكم اليوم الزلم ملتمه هناك عليمن ضالين
- هسه انته شعليك احنه نريد نبقى رجعنه
- عمه سكتي بتج لا ومحمد اكضي بيهه التوبه
- ربى كافي بنتي نجي غير مره هم صدك هسه مكلوبه الامه
هناك وهوسه البيت خلي يومين ونجي
- يمه ماسلمت على الشيخ شلون ارجع هيج
- هسه ابوج يكله بنتي كافي عاد

سكتت وضلت مبوزه ودايره وجهه للجامه وانه سويت الدرب
شبختين من طبينه المنطقه امهه كالت ..
- شهاب عمه نزلني هنا اريد اجيب كم شغله للعشه
- يلا انتظرج
- لاا اني اجي روحو
- هسه لتتاخرين واكفين احنه
- هههه مو اني حضل اسولف ويه ام جاسم ولا ساعه ولا ساعتين
ادري بنفسي روحو انتو اني اجي
- ماشي

نزلت وانه شخطت السياره ومشيت جان تكول ..
- اني ادري رجعتنه كلهه منك مو ابويه
- اي انه رديتكم لين انتي ماتسمعين الجلمه
- شنو شنوووو
- جا انه شحجيت هااااا مو كلت تلبسين مارضيتي كتلج
لاتطلعين بعدني ماماشي واشوفنج ويه زهره
- اني ماردت اطلع اختك لحت عليه وماردت اخجلهه
- اي تطلعين تحطين عباه عله جسمج وتمشين مو عارضه
جسمج للوادم
- هييي هو منو اكو كلهه راحت وبعدين انته شعليك هااا شعللليك
ماكلت لزهره لعد مو هم مالابسه عبايه
- بس لابسه ردان مامطلعه زنودهه وثوبهه مالاطش عله جسمهه مثل حضرتج
- اني احب البس هيج شعليك انته امي راضيه وابويه راضي
انته شكوووو
- انه اكسرنه لراسج ماارضى بهالبس فهممممتتتتتي عندج بيت
البسي بي يم الوادم تحشمين
- مو جاي انته تعلمني الحشمه اني لبست هيج لان حفله وبس بنات وشفتني ماطلعت من اجوي وكاعده وحدي بعد شكو هالحجي
-  مو انه طبيت وشفتج لو طابين ولدهم جان شلون ترديني
اشوفنهم يعاينولج واسكت هااااااا
- معليك عسى مااطب اركص بنصهم ماعللليييييك عندك ستين
بنت عم غيري روح ضبط فوك روسهن اني عوفني
- وحك ابو فاضل اصلخن جلدج عن لحمج ان ماكضيتي لسانج
- اممممممم
- جنه ماعاجبج الحجي
- اكيد غثيث مثلك

طبكت السياره باب البيت ونزلت فتحت الباب وجريتهه وسطرتهه راشدي شك شفتهه ... رفعت عينهه علي وجانت
حمره دم صفنت بوجهي وانه مدخن من الاعصاب ..

- راح تندم ياشهاب صدكني تندددم
- من تحترمين وتكضين لسان الزفت هذاااااا بذاك الوكت اندم
عله طكج
- انته الردتهه  تحمل
- ميللللي منااااا ميييييليييي

فتحت الباب وطبت وانه رحت شغلت السياره ومشيت بسرعه
انه تعمدت كل هاااذ وياهه جان شي بداخلي يريد يعاركهه
جني ماتعودت عله جفانه بس ماردت اطكهه هي اجبرتني
وتستاهل خلي ينكسر هالخشم اليابس شنهي الخلقهه ماخلق غيرهه ...

احاجي نفسي وجان فجاه طكت تاير السياره بالكوه سيطرت
عليهه ووكفتهه وجنت بشارع ماعليه محلات .. كعدت اطلع
بالسبير وافتح واشد .. لحد ماكملت عاد شغلت ومشيت للسلف

هناك كبل سبحت ولبست غير دشداشه وكعدت تعشيت وضليت
اتعلل ويه الولد ونضحك عله صياد ونشاقه لحد ماعبرت ال ١٢
كمنه للديوانيه لكيناهم فارشين كبل تمددنه ونمنه ....

جنت امشي كبال هالزرع واجتي ريح عاتيه تربه وانه واكف
وساد عيني شويه ،، ولن عتوي اسود جبير ينفخ بوجهي وتالي
جلب عله ظهري وركبتي ويخرمش بيه وانه افك بي واصيحن
ومامش حد يسمع .....

- شهااااب شهااااب

فتحت عيني ولن الشيخ فوك راسي كمت راسا وحطيت ايدي
على ركبتي وظهري واعاين منا ومنا كلهه نايمه وانه عركان
والشيخ واكف جدامي ...
- سمي باسم الله وكوم توضى وصلي الفجر
- اعوذ بالله من الشيطان الرجيم باسم الله الرحمن الرحيم شيخ
شجابك هنايه
- اجيتن عله صوتك
- هااا سمعتني والله انه ماعرفن شنهو هالمنام بالعباس كطع
نفسي عتوي هالكبر كبره جاني من نص ريح تربه وجلب
بركبتي افكن بي مايفك ومامش حد يساعد
- خير ان شاء الله خير كوم صلي كوم
- ان شاء الله

كمت توضيت وصليت وانه كل ساع اذكره عاد طلع الضوه
وكمت طلعت للزرع اتمشى ومريت عله نعيم تريكت بيتهم
وللظهر ردينه انه وعمي حاتم وحيدر للولايه ....

انه كبل رحت نمت منعس ما تهنيت بنومتي البارحه ...
غفيت شويه واشوفن هالعتوي بعيونه التجدح واكف مجابنلي
ويهزن بذيله وينفخ علي كبل فزيت وكعدت عركان ونفسي
بالكوه اجره ... دخيلك ربي انه عايزني هاي ضلت العتاوي
النوب علي ....

سبحت وطلعت للكهوه كضيت وكت ..رديت وكت العشه
اكلنه وباجر اطلع ويه بسام للشغل نشد كهربائيات ...

انه هاليوم كِله ماشفت خيال ربى .. نمت هالمره زين براحه
طلعت ثاني يوم للشغل .. وهناك اول ماطبينه صارت عركه
وكبت العيطه بينه تالي عفناهم وردينه للبيت وبسام الدرب
كله يسب بيهم وانه اعاونه بالمسبه ...

جيت اكل اول لكمتين غصيت بالكوه جريت النفس ..
رحت نمت ماعدتلي النومه كابلني هالعتوي وينفخ ويصيح
داير مدايري صوته صرعه لراسي كعدت زهكانه روحي
كمت اريدن اريح راسي ... طلعت للحديقه وشفت ربى
كاعده تقرا من شافتني طبكت كتابهه وكامت عبرت من
يمي وطبت وانه رحت كعدت بالحديقه اريد افهم عليش
هالحلم المايخلص ...

كعد بسام واجه ليه وكال امشينه نطلع للكهوه هو روحه
طافره من شغلته انلغت وانه روحي بزعانه من روحي
وطلعنه شكو كيم لعبناه خسرنه بي ... لا دومنه لا طاولي
ولا حته الورق كِله خسرنه بيهن انه كمت اسب ماخليت
تالي تعاركنه ويه جماعه وكلبنه الميز وبالشافعات يلا
طلعنه من الكهوه ....

رديت البيت وصدك روحي طافره شنهي اليوم الاكشر هاذ
جيت اريدن انام مادامتلي النومه براحه ... هالعتوي يكمز
فوك راسي وصوته خلاني افقد اعصابي كعدت اصيح
وكمت طلعت للكراج وانه لازم راسي اريد اخلص ياربي
شلوووون بيه هاذ ماتحطلياه هنايه بالحلم انه شلون اكضنه
واكطعه واخلص ،......

من ركزت شفت ربى كاعده وحاطه رجل عله رجل وتتمرجح
رحت ليهه وجريتهه كومتهه ...

- هااااي منج مووووو
- شبيك النوب شكووو
- هالصخايم السوده الفوك راسي من فعايلج انه اعرفن هاي
انتي دزيتي علي انه كلت انتي سحاره كشره شيطااااان
- هاااااا هسه شيطان طلعت
- واكبر شيطاااان انتي لجججج وتالي وياج ربى انه اضلن
متعلل من وراج فكيييني واليرحم اهلج بزعت رووووحي منج
- مجايه عليك هاي انته تجيني
- اجيج من ضيمي من الصخام الفوك راسي منج مجايج ميت
عليج
- هسه انته شبيك هيج عصبي
- لججججج نووووم يابت الناااس نوووم ممحصله من وره
سحورتج وشيطنتج هاي انه كلت اعرفن شضامه طلعتي
سحاره بيت شيوخ بتهم سحاررره والله عمي ززززين
- هاي شبيك انته تخبلت ياسحر
- انتتتي تعرفييييين كلش زين لاتغشمين نفسسسج
مو كلتيلي تندم وتحمل هااااا وهاي انه صاريومين ماضل
بله اسود ماوكع فوك رااااسي ... رببببى قسم بالله العظيم
ان ماكفيتي عني اصخمهه لعيشتج وحك علي اخليج اتمنين
الموت وماتلكي كفي عني زيييييين
- تررره زودتهه اني مالي شغله بيك كلشي انته تجيبه لنفسك
وتره اذا ع الندم فاني بعدني ماندمتك
- ياااامحمد شلون تريدني اكضي بيهه التوووووبه لج تره
ماكو عكل براسي بالعبااااس هسه اذا اكضج اهلسن شعرج
وانعنع ضلوووووعج كاااااافي عااااد بزعت مننننج لانننعل
هالليله السوده الكعدت بيهه مالله موتني بيهه وخلصني
- شهاااااب كاااافي كاااافي تره تعبت منك انته شتريد بالضبط فهمني
- كفي عني
- ماشي وانته هم عوفني
- ماشي

هديتهه وراحت طبت وانه رحت للمغاسل فتحت البوري
وخليت راسي جوه المي اهجس حينفجر من الاعصاب
.
.
يتبببع