رواية من فجر ديسمبر الفصل العشرون 20 - بقلم Zoka 🌷

من فجر ديسمبر
🍁
🍁
بالليل دز عليه الشيخ للديوان وانطاني فلوس
وكالي هاي تكاليف علاجه لمحمد ... اخذتهن
ووعدته ارجعهن ليه عبن انه اكره يضل حد
اله دين علي وحته لو عله اخوي ...
ثاني يوم الظهر جانت طيارتنه ودعنه الاهل
والاصحاب وتوكلنه ...
جان وليد ويانه عبن انه انطيته خبر من وكت
الي حجزت وهوه راح هم رتب اموره وطلعنه سويه ...

محمد جان خايف بس يحاول مايبينلي هالشي
وانه جريت خلك وياه وحسبته مريض واداري لين لو احطن براسي سالفته ارده وصل وصل لامه ...

لليل يلا طبينه الشقه وخليته وياي ينام بحجرتي وثاني يوم رجع زين لينه ...
تفاجىء بمحمد لجن فرح بي وهاذ يرطن تركي ومحمد صافن عليه وانه اترجم هنا وهنايه ...

بعد ماارتاحينه من السفر وضبطت كعدتنه
طلعت العصر وحدي للمستشفى وهناك حجزت يم دكتور نفسي وطبيت حجيتله سالفه
اخوي وهوه كتبلي عنوان مصح خاص بالادمان ووصاني شلون اتعامل وياه ...

وثاني يوم رحت اخذته وهوه جانت حالته
مو زينه اهجسه بالكوه مسيطر عله اعصابه
ساعه الساعه ينفجر بالعياط والاعصاب لجن
انه احاول الهي واضل احاجي واكله شوف
هاذ وذاك واضحكه عله البنيات واشتريله
شي ياكله كلساع بين ماوصلنه المصح ..

هناك ضل كاعد هوه بره وانه طبيت تفاهمت
ويه الدكاتره وكالو يفحصوه ويشوفون شني
الخطه العلاجيه اله ..

وبعدين طببته يمهم وضليت واكف وهمه
يسالوه جم سوال ومنهم واحد اخذ عينه دم
منه للتحليل وبعدين جان الدكتور عرفني
عله مراحل العلاج ليه ..

جانت بلاول جلسه علاج نفسي فردي وبعدين
جلسه علاج جماعي هاي يحفزون بيهه روح
العلاج وحب الحياه عدهم وبعدين يبدا علاج
العقاقير ووراهه جلسه علاج تحفيز مغناطيسي للدماغ ويرجع بعدين جلسه علاج
نفسي فردي وراهه ياخذ علاج كهربائي للدماغ ووراهه يزرعون رقاقه تحت الجلد
هاي تساعد حته يتغلب عله حاجته للمخدرات
وبعدين يروحون لازم لانطاليا بمنتجع طبي حته هناك يبدون بناء الذات الهم وعلاج روحي ونفسي هم ...
هو جان يكلي اكو عدهم هناك مسابح وغرف
نوم خاصه ورحلات سياحيه وجلسات صباحيه لليوغا والتأمل وسهرات وسينما
يعني بالمختصر يدارونه من كل ناحيه ويبدون وياه من الصفر يصنعون ليه شخصيه
جديده واخر شي ينطوه لقاح ..

انه تطمنت من شفت شلون يتساهلون ويراعون المريض وراح خوفي من ظني
راح يتعذب بالعلاج ...

جان المركز باسطنبول اسمه ان بي جنه
فندق كلشي بي يبهر العين من جماليته ..

رحت ويه محمد حجيتله شني خطه العلاج
وهوه بس ساكت بعدين رحت دفعت الفلوس
وجان لازم يحضر جلسه نفسيه بعد ساعه

فاخذته كعدنه اكلنه وانه احاول ارفع من معنوياته واشاقيه بس هوه ساكت مايحجي
شي كلت حكه مستصعب الوضع هاذ ..

صار دوره بالجلسه طب هوه وانه ضليت
بره انتظر وافكر شلون اذا صار وكت روحته لانطاليا ودوامي شلون بي ؟؟؟

ضليت ساعتين كاعد وانتظره من طلع بين
عله وجهه شويه الدم رد بي ...
انه رحت حاجيت المترجم الي وياه وكالي
الدكتوره اول ماحجتله تشكرته عله جيته
من العراق لهنا وثقته بيهم وثقته بنفسه لين
ماخله نفسه ضعيف ومتحلي بالشجاعه والقوه
وكالت هيه فخوره بي وكلش متحمسه حته
تصير صديقه اله وانطته رقمهه وكالتله
اي شي يصير وياه يحاجيهه ...
وهوه جانت رده فعله هاديه تجاهه بس هيه
ضلت مصره تحاجي وتسمع منه عن عايلته
ومنو وياه جاي ..

من سالته شحجالهه بعد مارضى يكلي وكال
انه احجيلك اليخص العلاج والتحفيز بس
اي سر عن شخصيه المريض وحياته الخاصه تضل بين هالاربع حياطين ماتطلع
فلا تسالني بعد عنه ..

انه تشكرته وعجبني موقفه خلاني ازيد ثقتي بيهم واعرفن ان اخوي راح يرد احسن من اول عله ايديهم ...

اخذته وردينه للشقه ماوصلنه لتالي الليل عبن
الدرب طويل بينهن ..
تعشينه واخذته حته يسبح وينام .. انه ضليت
كاعد ادخن بره بالبالكونه واجاني وليد حجيتله
شصار هناك وهوه شجعني اكمل وياهم ..

رحت اريدن انام مااكدر لابيدي الثوب ولا
التشيرت ضليت الوبن لحد ماشفته نام فد
مره كمت طلعت التشيرت وخليته بحضني
اشمن بي وغفيت عله ريحته ..
انه اجيب واودي باخوي واعالج بي وانه المدمن ازيد منه ...

مشت الايام وانه كل يوم رايح راد للمركز
لحد ماكالو صارت فتره العلاج السريري
ولازم يضل هنايه فخليته لوحده يمهم بعد
ماوصيتهم عليه وهمه تعاملهم طيب وياه

ثاني يوم مريتله من طلعت من الدوام وطبيت حجرته لكيته لابس بجامه سمائي ناعمه ونايم ومكرفص روحه جوه الغطه .. اجيت ليه
مشيت ايدي عله شعره هو فز وراسا كام
حضني ويبجي انه استغربت حالته هالشكل
شكثر جان بالاول وضعه مو زين لجن ماشفته يبجي هيج ...

- شبيك ياخوي عليش هالدموع
- شهاب انه خايف هالاجهزه هاي اليحطوهه براسي تصركعني دخيلك خويه ردني لهلي
ماريدن اضل هنايه
- سمي بالرحمن خويه شني هالحجي ماعرفنك هيج تخاف انته ابو جاسم الذيب
هيج يخفونك جم جهاز لاااا وسفه ياخوي
وسسسفه شني العمارچي الحوك الزلمه
المايهاب احد تجي تخوفنه جم ضربه مغناطيس !!
- ياخوي تخليني اصيحن واشكن هالبلعوم
تخض جسمي كِله مااريدنهه مااريددددنهه
- محمد خويه ركز وياي ركززز
عاينلي زييين ... تريد تعيش هااا جاوبني تريد تعيش وتكمل دراستك وتشتغل ويصيرلك مره وبيت لو تريد تضل محبوس بزويه بحجره
هااا كِلي شنهو التريده
- اريد اعيش
- اي جا اذا تريد تعيش لازم تحمل هالشي
وانه وياك وكلنه هنايه وياك نريد نساعدك
حته تعيش هذول ماجاي يضرونك لجن هالعلاج صعب ياخوي وانته كده وكدود
شد همتك يابوجاسم اهلنه ينطرون رجعتنه
اريدنك سبع تغلب المرض وتعجب كل هالدكاتره بگوتك واصرارك ولاتستسلم
هسه بدا دربك وانه اعرفنك ماتحب الفشل
عبن انته گوي ولو تريد الدنيه تحطهه بجيبك
وماتهاب هيج انه اريدنك تضل

- بعون الله اتغلب عله نفسي

- اي هيج اريدنك هيج ذيييب مايكدر عليك شي بعد اخوك بنفسك شي جوعان تريد شي

- لا انه اريد انامن هسه اهجس ارتاحيت شوي واريد انام

- نام بعد اخوك نام

عفته ينام وطلعت حاجيت دكتورته ووصيتهه عليه وكالت هذا شي طبيعي بالبدايه بس هسه بالجلسه الجماعيه تتغفير نفسيته ...

تطمنت عليه وطلعت للشقه ماوصلتلهه لتالي الليل .. وكل الليل انه صافن بصورتهه حيل
مشتاكلهه واذكر حضنتهه واضحك ..

الببغاء اسهر يسهر وياي اكرز حب وهو هم
مونسني بشكل ..
خلصن هالشهرين وبدا محمد يتحسن ووجهه
تفح ،، راح سوه تغيير بلبسه وشعره وصار
يتكشخ دايماً ويلعب رياضه كل يوميه الصبح
وعنده جماعه صار وياهم صحبه هم يتعالجون مثله .. وهالشهر لازم يرحون لانطاليا .. انه مكدرت اروحن وياه عبن امتحاناتي بدت ووراي تخرج ماكدر اروحن
وصيت المترجم يضل وياه وهوه ماكصر
تكفل بي وراحو ...

هالشهر انه كِله امتحانات ويومي كله يكضي
بالمكتبه ادرس للبحث .. ماكمت اشتغل لين
مالحك من كثر الدراسه والركضه ويه محمد

وصار وكت حفل التخرج جنت كِلش مستاحش بهاليوم صح هذول كلهم صحباني
لجن موش مثل اهلنه ... وليد مرافكني خطوه بخطوه وزين كل ليله يسويلنه احتفاليه ...

صار يوم التخرج وكبل ماناخذ الصوره سمعت حد يصيح باسمي بالعربي انداريت
ولنه اخوي محمد جاي وضحكته تارسه
وجهه ركض ليه وحضني وكالي ..

- يارفعه راسنه ياخوي مبروك تخرجك ياابن ابوي
- الله يبارك بيك .. يمتى رجعت عليش ماكلتلي راح ترجعون
- ردت افجائك بهاليوم انه كبل ساعه وصلت
وهاي جيتي عليك كبل ردت البسنك هاي بايدي

كِلش فرحت بجيته وهيج اشوفنه رد متعافي
وفرحان ورويحته طيبه .. اجه اخذ القبعه مال
التخرج وحطهه عله راسي وتحاضنه وبعدين
اخذنه صوره الجماعيه وبعدهه صوره انه
والولد ووحدي ويه محمد .. ملى علي فراغ
جبير بجيته ...

بعد اسبوع جانت اخر روحه النه للدكتور
وبيهه اخذ اللقاح وتأكدنه من شفائه ع الاخير
ورد ليه اخوي محمد وصار بهالايام كِلش
كريب مني وتعذرلي عله جفاه كبل ليه وكال
كلشي صار بينه كبل من بعاد بسبت امه ..
انه تقبلت منه كلشي برحابه صدر وصرنه
مانتفارك حته لدوامي يجي وياي ينتظرني اخلص الامتحان ونطلع نفتر ونتغده سوه..

وبالليل مره لكطني اتلمس بالثوب وصافن بي
اجه حط ايده عله جتفي وكالي ..

- جنك عاشك ؟
- ههههه
- هااا منهي هاذي كريبه غريبه
- بعدين تعرفهه
- شلون
- من اتزوجهه
- عليك علييي يعني ناوي عليهه موش لعب
- لاا شني اخيك يلعب عله بنات الوادم وبالذات هاي يحرم علي النفس لو زليت وياهه
- بداعت الخوه كِلي مني
- بعدين كتلك تعرف
- وزواجتك بس لا تطول
- لا ان شاء الله هالسنه انه هم بعد خلص صبري
- ههخخخخخ من يمتى تحبهه
- من سنه
- يمعود بعد وينك وين الصبر
- خايب انته ماتعرف انه بهالسنه شلون مشلول حالي
- والله انه ماعرفن بهالسالفه عود من احبن
يلا
- احسنلك لاتحب خلك هيج تنام وتكعد مرتاح
مابالك هم
- جا عليش تحب اذا تحسبه هم
- هو انه بايدي جا هوه غير مجلب بيه مايرضى يهدني لو بايدي بعلي ولا انطك
حرف من حروفه
- هههخخخخخخ عسى الله ايكتبلك الفرحه
بتالي هالعشك
- ااامين ياخوي امييين

مشت الايام وصار يوم النتائج وطلعت ناجح
بتقدير جيد ،، وليد بتقدير متوسط .. وجانت فرحتي بيومهه ماتنوصف اول شي كلته من اخذت النتيجه
" كلت يمه ابنج نال مراد تعبه ريتج حضرتي
هاليوم وكملتي فرحتي "
محمد وزين وليد علكوهه للدنيا بالتصفير
ويصفكون وليد اخذنه حجزنه بقارب بسيط
وطلعنه بي بالعشره بالليل وهناك اخذنه
ويانه عشه واكلنه بنص الشط والاغاني
كلهه تركي وطك اصبعتين .. جان يوم من
اوله خير وفرح ...

بهالاسبوع بدينه نلملم غراضنه ونحضر ترتيبات رجعتنه للديره ... ونزلنه السوك
هم اخذنه هدايه للاهل وهالمره انه اخذت
حجل جذبني لونه موش مثل هالمتعودين
عليهن لو ذهبي لو فضي لاع هاذ يصير
كله زيتوني طووخ وصاير حجر يلمع بنص
الزخارف مالته ونازله منه اجراس ناعمه
هم زيتونيه ..كلت هاذ مكانه برجل الحبيبه
ماينلبس بغير رجل .. واخذته ليهه ...

ودعنه زين والاصحاب وودعت هالمنطقه
العشت بيهه اربع سنين وكل صاحب عرفته
بيهه ودعته وطلعنه للمطار ...

مااوصلنه اهلنه الا نص العصر وانه جنت
ناطيهم خبر برجعتنه وموصي نعيم يروحن
لعمي حاتم وياخذه هوه والاهل هناك للسلف
وهوه من الصباحيات رايح ليهم جايبهم وجاي

من طبينه السلف تلكونه الجيران من راس الشارع .. حياهم الله وياهلا وياهلا ...
انه جنت ناذر جدام جدتي مطره كبل يوم
الردت اروحن بي اسافر كالتلي وين تكدر
لدراستهم خلك هنايه وشوفلك غير كليه
كتلهه نذر علي اجيلج بروب التخرج
عاد كالت لوان سويتهه صدك اذبحلك
خاروف جوه رجلينك والطخن باب
بيتنه من دمه ...

وهاي انه جنت حاطه بايديه ومن طبكت
السياره كبال الحديقه انه كبل نزلت ولبسته
وحطيت القبعه وصحتلهه ...

- ويننننج ياجده انه وفيت بنذري وينه نذرج
- ياروح جدتك هاي انه نذري محضرته ليك

عاد هلهلت واجه صياد ذبح الخاروف جوه
رجليني وهيه اجتي مسحت بدمه وراحت
طبعت ايدهه عله باب البيت وردت هلهلت
رحت ليهه حضنتهه وبوست راسهه ..
وهيه تشمشم بيه وتبوسني والدموع تجري
واجتي اختي زهره هم حضنتني وطشت
الجكليت علي وداير مدايري وابوي وحته
اختي من ابوي هم اجتي حضنتني وباركتلي
وعمامي كلهم جانو ملتمين حته الشيخ اجه
وباركلي وشاورني ..

- بشرني بالامانه ياشهاب
- رجعت وبالحفظ والصون ياشيخ انه الشهب ماردن ليك خايب
- والله وكفو من الشهب عز العشيره انته
ياابني عزها وفخرهه
- الفخر ليه بيكم

طبطب عله ظهري واجينه انطب وانه عيني
تدور محبوبتي ماهيه .. عاد انه طبيت من
باب المطبخ واشوفنهه .. وهَيج كلبي فرفح
ضحكتي شكت وجهي ورحت ليهه وناسي
من موجود حولنه ..
عاينت لعينه وهيه هم بعدين كالت ..
- حمدلله عله سلامتك .. مبروك تخرجك
ابن عمي
- الله يبارك بيج يوم الالج
- ان شاء الله

اندارت ومشت جوه وانه تبعتهه وجان
يصيحني محمد .. عاد انتبهت انه ناسي
عمامي كلهه هنايه ولازم اروحن يمهم
بس اليهمني انهه شافتني بلبس التخرج
هاي كافيه عندي ...

كعدنه وره جم ساعه حطولنه العشه الزين
هاذ اليرد الروح ومحمد كل ماياكل يكولن
" بوياي هاي النعمه الزينه هاذ الاكل "
وكلهه تضحك ...

ولحد الليل يله فك البيت شويه وكدرنه
نسبح وانام ... وانه ماكعدت لحد ظهريه
اليوم الثاني ..

ورجعت ايامنه بديره اهلنه المامش مثلهه
ديره كلشي بعمارتي يرد الروح ...

كلشي جان زين الا شوفتهه الي علعلت جبدي
كل مااريدنهه تجي لينه تصير سالفه صفح
ومالي حجه مثل كبل واضلن بيتهم واشبع
من شوفتهه وضليت بحسرتهه ...

لحد ماصار عيد الاضحى واجوي والتمينه
كلنه ببيت الشيخ وهناك يلا كدرت اشوفنهه
وهيج ثانيتين بس والنوب هالشوفه تزيد بالنار البكلبي ماتطفيهه ...

رحت لزهره واخذتهه عله جهه ...
- اكول زهره اريدن منج طلب
- اي خويه عيوني ليك كول
- اريدج تاخذين ربى وتطلعين للنبكه هذيج
- هااااااا خويه هااا شنهي كصتك فهمني
- لججج لاتلوفين بالحجي وياي تاخذيهه وتمشين فهمتي
- والله انك حاط عينك عليهه انه اعرفنك
- زهرررررره
- اي اي وعلي رايحه اخذه وعلي

راحت تركض وانه رحت انطيت اكل للببغاء كلهه متعجبه عليه هنايه ومحمد يداري وكت
الي انه ماموجود ..وهسه صار من الصبح
جايين هنايه وضل بالي عليه رحت حطيتله
اكل وطلعت بوجهي للنبكه ...

شفتهن واكفات ويتمضحكن وانه اصفنت
لضحكتهه .. حيل احبن شفايفهه الناعمه
من تضحك ...

وصلت ليهم وزهره تعاينلي وتغمز ...
- هاا السلام عليكم
- هلاا خويه وعليكم السلام
- عليكم السلام
- وشلونج يابنت عمي
- زينه
- ها زينه اي دايمن ان شاء الله
- اي
- اكولن خويه انه اروحن اجيب ماي وارد
عبن انه ريكي نشف مااتاخر
- اي روحي خيه روووووحي
- لا زهره هسه نرجع سوه
- لا شني نرجع انه ماريدن الكعده جوه ويه هذني المصوفرات خلنه هنايه الجو طيب
هسه دكيكتين وارد

راحت ركض وانه ضحكت ونزلت راسي والعب بشعري ورديت عاينتلهه هيه بعدهه
بمثل برودهه تعاين للماي وكلشي هادي بيهه

تكربت صوبهه وكتلهه ..
- بعدج زعلانه
- امم
- مشتاكلج ... عاينيلي اريدن شوفه عيونج
صارلي شهور انه منهن محروم يمتى تحنين
علي مابزعتي من الزعل
- لا
- زين انه كلبي طك من صدج هاذ يبت الناس
المسامح كريم عليش هيج تصعبيهه صارلنه
ست شهور انه وياج عله زعل ماكفى هلكثر
- لا
- ربببببببى
- هاا
- التردينه شني فهميني يابت الناس وانه حاضر بكل شي
- اريدك ماتضل تفكر بيه بس هيج
- هاي اعذريني مامكدور عليهه
- لعد وخر من طريقي
-  دربنه واحد ياربى لا تعندين
- مالي درب وياك شهاب
- ربى انه رايدج بالحلال وهاليوم جيتي لج
حته نفض الزعل ونبدي صفحه جديده
انه تعبان من صدج هاذ اريدن ابدي وياج
باليرضي الله واخليج ام بيتي اخليج حرمتي
- اقدرلك كل هذا بس اني مانسيت الصار
ورجاءاً لا تحاجيني بعد لان ردي مره الثانيه ماراح يعجبك .. من رخصتك

انه غديت اعصاب نار وهيه مشت ...
ضليت احبس باعصابي وانفخ موش هوا
لا دخااان حريك كلبي هاي كل مره اجيبن
ليهه حبي وكلبي بايدي تدفره وترجعه مكسور
ليه ...

.
.
. يتببببع