رواية من فجر ديسمبر الفصل التاسع عشر 19 - بقلم Zoka 🌷

من فجر ديسمبر
🍁
🍁
من هذيج الساعه الكسرت كلبي بيهه ومشت
انه طلعت من السلف كبل بلايه مااكولن لاحد
انه وين رايح ... ومشيت لبغداد رحت لبار
هناك وضليت اشرب بي بهبال ومااهجس
الا روحي ثاني يوم ببيت وليد ..

من كعدت جان نص الظهر .. كمت اريد
اغسل مابيه حيل عاد رديت تمددت وجريت
تلفوني وخابرته رفضني .. وره شويه طب

- هااا يمعود صح النوم
- هاي انه شجابني هنايه
- اييييي غير اني جبتك بس مبين انته مفرمت
عقلك
- عليك العباس كِلي انته شدلاك بيه !!
- دكوم غسل وصحصح وحتعرف شدلاني بيك كوووم يلاا كووم

كمت غسلت واجيت لكيته حاطلي كهوه شربتهه شويه صحصحت وضليت صافن
عاد هو كطع صفنتي وكال ...
- انته شعندك بالبار هاا
- اصيد سمج شعندي يعني
- لك بلا هالسوالف هسه من صدك احجي
يعني عايف اهلك باول يوم عيد وجاي حتى
تسكر هنا !!! فهمني هاي شمسويتلك وهيج
تهسترت
- مامش شي
- لاتجذب انته البارحه بس تسب بيهه وتصيح
لج لييش ياربى ياصخمه ليش
- هاي انه
- لاا عمي .. اكلك تره ماضاله عليهه الدنيه
طز بيهه تروح وحده تجي عشره اشو مكومات البنات شعندك موت نفسك عليهه
- انه ماتحلى بعيني غيرهه شني نسيت لو اذكرك !!!
- اعرف والله اعرف بس شلون بحالتك هاي
هسه انته غير تفهمني شسوتلك دافهم شنصحك احجي اشوف العايل انته هي
- بويه انه مو حاجيلك عله زعلهه من هذيج
النوبه هاي من كبل ست شهور
- اي
- وهاي ضاله ميبسه راسهه لهساع لاترضى
تسامح وتخليني ابده صفحه جديده وياهه ولا
هيه التريدني اتكربلهه بكل شي ماترضى احاجيهه جلمتين تتسودن علي وانه روحي مفرفرحه عليهه كتلهه بويه انه شاريج خلنه
نفض الزعل وبالتردي انه حاضر ماكو ميبسه هالراس وكل مااجيهه بحب تردني مذبوح
بزعت روحي من هالعشك المر
- هاااااا هاااي وحده عنوديه وكبرياء
- حييييييل
- لعد يابه مادام سالفتك ماتنفض الا بيهه بطل
سوالف العربده هاي وروح شوفلك حل تتصافى وياهه مو تجي تلم عليك العالم من صياحك بيهه
- شني شمصيح
- اكله جك يكلي بك .. مو توني اكلك تصيح
ليش ياصخمه حقك انته ماتذكر شي بس من
خابرتني وتصيح وينك ياوليد اني اجيتك كبل
لان عرفتك من صوت الاغاني الي يمك ومن صوتك المطفي هم دريت انك سكران كلت ماكو غير هالبار ادري بيك تروحله وربك
تلاحكتلك قبل مايجروك الامن

- ان اخووووك هاي انه شمسوي وماادري
الله عليك خما حجيت بعد هيج شيش بيش
- اييي هو انته بقيت شي ،،، لاخليت عم ماسبيته لا دنيه وجنت تكِلي انه كله مني عليش رحت وشفتهه لو ضال مطمور اشرفلي انه جلب شكعدني هذيج الليله
وانه اكلك ششفت تكلي زبده زبده
هخخخخخخخخخخخ يالله جان شكلك يفطس
ضحك

- ههههههههه عمي خلف الله زبده ولا غير شي ربك ستر ماجفصتهه

- هسه قابل حاجي يم غريب

- لااا خويي وكفتك هاي ماانساهه

- هسه خلي يولن هذني .. كِلي شحتسوي
وياهه دفضهه عاد مو من يمي مليت ادري
هسه انته بستهه لو ضربتهه بخنجر

- انه ادري بالعباس شعلت صفحه الخلفوني
من خرب بقسمتي هاي عود بنت عمي وهيج
متعلعل بيهه لو غريبه جا شلون

- دشوفلك حل يمعود

- شمدريني انه لو عندي حل اجي عليك
خايب ماتسكِت

- شوف ليش ماتجرب وياهه بشي تحبه
يعني اني اعرف هذني امهات الكبرياء
والخشم اليابس مايجن الا بالعيني واغاتي
واضل ادكلهه ناعم يلا .. برايي ابدي وياهه
صداقه او عوف سالفه الحب والزواج هسه
اجلهه خليهه تتقربلك وتعرفك بلكي تكوم تحن شويه بس ها بعد ماتصالحون ..

- عله كولتك هيه هم هيج لازم اسوي وياهه
انه هالمره اخر مره احاول وياهه وحك العباس لو طلعتلي درب جديد لاطلع حركتي
كلهه بيهه ولو تصير بنت النبي بعد ماالتفتلهه

- دكول يالله هستونه نكول علكيفك وعيني واغاتي هاي هيج عندك

- لا بس بزعت روحي شني اضل كل عمري اتوسل واداري حته ترضى انه لو ماانهه نامت مستشفى وصلت الموت بسببي مااهتملهه زعلت لو رضت لين السوته موش هين بس هنايه انه انغلبت بعد

- هسه دعلكيفك وياهه تضل بالعصبيه والصياح البنيه تشرد منك كتلك بهداوه
ولين تجيك برجليهه

- خلي نشوف بله تاليهه وين توصل

تغديت يمهم ورجعت للعماره ... وكلهه جانت
تنشد علي لجن انه مو بمزاج اكعد واسولف
عفتهم وطبيت سبحت وطلعت تعللت ويه نعيم
وجم ولد من الديره ...

وكضى العيد وانه لا شايفهه ولا اعرفن شي
عليهه كلبي موجر منهه لجن مايجوز ..

وره اسبوع سمعت راح تطلع النتايج مال
سادس انه كلت بنفسي اروحن واجيبهه
ورحت كبل لابو الانترنت وجان كبل
هالسالفه تطول يلا تطلع وضليت كاعد
حوالي ساعه يلا كدرنه نطلعهه ....

دنجت عاينت لشاشه الحاسبه واشوفن اسمهه
والدرجات بويه مفوله ...  سجلتهن يمي وعاينت معدلهه ٩٤ كلت صارت عدنه دكتوره .. طلعت فرحااان الحبيبه نجحت ورفعت راسنه بدرجاتهه ...

رحت لبيتهم كبل طبيت وصحت ...
- وينج ياعمه تعاي ليه
- هلا يمه هلاا خيرك ياعيني
- بنتج وينهه عمه
- فوك بغرفتهه
- صيحيهه بساع يلاا
- اي اي .. وينج يااا ربى تعاي بسرعه نزلي
يلا يمه تعاااي

نزلت وهيه ترفع بشعرهه وتخلي وره اذنهه
عكدت حواجبهه من شافتني ونزلت وكفت
بسد امهه ..

- شهاب دكول شعندك مو خوفتني ياعمه
- عمه اليوم اريدن منج عشه معدل عبن
جايبلج خبر مامش منه
- يعمه دكووول حتى طلي اذبحلك دحجي عاد
- ربى تشوفين هالورقه الي بيدي
- اي
- شتضنين شبيهه
- شبيهه !!
- شي يخصج
- شنو مافهمت
- نتيجتج ياثوله
- جذذذذب
- وحك علي
- ماما نتيجتي طلعت شوكت هاي
- اي يايمه خلي نشوف دفضهه ياشهاب
مو رجولي ماتحملني بعد
- ناجحه عمه ناجحه هلهلي بنتج معدلهه ٩٤
- ياصلاوات على النبي يايمه ياحبيبتي
كولللللييييييييييييييششششششششششش
فدوه رحتلج يابنيتي رفعه راسي والله اوووف
ياحبيبه ماضاع بيج التعب يايمه بنتي دكتوره
كوووووللليييييش

امهه تحضن بيهه وهيه بس دموع وصافنه
بوجوهنه تالي انطيتهه الورقه اخذتهه وتقرا
بالدرجات وردت حضنت امهه ...

- مبروك نجاحج بنت عمي
- شكرا الله يبارك بيك هاي منين جبتهه
- من ابو الانترنت صار ساعه كاعد وانتظرهه تطلع همه باجر ينزلوهه بالمدارس
يعني انتي نتيجتج اجتي كبل الكِل
- شكراً تعبتك
- لاا بويه بالعكس فرحتيني
- ان شاء الله يوم لزهره وتفرح بيهه هالشكل
يايمه مشكور وليدي ريحت كلبي جنت اكوم
واكعد وانخى وادعي الحمدلله ماضاع التعب
- لاا عمه بنتج شاطره وسبعه تستاهل النجاح
- اي وين اكو مثل بنيتي ،، خابر على ابوهه
خابر يلا بساع ياشهاب
- اي عمه صبر صبر

بهالفتره انه جان تلفوني العنكبوت وشويه
دكمه ثكيله وهاي عمتي بس ادغ بيه ويلا ويلا .. عاد خابرته لعمي وبشرته وانطيت
ربى حجت وياه وكال فد ساعه وارجع للبيت

ربى بعد ماشفتهه ضليت كاعد اتفرج تلفزيون
بين مارجع عمي وجايب وياه علب حلويات
سلم علي وحضني وراح لربى حضنهه وضل
يبوس بيهه ودمعته بعينه من الفرحه ...
بعدين فتح علبه بيهه زنود الست وانطاهه
اكلت واجه انطاني وعلى كعدتنه هاي مانحس
الا الباب اندكت كمت فتحتهه جان اتفاجىء
طلع الشيخ جاي !!!

- ياهلاا بشيخنه ياهلا  تفضل
- هلاا بالشهب شلونك بويه
- الحمدلله بخير
- يستاهل الحمد

طب هوه وانه سديت الباب .. من طبيت
الديوانيه عاينته حاضنهه لربى ولاف عبايته
عليهه وهيه مجلبه بدشداشته من وره والكل
ساكت ويعاينلهم وهمه جنهم فاصلين من الدنيا
انه هنايه الدم فار بعروگي مااتحمل اشوفن
حد كاضهه هالشكل ... وشلون بيه انه ماحبيتلي الا هالماكدرن عليهه بشي !!!!

ضليت كاعد واعاينلهه شلون تتبسم بوجه
وهوه حاط ايده عله راسهه ويمشيهه عله
شعرهه وعيونه كلهه حنيه ليهه ...

وانه كاعد وحابس هالنار بيه تالي كلت ..
- احمم ربى امشي سويلنه جاي
- خليهه يمه اني اروح اسويلك
-لا ماما هاي رايحه

راحت واجه الشيخ كعد جدامي وكال ..
- والله ياابو بسام من ساعه الخبرتني انه
هديت الديوان وطلعت عبن انه صارلي
شهرين احسبهن يوم يوم لنتيجتهه وهالساعه
فرحت كليبي بجيتهه

- ان شاء الله دوم الفرح عندك ياشيخ

- بعون الله اشوفنهه بالكليه وتزيدن فرحتي

- ان شاء الله هسه خلي نشوف ياكليه تنقبل

- عيني ابو بسام هي مبينه طبيه

- اي بلكت الله وتصيرن

- اكول عمي هيه ماحاطه بالهه شي تريده
حته لو طبيه شني من قسم الاسنان الجراحه
التحليلات الصيدله هاي كلهه طبيه غير تحدد

- والله بويه انه سالتهه نوبه وكالت من يجي
وكتهه الله كريم عاد هسه مانعرف شتريد

- ابو بسام بلايه زعل اكولنهه ليك

- لا شيخ ماينزعل من حجيك

- شمسه شتريد من كليه تروحن ليهه مايتحاجج بحجيهه وخلهه بالكم ان كالت
تريدن هاي تكلولهه ابشري موش لا زين

- شيخ هسه توصيني عله بنيتي شني انه
ماجبرهه عله شي هاي مدللـه البيت شني
الي بخاطرهه يجرالهه

- اي زين زين

طبت ربى وشايله صينيه الجاي وبدت من
الشيخ وبعدين ابوهه وانه وامهه وراحت
كعدت بسد الشيخ ...

- عاشت ايدج بويه عله هالجاي الطيب
- تدلل شيخي
- هديتج هالنوبه تطول شوي
- لا تسلم شيخي مايحتاج هاي جيتك كافي
- لاه لاه انه راسملج بالي شغلات من يوم
الجنت انومج بحضيني وهالساع جي وكتهن
انه يابويه راسلمج لبعيد كِلش اخليج بمجان
ماتطوله عين بن ادم بس اصبرلي جم يوم
- عسى الله يخليك النه .. اني شوفتك بخير
عندي هاي احلى هديه
- ههههه بالله عليك ياحاتم انته شمسوي
لربك ومنطيك هالبت
- ههههه رزك ربك هاذ ياشيخ .. انه رزكني بيهه وانته رزكك حبهه
- ههههههههههه انه ربي هداني اياهه نعمه
عظيمه جنت ناطرهه من سنين ربك مايكطع
باحد وانه اخوك

انه جنت محترك باعصابي شني بس وياه
تصير جنهه عسل وانه وياي علكم !!

تعشينه ومشينه سوا انه كل الدرب ساكت
عبن روحي طافره جا انه مشتول بالساعه
يم هاذ الوليد وحاير بنتيجتهه وتالي الحب
والشكر والدلال كله للشيخ !!!!!
من خرب بقسمتي السوده اذا حتكضي هيج

رحت كبل لحجرتي طفيت الضوه ونمت
راسي صاير هلكبر من الحريج ..

ثاني يوم خابرني وليد من الصبح ..
- هاا خيرك من صباح الله ذاكرني
- ماتريد تلفون
- اي اريد
- لعد تعالي ونروح نشتري سوا نازل موديل
جديد
- هاا يلا زين جا اتريك واطلع
- ماشي يلا انتظرك

سديت الخط ونزلت سبحت وتريكت واخذت
فلوسي وطلعت لبغداد ... وهناك كبل هوه
طلعلي ع الشارع ورحنه اشترينه تلفون
ال LG جان بوكتهه هستوه نازل وكامرته
واضحه شويه .. اخذناه وطلعنه لبيتهم
تغديت هناك وللعصر رجعت كلت هاي فرصه اروح بيهه لبيت عمي وطلعت ليهم
كبل ...

طلعلي حيدر وسلمت عليه وكعدنه نبحوش
بالتلفون الجديد .. هو جان عنده هاذ الدفتري
لون رصاصي وكال يريد يبدله من ينجح
كل شوي اعاين اريد اشوفنهه مامش اثر ليهه
عاد للمغرب نزلت من فوك عرفتهه جانت
نايمه من عيونهه المطفيه ...

حيدر راح لم هدومه وكال لازم فريقهم
يطلع للبصره عدهم تدريب هناك وسلم
علينه وطلع ويه صاحبه ...

عمي جان هستوه راجع بس تعشى صعد
لحجرته انه جنت اتفرج تلفزيون وتالي
شفت مسلسل مادري شلون هيج طخت
بالي فكره اصالحهه بيهه ...

كمت اخذت محفظتي وطلعت لمحل براس
الشارع هاذ كلشي عنده ومحله جبير ..
عاد اخذت منه الغراض الاحتاجهن ورديت
البيت وخليت العلاكه بحجره بسام وانتظرتهم
ينامون وانه هم جنت منعس شويه ...

كلت لعمتي راح انامن هنايه ورحت طفيت
الضوه ونمت ...

من كعدت جانت الساعه ١١ ونص بالليل
كمت اخذت الغراض ورحت للمطبخ ..
البيت جوه محد بي .. عاد بديت احضر بيهن
وخليتهن عله نار هاديه وصعدت ليهه ..

دكيت الباب ردت ..
- منو
- انه شهاب افتحي

فتحت الباب وعاينتلي ..
- هاا
- امشي انزلي وياي
-ليش
- اريدج بالمطبخ شويه
- ماا انزل مابيه حيل
- ربى جفي الشر وانزلي وياي مااكلج يابت الناس
- كتلك ماا

بهاللحظه طلعت امهه وكالت ..
- هاا يولاد شبيكم صوتكم طالع
- عمه اجيت اريدهه تنزل وياي للمطبخ
كاعد اسوي اكل واكو جم شغله مااندلهن
بيهه شي !!!
- لا ياعمه مابيهه شي
- جا كليلهه خلهه تنزل مااكل بشر انه
- ربى يمه عيب انزلي شوفي ابن عمج شمحتاج يلا بنتي
- ماشي

نزلت وهيه نزلت وراي طبينه المطبخ
ورحت للطباخ شفته بعده يرادله شوي
هيه واكفه ومتجتفه ومرتجيه ع الحايط
تالي كالت ..

- هسه شنو تريدني اساعدك
- اصبري شويه واكِلج
- زين
- اي زين

ماردت اخذ وانطي وياهه بالحجي هسه خلهه
بالوكت المناسب حته تضبط السالفه ..
كتلهه اطلع مواعين صغار وانه كملت شغلي
بيهه .. اجيت شلتهه وحطيتهه عله الكاونتر
يم المواعين ورحت جبت الدله الي بيهه القطر واجيت كتلهه ...

- عايني يازعلانه
- شنو هاي
- هاي كنافه بالطريقه التركيه لاجل عينج
انه سويتهه

درت القطر عليهه وهيه بدت تفور وريحتهه
طلعت وهيه ضحكت من شافتهه هالشكل
- جيبي السجين

انطتني السجين واخذت كصيت الي والهه
وحطيتهن بالمواعين وكتلهه ..

- شايفه هالماعون ماتمدين ايدج عليه اذا
ماتكليلي هاي تصافينه
- امممم
- ايييي بلاا امممم كافي عاد انه جم دوب اضلن اراضيج .. هاي بعد اليوم مالج حجه
عبن انه تعبت وصرفت لاجل نتراضى
- اصلا اني مسامحتك من زمان
- لااا ياملعونه جا عليش هالسويتي كِله
- حته لا تعيدهن وياي بعد
- خااايبه دنجبي هسه اليسمعج يكول رشيتج
بتيزاب هيه كِلهه
- اي اي كولهه
- امشي خلي نكعد بالحديقه ناكل الجو طيب
- اممم
- شنييي بعد
- يلا امشي

كلمن اخذ ماعونه وطلعنه كعدنه بالمرجوحه
ضلينه ساكتين وناكل لحد ما هيه كالت ..
- عاشت ايدك كلش طيبه
- الحمدلله غزرت
- اييي منين تعلمتهه
- جنت اشتغل بمحل حلويات هناك وتعلمت
صنعتهم
- هااا اي كلش زين علمني عليهه لعد
- لا هاي سر صنعه ماتنطي
- لعد واذا اشتهيتهه شلون
- كليلي وانه اسويلج بس ماانطي الوصفه
- يلا شكو بيهه بعد احسن تجيني ع الحاضر
- اي عمي مدللـه
- بجاهكم طبعاً
- دلالج علينه مثل الورد وخفيته ياربى
-شكراً
- من يمتى انتي مسامحه
- من سافرت
- هااا عليش بله
- لسبب يخصني
- ها ردينه
- اييي
- ربى اريد اسالج شي بس عليج العباس
جاوبي بصراحه
- اي ماشي بس خليهه بالك هالشغله
اني دائماً احجي الصراحه والشغله الي
ماريد احجيهه ماجذب بيهه .. اكول ماريد احجي وخلص
- كلششش زين ... جا هسه انه اريدن اعرف
انتي شنهو الي بالج عليه بعد كلشي صار
شتفكرين بيه
- انته ردت صراحه فتتقبل كلشي تسمعه
- اي اعتبري الينحجي هسه ينسد عليه بهالليله
ومانجيب طرواه بعد
- ماشي .... اني مابالي عليك شي مو زين
لان اعرفك رجال شهم والي صار عرفته
لحظه ضعف والانسان خطاء بس اني اكره
عصبيتك الزايده وتدخلك بيه اكثر من اللازم
واكره اجبارك الي على شي مااريده
- شنهو الي ماتردي وجبرتج علي
- الارتباط بيك
- هاا كليلي عليش ماتردين بصراحه
- ماريد لان مو الي بالي
- هااااا جاا ابو نجمه هوه الي بالبال موش صح حجي
- مو شغله ابو نجمه او شي بس اني الي
غايه واريد اوصلهه بي ولتزعل مني بس
اني مااشوف بيك غايتي
- يجوز لانج بعيده عني ماتشوفينهه
انتي اصلا شتعرفين عني حته تحكمين
هيج كبل علي !! تره كل انسان بداخله
شي ويتصرف ويه الوادم شي ثاني وانتي
بعدج ماتعرفين منهو شهاب وشلون داخله
- مااريد اتعمق وبعدين انصدم وماتصيرلي رجعه تفهمني
- افهمج ... زين انتي شنهو غايتج بالضبط
حته انه اكلج اي لو لا ومااجذب عليج وحك هو علي
- صدكني ماعندي شي ممكن احجي واوصفه هسه الك هو بس موقف وممكن او مو ممكن
يصير مامتأكده بس احساس
- ماشي انه مااضغط عليج ولا راح اجذب
عليج واكلج بكيفج اختاري الي ترديه عبن
انه ماتحمل هالشي .. هالبارحه انه شفتج
حاضنه الشيخ نار الله كلهه شبت بيه مو عاد
اشوفنج ويه غيري وجدام عيني وحك علي اتسودن ... انه اول دكه حب ومشاعر صارت
بهالگلب جانت عله ريحتج ياربى اعرفن انتي
ماتحبين تسمعين مني هالحجي لجن انه ماريد
اضلن كاتم هالشي بصدري وتاليهه اتندم
وانه مااجاي اريدن منج شي مااجبرج عله
محبتي ولا راح افتح هالموضوع وياج بعد
لجن اريدن منج شي واحد
- شنو
- تخلينه صحاب ولاتخلين هالحجي والصار
حاجز بينه وشما يصير اضل انه ابن عمج
- ماشي
- للصاحب حك عله صاحبه تره
- شنو يعني اني ماعرف بهالشي
- يعني وكت ما الصاحب تعبان او محتاج شي او مضايك من شي لازم ينشد صاحبه
وهوه لازم يلبي
- يعني وقت الشده ينراد
- اييييه بالضبط
- وهسه انته عندك شي اكدر اساعدك بي
- لاا الحمدلله مرتاح وانتي
- اني بعدني مامتعوده عليك
-هااي شنهو النوب
- اي هسه غير نحجي الصدك مامتعوده على
صداقه احد ويكون قريب هيج وبسرعه هم
- بس لا يطلع ماعندج ثقه بيه
- اي مو ثقه تامه
- رببببى
- اي شهاب منين اجيبلك الثقه التامه واني
كاضيتهه بس معارك وياك احس ساعه الساعه تنكلب عليه وترجع هذاك شهاب الي
عيونه مليانه نار وشرار
- استغفففففر الله ربي صبررررك
لج يامصخمه انه جاي اختنك ببعادج واريدن
الثانيه بكربج حته لو اشريهه بروحي تجين تكليلي تنكلب عليه !!! يمتى حتفهميني يمتتتى
- بالايام ان شاء الله
- ان شاء الله ان شاااااء الله
- اكلك هاي طيبه راح اجيب بعد تريد ؟
- لا انسدت نفسي
- اووي ليش بله
- هخخخخخخخخ شنهي بالله عيديهه
- هههه شهاب
- من رحت فدوا لهالسنون اضحكي بداعتي
اتمنى اشوفن ضحكتج

ضحكت شويه ودنجت وتالي كامت راحت للمطبخ .. شكثر جنت متضايك من وره حجيهه بس هيج بثانيه وحده غيرت مزاجي
كِله .. هاذ اليسمونه الحب ..
نارك وبردك من نفس البني ادم ...

رجعت وهيه جايبه الكنافه كِلهه ويه بطلين
ماي واجتي حطتهن وانطتني الخاشوكه
وبعدين اندارت جدامي وتربعت بنص
المرجوحه وصارت تاكل ومن ادنج شعرهه
ينزل عله وجهه عبن انه ملاحضهه دومهه
حالته وترجعه وره اذنهه ...
شكثر بنفسي حجي ليهه وغزل لكلشي بيهه
لجن ماكدر احجي تونه بدينه صحبتنه ..

- ليش متاكل
- هيج صفنت شويه
- اكل احسن من التصفن
- بله شعرج هاذ لو ناطيته ليه موش احسن
من هذيج الكطوه رباب
- عزه انته شمدريك
- خخخخخ وكاله الانباء زهره ماتضم شي
- ياااا واني اجيب واحجيلهه طلعت ماتضم سالفه
- شحاجيه ولج اشو ماعرف انه
- هههه شوف يعني محاجيتلك كلشي زين
زين اجيت تخرب ثقتي بيهه
- انه الج يا زهره اثاريهه طلعت تضم عن اخوهه
- واخوهه شكو يدخل باخباري
- عبن تهمي
- اممم
- شناويه عله جامعتج
- مادري بعد
- جا يمتى تدرين
- شوف مو اني ما داومت مدرسه ولاعندي اختلاط باحد تخرج حته اعرف شنو الكليات المرغوبه ولا اعرف اي شي عنهن كل الاعرفه لازم اقدم جامعه بس شنو الافضل بالاختيار ماعرفت
- هاا .. زين انه اعرفج عليهن
- اي ياريت
- باعي اجيبلج الدليل واكِلج كل وحده شني
هيه وانتي ضلي فكري منا لشهرين واختاري
- ماشي

صرت اكل واعاين لخدودهه المنمشه وحلكهه الصار احمر وبي لمعه وبداخلي اكولن يمتى
تحنين ومايضل بينه حاجز ...

- شهاب راح تضل سهران
- اي شبعان نوم
- امممم
- عليش تسالين
- هيج بالي شغله .. تضل هنا لو تفوت جوه
- لا اضل هنايه
- زين لعد اني راح اغسل هذني وافرش سنوني واجي
- اي ماشي

راحت واخذت هالغراض وياهه وانه تمددت
واهز بالمرجوحه وصافن بالسمه واكولن
سبحان مغير الاحوال كبل جم يوم جانت
ماتعاين بوجهي هالساع تريدني اضل يمهه

وره شويه اجتي ووكفت جدامي وانه نزلت
رجلي وعدلت كعدتي .. جانت جايبه وياهه
دفتر رسم عريض وقلمين رصاص ومساحه ...
كعدت وفتحت الدفتر عله اول ورقه ..
- من ست شهور اني مارسمت شي
رغم الشيخ اشترالي دفاتر واقلام جديده
بس ماكدرت ارسم شي بيهن ابد وهذا اول
دفتر افتحه منهن
- جانت غصه بكلبج عليهن
- اني حسيت ان كل كلبي راح وياهن
- جا ليش ذبيتي البقيه
- مااحب الشغلات الناقصه واني مايوكفني
شي اذا اريد اتخلى
- انتي مكابره عله نفسج
- وافتخر بهالشي
- بعدني محتفظلج بيهن بكنتوري
- اخذهن ماريدهن
- مكانهن يمج موش يمي
- واني مااريدهن
- ماشي انه ضامهن الج لليوم المناسب
- يايوم هذا
- مادري بس يجي وكته
- الله كريم
- هسه شراح ترسمين
- اجتي بالي فكره من جنت اكل الكنافه
- اي شنو
- هسه تشوفهه

وبدات ترسم بخطوط خفيفه وايدهه سريعه
بالرسم تتمايل بخفيه لدرجه انه ضال مركز
بايدهه اكثر من الرسمه .. جان قلم منهن تضلل بي وقلم تطوخ بي ..

انه ماحجيت اريدنهه تضل مركزه برسمهه
وكِلش فرحان عبنهه تشاركني شي مهم منهه
وكلساع اصفن لوجهه الي صاير شعرهه مثل
الظل عليه من جهه اليسره وبياض ركبتهه
مبين من اليمنه من رفعه شعرهه عنه ..

جنت صافن بتفاصيلهه وانتبهت عليهه تعاينلي
- ها شنهي
- كتلك كملت
- اي شو اشوفنهه

عاينت راسمه ماعون الكنافه وفوكاهه اصبعين متشابجات مثل الي يتصالحون
جان اصبعهه عله اليسره واصبعي اليمنه
ضحكت وكتلهه ...

- هاي وثقتي لحظه صلحنه
- اي عجبتني وكلت استفتح رسمي بيهه
- والله زين ماسويتي حيل عجبتني اكفي
خلي اجيبن تلفوني واصورهه
- ماشي يلا

كمت جبت تلفوني الجديد واجيت صورتهه
وهيه ومدنجه تعاينلهه هم اخذتلهه صوره
جانت فرحتي ماتنوصف بهالساعه ..

وعرفت بنفسي شغله اني كل ماتكربلهه اصير انسى اني اريدن كبل جسمهه وريحتهه
اضل تايه بسوالفهه وصوتهه اهجس جني
بعالم ناعم واتمزلك عليه مابالي شي غير اني
اضحك واعيشن لحضتي هاي ....

- ربى
- همم
- اذا اريدن اتواصل وياج شلون
- شنو تتواصل
- يعني احنه موش كلنه الصاحب للصاحب
-اي
- اي اذا انه ردت شي او جنت محتاج احجي شي شلون وانه ماكدر اشوفنج دايماً وهنايه
انه استحي كل يوم جاي وبالسلف انتي ماتمرين علينه
- اممممم مادري
- لا بالله كليلي شلون
- مادري والله يعني خليهه من نجي ونروح
للنبكه ونحجي
- وهاي جم دوب اضلن انه انتظر جيتج للنبكه
- يعني شلون شسوي
- انطيج تلفوني هذاك العنكبوت واخابرج عليه
- لااا شنو
- اي شنو شنو
- ابويه ميقبل لو يقبل جان هو جابلي واحد
- انه اكِله انطيه الج هديه
- لاا عيني لا
- هيه شني لا ..انه باجر احاجي اكِله صارت
بالكليه وتحتاج تلفون وانه اريدن ابيع هالتلفون اخذه ليهه وهوه بعده جديد مابي شي
- ماريد شسوي بي
- بويه انتي بكل الاحوال مشتريه مشتريه
انطيج هاذ احسن حل والله حته هم مايكلفكم
شي وهم اكدر احصلج وكت الي احتاجج
- انته ليش تحتاجني يعني عندك هواي اصدقاء ومقربين الك هم
- تردين الصدك
- اي
- وحك هالبدل النهار بالليل وخلك هالسبع
سماوات ونجومهه انه من يوم الراحت امي
ماهجست اكو احد بهالعشيره والديره كلهه
يخصني وكريب مني ..ماهجست منهم احد
التجىء ليه وكت فرحي وشدتي رغم كِلهم
ناس طيبه وينشد بيهم الظهر بس انه مانفسي
طابت لا لزلمه ولا حرمه الا شيخه الديره
هالمدولبتني وانه عبر الحدود مسهرتني ليلي عله خيالهه هاي الوحيده الي انه اهجس بيهه
تخصني والكه بيهه الجنت احسه بوجود امي
- ها اي زين
- ههههه شنهي خجلتي
-لا بس بعد لاتحجي هيج ماعرف شرد عليك
- ههههههههههههه كليلي امم تكفي
- ههههه وين الي وسم جانت
- بويه انه الي انسميت والله انه والله
- هههههه لاا انته متغير فد مره
- هسه ماكلتي احاجي ابوج
- عله شنو
- عله زواجنه
- شننووووو
- اقصد تلفون بنتي شبيج مو صارلي ساعه
اكولن انطيج هالتلفون المصخم مثل حظي
- هاااا
- اي لو لااا فضيهه عاد
- مادري اكلك خاف يضوج
- بويه شيضوج تلفون هااذ هو الونسه
انتي خلي يمج وبس انه اخذ رقمج ماتنطي
لاحد ابد سمعتي
- ليش يعني
- هيج احسن لين الرقم من يطلع لجم واحد
بعد ينطش ويضل كلساع واحد داك عليج
من هذول السرسريه
- لعد ماريده اذا هيج
- بويه لا تشلعين كلبي فوك ماهوه مشلوع
انه اجيبلج خط واحطن بي رقمي ورقم ابوج
والشيخ وبس وبعد ممنوع تحطين بي اي رقم ثاني زين
- هسه دكول لبابه بالاول
- يدلل البابه مالتج اكوله عيني اكوله
- شكو تقلد عله حجيي
- يعجبني وانتي ليش متحجين عمارجي
- خايب انه لو اريدن احجي عمارجي اسطرنك بي وادولبن فكرك لجن انه هاذ
ايعجبني ولساني ماخذ اعليه لاتضلن تلاغي
وياي هَيج احسن ليك
- شنهيييي هاااااي لك روووح عمي رووح
طلعتي لبلبان
- جا شني كالولك علي مااعرفن لهجه ديرتي
-لاعمي والنعم منج بس انه اعرفن اكثر
منج
- شلوون بله
- انه حكلج جلمتين اذا عرفتيهن شتردين انطيج
- يلا كول
- Seni seviyorum karım
-شنو ميصير هيج يعني احجي بلغتنه شمعرفني هاي شنو
- هههههههههه مو كتلج اعرفن اكثر منج
- هسه اي فهمنه هالشي غير انته دارسهن
اني منين اعرفهن يعني
- اي حنطيج مجال منا لبعد عشر سنين
اذا اجيتي وكتيلي شنو معناهه شتطلبين
بهذيج الساعه يجرالج
- والله عند كلمتك
- ماعلي هالشارب اذا زليت بكلمتي وياج
- ماشي لعد تعال اكتبهه هنا حته اضل اذكرهه واترجمهه فد يوم
- اي جيبي بس مدامني منطيج مجال هواي
حزيدلج جم وحده هم
- شنو بعد
- Beni tek sevdiğin gibi seviyorsun
- وهاي شنو بعد
- هاي اريدن منج من تعرفينهن ماتكليهن
لي اذا ماتطبقيهن واذا ماكدرتي عليهن
منا لعشر سنين لاتجيبين طاريهن ابد زيين
- اممم مبين شي مهم
- فوك ماتصورين
- لعد كولي عليهن
- لا لا هاي انه نطيتج عشر سنيييين وكت
ولازم انتي تعرفينهن بروحج وها مثل ما وصيتج ماتجين تحجيهن الا وانتي مطبقتهن
- هاهيه ماشي متفقين
- اي
- لعد هسه خلي نام وقت تاخر
- ماشي اخذي راحتج
- تصبح على خير
- تلاكين الخير

راحت هيه وانه رفعت راسي للسمه وكلت
مشكور ربي هيه العافيه درجات وانته فتحتلي الباب لاول درجه فيسرهه ياميسر يالله ..

كمت رحت نمت برااحه وضحكتي ماليه وجهي وكعدت وانه منتعش ماعرف هيج الحب يسوي بالبشر ؟!!!

تريكت ولكيت عمي بعده مطالع كتله ..
- عمي من رخصتك رايدك بحجوتين
- اي تعال ابني كول
- هو انه جيت اكولن ليك انه اريد ابيعن هاذ
تلفوني وكلت بدال ماابيعه انطي لربى هم وراهه شرايه تلفون عبن صارت بالكليه وتحتاجه موش صح حجيي
- ايييي صح ذكرتني بهالسالفه انه رايحه من بالي والله
- لاا انه بارحه فكرت بيهه كلت مدامه جديد
بعده ونظيف حته شخط مابي تدري بيه انه احافظ ع الشغله .. فشتكول تاخذه ليهه ؟؟
- خلي اشوفن خاف بنفسهه غير شي
- عمي هيه شمعرفهه بالتلفونات وشنازل منازل كول جلمتك والتريده حاضر تريد اشوفلك واحد جديد نفس هاذ الاخذته البارحه
حته اوصيلك وليد يشتري لو تريد هاذ بكيفك بعد
- ابني هيه السالفه موش سالفه شعرفهه وماعرفهه بس انه مااحب اخذلهه شي موش بنفسهه اخاف اخذلهه هاذ والنوب تكِلي شني جايبلي مستخدم
- عمي صيحهه رحمه لاهلك واسالهه وفض السالفه
- اي هيج احسن حته هم تصيرن هاي هديتي ليهه اغلب الشيخ بيهه بالاول
- هههههههههه صاير تغار هااا
- وانه عمك اتكرضم عله بنيتي لجن مامش حيله باليد اكومن اصيحهه

راح صاحهه واجه كعد وره شويه طبت هيه
انه غمزتلهه وضحكت عاد هيه خزرتني
- ربى بنيتي هاذ شهاب عنده تلفونه هاذ شايفته مو
- اي
- اي وانه كلت اسألج تردين هاذ التلفون اذا عاجبج لو تردين اجيبلج واحد جديد وبعد انتي
كيفج
- بابه اني الصراحه ماحبيت هذا شكله يخوف
ومبين صعب اريد مثل مال حيدر حلو صغيروني وشكله انيق هذا مبين مال ولد وعنكبوت يخوف ماحبيته
- هاي يجرالج التردينه يابه شهاب تروح
تجيبلهه من هاذ الدفتري مثل مال حيدر
ولون بناتي يلوك لهالوجه الحلو
- صار عمي باجر هوه يمكم واجيبن خط ليهه بعد .. تامرون بشي ثاني
- يخليك الله بويه بس افحصه بالاول اخافن
يطلع صعب يستخدمونه لو بي شي افحصه بالمحل يلا تشتري
- هاي يجرالكم التردونه عمي هسه هاي جدامكم راح اخابر صاحبي واوصي

شلت التلفون وخابرت وليد ...
- هاا خويه صبحك الله بالخير
- خير شهاب شبيك انته وين صايرلك شي
- لاا لاا يمعود شلونك
- انه مو زين من اسمعنك هيج تحجي
- اكِلك انه هسه بيت عمي حاتم
- لك هااااااا يالذيب شعندك هنا من الصباحيات حنيت هاا
- ههههاااا كِلللش خايب اسمعني تروح لهاذ
ابو التلفونات الرحناله البارحه وتشوفلي تلفون دفتري بناتي كون سهل استخدامه
وشكله حلو واريده بالباكيت بعده زيين
- والله طلعت تلعب ع الحبلين يول هسه
درجع لبيتك واني اعلمك مبين جنك محصل
الاوكي منهه
- لا يمعود ع النص بعدني
- هاي نص وكمت تدور تلفونات لو توصل للحلقه شتسوي يمكن تسجل روحك باسمهه
- غالي والطلب رخيص
- ايباااااخ دولي ولي
- هسه العصر اخابرك واريدن منك خبر زين
- اي زين زين من خرب بالحب اليخلي الصدقان يركضون بالهدايا للنسوان من اشتعل سلفاك على هذيج الكعده ياشهاب
- ههههههههههه خاب دروح رحمه لاهلك
هو انه عايز مو الحكومه ماتنطي مفكه
- روح لحكومتك رووح عساك بالزواج والبهذله كول امين
- امييييييييييين الف مره
- انته مستوي امشي روح روح
- يلا عود ردلي خبر
- اي اي
- مع السلامه خويه
- هلا بعد عيني بعد كلبي هلاا

سديت الخط وانه اضحك عليه وعمي جنه
فهم السالفه وهم يضحك من جوه لجوه
- هاي راح يروحله وره الغده
- ايي كلش زين

ضليت اتهرب من نضراتهم واسوي نفسي
كالب خلقتي وهيج وعاكد الحاجب وكاعد
اكلب بالتلفون تالي عمي شفته طلع لشغله
انه هم كلت اروحن للبيت وكمت اريد
اسلم عله عمتي سمعتهه تحاجي ربى ..

- اني مو كتلج هالحجي شيلي من راسج
- ماكدر يمه افهميني
- شنو المتكدرين عليه ها يعني تكسرين
كلمتي وتعوفين رضاي هاي تكدريلهن
بس من اطلب منج شي ماتكدريله مو يابت
بطني مووو
- يمه دخيلج فكيني من هالموضوع كاافي كافي كل يوميه هي والله بزعت روحي
- خلي يجي هو ويتفاهم وياج ويكسر هالراس اليابس
- لوو يموت ولو تحركيني مايصير الي بالج
- شو جنج مستكويه وطولان لسانج هااااا
- ماحجيت شي غلط انتو الي بزعتوني
من هالسالفه ياامي هالمله اني مااريدهه
كوه خما كوووه
- ليييش عيني لييش تاليتج تضلين ترفضين
بهاذ وبذاك وتاليهم يكربسوج بواحد من ولد عمج وترحين هناك بالسلف هي مبينه
- وشبيهم ولد عمي زلم ينشد بيهم الظهر
مو مثل ابن اخوج ساكن الملاهي شراب العرك
- انجبببي لج طولان لسانج

كبل طبيت وجريت ربى وراي عبن رادت
تضربهه وزمخت بيهه ...
- بنت الشيوخ ماتنضرب والبت من تكول
لا ماتنغصب موش اصولنه هاي ياعمه
- ماعليك بيهه شهاب هاي وحده ماتعرف
مصلحتهه وين تريد تهجم بيتي
- وانتي تصلحين بيتج وتهجمين بيتهه !!
انتي ام لو مرت ابو !!! ماتريدن سعادتهه
- لعد اني عليمن حاركه كلبي وميته بقهري
غير اريد سعادتهه واشوفهه دتضيع نفسهه
بايدهه
- مامش سعاده تعلى عله رغبتهه ياعمه
التردي انتي مايوالم بنتج كفي الشر عنهه
وبنتج ماطبت بالعمرين وهيج مستعجله
زواجهه
- اووووف اوووووف شيبتو راسي
اكلكم شيش تكلولي بيش وخر من طريقي وخرر

عفتهه راحت وانه جنت بعدني كاض ايد
ربى وهيه ساكته ومدنجه

- ربى ماتزعلين منهه هاي تضل امج وتفكيرهه غير عن تفكيرج هيه تحسب لبعيد
وماتعرفن شنهو التردي وجاي ادور اليسعدج

جانت صاده لغير جهه وساكته

- شو عاينيلي
- عوفني شهاب
- شنهو اعوفج شبيج
- كتلك عوفني
- ربببببى الصاحب للصاحب
- مابيه شي بس اريد ارتاح وحدي شويه
- انه اعرفن البيج محبوس بهالصدر احجيلي
انه عندج افهمج واسمعج
.
.
يتببببع
" طبعا تأخرت بالتنزيل جان المفروض البارحه بس نص المكتوب لكيتهه ممحفوظ
وانمسح ورجعت كتبت من جديد وحيل انقهرت عليه بس كدرت اعوضه اتمنى يعجبكم "