رواية من فجر ديسمبر الفصل الأربعون 40 - بقلم Zoka 🌷

من فجر ديـسمبر
🍁
🍁
- امشو انزلو بساع
- شني الصاير احجججيي
- خوال ربى جايين وجايبين وياهم جم واحد مسلحين ومن اهل العمايم انزل بساع الشيخ دز عليكم انزززلو يلاا عاد
- سترك ياربي شجابهم هذول ،... البسي جبتج وامشي عاد

طلعت وياه للدرج وانتاني ربى طلعت وهيه تلف بشالهه ونزلنه وكبل للديوان طبينه وجانت عالكه بينهم كلهه تصيح وتزمخ ... احنه واكفين ونتصفن
بالوجوه جان يجون اثنين زلام جرو ربى يمهم

- امشششي بنتنه حابسيهه بيا ذنب وحوش انتووو خماكم وحووووش همجيه
- احتتتتترم نفسسسسك يالي ماتحشم الدار الي انته بي ضب لسااااانك لساعني انه محترمكم عبنكم دايسين بيييتي مووووش هممممج احنه .. عكلنه
يواااازن عكلكم
- هااااا عقلكم الجبييير يحبس بنيه شابه ويه ولد بغرفه !!! هييييج العقل يكووووول
- ااااااانه اعرفن شاسوي ماتجي انته تعلمني تالي هالعمممممر .. وعييييب عليك تحجي هالشي هذول ولدنا وتربيتنه ماتضيعن بيهم فهممممت
- اااني ماعليه بولدكم بنتنه اجينه ناخذهه ونمشي
حابسيهه اللله الاكبررر عليكم
- البت ماتعتب البااااب لاتخلينه نتخارب دامنه اهل اكعدددوووو ونتفاهم بكل شي
- ماااالنه تفاهم وياكم ومانريد منكم شي بنتنه وناخذهه

كبت العيطه بينهم كل عمامي تحجي وتصايح وهذولاك زلمهم يشمرون بالحجي وربى بايد خالهه وانه ابوي جدامي واكف وابوهه يهدي بهاذ ويحاجي ذاك ومامش فايده علكت فرد علكه عاد
الشيخ جر سلاحه وطلع لباب الديوان محد انتبهله
عبن كلهه ملتهيه تتعارك وجاان يضرب جيلتين
والكل سكتت ودارت عليه ... جان يصيح بعلو صوته ...
- مااايضلن بديواااااني غير الخال والعم بلااااايه مطرووووود خلونه نشوفن دربنه

عاد انسحبو ولد عمنه وزلامهم وضلو بس عمامي وخوالهه ٣ وهذاك المغضوب عليه مؤيد وواحد وياه هم يمكن ابن خالهه ...

طب الشيخ وكفل الباب وراه وراح كعد بمجانه
- الكل تكعععععد

كعدنا وربى خوالهه حاطيهه بنصهم وانه بسد ابوي
جان الشيخ كال...
- ابووو مؤيد الضنى يصيرن باسم الاب لو الام
- باسم الاب
- جا البت بنتنه وانه الربيتهه وهاذ ابوهه جاي وتهد وتريدن تاخذ البت وتمشي بحكيش ها خويه
- اخذهه لانكم ماتدارونهه لان يعز عليه بنت اختي والعزيزه محبوسه مثل الحواوين ضلمكم هذا ماينسكت عنه
- احننننه ماضلمنه احد ... وهالعقاب نيته بهالبال
وانه موش زغير وماعرفن كيمه فعايلي ودروبي وين تمشيني .. هالسلف كله انه حامله بركبتي
والزله التطلعن مني تروحن عوايل موش هيتي انه اتصرف دامك يابو مؤيد ماتعرفن النيه شني والغايه شني مالك حك تطعن بوسيلتي
- محشوم ... زين كللنه شنو غايتك حتى نفهم
- غايتي مسروره بهالكلب مالك دخل بيهه
هسه انته جاي تريدن تفج اسرهم مني ؟؟ هاي فجيناه وبعد
- اريدهه لابني
- البت ناهي عليهه ابن عمهه شني نسيت هالشي
- لااا مانسيت بس ابن عمهه تزوج وطلك ومو بحالهه خلي يفك نهوته ظلم النهوه ياشيخ شنو ماتعرف بيهه انقرضت ضالين عليهه ليش
- انه كايلك هالشي موش بيدي بيد شهاب وماعليه حك هنايه النهوه بيده موش بيدي
- شيييخ كول انته ماتريد تنطيهه وتريدهه لابن اخوك
- انه مااغصب شمسه عله شي هيه بكيفهه تكرر مصيرهه ودامك حجيت هالحجايه وجنهه هالسالفه تضلن تجر وتعر خلني اخصمهه
- اي واليرحم اهلك
- شمسه بويه
- نعم شيخ
- تعاي ليه بويه تعاي

كامت من يم خوالهه واجتي ليمه كعدت بسده
كاللهه ..
- سمعتي حجي خوالج بويه شني رايج بي
- شيخ قبل رايي اريد اسال شي
- اي اسالي
- اني سمعت ان مؤيد خطب امه كالت لامي
فبعد هالحجي ليش
- هااا ... شنو ردك يابو مؤيد
- ماكو هيج حجي
- شيخ اني ماخطبت رسمي امي بس حجت بموضوع بنيه وراحو شافوهه بس مصارت قسمه
لان اني رفضتهه لخاطر ربى باقي انتظرهه
- هااا بويه حصلتي جوابج
- اي شيخي حصلته
- هسه كومي امشي اكفي ببدايه الديوان وكوم ياشهاب ويا مؤيد كلمن يكف بجهته .. انتم ضلو كاعدين ماعليكم بيهم خلوني انه اتصرف

وكفت بجهتي عله اليمنه ومؤيد جدامي عله اليسره وربى بالنص وشويه بعيده عنه جان الشيخ كال

- عايني بويه شمسه جدام ربي وجدام هالربع
انه ماجبرج عله شي ولا احكم حياتج بالزواج
جدامج ثلاث خيارات ومامش غيرهن للممات...

ولدنا اثنينهم عزاز علينه واثنينهم رجال واصحاب شيم ونخوه وشاريج ومغلينج واهلهم اثنينهم يحبونج وعدهم انتي شيخه البنات ... اليوم بايدج تنهين هالحرب الي بينهم وبشني تكررين محد يفج حلجه بحرف وحك ابو فاضل اليعترض جيله واحطهه براسه لو اعرفن ادشن بذنبه جهنم ماخليج ترحين لمجان موش راغبته فهالساع الكل سمعت اليعترض بشي ويطلع مراجله علينه بعد هالحجي
بيني وبينه الدم ....

شمسه .. ابن عمج لو ابن خالج لو ماتتزوجين
لاخر عمرج

- خويه
- ابووو بسااام خلني اكمل حجوتي
جدامج هالثلاث خيارات عبن مال غريب يدشن بينه مارضاهه انه ولا خوالج ولا عمامج فهاي سالفه انسيهه ... وهالزلمتين مابيهم كصور ماتردينهم امشي ليه واكعدي بسدي واكصن راس اليحاجيج بعد ويجيبن طاريج عله لسانه .. ماتردين شهاب هساع يفج النهوه ومايربطكم شي بعد
ماتردين ولد خالج تحرم عليه بعد شوفتج ماترديهم اثنينهم تجين ليمي وانه اداريج لكطع النفس
وانتي كيفج بعد
هسه انه عايل ويه احد بيكم
- لاا حكمك مضبوط شيخ خلي نشوف ربى وهو كله قرارهه بعد
- بنيتي اختاري ولاتخافين من شي

جانت واكفه وتعاين للشيخ بطول تفكيرهه وهوه
يعاينلهه وعيونهم تحجي بس وحدهم اليفهمون
وانه اقسم بالعلي العظيم اثنينهم جنهم يتخاطرون بالافكار عبن الشيخ يحرك بحاجبه ويه نظرته ليهه
وهيه حركه وجهه جنهه تفهم شيفكر وجنهم يتحاجون بالعيون ... والي زاد تاكيدي عله هالشي
حركتهه من شالت عينهه منه جن واحد وكطع حجيه وكلب يحاجي غير واحد هيه هنايه انتبهت لينه وضلت تعاين ليه مره ومره لهذاك عاد اخذت
نفس وكالت ...

- اريد ابن عمي شهاب

انه فجيت حلكي وضليت اعاين للشيخ ورديت عاينت لخوالهه وهمه كلهم صافنين مثلي وهيه
اجتي بهداوه ووكفت بسدي كلش عاد ابوي والشيخ كامو واجوي ليمنه الشيخ حضنهه وباس راسهه
وابوي اجه طبطب عله جتفي وخوالهه كامو
ووجوهم مكلوبه كبل مشو من الديوان والشيخ كال

- شهاب اخذ حرمتك وامشو لبيتي وانه الحكم بعدين
- صار

جنت امشي مثل المبنج مامصدك هالصار انه جنت مأيس وكل ظني راح تروحن للشيخ وتكله ماتزوج
او كلت مدامهه كرهتني وبعد الصار يجوز جياد بيه تروحن لخوالهه ماجان عندي امل ولا واحد بالميه تجي لعندي بكل هالهداوه والرزانه مادري
شني الي بالهه وشني الكلبهه هيج ..

طلعنه نمشي واثنينه ساكتين ورحنه لبيت الريم
طبينه وتلكتنه الريم مخبوصه وحاطه الشال عله راسهه لافته عدل انه مادري بيهه تحجبت ماشايفهه صار هواي ..

- شهااب اشنو صار الشيخ وينو
- ماصار شي سالفه وفضت هسه عله جيه كال انطروني هنايه
- اي حياك حياك .. بس مابي شي الشيخ امانه
- اي مابي شي والله هسه يجي
- الحمد للرب فوتو اكعدو

طبينه للهول كعدنا وربى متعاينلي عاد سالتهه
- شعجب هالاختيار؟
- مو حباً بيك بس محتاجتك
- شنننني!
- لعد بعد مل الي سويته بيه شعبالك يعني احن عليك هيج منين من وحي مثلاً
- شكددددد حقيييييره شمااااالج انتي عليش هالحقدد
- ايدي جبيرتهه بعدهه تشهدلك وتوضحلك ليش الحقد ماانساهه بيوم وليله تره واني اشوفهه كدام عيني وانته حتى اعتذار معتذرت رغم انك اعتديت عليه وضربتني ووصلتني للموت وتجي تريد مني حب !!! اليحب ماياذي شهاب عمره ماياذي واني من قبل كلتلك وارجع اكلك انته ماتحبني لانك ماتتحمل شي مني ولا مستعد تسوي شي علمودي اليهمك بس ترضي غرورك وكبريائك الي تشوف نفسك دتكسره علمودي بس بالحقيقه انته دتاذيني
بكل هذا الي موهم نفسك بي بانه حب ..

- لج انه متلوع بيج سنين تجين تكليلي متوهم وكبرياء ياصخام هاذ التحجين بي انتي هو شضل فهمينننني شضل ماسويته الج ليش تطلعيني من ديني ..استغففففففر الله استغففففر الله... جا دامج هيج حاقده علي وهيج انه بنظرج عليش اختاريتيني مارحتي للشيخ

- هذا شي راجعلي الاختيار

- لاااا موش راجعلج دااااامج اختاريتي يعني وراج زواااااج تفهمين وشلون تتزوجيني بهالحقد البكلبج

- معليك اني اعرف ادبر اموري

- ربببببببببى ان جنتي تردين تتزوجيني بهالافكار هاااي انه ماتزوجج تفهمممممممممين

- كيفك انته حر

- ياااامحممممممممد دخيلك الصبرررر ربي الصببر

كمت افتر وانه اعصر بايدي واعصابي مدخنه جان سمعت صوت الشيخ وهوه يصيح ياشمسي وينج ... وضلو يتبسبسون شويه وعاد طب علينه
شافنه كل واحد بصوب وكالبين الوجوه كال...

- هااا جنهه عالكه بينكم النوب
- شيييخ انتم شني تضحكون عليييي
- لااا بويه شهالحجي
- جااااا اسمع حجيهه اسمممممعه اكلهه شعجب اختاريتيني تكلي مو حبا بيك محتاجتك وطلع كل الي بداخلهه الي حقد وكره وسموووم شلون اتزوجهه انه هييييج فهمننننني
- اكعد اكعد ... وينج يالريم جيبي الماي
اكعد وخل نتفاهم ... بويه شمسه تعاي ليه

كعدت وانه اهز برجلي وهيه راحت كعدت بسده
اجتي الريم انطتني كلاص الماي شربته وحطيته ع الطبله ردت جابتلنه العصير اخذته منهه وحطيته
مالي نفس شي اهجس راح انفجر باي لحظه انه بدون شي كاتلني الضيم تجي هاي تزودهه علي
الشيخ كال...

- شمسه شهالحجي ويه ولد عمج

- شيخي متشوف شمسوي بيه انتم ليش متعذروني
يعني دائماً بس تشوفون شهاب بكل شي اله الحق

- لاااا يابويه انتي منين جايبه هالحجي .. هسه انتي فهميني شني الي بالج اريد اشوفن كضيتكم هاي يمتى تصفى .. احجي بويه كل البداخلج احجي شهاب اله الحك يعرفن شني العندج وانه هم اريدن افهمج احجي

- شيخ اني كل مواقفي ويه شهاب جانت عبره عن عركه وكل عركه احصل منه الاهانه بالحجي والضرب ويوصلني للموت مالكيت غيرهن زين هسه الي راحن هذيج السنين فدوه اله بس هسه هاي الاخيره لا ابد لاا يعني يكسر ايدي وياخذني بالكوه من بغداد للعماره ويفشلني كدام بيت جدي
وفوكاهه حرمني منك جنت كل ليله اتلوع بقهري عليك لان نحرمت شوفتك وحجيك واني ماسويت شي يغضبك والله لو ادري مسويه شي جان اني عاقبت نفسي بس ماسويت وتحملت هالعقاب بسبب عصبيته وعدم تحكمه بمثل هيج موقف يعني شراح يصيرله لو جاي ومعاتبني لان مانفذت شرطه هو صح حقه يكول هذا شرط ووعد وكلمه انطينه
بس اني يشهد الله عليه مارحت لبيتهم غير هالمره وصارت لان دريت من امي ان مؤيد خطب وسمعتو الحجي هم وبنات خالي وخالاتي جانو يلحون علينه بالجيه واستحيت كلش منهم وجانت حفله عيد ميلاد ومقررين ان بس تخلص نروح نبات بيت جدي ويه خالاتي مانبقى عدهم والله
بس هو تسرع وماسمع مني شي وخسرني ايدي لمده شهرين وحرمني حتى من اهلي شيريد بعد اكثر من هيج يسوي يعني الله عليك شيخي هو هيج اليحب بشنو اني اعذره واحبه فهمني ؟؟؟ او خلي هو يفهمني لو اسوي وياه مثل ماسوه وياي جان حبني !!!!

صفنه اثنينه ساكتين ونعاين واحد للاخ حجيهه ماينرد عليه بغلط عاد الشيخ كال ...

- شتكول يا شهاب هسه انته احجيلنه شني العندك

- شيخ انه احبنهه من اول سنه جيت بيهه هنايه
من بعد هذيج سنين الغربه هجستهه تملكتني بلايه حرف منهه ومن عرفتهه تتعبني كلت انساهه وضليت شهوور اعاند روحي بيهه والكه مرجعي
ليهه عرفت ماكدرن احيل من حبهه وهمت بيهه
بس منين مااصلهه تصدني .. من تكلين لو جاي معاتبني لو جايني باسلوب شني نسيتي اخر مره جيت بيهه لبيتكم وشلون حاجيتج بضميرج هم سامعه بزلمه حاجي هالحجي لمره وبهيج اسلوب
لا تكليلي نسيتي

- لا اذكره

- وشرديتي علي تذكرين اخاف انج ماتذكرين انه مانسيتهه لساعهه تدكن بكلبي تكليلي رووح من وجهي انه ماريدك اكرهك .. شني ازيد من الكره
بعد ينكال للبني ادم هاي ماتحسبينهه اذيه !! اذيتي بيهه ضعفين من اذاج بايدج لو بجلمه غلط حجيتهه عليج عبن انه جيتج رايد وصالج بكل طريكه كتلج
وتردين برد يكسم الروح نصين .. بسبته تزوجت
وتصخمت بهالزواجه كضيتهه ضيم بضيم ومن جنت احاجيج وادوسن عله جرحي ذاك منج ماتحسبينهه هاي !!! وطلكت وانه ضال عله هالحب الدفني وماخلص خلتني بلايه روح عايش
عبنهه ماتحس وانه النار ماخلت شي بيه ماحركته
ومخليج عله راحتج مازعجتج لو برساله ولا لحيت عليج حته لا تردين علي بهذاك ردج المسموم
ولين انه تعبت من اذلن نفسي لج وانتي تدفرين كلشي اتكربلج بي .. جيتي عليج بهالشكل من نار كلبي بيج لين انت ماتعيشين العايشه ماتحسين هالنار شلونهه ياربى ماتفهمينهه موش انه ماعرفن احب انتي الي ماتعرفين تحسين  شلونه  الحب
وشيسوي بالبني ادم .... ضاله حاقده علي عله هذاك اليوم جا ما وكفت بعينج حالتي من جنت منهار باعصابي من حجيج !!! ماركفت بعينج
عادوني عمامي واهلي وانه ضال مجلب بيج عبن اعرفن ماتريدين ابن خالج ضالج حماي ماتشوفينهه هاي !!! كلشي انسي كلشي عوفي
زين جم مره انه اريدن نتصافى بهالشهرين واحاجيج واريدن انسيج الصار وماترضين حته تردين علي بحرف واحد ... ويوم كعدنه هذيج الفجريه وحجيتلج عليهه ماتحطينهه بالج هاي المايحب هيج يحجي !!! هيج يوصفج !! انتي مالج نفس بيه كولي هيج لاتحججين باسباب مدري منين

جانت مدنجه راسهه وساكته والشيخ حاط جكارته بايده وصافن علينه .. يعاينلي مره ومره ليهه
وضلينه ساكتين هيج لحد ماكطع الشيخ وكال ..

- انه شكثر حال مشاكل بدوواوين من الشمال للجنوب هاذ عمري كِله ماشفت اصعب من مشاكل الحب ماتنحل بالايد .. لا والله اكو جم مشكله حب يحلوهه بالزواج بس يتراضون الاهل تفج السالفه عاد الا انتم مشكلتكم مامنهه مشكله اااانه الجنت احسبن روحي مامثل مصيبتي بهالعشك مصيبه
هسه جدامكم لاشي .. عبن انتم كل واحد بوادي

- حضي المصخم هاذ شيخ

- كلنه حضنه مصخم بويه كلنه .. هسه انه اريدن اكللكم عله شي

- اي شني شيخنه كول

- اريدنكم كلمن يرد لاهله ومحد اله شغله بالثاني
من هاليوم لحد ماشوف هالدنيا شلون تدور اذا الكم نصيب تجمعكم واذا مالكم انتم بعاد وتضلون اهل
بس شني اريدن هسه تكومون تصافون وتذبون كل هاذ وره ظهركم اريدن تطلعون من هالباب وصفحتكم بيضه محد مسجل ع الثاني شي
زييين
- زين شيخنه زين
- ماشي شيخي
- يلا كومو جدامي تراضو

كمنه اثنينه وانه مديتلهه ايدي وتصافحنه وهيه كالت..
- اعذرني لكلشي ابن عمي
- معذوره ..وانتي اعذريني لكل اذاج هاذ مايتكرر ان شاء الله
-  مو مشكله كلشي راح بعد

كام الشيخ وحضن ربى باس راسهه واجه علي طبطب عله ظهري وانه بست راسه وطلعنه
للديوان ... وهناك جبرنه انه وعمي حاتم نتراضى
ورحت حضنته وبست راسه وهوه هم حضني وتراضينه عاد كال ..

- امشو روحو خذو اغراضكم من هذيج الحجره حته كلمن يمشي لاهله

عاد رحنه اثنينه صعدنا وانه جمعت غراضي
وشلت العود وطلعتهن ليم الباب واجيت ساعدتهه
بلمه غراضهه نشيلهن واحنه ساكتين بودي بس احضنهه واكلهه مابكلبي عليج غير الحب اكلهه تسامحني عله كسر ايدهه اريدن امحي تعبهه مني بحضني بسس اعرفن هاذ الشي راح يفتحلنه بواب احنه بغنى عنهه ...

طلعت غراضهه ليم الباب وانداريت سديت الباب
وهيه عاينتلي وكالت ..
- خلص السجن
- اي هاليوم لا ع البال ولا ع الخاطر
- اي .. شهاب اني جنت افكر بحجيك هسه وشفت اني صدك ماحسيت مثل مانته تحس يجوز انته بسببي عشت ليالي صعبه فاعتذرلك عليهه سامحني لاني ماحسيت بالي بيك
- اعرفن موش بيدج مسامحهه ولا يضل بالج شي كلبي ابيض عليج وفاتحلج بوابه لحد مايدفنوه
- عمرك طويل ان شاء الله .. انتبه على نفسك
- وانتي ديربالج عله روحج وروحي للدكتور خلي يفتحلج ايدج وياخذلج اشعه
- ماشي
- طمنيني بوكتهه حته لو برساله لاتخلين بالي عليج
- ماشي

نزلت وشايله جنطه صغيره من جنطهه وانه شلت الجبيره وخذيت العود وياي نزلته حطيتهن يم باب المطبخ ورديت جبت جنطتي هم حطيتهه ورحت ودعتهم ..همه مشو لبيتهم وانه اخذت غراضي ومشيت لبيتي .. تلكتني زهره تحضن وتهلهل
وامي وجدتي اليسمعهن يكول فرجو علي من الاعدام ... طبيت لحجرتي تمددت وانه افكر بهالصار اليوم هالدنيا مضاميمهه لي وحده اكبر من الثانيه بله بعد هاي الهدنه شيصيرن ؟؟؟

رديت لحياتي العاديه اطلع اشتغل بالزرع عبن هالمختبر خسرت شغلتي بي بعد جابو بدالي واحد
والعصريه اروحن لنعيم اكضيهه يمه والليل بالكهاوي العب دومنه وادخن وجايات كلساع
بس جنت كل ماطبن لحجرتي اذكرهه وحيل اشتاكلهه تعودت عليهه جنت مجابلهه شهرين
هسه مامش اثر ليهه .. دزتلي هيه رساله طمنتني عله ايدهه فتحتهه وجاي تسوي علاج طبيعي ليهه
خف حمل هالذنب من كلبي جنت دايماً الومن بروحي علي ...

وليد وره ماشاف الاحوال هديت خابرني وكال اريد اجيبن الاهل واجي كتله هلا بيك وباهلك
وهوه ماجذب خبر يومين ولكيته فوك راسي
بس شني جاي بغير شكل موش هذاك وليد
العفطي هسه جاي متكشخ ببنطرون نيلي وستره
بيجي وقميص نيلي والحذاء والحزام نفس اللون واللحيه شلون مرتبه والمناظر والسياره تلمع والعطر يفوح ..ساعته تلمع من بعيد والشعر مصفط تصفيطه معدله ولا جل ولا شي

رحت حضنته وهوه يضحك ويكلي ..
- هم خلي تكول مايعجبني شكله
- ههههههههه ضاله بالك يامعزا
- والله ولا نسيت كلمه منهه ،،اكلك تشوفني هيه تشوفني وينهه بالمطبخ وره البيت بس دليني
- اثككككككل عاااد وليييد جم مره اكلك صخيمتي اختتتتي هااااي
- ايييي هسه شحجيت ماريد اشوفهه بس هي خلي تشوفني بلكي تغير رايهه الله عليك روح شوفهه وين بداعت الخوه شهااب اخيك حبيبي ماينكسر كلبك عليه شبيك
- لك امشي طب منا الزلم عوووفني خلي اسلم امششي تسودنت متكلي شجاك
- ماعوفك والحمزه

بالكوه وخرت منه ورحت سلمت عله ابوه وعمامه وامه اخذتهه جوه ليم اهلنه وكلت هاذ خطيه كسر كلبي رحت صحت زهره للمطبخ وكلتلهه ..

- امشي شوفي منهو من ولد عمنه بره
- ها شتريدن منهم
- موش عدنه ذبيحه الوادم غير يحطون ايدهم وياي يلا عايني من الشباج شوفي منهو موجود انه بحجرتي
- اي زين زين

مشيت للحجره وخابرته ..
- هااا وين اختفيت وعفتني
- وين واكف انته
- هنا كدام المطبخ دصيحهه شبيك هسه متكلي ينقص من عمرك والحمزه ماباوعلهه والحمزه لك حتى شباكم ملزكينه ومينشاف منه شني درحمني عاد شبيييييك خاطر العشره يول
- لتبجي لتبجي
- لا والحمزه راح ابجي لعد كاعد من السته واتكشخ وخابص الدنيا وامي تمشي وتهلهل وتاليهه ماتشوفني لك دسووووي شي شبييييك
- لتصييييح لتسمعك
- عليك الله صدددك خرررب بحظك متحجي لعد
وينهه هسه بالمطبخ مو
- امشي يلا عاد للمضيف هسه جايك
- يلا اني واااااااكف انتظرك بعد روووحي

سديت الخط ورحت طلعت للمطبخ شفتهه لازكه وجهه بالشباج ..
- هييييي انتتتي وين صافنه
- يمه اسم الله الرحمن
- ووووين دزيتج انه
- اااي موش انه سهيت مدري شني نسيت انته شكلت !
- زهررررره وين بالج
- هااا مامش واحد منهم هنايه اي ماشفت واحد جنت اناظر انه بلكت واحد يمر بس مامش احد
- هااا شو خلي اشوفن ،،، هاذ بس وليد هنايه وين ولو هذول المصخمين

عفتهه تصفن وطلعت رحتله جريتو وخربطت شعره وضل يكمز اخذته للمضيف وكعدنه وجانو عمامي جايين يمنه انه ترخصت وكمت حته اشوفن محمد وين ...
ورحت صحت ولد عمي كاظم ولكيت محمد رايح
يجيب الذبيحه ورحنه ذبحنه وره البيت واخذو الولد اللحم للبيت يطبخوه ... وانه غسلت ورديت للمضيف ...
صح همه جايين مشايه بس هاذ صاحبي واهله اول مره يدشون علينه واجب نضيفهم وشويه واجه محمد شاورني الشيخ من عارف هاذ وليد صاحبي دازله ذبيحه خاصه وكايل هاي وحده لاهله ووحده خاصه لمعزته ...

من سمع هوه هالحجي فرك ايده وكال
- اني ربي يحبني لك هاي بس سمعو اجيت انطوني ذبحيتين لو هسه اكللهم اريد المره شيسوووون
- انته اركد عاااد لاتضل تكامز خلنه نفتهم اهلنه شيحجون
- هم صدك عريس لازم اثكل مو
- هههههههخخخخ بالعباس اانته موش صاحي
- عووفني لك اني متوتر خاف هاي اختك تدك بيه الناقصه صارلي ساعه استعرض طولي كدامهه شو لا حس ولا نفس
- وليييييييد وحك الحسييين جلمه النوب واكوم امطلك هنااايه واكسرن متونك
- سكتت والعبااااس

عفته وكمت طلعت اشوف شراح يسون خاف ناكصهم شي وهاذ اجاني يركص وجلب بظهري
- وين رحت ولك وعفتني خاف زعلت لك
- خااايب بس وخررر مني خنكتني شتررريد
- شبيييك شو متغير عليه
- انته اجفص بالحجي ماتكض لسانك
- هسسسسه شبيك غير صاحبي وامون عليك
لك بابا انته لحد هسه مافهمت اني صاير عندي التباس .. لان انته صاحبي الضلع الكلشي احجيله وهم اخو مرتي يعني شلون فهمني ماكدر الزم لساني لازم اجفصلي بحجايه وواجبك انته تبلعهه وتسكت لانك من جهه ثانيه صاحبي وين اروح لعد المن احجي
- هو شصخم وجهي غير هالسالفه
- اييي لعد دفكهه عاد هبطتني خليتني اركض وراك .. شراح تسون ماتشولنه سمج روبه عدكم روبه
- هههههههه وليد سايم عليك محمد امشي اكعد وعوفني
- هسه اني جاي حتى اكعد شو مدري شلونك انته
اكلك نزلتو التمر مو .. لك بتيتاتي ايييي والحمزه اذكرتهن هسه صارن شكبررررهن يالله محد طلعهن لك امشي نشوفهن امششششي
- هخخخخخخخخاااااااااااي ضالات ينتظرنك

راح ركض للكاع وانه مشيت وراه وخربان ضحك عليه عباله هسه صارن كبار كلش ومملحكلهن
اريد اسكت بعد ماكدرت ضليت اكح واعيط عليه
يكف وهوه طار ليهن...

راح ونزع سترته شمرهه عليه وضل يحفر طلع وحده وكال ..
- لك شو هاي هلكدوتهه يالله
- هههههههه هسه انته غير تنطي صبر واحد يفهمك
- احجي دحجي
- هذنيج بتيتاتك حويناهن ودزيناهن للثلاجات بالمخازن وهذن جدد زرعناهن
- وليييش تصرفون بكيفكم منو كلكم اني اريد اخزنهن اريدهن يكبرن
- لك هنه يضلن هناك فتره ونرد نزرعن ويكبرن يصيرن تواثي ههههه
- مامقبوله منكم هيج والله ابددد ممقبول يعني تلعبون بكيفكم غير تخابرني تكلي جان اني اجيت طلعتهن
- لك اني جنت محبوس
- لعد منو سواهن
- محمد
- انيييي اليوم اعلمه لهالخاين ... وانته مااطلع منا اذا ماترجعلي بتيتاتي اخذهن وياي لبغداد والله مانطيكم وحده تعبي هاااي تعبي
- هههااااااااااي بويه اخذهن حلال عليك
- طبعا حلالي هذني امشي اخذني لهذا حميدااان داشوف شلون يمد ايده عليهن بلا مايكلي اله افصلكم اليوم اصبرولي
- تفصلنه علمود بتيته!!!!
- والله افصلكم واخذ منكم مره والبتيته وياهه وجايز حتى الكاع هم
- ههخخخخخ روح والهوا بظهرك

اخذ الستره ولبسهه وهو كالب خلقته صدك متاثر ع البتيته خطيه لين اول مره يتعب بشي عزيزات عليه ...

ردينه للبيت وهوه راح كض محمد من ياخته وضل يتعارك وياه ويالبتيته ويالبتيته وهذاك خربان ضحك عليه كعد بالكاع وطك من الضحك
وانه واكف واوز بي كلساع اشيشيه عله محمد
عاد اخر شي كال ..
- خلي احاجي شيخكم واشوف اذا ماانطاني طلبي اكلبكم فصل اليوم

وعافنه ومشه للمضيف .. تغدينه وشربنه الجايات
وعاد صار الحجي واهله طلبو زهره مننا ابوي
وعمامي كلهه ماعارضت عبن يحبون وليد وهوه
مدستر اموره وياهم وكلساع من واحد يمدح بي هوه يغمزلي ويتبسم وانه بالكوه كاض ضحكتي
عاد ابوي كال اكومن اسأل البت واردلكم جواب
عبن همه مارضو الا اليوم ياخذون جلمه منه

وضل هوه كلساع ياشرلي يكلي ارجف ارجف
عاد ابوي رجع وكعد وكال ...
- تبشرو المره ليكم

كبل وليد كمز وكال ...
- صلوووو على محممممد واااال محمد

انه هنايه طكيت ضحك ماكدرت بعد اسكت وهمه كلهم يصلون عله محمد وهوه اجه ليمي وخنك ركبتي وكال ...
- فصلتك مره لاعبالك نسيت البتيته شفت ظهر الحق وزهق الباطل ان الباطل كان زهوقااااا
-خنكتني يامزهووووق وخررررر بعلي اثنينكم مهاميج
-صدددك يابعد روحي هم مثلي تشاقى
-ولييييييييييييد
- اني سابقكم لبغداد

طلع ركض وانه حرت مدري اكومن انعنع ضلوعه مدري اضحك عليه ... اهلي كلهم يضحكون وعبالهم فرحان مايدرون هاي خبالاته هيج كل عمره

اتفكو اهلنه وياهم عله المهر وحددو يوم الجمعه الجايه يكطعون مهر السيد ...
انه طلعت ادور عله وليد وين راح وتالي طبيت للبيت واسمعنه كاعد بحجره جدتي ويكرك سوالف
نايم عله رجليهه ويسولف وهنه خربانات من الضحك عاينت زهره واكفه تصنط عليهم من يم الباب عبن باب المطبخ صاايره بسدهه وهيه واكفه تصنط وتضحك ...

اشرتلهه تطب جوه وهيه كبل راحت للمطبخ وانه طبيت عليهم ...
- كواكم الله
- هلاا يمه هلا بيك
- ماتكوم انتته شعندك هنايه
- خايف على ضلوعي شنو نسيت
- لااا بعد صرنه نسابه ماكسرن ضلوعك
- اكيد خما تزوج اختك لواحد مكسر
- هاااا يوليييد ماتجوز
- والحمزه ماحجيت شي شبيييييك شورطني اني

انه اجيت اكضه وهوه زيبك تفلت من ايدي وركض بره طلعت وراه وجريته من سترته
وضلينه نتعارك لحد مااخذنه هدنه ... تعبنه
عاد رحنه لنعيم سلمنه عليه وهو كله خطبت اخته
بعد كل يوم تلكاني فوك راسك ...

وهذاك يضحك وانه اضوج حييييل من يكول جلمه اخته مادري اهجس ساعه الساعه اكسرن فجه
مامصدك راح ازوجن زهره ويضل يصحلي اختك واختك هالسالفه حيل مسودنتني ...

للمغربيه مشو لبغداد وانه ضلت بالي زهره عجب وافكت ؟؟؟
رحت صحتلهه واجتي لحجرتي وكعدنه سويه وسدينه الباب ...
- اكلج زهره شني التغير من حجي كبل موش مدهن ومطيرجي وماعنده شارب شني فهميني خيه

- خويه هوه انه هم ماجنت اريدن اي بس اشو جنه صاير حليو

- هااا حليو كلتي جيف تكشخ وسوه لحيه كمتي تدورين حلوين

- لاا خويه شني ادورن حلوين .. بس شني خويه انه حطيت بالي شلون اشتغل وتغير هذيج الشهور
وشلون ساعدك بالموبايل واشوفنه شقايجي هيج فرايحي انه هم ماحبن الزلمه البومه الوجهه مدلغم صبح ومسيه

- اي جا هاذ اجه عله مايج جنه قرد مايعرف يركد ولا يسد هالحلك اثنيكنم متوالمين مهاميج لاتكضون لسانكم ولا تعرفون الثكل

- شني خويه جا هسه انه خفيفه

- زهررره امشي مناا انه وليد سطرني باليكفي
موش انتي الدور علي لسانج هاذ مايكف امممشي يلاا يلاااااا

- اكولن خويه بس شغيله زغيييرونه

- شني

- انه ادرسن كليه عدهم ؟

- اي جا شلون

- يعني مانتزوج للسنه الجايه موش هيج

- اي اي دامج تعرفين عليش تسالين

- اي جا غير اتوكد منك ياخويه

- امششششي خلي انامن امشششي

طلعت وانه تمددت اريدن انام تعبني هاذ اليوم
هيه زهره رسبت هالسنه بالسادس بالفيزيا مادبرتهه بيهه عاد رادت تبطل بس انه شجعتهه حته تعيدن السنه وكلت لازم اوصي هالاغم هم يضلن يشجع بيهه ومايلهيه بدراستهه ...

ومشت الايام وصار يوم الاربعاء الي كبل المهر
واجتي ربى شفتهه بس جني اول مره اشوفنهه
مدري بالي صافي وضل يتمعن بمعانيهه
ملامحهه كبرانه وصايره هذيج الشابه التسحر عين كلمن يشوفهه بطولهه ورشاقتهه وهيه ليهه سحر بهداوه ماله مثيل من تمشي من يمي جن تهب نسمه بارده عليه مالهه حس بس شعور هيج مشيتهه

ضلت هاليوم كله هيه وزهره وعماتي يتفرفرن بالسوك ومخبوصات وينظفن بالبيت وكالبات عاليه واطيه واحنه متهجولين ...

ثاني يوم الخميس جنت اريدن امشي اشوفنهن وين اختفن وبدربي لاكيت الشيخ عاد صاحني ورحت
ليه وتمشينه كال ..
- شلونهه احوالك
- الحمدلله مرتاح
- صار شي بينكم
- لاا بعاد احنه شيخنه بمعجزه ربك نتكرب
- انه من رايي تشيلنهه من بالك والك عندي المره التنسيك
- شنننني شيخنه شتحجي !!!
- مثل ماسمعت كتلك عندي المره التنسيك ربى
خلهه ماتفيدك ياشهاب لو اعرفنهه تفيدك جان جبرتهه وزوجتهه ليك بس انه عايفكم هالشكل حته تضيعن بينكم السالفه
- لااااااا شيخ عله بختك كول غيرهه
- ماعندي شي اضمه عليك شهاب جا انته موش ابن اخوي هم واريدنلك الزين وهالبت اخذهه مني جلمه ماتفيدك افهمهه عاد موش اضلن كلساع اعيد

جنت واكف صافن عله حجيه وهوه منطي ظهره
للماي وانه صاير جدامه وبهالصفنه عاينت بالمشحوف ربى وزهره وصياد اخذتني عيني ليهم
والشيخ مانتبهت شيحاجيني بس عيني ضلت عليهم
وجان اشوفن صياد كام ودفع ربى بنص الماي
انه انتفضت واجيت اركضن ليهم والشيخ جلب
بزندي ....
- صياااااااد ياااااجلب شيييييخ شوفن ربببى طااحت بالماااي طااااحت
- اركددد عاد وصم حلكك اااانه وصيته ماااعليك
- شوووووصيييييت شماااااك شيخ البتتتت طاااحت اكله
- صمممم حلكك عااااد فضحتنه خلهه هيج احسن ليهه
- مااااتشوفن البت حتخرك شييييييخ وخرررر عنيييييييي
- عووووووفنهه شكتلك ااااانه  البت هيج احسن ليهه
- شنننني احسسسن!!!خااااايب البت راح تمووووت شتحجججججي وخررررر اكلك
- خلهه تموت شهاب البت هيج ترتاح كافي عيفهه عااااد اكلك كاااااافي ماتتتسسسسسمع شني من ولد انته اسمع جلمتتتتي عاااد
- والعباااااس هسه لوووو مو تامر وخرررر منننني البتتتت حينكطع نفسسسسسههه هدننني عاد

نتكثت ايده وركضت للجرف واسمعنه يصيح
- شهااااب لووو عبرت وجبتهه اثنينكم تنفصلون من العشيررررره ولو يجي النبببببي مايشفعلكم عنددددي هدهاااا وارجع عاااااد
.
.
.
يتبع
اليوم بارت مليان احدااااث مليااان 😄✌🏻