رواية من فجر ديسمبر الفصل الحادي والخمسون 51 - بقلم Zoka 🌷

من فجر ديسمبر
🍁
🍁
شلتها ومشيت وعمي جدامي طلع فتح المصعد
وركض ركض اخذناهه للمستشفى ....
ضليت بره واكف والدكاتره يمهه جوه عاد انه
رحت للاستعلامات اشوفن هذاك الدكتور موجود هالليله لو لا .. كالو مايجي للصبح ...

وضليت افتر بالممر وانه ادعي مايصيرليهه شي
شجاني انه وراسلتها .. ضليت الوم بروحي لحد
مااجه الدكتور وكف يم عمي عاد انه رحت ليه
وكال نفس حجي كل مره ضعف بالنبض وضيك نفس ... هاذ كله نعرفه يصير من خفقان مفاجىء وبعدين  تعب وضيك نفس لحد ما يضعف النبض ...

ضليت كاعد بالممر وامهه تبجي عليهه وابوهه ماهداله بال .. وانه بس ادعي ربي يكومهه بالسلامه ومايحرمني منها ..

صار الفجر وهيه عله حطتهه ماصحت انه كل مااشوفنهه بودي اصرخ واملخ روحي انه الجنت
حافظهه من كلشي مداريهه بماي عيني تالي طيحتهه تصيرن من وراي !!!

بالسته الصبح خابرني وليد ..
- ها خويه وينك
- طبيت اربيل وين اروح هسه
- تعال لمستشفى بار
- ها شو من وكت هناك ؟
- ربى طاحت بالليل وجبناهه هنايه
- هااااي شنو شجاهه !! شلون صارت
- مو زينه بعدهه ماصحت لساعهه .. تعال خويه بالله ماضل حيل بيه محتاجك
- جايك يلا هسه مسافه الطريق

ضليت كاعد بره بباب المستشفى انتظره لحد مااجه
سلمت عليه وطبينه جوه راح سلم عله عمي الي جان بالكوه يحجي وعمتي هلت ورحبت بي وردت
كعدت يم ربى انه ماكدرن اعاينلهه اهجس بالذنب عليهه هيج... كبل طلعت كعدت بالممر بعيد عنهم
واجاني وليد ...

-شهاب شنو الصار فهمني
- لك انه جنت مراسل ناديه كبل هيج بس عله كد سلام وسؤال ع الاهل والبارحه ربى رادت تلفوني نطيته ليهه وربك جاب ناديه بهالوكت راسلتني وتكول ها رحت وخطبتهه عفيه عليك وتخابر ويطلعلهه مغلق هذاك الرقم وجايه تسأل هاي شافتهه تسودنت ومامش هيج ربع ساعه طاحت وهاي حطتهه من نص الليل لساعهه وعمليتهه اليوم شسوي مادررررري
- بالله هاي دكه دكتك هسه شعندك مراسلهه
- بويه هيه اجتي وتسال علينه ما ردت افشلهه جاوبتهه شدراني هيج يصيرن
- هسه لاتضل تلوم بنفسك قدر وصار خلي تصحى
وتتفاهمون ان شاء الله
- لك انه خايف عليهه ماضل شي لعمليتهه وهيه موش واعيه لساعهه اريدن احاجيهه ماتحمل اشوفنهه هالشكل وانه السبب بطيحتهه هاي ااانه
-دكول يالله يمعود هسه خلي يجي دكتورهه ويشوف شلون يحلهه قوي كلبك خويي قوي كلبك

للساعه ثمانيه رحت سألت عله الدكتور وكالو اجه
عادد رحت لمكتبه سلمت عليه وحجيتله الصار ليهه .. وهوه كبل مشى حته يشوفنهه ....

اخذ المؤشرات الحيويه وقراهن وعاين للنبض
وطلع كال ...
- مثل كل مره الوضع نفسه ديتكرر فالافضل نخصمه اليوم
- شلون
- عمليتهه جاهزين الهه وهذا افضل شي الهه لان الجسم متعب يريد طاقه ويريد دم حتى يتحرك اذا كلبهه تعبان منين تكدر تكوم على حيلهه بعد
- دكتور خلهه تصحى بالاول مايصير هيج كبل تاخذوهه
- ماتصحى بسرعه اني اكللكم تاخذلهه ع الاقل يوم ثاني واني من قبل كلتلك تاخير مو بصالحنه

انه ماكدرت احجي شي بعد .. عمي انطاه الموافقه
وهوه كال ساعه وتدخل العمليات ....

رحنه انه وليد سحبت الفلوس عبن انه كل المبلغ رحت حولته لحسابي هذا .. ودفعت حساب العمليه وتالي رحت ليهه .. من وصلت ليمهه امهه كامت طلعت .. تكربت ليم راسهه تلمست وجهه ورديت
كعدت جدامهه وكضيت ايدهه خليتهه عله وجهي
وانه مغمض واسمع بس صوت الاجهزه وخوفي وندمي كلهن خلن دمعتي تطيح ووحده تجر الثانيه
ضليت ابجي واحاجيهه ...
- يرويحتي اسف انه والله مالي كصد بشي تدرين بيه ماتملي عيني حرمه غيرج

دنجت وخليت راسي عله وجهه بستهه وصرت احاجيهه يم اذانهه ..
- يا فجري ونور دنيتي رديلي ياحبيبه ليلي من بعدج طال وزادت ظلمته .. ردي لو ماتريدين شهاب رديلي انه ابو نجمه انه حلمج وحياتج
لاتكسرين بيه وانه الشديت ظهري بيج رببببى
تگوي يارويحتي انتي لا تستسلمين جدامنه الدرب طويل كلنه ننتظرج تردين لينه سالمه وعفيه
حياتج الجديده الحضرتي ليهه تنتظرج وشيخج ينتظرج كلنه نطيح بطيحتج حبيبه ....
ربيييي لاتحرمني حضن امي مرتين

ضليت ابجي وكل دموعي تطيح عله ركبتهه
سمعت الباب نفتحت وخرت منهه وعاينت عمي ووليد والممرضين اثنين جايين ...
مسحت وجهي وكمت طلعت بره كعدت وانه كاض راسي واجاني وليد يطبطب عله جتفي ويصبر بيه
شفتهم طلعوهه وجدامي مشو وخذوهه جنهم جرو شرايين كلبي اختنكت بعد ماكدرت اضل هنايه
كمت طلعت شويه مشيت وهجست باذاني صفرت
ورجلي بادت ...

بعد ماهجست الا عله صوت يمي فتحت عيني ماشفت بس غواشه رديت غمضت ومادريت بشي بعد ....

كعدت واعاين لن هاذ وليد بسدي كاعد ويحجي بالتلفون .. ذبه من ايده واجه ليه ..
- ها شهاب تسمعني
- ايي
- شلونك شنو يوجعك احجيلي دايخ شبيك بس كلي
- مادري . شصار؟
- يمعود هبطتني ادري شنو مربوطين ع التوالي نشفتو دمنا نحير بيك بيهه .. صارلك اربع ساعات عله هالنومه متكلي شجاك
- شلونهه طلعوهه؟
-  لاا بعدهم

غمضت عيني وجان صوتهه يرن باذني تخيلتهه يمي وببروده ايدهه تهديني ونمت عله خيالي بيهه

هجست  بعدين عله حس واحد يصحيني عاينت هاذ عمي ..
— شهاب يابويه حاجيني شلون صرت
- زيين
- كوم وجمع حيلك ياابني عليكم اثنينكم انه ماكلبي يحمل طيحتكم كوم عاوني نتصبر اثنينه لحد ما ربك يفرجها

اجه وليد سندني وكعدت .. مرتاج بس اهجس جسمي رخي ...
- شني الصارلي وليد !
- الدكتور كال هذا نوع من الاعياء
- اييي جاي اهجس كل عضل جسمي رخي
- تتحسن ان شاء الله والله وكع كلبي من شفتك وكعت اظلمت الدنيا بعيني حرت شسوي
- ما خلت بيه حيل ... ما طلعوهه !
- لا بعد حيصيرلهم خمس ساعات شديسوون مادري
- دخيلك ربي رحمتك .. هاي لان عمليتين يطولون
- الله كريم .. حنزل اجيبلك شي تاكله يردلك حيلك
- ماريدن شي اكعد لا تروح
- مو بكيفك

راح وانه ضليت اعاين لعمي كاعد ويسبح ضليت ادعي ربي ينطيها الگوه ويشفيهه ..
وره شويه اجه وليد ويحجي بالتلفون اجه خلاه عله اذني ..
- احجي احجي هذا الشيخ
- ها ياشهاب تسمعني
- هلا عمي اسمعك
- هاااا بويه حمدلله ع السلامه شجاك عود انه محزم ظهري بيك ودازك بدالي تروح تطيح !!اثاري كلبك رجيج ماتحمل
- اييي بالله عليهه اي
- ههههههههه حكك بويه العاشك مسلول .. شلون صرت
- الحمدلله
- يلا شد حيلك عمك بحاجتك وياه اكل وشد حيلك
وگوي كلبك يكفينه طيحتهه النوب انته كلوبنه ماتحمل اثنين عزاز بمرض طايحين واحد منكم يشد حيله
- ان شاء الله
- خابروني بس تطلع من العمليه لاتنسى
- صار عمي صار
- يلا ماعندك الا العافيه بويه دير بالك ع روحك وعين عمك
- ان شاء الله عمي
- يلا اودعناك

سد الخط واجه وليد انطاني عصير شربته وجايب وياه اكل ماكدرت اكل اللكمه بحلكي ماتنبلع
فكري وروحي كله يمهه احاول اتگوى لجن حيلي بايد همزين جيه وليد بوكتهه صارت جان هساع عمي ضل وحيده ...

اجه الدكتور ضرب ابرتين بايدي عاد وراهه بشويه هجست جسمي برد وجفوني ثكلت
كبل نمت ...

من كعدت مامش احد هنايه بس اهل المرضى
عبن هالحجره جانت مشتركه بيهه اربع مرضى
هم .. عاينت ساعه ٤ الصبح .. شفت روحي بيه
شويه حيل ... كمت شلت صونده المغذي من ايدي
وسديتهه ومشيت طلعت تلكاني وليد بالممر اجاني يركض ...

- شكومك ولك ارجع نام
- عوفني خلي اشوفنهه لا تكلي بعدهه ماطلعت
- لا لا طلعوهه بس ارجع بعدين شوفهه
- مارييييد ارجع وخر بيه حيل لا تخاف .. دليني وينهه
- شهاب خويه امشي ارجع هسه
-كتلك ويننننننههه
- بالعنايه فوك مابيهه شي بس ارجع ارتاح شيصعدك هسه حتى مايخلوك تفوت لاتعب نفسك
- ميخالف اشوفهه من بعيد

عفتهه ومشيت للمصعد وهوه لحكني صعدنا
وهناك شفت عمي وعمتي حاطين راسهم عله الحايط وغافين .. عفتهم ومشيت اريد اطب بس اعاينهه من بعيد كلبي يتطمن ... ماخلونه
ضليت الوب عليهه تالي نزلت رحت اشوف الدكتور وينه ... همزين طلعت مناوبته اليوم
وحاجيته كالي ...
- هواي واجهنه صعوبه بالعمليه النبض جان قليل بس كدرنا نكمل غيرنا الصمام والدكتور كمل من بعدي شغله والحمدلله وضعهه استقر
- الحمدلله دكتور يمتى تصحى
- بعد خلي شويه ترتاح ويمشي الدم بجسمهه براحه. مثل قبل هي تسترجع حيلهه وتصحى لا تستعجلوهه
- يعني مامش خطر عليهه بعد
- لااا الحمدلله زال الخطر ان شاء الله ظرف يومين تصحى وترجع تمارس حياتهه طبيعيه بس تاخذلهه فتره راحه بالبدايه وبعدين ماعليهه شي
- الله يبشرك بالخير بالدكتور مشكوور جزاك الله الف خير

رديت لعمي وحجيتله شكال الدكتور وهوه ضل يحمد الله ويشكره جانت وجوههم غاديه تراب من التعب والسهر .. للعشره الصبح بالكوه قنعتهم
يمشون للشقه يرتاحون شويه .. عاد انطيت العنوان لوليد واخذهم وانه ضليت يمهه ... بره مااشوفنهه
لجن احس بيهه احاجيهه بيني وبين روحي وادعيلهه واتصبر بگوه الله وقدرته ...

رجع يمي وليد ونزلنه اكلنه سوه وخابرتني زهره
تتطمن علينه ... وللعصر اجوي عمي وحرمته
واحنه مشينه للشقه ... رحت سبحت ووليد كبل راح نام ... انه رحت اخذت ثوبهه شميته ومليت ريتي منه ورحت نمت وانه حاضنه ..

كعدت بالسبعه بالليل كعدت وليد راح سبح وطلعنه
اخذنه اكل ورحنه للمستشفى .. خابرت عمي نزلو
للكافتريا وكعدنا اكلنه بس عله كد الي يجيب الحيل

راحو عمي وعمتي ودزيت وليد هم يرتاح وضليت لوحدي اتامل ساعه الساعه يجيني واحد ويكلي صحت واشوفن عيونهه السبني واضمهه لكليبي
الغادي جمره بفراكهه هالايام .. 
التلفون ماسكت كلساع واحد مخابر والشيخ كل ساعتين يسال ها ماصحت واكله لا يكلي ربك رحيم اصبر ..
ثاني يوم هم نفس الحال ... اليوم الثالث ويه صلاه الفجر انه جنت اصلي بالممر رفعت راسي ادعي ليهه بالصحه والعافيه وقريت ايه الكرسي والفاتحه هديتها لام البنين وكمت جاي امشي وجان يجيني الممرض وكالي مريضتكم صحت ...
كبل فتت ركض ليهه وعاينت الدكتور يمهه يفحصهه وطلع طمني عليهه وشويه وطلعوهه
لغير حجره .....
خابرت عله وليد وكلتله ورديت خابرت الشيخ
ورحت ليهه .. سديت الباب وكعدت يمهه
جانت مغمضه كضيت ايدهه ورفعتهه بوستهه مرتين .. فتحت عينهه ابتسمتلي ...
- حبيبتي يارويحتي حمدلله عله سلامتج
- الله يسلمك
- يابعد حيلي انتي كلبي غادي نار عليج مامصدك رديتي ليه سالمه ومتعافيه
- اممم
- احجيلي يارويحتي شني الي تحسينه هسه
- جوعانه
- ههههههه يخسى الجوع بنيتي هساع بس يجون اهلج انزل اجيبلج الاكل
- وين ابويه بالشقه؟
- اي خطيه تعبو من الكعده هنايه من كبل العمليه همه سهر وتعب
- صارت العمليه؟
- ههههه صارت وصارلهه ٣ ايام ماتحسين بيهه بوجع بشي
- لا كلشي ماكو

كامت تتلمس صدرهه ورادت تكعد اجيت سندتهه
وهيه تعاين بوجهي .. كعدت بسدهه وتلمست وجهه دارت عينهه مني عرفت بعدهه زعلانه كربت بست خدهه وطرف شفتهه وخرت راسهه

- ما مشتاكتلي  ؟
- لا
- جذابه تغطين عله شوكج بالزعل تكابرين
- حتى لو شعليك بيه
- شني شني جا منو العليه بيج !
- اكو اهلي انته روح لخوالك احسن
- هههههههاااااي لج عليش حاطتهم بالج بويه مايسون تراب جدامج
- اي قنع روحك بهالحجي مايمشي عندي
- يعني شني !!

اندكت الباب وطبو اهلهه ركضو ليهه امهه تحضن بيهه وتبوس وابوهه هم وانه واكف يم وليد واعاين ليهم .. عفيه نسوان تطبن للموت وماتنسن سالفه دخيل الله شكد راس يابس

عفتهم ومشيت بره لحكني وليد ..
- هااا شبيك شو هم بعدك كالب خلقتك
- عوفني لخاطر الله
- شكو شبيك غير افتهم .. خاف بعدهه زعلانه؟
-ايي
- ههههااااي والله عبالي نست طلعت ذاكرتهه قويه
يلا هسه خليهه شويه تدلل عليك
- الله كريم
- شبيك راضيهه فد هديه كم كلمه حلوه هسه اني شويه واشحتهم وضلو وحدكم
- ههه شيطلعهم بعد لو يجي الحمزه
- ايييي بعد راح يجلبون يلا خليهه من نرجع
- مااصبر لذاك الوكت
- لعد شلووون !!! اني من يمي دخت
- خلي افكر

ضليت كاعد بالممر ويه وليد لحد ماصارت ساعه سبعه كتله..
- امشي وياي
- وين !
- هسه تعرف امشينه يلا

اخذته وطلعنه من المستشفى اخذنه السياره ومشينه
طبكت يم محل ورد .. انه وياه شكلنه مجموعه حلوه وكتبت ليهه عله ورقه وطبكتهه ..
" الله يديمج لكلبي .. ياچنج ماي بارد يشرب بتعبي
يمدري شهالضوه بطاريج.. تغنيلي شمع معلوك كل ماذكرج بدربي .. ياكون العافيه تندار جا درت عله عافيتج .. من طشو سواد وصار كلش ليل كاسرت السمه بنيتج ..
ماعله كلبي اغلى من راحتج وضحكتج "

ردينه طلعنه نزلت لاسواق اخذت ليهه باكيت  كامل بسكت ابو الشوفان هيه كلش تحبه وبعدين خذيت وياه علبه مال ككو اعرفن هذني ماتكدر تقاومهن ..

- اكلك شهاب هسه هي بيهه حيل تاكل كل هذني
- لك بويه هيه استلهه شتحسين تكلي جوعانه شتريد ازيد من هيج
- لااا بشرفك
- والله شبيك اصلا ماتدري سوت عمليه بعدهه جانت مسكنه من الابر هسه تلكاهه تصيح من الوجع
- ههههاااااايييييي هاي جانت فاصله من الدنيا واحنه هنا نحترك
- اييي بعلي حركت شيب الخلفوني هاي تاليتي عمري ٣٠ سنه وافتر جني مراهق ادور هدايا من خرب بقسمتي السوده جان انه المفروض جهالي  هساع بالمدرسه
- هههههههههههه هالنسوان بله اسود علينه ياخيي
لا نكدر وياهن ولا نكدر بدونهن

ضلينه نضحك شويه وردينه للمستشفى دزيت العلاكه والورد بيد وليد كلتله ينطيهن ليهه عبن
اريدنهه تهدا وترضى براحتهه ...

طلعلي وضلينه نحجي ويه زهره وهيه سوالفهه ماينشبع منهه .. عاد تالي عفتهم يحجون ورحت
كعدت بره بباب المستشفى .. اشتم هوا وتالي اجاني وليد

- شعندك هنا ماتصعد تكعد يمهم
- لا عوفني هيج احسن
- هاي شبيك شنو انته الزعلان لو هي
- موش زعلان عليهه لجن هيه ماتريدني يمهه
خلهه براحتهه من تحط عكلهه براسهه وتبطل سوالف جهال هاي عود اروحن ليهه
- هاي انته حالتك حاله لك يمعود هسه هي بحال عرك دعوفهه كتلك تدلل عليك شبيك
- خلهه تدلل ماكولن شي بكيفهه شتريد خلهه تسوي
- مادري مدافهمك والله
- لك بويه تعبان انه جنت اريدنهه بس تصحى اتطمن عليهه اريحن كلبي غادي نار عليهه وتالي
تجيني روح لخوالك احسن مالي خلك سوالف جهال هاي خلي تهدي اعصابهه وعود اروحن ليه
- هم صدك بعدك تعبان خليهه هسه بس تاكل يتعدل مزاجهه

طلعنه بعدين جبنه الغده ودزيته يوديلهم .. روحي تلوبن عله شوفتهه لجن اريدنهه تحس وهيه تطلب شوفتي وضال مبتعد عنهه حته شويه تبطل تكابر
وياي .. الي علي سويته ليهه بس مااحبن مكابرهه هاذ ...

كاعدين بالكافتريا واجانه عمي ..
- ها كواكم الله
- الله يكويك عمي حياك
- شمالك بويه شو مااشوفنك تكعد يمنه موش كتلت رويحتك عليهه شجاك هساع
- هيج عمي مامش شي كاعد ويه وليد انتم اخذو راحتكم وياهه
- لااااا شني تمشيهه علي اعرفنك بويه جا انته
الطحت من طولك ساعه الخذوهه هساع تخليهه لينه وانته بعيد ومترهي. !!!! ماتدش عكلي هالسالفه !
- ههههههههه  هيه شلونهه  هسه عمي ؟
- جاي تبجي
- شنننني عليش تبجي
- تكول هنايه شي ينغزهه بصدرهه
- وساكت  عليش ما خابرتني كلتلي اجيبن ليهه الدكتور صدك تحجي عمي هيه هاي سالفه
- تهدااا بويه شمالك كليتني بلحمي هاي جيتي عليك
حته نمشيله سويه
- استغفر الله امشينه عمي

كمت مشيت كبله ورحت حاجيت الدكتور اجه ويانه طبيت بالاول وكلت لعمتي تلبسهه شالهه
وعاد يلا اجه الدكتور حاجاهه وتلمس مجان العمليه وهيه تبجي وتصيح كل مايطخه عاد كال
هاي الخياطات ماتخوف هسه بابره وحده تسكن

وصى الممرضه الي وياه تضربهه الابره وطلع
جانت تعاين ليه وامهه تهدي بيهه درت وجهي وطلعت كعدت بره ..

وره شويه عمي طلع واجه ليه وكال ...
- راح نمشي احنه نجيب جم غرض من الشقه
انته ديربالك عليهه
- خليكم عمي انه اجيب لاتتعب نفسك
- لا لااا انه اريدن امدد شويه ارتاح واغسل
وامهه تجيب جم هدم ليهه
- عله راحتكم عمي يوصلكم وليد
- اي يلا وينه هوه

كمت صحت عليه جان يخابر .. عاد اخذهم ومشو
رحت طبيت يمهه ..
تعاينلي ورافعه حاجبهه ماحاجيتهه شي رحت كعدت عله الكرسي واكلب بالتلفون ..
شويه وكالت ..
- مرتاح مو ؟
- اييي كِلش
- طبعا حلالك الجو وياهه
- ههه هاي شمالج انتي
- هم جذب وكول مااحاجيهه
- واذا حاجيتهه انتي شعليج موش تكلين معليك بيه انه هم اكلج معليج بيه زين !

ضلت تعاينلي باعصاب وجان تريد تنزع حلقتهه
عاد كمت ليهه كضيت جتفهه وهيه ادفع بيه
- لاتجي يمي وخرررر ماريدك روح الهه هاي حلقتك اخذهه وامشي روحلهه ماريد اشوفك
- اشششش بنتي بسج تحركين موش زين عله جرحج اهدي عاد
- معلييييك بيه وخررر ماتحمل واحد جذاب مثلك يبقى يميييي روووح

كضيت وجهه باثنين ايديه وركزت بعينهه دنجت
بوست شفتهه بالاول جانت تضرب بيه وانه ضليت اتلمس خدهه وابوسهه لحد ماهديت وخرت منهه وخليت وجهي عله وجهه ..
- ماتحلى حرمه بعيني غيرج بسج عاد تعبتي كلبي
بزعلج ولج بويه لو اريدنهه مااجيج واهد عشيرتي لخاطرج تعگلي عاد
- لعد ليش ضميت عليه
- وغلات حبج ناسيهه للسالفه هاي من زمان اجتي سلمت ورديتلهه ماردت افشلهه لا مخابر ولا حاجي ازيد من هيج وكلشي جدامج شفتي وقريتي
تسودنتي علي هالشكل وطيحتي كلبي عليج عليش يابنتي
- انته مو تدري بيه ماتحمل يحاجيك احد غيري
لا والنوب منو الي جانت قبل زوجتك ماتحس بالنار الي بداخلي من وره هالسالفه
- احس بيج يرويحتي وافهمج مايتكرر هالشي بعد
وعيونج بس تهدي
- وليش عايفني من الصبح لحد هسه هاا
- حته تفكرين بعگل وتشوفين شكثر انه تعبان وانتي جاي تزيديني تعب بزعلج هاذ
- امم
- شني اممم
- اييي مشتاقتلك لتعوفني هيج
- هههههههه تعاي لحضني يابوووويه يريحتج
ترد حيلي

حضنتهه واشمن بركبتهه وابوسهه .. بعدين كعدت بسدهه وخليت ايدي وره راسهه والعب بشعرهه
وهيه كاضه ايدي وتلعب بالمحبس ..
- شكراً ع الورد حبيبي كلش حبيتهن
- تدللين يرويحتي شعندي غيرج .. اكلتي البسكت
- لا مااكلت جنت ضايجه لان انته ماكو
- هههههه هسه اوكلج بايدي

كمت فتحت الباكيت اخذت واحد منه واجيت كعدت بسدهه فتحته وحضنتهه ووكلتهه ... من كملت اكل
بوست راحه ايدي مرتين وخلتهه عله وجهه ..
- ايدك بيهه حنيه العالم كله
- موش مثلج يارويحتي
- ماكدر بدونك ابو الشهب لا تخليني اغار والله اتخبل واضل اجفص وياك بالحجي ادري بس كلبي يحترك اعذرني
- ههههههههه بويه انتي بس خليج وياج وشتردين سوي بس كلشي ولا اشوفنج تتعبين هنايه انه انهزم
واضعف ماكدر عله شي يتعبج وياذيج
- امي كالتلي عليك تخربطت بيوم عمليتي
- هه ايييي شسوي كلبي ماتحمل يشوفنج رايحه مني وزعلانه
- اسم الله على كلبك حبيبي .. بعدك تعبان ؟
- لااا كل الحيل ردلي بشوفتج
- فدوووه اروحلك .. شهاب
- ياعيونه كولي
- هذا اثر العمليه يروح ؟
- ماعليه شي بنتي لا تفكرين بي
- اذا ماراح شلون
- وشني يعني هوه خط صغيرون عليش شايله هم
- يعني انته ماتضوج منه هيج اكو بنص صدري
- اششش لاتضلين تمسلتين بهالافكار انه احبنج بكلشي بيج شني واذا ضل اثر هو خط هلكدودته لا يقدم ولا ياخر والعباس لو حجيتي هيج نوبه الثانيه
ازعل عليج
- لااا شنو تزعل بس غير جنت افكر بيك خاف تضوج
- هسه انه هم عندي بايدي اثر مال هذيج الضربه تذكريه ؟
-اي
- اي هم تضوجين منهه !
- لااااا
- جا انه عليش اضوج ؟؟؟؟ ولج بنتي انتي عكلج بالحب صغير كبريه
- امممممم
- لا هله بدينا
- ههههههه مشتاقتلك
- وبعد
- واحبك
- وانه اعشكج ولهان بيج

دنجت بستهه وبعدين خابرنه زهره خليتهه تحجي وياهه ونضحك عله سوالفهه وحجت ويه جدتي وامي ومنال  ....

ثاني يوم  فحصهه الدكتور وكتبلهه الادويه الي تستمر عليهه و طلعناهه للشقه ..

جنت كل يوم اكعد وياهه واشتريلهه اشكال الحلويات ونضل نسولف ونتفرج عله افلام باليوتيوب ابوهه شويه خف علينه وكضاهه طلعه وفره ويه حرمته .. وليد مكضيهه يفتر بالسوك
ويشتري لزهره ولامه ومكضيهه صور ...

وره اسبوع بدت تتحسن صحتهه واخذتهم كلهم
ويه ليال وادم لشلال بيخال .. ماجنت اخليهه وحدهه ايدي بايدهه ونتمشى وكل شويه اخليهه تكعد ترتاح .. انه طلعتهه لين جانت متضايكه من الحصره بالحجره وجبتهه هالمجان عبن موش عالي ومتعب زين تكدر عليه ..

وره يومين ردينه للعماره طلعنه كبل للسلف
تلكانه الشيخ يطك بهالفشك لسلامتهه وحطو
الذبيحه جوه رجلهه ذبحوهه وهيه مغمضه
خوافه ..
تلكتنه جدتي تطش الجكليت وتهلهل وعماتنه
كلهن جني يسلمن عليهه .. عفتهم فاتو جوه وانه
مشيت للشيخ طمنته عليهه وهوه جان طاير من الفرح بجيتهه حته الريم راحت ليهه ويه امهه

ضلو هالليله يمنه نطيتهه حجرتي ونمت يم محمد
ووياي وليد .. من الصبح نزلت صبحت عليهم
وسالت عليهه كالو بعدهه نايمه .. رحت للحجره
سديت الباب ورحت تمددت بسدهه العب بشعرهه
واتلمس رموشهه ونمشهه بلايه ماتفتح عينهه كربت راسهه لصدري .. ضحكت وحضنتهه
- ها ياحلوه موش ناويه تكعدين
- لااا
-  زين جا انه راح اطلع لصحباني وانتي ضلي نايمه
- وييييين شعندك من الصبح وياهم
- هههههاااااااي هاا اشوف صحصحتي بس سمعتي بروحتي
- ماكو طلعه والله ابد تضل وياي لعد اني عليمن جايه هنا حتى تعوفني وتروح !
- انتي اكعدي وضلي وياي انه ماامشي

كامت عله حيلهه وتعدل بشعرهه .. جريتهه عضيت خدهه وجان تطب عمتي داهمتنه
عاد انه كبل دفعتهه وعمتي تكول..
- يااا ولك شعندك هنا من صباحيات
- اصبح عله حرمتي شني شبيهه يعني
- ايييي نعرف هالسوالف عيني اكعد راحه

ضحكت وطلعت كبل واشرتلهه تجي بساع ..
طلعت غسلت ولحكتني لحجره جدتي ..
- حبيبتي تتريكين وتاخذين دواج موش تنسيهه
- كأنك راح تطلع لو احساسي غلط
- ههههههه لااا احساسج صحيح اليوم حنه صاحبي
واريد امشي اشوفن نعيم وبعدين اروح احلق واخذ وليد ونروح للحنه
- شنووو يعني اليوم كله ماشوفك
- اعوضج بالليل يارويحيتي
- اممممم نشوف
- ماوصيج لا فره ولا خيل ولا صعده ونزله كلساع
- اييي يعني ويين اروح لعد عفيه اريد اشوف الهيام مشتاااقتلهه
- تشوفينهه بس موش تركبينهه والعباس ماتخلصين مني لو دريت بيج ركبتيهه
- شهاااب
- بلا دلع هسه لا يعني لااا
- يعني شسوي بس اضل كاعده
- اي شكو بيهه هاي عماتنه يمج وبناتهن سولفي وكضي وكت وياهن لو اله تعبين نفسج يلا ترتاحين حبيبه استري علينه ماصدكت كمتي بسلامه ماريدن يصيرلج شي بس اتطمن عليج للاخير انه اخذج ونركبهه سويه زين
- اممم اذا هيج اوك زين
- يابعد روحي يلا ماوصيج عله روحج بعد
- لا تخاف بس انته انتبه ع نفسك و لاتتاخر
- صار تدللين

مشيت اخذت وليد ورحنه لنعيم سلمنه عليه وكعدنا يمه تغدينا وطلعنه للحلاق ... وتالي ردينه البيت
راح وليد يسبح كبلي وانه رحت لحجرتي وصحت عله ربى اجتني وجنهه العافيه .. صدك هالشيخ من كال ليهه اريدنج بجمال جديد وحياه جديده ..

لابسه ثوب بصلي فااتح كلوش ومكحله عينهه
وشالهه نيلي كاعد ويه زراك عينهه جريتهه
وسديت الباب تلمست وجهه ..
-عليش هالجمال بويه تردين تجلطيني
- هههههه لاا اسم الله هسه قابل شمسويه هي دشداشه
- ناعمه هالدشداشه حيل خذت عكلي
- اممم صير حباب
- ماضل شي واطلع هالحباب من عينج اصبريلي
- ههههههه نشوف منو يطلعه من منو هههه
-هااا جنج ناويه النيه
- كُلششش
- عاايزج بويه هم بالعرس وتشلعين كلبي وتخليني اصيح الويل بالله حته اجتلج واجتل روحي وراج
- يممممه عززاااا تخوف انته كلشي تسوي
- جا ديري بالج علي زين
- حاضر ابو الشهب من عيوني
- حضري هدومي خلي اسبح
- تدلل

راحت طلعت تراكسود والمنشفه اخذتهن منهه وبين ماانتظر وليد يطلع من الحمام وكفت يمهه
حاضنهه وهيه تكلب بالكنتور تختارلي لبسه للحنه
انه عايف كلشي ومركز بريحتهه وبهالجسم الطري شتكلي اكلهه اي لحد ماندكت الباب رحت
فتحت جان وليد كبل غمزلي عاد صحتهه ومشت
جدامي راحت للمطبخ وانه طبيت سبحت ومن طلعت لكيت وليد مبدل ومكمل وواكف يمشط بشعره ..
شحته ولكيتهه محضرتلي ستره بيجي وبنطرون جينز وقميص سمائي فاتح .. دايماً اتفاجىء بترهيم اللبس عدهه انه مافكر اجمع هيج الوان دايماً احط البيجي ويه الاسود لو النيلي بس هيه تدمج عكس مامتعود دايماً وهاذ الشي احبنه بيهه عبن دايماً
تدورلي الاختلاف ...
لبستهن وصحت عليهه اجتي ..
- وين الساعه ؟
- هو ردت اسالك تريدهه سبورت لو هاي الفضي
- كيفج
- سبورت احلى وحذائك والجواريب محضرات
- تسلمين ..العطر
- شتسوي بي مكافي كل هذا بعد عطر !!
- هههههه ولج بويه جا شلون غير تكمل الكشخه
- كافي هيج والله ماكو يروحون يشمون عطرك من بعيد وماشاء الله عليك عطرك قوي ويفوح قبلك
- بويه حته هنايه هم الغيره جا هوه عطر متكليلي شمسوي
- ماكو ماااكووو ماحب احد يشتم عطرك غيري
مفهوووم كافي مخليتك تتكشخ وتطلع
- هههههااااي لا انتتتي تردين اطلعينهه بالعطر ماتكدرين تسكتين ادري بيج لازم تلكيلج فد سالفه تنكين بيهه
- يعني هسه هاي جزاتي فوك ماافكر واحضرلك تجي تكلي تنكين !!!!!
- جا هسه انه مجذب موش وكفتيلي ع العطر
- هاك هااااك حط اشبع

كمت ليهه جريتهه وسديت الباب ..
- شكووو جاي عليه روح تعطر وامشي حتتاخر
- ماريد العطر
- لعد شكو صار ساعه تعاركني علموده
- اي ماريد هذاك اريد اتعطر بيج من ريحتج الخذيتي كلبي بيهه

حضنتهه واشمنهه جان تكول ..
- انته واحد لوتي والله بكلمتين تلوف السالفه وتنسيني العركه كلهه
- هههههه افتخر بهالشي
- اممممم حشتاقلك مو تتاخر
- صار تدللين

وخرت من حضني وتخوصرت وكالت ..
- تسمع الوصايا ابني .. لا حبيبي ولا روحي ولا مدري شنو لا تبوس كل واحد مسموحلك بس العريس البقيه بس تسلم عليهم .. لا تشوف بنيه ولا بنيه تشوفك هاي اهم شيييي حتى اذا شفت او لمحت من بعيد بنات يباوعن عليك تنطيهم ظهرك او روح اصلا من كدامهم
-ههخخخخخخخخخخخ فد نوبه خلي اتحجب والبس العباه واكعد
- شهااااب مو وكت ضحكك تره صدك احجي
- لااا بويه شني سالفتج ادري هسه انه عيوني عيون صكر اعرف بيهن يعاينن ليه
- ميخالف الي تلمحهم توخر منهم شهاب اغارافهمني لا تعبني فدوه حبيبي
- صااار حبيبتي فهمت حافظهن والحسين وادري بيهن بس هم تهدي شويه مايصير هيج
-هسه مشيهه هالمره وع الجايات تدلل
-  ههههخخخخخخ لاااا شبعنه خبز

وليد جان يندهلي طلعت ليه شفته ورديت للحجره
اخذت محفظتي ومشطت شعري ورحت بستهه
وطلعت وياه ...

جانت الحنه بالولايه .. كل مااجي اسلم عله واحد اتذكر حجيهه واضحك وخذيت بوصاياهه
صارت نزلات المهاويل والهوسات علكو الدنيا
وليد كلش نعجب بهالفقره وانطلق وياهم يهوس
موش شايف عرس شروكي من كبل هنايه يختلف موش مثل اهل بغداد اعراسهم بسيطه هنايه يعلكوهه علك للصبح .....

للتسعه بالليل مشينه وطبكت عله محل حلويات اخذت ٣علب زنود الست وماعون كنافه خليتهن بعلاكتين وردينا للبيت ...

طبينه سلمنه عليهم جان الكل بالديوانيه كاعدين
ابوي وعماتي وجدتي وامي والبنات وربى وامهه
ومحمد عاد نطيت لعمتي علاكه والثانيه خليتهه
عندي .. جان عمتي الجبيره كالت ..
- هااا الثانيه المن
- لبنيتي

واكف يم الباب ومديت ليهه ايدي عاد هيه كامت
ركضت هيه وتضحك اجتي كضت ايدي خذيتهه ومشيت ورانه يصيحون ويحجون والضحك صار بفلس .. خذيتهه ومشينه بره للنبكه ..

كعدنا وهيه خلت العلاكه بحضنهه واخذت اول قطعه زنود وكلتني وهيه تضحك وانه حاضنهه
بعدين صرنا ناكل الكنافه ..
- احجيلي التزمت بالوصايا
- اييي وحك العباس اي
- والبنات
- بويه لا شفت ولا انشافيت ارتاحي
- ايييي ريحت كلبي جنت بقلق والله مادري هيج الحب يسوي بالانسان مااحب تطلع ولا تنشاف ولا تسوي اي شي بس كدامي تبقى مرض هذا مرض
- ههههههههه عسل عله كلبي منج يارويحتي
- امووووت عليك وعلى حجيك الحلووو ابو الشهب
- وانه اعشكنج ياحلوه
- حبيبي اريد ارجع للدوام
- شلج بي بنتي خليج مرتاحه
- شهاب وراي كومه شغلات اسويهن يعني حفل التخرج مابقاله شي والبحث كلشي ماعرف عنه
ولا المواد راح ارسب اكيد
- لاااا بويه شاطره انتي مينخاف عليج بس موش هالاسبوع عله الوراه خليج هالاسبوع ارتاحي وكملي علاجج وروحي للكليه بزودج
- اممم ماشي زين تساعدني بالبحث تره صديقاتي كلهن مشتغلات بي بس اني كلشي مامفتهمه شسوي
- ولا يهمج اجيبه لج جاهز
- هاي شنو منين !
- مكومات حبيبه اجيبه واترجمه الج وتقري تفهمي وتروحين تقدميه سهله السالفه لا تشيلين هم
- يارووووحي مدامك عندي ماشيل هم لشي اووف كلش ريحتني بهالحجي جنت كلش متخوفه من هالسالفه
- لا شتردين يجرالج ياكليبي بس امري
- امممم اريد انته تاخذني باول يوم دوامي
- ها عليش بله
- هههه مو اني كلت لصديقاتي انخطبت بس مكلتلهم منو شكد رادن كلتلهم مفاجأه خلوهه من اداوم فاريد يتفاجون بيك وهنه جانن حاطات عينهن عليك اااااخ شكد حلو هيج هالشعور يجنن
هيج حطمت احلامهن واخذتك هههههه كلش حلو
- متسودنه انتي موش ربى الاوليه
- سودني حبك هههه
- يافرح كلبي بضحكتج بويه ماتحمل فراكج خلنه نتزوج ونخلص
- حبيبي مابقى شي بس شهر ونص
- وشيكضيهن
- وياك اني حبيبي قابل وين اروح كل ماتشتاقلي تعالي اشوفك واني كل مااضوج اخابرك وهم اشوفك ونطلع وبعدين هسه انته لازم تلتفت لشغلك
كافي صار شكد هملته ورانه زواج ومصاريف
كافي تسخت
- اي بعلي ذكرتيني بي .. جا اذا هيج السالفه حسبي حسابج كل خميس اجي ليكم اجيبج تباتين يمنه والسبت اردج لاهلج
- ههههه وين ابويه يقبل هيج
- شني عمي بايك ناهب بالحلال انه جاي اخذج
- اي ماكلنه شي بس نجي ونبات وكل اسبوع هاي مادري ابويه يقبل بيهه لو لا
- يقبل مايقبل انه عندي اهم شي اشوفج واحضنج
والحسين شايل هم هلكبر عله روحتج بويه والحسين مامتعود ماكدر اذا مااشوفنج جدام عيني
شيكضي يومي بدونج
- اووي يروحي والله اني هم حشتاقلك بس لازم نصبر هالكم يوم وباقي العمر كله يمك ماروح
- لاا هم جم يوم وامشي اخذني لاهلي جا ماعرفن بسوالفج
- اي هاي اجازه ماتنحسب
- شكد يعني اجازه يوم ؟
- شنو يوم اقل شي ٣ ايام
- خييررررج تردين تهجمين بيتي ٣ ايام وين اروح انه !!
- هههه هم اخذ اجازه بيت اهلك
- ماريد اجايز انه .. انتي ترحين الصبح ترجعين بالليل ويمكن اضل يمكم شعندي رايح نتعشى ونرجع
- اذا هيج لعد نبات سوه يمهم
- يلا مانعترض مدامج يمي صار نبات يومين هم موش بس واحد
- اييييي هيج تمااام

صفنه شويه ع الماي وبعدين كالتلي ..
- حبيبي اريد انطيك شي
- شني ياعيوني
- غمض وانطيني ايدك

غمضت وهيه حطت ايدهه البارده بايدي الدافيه
هدوء يعم هالمجان والجو كِله ماسمعتهه تحركت ولا كالت شي بس كاضه ايدي .. شويه وجان ..
.
.
يتبع