رواية من فجر ديسمبر الفصل الثاني والخمسون 52 - بقلم Zoka 🌷

من فجر ديسمبر
🍁
🍁

غمضت وهيه حطت ايدهه البارده بايدي الدافيه
هدوء يعم هالمجان والجو كِله ماسمعتهه تحركت ولا كالت شي بس كاضه ايدي .. شويه وجان
توخر ايدهه وتبتسملي ..
- هاي شنو
- انته كول شنو
- جن دكات كلبج بايدي احسهه
- اي هاي هديتي الك .. مدامني عايشه راح تضل تحس بيهن وتحسني قريبه منك
- يارويحتي شلون هيج
- ببساطه وبعمق احساس
- دايماً تفاجأيني بشغلات ماتخطر بال بني ادم
- هاي صنع خاص بس الك هههههه

جريت ايدهه بوستهه وهيه خلت راسهه عله جتفي
وبعدين مشينه للبيت ...
ثاني يوم مشو بيت عمي وانه رجعت لشغلي
جان عندي هواي شغل متاخر عليه وضليت يومين انه ماطلع من البيت كله عله اللابتوب اعوفه ساعه عله كد الاكل ووكت النوم .. لما خلصتهن انه جسمي متكسر .. رحت لجدتي دهنتلي جتوفي وظهري شويه فكن ولليل عاد طبيت سبحت بماي دافي يلا راح التشنج منهن ....

وره يومين المغربيه خابرني نعيم وراد مني اجي ليه .. عفت كلشي ومشيت ليه ..
طبيت سلمت عله اهله وشربنا الجاي وضلينه وحيدنه كالي ..
- خويه اريدن نلعب دومنه لو نطك هالزار مثل كبل
- غالي والطلب رخيص هساع انزل الطاولي ونطك هالزار للصبح

صحت عله اخوه جابه لينه ورحت ساعدته يكعد وجبت الطبله وحطيته عليهه وكعدت جدامه وبدينا نلعب ونضحك هرجنا  البيت بصوتنه ... عاد وراهه تعشينه سويه وخليته يتمدد يرتاح ردت امشي مارضى جلب بيه الا ابات يمه هالليله
ماكسرت بخاطره وضليت وياه ...

تفرجنا ع الاخبار وبعدين رحت  كعدت يمه وطلعت باليوتيوب مقاطع اهداف عالميه وضربات جزاء واهداف حره وهوه كلش يحب ريال ضلينه نتفرج فيديوات عليهم لحد ما كال ..
- انه تعبت شهاب خلي نام بعد مابيه
- اي خويه براحتك نام
- لا افرشلي يمك بالكاع
- لااا خويه وين هنايه مجانك مرتاح بي عليش بالكاع نايم
- انه بنفسي انامن بسدك هاليله يلا كوم افرش لينه يلا لا تماطل بالحجي
- هاي بويه يجرالك التريده

وصيت ابوه عله الفراش وجابوه لينه فرشتله بسدي وكومته جان يحضني انه هنايه كلبي حسني بي شي عاينت لوجه يتبسم عاد كلت ليه ...
-نعيم بالك شي ؟
- لاا مامش شي
- زين مرتاح لو اكو شي مضايكك
- لا ياخويه مرتاح الحمدلله
- زين جا تعال تمدد يلا

خليته يتمدد بفراشه وغطيته ورحت سديت الضوا
واجيت تمددت بسده جان تخابر ربى .. رفضتهه ورجعت خابرتهه ..
- هلوو حبيبي
- هلا يرويحتي شلونج
- الحمدلله بخير وين انته
-بيت صاحبي نعيم بايت يمه هالليله
- هااا اي زين خليك يمه احسن
- اي شخبارج
-ضايجه منك ليش يعني اليوم كله متحاجيني لارساله لا مكالمه
-ههههه حكج علي اعوضج تدللين
- اممم اذا تعوضني لازم بالحقيقه
-ايي صوت وصوره هههه مباشر .. تدللي
- هههه هاهيه لعد انتظر التعويض
- ان شاء الله هسه نتخابر بعدين ماشي
- اي ماشي تصبح على خير
- تلاكين الخير

سديته ونعيم كالي..
- تدري خويه انه حيل فرحان ليك عله هالنصيب
- هاا عليش
- عبن انه ما شفتك بيوم تضحك هالشكل ولا سمعت صوتك هيج جن طاير من الفرح ويه بني ادم مثلهه
- ههههههه خذت عكلي هالبت بعلي طيحتني وانه النجر
- هههههه مامش نجر جدام الحب .. امانه الله عليك لا تضيعنهه من ايدك لا بعصبيه ولا حته بغلط منهه عبن مامش احد يريحك ويسعد كليبك غيرهه
حافظ عليهه ياخوي لاتغرنك الدنيا بعدين وتكسر كلبهه
- لااا ياخويه شني ماتعرفني انه لو يمرن علي دهر  ماابدلن هالحبيبه ولا عيني تمليهه غيرهه
- اي عفيه عليك ياخوي هيج خلك سند وعون ليهه عبن هيه شكد ماتلاكيك كريب منهه ومحافظ عليهه
تنطيك الازيد بعد هنه الحريم هيج تتكربلهن بشبر يتكربن ليك متر عطوفات وكريمات نفس
- اييي والله صدكت ياخوي
- اكلك باجر ذكرني انطيك شي واذا ردت تمشي وانه بعدني نايم تلكاه جوه مخدتي ع الجربايه
- هاا شني هاذ ماتنطيني اياه هسه
- لا لا باجر خله
- يلا كيفك باجر باجر

تغطى واندار عليه كال ...
- شهاب كعدني كبل لاتمشي
- لا تخاف ماعوفنك تنام براحتك موش هلكد انه ادللك
-ههه والله مامش مثلك صاحب ياخوي كلبي بالفطره يحبنك
- هاي جلمه الاخوي منك تسوه عندي كون

انه بساع غفيت هالليله والصبح كعدت بثمانيه
كمت رحت غسلت واجيت كعدت ع الجربايه
رفعت مخدته ولكيت مفتاح خذيته وصرت احاجي
- هيه هاي ضميمتك شسوي انه بالمفتاح هاذ
خاب يانعيم اكعد فهمني شني هاذ ماليش
نعيم نعيييم خاب اكعد

دنجت ليه واهزن بجتفه واصحي مايكعد رفعت ايده طاحت ضليت اصيح واضرب عله وجه مايكعد التمو اهله وانه ضال احاجي واهزن بي
عاد اخوه جرني منه وابوه غطى وجه ..

هنايه انه هجست جن ظهري انكسر ماكدرت اصدك هاذ صاحبي هالليله سهرناين سويه ونمنه عله فرد فراش هالساع موش وياي بعد راح مااشوفنه صاحبي من الصغر رابين سوه كبرنا وشبينه سوه شلون اعيشن بدونه تسودنت صياح اهله ولمه الجيران كلهه وانه نايم عله صدره وابجي واعاتبنه شلون يهدني هيج ويمشي موش كالي كعدني كبل لاتمشي جان لازم نكعد ونتريك سوه ويشوفني شني الضامه الي ماحسيت هيج الموادع صار برمشه عين ....

ماجنت ادري شلون مشينه بي وشني الصار وين رحنه ووين جينه جنت امشي وياهم بكلشي لجن عكلي موش وياي .. ماوعيت الا عله الوادم تذب عليه التراب عاد خذيت الكرك وانه كملت ودموعي مانشفت عليه رديت امشي محني الظهر
اخوي الي ماجابته امي هساع عفته جوه التراب ومشيت .. سنين عمري كلهه دفنتهه وياه ،،ضحكتي وسهري ورفجه عمر خذاها الموت بلايه وداع ..

من طبينه السلف انه كبل مشيت للزرع لهذيج كاعي البعيده وكت المغربيه وضليت كاعد هناك
وانوحن عله فكده ....

هجست عله صوت احد يمشي رفعت راسي وعاينت ربى جايه ليه كبل بلايه ماتحجي شي
كعدت عله ركبهه وحضنتني .. انه چني رديت ابجي عدهه فكد امي وغربتي ووحدتي وفكد هالعزيز كلهه بجيتهه بحضنهه وانه اكللهه ..
- لج ربى رااااح صاحبي اخوووي انه فكدت اخووي .. اهجس ظهري انكسر مابيه اكف عدل بروحته ... علييييش هيج صارله علييييش ماكفاه المرض كل هالسنيين ماتهنى بعيشته
- امر ربك حبيبي ماعليه اعتراض
- البارحه جان مابيه شي سولفنه ولعبنه سويه ولحد مانام هوه مابيه شي كالي ضل يمي وراد ينام بسدي جنه يعرف راح يموت والله يعرف جان يودعني بس انه مافهمته ماافهمته
- كاافي ياروحي كافي البجي مايرجعه كافي اذكر الله ياعمري مايصير هيج ... كول لا اله الا الله مايصير هيج يروحي والله مايصير
- لا اله الا الله انا لله وانا اليه راجعون
- عفيه حبيبي اهدا يروحي دميت كلبي عليك هاي دموعك غاليه عليه ماتحمل اشوفهن ينزلن
كوم حبيبي امشي غسل وغير ملابسك
- عوفيني ربى
- لااا ماعوفك يمك ابقى تريد تضل هنا بعد شويه
ميخالف نبقى

مارديتلهه شي وهيه ضلت مخليه راسي عله صدرهه وحاضنتني وتمسح بدموعي ...

- شنو رايك نكوم نصليله صلاه الوحشه وندعيله مو احسن من هاي كعدتنا
- اي احسن
- يلا لعد كوم وياي خلي نروح يلا حبيبي انطيني ايدك

نطيتهه ايدي وكومتني جان تحط ايدهه عله ظهري
وكالت..
- اني اسندك لو ظهرك انحنى لا تشيل هم

ردت حاوطت ظهري ومشينه جنت حيل تعبان
وبالكوه امشي عيوني مجمرات غاديات نار
عاد من وصلنه بيتنه ضلت هيه وياي جابتلي ملابس بين مالبستهن راحت جابتلي كلاص ماي
شربتني وبعدين اخذتني للمغسله هيه غسلت وجهي وضلت واكفه يمي لحد ماتوضيت وكملت وبعدين
مشينه للحجره جابت مصلايتين وترب وكتاب

كفلت الباب واجتي وكفت وراي صلينه سويه
من كملت الصلاه عاينتهه تبجي مثل بجيي
وكالت..
- خلي نقرا زياره عاشوراء تنور قبره هالليله
تكربت يمي وحطينه الكتاب وسويه قريناهه
ومن كملنه صفنت ووعيت هاي ختام لروحته
مامش صاحبي نعيم بعد .. كلش اختنكت دنجت
وكضيت راسي عاد هيه جرتني ليهه وخلت راسي عله رجليهه وغمضت عيني وضلت مخليه ايدهه عليهن وكامت تقرا سوره الرحمن وشويه ووخرت ايدهه من عيني وصارت تمسد عله راسي وانه هديت وبس اسمعلهه واتمعن بهالايات جن اول نوبه اسمعهن .. تطمنت روحي بذكر جلمه الرحمن
وضليت مغمض واسمع لتلاوتهه واتامل كل جلمه
لما خلصت انه جريت ايدهه وبوستهه عاد كالتلي..

- حبيبي ربنا رحيم حتى الموت خلاه رحمه للبشر
هسه هو بي خلص من المرض ومن العلاج الي هلكه من التعب والاذى وراح لرب رحيم وعطوف ويه عباده .. شتتخيل الي داراه وحفظه وهون عليه المرض كل هالسنين ماراح يرحمه ويداريه وهوه وحيد وبلايه معين وينتظر رب الخلقه يعينه ويأنسه!
- لااا احن عليه من عدنه
- لاتخاف ولا تحزن المكان الي هو بي اريح اله من بيته وكل ناسه هو ضيف رب الخلق وربنا يحسن اكرام ضيفه خلي ايمانك  وكلبك قوي
شد حيلك بيه وانسى حزنك
- والنعم من الاختاريت ماتكصرين يارويحتي
- ماكدر اتحمل اشوف الحزن بعيونك حبيبي ولا اكدر اشوفك تعبان ومااكون وياك .. كوم هسه
نام وارتاح يلا حبيبي

كعدت عله حيلي وهيه كامت نزعت لباس الصلاه
وشالت المصلايات .. واجتي انطتني ايدهه وكومتني ..
تمددت وفتحتلي ايدهه اجيت توسدت ايدهه وحضنتهه وهيه غطتني وضلت تمشي ايدهه
عله لحيتي وتبوس راسي بخفه .. بعدين ضلت تلعب بشعري لحد مانمت ...

فزيت الفجر وعاينتهه بعدهه نايمه يمي تطمنت
ورديت نمت وماكعدت الا عله صوتهه ..
- ابو الشهب حبيبي يلا ساعه تسعه اكعد ياعمري
جريتهه لحضني حيل وشميت ركبتهه ..
- صباح الخير حبيبتي
- يا صباح الورد والحب والنشاط عليك ياروحي
- جنت اخاف تروحين وماالكاج الصبح
- لاا شلون اعوفك ضليت نايمه يمك
- زين سويتي انتي وجودج هون علي كلشي
- الحمدلله هالشي يفرحني من اسمعه .. يلا هسه
كوم اريدك تسبح وتتريك يلا حبيبي
- يلا ماشي

كمت رحت للحمام سبحت وطلعت لكيتهه حاطه الريوك بالحجره ..
- شعجب هنايه؟
- لان اريد اوكلك بايدي تمانع !
- لاااا بويه عليش امانع
- يلا تعال لعد

كعدت بسدهه وهيه توكلني وبعدين ضليت اشرب الجاي وهيه كامت طلعت دشداشتي نيلي والسبحه
وحطتهن ع الجربايه واجتي يمي كضت ايدي وكالت ..
- شهاب حبيبي اريدك قوي هسه مو وكت الضعف والهوان اهل المرحوم تلكاهم تعبانين والعالم عليهم ملتمه ومحتاجين الك .. هاي فاتحه صاحبك واخوك انته لازم تقوم بيهه اريدك تشد جرحك هسه وتقوم بالواجب وياه ينتظرك هو هسه تعين اهله وتشيل فاتحته .. هاي حضرتلك ملابسك هسه تلبس وتطلع الهم جبل ماينهز تقوي كلبك وظهرك مانحنى حبيبي اني عندك منين ماتندار تلكاني يمك
تكمل عشاهم وتطمن عله اهله وتجي تلكاني انتظرك هنا اني موجوده ويمي طلع حزنك وقهرك عليه بس بره هالغرفه انته الي مايهزك شي

جريت راسهه وبستهه ورفعت ايدهه هم بستهه
وكلتلهه..
- احمد ربي عليج يانعمتي انتي .. تطمني يالغاليه مايصير الا اليسرج مدامج عندي كلشي يهون
- ياروحي انته يلا بدل ملابس عله راحتك

اخذت الصينيه وراحت .. انه كمت بدلت ووكفت جدام المرايه عاينت لروحي وكلت .. هاليوم مامنه مفر لكل بني ادم يدور ..

طلعت وكبل مشيت لبيتهم لكيتهم ناصبين الجادر
سلمت عله ابوه اخوه والتهينه بالوادم بعد .. جان حجيهه يرن باذني ويكويني كل ما كلبي يلجمني عله ذكراه وكل مااعاين لصورته اخذ نفس واروح الهي نفسي بشي وكضيته واكف عله رجلي اليوم كله ماكعدت و مارديت للبيت الا بالعشره بالليل

من طبيت ماعاينت احد منهم هنايه وانه جنت تعبان كبل مشيت لحجرتي تمددت .. شويه وطبت ربى اجتي باستني وكعدت وحطت ايدهه عله وجهي ..
- الله يساعدك حبيبي
- هلا يرويحتي وين جنتي. ؟
- فوك يم زهره .. شلونك طمني
- تعباااان رجلي بعد مابيه اشيلهه من الصبح عله فرد وكفه
- اسم الله عليك عمري كوم بدل وهسه اجيك

راحت وانه كمت بدلت ورديت تمددت ..عاد اجتي وشايله طشت دارت بي جدريه ماي وملح .. كعدت ومددت رجلي بي جان الماي دافي وهيه تفرجهن كلش ارتاحيت بي .. كملت ونشفتهن
وراحت ودتهن وكل هاذ وماحجت شي اعرفنهه
تخصص وكت للحجي واحبن هاذ طبعهه تخليني اهدا وارتاح وتالي يلا تكعد تحجي تعودت عليه
ومااكطعه باي سالفه ..

اجتي سدت الباب وكعدت بسدي وتلمست اصابعي
- بنفسك تحجيلي شي ؟
- احبنج واشكر ربي عليج هاذ الي بنفسي
- ياعمرري انته .. لا يعني ماكو اي شي مضايقك تريدني اشاركك بي واسمعك
- لا وغلاتج انتي ماخليتي شي يثكل عله روحي
صح وفاته كسرتني بس انتي جبرتيني وهونتي علي هالكسر لدرجه صرت اهجس بي واجب وعلي لازم اسوي موش مصاب .. انه ربي يحبني بيج والله جان انه هساع متسودن وكاتلني الضيم لو ضال وحدي بحزني عليه
- الحمدلله الي خلاك يمي واداريك
- الحمدلله
- اشتاقيتلك مااحب يومي بدونك
- وانه مشتاكلك يارويحتي .. تعاي نامي يمي
- لا مو اخاف هسه زهره تجي
- لانعل ابو زهره تعاي
- ههههههه ابوك هذا يمعود
- ماعليه شي تعاي يلا

تمددت واجتي لحضني شميتهه وبوست خدودهه
واصابيعهه واحد واحد بوستهن وهيه تعاينلي وتتبسم .. عاد حاوطت ركبتي وحضنتني ..
جريتهه ليه ازيد وبعدين وخرتهه شويه فتحت شالهه وضليت العب بشعرهه .. جان تجي زهره وتضل تدك بالباب ..
- افتحووو خايبين ياااه شني وينكم
- وسسسسم شكووو شعندج
- خويه يابعد بيتي جيت اتطمن عليك
- روحي وانه اصير زين
- هااا جا خلي اخذ ربى ويايه شني ضاله وحدي
- زهييييره امشي منا احسن ماطلع ضيمي كله بيج
-ياه خويه شجاك علي هاي ماشيه ماشيه

راحت وانه رجعت دنجت ليهه ..
- خطيه ليش هيج وياهه
- عليش تكطع وكت راحتي
- ههههه زين خلي اشوفهه واجي
- لا ابتلي بيج انتي الثانيه بسج عاد خليني افتهم
- شتفتهم
- اسكتي وتعرفين

ضحكت هيه وانه كطعت ضحكتهه بوسه وطولت بيهه نستني الدنيا وكلشي بيهه وكت الي تجاوب وياي وتصيرن بايدي وعله مايي ...
لجن هيه ماترضى ازيد من جم بوسه عله ركبتهه
وشفايفهه وانه مااطلب منهه شي ثاني عبن انه بالذات هالسالفه ماحب اطلب بيهه شي ....

- شهاب
- ياعيونه
- شوكت اداوم ؟ يعني مو راح يخلص الشهر
- حكج والله انه هملت هالسالفه بس وعد ع الاسبوع الجاي نمشي لبغداد وتدللين
- اييي ياعمري تسلملي
- حبيبتي عود لاتنزعين حجابج زين
- ها ليش !
- هههههههههه
- لتكولهه !! شهاب اموتك اذا صدك
- هههااااااااي بويه جا كاضلي كيمر ماتردين اضوكه
- شتضووووك عزا بعينك هسه لو تشوفني زهره تفضحني والله يبوو لك امي باجر تجي شسووي
عزا بعينك شهااااب ليش هيج
- جا غير حليلي وبكيفي جا لابوس ترضين لا مصه لا تخليني اكمكش بكيفي شني جا عليش كاطعين مهر ؟؟؟؟
- ايي مو هيج مخليني خريطه
- ايبااااه جا عليش ماتحجين من ابوسج اله بعدين تفطنين وين جان بالج وقوانينج
- ياااا لك عيب شهالحجي
- هههخخخخخخخخ احبنج وعلي
- اكرهك غثيث
- هااا عله جم بوسه كمتي تكرهيني
- بله هسه انته بس فهمني شسوي هسسسه
- امشي حطيلهه ثلج ومنا لباجر تروح
- هاااا شمعرفك بهالسوالف
-هههههه شني جاهل جدامج بويه تره طبيت الثلاثين
- واذاااا يعني شمعرفك بهالسوالف هسه تحجيلي
خاف مجربه شهاب بلا ضحك كلي منين تعرف
- بنتي هوه دم وينحصر هيج من تمشين عليه الثلج يخف شكو بعد كبل تفكيرج يشطح مدري وين
- الله عليك يعني بس هيج تعرفه ؟ مامجربهه ويه اي بنيه قبل امااانه حلفتك شهاب
- والحمزه مامجربهه كبل انتي اول حرمه ترغبهه نفسي ولج بويه انه صارلي ست سنوات احلمن بيج من تحجين هيج تخليني اضحك عليج والحسين
- اممممم ليش !
- لين تفكيرج مدري شلونه اكلهه انه مارغبت غيرج تكلي منين تعرف مجرب! منو بايسهه قبلي
- اييي زين يعني اني اول وحده بكل شي
- والاخيره هم ارتاحيتي
- اييييي فدوه اروحلك يمه حبيبي ماكو منه
- هههخخخخخخ بعلي شاخطه
- اممممم خلي اروح اشوف زهره
- حسبي حسابج تنامين يمي هالليله
- شهاب عيب هسه اهلك شيكولون علينه
- مااااعلي باحد اذا مااجيتي انه اصعد اجيبج فتعاي بروحج احسن
- هههههه ماشي تدلل

راحت و وره شويه اجتي امي ليه .. كعدت يمي
وكالت ...
- اكلك يمه انه اريدن احجيلك فرد سالفه بس موش تتضايك مني
- لا يمه كولي شني
- انته وربى صاير بينكم شي من زمان يعني متكربلهه ماخذهه
- يمه شهالحجي صلي عله نبيج
- عليه الصلاه والسلام
- عليش هيج تحجين فهميني
- انه كل ماعاينكم جنكم متزوجين موش باول خطوبه وشفتهه شلون مشت وياك وماحسبت لشي كلت يجوز هيج صاير بينكم وماكدرت تعوفك
- هاااااي شلج بيهه يمه .. شني انه ماعرفن ربي
اروحن اخذ البت وانه ماكاطع مهرهه !!! يمه انه وياهه نمنه عله فرد فراش خمس شهور وماطب بينه شيطان روحي وروحها نضيفه مااستعجلنا شي لهاذ يومهه وهيه حرمتي وماشايف شي منهه
شجااااي تحجين انتتتتتي يمه ماتكليييييلي شجااااج
- ايييي يايمه انه شبجت علي من جهه هذيج سالفتكم والنوب اليوم حجي هاي السوسه
- يا هيه؟
- مرت ابوك الغاكه من صباح الله وهيه تمشي وتشمر بهالحجي وربى لا فجت حلكهه ولا حجت
ضلت سويكته عليييش سكتت غير حجيهه صح
- شحجت هاااي كليلي
- جانت تكول بنات الوادم ينضبن بيتهن موش يجلبن بذيال الزلمه عاد زهره ردتهه وسكتت
وسمعتهه تحاجي ابوك تكله شو ساكتين عله نومتهم سوه الليل كله اهلهه مايخافون عليهه هيج متيهيه لو صارت بيهه سوله اله بحضنه يلا ترتاح
- هاااا هيج الحجي
- اي ابوك كال ليه ماعليج بيهم حرمته موش غريبه عاد ردتله اكص ايدي اذا مايطلعون متزوجين من كبل واجوي يطمطمون السالفه
عاد تلاغت هيه وابوك وكلمن مشى بدربه بس انه عجبني سكوتهه جانت تسمعهم وماحجت شي ولا كالت ليش لا عاتبت هيج صمت هالحلك وكعدت
- وانتتتتتي صدكتي حجيهه واجيتي علي !!
بالله انتم فلا عدكم عكل جا انه لو متزوجهه اكلبكم بعد
- يااااااه هيج غاسله عكلك !
- يممممه لا يغيرنج حجي الوادم عليج بالتسمعي مني موش علي .. حرمتي عرضي هالحجي الي انكال اليوم لو ينعاد نوبه الثانيه واسمعن تضيك خاطرهه منكم ماتلومون الا نفسكم وهالحجي وصلي لهذيج الغاكه عله كولتج .. كليلهه شهاب يكول ان تكدر خاطر حرمتي بسبتهه اشيلهه من هالسلف كله لاتندك بيه تره والعباس اطلع بيهه ضيم سنين خلهه تنجب احسن ليهه
- ياااه ييمه تهدا هسه شني انه جايه اعلكن بينكم حرب انه بس جيت افهم منك شني الي بينكم
- شني شنننني الي بينه بنت عمي حبيتهه خطبتهه شني بعد تجيبون وتصفطون بهالحجي جا انتم اهلي وهيج تفكرون الغرب شكولن عليهم
- هاي يمه سديت حلجي هاا اهاا سكتت
- يمممممه عليج العباس لا تصيرين مثل هالخلك علينه اريدنج وياي تحبيهه واداريهه موش حرمتي ماتحبينهه!!!
- لااا ييمه وحك علي انه احبنهه بت جنهه العافيه مامنهه عيبه شاغوله ومرتبه وماطلعت منهه حجوه الموزينه لا تكدر خاطرك ياوليدي هاي حرمه العزيز احطنهه بعيوني
- اييي يمه هيج ريحي كلبي بهالحجي موش جايتني مدري شتفكرين
- يلااا سالفه ونسدت وهاذ حجيك باجر اوصلنه ليهه حته تجفي شرهه عنكم .. بس انته هم موش تطولهه عاد احزب لوكتك وتزوج عاد
- ان شاء الله

مشت وانه ضلت بالي هالسالفه اثاري هالوادم لاعبه لعب من ورانه واحنه ياغافلين الكم الله
طلعت كعدت بالحديقه ادخن وعاينت محمد يخابر من بعيد وضحكه شاكه الوجه عاد تذكرته من كالي لكيتلي خوش طيره كلت اليوم لازم اعرفن منهي هاي ومنين ... ضليت واكف ادخن وهوه سد تلفون واجاني ..
-ها خويه شلونك
- هلاا يالعاشك
- ههههه
- منين هاي الطيره !
- ايييي ياخوي سالفه طويله
- اكعد اكعد واحجي سالفتك اسمعك
- يكلك خويك جان ماشي لفصل بالسماوه والله وكاعدين وشيخك يهدي النفوس وهاذ اليرفع وهاذ اليكبس وجرت وعرت سالفتهم انه شويه شويه سحبت روحي وطلعت مشيت افتر بالفرع وعطشت كلت اروحن لهالمحل اجيبن شي اشربه
جان يفوتن اثنين طالبات طبن كبلي للمحل انه طبيت جاي اريد افتح الثلاجه ووحده منهن عاطت وكمزت جتي طخت بصدري جان اكو جلب مدنفش عند ابو المحل وهاذ اجه ليم رجليهه وهيه تسودنت ... عاد انه خليتهه وراي وحاجيت الولد اخذ الجلب طببه جوه .. وجان اندار اعاينلهه بويه شني جنهه جوريه توهه مفتحه والخدود غدت حمر من الخجل
- ههههههه وتالي شلون حاجيتهه
- ماحاجيتهه مشت كبل هيه وانه رحت لحكتهم
اندليت بيتهم وضليت افتر بالمنطقه اشوف وين هاي مدرستهن جانن يداومن ظهري .. عاد رديت ثاني يوم اجيت لمدرستهه وضليت انتظرهم لحد ماحلو هيه من شافتني دنجت ومشت ضليت اسبوع اروح اشوفهه وارد لحد ما كلت لازم احاجيهه
بعد كلبي طاك عليهه اريدن اعرف اسمهه اشوفنهه ترضى ماترضى حته اجيبن اهلي ونخطب ..
عاد هالمره مشيت وراهم وشفت صار مجال حطيت بايدهه ورقه
- هاااااا والله وطلع كل البله بيييييك
- هههههههه شسوي خويه مالكيت غير هالحل
- اي وشكتبتلهه
- كتبت .. ياجوريه رايدج بالحلال اذا موافقه بس دزيلي رساله واجيب اهلي واجيكم وكتبتلهه رقمي
والله يوم يومين انتظر ومامش خبر كلت هاي يجوز شكتهه ومشت جان وره خمس ايام اجتني رساله منهه .. بيهه بس جلمه موافقه
- ايييي وتالي خذيت اهلنه؟؟؟
- اي اخذت امي وجدتي ومنال وزهره حته يشوفنهه وساعتين انه مشتول بره كاتلني البرد
تالي طلعن وكالن اهلهه مايرضون جيف بعدهه
تدرس وهيه سادس ادبي ابوهه مايرضى الا تكمل
- هااااا اي حكهم بويه .. شسمهه؟
-اسمهه جنه اوووووف بويه من صدك جنه
- وتالي شصار؟
- هيه عاد وره يومين خابرتني وبدينا نحجي
- ولك خاف تاثر عله دراستهه وتروح ترسب وتااكلهه
- لااااا بالعكس مشدد عليهه كل مانحجي اكللهه
خلصي هالكتب بساع حته ابوج يحن علينه
تخرب ضحك يابووويه مدري منين جتني بالعباس هيج طلعتلي بالحظ يانصيب
- ههههههههه ديربالك محد طب العشك بلايه مايتجوى صير فطن وياهه
- الله كريم المهم احصلهه كلشي يريد يصير خلي يصير
- ان شاء الله يلا حته نتزوج سوه
- اييي ان شاء الله

طبينه جوه وانه جنت اراسل ربى حته تنزل
رحت طفيت ضوايات البيت وكعدت بحجرتي
شويه وفاتت ربى .. جريت ايدهه وكعدتهه عله رجلي ..
- عليش تعاندين ماتنزلين !!!
- مو خفت خاف احد كاعد هسه
- هاااا ضامه شي علي؟
- مثل شنو
- مثل شصاير اليوم
- ماكو شي لاتهتم
- عليش تسكتين عن حكج وتخلين الوادم تاكلج بالحجي حتسودنيني انه ادري بيج لو حجيتي مايغلبج احد جا عليش ضاله ساكته !!!
- الحجي يجيب المشاكل شهاب .. وكلمن يعرف قدره هيه ام بيت هنا واني خطار مايجوز اتطاول وياهه بالحجي احترامهه واجب .. واني مايهمني حجيهم لاني اعرف شداسوي واعرف طريقي عدل مايهمني الناس تباوع لضلي المايل
- ياريت كل هالوادم مثل عكلج ونفسج الطيبه
- هههه ياروحي انته
- مره الثانيه لاتضمين شي علي تعاي كليلي هيج وهيج صار لاتخليني اسمع من غيرج مفهوم
- مفهوم حبيبي
- يلا خلي ابدل حته نام
- هههه شهاب ذكرتني هاي سبحت وصعدت امشط جان تجي زهره وتشوفني مابقت كلمه ماحجتهه هههههه تكلي هذا اخويه مفلفل مايكعد راحه لا تروحين يمه بعد ههههههههه
- عفيييه عليييج وانتي ساكتتلهه
- لاااا والله كلتلهه حلاله وبكيفه انتي شكو ضايجه
جان تكلي هاي انتي المسويتله واهس ومجلب بيج
اثاريج مو هينه واني اكول عليج فقيره وهاديه طلعتي هم مثله من جوه لجوه هههههه موتتني ضحك تكلي شضلت هيه عله لبست البدله عوفوهه همي لا تلبسوهه روحو عرسو وخلصونه
- هههههههاااااااي لج هذول شمالهم ويااانه اليوم
مضغوطيين بعلي
- ايييي عيني وين شايفين هيج حب ودلال
- انه هم ماشايف هالدلال وينه؟
- عزززا شنو مشايفه لعد اني المن ادلل غيرك!
- مادري يجوز نسيت بله رجعي دلليني من جديد حته اذكر
- اممممم شلون يعني
- يعني دلليني بغير طريقه اليوم شبعي شوكي عليج
- شهاب
- ربى مايصير هيج تره موش حجاره انه جدامج ماريدن اضل كابت شوكي ولهفتي هاي عليج مليت وتعبت حرمتي صرتي بعد عليش مستحيه
- بعد وكت على هيج شغلات نتزوج وتدلل
- ماشي براحتج ..كومي خلي ابدل
- حبيبي ليش ضجت شبيك
- مابيه شي

كمت نزعت هدومي وضليت بالفانيله والشورت وطفيت الضوا واجيت تمددت وهيه ضاله واكفه
بمجانهه .. عاد شويه واجتي حضنتني من وره
- حبيبي ابو الشهب شنو صاير تدلل وتزعل ليش يعني
- مازعلان يارويحتي بس تعبان اريد انام
- لااا لتجذب عليه ادري بيك ضايج شوف حتى ماتندار وتحاجيني
- نامي حبيبتي لايضل بالج
- باوعلي شو خلي اشوفك

انداريت ليهه وصارت تمشي ايدهه عله لحيتي وشفايفي جريتهه لحضني بوست راسهه ..
- كعديني باجر من وكت
- راح تنام ؟
- اي نعست وهالسالفه انسيهه بعد مانحجي بيهه
زين
- يعني ماضايج !
- لا رغبتج هاي ماجبرج اذا مايجي من كيفج ماريدنه .. هاي حضنج كافي لا تفكرين بالسالفه

باستني بجتفي وضلت حاضنتني ونمنه هيج
ثاني يوم هم كعدت لكيتهه محضره دشداشتي
والريوك بوستني وطلعت للفاتحه كمنا بالواجب
ولليل لمينه الجادر وعزلنا وكلمن رد لبيته
وانه ترخصت من ابو نعيم وردت اشوفن شني سالفه هالمفتاح ... عاد خلاني احاجي امه وكالتلي
هاذ مفتاح كنتوره .. فرغت الحجره وانه طبيت
وسديت الباب رحت فتحت كنتوره .. عاينت ملابسه وادويته والتقارير وجان ليفوك اكو صندوك خشب .. خذيته وكعدت بالكاع فتحته
وجان بنصه ظرف مكتوب عليه اسمي ..

ماكدرت افتحه جنت شبه منهار وضال بالكوه مسيطر .... عاد خذيته ومشيت للبيت ...

لكيت بيت عمي حاتم جايين .. كبل تغير مزاجي
وتنفرزت .. عاينتهه كاعده وياهم وبس تصفن
سلمت عليهم وطبيت لحجرتي اجتي وراي
كبل حضنتني ..
- شمالج يارويحتي
-حشتاقلك ماريد اروح
- ههههه يابعد كلبي والله انه كلبي جمر من شفت اهلج جايين
- افففففف كله منك شكو تعودني عليك
- هانت يرويحتي هانت كلهه شهر وتخلصين امتحانات ونتزوج
- ان شاء الله حبيبي .. احضرلك الحمام ؟ جوعان؟
- لا ماريد اكل مالي نفس شي بس اريد اسبح
- يلا هسه دقيقه

راحت حضرتلي الحمام وانه طلعت الظرف وحطيته عله الميز ورحت سبحت .. بعدين طلعت وصحتلهه ..
اجتي وكفت بسدي شلت الظرف وكلت ليهه..
- سدي الباب وتعاي نكعد نشوف هاذ شبي الظرف
- منين هذا !
- نعيم ضامه ليه ومااكوى عليه وحدي اخذي انتي افتحي
- لا تعال اكعد هسه

سدت الباب ورحنه كعدنه نطيته ليهه ومارضت تفتحه ..
- ياعيوني انته لازم تفتحه لاتخاف يجوز بي شي يسرك
- مامش شي يسرني حته ذكراه صارت تاذيني ياربى فكده موش بالهين
- افتهمك ياروحي بس خلي نفتحه ونشوف واني يمك لاتشيل هم يلا افتحه

فتحته وطلعت منه ورقه جان مكتوب بيهه ..
" اخوي شهاب عضيدي ورفيج دربي ربي يعلم بجثير ندمي عله هذيج السنين وعله كل جلمه حجيتهه ضيكت خاطرك والله انه من يوم الصديت عني صدت عني كل هالدنيا وانه متت من زمان ياخوي ويوم الي اجيت بيك انه احتييت لجن هالحياه جانت صعبه واذتني جثير مادري جانت هاي حوبتك عليه دارت مدري هو زماني الجار وياي .. ياخوي انه كضيت سنين اتمنى بيهه امشي واكعد واطلع مثل هالوادم من شباج حجرتي انه هواي رسمت احلام وجان كل صباح ياكلهه المرض مثل مااكل جسمي لجن انه عندي شغلتين تمنيت احصلهن كبل مااموت وهنه رضا اهلي وشوفتك والحمدلله اثنيهن حككتهن وهاليوم التفتح بي هالمكتوب تاكد انه مرتاح بكبري .. وصيتي ليك ياخويه تذكر صحبتي بالخير وتسامحني لو ان ضال بكلبك شي علي ما عرفنه سامحني عليه ولا تكدر نفسك عله روحتي انه موتي هاذ جنت اتمناه بكل ابره كيمياوي خذيتهه تاكد انه حاربت وكافحت حته اعيشن بذلت كلشي مالي وحيلي لجن تالي عرفت العيشه هاي الاركض وراهه موش دايمتلي ومالي منهه فايده صرت اشوفن الدنيا بالعين الزغيره ومشيت منهه وانه مكتفي بالخذيته وعشته .. اريدنك تحفظ وصيتي .. لا تنسى اهلي
وبالك عله حرمتك وطور نفسك والبس هذاك الروب الابيض وعيش هالحياه بدل عني وحته لاتنسى ذكراي انه خليت ليك هاي الصور من جنه بالكليه ووكت الحصاد اخذهن وكل ماتذكرني شوفهن واذا صار عندك جهال من يكبرون جيبهم وتعال لكبري بلجي  اكدر اشوفنهم واحجيلهم عله ايامنه ورفجتنه .. مودع بالله يالعزيز "

طاحت من ايدي الورقه وتطشرت الصور وانه عاد هنايه كلش انهاريت ماكدرت اوكف دمعي
ولا اضم هالحسره الخانكه صدري عليه
رديت ابجي عله فكده مثل جاهل صغيرون حاضن ربى وابجي عليه موش عيب هالبجي للزلمه هاذ حريج روحي مايطفى بجلمتين انه فاكد اخو ضلع من ضلوعي تكسر بروحته اضل كل عمري اتوجه لجن مابيوم اكف عدل مثل اول ...

اجوي ابوي ومحمد عله صوتي وربى ماخلتهم يضلون طلعتهم وسدت الباب واجتي ليه كعدت تمسح بدموعي وتشربني ماي وتهديني بس انه انهاريت هاليوم ماكدرت عكلي مايرضى يستوعب الصار صح انه جنت اعرفن يجي هاليوم لجن روحي ماكدرت عليه .....
- شهاب حبيبي كافي ياروحي كافي فوك تعبك تزيده بهالبجي اهدا ياعيوني
- ربى شهدااا لج اخوووي هاذ اخوي ناار وشابه بضلوعي عليه شيطفي نار فكد الاخوو منين اجيبنه بعد منين اردن هذيج كعدتنا وسالفتنه لج من عمر عشر سنين احنه سوه شنسى منه ماتكليلي شنسسى
عمري كله كضيته وياه بروحه امي هوه عوضني
وخلاني اعيش وانسى ااااه ياربي نعيييييم
- انيي عندك حبيبي اني انسيك كلشي فدوه لعينك اهدا كافي تحرك كلبي عليك هيج كافي يروحي

ضلت حاضنتني وتهدي بيه وبعدين كامت طفت الضوا وخلتني انام بحضنهه هيج احتوتني مافاركتني وتحملت كلشي مني كل مابعدهه واطردهه الكاهه تزيد بكربهه مني لحد ما هديت
بحضنهه وغفيت ....
هم فزيت وره شويه وعاينت ما هيه ضليت اصيح
عليهه لحد مااجتي ..
-ووووين رحتتتي
- حبيبي جنت احاجي ابويه
- ربببى وكتهه هسه
- غير داكله مانروح هسه ماريد اعوفك اليوم وهوه قبل

مارديتلهه جريت المخده وخليتهه عله راسي وره شويه سمعت صوت كفل الباب .. اجتي شالت المخده ورفعت راسي خلته عله رجليهه .. تفاجأت
رجليهه كلهه طالعه وثوبهه كصير كلش .. ماهتميت ضليت نايم عله رجليهه وهيه تلعب بشعري جان تكلي ..
-  شنو الي بنفسك هسه حبيبي ؟
- هالنار الي بصدري تروح
- وبعد
- ويصفى بالي وانسى هالمصاب
- يجرالك الي تريده
- شلون !
- اول شي خلي بالك ياروحي هالنسيان لا تطلبه
لان هذا معناه انته تريد تمحي وجوده من اصله وهذا الشي مو رغبتك انته الي تريده تنسى الم فقده وهذا تكدر عليه بالتقبل .. اعتبره مسافر ومكانه بعيد اعتبره رايح حتى يتعالج ويرتاح مو راح تضل تدعيله وتذكره بالخير والفرح هنا هم نفس الشي لان صدكني الي يصعب المواقف الي نمر بيهه هو التفكير الزايد وعمق الشعور بينما بغير وكت نكدر نتقبل الامر مثل البارحه شلون للحظه جنت منهار وللحظه ثانيه صرت قوي وواجهت كلشي صح راح تضل تقاوم كل يوم بس راح تتعود خلي بالك هالشي انها كلهه فتره وتمر لا تاذي نفسك بكثر التفكير خلي بالك وياي واني اطلعك من كل هذا ثق بيه
- اثق بيج يرويحتي ادري بيج ماتكصرين لجن هيه موش بس بالتفكير هاذ صدري اهجسه يحترك
- ولا يهمك هسه يروح .. بس لو تنزع تشيرتك مو احسن !

كمت نزعت التشريت والفانيله ورديت تمددت عله ظهري وراسي عله رجليهه .. خلت ايدهه اليسره عله عيوني واليمنى كامت تمشيهه عله صدري وحيل بارده ايدهه .. دنجت راسهه عله راسي
ومافهمت شني جانت تكول لجن هيه جانت تمشي ايدهه عله صدري وتحجي وراهه بشويه وخرت ايدهه من عيني ورفعت ايدي اليسره باستهه وكالتلي ..
- كلشي بذكر الله يهون مو صح ابو الشهب

صفنت شويه وانه اهجس روحي خفيفه هذيج الخنكه والحريج الي بروحي كله اختفى حته نفسيتي اهجسهه هاديه وموش جني ذاك المساع
يصارخ من حركه روحه ..
- شنو الي سويتي !!
- داويتك واحتويتك كل وجعك صار حمله على جتافي
- ليش هيج وشلون
- لان اسبابهه طويله واني هسه تعبت اريد اتمدد شويه

وخرت منهه وفتحتلهن ايدي اجتي نامت عليهه
ومغمضه وكاضه راسهه ..
- حبيبتي بيج شي !
- لا
- متاكده
- تكدر تحضني مثل قبل مو بحب بامان
.
.
يتبع