رواية من فجر ديسمبر الفصل الخمسون 50 - بقلم Zoka 🌷

من فجر ديسمبر
🍁
🍁

خابرت وليد اجه وعماتي وعمامي كلهه تحضرت
وثاني يوم وره الغدا مشينه ليهم ...
انه لبست دشداشه بيضه وغتره وعكال عبن هيه لحت عله هالشي ..
وصلنه ليهم وتلكونه عمي حاتم وحيدر سلمنه عليهم وطبينه للديوانيه كعدنا .. وانه ولا جني كاعد ويه عمامي وهالبيت شابع منه طاب طالع عليه
جنت كِلش مرتبك و وليد كاعد ويكرص بيه يكلي
دارت الدنيا ويضحك ...

كضيتهه بس امسح بالعرك واحسبهن لحضه لحضه حته اشوفنهه ..
صار حجي عله المهر وابوهه كال ...
- البت بتكم وانه ماثمنهه بذهبات عبن هاي روح بيتي انه ناطيهه ليكم

ابوي كاله ...
- انه فرحتي ببت اخوي تصيرن ام بيتنه ماتتكدر
ومني انه فوك مهرهه ذهب المرحومه ليهه نصيبهه يصيرن انه ضامه من زمان لهاليوم ومااشوفن اغلى من بت اخوي انطي ليهه

كِلش تفاجات بحجي ابوي انه نفسي ماجنت اعرفن شني ذهباتهه لامي واذا ضالات لساع لو لا !!
عمي وجهه تطمن عليهه بينه عاد ابوي كال

- هاذي عزيزه الشيخ وبت الغالي مهرها مايكل
من العشرين وكل الي تردونه اعتبروه تم

- لاااا انه ماتشرطن بشي انه حضيت بزلمه ينشد بي الظهر وكت الشده والعوز لينه ولبتي هاذ مايتثمن

- جا خلنه نخصمهه بعشرين حاضر وغايب

- هاذ هوه خويه

- توكل سيدنا عله بركه الله وحب اهل البيت

بديناهه بصلاه عله محمد وال محمد وكمنه ليم الباب .. طب عمي صاحهه ومن وره الباب
يحاجيهه ...
جنت مغمض عيني واسمعن حجي السيد وانه اردد الحمد والشكر ليك يارب عزيز ورحيم ماينسى عبده ... صبر سنين برمشه عين صار بايدي ثمرته ...

هجست عله صوتهه وهيه تكولن .. نعم
ضحكت واول مااجت عيني عله وليد حاط ايده
عله حلكه ويريد يهلهل ...

عاد علت اصوات الهلاهل من جوه .. ورحت تشكرت من عمي وبوست راسه وعاد شويه وطبينه ليهم ...

عيني طاحت عليهه وهيه مدنجه وتلعب باصابعهه
جانت لابسه ثوب طويل خليجي لونه كريمي وكله شغل مذهب وشعرهه الاحمراني مفتوح وملفلف كله ..
زهره جانت بسدي زرفت اذني بصوت هلهولتهه
متعاونه هيه ومنال بيهه كلمن من صوب طرشني
وصلت ليمهه كامت هيه عاد عاينتلهه وضحكت وهيه تعاينلي وترد ادنج عاد كضيت جتفهه ودنجت بوست راسهه .. رفعت عينهه ليه وانه رفعتلهه حاجبي باعجاب لشكلهه ردت دنجت وكعدت .. كعدت بسدهه وكلساع اعاين ليهه اريد اتطمن هالنمش بعده موجود جنت حالف اتعارك وياهه لو توخره بالمكياج بس زين مبقيته ملاعبه بي بس مكياج عيونهه طوخ والي محلي زراك عينهه وهالخدود المحمره .. متت عليهه هالساع
بس اريدن ارد ليله من ليالي اربيل ...

كربت راسي ليهه شاورتهه ...
- انتي الاربعه الحللهن الله يابعد الصبر والحيل

خلت عينهه بعيني وضحكت وبانت سنونهه تكربت كالتلي ...
- يا حنان الله اليه احبك

خذيت نفس كوي من ريحتهه وهيه كريبه مني هيج
مليت ريتي بي وضحكت وانه ازفره واعاين لجدتي تهوس هيه وامي وعماتي ..
هاي الرادها وهاي التمناها بنت الشيخ لابن الشيخ جبناها ...

اجتي امي جابت الحلقات .. اخذت حلقتهه وجريت ايدهه تلمستهه وهيه تضحك عاد لبستهه الحلقه
وكلتلهه ..
- خذيتج ياام راس يابس لا عنادج ولا عناد اهلج
وكفوني
- شهم حبيبي العنودي مثلي

ضحكت وهيه خذت الحلقه لبستهه ليه وزهره تهلهل كلبت الامه بصوتهه ...

ضليت كاض ايدهه واعاينلهه واضحك ماكدرن اوكف ضحكتي هيج اهجسن كلبي راح يطلع من ضلوعي ويدبج بدال اهلي هنايه ..

اجتي جدتي تكلي يلا نمشي وانه اكللهه اي بعد وشويه وربى تضحك عاد كالتلي ..
- شنو رايك نشرد هسه
- بعلي ضلت بنفسي اخذج وامشي جا هيه هيج كالوهه عمي شفتهمت انه هسه
- ههههههههه عجبتك السالفه
- جا غير ويه رويحتي شلون ماتعجب
- شهااب
-ياعيونه
- يالله اموت عليك
- لج بويه ارحمي بحالي انه ضلوعي جاي تلهب تريدنج استري علي واليرحم اهلج
- هههههههههههه سكتت سكتت
- تردن حيلي ضحكتج هاي
- اممم احجي لو
- لااا لاا ضلي بس اضحكي صوتج المايع هاذ موش زين هالساع يزيدن اشواكي
- ههههههههه هههههههههه
- فضحتينه خايبه هيه هيج
- ماكدر والله مو بيدي
- خلي امشي احسن ليه
- لاا لا لحضه صور صوووور
- هاا بويه بعلي نسيت جيبي تلفونج

اخذت تلفونهه واخذنه جم صوره رديته ليهه جان تكلي ..
- حباب اخذلي كم صوره لهالاناقه والجمال كله
ودزهن الي
- هههههه موش تدللين
- على كل طولك مو تنسى
- صار من هالعيون
- فدوا لعيونك
- اكلج يصير اجيكم بالليل شويه هيج نص ساعه
-هههههههه لااااا
- شني بويه كايمه تطردين بعدنه بسم الله
- هههههه عمري عيب هسه ابويه شيكول علينه خلي نبقي من هيبتنه شويه
- هم صدك يلا مانطول ان شاء الله كلهن جم يوم
- ان شاء الله
- احبنج ياسحاره
- ههههههههههه احبك ياغثيث

ضحكت بصوت عالي خله الكل تنتبه علينه عاد هيه اندارت وحاطه ايدهه عله وجهه وتضحك
انه كمت واعدل بغترتي وجنت احاجي امي حته
نمشي وهيه راح صاحت البنوات .. عاد غمزتلهه وطلعت وكبل تلكاني وليد ....

- هاااا هسه ياهوه الي مجلب حسيت بيه حسسسيت
- ااااااخ بويه مامش درج اصعدن بي لله شويه احاجي
- اييي وشتريد منه
- اكله بس فدوه رحتلك شكثر انته رحيم والحسين
مامش احد فرحان مثلي هالساع ااااخ لك ماعرفن شسوي هيج غمض فتح لكيت بواب الجنه تفتحت بوجهي
- صلي عله نبيك لاتروح تحسد نفسك يمعود
- عليه الصلاه والسلاااااام اااوف ربي محمود مشكور بويه وعلي الي مايعشك لا يعيش احسن ليه
عمره مايضوكن طعم الحيا شلونه
- هاااا لعد وايام الياريتني متت ولا كعدت هذيج الليله
- وحك العباس لو يرد بيه الزمن ارد اكعد نفس هالساع وامشي واشوفنهه وخلي البليه تكع بهالراس ميه نوبه ولا املن منهه
- بس خلي بالك انته حتدفع عشرين مليون للي كرهتك حياتك خمس سنين
- اييييييي بعلي انطاح حظي
- مو هواي شدعواكم هيج تكتون بالملايين شو هذا ابوك كام يزامط منين عنده كل هالفلوس
- انه ادري !!! لك صدك هاي انه منين اجيبهن هسه يلا وعيت عليهن خرب بحظي اذا صدك لك انه اريد اتزوج هالشهرين شيجمعهن لا والغسل
- هههههههههاااااااي شوف وجهك اصفر شجاك يابه لعد هوست وكلبت الدنيا تالي ع الفلوس وكفت
- لك موش وكفت عليهن  تستاهل ماي عيني هيه لجن انه ماخذ من احد واريدن اتزوج من وكت مادري خلهه عله الله هيه تدبر
- خلي ابوك يدفعهن لعد بس يعرف يورطك هخخخخ
- شبيه جاهل انه اخذ من ابوي نجب نجب طيرت فرحتي هسه وكت هالسوالف
- غير شويه اصحيك لاتروح تنصدم بعدين ههععععع
- وصمخ امش جدامي يلا امش

مشينه للبيت وهناك كبل اول ماوصلت عاينت كاعد جدام باب بيتنه نعيم واخوه يمه انه كبل
فتحت باب السياره وركضت ليه ..  دنجت ليه و حضنته كالي بصوته الضعيف ..
- بالمبارك ياخويه تمنيت حيلي يعيني وامشي  وياك
- الله يبارك بيك عليش جيت وتعبت نفسك انه جنت ناوي اجيك هالساع
- لااا ضلت بكلبي اجي واشوفنك راد وفرحتك بعينك وانه ماعلي شي كاعد هنايه واشمن هوا الله
هم ضاك خلكي من البيت
- يااهلاااا وجثير الهلاااا والله فرحتي بجيتك تعادل فرحتي بهاليوم .. اي هيج اريدنك تنشنش من جديد
وتصير كوي وانه اخذك اطرك هالسلف كله
- ان شاء الله

جريت كرسي وكعدت يمه وضلينه نحجي وهوه حاط المغذي بايده واخوه واكف وشايله ليه ..
خذيته لحجرتي خليته يرتاح شويه و وصيتهم
يجيبون لينه العشه هنايه ..
عاد خليت الصينيه ع الجربايه وكعدنه ناكل سويه
وليد هم جابلنه وماسكت من الحجي وضل نعيم
بس يضحك ويعاين لينه نضره حنيه جنت كلساع
اردد يارب تشافي وتردله عافيته ...

عاد شربنه الجاي وخذيته بالسياره وصلته لبيته
سلمت عله اهله وهمه باركولي ورديت للبيت
سبحت ورحت حجرتي لكيتهه مخابره عليه
طفيت الضوا وتمددت خابرتهه  ..

- هلو ياغثيث
- كل الهلا يا سحاره شلونج
- هههه زينه وينك ليش متجاوب
- جنت اسبح
- حمام الهنا .. وين صور شو مدزيتهن
- التهيت ويه نعيم لكيته جاي علي وهساع رديته لبيته واول ماكضيت التلفون خابرتج
- هاا ديربالك عليه لا تعوفه وحده خليك دائماً وياه
- اي  اكيد ماعوفنه
- زين شهاب داكلك شي
- اي يارويحتي كولي
- يعني ع المهر كلش هواي ماله داعي هلكد والله
- هاااااي شلج بهالسالفه بتي
- لا من صدك هواي يعني شسوي بيهن هلكد تره اني كلشي عندي والله
- ادري كلشي عندج بس هاي الاصول جا ترديني اخلي اهلج يصرفون عليج بعرسج هذن حته ماتعتازين لفلس واحد من اهلج
- تسلم عيوني بس والله هواي .. زين لاتخلي بمال المحكمه هيج
- هاي شبيج ربى شني اكتب هناك نصه !! شيكلون علينه الوادم نضحك عليكم !!
- هسه يعني الناس شعليهه اني ماريد هلكد هواي عيني انته خلي عشره كافي وزياده
- ماشي اذا هيج تشوفين العشره كافيه خلي العشره ثانيه بحسابج
- لااااااااا
- جا شني التردي فهميني
- دحاجي عمو وخلوهن بس عشره والله هيج هواي
- اكلج انجبي انجبي انتي تردين تفشليني جدام ابوي حته يجي يكلي ماتكدر عليهن انه ادفعهن ترديني اصيرن حجايه بحلكه اسكتي احسن ليج
- ههههههههه ايييييي هاهيه سكتت
- شوفي انه ماريدن نكعد هنايه بهاذ بيتنه
- هاا لعد وين؟
- نرد لاربيل
- لاااا شهاب شعدنا هناك
- اااانه موش كايلج كعده هنايه ماتعجبني بعد لحيتي عله الجيه جبتج وهسه تصير عمليتج تتشافين نرد هنايه نسوي العرس ونمشي لشقتنه
- ما روح ماريد هناك شهاب شنووو ماروح
- ربى انه اريد اخذ راحتي وياج هنايه اضلن اجه فلان وصاحنه فلان كلشي مافتهم من زواجي خلينه هناك عله راحتنه وعود اشتغل وابني بيت هنايه
ونرد
- شهاب يعني هو منو بيتكم بقى والله عمو مايخلينه نطلع
- انه اريدن اخذ امي وزهره وجدتي وخللي البيت ليهم هيج احسن بنتي ماريدن تصير مشاكل
- يا مشاكل هاي شهاب عفيه لا
- موش لاااا افهمي انه اكلج تصير مشاكل مرت ابوي ماتسكت وانه بالكوه بالعهه هسه انتي من تجين تشوفيني اطب البيت بالنهار اكعد وياهم كله
اكضيهه بره ولو اجي عله العشه لو لا عبن شني
مامرتاح بينهم اكضي وكتي بره فما اريدنج هم تجين هنايه واضل انه بره اريدن اشبع بكعدتي وياج وهاذ صار وكت اكون نفسي نعزل بيت لوحدنا من اول احسن لينه وليهم
- ماادرري يعني اذا هيج شوكت نتزوج ؟
- مانطول بس تتعافين نتزوج
- لا خلي اتخرج مابقى شي
- جم شهر ضلن ؟
- هسه هيه راح تبدا الحفلات نهايه الشهر هذا ويبقى الخامس والامتحانات
- اي زين يلا نصبر عليهن
- زين ليش متكمل البيت ونتزوج فد مره
-رببببببى
- اوكي اوكي سكتت
- تخليني احجي عليج كوه
- لا والله سكتت شبيك عيني اعصابك
- استغفر الله ... اسمعي بنتي اخذج لاربيل هالاسبوع تحضرين روحج نروح نسوي الفحوصات من جديد وانه راح اخابره باجر اشوفن  يمتى يحدد موعد للعمليه
- زين شكد ونرجع
- نضل هناك بالشقه لحد ماتكومين عله حيلج يلا
نرجع
- يعني الحك عله حفل التخرج ؟
- تلحكين ان شاء الله
- اذا مالحك علي ماسويهه هسه
- حته اكسر راسج بسج عاد طولتيهه هواي تجيبين وتماطلين بالسالفه شعندج
- ايييي ماريد
- ههههخخخخ خوافه
- مو خوافه لتضوجني هيج هسه عوف هالسالفه
- اي عفناهه .. مشتاكلج
- امممم شكد
- بكد جمالج هاي عود انه كتلج غسلي واكعدي انتي جيتي محمره ومكحله سبيتيني بكحله عينج
- هههههه لعد ليش مااحجيلك شسوي حتى لا تكلي بس كعدي وسكتي
- انه جنت حالف اذا ماشفت النمش اطلع هاليوم من عينج بس ربج ستر
- ايييي ادري والله كلت هاي اذا يروح هسه شيخلصني هنه لرموش وبالكوه ساكت عليهن
عاد ماخليت اي كريم عليهن عفتهن هيج ع الطبيعه
- يروحن كلبي فدا لهالطبيعه خلابه بعلي

ضلينه نحجي لنص الليل وعاد نمنه .. ثاني يوم
سألت ابوي عله بسام وكال .. ماراضي يرجع
وكايللهم مالي شغل باحد بعد وضال بغداد يم جماعته زعلان من اهله ...

كلت خلي يهدا جم يوم واروحن احاجي بلكي نتراضى هوه عزيز علي وداكه بكلبي هاي روحته

خابرت الدكتور وحدد يوم الاربعاء الجاي العمليه
وبعدين حاجيت ابوي عله بيع السياره مارضى ابيعنهه كال انه انطيك شكد ماتريد عاد انه كتله تاخذ هذيج الكاع بدال هالفلوس عبن انه مال اخذهن هيج وتصيرلي منيه ماكدر موش طبعي هاذ ... شافني قافل ع القضيه عاد رضى بيهه
ونطاني حك الكاع كامل مكمل ...
عاد نطيت خبر لادم عله سالفه السياره يلغيهه
ويحاجي الولد وهوه ماكصر كبل راح خابره وتفاهم وياه ...

خابرت عمي حاتم ووصيته يحضرون روحهم
نمشي الاحد لاربيل ..
الشيخ كلش انكطعت علاقتنه انه وربى وياه وهوه ماله دخل بينه لا من كريب ولا بعيد ...
لحد يوم السبت خابرتني ربى وكالت تريد تجي
تحاجي الشيخ ماعارضت عبن ادري تريد تودعه كبل مانمشي الصبح ...

لليل اجوي بيت عمي حاتم .. كعدنا شربنه الكهوه
وشويه وترخصنا انه وربى ومشينه لبيت الشيخ

- بنتي انتي فوتي حاجي وانه هنايه تلكيني يم الولد
- لا شهاب امشي نفوت سوه
- ربى يعني عليش تخليني كل يوم اعيدن نفس السالفه امشي وماعليج بيه
- يعني لشوكت تضل هيج ماتحاجي مايصير حبيبي
- يصير كلشي يصير امشي يلا لا تتاخرين
- افف زين زين

عفتهه ومشيت لولد عمي جانو فارشين و كاعدين يكرزون حب كعدت وياهم وخذتنا السوالف وما حسيت الا عله صوت تلفوني يدك عاينت هاي ربى .. جاوبتهه ..
- ها بويه وينج
- بعدني يم الشيخ تعال يريد يحاجيك بشغله
- وين كاعدين؟
- بالبيت مو بالديوان
- زين جاي

ترخصت من الولد ومشيت لبيته .. طبيت سلمت عليه وكعدت عله يمينه وربى عله يساره ...
عاينلي وكال ...
- المره وخذيتهه عمك وراضيته ضال صاد عنه عليش !
- مابينه شي عمي احنه اهل شني البدر مني موش زين بحككم ؟
- ماسويت شي لجن ضال زعلان وماتعتب ديواني ولا تحضر مجلسي عليش؟ موش حجينه بالصار والمضى!
- هاذ ياعمي عبن انه ليه من هالعشيره اهلي بس
غيرهن موش حكي
- هااااا يعني بعدك ماتريد تردن ليهه .. شني تريدن تصير انته وعايلتك لفو !!!
- موش محتاجين نلفي عله احد اهلي بينكم وحرمتي وياي واحنه عدنه مجان اليلفينه
- موش صح هالفعل ياشهاب تعكل يابويه موش هاين كرامتك انه ولا تبريت منكم انتم اعزاز كلبي
الله يعلم شكثر تاذيت بروحه شمسه من جدامي ماعولت الاكيكم وتردون لينه تالي تريدن تاخذهه وتمشون !
- حياك الله بكل وكت لينه عمي وان ماجيت انه اجيبنهه ليك واشبع بشوفتهه لجن كعده هنايه ماتصيرن بعد
- بويه شهاب حكك عله هالراس لجن انه فهمتكم
كلشي والغايه تبرر الوسيله موش صح حجيي
- اي صح عمي
- جا ضال راكب راسك عليش شني جتال اهلك انه حايف حلالك شسويت ليك ماتكلي.. تهدا والنفوس
بينه خلهه طيبه وخل ترد الفرحه بينه من زمان مافرحنه هيج ماعاينت شلون عمامك واهلك هالكاع ماوسعت فرحهم يوم الكطعتو مهر
تهدا وانه من باجر اردلك حكك جدام هالخلك كلهه
لجن انتم ولدنا وعزازنا مانفرطن بيكم لحمنه انتم
مانعوفنكم بالغرب ..

عاينت لربى وهيه تنتظر مني جلمه .. صفنت بيهه
وكلت ليه ..
- تسلم عمي .. اليعجبك سويه لجن عله الكعده انه
ناوي ابني بيت واكعد  بي بس اريدن ارتب اموري يلا
- اي عين العكل .. اكعد ابيت وحيدكم احسن
وكاعكم عليه
- لاااا عمي مشكور
- لاااا هاي هديه عرسكم لا تعارض بيهه
- مشكور عمي ماتكصر
- بيكم خير وتدللو .. يعني يمتى تريد تبنى؟
- موش هالساع بعد .. انه اريدن نكعد باربيل بين
مارتب اموري وابنى البيت
- وعليش تضل هناك وبيتكم موجود شكبره ماتكعد بي
- عمي هناك احسن
- موش احسن لااااا مال تكعدون هناك حوالي السنه ماترهم ترحون شهر شهرين كضوهن بدايه عرسكم وتعالو هنايه اكعد ويه اهلك بين ماتكمل بيتك جا البيت شني تريده يكمل بشهرين !!! رادله وكت وشني تضلون هناك ماعدنه بيوت هنايه !!
جا هاذ الخير كله المن رايدينه غير ليكم !
- الله كريم .. خلي تكمل العمليه وتكوم ليه بسلامه
وكلشي يهون لعينهه

ضحكت وبانت الراحه عليهه والشيخ حط ايده بايدي وضحك عاد كمنه وهوه جاب ايدهه خلاهه
عله ايدي وكال ..
-  اريدنكم مثل الجرف والماي واحد يكمل الثاني
وماتفاركون وتذكرو انه ليكم سند موش هدام لاحلامكم
- يخليك الله النه شيخي
- والنعم منك ماتكصر
- ديربالك عله شمسه ياشهاب هاي رويحتي اريدنك تردهه ليه سالمه ومتعافيه من كل شي
- ان شاء الله

سلمنه عليه ومشينه جان كالت ..
- خلي نروح للنبكه نكعد ماريد ارجع للبيت هسه
- يلا امشينه

رحنه نمشي واحنه ايد بايد ..وكفنا يم النبكه عاد هيه ضحكت وكالت ..
- تذكر اول يوم هنا
- اييي يوم السودنتيني ببرودج
- شكد جنت اكرهك بوكتهه هههههه والله مرات اصفن اكول منو جان يتخيل احنه قسمتنه سوه
- انه هم كبل جنت اكول هسه انه ماحبيت من هالخلك كلهه الا هالسحاره
- هااااا شو جلبت بسالفه السحاره
- جا موش سحاره انتي
- هههههههه ذكرتني من قبل جنت تفتر ورايه وتراقبني والله جنت اطك من الضحك عليك صح تضوجني وتخليني اعصاب بس هواي اضحك على هذيج الايام جنت وين ماامشي الكاك ورايه
هههههههه
- جا غير سودنتيني اشكال تخيلتج تسوين وضلت ادك بكلبي الا اعرفنهه ولهالساعني مافهمت شي منهه  متكليلي يمتى تحنين علي وتحجيهه عاد
- بعد بعد
- شني بعد
- مو كتلك يا حبيبي اني فتحتلك كل الابواب الباقي عليك تمشي بيهن
- وشعرفني انه شسوي
- بس خليك وياي وهوه كلشي يجيك بوكته
- لاااا بنتي عوفي هالسالفه شبعت منهه كليلي شي افهمه واشوفنه
- اممم شوف حبيبي بس حافظ على هدوئك وياي
واني بس اتعافى ان شاء الله اشوفك كل الي باقي بالك بس هسه ماعندي حيل اله والله
- يعني هيج ياخذ من حيلج جثير ؟
- المشكله مو بي المشكله بيه اني حيلي قليل اي
تعب راح يوكعني متشوفني دائماً اتجنب هالموضوع وياك لان لو حجيت هيج مايفيد اذا ماتشوف بعينك واني كتلك اريد تعرفني غير عن الي هالناس تعرفه عني .. يعني باختصار اكلك
كل مواقفنه قبل راح تصيرلك بيهه نظره ثانيه
وتشوف مثل مايسموه كواليس
- زين .. نصبر ماعدنه شي اهم شي راحتج اريدنهه يارويحتي

ميلت راسه عليه وانه بوست راسهه وضلينه نعاين للماي وتالي ردينه للبيت ...
حضرت غراضي و وصيتهم ينامون من وكت حته من الصبح نمشي ...
ربى ضلت ويه زهره بعد ماشفتهه .. عاد رحت نمت ومن الفجر اجه عمي كعدني ..

تريكنا وسلمنه عله الاهل وجدتي كاضه ربى وتحصنهه بالمعوذات وتدعي ليهه والشيخ اجه
لينه هم حضنهه وشال ظرف فلوس راد يخلي بايدهه انه خزرتهه عاد هيه تعذرت منه وماخذتهن
اندار عليه وكال ..
- مالك دخل ياعنتر بنتي واريدنهه ماتعتاز حته ليك
- ماتعتاز شي وانه موجود شيخ
- لا تتدخل بين الاب وبنته

جر ايدهه وحط الظرف وكاللهه ..
- اريدنج تمشين ويه امج وتاخذين كلشي جديد كبل عمليتج اريدن تردين هنايه بعافيه وحيل وجمال جديد ماريدن يضل وياج ولا شي من كبل فهمتيني
- مفهوم شيخي تدلل
- يارويحتي لو بيدي اجي وياج لجن هالديوان كله بركبتي بس شهاب ينوب عني بعد
- ابو الشهب مايقصر لا تخاف شيخي اطمن
- روحي محفوظه باسم الله وجاه اهل بيت نبيه
اريدنج كويه مثل مادايماً اعرفنج بويه خلي بالج
كله عله حياتج الجديده ورديلنه سالمه انه كلبي وفكري يضلن وياج لحد ماتردين جدام عيني سالمه غانمه
- ان شاء الله شيخي ضل ادعيلي
- بكل وكت وكل صلاه انه ادعيلج يابويه ماناسيج

حضنهه وتالي مشينه ويانه امهه وابوهه ...
جنت منطي خبر لادم عله رجعتنه عاد من وصلنه
هناك تلكونا هوه وليال سلمو عله عمي ومرته وطبينه لشقتنه شويه كعدنا وجان يندك الباب
اجه ادم وكال ماتغدينا انتظرناكم .. عاد رحنه لشقتهم جانت ليال تارسه الميز باشكال الاكل
كعدنا اكلنا سويه وسولفنه وشربنا الجاي وتالي
ردينه للشقه ...

تذكرت انه هنايه ماعدنه فراش كافي لينه كلنه
عاد نزلت للسوك جبت مخاد ودواشك وغطوات
وتسوكت للعشه هم ورديت للشقه ...

ربى وامهه خذو الحجره الجبيره وانه وعمي
رحنه فرشنه بالحجره الثانيه ونمنه ...

ماحسيت الا عله صوت ربى تكعدني للعشه
عاد كمت غسلت ولكيتهن مكملات العشه وحاطين الصينيه .. كعدت اكلت وبعدين حاجيت عمي وكتله اذا تريدون تمشون نفتر شويه .. مارضى
اليوم كال تعبانين ... عاد كتله باجر الصبح نمشي للمستشفى نسوي الفحوصات ...

هوه وعمتي راحو نامو وانه وربى ضلينه كاعدين
نسولف ونتفرج فلم .. تالي رحنه نمنه ومن الصبح
مشينه للمستشفى ..

نفس الدكتور هوه تكفل بفحصهه واخذ التحاليل اللازمه ودزني للدكتور الثاني هم حاجيته وفهمنه
عله شني الي يسوي كال جهاز صغير يخلي ينظم النبض وكال الاربعاء من الصبح انتم هنايه تجي
بلايه اكل وتوكف كل الادويه من اليوم ...

ردينه الظهر للشقه وانه ماخليهه تتحرك بس كاعده جدامي نتعارك ونترزل من عمي نسكت شويه واشوفنهه تغاللني وتكوم ويه امهه وارد اجيبهه
تالي الا زعلت عليهه يلا كعدت واستجلت بمجانهه

هيه بلايه شي بلكوه تجر النفس والنوب بلايه ادويه هاليومين اخافن عليهه ...

ثاني يوم اجتني تتوسل وتتدلع تريد نطلع للمول
عاد ماخليتهه بنفسهه اخذتهم وطلعنه كلنه ..
عمي ومرته يمشون وحد واحنه وحد اعاينلهم
مدري شيتبسبسون ويتمضحكون عاد كلتلهه
- عايني ابوج شلون ناسي الدنيا
- اذا عنده مثل امي ليش لا
   -اي خلي بلكي امج تلهي واخذج ونشرد شويه
- شنوو وين نشرد
- بويه هسه انه شفهمت منج بالكوه اكضن ايدج وبالختله جا لو ضالين مخاطبين احسن ع الاقل جنت اشمشم احضن هسه صارت يابسه
- ههههههههه يااا غير ابويه موجود يعني شلون
- اكلج مانخليهم وحدهم هالليله هم خطيه ياخذون راحتهم
- لك عيب شهاالحجي طالعه عينك
-ههخخخخخ من زمان بنتي جا توج يلا دريتي
- يااا شكد جريىء

ضليت اضحك عليهه وعاد امهه اشرت ليهه ورحنه يمهم وطبينه لمحل ملابس مال بيت
وضلت هيه وامهه تختار وعمي هم واكف ويعاين ليهن عاد انه طلعت وشفت محل بي الزي الكردي
وتذكرتهه بهذاك اليوم شكثر جانت حلوه بي عاد
نطرتهم طلعو وخذيتهه عليه ...
انه وياهه اختارينه اثنين الهه وواحد لزهره ولمنال
وكملنه فره واكلنه وردينه للشقه ...

لليل خابرني وليد عاد انه طلعت بره الشقه جاوبته
- هااا يالعضيد
- هلااا بالعريس
- لك بويه ياعريس غلطه عمري جبتهم
- هههههااااي عرفتك والله مسويهه حصار عليك مو
- اذا اعاينلهه الكه ابوهه فوك راسي عبالك جايهم من الشارع بطو كلبي والعباس
- ههههههههه لعد شتريد مو زين مكعدك وياهم
-لا عايز والله
- لتخاف هسه اني اجيك واسويلكم مجال
- شتجي ؟؟هنايه !
- اي لعد وين
-عليك علي
- اي وعلي مو باجر يوم العمليه كلبي مانطلني اعوفك وحدك ادري بيك ماادبرهه هيج وهي جوه بالعمليات كلت اروح لصاحبي ادير بالي عليه واوكفله بهالشده بلكي يحن عليه ويزوجني اخته ع العطله
- هههههههااااي هاااا مصلحجي
- لعد بس انته كلبك مفرفح مو اني هم شبعت ضيم
بله انته يمك وكدام عينك الا اني اعبرلهه محافظات هو هيج كالوهه ياخيي
- يلا ما ضل شي خلي تمتحن والله كريم هو احنه اثنينه متربطين بامتحاناتهن حالك من حالي خويه
- ااااااخ بالضيم خويك
- هسه باجر تجي من صدك لو تشاقه
- لا والله اني خابرتك داكلك راح اطلع ب ١٢ حتى
من اخابرك واكلك وصلت تجي تتلكاني ماندل وين كاعدين
- يااابه حياك الله بس توصل اربيل خابرني
- اي ماشي بس لا تكللهم خليهه مفاجاه امانه عليك
- ههخخخخخ تفاجىء عمي تريد!
- ايييي خلي يشوفون صاحبي مو وحده هيج اجي اصدمه اريد اشوف وجهه شلون يصير هو هم ميرتاحلي
- لااا شعنده وياك
- هسه نجي ونشوف يلا خلي اروح احضر غراضي
- يلا مودع بالله توصل بسلامه
- الله يسلمك

سديته وطبيت للشقه عاينت ربى واكفه ورافعه الحاجب كالت..
- وين جنت ؟
- خابرت صاحبي
-منو
- صاحبي ماتعرفينه
-هاااا
- اي شني شمالج
- مابيه شي حبيبي بس ضجت ماريد تروح ضل يمي اريد اشبع بشوفتك
- يمج انه حبيبه شعندي غيرج

فات عمي ويحمحم عاد انه كلت بلشت رحمه الله
حته سهر وحدنه مامش ..
ضلينه كاعدين نتفرج تلفزيون وعمي جان يريد فلم رعب وضلينه كلنه نعاين ليه .. عاد شويه وربى كالت ..
- شهاب انطيني تلفونك اريد اكنك شويه ضجت
- شني ماعجبج الفلم
- لااا ماحب هالنوع مو تدري
- ايي ادري كلش زين ادري .. هاج اخذي

مديته ليهه وضلينه نتفرج الفلم وهيه تكلب بالتلفون
خلص الفلم وعمي ضل يكلب بالقنوات عاد انه عاينت ليهه جانت صافنه علي ودمعتهه بعينهه
عكدت حواجبي وكمت ليهه .. جان تمشي كبل للمطبخ رحت وراهه وهيه تبجي كضيتهه من جتفهه وخرت مني ..
- شمالج حبيبه عليش هالدموع
- هااااي شنووو شنوووو
- شني فهميني
- يعني تتراسل وياهه بعدك ! وتخابرهه !!
- منننننني يامخابره ياعزا شمالج
- لتغشم روحك هااااي مو مراسلتك لو شنووو
كلي منو الحاجي ابوويه !!!

جريت التلفون منهه وشفت داخله عله الماسنجر
وبالمحادثه مال ناديه جانت دازتلي ..
شلونك ليش رقمك مغلق ؟
وينك ليش متجاوبني
يعني رحت وخطبتهه والله عفيه عليك

- ربى هاي
- شنو هاي شنو يعني تخابرك وتتحاجون واني مادري ليش تجذب عليه شسوووويتلك اني ليش تجذب ليييش
- مامجذب عليج وعيونج هاي الرسايل مامنتبه ليهن وحك عينك مادري بيهه دازتهن
- هااا هذني ماتدري بيهن والي قبلهه هم متدري
- لا هاي مره راسلتني وجدامج الحجي عله كد سلام وسؤال ع الاهل مامش شي بينه وغلاتج
- وشلون تحاجيييهه مو تدري بيه ماراح ارضاهه
يعني لو مااني شايفتهن اليوم تضل كل عمرك ضامهن عليه
- حبيبتي موش
- كااااافي لتكلي حبيبتي لتكللييييي وانته تجذب وتروح تحاجي طليقتك من وراي كاااافي ماطيق اشوفك بعد وخر من وجهي

كبل مشت راحت للحجره وسدت الباب اجتي امهه تسألني عليهه مارديت ليهه شي رحت طلعت بره
وضليت الوم بروحي انه شعندي حاجيتهه هذاك اليوم وقبلت صداقتهه ..

رحت كبل حضرتهه وجنت اروح واجي بالممر اريدن افكر شلون اراضيهه عاد كبل انفتح الباب
وطلع عمي يركض ليه ..

- هااا عمي
- الحك لك بويه البت طاحت لا ايد ولا رجل

كبل ركضت طبيت للحجره عاينتهه بالكاع مدده
وراسهه بحضن امهه دنجت جست نبضهه ضعيف
كبل صحت عله عمتي جابت الشال حطته عله راسهه وشلتهه ومشيت ...
.
.
يتبع

هذا تكمله هذاك البارت اعذروني تاخرت عليكم بي
بس مالحك اكتب شي والله واسالو ام الكيوي اركض بتلفوني اكللهم بس ساعه لو ربع ساعه عوفوني وحدي .. يلا كدرت اكتب هلكد وهسه راح اكمل وانزللكم يمكن الفجر تعرفون بيه اعوضكم ماعوفكم بدون دلال ...

توقعاتكم !!!!!