رواية من فجر ديسمبر الفصل الحادي والستون 61 - بقلم Zoka 🌷

من فجر ديسمبر
🍁
🍁
رحت بدلت ملابسي ع السريع واخذت السويج وطلعت ليهه ... جان بالي خوف عليهه شني الصاير ومكايلتلي عليه خاف هذول ماذينهه بشي!!

وصلت وطبكت السياره ونزلت دكيت الباب محد يفتح عاد فتحت السركي من جوه وطبيت وسديته
مشيت كبل للمطبخ اعاين مامش احد هنايه ..
اصيحن عمتي وينج ! ربى !! مامش صوت
مشيت ليم الدرج واكف اريدن اخابر عليهه جان تنزل من فوك .. لابسه ثوب كصير لون سمائي ومخصر عله جسمهه لازك عليه والشعر مفتوح ومسشور والمكياج والكعب الرفيع وردي ..
ضليت صافن عليهه وعاكد حواجبي .. مادري اعاين لهجمال لو افكر شني سالفته ؟؟؟

اجتي يمي وهيه تضحك وترفع بشعرهه من عيونهه كلتلهه...
- اللهم صل عله محمد وال محمد بويه انتي حسنج كل يوم يزيدن شني!!! فهميني !!
- ههههه لان تحبني تشوفني هيج حلوه
- لاااا ياعيوني انتي من كاعج حلوه ومدوخه كل من يشوفج الا انه ماخذه عكلي من زمان بهالزبد المسفط
- امممم احب كل عقلك يضل الي
- لج هوه كله عندج والج
- زين لعد تعال وخلي عقلك بس وياي

اخذت بايدي وطبينه للهول جان اظلم انداريت ليهه
وهيه سدت الباب  وفتحت الضوايات وجان اشوفن
ميز وعليه غطى لونه زيتوني ساده وعليه كيكه
كلهه ككو وفستق مغلفه بي وشمعدان اثنين ذهبي طوال ونجوم ذهبيه ناعمه  منثوره عله الغطى هاذ
ومواعين اثنين وكلاصات عصير ومواعين بيتفور
وبقلاوه وكرزات و كلب صاير من الورد مسفط عله طرف الميز وجوه بالكاع منثر هم ورد علب مغلفه  ونفاخ مطشر يم الميز ..والبرده عليهه نشره تشتغل بضوا احمر وازرك واصفر ..

عله هاي صفنتي وانه اعاين لكل شي اجتي جدامي
وطكت هاي الي تذب ورق ملون جفلت منهه وجان تضحك وتكول ....
- كل عاااام وانته بخيييير
-يا عام ياخير !!! هوه شكو
- هههههه عيد ميلادددك ابو الشهب
- ليش اليوم شكد
-  ٩/٤ حبيبي شنو ناسي !!!
- هههههههه عليج علي !!
- اي والله شبيك
- بعلي ناسي اصلا مادري اليوم ٤ .. وهاذ كله انتي مخططته ومسويته ليه !
- طبعا لعد غير عيد ميلاد رجلي حبيبي شلون مااحتفل بي واخططله
- يا بعد روووووحي انتي

رحت بست راسهه وحضنتهه حييييل وخليت راسي يم ركبتهه وكلتله ..
- انتي كل فرح حياتي عوضتيني عن كل شي
احبننننج والله والله احبننج
- اعشقك ياحلووو هههههه تعال يلا شلون نضل واكفين هنا

اخذت بايدي ومشينه للميز بالاول جابت تلفونهه وكعدنا نتصور وبعدين شغلت هالاغنيه

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

- لك حبيبي يوم ميلادك خلي نحتفل ع راحتنه اركص وتونس
- ههههههههه ماعرفنج هيج مرحه !
- بس وياك ياحلو

كامت تغني بهالاغنيه و تتمايل وتركص يمي وانه اضحك فرحان بيهه هالشكل ازيد من كل شي
ذبت التلفون من ايدي وضلت كاضه ايدي ونركص عله الاغنيه .. وهيه مندمجه كلش
صدك غيرت مزاجي وخلتني صغيرون وياهه
ولا جن هاذ ميلادي ال ٣١ ...

اخر شي شلتهه وفريتهه وهيه تضحك بعلو صوتهه نزلتهه وبوست ايدهه جان تكلي ..
- ما خلصنه بعد الكيكه
- ههههه حلوه هالترتيبات عاشت ايدج يارويحتي
- تدلل انته

وكفنه من جهه التخم وانطتني السجين وشغلت  بس موسيقى  وضلت كاضه التلفون وتصور وتكول ..
- سنه حلوووه ياجميل

وانه اضحك واجتي خلت ايدهه عله ايدي وكصينه الكيكه  وكالتلي الشمع الشمع .. هم طفيتهن وجان تصفك وتكمز تبوسني بخدي ...
كعدت تشيل قطعه من الكيك وحطتهه بالماعون
واجتي وكلتني وهيه ضحكتهه مافاركت وجهه
اخذت شويه وهم وكلتهه وبستهه وهيه تاكل
بعدين كعدنه وهيه حاضنتني وانه العب بشعرهه كلتلهه ...
- تصدكين هاي اول مره انه احتفل بعيد ميلادي
مامسويهه من كبل محد جان يهتم لهالسالفه
- بس هسه بعد اختلف كلشي حبيبي .. اني اهتم لكل تفاصيلك ولكل شي يسعدك
- محظوظ انه بيج ... والله هالكلب ماغلط من ضل مجلب بيج وينتظرج عبن يعرف انتي دواه
- هههههه اموووت عليك وعلى كلبك
- يابعد هلي وكل دنيتي ... نسيت اسالج اهلج وين!
- ههههه سفرتهم
- لا والله
- وصيت امي تكول لابويه اريد اسوي حفله صغيره وياك وهو كال اني شوكت اخلص من هالتمعشك وكبل طلع هههههه
- ههههههههااااي شكدددد عيب منه
- لااا هسه شنو يعني تره ماصارت من وكت خطوبتنه لحد هسه النه كعده هنا .. بس هو يضوج ميحب تاخذني منه والله مرات مثلا مو اخابرك واني كاعده بره لو داشتغل بالمطبخ ويشوفني
يصير فد عصبي ويضل يتعارك ويه امي لو حيدر على اتفه الاشياء
- ههههههه جا خلي اخذج كبل لا يغير رأيه
- ههه كلشي يصير .. النوب حتى حيدر يكول لامي لعد ماتخطبيلي اني هم اريد ادلل وامي تكله بعدك صغير وضلو يتعاركون يكلهه عشرين عمري عشرين شنو صغير مو بعينج هاي شواربي
- هخخخخ النوب علينه حيدر افندي
- ايي يغاروون
- حكهم يغارون جا وين لاكين مثل مريتي
وين راح هوه ؟
- مادري دزيته يجيب الكيكه وكلتله اليوم اجازه الك من البيت استمتع بره هههههه ضلت بس امي فوك كالت اني راح انام بقت عليه
- هههههااااي اليوم مسويتهم انذار هههههههععع
- ايييي لعد شلوون يضلون هنا استحي كلشي ماكدر اسوي
- بس تدرين احلى شي بهاذ كله هوه انتي
- شهااب
- والحسين تجنين يعني انه مادري اعاين للشعر لو لهالعيون الكاعده تخم ويه هالثوب مدري اعضعلي شويه من هالزنود حرت والله حيرتيني
- هههههههه ماكوو لا تعض ولا شي خلي ناكل هسه

ضليت اضحك واكرص بيهه وهيه تحط بالمواعين وتحجي عليه اكعد وكافي ..
كعدنا ناكل وكالت خلي نخابر زهره ...
وخابرناهه جان تفتح كاميرا كبل خذيته منهه
- شمااالج انتي تطلعين هالشكل بكلي وليد كاعد
- لااا مموجود هسه
- وشدراج
- هي كالت طالع ويه ابوه دجيب خلي نحجي
- اكفي

اخذته رجعت خابرتهه وحاجيتهه انه بالاول
وتأكدت وليد طالع يلا انطيته ليهه ...
- هااا زهورر شلونج
- هلاا عيني هاي شمسوين اليووم
- مفاجأه لرجلي الحلو ههههه
- اي خويه شكو عليك مرتك خوش مداريتك
- احسن منج
- اييي عيني بعد هذول الاعزاز احنه بيش كيلو
- هههه لاا ولج انتي هم عزيزه .. كليلي شلونهه الكعده ويه وليد
- يممماي تهبل .. جا غير مفطسني ضحك اسمعو خلي اكلكم شسويت بي البارحه
- اي
- جان يريد يمشي لبيت عمه ويه ابوه من الصبح
عدهم عزيمه ويردون يمشون ليهم الصبحيه ابوه وصاه وهوه مايرضى يكِعد وانه اكعد ولك ياوليد يامصخم كوم ابد حاط هالمخده فوك راسه ومتلفلف باللحاف وابوه مناك يصيح وينهم ...
جان اكوم ادور بالثلاجه مامش ثلج هنايه والماي مخلص لكيت بطل بيبسي وجان اجيبه وشلت اللحاف شمرته وكلتله تكوم لو لااا يأشرلي روحي روحي وجان اجيبن البطل واديرنه عله ظهره وهوه كاملج يكمز ويصيح وانه كعدت بالكاع خربت من الضحك انه اضحك وادكن عله رجولي وهوه يصيح ويشمر بالغراض شلون مانخليه ينام

- ههههخخخخخخخخخخخخخ بويه انه صرت اخافن عليه منج وعلي مسكين
- شني مسكين خويه جا هوه غير ردلي بالليل
مطنكر ومايحاجيني ومسوي روحه زعلان وانه اريدن اسبح ويطفي الضرا عليه ويروحن يطفي الماطور .. طلعت يكلي امشي صبيلي جاي وخدري جديد اروحن اسوي اجيبه يكلي ماريدن
واروحن اذبه من ارد يكلي افرشيلي بالكاع ماريدن اشوف وجهج بعد جان افيط بي فيطه والعباس
انخرس وضل صافن عليه بلع لسانه

- ههههههه  شكلتيله بله

- كلتله شني خدامه عندك  جيبي وودي ولا ماريدن وردي جيبي شني جاهل وتمضحك علي
وماتريدن تشوفن وجهي جا عليش ضال مجابلني هاي حجرتي ماتريدني امش هاذ بيت اهلك شكبره روح شوفلك مجان واكعد واخلص مني عتوي انه وماتريدني فوك ما تحاجيني جلمتين حلوه تجي ماريدن اشوفنج لااا والله عمي خوش !!
تالي شلت مخدته ولحافه وشمرتهن بالكاع وهوه ضال صافن تالي ردت انام مكدرت بعده الحجي ماخلص عندي جان اردن اكعدله واكله ..
تره انه تشاقيت وياك ما ذبحت اهلك هنه رشتين حته تكعد جا تريدني اكعد واجابلك وابوك يندهلك
وانه بيمن اكعدك بالريش !!!
وبعدين شفته كام وجهه يتغير مال متعجب هيج من اعصابي جان اكله .. هسه انه اسفه ماريدنك تشيل بكلبك علي ولا تزعل مني انته تعرفني ماكضن لساني جان يخلي ويكوم وخلاني اتكرضم ماخليت شي ماحجيته عليه

- حييييل والله تستاهلين جا دكتج ها دكه نواكيص
تعرفين الزلمه روحه بالنوم عليش تخربينهه علي

- خوويه شني جا شسويله نومه مال اهل الكهف
لا يهش ولا ينش جا شلون اضلن انه اصيح كوم ياوليد اكعد يوليد وابوه يصيح عليه

- اي اطلعي ليه وكليله ابنك مايكعععععد موش تجفلينه من صباح الله وفوكاهه تطلعين لسانج هالطول عليه ولج انه جم دوب اضلن اوصي بيج

- ايييي خويه هسه احنه تراضينه لاتضلن تحجي علي

- هههه شلون تراضيتو بله

- هوه وره جم ساعه رد ياخذ الفراش وطلع وانه ضليت احوصن ماتحملت هيج يجافيني وجان اطلع وادورنه والاكيه يخابر ويكهكهه وانه رديت للساني واول جلمتين وجان يكوم ويسد حلكي
وضل يحجي بالتلفون عاد عفته ورحت لحجرتي لحكني وجان يكلي .. هاي خالتي الصغيره جنت احاجيهه لا تخلين الشيطان يلعب براسج وتسويهه ليله السوده عليه .. عاد انه ضحكت وهوه ضحك وتراضينه

- هههخخخخخخخ والله انتم بليه الله يساعد اهله عليكم

- اوووي شكد حلوووين

- شوف هاي الثانيه ياحلوين ولج هذول مسادين

- ههه لاا متشوفهم شلون يتزاعلون ويتراضون بسرعه حلوين

- ديربالج تصيرين مثل خبالاتهه وعلي اردج لاهلج انه ماتحمل هالسوالف

- لاا حبيبي انته معاملتك خاصه لتخاف

- هوه انه لين خاصه حذرتج

ضلت تضحك وكملت حجي ويه زهره وانه اكل
تالي سدته واجتي حضنتني ..
- مرتاح حبيبي
- اكيد بوجودج وضحكتج بنص الراحه
- عساها دايماً .. هديتك نسيتهه
- هديه النوب .. رويحتي هاذ كافي شسوي بالهديه
- لا لاا ماتكمل بدون الهديه

كومتني ورحنه جدام الميز وشالت العلب خلتهن ع التخم وكالت افتحهن ..
فتحت الاولى جان بيهه قميص لون نيلي وبنطرون زيتوني من هذا التسعين والثانيه بيهه حزام رفيع جوزي وحذاء جوزي والثالثه ساعه سلفر والميل مالهه جوزي .. ضحكت شلون مفكره ومنسقه هيج
خذيتهه لحضني وعصرتهه حييل وكلتلهه ...
— لج انتتتي شنننني طيرتي عكلي بسوالفج
- هههههه شعبالك لعد مرتك مو هينه
- لاا عمي مريتي مامش مثلهه .. تسلمين حبيبه كلشي جبتي وحضرتي يجنن وحيل فرحتيني بيهن
- هو هذا الي ردته فرحتك حبيبي
- يانور عينننني انتي  يانعمتي وكل فرحتي
صح انه اليوم كبرت سنه لجن وياج اهجس رجعت اصغر بعشر سنين
- ههههههه من الخبالات ههههه
- ههههههه يمتى حضرتي لكل هاذ واشتريتي !!
شني طالعه ومادري ؟؟؟
- لااا هو اني طلعت وانته تدري بس ماكلتلك ششتريت ههههه
- هاااا يعني من زمان
- ايييي ... حبيبي هذا كله شي صغيروون كدام الي مسوي الي وشكد تعبت وياي وفرحتني بكل مره اكون بيهه تعبانه وكارهه الدنيا .. كلشي مايجي بكد. واحد بالميه من الي انطيته الي
- يارويحتي انتي تستاهلين ماي عيني بس كون اشوفنج هيج فرحانه وضحكتج وجمالج يزيد هاي كلشي اريدنه
- اكيد مدامك موجود وياي  تلكاهن
- عله هالحفله هاي فلستي اكيد
- ههههه فدوه تروحلك كل الفلوس .. اصلا مرتاحه اني صرفتهن جنت افكر شسوي بيهن ماعندي شي اشتري ولا طالعه .. صارن نصيبك
- هههههههه يكرصن بيج اذا يضلن
- لااااااا بس يعني واحد لازم يصرف هههههه
- ههههههه والله ماكدرن افهمج انه اعذريني عكلي رجولي بحت
- اي حقك احنه البنات ماننفهم اني هم مرات مافهم نفسي بس يلا اهم شي تونسنه
- هسه تعاي خلي نتونس عدل
-هاااا بدت النظرات الخطره
- هههههااااي صايرره تفهميني
- شلون لعد تعودت عليهن واعرفهن
- جا كفي الحجي عاد انه اريدن اضوك هالزبد
- شنو ماضايكه قبل
- لااا بويه هوه جا ينشبع منه كل مره يصيرن اطيب من كبل خلي نشوف هالنوبه شلون صاير

ضلت تضحك وانه ارفع بشعرهه من وجهه واتلمس هالخدود المرفوعه وبعدين كعدت وكعدتهه عله رجلي وهيه كربت لوجهي بوستني وانه تهت بريحتهه الي ماكدرت بيوم من كل هالسنين اشيلنهه من بالي واسيطرن جدامهه ...
شبعت بحضنهه وبوساتهه.. عفتهه تعدل بملابسهه
وجاوبت الشيخ ..
- هلا شيخنه كواك الله
- الله يكويك .. انته وين
- ههههه بيت عمي حاتم
- هااا يامصكوع ماتعرف تركد
- جا هوه هاليوم انه جيت
- اي اي اكلك عودينه مرلي اكو فرد سالفه اريدنك بيهه
- ان شاء الله بالليل انه يمك
- يلا سلملنه
- يوصل

سد الخط وانه جنت اعدل بشعري وقميصي جان تكلي ..
- تروحله بالليل مو
- اي
- اريد اوصيك شي
- شنهي!
- خليك هادىء ولاتصير عرضه لاستفزازهم
- هاا تعرفين شني اليريدنه!
- لا ماعرف بس حسيت لازم اوصيك على اعصابك وان شاء الله ماتحتاجهه
- الله كريم

وره ساعه مشيت لاهلنه .. رحت حطيت الهدايا بالحجره ورحت سبحت وبعدين مشيت للشيخ
كعدت بديوانه وتالي وره الصلاه ندهلي رحت ليه
جان يكلي ...
- هالليله اريدنك تمشي تكابل لابان وتكِعد وان مشى تمشي وراه
- خير شيخنه!
- ان شاء الله خير سوي الي كتلك عليه ونتفاهم

رديت لمجاني واسألت عنه كالو بيته يتعشى ويجي
والله وانتظرته ولحد مااجه سلم وكعد وانه عيني ضلت عليه طلعو الولد وكام وياهم ورحت وراه
وضليت الليله كلهه وراه وراه لحد مانتبهت عليه كلساع يعاين بساعه تلفونه تالي جان يكوم من صارت ساعه ١١ .. خليته يمشي وشويه وكمت وراه وضليت امشي وراه لحد ماعاينته تختل بين الكصب عله حافه الماي .. ضليت اريدن امشي ليه واخافن يعرف بيه وراه !!!
وكفت شويه بعيد وجان تجي بنيه مكبعه بعباتهه وشيلتهه مغطيه وجهه وبس العيون طالعه راحت ليه ...
ضليت شويه اريدن اتكرب واسمعن حجيهم والصوت يطلع اذا مشيت عاد نزعت شحاطتي ومشيت علكيف ليهم وصرت اسمعهه تكله ..
- والعباس نوبه الثانيه لو تعرضت ليه اشهرك جدام خلك الله استحي عله روحك وجف شرك عني
- اشنو هسه كمتي تكرهيني
- مااريدنك روووح ولاتعرضلي بعد ولا عبالك اخافن من تهديدك ولا شي انه ماطخن راس لبشر اجيتك حته احذرك هاي اخر نوبه اشوفنك تحومي عله بيتنه
- اريييدج اني اجي اخطبج بس اصبري عليه تعاي يمي مشتاقلج تعاي
- لك رووووووووح

جفتت عليه وجريته من ياخته وهوه ضل يبلعم وهيه ختلت وراي .. كضيت ركبته ودنجتهه وانه الدم فاير بعروكي اريدن اجعصه  جوه رجولي
انداريت ليهه وكلتلهه ...
- بنت منهو انتي ياعمام !!!!
- جيران احنه ياخويه 
- شنننني الصاااير احجي من الاول لاتخافين محشومه ومستوره
- ياخويه هاذ كل يوم الكاه باب بيتنه ولدوامي جان يلحكني والنوب تلفوني ماعرف منين محصله ويهددني يكلي لو ماتجين وتحاجيني انشر رقمج ويحجي عليه جدام الرايح والجاي حته نسوان منايه كامن يعرفن بي حاط عينه عله بيتنه وهاي رسايله ماتخلص ومادري بي منين يجيب رقمي اكسره احط الثاني وره اسبوعين هم الكاه رجع فدوه خويه ماتحجي لاحد ع الصار انه والله بنت رجال مانكس الروس واجيت احطن حد ليه الله يشهد عله حجيي

- امشي لبيتج خيه وهالسالفه اعتبريهه اندفنت هنايه توكلي بالله

مشت البنيه ركض وانه درت راسه وحطيت عيني بعينه وهوه يبلعم كلتله ..
- لااا يالردي تريدن تطيح روسنه بهالكاع واحنه شيوخ !!!! تالي هالعمر والتعب تصيرن سمعتنه بالطياني من وره نزواتك يالكديييش امش جداامي امشششش

خذيته ادفر ادفر للديوان وانه بالكوه كاض نفسي عنه .. تالي تفطنت الوادم كلهه كاعده ماريدن تصير سالفه جدامهم خذيته لبيته طببته وسديت الباب وضليت كاعد جدام البيت ... دزيت رساله للشيخ حته يجي وضليت انتظره ...
وره نص ساعه اجه الشيخ كمت ليه وكلتله..
- شيييخنه ولدكم ردي
- تهدا تهدا واحجي شصاير

حجيتله الصار كله وهوه يعاينلي وساكت تالي كال
- كفو منك .. انه جان شكي بمجانه وعرفته راح يفين هالليله زين رحت ووكفته
- الحمدلله الي سلطني عليه لو شايفه غيري جان صارو سيره عله كل لسان
- الحمدلله. هسه انه اتصرف وياه عدل .. انته امش لبيتك ارتاح
- اودعناك شيخ
- الله وياك

مشيت للبيت وانه موجر اعصاب ماعرفن اسكت بهيج سالفه انه اريدن اكطعنه باديني ..
رحت لحجرتي خابرت ربى وضليت احجيلهه شني صار وهيه مثل عادتهه تجيبني من سالفه اطلعني من سالفه وتنسيني ابو العصبيه ...

وره جم يوم عرفت لابان ماشي للموصل زعلان ورايح وحده وامه ادك وتلطم عليه لين الوضع خطر هناك وهوه ماشي بدون مايعرفون  ...
الشيخ دز وراه جماعه يشوفون مجانه وين تالي
كالوله ماشي ويه عمامه لاربيل ومايرضى يرد وياهم .. كاللهم عوفوه هوه من كيفه يرد موش صغير ونجبره ..

جنت اسمع من ربى اخبار الريم وتكول عنهه تنوح عليه ليل نهار وتتوسل بالشيخ يرجعه ليهه وهوه يكللهه اصبري هوه يجيج بس هيه ماترضى وزعلانه عليه لين مرزله هذاك اليوم ومعلي صوته عليه وهوه ماشي زعلان من بيتهم
وضالين كل واحد بصوب ..

وره شهر الشيخ دز جم زلمه لعمامه حته يردوه لامه .. من سالته شعجب غير رأيه كالي ..
ماريدنه يفكر احنه مانريده ونكيف عله روحته خلي يعرف هوه عزيز عدنه لجن الغلط يضل غلط ماينسكت  عليه لين عزيز .. وماريدن يتندم عله جيته هنايه خلي يرد لامه الوضع  موش امان ..

وهمزين هالمره رجع وياهم لجن ضل حد بيني وبينه وهوه ويه الشيخ رجع طبيعي ما جن صاير شي .. ويوم الي رجع بي لامه رجعت ضحكه الشيخ لين تراضى ويه الريم ..

صار شهر ال ١١ وبي سجلت لمحمد عله الدراسه الخارجي وجبتله الكتب .. وهوه ضل مجابلهن وكاعد يدرس للتمهيدي ..نوبات انه اساعده بالانكليزي واكثر شي عله اليوتيوب يدرس وياهم ..

جان يكول الا انجح بالتمهيدي يلا اتزوج وخله كل واهسه بالكتب ..

انه كثفت شغلي صرت اشتغل بالنهار باسواق
من السبعه الصبح لحد ال٢ الظهر ارجع للبيت
اسبح واتغده وانام واكعد المغربيه اصلي واضل كاعد ع اللابتوب واشتغل بالترجمه لحد ال ١٢
اطفي وانام .. وحته ربى اخابرهه وانه اشتغل
جانت تشجعني وبالنهار كلساع ادزلي اغنيه لو رساله شكل دايماً تتواصل وياي وماتخليني احس بتعب وضيج ...

صارت عطله  زياره الاربعينيه الي صادفت ٢/١٢ .. احنه متعودين نخدم بالمواكب من يوم ٣٠ بمحرم  نبدي ننصب المواكب عله الشارع العام و كل بيت وموكبه الخاص و كلمن يوزع شكل..
اكو منهم يبدون كبل هالوكت لجن احنه متعودين هاليوم نبدي  ونضل متفرغين بس ليه مالنه وتعبنه كله للموكب ابا عبدالله يصيرن ...
حريمنه يخبزن كل صبح ومسى .. والذبايح كل يوم من الصبح وره الريوك نذبح ونبدي نطبخ للغدا
والعشه شوي كباب لو فلافل لو تمن ومرك ...
والي من المنطقه ماعنده امكانيه يسوي موكب هيج  يدز كراتين عصاير وكيك يوزعوهن الجهال العصريه ....

اول خمس ايام من هالعشره يطلعن الحريم نصهن
ومن عمامنه وولدهم  هم نص يطلعون للزياره
عاد يرجعون وتصير الخمس ايام الثانيه احنه الي ضلينه نخدم نروح بيهن ...
هالنوبه ربى رادت تروح تكول مارايحه ولا مره
بالاربعينيه وجلبت الا تروح ضلت نص محرم هيه
تنك فوك راسي عله الروحه تزعل وترد ترضى وتتحايلي وتتوسل وحته ابوهه هم مايرضى لروحتهه وتسودنت تالي خليتهه تروح لجن شرطت عليهه تلبس البوشيه يلا ...
ضلت تحاول وياي تريد كلتلهه لو تلبسيهه وتروحين لو تكعدين وتسكتين ... عاد رضت
وراحت ويه امهه وعماتنه وزهره وياهم ..
وليد ضل وياي بالموكب نخدم ...
جنت كل نص ساعه اخابرهه واوصيهه عله مشيتهه صوتهه عباتهه .. وراحت وانه مامرتاح
شلون تمشي بنص الوادم وانه موش يمهه اخافن احد يطخهه حته لو بالغلط .. اخافن تتعب .. تتمرض الجو بارد .. و وليد نفس حالتي كلساع اسمعه يكللهه اركبي سياره واوصلي بسرعه لاتضلين فاهيه وانه اضحك اكله بالله انته الفاهي موش هيه هساع تلكاهه هيه الي قايدتهم ..

لما وصلن وزارن احنه كلوبنه شيبت ونعارك ذبان وجهنه ... عاد من ردن للبيت رحت ليهم ماتحملت مااشوفنهه ووصيتهه تجي للسلف ماتمشي لبيتهم

انه و وليد عفناهم وركضنه للبيت تلكيناهم
جانن متربات من فوك لجوه ويسحسلن بارواحهن
عاينت ربى راحت  حطت راسه عله الحايط وغمضت مشيت كعدت يمهه وكضيت ايدهه
غاديه نااار .. كبل جضيت بوجهه ..
- شماااالج شهالحرارررره هااي شوصيتج انه
- شهااب عفيه مابيه حيل
- استغفر الله كومي امشي اسبحي جسمج غادي جمره وينهه امج ماتدري بيج
— مابيه حيييل رجليه يوجعني عوفني

عفتهه وكمت لامهه ضليت احجي عليهن شمالهن مايدرن بيهه هيج تعبانه ورديت اخذتهه كومتهه كوه للحمام وصحت لمنال تاخذلهه ملابسهه
وضليت كاعد بالحجره انتظرهه ..

اجتي وكعدت بسدي ع الجربايه ودنجت تعاين لرجليهه وعاقجه الوجه ..كلتلهه ..
- شماالج
- فراكيس يوجعني
- ماداويتيهن هناك
- لا خفت
- انه صوجي وخليتج تمشين .. عايني روحج غاديه طحين .. عليش ماكلتيلي تمرضتي وهيج حرارتج موش كلساع نحجي !
- حبيبي شمدريني اني هيج مصخنه بس جنت احس تعبانه وشو هسه بلاعيمي دتوجعني
- هاي كملت عفيه والله
- مو تدري شنو .. هاي من طلعنه الفجر جانت بارده حيل واني جنت  دفيانه بالجادر من طلعت
ايدي ثلجت وجنت ملابسه قمصله ماعبالي هيج بارده تصير
- جااا انه من اجيب واكول تدفي البسي ثخين عليش ماتسمعين
- هو اني لبست بلوزين والبجامه والجواريب بعد شكو والعبايه فوكاهه شبع يعني
- هاا وتدفيتي بيهن !!
- اي يعني بس الفجر بارده بس بعدين زين الجو
والظهر حااره هوه كل شويه يتغير الجو وتمرضت
- لج ااااخ ربي شسوي بيهه هسه انه
- حبيبي شبييييك
- محترك كلبي شبيييه ماتحمل اشوفنج هيج حتسودنيني عليش ماتسمعين الجلمه نوبه الثانيه وحك الحسين تحرم عليج عتبه الباب لو عاندتي هالشكل وسويتي الي براسج
- ماشي ماشي
- تعاي
- شنو وين
- لحضني جا وين يعني  !!!

ضحكت وحضنتني وانه خذيت نفس من ركبتهه وهجست كلبي تهدا وهالاعصاب الجانت متشدده كل هالايام رخت .. ضليت عاصرهه بنص صدري واطمن كلبي بيهه ماعرفن عليش هيج اتسودن بغيابهه !!!!

وخرتهه ورحت جبتلهه كبسول نطيتهه تشرب وبعدين رحنه كعدنه ناكل سويه و وليد يغمزلي ويضحك عبن شافني انه رجعت مرتاح وهوه هم واثنينه ضلينه نضحك عله ارواحنه شلون اجينه ركض هنايه وكلمن روحه بخشمه صايره
وهسه كاعدين ومرتاحين .. طكيناهه بضحكه مافهمهه غيرنه .....

لليل مشو لبيتهم وانه ثاني يوم وره صلاه الظهر
طلعت ويه وليد وجماعتي وجم واحد من ولد عمي الي ماراحو ...
انه و وليد  واثنين من جماعتي حاطين السماعات باذانه والتلفون بالقمصله حته نحجي براحتنه بصوت ناصي واحنه نمشي ...
تالي الولد حسو علينه وكضوهه تمضحك عبن احنه جنه كلساع واحد منه منسحب ليوره شويه
يكمل حجيه ويرد يركض ويه الجماعه .. وهيج كضيانهه لحد ماوصلنه ثالث يوم الفجر لعون وضلينه نحسب بهالعواميد الماتخلص .. وبعد كل هالتعب والركض كدرنه نزور من بعيد لين الي يطب ليم الشباج هاي مايطلع الا بمعجزه وهوه حته محط رجل مامش ... من باب الحضره سلمنه عله الامام وقرينه الزياره وطلعنه بالصحن صلينه وضلينه كاعدين نرتاح وتالي مشينه اكلنه وضلينه ندور  سيارات رجعه ...

وصلنه بنص الليل للبيت كبل سبحنه ونمنه انه وليد لحد ثاني يوم عله الغده كعدنه  ...
للعصر وليد اخذ زهره ومشو .. وانه رديت نمت
وكعدت بالليل خابرت ربى وضليت اشتغل بالابتوب .. ومن الصبح طلعت للاسواق ...

ومشت الايام بين الشغل والبيت .. رباب  بنت الشيخ تزوجت واحد من كرابتنه من بعيد ..
وزهره داومت قانون ...
ومحمد كاعد يحضر للامتحانات الي صارت بشهر الثاني ...

وانه استلمت السلفه وانطيتهه لربى حته تشتري ذهبهه مارضت تروح الا انه وياهه .. تفرغت ليهه واخذتهه وامهه ويانه واشترت ب ٧ ذهب ماخليت شي بنفسهه اخذت تخم ومفرد محبس وتراجي

انه ماريدن اسمع جلمه انهه مدللـه عند الشيخ لو ابوهه ازيدن مني اتسوودن اذا سمعت هيج طاري
فكااخلي شي ينكصهه .. كل مااروحن ليهه مصرف انطيهه من غير الحلويات وشغلي الي اتعب بي حته اكملن باقي المهر ...
ولساعني ادفع ايجار الشقه باربيل لين عايف كل غراضنه هناك وزواجنه يصيرن بيهه ماريدن اضيعنهه من ايدي فجنت كل راس شهر احول لادم فلوس وهوه ينطيهن للزلمه ...
اشتركت بسلفه ثانيه هم وكلت بس استلمهه ابدي اجهز للعرس ...

محمد نجح وجانت الدنيا ماسايعته من الفرحه
وثاني يوم راح اخذ حرمته  وامهه واختهه للزياره بكربله ... ومن رجع جابلنه عشه عله حسابه
كلنه فرحنه ليه عبن تعب من صدك حته حصل النجاح ...

كال اريد هالشهر اتزوج كبل ماتصير الامتحانات
الوزاري ... وهوه جان مجمع فلوس من زمان
اخذهن ونطاهن لحرمته لجهازهه .. وراد يصبغ حجرته الفوك انه ما رضيت و  كلتله ياخذ حجرتي
عبن انه راح اطلع من البيت عليمن يضل فوك
وهنايه بدت المشاكل ..
ابوي من جهه يصيح وجدتي من جهه وامي تنك فوك راسي من جهه ... وضل الولد لا هوه المشتغل بحجرته فوك ولا هوه المشتغل بالجوه
وانه اكولن ليه اخذهه وامشي نفرغهه وابوي يعرضلنه ويسويله هوسه الماصايره ..

تالي رحت للشيخ كلت ليه  يشوفلي حل ويه اخوه شل حالي اثنينه واكفين ومتبهذلين من وراه
والله وجم يوم واسمعن ابوي يكولن لمحمد
جا وين تودي غراض شهاب هسه !
فهمنه منه يعني رضى اطلع من البيت وبدينه
نفرغ الحجره وصعدنه الاخشاب فوك وغراضي
سفطتهن ويه غراض محمد منا لما يكمل حجرته وينزل هوه بس شهر ويخلص ..

وصار يشتغل بيهه هوه وصياد بالليل ينظفونهه
وبالنهار الصباغ يشتغل بيهه خوش رتبهه ديكورات واضويه ... والترضيه كال اريد اغلفه
هم سواهه خشبيه ...
وضلينه نطلع كل يوم ندور ليه عله غرفه مرتبه
وجانو يتعاركون هو وحرمته هوه يريدنهه اخشاب جوزي وهيه تريدنهه بيضه .. تالي صفت بيضه
بحيله النسوان كلشي يجي ...
واخذهه ضخمه وملت الحجره كلهه وضل الفراش جدتي تجيب وتدز لحجرته ..

وضل بس السبلت العصريه جنه نشد بي وجان تخابرني ربى ... رفضتهه ورجعت دكت
كمت طلعت بره الحجره حاجيتهه ..
- هاا يروحي
- شهاب حباب عوف كلشي بايدك وتعال
- اهدي اهدي شمالج فهميني
- تعبانه .. الله عليك حبيبي تعال فدوه محتاجتك
- يلا صار جايج هسه ابدل واجيج اهدي اهدي
- ماشي

سديته وصعدت كبل بدلت ع السريع وطلعت ليهه
جان صوتهه مخنوك ماعرفن شني الصارليهه فجأه !!
وصلت ليهم وكبل فتحت السركي من جوه وطبيت
عاينت عمتي وبسام بالحديقه كاعدين .. تفاجأو هيج جفتت عليهم .. سلمت وانه اخذ نفس وكلتلهم
- ربى وينهه
- بغرفتهه شبيك يمه شصاير
- ماصاير شي بس اريدنهه عمه بلايه زحمه صيحيهه
- شهاب اكو شي شمالك !!
- لا بس هيج سالفه بينه
- زين تعال طب جوه اكعد

مشيت للهول كعدت وجابلي بسام ماي شربت
وجان تجي ربى  وجهه مايتفسر بس الحزن طاغي عليه .. بسام شافنه هالشكل كبل طلع ..
كمت ليهه جان تجي ركض وحضنتني وضلت تبجي ..
- اسم الله حبيبي شمااالج طيحتي كلبي فهميني شجاج بنيتي .. بسج بجي تعاي اكعدي احجيلي منهو المضوجج هالشكل !! شني الصايرلج !!
- مااريد احجي شي عوفني هيج بحضنك
- زين زين عله راحتج اهدي ولا تخافين انه يمج ماعندي شي ضلي بهالحضن ارتاحي

اخذتهه وكعدنه وهيه ضاله مخليه راسهه عله صدري وتبجي وانه امسد عله راسهه وابوسه
واحضنهه اريدنهه تهدا مامش .. تزيد بالبجي ماتنكص ... تالي ماتحملت هيج اشوفنهه ..
وخرتهه من صدري وضليت امسح دموعهه وانطيتهه ماي شربت وغسلت وجهه وكضيت ايدهه جانت ترجف .. وانه اعاينلهه ..
- منهو الي يستاهل هالدموع يرويحتي بس فهميني شني الي بيج كليلي اي شي لاتضلين ساكته وتناشغين كطعتي نياط كلبي بهاذ بجيج بسج عاد فهميني شمالج .. بس كليلي منهو الي ماذيج اشحطه لجوه رجلج وعلي
- ديموتون كلهم والله والله ديموتون شفتهم شهااب والله شفتهم مشمرين بالشوارع والبيوت مهدمه كلهه ليييش ليييش يا الهي والله حرام هيج حرااام

للحظه جسمي كله تقشعر ماعرفت احجي شي جدام دمعهه هاذ ونبرتهه بالحجي وخوفهه كبل
حضنتهه وردت تبجي ازيد من الاول اهجس صدرهه راح يتكطع من هالشهكات الي تجرهه بالكوه ...  جان تكلي ...
- ماتحمل اكثر من هيج شهاب والله ماتحمل اشوفهم بعد والله ماكدر كلبي يوجعني عليهم
ماريد يصيرلهم هيج ماتحممممل
- منهو همه بس فهميني
- مادري ماادري
- احجيلي بالتفصيل شني ششفتي

مسحت دموعهه واخذت نفس وكالت ..
-  قبل يومين جنت مختنكه النفس ثكيل مو مثل قبل كمت اخذ البخاخ شويه وتحسنت بس بالليل ماكدرت انام مختنكه مادري ليش .. ضليت سهرانه وجان اشوف كم صوره لجهال مشمرين بالشارع وكلهم تراب ودم وبيوت مفلشه
خفت كلش ورحت صليت ودعيت تكون امن وامان .. واليوم هم رجعت شفت اكثر من هذاك المنظر شفت جنود متكطعين وناس تتراكض وشايله جهالهه والدم  بالشوارع والدخان وكل منظر للموت شفته بيهم ماعرف منو همه ولا ادري وين بيا مكان بس هذوله بشر الهم مصير
مرعب وظالم هالشكل مايصير .. جهال وكبار
كلهه مدمايه ومطشره ليش بيا ذنب !

- ربج اعلم بالحال .. هاذ امر الله بعد موش بيدنه

- لاااا امر الله الموت بس مو الظلم شهاب الله  مايامر بتعذيبهم وظلمهم هيج هذا نتيجه عمل هالظلام هذوله مو امرالله .. الله ماعيشهم حتى يظلمهم غيرهم من طغى و وصلهم هيج

- حسبنه الله عله كل ظالم

- شهاب مقهوره تفهم شلون يعني بهالوكت الكاعدين بي براحه احنه اكو من غيرنه كاعد يموت بابشع طرق وغيرنه عايش الخوف والرعب
وجاهل يبجي من خوفه وضياع اهله والموت والنار كدامه ورجال تموت والهم اهل ينعوهم هسه بحركه كلب وعوائل تيتمت كلهه دتصير بهالحظه

- مابيدنه غير الدعاء ليهم .. ربى لا همه الجدامنه
وننصرهم ولا النكدر نصل ليهم ونعرفهم ماندري همه وين اصلاً من ياديره ؟ هالشي صار بعده؟
مانعرف شي

- بس اني ماكددددر كلبي مايتحمل اذاهم هيج واني اشوفهم بعيني واسكت وانسى ماكددددر شهااب ماكدر واالله

- اهدي حبيبتي رويحتي انتي اهدي كافي هيج موتي روحج بالبجي

رجعت حضنتني وتبجي ضليت حاير شسويلهه
افهمن موش سهله عليهه لجن شبيدنا !!!
تالي عفتهه شويه وكمت رحت لعمتي كلتلهه
اريدن اخذ ربى فوك لين تعبانه وهيه راحت ركض ليهه شافتهه تبجي كامت تسأل شكو وشكو
كلتلهه بعدين نحجي واخذت ايد ربى كومتهه
وصعدنا فوك لحجرتهه ...
طلعتلهه دشداشه خفيفه وانطيتهه تلبسهه ورحت
اعاين للرسمات ... شفت بيهن جدد مال هالمره
مشمرات بالكاع ومرسومات بالرصاص
خذيتهن وضليت اعاين بيهن .. نفس الي وصفته
بالضبط .. تذكرت كبل هذيج الرسمات هم طلعت كِلهه صور لحوادث تصير .. صفنت عليهه وانه اشوفنهه شلون كاضه راسهه والدموع تصب
هالساع عرفت شني جانت تكصد بجلمه اريدنك تشوف ربى الي مايعرفهه بس ربهه.....

فهمت ضعفهه وحزنهه وهذاك البرود والمرض والملامح الجامده كلهه شني سببهه .. فهمت سبب
وحدتهه وسكوتهه دايماً .. هاذ كله لين داخلهه متعب ..فكرهه بالوادم وهمهم وكل مصايبهم
بداخلهه حامله هم اكبر من عمرهه ومامش من يعينهه بي ... اختارت الرسم حته تعبر عن داخلهه تفرغ طاقتهه بي بس ضل هاذ يتراكم بداخلهه ولحد ماوصلت للانهيار هاذ ... رادتني اشوفن ضعفهه موش هذيج البت الكامله حياتهه من كل شي

ذبيت الورق من ايدي ورحت ليهه رفعت راسهه وبوست عيونهه وكعدت جدامهه بالكاع وكضيت ايدهه ..كلتلهه ..
- انه اليوم مفتخر بيج ازيدن من كل يوم مر علينه سويه
- ليش
- لين شفت شجاعتج انه اليوم ماشفت بيج بنت ضعيفه ومهزوزه وضامه هاذ الشي بداخلهه لا انه اشوفنج شجاعه وكويه تحملتي جثير صور واحداث وكدرتي تعيشين وتصلين لحلمج وتوازنين بين هالحياتين .. صدكيني انه حيل مفتخر ان مريتي هيج كلبهه كوي وطيب ولين بمثل الوكت
انتي الي يكولون عليهه 'مره بعدال عشر رجال '
تعرفين شلون تسيطرين عله خوفج وتتكوين عله كل صعب وبنفس الوكت انتي هاديه وشفافه جنج كطر الندى
- بس هذا صعب هيج صعب والله مخنوكه دتفهمني
- افهمج اكيد يارويحتي اعرفن هالشي موش سهل
وموش بالهين حمله لجن انتي ام كلب الگوي تكدرين تعدينهه مثل ماتعديتي الاصعب منهه
ربج من اختارج وشوفج هالشي يعرفن عندج الحيل الي يحمله .. ميخالف مابيهه شي مرات نضعف وننهار هاذ شي عادي وطبيعي كل انسان تجي فترات يتعب بعد تخلص طاقته لجن هنايه اريدنج تاخذين وكتج وترتاحين عله كيفج وترجعين  ربى الاعرفنهه
- زين بس ضل وياي
- اكيد وياج يارويحتي وشلون اعوفنج واروح !!!لااااه كلبي ماينطيني .. تعاي هسه نامي بحضني وانسي كلشي ذبي وره ظهرج ولاتفكرين بشي
بس صفي دماغج وارتاحي

تمددت وفتحتلهه ايدي اجتي خلت راسهه عليهه وحضنتني غطيتهه وضليت امسد عله شعرهه
منا لحد مانامت ... جنت اعاين لوجهه المتعوب
ونعومتهه واكولن شمعنى هالبنيه بالذات تشوفن كل هالشغلات ؟؟؟
وهاي شلون راح تحمل هالشي كل العمر !!
صرت اخافن عليهه ازيد من كبل الي بيهه ياذيهه ازيد من كلشي حولهه ...
دعيت ربي يهدي بالهه ويبرد كلبهه ...
غفيت وياهه وماحسيت الا عله صوت الباب ينسد
عاينت ربى بعدهه بحضني نايمه جا ياهوه الطلع؟

عاينت الساعه سبعه وربع ووكت الصلاه صار
كعدتهه وهيه فتحت عينهه وضلت تعاينلي
دنجت بوست خدودهه وكلتلهه ..
- شني رايج نطلع نتعشى بره اليوم ؟
- لا ماشتهي
- لاا ميصير هيج
-مابنفسي اكل والله
-زين نتمشى شويه نغير جو
- نروح للهيام !
- اي نروح حلو خوش فكره يلا كومي نصلي ونطلع
-ماشي

كمت طلعت وهيه بدلت ولحكتني جوه ..صلينه سويه وبعدين حجيت ويه عمي وكلتله تريد تروح للهيام كالي ماشي بس ترجعهه ما تبات ..

طلعنه وانه طبكت يم مطعم اخذت لفات بركر اثنين وبيبسي ورجعت للسياره ..
وكبل طلعنه للسلف وما مرينه للبيت كبل لكاعهه
هناك نزلنه وهيه راحت تريد تفتح الباب بس سلام مكفلهه .. خابرته حته يجي ينطينه المفتاح ..
هوه خوش مامنهه مسيجهه بخشب وجوه مسوي حجره بيهه باب ينسد عله المهره وباب ثاني يسد عله هالحجره ومخلي جلب مربوط بالسياج هاذ صوته من ينبح يسمعه سابع جار مدري وين لاكيه

انتظرناه واجه فتحلنه البوب وطلعهه وحط عليهه السرج شده زين وسلمهه لينه وعافنه ومشى ...
ركبتهه وهالمهره جنهه مستعده ليهه كبل طارت بيهه بالركض صرت ماشوفن بس العجاجه وراهه
مرتين فرت هالكاع بيهه .. وتالي اجتي وكفت يمي
وهيه تتنفس سريع وضلت رافعه راسهه للسمه وتاخذ بهالنفس .. تالي نزلت منهه وراحت ربطتهه
وخلتلهه اكل واجتي ليمي ..
كضيت ايدهه وكلتلهه ..
- هسه احسن؟
- احسن بهواي
- زين اكعدي خلي ناكل

كعدت بالكاع وانه جبت العلاكه واجيت كعدت بسدهه .. اخذنه لفاتنه وبدينه ناكل وساكتين
جان الجو طيب هالليله والكاع هنايه مفتوحه عله
صح كلهه تراب بعدهه بس الهوا الجاي ليهه طيب

كملت اكل وكالتلي..
- تدري لو مو انته وياي جان هسه فد اسبوع اضل مو نايمه ويمكن حتى ارجع اختنك مثل قبل
- لاا اسم الله عليج حبيبه هذيج ايام وولت
- الحمدلله
- يعني هاي كبل سهرج ومرضج لين تشوفين هالصور
- هو نص من هاي ونص الثاني اصوات
- يا اصوات ؟
- مرات صوت انفجار هاي قبل ببدايه الاحداث
والتفجير جنت كل يوميه واكعه من وره هالصوت هيج على فجأه يصير باذني دوي مالته وبعد ماتوازن راساً اوكع .. ومرات اصوات بجي والله لحد هسه ماعرف المن بس هيج صوت نعي وبجي
عبالك اكو فاتحه براسي وهاي تضل ايام ومن وحدهه تروح
- هاي كلهه سببه شني
- يعني الي منهن خبر يوصله الي الرفيق والي منهن مجهوله مثل هالمره
- وشلون تميزين هاذ عن هاذ
- الي يجيبه الرفيق يجي وياه يعني اذا صوت اسمعه وراهه اشوفه او احس بوجوده والي مجهول مو منه مالكاه يمي بي
- زين ماتكدرين تطلبينه وتفهمين شني سببه
- قبل ماجنت اكدر لان مو طوع امري هو بس هسه يمكن اختلف
- شلون اختلف
- من هذيج الحادثه الاخيره قبل روحه ايران
-اي
- اي اني بوكتهه كدرت اطلبه ولباني باللحظه
و وره فتره تذكرت من قبل كالي ..اأمر انا لك طائع .. بس اني مارضيت اني امر بشي ماحب هيج لان كل عمري معتبرته استاذ الي ما معقول اكعد اتامر عليه واخاف لا يغرني هالشي الي املكه بي واكوم استخدمه اكثر من اللازم
- بس هسه يعني تكدرين تطلبيه باي شي
- اي اكدر بس كتلك ماريد وسويتهه بس مره وحده
بوكت الحادثه وبس
- شني الي صار بوكتهه !
- هههه هوااي شغلات
- اذا يتعبنج لا تحجيهن
- هو كلشي يتعبني شهاب كل ذكرى الهه اثرهه محفور بداخلي بس تعودت امشي عليهن بثقه
- عفيه هيج اريدنج دايماً ..لاتخلين الماضي يتغلب عليج عيشي يومج وبس
- ان شاء الله ،، اوعدني ماتغير نظرتك عليه بعد الي احجي
- انه دايماً واعدج مايتغير من حبج وعزتج عندي اي شي تكولينه
- .
.
يتبع