رواية من فجر ديسمبر الفصل الثاني والستون 62 - بقلم Zoka 🌷

من فجر ديسمبر
🍁
🍁
-ان شاء الله ،، اوعدني ماتغير نظرتك عليه بعد الي احجي
- انه دايماً واعدج  مايتغير من حبج وعزتج عندي اي شي تكولينه
- بهذيج الايام جانت المره تفتر فوك راسنه وهي
تخابر كلساع بواحد وتجي تغلط وادفر ببنت صياد
جانت تبجي وخايفه واني احاجيهه اهديهه بس هذيج تزيدهه عليهه وتخوفهه اكثر ضليت احجي عليهه وهي طلعت لسانهه شطوله .. عفتهه وجنت كلش اتجنب الحجي وياهم لان جان كل كلمتين تجي تضرب الابره بايدي ..
من اجه الرجال جان عصبي وهو يحجي بالتلفون
سده واجه على الجاهله راد يخنكهه .. هنا اني بعد ماسكتت ضليت احجي عليه واهدده وهو يستهزء
واجه هم خبط ابرتين وضربهه بايدي جنت حيل تعبانه بلا اكل بس ابر تسطر وتثكل الجسم
وراهه ضل يحجي هو ومرته يكللهه يريدون موتته وحده منهن وهي تكله لا ماعلينه مانكتل خلي همه يجون وشيريدون يسون خلي يسون .. راح خابرهم
واجه وجهه اعصاب هم رجع عليهه جرهه وهي تعيط وهو يجر بيدهه .. عاد هنا طلبت العون من ربي وبعدين عيطت عليه بعلو صوتي وهو نصدم بعدين عافهه واجه عليه واني ضليت مركزه بعيونه واردد بداخلي طلب للرفيق وبنفس اللحظه
حضر بيهه وكبل دفعه من كدامي بس دفعته صارت بوكعه بحيث ضل صافن ووراهه المره هم دفعهه ووكعت يمه شويه وكامو اجوي راد يضربني ابره ثانيه بس ماكدر لان هذا صار بداخلي ومااتذكر شنو حجه بصفتي بس وراهه شفتهه طلع يركض وانتبهت على البنيه دتبجي كلتلهه غمضي عيونج .. وراهه باوعت للمره  وبثواني شفتهه كامت تلزم بركبتهه وعيونهه ناطه وطلعت ركض بره بس بطلعتهم
راساً شفت هالحارس الصغيرون واكف ويبتسم وبس طب صياد هو اختفى .. ومن لحظتهه اني
ماحسيت بعد على شي اجاني تعب بجسمي واذاني كأنهه انسدت حتى لساني ثكل وتفكيري كله توقف مادري شنو الصار بس حسيت روحي بدوامه اتحرك ومااحس 

- حكج لين هالشي كله صعب .. زين ماجنتي تسمعيني من احاجيج

- باول ايام مادري ماركز وياك هيج احس دماغي فارغ حتى من اشوفكم مادري مافتهم شتريدون مالي حيل افكر واركز وياكم كأن بوكتهه روحي واكفه بجهه وجسمي بجهه واثنينهن بتعب يباوعن

- اي هالشي جان واضح عليج انه جنت اعاين عيونج فارغه ... الله لا يرد هذيج الايام والله جنت اموتن الف موته بكل ساعه منهه

- ياعمري اسم الله عليك

- زين يمتى وشلون ردلج وعيج بالكامل

- مادري بالضبط .. بس اذكر يوم الي بجيت بي
جنت مخنوكه حيييل احس اني موجوده بس مموجوده ومرات احجي وماحس صوتي يطلع
وخفت هواااي خفت من عدمي ووجودي بنفس الوكت .. وهو من وراهه بديت اركز اكثر

- يارويحتي عساه الصار بيه ولا بيج كلشي علي من اذى اتحمله بس انتي لااا ماكدرن عليه لين انه اشوفنج هالسند ليه بالدنيا هاي من تتعبين انه اتعب ضعفج وحك عينج ما مر يوم بهذيج الشهور الا
وانه اهجس بصدري مخنوك وثكيييل وجن مامش روح للحياه بعد ..من صديتي عينج مني انه جن خذو روحي مني بساعتهه اتسودن من ماالكاج مثل ماعرفتج

- اسفه شهاب بس ماجنت اكدر اتجاوز الي صار
اسفه لان تعبتك

- لااااا ياعيني انتي لاتعذرين .. اهم شي هسه انتي
رديتي لحيلج والصار جزا وكته بعد انسي

- كدرت انساه  بفضلك حبيبي

- ياعيون حبيبج انتي

- ههه شنو رايك نكوم نركب الهيام سوا ؟؟

- يلا كومي

كمنه وركبت هيه جدامي وانه وراهه كضيت اللجام وضلينه نتمشى بيهه وهيه كلساع تندارلي وتضحك بعدين كالت خلي نسرع .. جلبت بايدي وانه حاطهه عله لجام المهره وصرنا نطارد بيهه
جان هاذ احلى شعور هيج الهوا يصير باارد من يطب الريه والوجه ينتعش بهالنسمات البارده وجسمي كريب عله جسمهه مخليلي  دفو  منهه
وصوت ضحكهه وفرحتهه ويه صهيل المهره
ينطي احلى احساس بالراحه والنشاط ..
طرينا هالكاع كلهه وردينه لمجانه ..نزلت ونزلتهه
وربطنه المهره بالسياج .. واجتي كضت ايدي
وكالت ..
- يالله ماتدري شلون احس براااحه وحتى روحي احسهه خفيفه
- جا ويه حبيبج انتي بعد شلون ماتجيج الراحه
- هههههه احلى حبيب والله .. والهيام الهه دور لاتنسى
- ايي جا شلون
- بعد كل مره نعيدهه كلش عجبتني ركبتهه وياك
- تدللي يالغاليه
- تسلم ياعيوني

رفعت نفسهه وباستني بخدي وانه حضنتهه
وضلينه واكفين نعاين للسمه جان تكلي ..
- شهاب هسه انته تعرف كلشي عن حياتي كلشي حجيتلك وشفت بعينك وحسيت بي همين
- اي يارويحتي
- راح اضل تتقبلني هيج كل العمر ؟؟ يعني اني ماعرف شنو يصيرلي بعدين بهالسالفه بس مستعد تتحملني بكل شي يصير
- طبعا يا حبيبه ليش هاي يحتاجلهه سؤال ..انه من يوم حبيتج اعرفن هالشي ولاتظنين انه راح اكرهج او اضوج منج بيوم جيف عندج هاذ الشي لااا بالعكس انه واحد من اسباب حبي لج  لين انتي تملكينه ومتميزه بي واحبنج لين انتي شجاعه بي
فهمتيني
- ياروحي انته طمنتي الحمد لله
- بعد ديربالج تفكرين بهيج شي وياي ترا انه محسبلج غير حساب .. اريدنج تجين بيتي ملكه
مدللـه والضحكه ماتفارك وجهج مامفكر يجوز اضوج من هالشي لو اخافن منه لو هالسوالف التعبانه هاي ... لاااا انه اريدن راحتي وياج وراحتي تصيرن بشوفتج ووجودج
- امممم يعني حتى لو تعاركنه
- اي حته لو نتعارك هم اضل احبنج وراحتي بشوفتج ..انه كايلج من تبعدين من جدام عيني اصير ماانحمل والاعصاب هاي ماتهدا الا وياج
ماعرفن الله شحاط بيج من روح هيج تكدر تسكني وتهديني لو بس تمر من جدامي
- واني هم ماعرف انته شنو الي بيك وهيج تكدر تنسيني كل شي وتضحكني وتخلي الدنيا بعيني حلوه .. كل سعادتي انته ابو الشهب
- يارويحته انتتتي
- حبيبي خلي نرجع تاخر الوكت وابويه ينتظرني
- ماشبعت منج بعدني
- شنسوي بعد هاي اوامر ابونا العزيز لازم نرجع
- يلا هو ماضل شي عله عرسنه واخليج يتمنون شوفتج
- هههه خبيث
- والله حكي اريدن اشبع صارلي سنين صاير ومتحمل خلهم يضوكون الي ضكته
- هسه خلي نتزوج والله كريم
- ماضل شي وعيونج بس انفض عرس محمد
نجهز لعرسنه
- هاااا صددك !
- جا شمنتظرين بعد
- شو بسرعه مشت الايام وراح نتزوج
- يابسرعه ولج شيبت وانه انتظر بيج
- هههه اروح فدوه لهالشيبات

ضحكت وخذيتهه ورحنه للسياره .. خابرت سلام يجي ياخذ المهره وطلعنه .. طول الدرب ماهديت ايدهه .. بعلي اكثر شي كرهته بحياتي اوصلهه لاهلهه لو يجون ياخذونهه طك كلبي من هالسالفه
حسره علي ما تهنيت بشوفتهه جم ساعه الكه وراي اهلهه يلاا جيبهه ..لو يلاا امشي نرجع
تسودنت من هالحجايتين وحك محمد ..

هالاسبوع كملنه حجره محمد وجهز كل شي
ضل بس القاط طلعنه نشتري انه وياه ..
وتحدد عرسهم يوم الجمعه والسبت علمود الدوام حته عطله والوادم تاخذ راحتهه بالجيه ...

يوم الخميس اجتي زهره ووليد بات يمنه وضلينه ننصب عله محمد الليل كله وهوه يضحك وخجلاان
الصبح كلهه التمت بيتنه من عماتنه  وخوالهم
وصارت هوسه للضالين ..
مرت ابوي جانت تمشي وتهلهل و وجهه يضحك هاليوم وتطش بهالجكليت عله الرايح والجاي

انه مبتعد منهه من الصغر جيف جانت تخبث ويانه هواي وتنتحس من كلشي نسوي .. تريد كلشي الهه
ومن ينذكر طارينه انه وزهره ادلغم وجهه واضل تشمر بهالحجي المسموم ... لجن عله هالكبر كفت عنه والتهت بولدهه والبيت ...

اجتي ربى وره الغدا مثل كل مره مرتبه وكاشخه
ومتجهزه .. اخذتهه لحجرتي فوك حضنتهه وشميتهه لحد ماهديت ..
طلعتلي ملابسي وبدلت وهيه تلبسني الساعه وتعدل بشعري  وحته شواربي تسفطن شعره شعره .. ونزلنه سوه ..
عفتهه ويه البنات ورحت لمحمد جان راجع من الحلاق هستوه .. بدل وكمل وطلعنه بره للزلم
وللساعه خمسه مشينه لبيت العروس ...
حناهه وطلع ماتاخر لين دربنه بعيد ..
وهناك بيتنه بدت الحفله الزينه ... الساحه بالنص بين الكراسي ملوهه المهاويل من عشيرتنه وكلمن
يطب يذبله هوسه وكلهه تدبج وتهوس وياه
بالحنه عدنه احنه الزلم نتكشخ بالدشاديش
.. احنه الكبار  كلنه نلبس الشماخ والعكال والشباب من عمر العشرين وجوه بس دشداشه يلبسون
جنه ذابحين والعشه ثكيل صار وكفه الكل
ضلينه وره العشه نلملم بالهوسه وللساعه عشره
كلمن مشى لبيته والي من ولدنه ضلو نص بيت عمي كاظم ونص بيت الشيخ والحريم ضلن بيتنه

انه رديت للبيت اخذت ملابسي وطبيت سبحت
وطلعت دورت عله ربى و وصيت منال تصيحهه
وره شويه اجتي وياهه .. كلتلهه ..
- بالي يمج ماشبعت بشوفتج
- واني هم بالي على جمالك اكلته عيون الناس اليوم
- هههههههه لج بويه ياهو اليعاين عليه بنص الزلم انه تره
- شافوك عيني شافوك هذني عيونهن تلكط من بعد عشر امتار
- ههههاااي وهسه انتي ضايجه جيف شافوني
- لعد تريدني اكيف وهنه يباوعن لطولك
- بويه ويطبهن مرض انه شلي دخل بيهن
- افففففففف
- جا هسه انه شلون ترديني اتكبع يعني موش حاله هاي بسج عاد
-اييييي هسه اني شكلت
- هههه اروحن فدوا للضايج انه اضحكي ولج لاتعطبين كلبي بهالزعل
- ههه اسم الله على كلبك
- يارويحتي هنه منو هذني الجانن يعاينن
- شهاااااب
- هيج بس ارد اشوف مايعرفني خاطب
- لااااا يعرفن وكلش زين بس لطلطه زايده
- هههههه وانه شكو اطلعين حركتج بيه
- غير انته صوجك شكو حلو هلكد
- ههخخخخ من الله انه شعلي .. هسه عليش ماتعوفين هالحجي وتجين نكعدنله بمجان نتعلل
موش احسن
- شلون مو زهره تريدني يمهه
- اي جيبيهه وياج ونكعد سويه انه هم مشتاكلهه
- يلا لعد راح اصيحهه واجي
- زين تلكيني بالحديقه انتظرج

راحت وانه طلعت للحديقه كعدت وشويه واجه وليد يمي وردن اجني هنه وكعدنا سويه .. وبسام خابر يسال علينه انه وليد وين حته يجي ينام يمنه
كلتله جاي نتعلل بالحديقه كال انه جايكم وصيته عله حب يجيب وياه وبيبسي وصدك اجانه محمل العلاكه وكعدنه سويه نكرز ونسولف ووليد وزهره
مابطلو تمضحك وربى بسدي وتضحك ع الساكت
بس تهزهز بجتافهه ..
شويه وجان يجي محمد هم كعد ويانه ع الواهس
وجان وليد يكول ..
- محمد مجنص كبل مشت سالفته مو مثلنه جرعنه الحر ونحير شنسوي ومايرضون
- هاااا شني جاي تبسمرني
- لاا ياعيوني شعليج انتي اني جاي احاجي محمد
جبت طاريج !!
- اييي مو اكول
- لااا ورده انتي وين اكو منج اصلا هيج شربه مي صار عرسنه ابد لاتعبت ولا فلست ولا انهجم بيتي
ولا تكسرت من روحه والجيه ابببببد
- ولييييد خلنه ساكتين وحبابين اليوم
- دايماً حبابين ان شاء الله عساكم كل ليله هيج تجمعونه وين جنتو متكلولي
- ههخخخخخخ هااااا وليد جنك متندم
- هههه لاااا عزاز بويه عززااااز

جان يباوعلهه ويرفع حاجبه وبعدين يتبسم بوجهي جذب هيج يجاملهه انه ادري مطيوح حضه وياهه
بس مايكدر يحجي وشبعت ضحك عليه ..
جان بسام يكول ...

- والله كلكم ماتجون مثل شهاب
- اي والله انه مسجين
- اتذكر جان اول سنه من اجه يمنه باليل يجيني للحجره مدخن اعصاااب ويضل يغلط ويشمر بهالحجي تالي من اكله شمالك ! يكلي اختك نعلت اسلافي ابوك مدللهه زايد .. عنااد راس يابس والله الا اعلمهه ويضل يهدد ويحجي عليهه
- ههههههههههه
- هاااا شهاب هااي هيج اني جنننت عندك !!!
- بويه جا انتي شخليتي بيه كبل كل حريجه ولا الثانيه
- هاا واني هم اذكر جان يصيحلهه صخمه
ععععههههههه
- اي بله هاي سامعتهه منه الف مره
- ههههه بويه من ضيمي انه احجي
- والله كبل جان ينام يمي وبس يدردم عليهه وماشفتهم مره اذا مو متعاركين لو واحد يريد يكفش الثاني اذا مو صوتهم طالع تلكاهم يخنزورن واحد ع الثاني ..
- ايييييي ايام كبل شبعنه عرك ههههههخخ
- واني شبعت ضرب وتكسير وصياح منك
الله يساعد كلبي اننني
- لاااا بويه جا انتي كاصره !! موش شعلتي صفحه الخلفوني بعنادج حته بلعومي يبس من الصياح وانتي ولا يمج السالفه
- شسوي يعني انته تعاند بيه
- الله عليك شهاب انه ضلت بالي سالفه
- اي محمد كولهه شني
- شجابك  ع الحب بنص  هالمشاكل
- هههههييييي يكول شحبيت بيهه لك محمد هذا اخوك جان يكوم ويكعد ويصيح اكرهه صارع راسي
- اييي كبل هاي وراحت ويه زمانهه
- شروحهه بله
- شسوي كيدهن عظيم ماينفلت منه ههههه
- والله ماعليه اني كلشي ماسويت
- اي بالله ع الفطره صارت الله رحم بحالي
- انه هم تفاجأت كبل جنت اكله اكو وحده بالك
يكلي اي بس ماريدهه اكله امشي نخطبلك وخلصنه يتسودن ويصيح ماااريدنهه
جان كلت خلي اشوف هالولد شسالفته واروح ادبرله وحده والله ويومين وطفرههه ههههعععع تذكرتهه شهاب
- هههههه اييي
- شهااااب
- هاا بويه تهدي تهدي
- منووووو هااااي النووب !!
- هيج وحده راحت والله
- شجان اسمهه يمكن نور
- شهاااااااااب
- لك هسه انته شجفصت خرررررب لج بويه هيج يوم واحد وولت اهدي عاد
- عوفني

كامت ركضت للبيت وزهره لحكتهه وانه شلت القوطيه مال بيبسي شمرتهه عليه وهوه خربان ضحك ومحمد ووليد يرزلون بي .. تالي عفته وكمت ليهه جوه .. لكيت زهره بالمطبخ ..
- وين ربى؟؟؟
- راحت جوه يم امهه
- امشي صيحيلهه

راحت ليهه وانه ضليت بالمطبخ انتظرهه تالي اجتي زهره وكالت ..
- خويه ماترضى تكوم
- شننني ماترضى
- ايي ماترضى تكول اريدن انام نعسانه وتلفلت وصدتلي ظهرهه شسويلهه
- استغفر الله شحجاك يابسام حظييي هاذ المصخم حجاك هسه

مشيت بره وكضيت بسام شبعته رزيال وادفر وهوه يكهكه ولا جنه .. عفته وخذيت وليد ورحنه لبيت الشيخ حته انام ... ماكدرت انامن ضليت ادزلهه رسايل اخابر ماترد ..عاد تالي غفيت

من الصبح كعدنه كلنه ..رحت غسلت وبالي يمهه اريدن امشي ليهه بس عدنه شغل ..كفيت شغلي
ومشيت لبيتنه طبيت المطبخ وشفتهه واكفه تشرب ماي وعركانه ويمهه عماتي وامهه وجدتي كاعدات يكطعن باللحم .. صحتهه وهيه عاينتلي وكالت ..
- هلا صباح الخير
- هلا بيج وين جنتي !
- يم الهيام
- هاا زين تعاي اريدنج بسالفه

مشت جدامي ووكفت يم الدرج وتجتفت وهيه تعاينلي ..كلتلهه...
- بارحه عليش نمتي وعفتيني موش تدرين بيه اريدن احاجيج
- بس اني ماريد احجي
- شني هالاسلوب النوب
- مابي شي
- ربى يارويحتي البارحه الصار انتي مافهمتي شلون تحكمين علي وانتي ماتسمعين مني شي
غير تساليني بالاول شني الصار وبعدين تزعلين
- مايهمني الصار ..انته ضميت عليه وجذبت وكت الي جنت اسالك على حياتك قبلي تكلي ماعندي شي وهسه طلع الحجي غير
- .. وحك عينج ماعندي شي وياهه شغله ساعه حاجيتهه لين جنت اريدن انساج وهوه بسام جاب رقمهه الي كلي حاجيهه وانسى هذيج مايدري انه احبنج وحك علي ماحاجيتهه غير مره وحده والثانيه طردتهه بيهه
- ماريد تبررلي شي عوفني
- رببببى لاتشلعين كلبي كتلج ماعندي شي وياهه وحك عينج وغلات حبج ما كلبي رف لغيرج ولا نطكت جلمه حب لغيرج والله يشهد علي

- لعددد ليش ماتحجيلي هااا ليش ضامهه عليه
وهسه خليتني بموقف الثوله كدامهم وليد وبسام يدرون ويضحكون على حركان كلبي هيج حلوه يعني !!!
- حكج والله اعرفن موش حلوه بحكج هالسالفه جدامهم لجن انه ناسيهه وعيونج موش اريد اضمنهه عليج بس مامذكرهه
- خلي اروح امي تصيحني
- رببببببى ماتسوه زعل
- طبعا لان مو كلبك المحترك تشوفهه متسوه

راحت لامهه وانه ضليت اتافف هسه هالسالفه منين طلعتلي مو جانت شلونهه وياي هم ردينه للزعل !!!!!

طلعت بره واجاني وليد يطقس الاحوال بينه ويتمضحك عفته ومشيت .. جان وره شويه
صاح عليه محمد رحت ليه ..جانو بالديوانيه كاعدين بسام ومحمد و وليد وحيدر ومشغلين اغاني ويهوسون لمحمد ويركصون كعدت شويه
يمهم وجان تجي زهره وجم وحده من بنات عماتنه
وكفن بالباب يعاينن ليهم وربى واكفه من بعيد وكالبه وجهه .. عاد اجتي بالي فكره ...
دزيت زهره تجيبلي العود و صحت لبسام يسد الاغاني وكلهه كعدت بالكاع وانه كضيت العود
وعزفت عليه شويه بعدين بديت بموال ...

اصد عنك .. امــل منــك
جذذذذب من كااااال اعوفنك

وليد كام يصوفر وزهره جرت ربى بالكوه ووكفتهه يمهن بالباب والولد يصيحون حيهم
كمل..
ولو حطو بدربي النااار بدمع عيني اطفيهه
وادك بابك واشوفنك ..
وافلش حاجز المبني ..واحيله عنك وعني
واحاجيييك وتحاجيني واسمعنك ..
شتريد تصير طير اطيييير يبه هم تحط والزمنننك
شتريد تصير سمج بالماااي يبه هم تطفح واصيدنك
شتريييد تصير... نجم بسماااي يبه هم تلمع واشوفنك ..
تريييد تموت والله اموووت وياااك وكبل لا اموت
اصيحن حيييييييل احبنك
اصيحن حييييل حيييل احبننننك
ولك تريد تموت والله اموت وياك وكبل لا موت اصيحن مووووت احبنك

غمزتلهه وجانو بسام ومحمد يهوسون  ووليد يصفك ويصيح الله الله .. انداريت وعاينت ليهه
وكملت ..
بين العصر والمغرب مرت لمه خياله

كامو وليد وبسام يدبجون والبقيه يصفكون
رديت كلت ...
بين العصر والمغرب مرت لمت خياله
وعرفت فرس وليفي لانها
جان زهره تصيح .. سوووده ومياله عيني سوده

ضحكت وضليت اعاينلهه وهيه تبسم بخجل والبنوات كلهن يعاينن ليهه .. ضليت ادك عله العود وكلنه نغني بهالمقطع والولد يدبجون وكومو محمد وياهم وهو صار يفر بالسبحه والبنوات يصفكن ويه العود والتمن عماتي يعاينن ليهم
وصارت كعده مامش مثلهه لخاطر هالزعلانه
انه غنيت ولا انه من زمان ماكضيت العود وعزفت عليه جدام اهلنه لجن لاجل عين العزيزه
كلشي يصير ....

وراهه كمت اريدن احاجيهه وهيه ضحكت ومشت
ويه البنوات .. ياويل كلبي انه يمتى اكضهه واحجي وياهه مثل الاوادم ...

ضلت هيه بالمطبخ يشتغلون وانه طلعت بره هم كضيتلي جم شغله وتالي رديت خذيت الغدا
وترسنه بيت الشيخ وبيتنه بالاكل وكلهه التمت تغدا
عاد كفينه الغدا والجايات وكلهه صارت تحضر ارواحهه للزفه ...

انه صعدت فوك لحجرتي وخابرتهه مرتين يلا جاوبت كبل كلتلهه ..
- انتظرج بحجرتي  فوك لاتاخرين
- ماشي

سديته وهيه شويه واجتي راحت كبل للكنتور تريد اطلع ملابسي .. انه سديت باب الحجره ورحت حضنتهه من وره وخليت راسي بركبتهه .. هيه هدت الي بيدهه وضلت هاديه ... كلتلهه ..

- موش كافي زعل ياحبيبه
- شهاب
— وغلات حبج عندي ما ضميتهه عليج الا وانه ناسيهه موش خوفاً من شي لجن وعيونج ناسيهه
بسج زعل هاذ حبي كله لج مايكفيج !!

اندارتلي وضلت تعاين بوجهي وكالت ..
-  ادري بحبك جبير الي بس اني ماتحمل احد يشاركني بيك حتى لو قبل مو بيدي انغث ماسيطر على غيرتي هيج صدكني ماتحمل
- يارويحتي انتي هالوادم المفروض تغار منج ومن حبي لج موش انتي التغثين روحج وتغارين من وادم مايسوون تراب جدامج
- شهاب الله عليك هم محاجي وحده قبل غير هاي
لاتضم عليه احجيلي هسه احسن ماعرف من غيرك
- لااا ونور محمد ما محاجي وحده وهاي جانت سالفه يوم واحد والله بس يوم وطردتهه نفسي ماتقبلت غيرج
- ولا حتى بتركيا !!
- حته هناك ملتهي بشغلي والدراسه ماعندي مجال لهالسوالف بس بالدوام الي ويانه بالمشاريع نحاجيهن غيرهن لا ،،، صدكيني يارويحتي مانفسي رغبت غيرج ولا حلمت بغيرج والله اليشهد عله حجيي .. ماتملك هالكلب كبلج لاي بشر
بسج عاد اهدي وتطمني انتي مريتي وحلالي انتي تعب السنين والصبر شني تفكرين ببنيه ولج بويه انه ماعندي شي انطيه لغيرج انتي خذيتي كلشي بيه باسمج سجلتي بعد ياهو اليكدر ينافسج

هديت وخلت ايدهه عله ظهري و شبكتني حيل
وكالت ...
- مو تأذي كلبي هيج بعد والله احبك ماتحمل اسمع هالشي واسكت
- عساني ميت ولا مآذي كلبج رويحتي انتي
امووتن عليج
- لااا اسم الله حبيبي
- اووف هساع ردتلي رويحتي بهالجلمه لج بويه انه صاير مدمن بحبج لاتحرميني هالجلمات بعد
- هههه ادلل ... خلي اطلعلك ملابسك ماضل وكت
- يلا انتي طلعين واني خلي اشم هالريحه شويه اجدد نشاطي بيهه

ضلت تضحك وهيه منداره للكنتور وانه حاضنهه واشم بركبتهه وجتافهه .. جان اطلعلي الملابس الي هدتهن الي بالعيد ميلاد وكالت ...
- روحي اريدك تلبسهن لان الواني مقاربه الهن
- اي جيبي حلوه هالفكره
- يلا بدل اني اروح هسه
- وووين ضلي يمي ننزل سوه
- مو اريد ابدل هم خاف اتاخر
- هسه بسرعه ابدل وروحي

ضلت واكفه يمي طلعتلي العطر وحضرت الجواريب وبعدين اجتي دكمتلي القميص وانه اكرص بخدودهه .. ورشتلي العطر ولبستني الساعه وتالي باستني بخدي وكالت .
- الله يحرسك من كل عين
- يابعد كلبي انتي
- يلا هسه راح ابدل
- اي روحي موش تاخرين
-هههه ماوعدك

راحت وانه ضليت ارتب شعري وتالي نزلت لمحمد لبسته الستره وامه وجدتي يهلهلن وضلينه ناخذ صور وتالي نزلن البنوات ...
خذيت ربى و زهره ووليد بسيارتي وطلعنه للزفه
جانت سياره وليد مزروقيهه لمحمد وصاعد وياه الشيخ وابوي وبسام يسوقهه ..
والبقيه موزعين ناس بسياراتهم ناس بالكيه
والدرب كله كضيناه هورنات وتصفك لحد ماوصلنه ليهم ...

كضيناهه احنه الولد بره نهوس منا لحد ماطلعو كلمن شال سلاحه وطك هالفشك .. وردينه للبيت
الحلو صارت هالزفه دربهه شويه طويل وشبعنه ضحك وسوالف ...
همه سياره العرسان طلعو للمصور واحنه ردينه
للبيت كعدنه هم هناك نسولف ع الزفه وكلمن يحجي موقف صار وياه .. وجان تجي جدتي كالت..
- ماضل غيرك ياشهاب يمتى تعرس عاد
هذول خذو وراك وعرسو وانته هالضليت
- كريب جدتي ماضل جم مليون هههههخخخخ
- ههههههه عمي والله ماريدهن لهالملايين
- هااا اهاا بعد المره وتنازلتلك بيهن شني حجتك النوب
- لااا شني انه نطيت جلمه لابوهه شني ماوفي بيهه .. كلهن جم شهر واجيبهن واخذهه ونطفر لاربيل
- هييي يامصخم وين مولي لاربيل ماتكعد نشوفنكم هنايه بيتنه وملمومين وشحلاتنه
- خلوهه الكم اللمه هاي اشبعي بمرت محمد انه عوفيني اصيف ويه مريتي غاااد
- دهر طرك  انته ومريتك

ضلينه نضحك وياهه وهيه بوزت جيف اريدن اروح لاربيل ماضل هنايه .. ورادت ربى تغير هالقرار ماكدرت عبن انه اعرفن روحي ماخذ راحتي هنايه وصارلي سنين صابر لهاليوم تالي ماتهنى بي لاااا والله ابد اله اطلع حيف السنين كلهه
وماريدن فوك راسي لاعم ولا اخو ولا خال وحدي اتهنى وياهه بكيفي اطلع اطب ماريدن كال وكلت

اجتي سياره العرسان ورجعت الهلاهل علت
خذوهه للبنيه جوه وضل محمد ويانه بره
شويه وزفيناه لحجرته ...
ضليت كاعد بحجرتي فوك ويه ربى ناخذ صور
ونسولف لحد ماصاحو عله العشه .. نزلنه تعشينه
وبين ما كفينه العشه وكعدنه نشرب الجايات سمعنه
هلاهل مرت ابوي .. خذت النيشان .. عاد طلع ابوي طك هالفشك بره ورد ووجهه يضحك هاليوم

كعد يمنه محمد باركنالهه وشويه ورد لحجرته وبعد ماشفناه ...
ربى ردت لبيتهه وانه كبل رحت نمت اليوم جان هوسه وتعبنه .. كبل لفيت راسي ونمت ...

الصبح نزلت اغسل وجان تطلع حرمته لمحمد من الحمام هاي صارت اول مره اشوفنهه بيهه
سلمت عليهه ومشيت طلعت يم ابوي ...
وهجيت هاليوم من البيت عبن بعدهم هوسه والنسوان رايحه جايه ...
وكل ماشوفن الهوسه هلكثر اكولن قراري صحيح من اريدن بدايه زواجي بعيد من هنايه ...

صارت السبعه مالتهم ورد البيت نخبص بالخطار
والعشه وحته ربى ماشفتهه عبن احنه الزلم كلنه مشينه من الصبح وعفنالهن البيت ...
لليل بالعشره يلا ردينه للبيت شفتهه نص ساعه ودز ابوهه يلاا نمشي وخذاهه وانه ماتهنيت بيهه

ضلت ايامي بين شغل الاسواق وبين الترجمه
وجان ضالي خمس ملايين اجمعهن وهاهيه
وجنت مشترك بسلفه انتظرهه تطلع .. وهمزين
حصلت الاسم الثاني همين بيهه ...

طبينه شهر ال١١ واستلمت بي السلفه رحت نطيتهه فلوس جهازهه والي ضل ردت نشتري بي
اخشاب وشغلات للشقه هناك هم نجدد بغراضهه
نطيتهه وياهن فلوس الغراض هذني وانه رحت لاربيل ...

مريت على ادم وليال سلمت عليهم وتعشيت يمهم
وجانت ليال حامل .. وكلش فرحو لين راح نرجع نعيش هنايه يمهم ...
مريت للشقه جانت غاديه تراب ... كعدت نظفت بس الحجره ونمت بيهه وثاني يوم نظفتهه هيج ع الخفيف ...
واخذت قياسات الحجره ورحت ويه ادم افترينه
حته نشتري الاخشاب ...
جنت اصور وادز لربى وهيه تكلي شني يعجبهه
واختارت وحده بيضه ملكيه وبيهه نيلي وكلهه اضويه وحفر كلش مرتبه وفخمه .. حجزتهه ودفعت نص فلوسهه وثاني يوم جابوهه شدوهه
وهذيج الاخشاب شلتهن حطيتهن بالحجره الثانيه
وضلت البردات والزوليه والفراش ..
هيه كالت اشتريهن من هناك لين شيجيهن الدرب طويل ... وهم نزلنه السوك وهالمره ويانه ليال
واختارينه زوليه صغيره تصير بس عله كد الفراغ بالحجره بين الجربايه والميز .. ووحده ثانيه للهول
جانت جبيره ولونهه حليبي ومشمشي وكلهه حفر
والقنفه جبتلهه تلبيسه جديده بلون حليبي ساده وخذيت وياهه كوشات ملونه ..
والمطبخ هيه حضرت كِل غراضه و وصيت وليد يجيبهن ليه ...
وهيه دزت وياهن غراضهه وفرشات ولحف ومخاد وحته ثريات صغار وتيبل لام جديد للحجره
واجوي وليد وزهره لاربيل جابوهن ..
وزهره جانت حامل بشهرين حجيت عليهه لين جتي والدرب طويله ورزلته لوليد جيف جابهه
لجن هيه ماراضيه تضل .. تكول اريدن احضر كلشي يخص عرس ابن امي  كلبي ماينطيني اكعدن وغيري يحط ايده بدالي بعرسك ..

وجانت تكلي دايماً ..
- خويه جا انه تزوجت وحبلت وحجيين وانته بعدك ماتكِلي يمته تفض هالعرس

وانه اضحك واكللهه ماضل الا جم مليون نصرفهن ونعرس ...

ضلينه انه ووليد نسوي شويه تصليحات .. صبغنه الشبابيج والبوب هم جانت شويه تعبانه .. صبغناهه جوزي ولمعناهن وخلينه زهره بيت ليال منا لحد ماراحت ريحه الصبغ من الشقه يلا ردت ..

وجانت ربى دايماً تخابر وشوفوني شتسوون
ونضل فاتحين هالكاميرا ونشوفهه كلشي ..
خلت زهره ترتبلهه مكياجهه وعطورهه واجتي ليال هم وياهه رتبن الملابس والجنط والاحذيه
وضلن بيهن يومين .. اثنينهن حوامل ويبطن الكلب بالشغل وهيه ربى ماشاء الله مامخليه شي بالسوك يعتب عليهه مادازته ...
بحيث جانن بس جنط الملابس اثنين من هذني الكبار الي يحطون بيهن ملابس شتويه ويضموهن
وجنط سفر هاي مليانه مكياج ومعطرات وشامبوات وكارتونه مغلفه كامله بس احذيتهه وكارتونه ثانيه بس جنط ..
عاد انه سألتهه ..
هاي الفلوس النطيتهن لج كفت كل هاذ ؟؟؟؟
جان تكلي ..
لا هاي نص اني احبهن ونص اشتريتهن جدد
وامي جانت هم محضرتلي كومه ملابس كل هالشهور من نطلع نشتري ونضمهن وشي عله شي انجمعن وصارن هلكد ...

وضلت كتبهه والرسمات يمهه مادزتهن ..
انه ووليد ساعدنه زهره بالمطبخ وضلينه وياهه نرتب بالغراض وشكلنه ساحبه جديده ونضفنه السكف والبنكات ... والطباخ وليد كال عوفوه اليه
واخذه شحط للحمام ونزل عليه دك جلف هوه مابيه شي بس راد يطلعه جديد ... وصدك رجعه بلادي
وهيه جانت دازه تلبيسات يخلوهن عليه لون وردي فاتح وشكلتهن زهره وحته دبه الغاز هم نفس اللون تلبيستهه ... وزوليه صغيره هم وردي وابيض
خليناهه اخر شي من كملنه تنظيف الثلاجه وتسفيط الغراض ونظفناه ع الاخير يلا فرشناهه

بعشره ايام كملنه كل الشقه وردينه للعماره . ..
ضلو وليد وزهره بايتين يمنه وثاني يوم مشو لبيتهم ...

جنت حاط محامي علمود عقد المحكمه ...
وهالاسبوع كملهه وخذيت ابوي وابوهه وامهه وهي ورحنه كطعنه مهر المحكمه ... وردينه
للسلف جدتي وامي جانو محضرين لينه الغده
تغدينه سويه وكلهه التمت وباركت لينه ...
وانه هالدنيا ما مكفيه فرحتي ... هالغاليه صارت
ليه شرعاً وقانوناً ... بالاول كره وبعدين صحاب وتالي نهوه وهالساع حلالي وحرمتي وكسرت خشوم هالوادم كلهه ....

رجعت اشتغل بالترجمه وهم جمعتلي جم فلس خليتهن ويه الي عازلهن للحنه والعرس ....
وضلت غراضي جمعتهن كلهن وصفيت الحجره كلهه وخذيت محمد وياي هالنوبه ورحنه لاربيل
ارتاحينه يوم وثاني يوم كعدت ادورلي مجان اخليهن بي وخابرت ربى تعاركت وياهه عله هالحمل الدازته ماخلتلي مجان لشي ... وهيه تضحك ولا هامهن تكلي دحسهن شويه هنا وشويه هنا ....

جان اشيلن نص ملابسهه مال بيت وادحسهن بالملحق وفرغتلي خانه وحده صفطت بيهه ملابسي ورحت اشتريت تعاليك جديده وعلكت بناطيري وقمصاني والستر وهيه صرت اشيل من تعاليكهه وادحس اثنين اثنين بتعلاكه ...
واخذتلي خانه من ميز التواليت حطيت بي اوراقي ودفاتري بيهن ملاحظات مهمه تفيدني بالشغل
بالتحليل ...

وخليت عطوري ويه عطورهه وردت اخلي احذيتي وهم الكه الخانه مليانه رديت هم خابرتهه
- ها حبيبي
- اشتعلو اهلج كون
- هااا شبيك شكو
- هسه انه صارفلي  كوم ملايين ومامحصلي شبرين من هالحجره احطن بيهه غراضي
- ههههه اي شسوي يعني غراضي هواي
- وانتي احد كايلج حيعزلون السواكه لامه كلشي وجايه هساع انه شسوي اضلن مفردش هالغراض
- هسه شنو الي بقى عندك
- هوه كلشي صار ادحس ادحس
- ميخالف هسه دمشيهه ومن اجي اني اعزل الاحتاجهن وافرغ شويه بغير مكان
- ايييي تسوين فضل والله عبن ماراح يضللنه محط رجل بهالحجره
- هههههههه هسه انته شيل اليعجبك وخلي غراضك ومن اجي اني ارتبهن
- يلا ماشي انتي تجين وتحيرين بيهن انه حكومهن بهذيج الحجره وتجين تعزليهن من جديد زيين
- زين حبيبي زين
- يلا خلي اروح اكمل بعدين نحجي

سديته ورحت شلت نص احذيتهه وخليتهن بكارتونه بالحجره الثانيه وخليت احذيتي
وكملت تعزيلهن وطلعت ويه محمد تعشينه
وردينه للشقه ...
عجبه ترتيبهه والالوان وضل بس الحمام بدلنه الدوش جبنه واحد اكبر وشديناه ... وثاني يوم ردينه للعماره ....

كلشي كمل بالشقه وضل بس نحدد موعد العرس
ورحت ليهه شفتهه جنت حيل مشتاك ليهه هالفتره ماشفت شي منهه كله كضيته شغل بشغل ..

نطيتهه فلوس الصالون والبدلات وحددنه يوم
٢٢،٢٣/١٢ للحنه والعرس ....
وجان باكيله اسبوع ...

بدينه نعزم الوادم من عمامنه وكرابتنه ..
ورحنه انه ومحمد حجزت بفندق عله يوم ٢٣
وردينه اشترينه ذبيحه وتسوكنه وردينه للبيت

كبل يومين من  الحنه اجاني بسام العصريه
وجايب وياه جنطه سفر صغيره ... نطاني اياهه
وكال ...
- هاي ربى دزتهه الك
- هاا شبيهه هاي النوب
- شدراني انه افتحهه وشوف .. انه رايح
- زين ماتعشى
- لاا اريد امشي اجيب جم غرض وصوني عليهن بالبيت هم يلا الحك
- زين جا مودع بالله

راح وانه خذيتهه وصعدت لحجرتي فتحتهه
لكيت بيهه علبتين .. فتحت الاولى طلع بيهه
قاط رصاصي طوخ   كامل ويه قميصه السمائي   ورباطه النيلي مغلف كله بجيس نايلون ومرتب بالعلبه ...
ضحكت من شفته فرحت حيل فرحت بي ...
وفتحت العلبه الثانيه جان بيهه حذاء نيلي يلمع
وجواريب وضاله علبه صغيره فتحتهه جان بيهه
كارت وساعه فخمه نيلي من نوع السبورت بس كشخه حيل ...

فتحت الكارت جان مكتوب بي ...
Seni seviyorum kocam beni sevdiğin gibi

ضحكت بعلو صوتي وانه فهمت معناهه وتذكرته
جنت انه كبل كاتبلهه .. وهالمره ردتلي بالمثل ..
جان معناهه ..
احبك يازوجي مثلما تحبني واكثر
وانه كبل كتبتلهه ...
احبك يازوجتي واريدك ان تحبيني اكثر من حبي

ضحكت وخابرتهه ... جاوبتني ..
- هلو حبيبي
- هلا بالغاليه ام ذوق الحلو
- هاا عجبنك
- عاشت ايدج والله حيل حلوات عليش كلفتي روحج حبيبه
- لا حبيبي شنو ماكو كلافه بينه .. واني شفتك تعبان بالشغل بالشقه ومامتحضر للعرس لحد هسه
وادري بيك ماعندك حتى مجال تطلع تشتري
فكلت خلي احضرهن الك مثل كل مره شلون اني متعوده احضرلك ملابسك بذوقي ..ماحب اخليك محتار ولا يهون عليه تعبك
- اروحن فدوا لهاللسلن الينكط عسل لج انتي شني
بالعباس مسودنتني بهالتفاصيل الي انه انساهه ماعرفن شلون انتي تذكرينهه هيج وتهتمين بيهه
- اذا برجلي حبيبي ماهتم لعد بيمن اهتم
- وعلي من شفتن ضحكت من كل كلبي عبن انه جنت اليوم حاير يمتى اطلع اشتري وكلساع افكر يالون اخذ ومنين بس انتي عفيه عليج والله اجتي هالهديه بوكتهه
- تدلل انته ابو الشهب .. اهم شي اريد راحتك
- مرتاااح انه بوجودج يارويحتي
- ياكلبي انته
- ايييي هسه انتي تحبيني يازوجتي العزيزه
- ههههههه ايييي احبك
- اخيراً ترجمتيهه
- كلت قبل ماتخلص العشر سنين خلي اشوفهه شنو
ولو تشوف شكد ضحكت وفرحت من قريت ترجمتهه ... يعني ماتخيلت هيج انته تكتب جمله قبل كم سنه وتالي اني بدون ماعرف شنو اكون مطبقتهه واكثر هم
- ههههه ايي القدر لعب دوره هنايه
- اجتك عدله عيني
- هو كله من الكنافه يابويه شكثر نقذتني بمواقف وياج
- هههههههه ايييي اني اضعف كدامهه وانته تستغلهه
- جا شلون الين عنادج هاذ الا بالكنافه
- مو نتزوج وبعد متسويلي والله من هسه اكلك نتعارك تره
- ماسويهه الا بالحالات الحرجه
- لاااا شنوو
- اي جا غير اريدنلي سلاح استخدمه وكت الضيج
- امممم يلا لعد شوكت مااريدهه اسويلك عركه ههههههههه
- وانه ماعندي شغل وعمل اضلن بس اطبخ كنافه
- المهم نتراضى حبيبي بكنافه ولا بغيرهه
- اييي هاذ الحجي الزين ... اكلج هاي كفنج الفلوس لو معتازه بعد شي
- لا الحمدلله كفن وزايد
- خاف لين اشتريتي هذني تضايكتي بشي كولي لا تستحين مني
- لااا حبي هذني من فلوسي لان الي نطيتهن  الي
حجزت بيهن
- هاااا بس لا خذيتي من اهلج
- لااا وعيونك اني عندي خير من الله هههه لا تخاف دايماً جيبي مليان ههههه
- اييي عمي شكو عليج اذا عندج وارد من ثلث جهات
- لا اربعه
- منين الرابع !
- الرابع امي شنو نسيتهه
- حته امج هم تاخذين منهه !!!
- لااا اني مو اخذ منهه مباشره بس اكللهه اريد هيج وهيج وهيه تصرف يعني فلوس بس بهيئه غراض ههههه
- ايييي طاكين عمي شكو عليكم
- ههههه مدللينك احنه حب
- لاا والله مخجلتني بهالدلال
- ياروحي كلشي رخيص كدام ضحكتك وراحتك
- يابعد كلبي وهلي انتي ... تدرين اهجس هاليومين جنهن بسنه ماجاي يمشن
- لااا اني عكسك احسهن ركض ركض صارن
حتى مداشبع من اهلي
- شني صارلج عمر وياهم مكافي اريدنج عاد خلص صبري
- ايي اجيك حبي هو تاليتي الك .. بس شويه متوتره يعني لو تشوف ابويه كل ماينجاب طاري العرس هو يضوج وحتى ميكعد ويانه كله بره
وامي من تحاجي على شي للعرس راسا يصير اعصاب
- ههههخخخخخخ حكه والله انه افهمن هالشعور جربته بزهره .. جنت اهجس جن راح ياخذون روحي
- اييي صعب هالشعور والله اني هم تذكرتهه لزهره وشلون جانت تبجي وخايفه هسه صرت مثلهه
- بس شفتيهه شلون بعدين مرتاحه وحتصير ام وكونت عايلتهه واستكرت انتي هيج فكري موش تضلين تبجبجين زين
- ان شاء الله حبيبي
- يلا حبيبه انه هسه اروحن اكمل شغلي ونتحاجه بالليل
- ماشي ياروحي

سديته وخذيت القاط كدرته اجه قياسي فيت
عاد خذيته وياي للمكوى ورحت كملت جم شغله ضالات بالبيت ...

وباليل ساعه ١٢ خابرتهه وكلتلهه كبل ..
- ضلن ٤٨ ساعه واجيبج لحضني
- هههه ويخلص صبر السنين
- واملي عيني بشوفتج ولا يضل بعد لا اب يصيحن يلاا امشينه ولا ام التسمعنه رزايل
- و يخلص الاشتياق والقلق على طلعتك ورجعتك
- ومامش جدتي بعد تحجي علي تزوج وتزوج هاااي راحه نفسيه وحدهه بعلي
- اييييي تصدك هالشي مخليني انسى توتري كله
- اي عفيه حبيبه خليج فكري بفرحتنه لاتضلين توهسين مايصيرن شي
- ادري عمري بس فراك الاهل شويه صعب
- اي حكج بس هيه البت خطار عند اهلهه لازم تحسبين هالشي بالج
- يلا همزين احنه من عائله وحده حتى نضل قريبين ونشبع بيهم
- لااا كريبين ولا نشبع ... منا وغاد بس احنه وبس لا عم ولا اب ولا ام كلهه نترخص منهم هالسنه
عود سنه الاخرى نكعد نشبع بيهم هسه خلينه نطفي نار كلوبنه عاد مو انه اشتعلو صفاح الخلفوني
- هههههه اسم الله عليييك عيني

ضلينه نحجي بحوالي الساعه وتالي نمنه ..
وثاني يوم الظهريه اجني عماتي  وزهره ووليد وكضينه اليوم كله نشتغل بره بالحديقه نرتب كراسي ونعدل الثيل وكومه شغل يطلعلنه ...

وصار الليل ويامحلاهه هالليله دزيتلهه رساله
عبن هيه كالت بنات خالاتهه يمهه ماتكدر تحجي
ونص من بنات عماتنه هم وياهه ...
فكتبتلهه ....
ضلن ١٥ ساعه واشوفنج يامريتي
ردتلي ..
متحمسه لرده فعلك من تشوفني
كتبتلهه ..
انه اصبرن بروحي كوه لهالساعات الضلن
ردتلي ...
نام هسه وهنه يمشن حبيبي
كتبتلهه ..
تصبحين عله خير يامريتي
ردتلي ..
تصبح على حبي ياحلو

سديت تلفوني ونمت براحه هالليله ولاول مره هيج اتحمس وانه انتظر الصباح يمتى يطر علينه ...

وصار الصباح وكمت كلي نشاط .. تريكت وكعدت ويه جدتي وامي وهنه مامصدكات حنتي اليوم ... كلساع يهلهلن من الصباح وامي تجي وتبخر اكلهه حجيه خلنه نصبح بالاول تكلي لا
نبعد عين حسادنه ....
وجدتي تفك هالجكليت وتحط بحلكي وتكلي
تحلى خله يبدي يومك بكل حلى ...
وردت اجتي منال جايبتلي كلاص حليب وكليجه وره الريوك وكالت ..
خويه اشرب هالحليب بعده تازه ينطيك حيل
وتحلى بكليجه التمر انه سويتهه ليك

خذيتهن منهه وتشكرتهه وكليت الكليجه وشربت الحليب وهيه تعاينلي من خلصتهن فرحت وتبسمت
رويحتهه وكلبهه طيب عكس امهه ....

اجانه وليد يصيح ...
- هاي شنووو شو نسيبكم ماتدللو صايرين شنو صرت عتيك بعد مادوروني حايرين بشهاب
- عندك مره هيه ادللك انه ادللن حفيدي نور عوينتي هاذ العزيز
- اييي حظوووظ
- تف تف تف اسم الله الرحمن عوذ بالله قل لا اله الا الله .. شجاك عله الوليد لاتصيبنه بعين
- هسه اني شكلت حجيه وهيج نطيتي علي لا تخافين مايصيبه شي هذا عنده دعم من رب العالمين
- يمه يمه منك كوووم لا تروح تطيحنه بسالفه عين بني ادم ماتامن
- هههههههه لك هاي شمسويلهن وهيج عابداتك متكلي شنو وصفتك
- هخخخخخ محبوب موش بيدي

ضليت اضحك عليه وهو يجايد بيهن وهنه كلساع وداكات الخشب ويتعوذن واحنه خربانين ضحك

رحت للحلاق رتبت لحيتي وشعري ورديت
للبيت تغديت وسبحت وطلعت ...
بدلت واجاني وليد كعد رتب شعري ولبسني الستره
جنت لابس بنطرون اسود وستره صحراوي وقميص اسود ... وكملت لبس الساعه والعطر محمد يرشلي وتالي نزلنه ...
وجدتي استلمتنه رشك بهالجكليت ...

طلعت بالاول بس انه و وليد للصالون عبن جانت تنتظرني ناخذ صور وبعدين نرد كلمن لبيته ...

نزلت طبيت جان اكو استوديو بالصالون نفسه صاير بالطابق الارضي والصالون فوك .. انه جنت انتظرهه جوه بي ... اجتي وهيه تتمايل بهالبدله ... بويه شني تكول من هذن حور الجنه
جنهه تفاحه مكشره ...
هيه منايه جنهه زبده بيضه ولينه ولابسه هالبدله
سمائي ويه لون عيونهه وهالصدر جمار صاير
والخصر هالكدودته مبين بيهه وهيه تضوي بيهه
من هالورد المايل عله الشعر الاحمراني الملولو ونازل عله جتافهه وهالكلاده التلمع بركبتهه
باسم شمس الشيخ ... والايدين رفاع والاظافر الخمريه زايدتهه نعومه ... ضليت حاط ايدي عله شعري وواكف اعاين ليهه ... وجهه متغير بالمكياج وزايدهه حلى مخليهه شابه تغري
موش هذيج الطفله الاعرفنهه ....

تكربت ليهه وكلتلهه ...
- يا صلاه عله محمد يا ملاكي انتي شهالحسن لج بويه انتي يمتى ترحمين بحالي هاذ جثير وحك عينج جثير كلبي رجيج جدام هالحسن كله

دنجت خجلانه وكلساع ترفع بكذلتهه .. انه نسيت منهو موجود وياهه ونسيت حته المصوره ..
خذيت ايدهه وبستهه ورفعت راسهه من حنجهه
حته تعاينلي وانه ذايب بيهه ذايب وجان اسمعن صوت عمتي الصغيره تكلي ..
- يا شهاب وكت الصور هسه مو الزفه

عاد انه جفلت وبساع وخرت منهه وصرت امسح بالعرك من وجهي واشرتلهه يلا نتصور .

وضلينه ناخذ بهاللقطات الي تشعلني ازيد بيهه
وكلساع انتبه ليهه عله تفصيل ..

خلصنه تصوير وجان تشاورني تكلي ..
احب شخصيتك بالاسود زين سويت من لبسته اليوم .. راقي هاللون راااقي عليك

ضحكت وغمزتلهه وكلتلهه ..
جا حضريلي ملابسي بي بعد
جان تكلي ..
اذبحك اذا تلبسه لاحد غيري

ضحكت عبن اعرفنهه هيج ردهه تغار ماترضى اللون الحلو بس ليهه ...

ردينه للبيت انه ووليد وانه كضيتهه تصفن وانذكر هالتفاصيل و وليد ينصب علي لحد مابزع
خابرتني من وصلت مرجعهم بسام ...

وضلينه احنه للساعه خمسه ونص طلعنه ليهم
وهناك اول ماكعدت جان مرت ابوي تصيحن لامهه تلبسهه الكاب عبن ابوي يريد يجي ....

لبسته وتالي اجه سلم وباركلنه وانطاني عليه ذهب امي الله يرحمهه ... وكالي لبسه ليهه هاي زياده فوك نيشانهه هاي بنت اخوي وعزيزه الشيخ
غاليه علينه ...
خذيت العلبه وجان بيهه كلاده بشكل كتاب قران يطلع عرضه ٣ اصابع واربع بتوت ومحبس
لبستهن ليهه بالاول وبعدين جابت امهه صينيه
مذهبه وبيهه شرايط وحاطه بيهه الذهب الي اشتريناه سويه ...
هم لبستهه التخم كله وضل بس المحبس وكلاده الناعمه كالت عوفهن بعد وين اخليهن اختنكت .. ضحكت وعفتهن ليهه ...

تحنينه وشبعنه صور وتالي مشينه لاهلنه ...
هناك تلكاني الشيخ يبارك ويوصي بيه عليهه
وكلي هديتكم تصلكم بعد جم يوم ...

وبدينه بحفله الحنه هنايه بيتنه والجماعه علكوهه
علك ... ماضل واحد بالسلف ماحضرهه ودبج وهوس ويانه ....
عشينه الوادم وردينه هم نهوس وهالمهاويل ماوكفو يطب واحد للميدان ويطلع واحد وسودنوهم للوادم ...
تالي للساعه ١١ بالليل كلمن مشى لبيته وضلينه احنه ولد العم ملتمين بالحديقه انه ذبيت الستره وتمددت ع الثيل وهمه يسولفون عاد خذيتلي غفوه
وتالي حسيت عله صوت وليد يكعدني ..
- لك تلفونك احترك اكعد جاوب

كبل خذيته منه وعاينت ربى مخابره سبع مرات
والساعه صايره وحده بالليل ....
كمت عله صفحه خابرتهه ...
- ها حبيبتي جنت نايم مادريت بالتلفون
- شهاب تعوف كلشي وهسه تجيني
- شمالج ياستار شني هالاعصاب
- داكلك هسه تجي تره بالكوه واكفه على اعصابي
- خير بس فهميني شكو
- تعال ونحجي

سديته وكبل مشيت خذيت السياره وحت ليهه وكاض كلبي بايد شني الصاير !!!

وصلت ليهم وخابرتهه جان ترفضني وكبل فتحت باب الشارع .. طبيت جوه ووكفنه بالحديقه وهيه
عيونهه حمرر ومبوزه ...
- شني شصاير بهالليل شكووو احجي
- انته لشوكت تضل هيج مستغبيني وتضم عليه
فهمنننننني كم مره سالتك على حياتك قبل ليش تضل تجذب عليه لييييش
- شمجذب شمااااالج بويه وحك الحسين حتسودن شني احجججي شني شمجذب
- شووف هاك بعينك شوف .. هذا منو الي كاعد منووو مو انته وصاحبك لو غيركم جاوووبني
منو الجان ساكن البارات ويه البنات هااا منوووو
مو انته مووو لو متوهمه اني
- شجاب هالصور يمج
- معليك شجابهن معليييك جاوبني هااااي شنوو شيسمونهه
- هذن كبل بتركيا وراحن بعد
- راحن مو. راااحن اي يروحن يطبهن مرض مايهمني عسى ماجنت تعاشرلك كل يوم عشره مو وحده بس لاتجذب علييييه سألتك الف مره شهاب ضام عليه شي من حياتك قبل وتكلي لا وتحلف وارجع اشوف شي واسالك اكو بعد شي وهم تكلي لاا وتحلف بعيوني وغلاتي وطلع كل حلفانك جذبه
وكلشي جذب بجذذذذب
- موش هيج رببببى شجاااج بويه تهدي بالرحمن
وحك الحسين انه مااجذب عليج احبنج انه يابت الناس شني جذب
- لعدددد هاااي شنووو شهاااب شنووو
يعني بليله عرسي اكتشف رجلي الحاطه بي كل ثقتي ومأمنه بي يطلع هو شراب عرك قبل ويكعد بنص هالزبايل من البنات هيج جنت مكضي اربع سنين من عمرك هناك بالشرب والنسوان
- رببببببببى بسسسج عاااد كافي
- لااا مو كافي  مو كاااافي .. هاي اعذارك ماتنتهي واني ماردت منك شي بس تكون صريح وياي مثل ماصرت وياك صريحه وحجيتلك كلشي بحياتي
وماعزيت عليك شي ولا قصرت بيوم وياك
ويطلع جزاتي جذبك عليه !!!!
هاي صار ثاني مره تحطني بموقف الغبيه كدامهم
واني الي مغليتك عن الدنيا والي بيهه تستكثر جم دقيقه من الصراحه وياي
- ربى هاذ جان زمان جنه بطيش وبدايه شبابنه
بس وحك هوه الله ماطخيت ولا بت هناك ولا عاشرتهن وتحرم علي عتبه هالباب عله وجولي لو انه جاذب بحجايتي ... وحك هالخلك هالروح مامعاشر ولابنت كبلج ..
- والشرب !!
- اي هاذ انه اكلج شربت مااجذب بي
- وليش لعد مكلتلي ..من اسألك تكلي ملتهي دراسه وشغل وتطلع انته لياليك كلهه بالبارات كاضيهه
ومن جنت احجيلك على مؤيد واكلك اكرهه لان يشرب تسكت جانبك ماتحجي شي ليييييييش
لان جان الحجي يمسك فتسكت بس اني غبيه لو ماغبيه وثوله جان ماصار بيه هيج ... تالي بعد هالتعب كله اجي بليله عرسي الكه صورك بتلفون زهره والبنات يتمضحكن عليهه واني الثوله واكفه واباوعلهن شبيهن ... همزين الي تدخلت زهره وكالت هاي بحفله تخرجهم ولا جان هسه ضلن يتشمتن بيه من وراك يا رجلي ياعزيز
- استغفررررررر الله ربي واتوب اليه ....
هيه ليله وحده ماعرفت تكمل بخيررررر
شجاب هالقنادر بتلفونهه

شمرت التلفون بالكاع وضلت مغطيه وجهه وتبجي تكربت ليهه بس كضيت ايدهه جان تدفعني وكالت
- روووح اني ماتحمل شوفتك بعد
- رببببى حبيبتي لاتسوين هيج باجر عرسنه شهالحجي شهالزعل مايسوه يارويحتي
- ايييي ايييي انته ماتفهم حركت ملبي بليله عرسي اعرف جذبك عليه لك والله لو حاجيلي لو مره وحده بس حاجي بالموضوع جان ولا كلتلك شي وتقبلتهه منك انته مدتفهم اني الحارك كلبي جذبك عليه مو ماضيك ....
كلنه نخطىء ونطب بشغلات بالطيش بس اني فتحتك كل ابواب الامان عندي واحتويتك بكل شي
ولو جايني وكايلي جنت مجرم هم اتقبلهه منك واحطك على راسي بس مال تجذب عليه وتضل ضام عليه هالشي واجي واشوفه عند غيري واني مثل الثوله واكفه بنصهم لااااا هنا مااعذرك ولاتحملهه منك
- رببببى
- عوفني عوووفني وروح حسافه الحجي وهالدموع بيك
- ربببى اكفي خلي نتفاهم

مشت ركض جوه وانه ضليت واكف حاير شسوي هسه ياربي منين جاي تطلعلي هالسوالف انه منننيييين ....
.
.
يتبع