من فجر ديسمبر
🍁
🍁
- ها محمد خيرك
- خوويه بالعباس ضايج خلكي
- خير هسه غير تحجي وافهم شمالك
- هالزواج الاكشر
- خخخخخخخ بسم الله ولك ماصارلك ليلتين كاطع مهر
- خويه بربك جا انه اچدن من الصبح لليل وخيرنه جثير تالي تجي جم صخله من هذنيج صخولهن يتمضيكن براسي وله شني انه ماعندي شهاده
ويتمضحكن عليهه
- عله حرمتك !!!
- اي
- وهيه شكو تسمعلهن شني ماتعرفن بيك
- لا هيه مارضت عليهن لجن انه حزت بكلبي حجايتهن كاعدات ويكللهه يااا مادارس شعندج ماخذه واحد ماعنده شهاده
- ماعليك بيهن خويه شمالك كول يالله عبالي شو شني صايرلك
- خويه جاي تفهمني انته لو لااااا
- افهمك اييي بس تهدا وخلني اشوفن شني الي تريده
- اريدن اكسر روسهن شريدن يعني
- لاااا لاا موش هيج الحجي انته العاكل شجاك
- جا يتمضحكن علي ويكلن هجمي وعربي وكلشي مافهمن جيف ماعندي شهاده !!!! هيج الزلمه تاليه
- شمالك انته شو هم مصغر نفسك جا انته موش عندك شهاده الثالث متوسط شني بعد
- اي عندي لجن جيب اليسمع
- هسه التريده شني !!!
- اريدن ادرس واكسر هالخشوم
- اييي هااااذ الحجي الزين
- شلون شسوي
- هالسنه تدرس خارجي سادس وتنجح ان شاء الله وادخل الكليه
- اكدر انجح !؟
- اييي جا عليش ماتنجح موش عندك هدف وحلم تريدنه تصل ليه لا تخاف
- اي انجح جا شني النجحو احسن مني !!!
- لاااه يرحون فدوه لتراب جدامك خويه
- زين جا يمتى نروحن نسجل
- انه اسأل ع السالفه واكِلك
- بعد اخوك موش تنساني
- لااا خويه تدلل ... هسه لا تضل مضيج خلكك اضحك وريح بالك وتونس ويه حرمتك لاتهتم بحجي الوادم تره مايخلص
- لااا خويه هسه تعدل مزاااجي ونشنشت
- ههههه اييي دايماً ان شاء الله
- يلا انه اروحن انام وانته موش تنسى ردلي خبر هاليومين زين
- زين زين
مشى وانه فرحت لين فكر يدرس ويحصل الشهاده
ولو هسه انه مسفط شهايدي بالكنتور وكاعد بس هم احسن من مامش شي ...
طبيت سبحت ورحت لحجرتي تمددت وغفيت شويه وكعدت عله صوت ابوي .. كمت رحت ليه
جان جاي عمي حاتم ورحت سلمت عليه يريد ياخذ عايلته ... شفت ربى نزلت ولابسه ومنزله وياهه جنطتهم .. تضايكت يعني هاي السالفه يمتى حتفض اريدنهه جدام عيني بزعت روحي كل يوم رايحه راده حيخلص عمري وانه ماشابع منهه ..
عفتهم وكمت رحت لحجرتي وهيه اجتي وراي
سديت الباب وحضنتهه .. ماحجيت شي بس مخلي راسي بركبتهه وهيه محاوطه ظهري بايدهه ..
تالي كلتلهه ..
- ماشبعت منج
- ولا اني
- اريدن اتزوجج عاد ملت روحي من هالسالفه
- مادري ليش اشك بعدين ماتخلي احد يشوفوني
- ههههه شكج بمجانه حبيبه اخذج ونشرد بس خلهم يصبرولي اخلي ابوج يتحسر عليج مثلي هسه
- ههههههه يمه مننك يممه
سمعت صوت امهه وهيه تصيحهه عاد كلتلهه
- اوكفي شويه
جبت محفظتي واخذت فلوس خليتهن بايدهه ..
- ياروحي تسلم ممحتاجه
- اخاف يصيرن شي بنفسج ماريدن تطلبين من احد انه دايماً كايلج ماريدن تعتازين حته ليه
وهسه اخذيهن وامشي يلا عيب من عمي تاخرنه
اخذتهن وحضنتني وباست خدي .. طلعنه ودعتهم
ورديت لحجرتي كلبت بالنت وسألت عله سالفه الدراسه لمحمد ووصيت ولد صاحبي يشوفلي يمتى تسجيل ...
وره يومين الظهر جنت راجع من الهور وجان اشوفن سياره وليد جايه لينه .. طبك جدام بيتنه
وجان ينزل والضحكه شاكه الوجه رحت ليه
جان يحضني ولا سلم ولا شي كبل كالي ...
- امشي خلي نفووت امشي
-شمالك شصاير !
مارد علي وراح ركض طب للديوانيه انه طبيت وجان تجي زهره وابوي جان يكوم يهوس بايده
ويكول ....
- نجحت عمي والحمزه نجحححححت زهره نجحت لك شهاب والله تعبي ماضاع بيهه نجحححت
- صددددك شكد معدلهه
- ٨٩ هاك شوف درجاتهه هاي بالليل فتحو الرابط وضليت احمل بيهن لحد الصبح يلا لكيت نتيجتهه
- اييييي الحمدلله الحمدلله والله رفعت راسنه هالزهره
نعاينلهه وهيه كاضه طرف شالهه وفاجه حلكهه وصافنه علينه جان امشي واكفخهه عله راسهه
جان تندارلي وتكول ..
- خويه شني هاذ حلم علم
- كيفج انتي شتردين
- يعني انه نجحت هالساع خلصت المدرسه
- هخخخخخخخخ اي خويه نجحتي
- كلللللللللللللييييييييييييييييش
- يااااا مسودنه شجاااج
- يماااااااااي نجحت انه كللللليييييييش
- بالعباس انه ماشايف وحده تهلهل لنفسهه
- ماعليج بالحجي هلهلي يابعد كلبي هلهلييييي
ضلت هيه تهلهل و وليد يطك اصبعتين ويهز بركبته ويضحك وابوي عاوج حلكه ويهز بايده
مايعجبه العجب ...
التمن جدتي وامي ومرت ابوي عله صوتهه يردن يعرفن شني السالفه و وليد يصيح نجحت ...
وليد كال انه اتكفل بتقديمهه للكليه بس زوجني
عاد كلتله حضر روحك ويمتى ماتريد اخذ
جان ضال بس يهز جتف عله فرحته هاي
راح لاهله وثاني يوم خابرني الصبح كالي
راح احولك فلوس نطيهن لزهره تكمل بيهه جهازهه والعرس نهايه هالشهر يعني بعد اسبوعين
رحت كلت لزهره وهيه مدنجه والضحكه شاكه حلكهه من الطول للطول ...
انه جان يومي كله يكضي بالترجمه واشتغلت بموقع ثاني اجنبي وخير من الله هالشغل ..
هاليوم جان خميس وجنت موصي جدتي تحضر ثواب لروح نعيم مانسيته ابد دايماً اذكره بكل شي
واترحمله .. رحت العصريه كعدت يم النبكه واعاين للصوره الجان حاطهه بالظرف ليه ..
كلش مستاحش بدونه صح العيشه تمشي لجن بيهه روح ناكصتهه ... بين ماانه اعاين لصورته واذكره دك تلفوني ولنهه ربى ...
- هلوو حبيب روحي
- هلا بالحبيبه شلونج
- مو زينه لانك مو زين
- هههه
- شبيك شنو الي مضوجك احجيلي
- مامش شي هيج تذكرت نعيم اليوم واستاحشته
بهالمجان ثكيل فراكه ياربى ثكيل
- حقك ياروحي صاحبك وعزيز عليك زين ليش متروح تزوره بلكي شويه ترتاح
- مادري الصراحه اخافن اروح واشوفن صاحبي غدا ترابات وعليهن اسم ماتحمل هالشكل
- نصيبنه من الدنيا كلنه هيج حبيبي .. تريد اروح وياك ؟
- لا لا ماريدن اروح عوفيهه للسالفه
- ماشي على راحتك
- شخبارج شلون صرتي
- بخير .. ردت اكلك باجر اريد نروح اني وامي لبغداد حتى نجهز للعرس تقبل مو
- وشمعنى بغداد !!! شيوديج
- مو امي متعوده تشتري من هناك وهم الفساتين احلى ونندل كم مكان مضبوطين بيهن وزهره هم وصتني بكم شغله اريد اجيبهن الهه ...لااا لاا شتكول اخذهه وياي مو احسن
- هههههه هو انه كلت انتي تروحين حته تاخذي زهره !!
- يااا شهاب شبيك هسه شنو قابل
- زين ترحين بس تلتزمين بالشروط
- شنو هالشروووط
- لا مكياج لا بنطرون لا كعب لا عطر
- شنوووو هو شبقى لعد
- شني شبكى البسي جبه وشال وامشي هوه انتي رايحه لسوك موش لحفله وتمكيجين وتعطرين واطكين بهالكعب
- بس اني احبببه
- البسي هنايه من تجين هناك رايحه بسوك والوادم عينهم زايغه وانتي ماشاء الله تجيبين التايهه بحسنج
- يعني شلون اتبوش والله شنو حلوه
- يااااريت والله
- لااا يمه شنو اختنك .. البس الجبه احسن
- واخذي مناظرج البسيهن
- هاي شنووو النوب شسوي بيهن
- مااااريدن يشوفون عيونج ويتصفنون بيهن
- خوب كلي لا تروحين وفضهه
- لا خطيه انتي ماخليهه بنفسج
- لااا والله !!!!
- هسه انتي كيفج بعد تريدين ترحين هاي شروطي
ماتريدين كيفج
- اممممممم خبيث
- جبه سوده وشال اسود زييين
- زين زين
- ولااا نتفه مكياج موش تكلي بس هاذ وبس هاذ
- والله اغسل وحهي واطلع فهمت
- ههههههههه انتي بكلشي كمر رويحتي
- اي اي قشمرني اي
- هسه منهو ياخذكم
-بسام يوصلنه ويروح لخوالي
- ربى خاف لامج نيه تروح ليهم !
- لاا مانلحك لان ابويه كال ترجعون بسرعه
- زين جا احجي ويه زهره وشوفي تريد تروح وياكم؟
- يلا ماشي حخابرهه
سديته ورحت اخذت المشحوف ونزلت للماي وضليت اتسرسح بي واعاين للشمس شلون تغرب
واشوفن هاالالوان الي بالسمه من كل صوب لون
سبحان خالكهه ...
عاينت بين الكصب عله الجرف راس زلمه ملثم
ركزت بي واشوفنه يحاجي احد هناك ضليت اعاين ليه وتالي شفت حرمه مغطيه وجهه بشيلتهه ومشت وهوه يتلفت وراه انه كبل مشيت للجرف
وطبكت المشحوف وركضت وراه اشوفن منهو هاذ اخافن دخيل !! موش من سلفنه !!!
وجان اشوفنه ولنه هاذ لابان ابن الريم .. جان ينزع لثامه من وجهه ويعدل بشعره وهوه يتبسم
ضليت واكف اريدن افهم هاذ ويه ياحرمه جان!
اجه سلم علي وانه مابينتله شي كلت افهمن سالفته عله راحتي احسن ...
ثاني يوم محمد وصل زهره لبيت عمي حاتم
وكبل مايطلعون ربى دزتلي صوره الهه وتكلي
راضي زوجي العزيز ! رديتلهه ...
هوه الكمر شيچمله غير الليل .. حته بالاسود تكتلين
دزتلي.. ابدل يعني !
رديتلهه.. لا خليج بس البسي مناظرج وديري بالج ع روحج
دزتلي ..اووكي حبيبي
وراحت وانه رديت اكمل شغلي ع اللابتوب
ولليل يلا ردت زهره للبيت محمله بهالعلاليك
تالي انه صفنت بيهه ..هاي ربى هم بعد جم يوم وتضل تفرفر من سوك لسوك هيج !!!
شيخلصهه بعد !!!
بدينه باسبوع العرس والكل مخبوص .. نص التنظف ونص تسوك وانه ومحمد حايرين بهالكراسي والماي والشرابت ...
حضرناهن كبل يوم الحنه وبهاليوم وره الغدا
اجوي بيت عمي حاتم والامه العربيه كلهه التمت
ماتسمع بس صوت الجهال والنسوان حته ربى ماشفتهه من بينهم ...
طلعت بره اكضي جم شغله ورديت العصر للبيت
خابرتهه وكلتلهه تجيني للحجره ..
ضليت كاعد انتظرهه وهيه اجتي وسدت الباب
وكبل حضنتني وانه عصرتهه بحضني واشمن بيهه ..
- لج مشتتتتااكلج مشتاااكلج
- حبيبييي واني مشتااقتلك
- بله هسه انه شفتهم اليوم منج وهالجعويط كله هنايه!!
- ههههه يخلص العرس وافتهم على راحتك
- شننني وانه اضل انتظر يومين !!
- لعدد شنسوي
- خلي ناخذ حصتنه هسه وبعدين يصير خير
ضحكت وانه بوست شفافهه التضحك وهالسنون
الناعمه .. فتحت شالهه وذبيته وضليت اخربط بشعرهه شكثر مشتاكله يالله ... ضليت اشتم بي
وهيه تتلمس بلحيتي وركبتي تالي خذيتهه للجربايه
نومتهه ورحت كفلت الباب والبرده سديتهه واجيت ليهه نمت بسدهه وحضنتهه لصدري .. افيييش
هساع ردتلي رووحي .... ضليت ابوس واشمشم بيهه وجان تصيحن عمتي ..
-يا شهاااب وينك
وردت النوب جدتي هم تصيحن ..
- شلوووون حته هنايه حاطين رواحهم
- ههههه دكوم شوفوهم شيريدون عيب
- عوفيهم مالي خلك احد هسه خلينه بالمهم
هستوني بستهه جان ترد امي تصيح واعيط بيهم
- من اشتعلو صفحه اهله لشهاب شتردووون
كمت بساع وفتحت الباب شويه وامي واكفه وتضحك وانه اعصاب .. كلتلهه..
- هاااايمه عرستي ويه عرسي !! خيير
- ههههه يايمه جا شعدنه غيرك هسه وكتكم ماتشوفون البيت مليان وادم
- شمالهم احتركوو!!!
- ههههه انته الي شمالك .. امش جيب اللحمات من الولد يلا خلنه نزهب العشه
- شوفيلج غيري يمه باليرحم اهلج انسيني اليوم زين
- هههههه زين يمه زين روح لحضينهه روح
سديت الباب واعين ربى فاطسه من الضحك
اجيت عليهه وعضيت خدهه ..
- النوب انتي التضحكين
- ههههههه صاير عصبي عليهه شكد عييييب هسه شتكول
- يستاهلون جا الله يرضاهه يكطعون رزكي
- يارزق هذا
- هالزبد موش رزك .. عوفي الحجي وخليج وياي
مشتاااك عطشاان عليج افيييش يهالريحه سودنتني
ضليت اشتم بركبتهه وابوس وهيه كلساع وتكلي ديربالك تخلي اثر واضل حايره باجر... عفتلهه ركبتهه وخذيت الباكي شبعت بي ... اشوفنهه تغيرت موش مثل الاول هسه مسترخيه وياي وبعينهه شوك لكلشي مني سطرتني ازيد ما انه مسطور بيهه ....
خذيتهه لصدري واخذتلي جكاره ادخن وجان تجر بشعر صدري حيل..
- خاااب شمااالج والصكع
- شكو ادخن كم مره اكلك عوفهه
- ماعليج انه احبهه بهيج وكت اتسلطن بيهه
- امممم
- شراح تلبسين باجر
- فستان احمر طويل
- احمر ؟؟شعججججب
- هههه من شفته تذكرت من جبتلي الزي الكردي وكلتلي احب الاحمر عليج وهو صح طلع حلو كلت خلي اجرب هالمره هم
- ايي زين زين .. بس خما مدلع ؟
- شهااب تره حنه بنات لاتحطلي شروط وقوانين
- لاااا عايز بويه تصلخين جيف حنه
- ههههه هسه شكو بيهه
- لاا والله صدك يعني مدلع من فوك
- اي باجر تشوفه
- رببببى
-اي حبيبي تشرط اسمعك
- اذا شفته فاضح تخلين شال عليه لو تشوفيلج غيره هاي وحده ...شغله الثانيه تصوير باي تلفون ممنننوع .. لا عمه ولا جده ولا بنت عمه ولا عم
غير تلفونج ماتاخذين صور .. واذا اخذتي ويه زهره بتلفونج وماتدزيهن الهه
- شلون واذا رادتهن شكللهه
- ماتدزيهن لو تنطبك السمه ع الكاع ..بعدين وليد يضل يكلب بتلفونهه ويشوفج ترضيهه؟؟؟
- لاااا طبعااً بس مايصير يعني لازم صوره عدهه
- اي اخذيلج جم وحده وياهه بس بالشااااال وهذني خليهن يمهه وفضي السالفه
- اممم ماشي
- وحسبي حسابج بالليل انتي يمي ولا تبدلين
- بله تاخرت شلون !!
- اجي اجي لاتخافين
- من هسه اكلك اذا تاخرت ابدل لان ورانه تنظيف شلون ميصير اضل كاعده هيج
- اكو غيرج الي ينظف انتي شغلج بس تجين لحضني اتمعن بيج
- ههههههه حته شلون امي تشرني ع الحبل بالرزايل
- هخخخخخخ هاي امج واكفه عله كلبي
- هاااا
- اييي لين ماتخليني اتهنى
- ميخالف لتكول هيج هي غير لمصلحتنه تحجي
- اييي واضح
- اكلك هاي ريحه الجكاير بيك تصير طيبه شنو هاي بيهه فد طعم
- ككو
- هااا اكول شنو سالفه هالريحه بيك طلعت ككو
شعجب ماجنت تدخن هيج قبل
- جديده هاي ماصر اسبوعين جربتهه هذيج حاره وهاي اخف منهه عجبتني
- امممم حلوو
- تجربين !
- ايييييي
- وعلييييي ماتصدكين
- امممم غثيث
دنجت حكيت خدهه بلحيتي وهيه تتنعوص
- هاي حته اغثج من صدك
- هههه اموت عليهه هاللحيه ماتغثني
كامت تلبس وانطتني ملابسي لبست ووكفت امشط شعري واعدله وهيه تعاينلي وتتبسم
- شمالج
- ههه احببك
اجتي حضنتني وانه بوست راسهه وطلعنه رحت شفت الولد ورديت رجعت سبحت كبل الغروب
كعدنا تعشينه وطلعنه للكهوه وهالليله احنه الولد كلنه نجمعنه بديوان الشيخ نمنه وفرغنه هذاك البيت للحريم ...
من الصبح كعدنه وكلمن كضله شغله .. محمد اخذ ربى وزهره ومنال و وياهم وحده من عماتنه للصالون ... وضلينه احنه بالديوان ساعه وساعه
نشوف شني يردون للبيت ...
لحد الساعه وحده الظهر خابرتني ربى وكالت
- حبيبي رجعنه للبيت انته وين؟
- هنا يم الشيخ
- ها زين
— حضريلي ملابسي حته اجي اسبح واطلع كبل ما تبدي الهوسه
- اي ماشي ادلل
سديته وشويه وترخصت رحت للبيت وكبل طبيت لحجرتي .. رمشتلهه اجتي وجنهه جوريه ..
ثوبها احمر طويل منسدل برهاوه عله جسمهه والجتاف جنهن جماااره صاير بي دانتيل رفيع نازل عله زندهه ومامبين بس ركبتهه وجتفهه وبي تول نازل من الخصر و منكش من الحاشيه .. وشعرهه رافعته وملولو والي عجبني بيهه ازيد
مكياجهه عله كد كحله مجروره ورموش عاليه وحمره فاتح ... لا موخره النمش ولا ملغمطه بهالالوان ... ضحكت ليهه وانه رافع حاجبي واعاين لكلشي بيهه .. كلتلهه ..
- انه ربي يحبني وخله مريتي تصير ام الحِسن كله
- ههههه يعني حلو
- بووويه يطك بالكاع شني حلووو تكتلين
- اممم انته الي تكتل يااسمر ياحلو
- والله
كلتهه وجريتهه من خصرهه ليه وشميتهه من حنجهه وبستهه وتلمست ركبتهه وجتافهه ..
- لا يصيبوج بالعين حبيبه
- هههه لااا امي صارلهه ساعه تقرا بالمعوذات
لاتخاف
- والله زين ماسوت .. ماتجين نشرد جم ساعه ونرد
- لااااا شنوو
- انه اعرس مااضل هيج اتكرضم عليج
- اممممم ... حضرتلك ملابسك عمري
- موش بحالهن هسه
- شهاب حبيبي هسه تجي امي وبس تشوفني راح ترزلني بالكوه خلصت من حجيهه البارحه
- شنني خيرهه شكو تحجي
- تكلي شوكت تجوزين من هاي سالفتج لا تروحين لغرفته واني كلتلهه جنه نتعارك هههههه
- ههههههههه اييي عركه من هاي الزينه
- اييي خليتني اجذب من وره سوالفك
- عادي هاي جذبه بيضه ماعليهه شي
- ديلا لعد ماريد بعد جذبات يلا حباب قبل لاتجي
- خاايبه جيبي من احتركو عشيرتهم واحد واحد
سمطو اهل اهلي بنطتهم كلساع علينه
-هههههههه شكو تصير اعصاب هيج بسرعه
- اسكتي انتتتي .. راح اسبح من اجي الكاج هنايه زيين !!
- ادلل عيوني حبيبي ادلل
رحت للحمام سبحت ع السريع ولبست وطلعت
لكيتهه واكفه تاخذ صور ليهه .. اجيت وكالت نتصور سوه .. ردت امشط مارضت اله خربطت شعري وانه اعاينلهه ورافع حواجبي شجاهه هاي!
جان تكلي ..
- تصير تجنن من مخربط شعرك ومبلل
- خبااال اي والله
ضحكت وضلت تصور وانه ابوس بجتفهه
بعدين مشطت ورتبت شعري وبوستهه وطلعت
جان يخابرني وليد ..
- هااا عريييس شلونك
- منطلق اني مامصدك لك شهاب كبرت وراح اتزوج ههخخخخخ والله لو يسولفولي على نفسي هسه قبل كم سنه لا اطك من الضحك
- ايييي زمان الخلاك هيج
- اي والله .. هسه كلي شنو الاوضاع يمك
- عاليكهه الجماعه
- ايي خليهم يفرحون اكلك
- هاا
- اني جاي بالطريق تره مامتغدي من هسه اكلك
حضرلي فد ماعون هيج بالختله زين
- ههههه شجابك ولك موش كالو اهلك مايجون الدرب طويل !!
- اي اهلي مايجون اني شكو
- وليد هههه لك خويه شلون تجي وحدك ماترهم
- لاا جبت وياي امي وخالاتي اثنين .. هسه انته لا تظلمهه عليه .. بس اشوف وارجع ماطول بس خلي يرتاح كلبي شويه ماصبر وداعتك
- والله انته متسودن فرد نوب
- هسه عوفك مني وامشي حضر نفسك يلا ترجع وياي تره
- شكو راجع وياك !!!!
- مو صاحبي وحنتي اليوم شنو ماتحضرهه !
- لك نسيت هاي اختي شمالك انته
- اني مو كايلك احنه قمصله ام وجهين ترهم ماعليك هسه صار وكت الصحبه عوف اختك
باجر عود لاختك اليوم الي
- وليد ماترهم خويه لا تسويلي سالفه
- والله ازعل منك لك حنتي هاي لتصير اغم والله اذا ماتجي اضل مكابلك وكاعد واسوي حنتي يمكم
وانته كيفك بعد
- هخخخخخخخ ااااانه الله مايذب علي بس المخابيل
يطيحني بوين مامش واحد ماعنده عكل وصبر
- حظك بعد وصاحبك تتحملني .. هسه كافي خلصت رصيدي امشي حضرلي ماعون مرتب اكيد ذابحين اليوم وكله هبيط مو
- ههههههه ايييي
- اي دثردلي فد ماعون وشكلي من كلشي عدكم تره نفسي مفتوحه للاكل اليوم اكثر من كل حياتي
- صار بويه صار
- باوع تره اني اليوم اتعامل وياك صاحبي مو نسابه فادلل عليك ولا عيب ولا مستحى
- بويه هسه انه حاجي شي .. كيفك عمي عزيز مانكدر نكلك لا
- اييي هذااا الحجي المعدل .. يلااا بااااي
سديته وانه اضحك والله مامصدك انه منطي اختي لهيج واحد مسودن .. يعني هاي سوايه يسويهه شاحط خالاته وامه بس حته يشوف شويه ويرجع
رحت للمطبخ وشفت بنت عمي عمران واكفه توكل ابنهه سلمت عليهه وجاي اشوفن الجدوره ومااحسلك الا ربى فوك راسي وعيونهه مخنزره
كلتلهه ..
- هاا خيرج
- شكاعد تسوي !!
- واكف شمسوي
- وهاي
- ياهيه
- لاتغشم روحك مو تشوفهه واكفه وحدهه شكو جاي وتحاجيهه
- وانتي شدراج انه جاي احاجيهه
- لا عبالك تحركاتك كلهه مراقبتهه
- هاااا شغلتي رادارج
- لااا هالمره شغلت عيوني عليك .. لا تلوف السالفه شعندك وياهه وحدكم
- بويه لا تسودنين علي اجيت اشوف منهي هنايه تصب اكل وليد راح يجي وجوعان وهاي لكيتهه هنا شكوو شصار يعني
- مره ثانيه تخابرني ماتحاجي اي وحده
- هههخخخخخ والثوووول اي والله عله هالعكل الصغيرون بويه لو اريد احجي انه ماخايف وهسه يلا امشي صبي انتي .. الله جابج
- شصب !
- ااااكل للزلمه اكلهه جاي
- هاا مو اني ركزت بس عله سالفتهه
- ايييي بس تريدين تلكطيلج شي تعاركين عليه
- لااا حبابه شبيك
- اييي انه هم ادري ... يلا سويله صينيه مرتبه
- اكلك هو شعجب جاي شو زهره ماكالت يجي
- ههخخخخ متسودن هاذ جايب امه واثنين من خالاته وجايين وحدهم
- يااااا
- يريد يشوفهه وياخذني وياه
- انته شكو ياخذك !
- لحنته
- لاااااا والله شنو تروح !
- مادري لج انه غلطه عمري هاي صارت وانطيته اختي .. السالفه التعجبه يكلي صاحبي انته
والي ماتعجبه يكلي اخوهه انته وحرت وياه
- ههههههههه شيخلصك بعد منه
- تصدكين يكلي لو ماتجي للحنه اسويهه هنا يمك
- لاااا يشاقه
- لا بعلي هاذ يضل مجابلني وكاعد اعرفنه بالملحه محد يلحكه
- وشلون لعد شراح تسوي
- بلكي اقنعه يعوف السالفه
- ههههه والله سالفتكم حلوه تعال لحنتي اني هسه صديقك مو نسيبك هههههههههه
- ايييي انطاح حظي بيهم بعلي .. صبي صبي
لنشوف تاليتهه
شويه وسمعت صوت الهورن بره طلعت وشفت وليد نزلن امه وخالاته طبن جوه يهلهلن وهوه حاط ايده عله جتفي وواكف يعاين داير مدايره جان يكلي ..
- اكلك هاي شو ماكو احد من الولد وينهم
- كلمن بشغله شتريد منهم
- عبالي اكلهم يجون ويانه
- هاي انته من صدك تحجي !!! بويه شتاخذ انته تريد. تضحك علينه الوادم !!!
- شكو اضحكهم !!عرس وفرحانين سوه معليك بيهم معليك اهم شي انته عندي تجي وياي
- مااا اجي افهمهه عاد
- هسه دجيبلي الاكل وعود نتفاهم
- امش لبيت الشيخ وهسه اجيبنلك الاكل
- يلا بساع
كفخته عله راسه وهوه ضحك ومشى .. طبيت اخذت الصينيه ورحت ليه .. كعدنه بديوانيه بيت الشيخ وهوه شنف ردانه وتربع ونزل ع الصينيه
فرد نزله ...
كمل اكل وكعد يكِلي ..
- اكلكم بي نفس طيب بلكي هاي زهيره هم تطلع هيج نفسهه طيبه بالاكل حتى اكرش
- هخخخخخخ اثنينكم اهل بطون
- اي والله تصدك هواي لكيت بيهه شغلات تشبهني يعني والله كل يوم اكول هاي احسن اختيار
- الله يهنيكم
- يلا كوم سويلي طريق خلي اشوف شكو ماكو جوه
- ولييييييد
- يعني اذا لصاحبي ماحجي المن احجي
- امش لانعل ابوك لابو صاحبك
- خخخخخ جنك تندمت
- اااخ غلطه وصارت بعد
- ليش هيج ليش مو صويحبك اني تعز اختك علي
- لتكول اختك كرهتني بيك من وره هالجلمه اششش لاتضل تحجي امش امششش
ضل يضحك ومشى جدامي .. من باب المطبخ صحت ليهم يسون درب وخابرت ربى نبهتهه تلبس شال وعبايه ... ضل جوه وانه بره كاعد وانتظر بي .. بله هسه انه شجبت لنفسي من سالفه!
وره نص ساعه طلع واجه كعد يمي ووجهه يضحك وسرحان جان كفخته عله راسه ورد عاينلي وبعدهه الضحكه بوجهه ..
- لااا افلش سنونك بسك عاااد
- كلبي يمه كلبببي اختك مصيبه ولك مصييبه
- جم نوبه اضل اكلك صم حلكك
جريته بالكاع وضربته بوكس ببطنه ..
- هيييي عوفني ولك باجر عرسي عووفني
- ماريدن اشوف وجهك منا لشهر فهمممت
- باجر يمك وبالسبعه هم تجيني واشوفك وتعزمونه ونعزمكم حنشبع شوف خويي
- لو اروحن لجهنم هم ماخلصن منك ادري بروحي
دفرته وكمت جان يلحكني وكال ..
- لك بس كلي وين شايفلك واحد عايف حنته وجاي يلحك صاحبه بس كلي وين تلكه مثلي وييين بس انته متقدر النعمه
- عمي روح وخلصني هسه انه مجلب بيك
- يلا امشي بدل ونروح
- مااجي انه شمالك وليد
- شهاب شسالفتك دتعال وياي هسه قابل راح يخرب العرس لو اجيت
- ابني عيب عيييب شعندي رايح
- العيب بالجيب امشي يلا تره والله ماروح وخلي ابويه اذا حجه اذبهه براسك
- وليد خويه امشي روح لاهلك وعدي اليوم هاذ بالخير وباجر اخذهه وخلصني بعد لاتشوفني وجهك
- تدلل بس تجي وياي اليوم واعوفك وعد اسبوع ماخابرك
- ههههههه جاهل بعلي
- دمشي امشششي لك هي مال اصول بهالزلك خلي نفرح ونركص شعدنه هي مره بهالعمر دمشي لانعل ابو القوانين والعيب
اخذني ادفع ادفع ورحت بدلت ملابسي وطلعنه
وصيته هناك يكولن انه صاحبه وبس .. وكلي ابوه هوه محاجي وكايله مااسوي حنه بلايه شهاب وهوه مكيف بجيتي ماحاجي شي .. ابوه رجال مسالم وماله دخل بشي بس انضباطي كلش..
والله وهناك علكوهه جماعته وهوه ماكصر ويه المطرب ويهز .. جان يجي يكلي
- يول شو ماهوستلي مو صاحبك معرس اضل اعلم بيك
- خخخخخ لك انته ناوي علي اليوم ابتليت وصرت صاحبك خما ابتليت
- ضريبه العشره لعد ياما غسلتلك مواعين وفرفرتك و وكفاتي ماستاهل هوسه صغيرونه
- لاااا والله تستاهل ماي العين جا انه جم وليد عندي
- هلا هلا الله حيهم
وكفت بنصهم والمطرب كالي اخذ السماعه مارضيت هيه حلاتهه هيج وانه صوتي مايحتاج ليه هوه عالي من كاعه ...
كلتله ...
- مبااارك ياابن الطيب مبااارك
وعساه الفرح دومه يبكى بدااارك
يافرحتنه الجبيره ويااك نتشارك
الصاحب مايتعوض .. وشد حزامك بي الصاحب مايتعوض ...
كلهه التمت تدبج وتصيح الصاحب مايتعوض
ردو كالو بعد .. جان كلتلهم ..
- الف ع الخير كليله خاف وياكم يالي مدينينه وشلون ننساكم ..
العرس فرحه وسهل نوصل باب الدار بس بالضيج دوم احسبني وياكم
ها ها واحسبني حساب ابن العم
احسبني حساب ابن العم دوم انعيهم ويه الجيلات
وردت كلهه تدبج وتهوس وهوه واكف بسدي ويضحك جان يحضني ويكلي ..
- كنز انته بحياتي ياخويه كنز
- تستاهله ياخوي طيب واصيل كلشي يرخص ليك
صار وكت يحنوه وكفت بسده واجه اخوه الجبير حنه اصبعه الصغير وتالي هم ردت الاغاني والمعزوفات وللتسعه انه سلمت عليه ورديت للبيت
وصلت ب ١١ وربع طبيت لحجرتي كبل واشوفن ربى متمدده ع الجربايه وبعدهه بملابسهه
كبل ضربت كصتي انه شلون نسيت كايللهه تنتظرني !!!!
طلعت تلفوني واشوفن رسايل منهه ومكالمات
وانه ماسمعته من الهوسه ...
اجيت يمهه كعدت و وخرت ايدهه من عيونهه
جان تفز ضلت تعاينلي بعدين كعدت ..
- حضرتك رجعت اخيراً !!
- ههههه
- لااا والله وتضحك وكاعد بكل رهاوه واني مشتوله هنا من التسعه !! ليش متجاوب وين جنت
- حبيبتي جنت بيت وليد بحنته وماسمعت تلفون من الهوسه
- وشكو رايح وعايفني
- والله هوه ضل يلح وتعرفين صاحبي ماكدرن اعوفنه هيج يزعل
- هااا يعني هو ماتعوفه بس اني بالجذب متنطيني خبر وتكلي تره اتاخر تره طلعت ماكو ممحسبلي حساب
- رويحتي تهدي .. حكج علي اسف انه التهيت وياه وهو شدهني
- خلي يفيدك
رادت تكوم جريتهه كعدتهه ودرت وجهه علي
- وين رايحه حبيبه
- ماعليك
- ههههه يابويه مريتي زعلانه يابويه .. ولج ماكدرن عله زعلج رويحتي اسف كتلج مادريت بالتلفون لاتكبرينهه عاد
- ماشي ماصار شي
- جذابه موش من كل كلبج
- اففف شهااب يعني ضجت ضجت صارلي شكد انتظرك وخوفتني عليك متجاوب وعايفني وحدي ميصير هيج
- حكج والله حكج .. هسه اعوضج رويحتي لاتضوجين كافي عاد موش حلو عليج الزعل يخرب هالجمال
-امممم
- لج شعلتي اهلي بالجتاف ماتكليلي امج شمالكه من حلاه وهيج جابتج بويه تسطرين
- هه حيال
- اموووت عليج وعلي رويحتي بيج
جريتهه حضنتهه و وخرت شعرهه وضليت اتلمس ظهرهه وركبتهه .. بويه اتمزلك ايدي عليهه زبد بالعباس زبد ...
- شو كومي سدي الباب وتعاي خلي اتمعن بطولج
كامت تمشت وانه اعاين ليهه شبر شبر من جدامهه لراسهه .. تنسيني ابو الدنيا بحسنهه هاذ ..
اجتي وانه اعاين لخصرهه شلون يتمايل ضحكت وكمت كضيتهه منه وعصرتهه حيل جان تضربني بخفيه عله جتفي وهيه عاقجه الحواجب ..
- تمايلين عله كلبي بهالخصر تدرين لو لا
- ايي ادري
- وتعمدينه !!
- لاا هو هيج
دنجت مصيت هالشفايف المحمره وكلساع اكربنهه ليه ازيد جان تجفت علينه زهره كبل دفعتهه وهذيج سبحت بوشهه وفلتت ..
- خررررب بحظكم اي والله مايخلون واحد يتهنى
-هههههههههه
- امشي شوفيهه شتريد
- اعصابك عيني
- يخلون اعصاب هذول حسره ماكضيتج الكاهم فوك راسي
- هههه موقتين
كالتهه وراحت ليهه وانه خذيت ملابس وبدلت
هستوني تمددت جان تجي ربى ..
-شهااب كوم هاي زهره دتبجي
- تبجي !! عليش منو وياهه
- ماتريد تروح خايفه ومقهوره
- هاا زين هيه مقهوره انتي شكو من يمج دلغمتي
- ايي شبيك غير راح اشتاقلهه عفيه ماريدهه ترووح شهااب
-ايييييييي بجت .. تعاي ليه تعااي
اجتي حضنتني وهيه تبجي وانه اسكت بيهه وصحت لزهره هم اجتي والوجه احمر والخشم منفوخ واحمر وكلينسهه بايدهه ..
-ها خويه
- تعاي يابعد اخوج
شو هاي بس كلتلهه هيج كبل طكتهه ببجيه واجتي هم حضنتني وصارن كل وحده بجهه ..
- شجاج خيه موش هيج اعرفنج رجيجه
- خويه جا انه حروحن بعيد ماشوفنكم بعد جا هوه كلب لو حجاره
- ههههه لااا كلبج ترف اعرفنه .. جا والدك والركص من الصباح لهسه شني .. توج تفطنتي
- موش هسه صارت صدك بعد هاي مشى الوكت
وما ضل بس الصباح واروووووحن وبعد ماشوفنكم لا جدتي ولا منال ولا انته خويه هناك وحيدي غريبه بينهم ومامش ربى وياي وتونسني
- لج عفيه كافي والله كلبي نمرد
- خاااب بسجن عاد سويتنهه ظلمه ... اسمعي خيه انتي موش غريبه هناك بعد هذول اهلج صارو
و همه وادم طيبين وعله مايج ماياذونج بشي شفتي شكثر يحبونج ومدلليج ... وعندج هناك المهرج وليد هاذ مايخليج تسدين حلكج من الضحك وهسه تشوفين شلون تونسين وياهم .. انه اكولنهه ليج
حيكضيهه طلعات وفرفره وياج واعرفنكم يومين والكاكم فوك راسي تسطرون بيه
- شني خويه جنك ماتصدك تخلص مني
- ههخخخ لج ياثوله لاااا بس هاذ الصحيح هالاغم مساع يكلي حسب حسابي اجيك كبل السبعه ماتحمل مانك فوك راسك
-ههههههههه
- شفتي يعني حيسوي درب بغداد العماره مثل راس الشارع يوميه رايح راد ماتحسين بفرك صدكيني .. وبسجن عاد بواجي هساع عيونج تنتفخ وباجر تطلعن جنج عتاوي
- عززززا لج زهره صدك باجر عيونج منفخه ميكعد عليهه المكياج
- لااااا يالله صدك !!!
- امشي نحط عليهن ثلج يلا يلاا كومي
كامن ركض راحن وهنه يتلمسن بوجوهن وانه خربت ضحك عليهن توهن يتباجن وسونهه مناحه تالي من وصلت ليم الوجه والمكياج لاااا هنايه كلشي يتغير خرب بعكولجن يالنسوان ..
انه كمت طفيت الضوا ونمت حيل تعبان وربى ادري بيهه ماتجي بعد ..
ثاني يوم سمعت صوت امي تصيح عله زهره وربى فتحت عيني وجان اشوفنهه هنايه يمي !
رفعت روحي شويه واشوفن ربى وزهره فارشتت ونايمات بالكاع يمي !!!!
- هاي شجابهن هنايه
- هاا يمه كعدت صباح الخير
- صباح الخير يمه
- جاي اكعد بهالدثوات هذن ومايكعدن ماتصيح عليهن بلكن يكومن
- شعندج من هسه مكعدتهن بعد وكت
- ياااومت يمه ساعه سته ونص والشمس شعلوهه
هم يلا يلحكن
- ادري شعدهن حوي !! هنه كحله وحمره يلغمطنهه ويجن عوفيهن هسه عوفيهن فد نص ساعه واكعدهن
- يلاا جا اعتمد عليك
- اي اي
راحت وانه ضليت متمدد واعاين ليهن .. صح انه مابينت هالشي لجن كلبي يوجعني عله روحه زهره هاي ريحه امي الضاله ليه وراح تمشي هالساع من جدام عيني .. لجن انه اعرفن بوليد يديرن باله عليهه ويسعدهه ...
دعيت ربي يريح بالهه ويطمن كلبهه ويسعدهه بحياتهه هاي صغيرونه البيت والمدللـه راح تفاركنه بعد بيتنه راح يضل هادي مابي صوتهه وهوستهه من الصباح ..
كعدت عله حيلي وشلت هالافكار كلهه من بالي ماريدن اضل افكرن بيهه واضعف جدام روحتهه
رحت كعدت بسد فراشهه لربى وتلمست وجهه وكرصت خدهه جان تكعد .. عاينتلي بنص عين
كلتلهه..
- ياحلوه صح النوم
- صباح الخير
- صباح العافيه .. كومي يلا وكعدي زهره
- اممممم شهااب بس شويه
- لاااا كافي يلااا ،، زهره خيتتتتتي يلا اكعدي
خلي نشبع بيج كبل لاتمشين
- خوووووويه لاتذكرني
- ههههخخخخ بدينه بالبواجي !! كومن يلا
كمت وشغلت الضوا وضليت ادعفس بالحجره لحد ما بزعن وكامن ...
تريكنه سويه وراحن يسبحن وانه رحت لابوي
شفته كاعد وضاربله صفنه من هاي المعدله
حطيت ايدي عله جتفه وكلتله ...
- ها بويه وين البال
- صارت صدك وخذوهه لاخيتك ياشهاب
- بويه كول يالله
- يالله يالله .. ربي يسهل دربهه ويحفظهه
من هالساع اكولن ليك لو هاذ صويحبك دك الناكصه وياهه اجي ليك واخذن الحك منك عبن انته الي جبته
- بويه انه واثق منه مثل ماعرفن روحي اعرفنه لاتخاف بنيتنه بايد امينه
- ان شاء الله يحفظهه ويداريهه
خذيتهن للصالون ورديت للبيت وضليت الهي روحي بشغلات بين مايخلصن ... وتالي خابرني
دزيت محمد يجيبهن كلبي مانطاني اروح ...
جنت بره وكت الاجوي .. وعاينتهه نزلت بالبدله البيضه وربى وعمتي وياهه .. ماتخيلتهه كبرت بهالسرعه وراح تصير عروس !!!
تلكوهه بالهلاهل والجكليت لحد ماطبت جوه
وجان وره شويه تخابرني ربى ..
- حبيبي تعال شويه
- عليش
- زهره تريدك ودتبجي
- يلا جاي
سديته وطبيت للديوانيه عاينتهه واكفه وحاضنه جدتي وتناشغ بالبجي وجدتي مامكصره تنعي وياهه ... اجيت وخرتهه ومسحت دموعهه وهيه حضنتني ..
- خوويه حشتاكلك يابن امي
- يابعد روح اخوج انتي وانه اشتاكلج ياخيتي ياصغيرونه يالغاليه
- شهاب موش تكطع وياي خويه موش تعوفوني
وحيدي هناك
- لااا شلون نعوف زهره بيتنه لاتخافين ولا تضلين تبجين بسج عاد هاذ يوم فرحتج موش جنتي تنطريه وتجهزين ليه شجاج هالساع
- شدراني انه هيج صعب هاليوم
- ماعليه شي خيه ماعليه .. لا تضلين تبجين هاد بسج تره ازعل عليج لا تحركين كلبي هيج
- لا خويه كلشي ولا زعلك
- اي عفيه .. اسمعيني زين .. اريدنج كويه ونبهه
وتحفظين صاحبي وماتخلي يكولن غير رحم الله ايد الربتج ماريدن يشتكي منج بشي وانه اعرفنج سباعيه تكدرين ترضينه وتكسبين اهله وتصيرين ام البيت بعد انتي النجره ياهو يجي مثلج
- ان شاء الله خويه ماتسمع علي الا الزين
- اكيد اكيد اعرفنج ربات ايدي انتي .. وخلي بالج
انه سندج اضلن لكطع النفس .. اخوج مايعوفج شتحتاجين صغيره ولا جبيره تشيلين تلفون وادكين علي ويمتى ما تشتاكين لينه وتردين تجين كليلي حته لو وليد ما يكدر يجي انه اجي اخذج وتطمني اريدن تطلعين منايه بضحكه موش دموعج تارسه وجهج وتهبطين كلب الزلمه وتخربين فرحته
زين حبيبه
- ماشي خويه
- يبعد اخوج انتي رفعه راسي والله رويحه الغاليه انتي
حضنتهه وهيه ضلت مجلبه بيه وربى تصورنه وتبجي والنوب كملتهه منال كاعده غادي وتناشغ
وجدتي من صوب ومحمد يعاين من بعيد لينه
عاد صحت عليهم ..
- شنننني ظلمتوهه علينه خاااب شغلن هالاغاني وافرحن كاضياتهه بواجي سودنتن البت الله يسودنجنج ان شاء الله تحركن عااااد .. منااال
امشي جيبي لاختج لكمه تاكلهه ... وجدتي بسج عاد سودنتيهن وين هوساتج وهلاهلج يله هوسيلهه وفرحيهه لا تخوفينهه هالشكل شلون اضل اعلم بيجن تحرررركن
عفتهن مخبوصات وطلعت رحت لحجرتي كعدت
واجتني ربى .. كضت ايدي ووكفت جدامي ..
- حبيبي ضايج؟
- لااا شعندي ضايج
- لعد شبيك ليش ممرتاح
- هيج مامش شي هذني مايعرفن يتصرفن مجابلاتهه ويبجن وانتي جنابج طابكه وياهن بالسره ماتكلن هالبت بلايه شي خايفه تجن تعاوننهه النوب !!
- ايي شنسوي كلوبنه رقيقه ماتتحمل ودمعتنه بسرعه تنزل
- هاي انتي هم ان شاء الله تكلبينهه هيج علي !!
- هههههه بعد حسب المزاج
- اسكطج وعلي بس تبجين
- لييييش
- ماتحمل دموعج
- اوووي حياتتتي
- بلا تنعوص موش وكته خليني مركز لاتسطريني
- هههههههه لعد اعوفك تركز اكثر
- ربببى خلي بالج روحه بزفه مامش موش الكاج ماشيه اول وحده وياهه
- شهااااااااب شنوو عفيه لاااااا
- وعلاااا وين تردين وياهم !! تكعدين يمي هناك اتضل الوادم تعاين لطولج شني بويه جايز منج انه وامشيج ويه كوم زلم وحريم غرب !
- مو كلهه حتروح وزهره تريدني يمهه شلوون
- شتريد منج بعد .. هاي امه محمد كلهه وياهه انتي شيلي ايدج من السالفه
- شهاااب
- رببببى شحجيت كافي سدي الموضوع
- افف مااشي ماشي
- وين رايحه
- اكول لزهره
- لااا لا تكليلهه هسه تصركع علينه عوفيهه هيه اصلاً راح تنخبص وماتدري منهو الاجه والضل
- امممممم
- ثوبج ضيج لا تطلعين بره بي حدج لباب الديوانيه زيييين
- صاير هواي ادقق تدري بهالشي!
- لين صرتي حرمتي يابعد جبدي ولازم انتبه عليج
وعله لبسج
- ديلا هسه مو مشكله خلي اروح اشوفهه محتاج شي !
- لا سلامتج
راحت وانه كمت بدلت وطلعت ... لحد ماخابرني وليد كال راح نوصل .. رديت ليم البيت وهمه اجوي .. جان جايب فرقه وياه وعلكو الجو
سلمت عليه ووصيته عله اخيتي ... وراح ليهم جوه .. وره شويه راح ابوي ليهم حته يسلمهه ليه
وطلع هو وياهه وعيونه تلمع بالفرح .. طكو هالفشك اخوه وولد عمه وخذوهه ومشو ..
ضليت واكف لحد مامشت كل سياراتهم وعاد طبيت جوه عاينت الوجوه رجعت ظلمت ماهتميت
مادامهه مشت براحه خلهم همه يحيرون بروحهم
رحت لحجرتي تمددت واجتي ربى يمي كعدت وصافنه ... كلتلهه ..
- كومي سدي الباب وتعاي
راحت سدته واجتي .. وانه وكفت نزعت القميص والبنطرون وهيه تعاينلي صفح .. ضحكت وكلتلهه
- خلي ناخذلنه غفوه شويه مانعستي. !
- ايييي وهم تعبانه
- جا يلا بدلي وتعاي خلي نام شويه بين مايصير العشه
- واهلنه !
- ماعليج محد يدورنه هالساع كلهه متصفنه
- هههههههه محسب حساب كلشي
هسه ابدل واجيك
راحت وانه طفيت الضوا وتمددت وانتظرهه تجي
جان اجتي امي وكالت ...
- ها يا شهاب شني نايم
- بعدني مانمت
- اكِلك هاي اكو وحده اليوم كالت يردون منال لابن عمه لوليد
- لااا لاااا لاااا بلا هالسوالف التعبانه كليلهم ماننطي خوات
— هاا هيج تكول
- اييي والي يرحم اهلج يمه لا تجيبون طاري زواج منال ابدددد مامش زواج للكليه زييين
- اي ماشي انه بس ردت اكلك شصار
- اي سدي ع السالفه ولا تحجينهه لاحد
ويمه لاتخلين احد يجي والي يريدني كليله نايم
- هااا جن المسعده راح تجي
- ههخخخ غير اريدن اشبع منهه كبل لا ينطلي ابوهه بهالليل
- لك استحي موش امهه هنايه وعماتك عييب تجيكم الحجايه
- ماعلي باحد طز باليحجي المهم راحتي انتي دبريهه من يمج يمه زيين كليلهم راحت لبيت الريم وسكتيهم
- النووووب تالي عمري اضمضملك حته تحضن
- جا شعندي غيرج يالغاليه
- ايي هاي اجتي يلا اروحن انه
- مثل ماوصيتج يمه موش تنسين
- اييي فهمت
اجتي ربى واشرتلهه تسد الباب وتكفله .. وتالي اجتي ليمي تمددت وخلت راسهه عله ايدي وكالت
- شنو شكلتلهه
- وصيتهه تسد حلك اليدورن علينه
- ههههه شكد عيييب كل فشلاتنه كدامهه
- شنسوي جا نضل محرومين
- امممم ... اشتاقيتلك ابو الشهب
- وانه مااشبعن منج دومي مشتاك
باستني بلحيتي وانه حضنتهه ازيد وهيه تشم بركبتي وتكلي ..
- هالريحه الطيبه منييين
- ماحاط ريحه وعيونج
- اووف يعني بس ريحه جسمك هيج حلووه شنوو انته
- هههه اعجبج
- اموووت عليك
- اعشكنج
ضليت شويه اتغزل بيهه شويه ابوس واشمشم لحد ما نمنه ... وكعدنه صوت امي تصيحني ع العشه وادك بالباب ...
كمنه تعشينه وتالي ابوهه دز عليهم حته يتحضرون وبظرف ساعه مشو ...
كضيت الايام عاديه بين شقى وليد وخباله وبين تلفونات زهره الي ماتسكت تنبش شكو خبر بالبيت لازم تعرفنه ... تطمنت عليهه مرتاحه وردت تضحك ازيد من الاول ووليد طاير بيهه من الفرح
كضاهه كل ليله بمطعم ومجان شكل وياهه وهيه تصور وادز .. مسودنين بنص الليل مااهجس الا مكالمه فيديو وتعال يضلون يسولفون ويكرزون حب ووليد يفطس من الضحك وجنه جاهل بعلي اذا اشترى قميص تعال شوف هاذ حلو اشتريته !
اذا سوت غدا ليهم يصور ويدز شوف اختك شطبختلنه اليوم .. وهاي تلفوني مايسكت يازهره ياوليد ...
وصار يوم السبعه مالتهم لو خبصهه للدنيه
اجيك لو تجيني ؟ كتله لاتجيني ولا اجيك انه مليت منك عوفني يكلي لا خلي نطلع انركل سوه شو ضجت وحدي ...
وتالي من اخذت الاهل لهناك نزلو وانه اخذته وطلعنه لكهوه ونزل النركيله ونزل دك سوالف
حلكه مايتعب ولا دماغه يخلص افكار للحجي
اخذتهم وردينه للبيت جان وياي بالسياره ربى ومنال وامي وام ربى .. وبالسيارات الباقيه عماتي وبناتهن وجعويطهن ...
ام ربى مارضت الا نوصلهم لبيتهم .. عاد وصلتهم وكملت لبيتنه ... وماتهنيت بشوفتهه ...
وره عشر ايام خابرتني ربى الظهر وره الغدا ...
- شهااااب
- ياروحي كولي
- عندك شي !
- لا ماعندي خير !
- اريدك تجي محتاجتك
- شكو شصاير وياج فهميني
- تعال واكلك حباب عوف كلشي وتعالي
- زين زين يلا هسه جاي
.
.
.
يتبع
💓💓💓💓
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!