رواية من فجر ديسمبر الفصل الحادي والثلاثون 31 - بقلم Zoka 🌷

من فجر ديسمبر
🍁
🍁
- شنو شنووو شفاهم
- ربى انتي عندج مشاكل بالعالم الثاني
- لاااا مستحيييييل انته مدري شنو عقليتك شهالخرابيط يعني لو اني عندي مشاكل مثل ماتكول مارحت تعالجت !! هاا شنو يعني ماكدر اكول للشيخ عندي كذا وكذا واروح واخلص ! لو انتظرك تجي تاخذني وتعالجني وتخلصني من مشاااكلي بالعالم الثاني
- كلشي بيج يخليني هيج اشكن بهالسالفه
- بس شكك غلط بغلط ولتجيب هالطاري بعد كافي تره بزعت روحي
- ربببى
- شهاااب
- كاااافي لكم غضب الله عليكم ماتكلون نايمه منهمده هالبت خلي يصبح الصبح وتكافشو جفو شركم عني غاد
- دشوف كتلك حتكعد
- خااب نامي نامي انه صوجي وكاعد يمج انهمدن اثنينجن
- ايي ننهمد
— والثووول اي والله

عفتهن ونزلت تمددت بحجرتي وانه افكرن بالسالفه اجيبهه منا اوديهه منا ماجاي الكالهه تفسير لجن هيه حجيهه صحيح .. يعني لو صدك عدها شي من هاذ جان الشيخ ماخلاهه وهوه يعرف كلش زين شعدها ماعدها جا شني الجاي يصيرن بيهه!!!!؟؟؟؟؟

غفيت عله هالتفكير وثاني يوم جان عدنه حوي
وطلعنه للزرع نحوي من الصبح والظهر اجه بسام وعمي حاتم تغدو يمنه واخذو ربى ومشو ..

اجتي ايام وراحت ايام وكضت بالمعارك بين ابن الشمس وبين ولد الشيخ لا هاذ يحب هاذ ولا يتصافون .. عاد الشيخ وكلني بي ووصاني ابعده
عن ولده حته تخف مشاكلهم عاد انه خليته يشتغل بالكياعين حته يلتهي واحاول اصدهم عنه والمجان الي همه بي مانروح ليه حته نعديهه بخير وسلامه

رحيم صحته رجعت ادهورت وضليت حاير بي
وماجان اله حل غير الكيمياوي وانه واخوه ناخذه للمستشفى ويضل هناك جم يوم ونطلعه ..

وبيوم انه جنت هستوني واصل لبيت رحيم وجاي اخليه ينام بجربايته دك تلفوني وجان محمد يخابر
وخرت شويه عنه وجاوبته ...

- هلا خويه
- كواك الله خويه انته وين
- بيت رحيم توني رديت من المستشفى
- زين بعد اخوك هد كلشي بيدك وتعال لينه
- خير شصاير
- والله ماضنهه خير ياشهاب .. هذول خوال ربى جايين وياهم شيوخهم المعكله وشكلهم ناوين النيه
الحك كبل ماتضيع
- يله جاي جاي

سديت الخط وكبل طلعت بلايه ماودع رحيم لو اتعذر منه عله طلعتي هالشكل كبل فتحت الباب ومشيت ... سويت الدرب شبختين وشفت السيارات ماليه الشارع والديوان مليان عكل .. كضيت كلبي بايدي لا تصيرن صدك وعلي احركنهم
عاد طبيت سلمت وكعدت واعاين بالوجوه
هالخال وابنه جايين وعمي حاتم وولده هم وعمامي كلهم كاعدين والشيخ رافع الحاجب وحجيه ثكيل
وياهم والي فهمته ان جيتهم ماصارلهه هواي
عاد هاذ الخال كال ..

- من رخصت هالوجوه الطيبه اليوم احنه جايين
الكم بطلب وندري بيكم اهل نخوه وكرم وماتردون ضيفكم ان شاء الله
- بالنكدر عليه احنه حاضرين
- تسلم ياشيخ كلك كرم وطيب .. انتم تعرفوني
وتعرفون سمعتنه بين ناسنه طيبه والكل تحمد بيهه وتشهد عليهه واني طمعاً باخلاقكم ونسلكم الطيب
واحنه اهل وبينه صله قرابه والدم يحن للدم
لذلك اني اريد اطلب ايد كريمتكم بنت اختي العزيزه لابني مؤيد والولد دارس وموظف ومتمكن وكلشي يوفرلهه مايقصر عليهه بشي وبدال ما كاعاده بوحدهه هناك وحايرين بيهه احنه بيتنه مفتوح الهه وان ماردتو ويانه عمي نبنيلهه بيت وحدهه وقريب كليتهه

من سمعت هالحجي الدم جان يفور بعروكي
واعاين للشيخ وهوه ساعه يعاينلي وساعه للخال
وانه انفخ باعصاب واعصر بايديه ومحمد يمي كاعد يهدي بيه عاد عمي حاتم كال ..

- انتم طيبين واهلنه وربعنه وانه اشهد والنعم من اخلاقكم ونشميتكم لجن بنتنه بعدهه مو مال زواج خلهه تكبر والله كريم

- عيني ابو بسام قبل حجينه وياكم وجنتو تكولون بعدهه خلي تعبر السادس وهاي نجحت وصارلهه
سنتين وماضل هواي وتخلص الكليه هالسنه نخطب وعلى الرابعه الزواج تريدون غير شي بكيفكم احنه حاضرين بس بنتنه ونريدهه باي ثمن جان

- ياجماعه الخير الرسول يوصي بالتفاهم والتراضي وتسهيل الامر ويوصي بصله الرحم
ومو حلوه بحق اهل الجود والنخوه يكفون بطريق
جمع راسين بالحلال ومادام الولد شاريهه وابن خالهه مو غريب وتعرفونه والقريب اولى من الغريب سلهه ياابو بسام

- احنه نعرف انتم خوالهه واهلهه لجن بنتنه
مانجبرهه عله شي نسالهه وبراضتهه

- ياشيخ احنه كلنه اهل ديوان ونعرف هالحجايه شتعني احنه اليوم مانطلع من ديرتكم الا وقارين الفاتحه

- مو هيج الحجي ياابو مؤيد كلشي بالتفاهم

- واحنه متفاهمين وياكم وعلى الراس حجيكم وكلشي تريدونه بس هالسالفه طولت صارلنه سنين نحجي بيهه ومامحصلين منكم جواب وهالمره حقنه نصر على جواب منكم لان العمر ديمشي ياشيخ والولد كبر ويريد يتزوج ليش واكفين بطريق زواجتهم البنيه منقصين عليهه شي شايفين منه شي مو زين شنو التريدو واحنه ماكلنه حاضرين انطونه سبب

- من رخصتك شيخنه ومن رخصت عمامي والحاضرين انه اريدن ارد جواب ليك ياابو مؤيد

- اي كول شنو جوابك

- البنت بنت عمي وانه ناهي عليهه ماتصيرين لغيري

- شننننني شهاااااب

- عمي لا شني ولا غيرهه بنت عمي وانه انهي عليهه وجوابكم ماعدنه بنت للزواج والبت حرمتي انه وماارضى بحجايه ثانيه ينجاب بيهه طاريهه

- ابوووو بساام شنو الديصير هذا شنو لعب جهال هووو يعني ماكو احترام مااكو اخلااق بيا عصر احنه وهذا ابنكم جاي ينهي وكدام الكل

- هااااي اهانه النه اذا ابنكم رايدهه ماحجى من قبل ليش من تجي قسمتهه ينهي ويعترض هاي حجه منكم طلعتوهه

- شهاااب شني هالسويته هااااااااذ من يمتى صاير ماتحترم ديوان وشيوخ

- عمي انه ماسويت الا الواجب

- لانعل ..

- ابو بساااام

- شيخ ماتشوفنه شيمسلت هاااذ بنص هالزلم شني هيج بنتي هينه ولعبه بادينه يجيب وينهي جدام الكل

- الكل تكععععععد وتسمع هالجلمتين ...
انه سكتتت وعفتكم عله مايكم واشوفن الظاهر
انتم مامنكم واحد يعرفن يضبط اعصابه ويتحجى
بالزين .. جلمتين وتنسد هالسالفه عاد مادام السالفه بيهه نهوه صارت مابدينا شي بعد كل الحل والربط بيده هوه بيد شهاب ان فج هالنهوه البت الكم وان لا ماعلينه حك بعد ياجماعه الخير

- يفجهه شنو هي تايهه

- ماافج النهوه انه البت الي وكتلك حرمتي لا تجيب طاريهه

- انججججب حرررمتك شنوووو

- لاتجااااوز محترميك لين انته ضيف وجبير
مو لين ماعرف اردن عليك

- ابووووبسااااام احجيلك شيييييي

- شهااااب ابني مو سالفه عناد هاااي فج النهوه وخلصنه واليرحم والديك

- ابني شهاب بعد ابوك انته رايدهه للبت لو بس تريدينهه عناد

- لااا بويه انه رايدهه وجنت اريدنهه تكمل دراسه
واحاجيكم عليهه لجن هاليحط عينه عليهه افكسهه ليه والنهوه مااافجهه زييين

- اشووووو تفج هالنهوه ورجلك فوك رااااسك
شهااااب اختي مو مااااااال مذله وعناد هيييج

- لك من يمتى حااااط عينك عله بتي يااااامصخم
من يمتتتتتى !!!! ليش تخليني اطلعن من طوري
لاااا تجلطني شهاااااب بنتي عزيزه ماتصيرن نهوه احد فج عننننننهههههه

- تعذرني عمي ماافجن عنهه ونهوتي عزيزه عندي ازيدن من ماعدكم وهاي جلمتي ماتتغير
لو تحطون الجيله براسي هسه مااتنازل عنهه
اودعناكم

عفتهم وطلعت والصياح وصل لراس الشارع
انه كبل رحت مشيت لكاعي بعيده عن الهوسه
وضليت هناك كاعد وصافن واحاجي نفسي
يعني هالربى صارت نهوتي!!! وين الله وابو الحسنين وهيج تدبر سالفتي وياهه

جنت فرحان بهالشي عبن كسرت خشمه لهالمصكوع وشفت شلون الشرار يتطاير من عينه
وحطيت حد لكل واحد يفكر يتكرب ليهه هسه لو بعدين وكل اهلنه عرفو انه اريدنهه حته مالهه مفر مني الا اليه ...

خابرني محمد جاوبته ويمه صوت صياح عمي حاتم وولده ..
- شهاب الشيخ يكول بساع اريده جدامي يجي
- ههه يلا جاي

رحت امشي بهداوه وجانو الجماعه ماشيين
وبس عمامي والشيخ بالديوان ..
اول ماطبيت مالحكت اكول السلام واجاني بسام
ووجهه يلهب نار
- شهاااااب اختي موش للعب شني بكيفك تنهي
لاااتخرب الي بيييييينه شهاااب لاااتضل شاب هالنار بينه

- اخيي هالنار اطفيهه بهداوه وامان اختك ما يصيبهه الا الخير وياي وهيه موش لعبه بايدي
هيه عزيزه روحي

- لككككك انجججججب انججججب لااتتتتحجي هيج علييييههههه جددداااامي لاتجييييب طااارييهههههههههه لاتججييييبه

جان يتهجم علي ومحمد يفاكك بينه واحنه نتلاوى
وجان الشيخ يصيح بينه وفكينه عاد

- ماااتستحون انتم مااتحشمون ماتحسبون حساب الجبير هناااايه تخانكون وتصايحون بنص ديواااان
ياعيبه العيبه اااااي والله احنه ولدنه تذابح بينهم
هييييج تالي الربى

- ايي ياخوي اثارينه ماعرفنه نربي عددددل
شهااااب الجماعه و مشو وهسه كلنه اهلك
فج النهوه وابعد عن درب بنتي احسن ليك

- عليش عمي شني ماتنطيهه ليه

- من تصيييييرن ادمي انطيك تضل برعونيتك هااااي تحلم تشوفن اظفرهه

- عمي هاااذ حكي وماعليه رعونيه والبت ماتريدن ابن خالهه عليش مجلبيلهه

- وماتريدنك هم

- اااانه شغلتي وحد

- شنننننني وحدددد شنيييي انته تريدن تضل معلك بتي هالشكل وموكف قسمتهه علللليييييش بوووويه
هاااا عليييش

- عمممي ماموكف شيييي البت ااااانه شاريهه
وتعرفني كلش زين مااعيل وياهه بشي وماكصر عليهه بماي عيني اداريهه

- شهااااب فج النهوه ونحجي

- مااافج النهوه البت بنت عمي واريدنهه والي يدنالهه احركه بكاعه اذا ماتعرف اعصابي ياعمي
فاانه اعرفنهه زين ومن اكولن احركه يعني احررركه

- ياااااامنذر كض ابنننننننك تره مصخههه وماريدن امد ايدي علييييييه كله يفج عن بتي لااااوحك علي اسويههه مو زينه وياااااه

- يوووووليد شجااااااك ماتشوفن عمك محترك وشايط باعصابه عليييش تزيدن عليييييه تريد البت نكعد ونحجي بيهه مثل الوادم

- لااا بويه لااا انته تعرف شي وانه اعرف شي

- والعبباااااس حكومن اكضي بيك التوووبه

- بسسسسسكم عاااد بسسكم

- شيخنه

- هششش ولاااا جلمه انه احترمتك ازيد من اللازم
بسسام امشي طب جيب اختك وتعال يلااا بساع

- شتريد بالبت خويه

- الحيااااه حياتهه وهيه بايدهه توكف هالمهزله هااااي وخله يسمع منهه بااااذنه واريدن اشوف شلون مايفج نهوته

- خلهه تجي وتكولن مااريدنه واشوفن شلووون بعد يضلن مجلب ليهه

- وحك هالخله النفس بهالريه وقسسسسسم بمن احل القسسسم هالنهوه مااااتنفج لووو انكم تكطعوني وصل لووو هالتفكه تفرغهه بصدري
ورااااسي مااااافجن عنهه وسووو التردون تسوووه

- شهاااااااااااااااااااب

- لااااااا تتتمرجل عليييينه ياااشهاااب كااافي تخطططيت حددددك

طبت ربى بهالحظه ويه بسام وراحت وكفت يم الشيخ وتعاينلنه عاد الشيخ كاللهه ..

- شمسه بويه سمعتي بالصاااار
- اي شيخي سمعت
- شنهو ردج ليه كليله خلي يسمع ويرتد
- بويه ربى احجي وخلصينه عاااد تره شيب كلبي من هالسالفه كليله خله يولي من دربنا
- لووو مو انهه تحجي هالنهوه تضل من هاليوم ليوم موتي وانه اقسمت بعد
- مااااتحجين انتي شني عاجبج الوضع
- عادي النهوه بايده بس الزواج بايدي
- شنننننني
- اي شسويله يعني هسه واذا نهى هذا شي لا يقدم ولا ياخر عندي يبقى ابن عمي واحترامه موجود
وبنفس الوقت اني اثق بي وادري انه ماراح يسوي شي يعرضني لاذيه او مذله فخلي يابه مادام عاجبه يضل ناهي عليه اني ماعندي اي مشكله وياه لان بكل الاحوال سالفه الزواج هي شي منسي عندي
فوجود النهوه ماياثر بشي على حياتي .. كيفك
ابن عمي هذا قرار راجعلك  ان ردت تفك النهوه او لا ومثل ماسمعت انك اقسمت فتحمل مسؤوليه قسمك ....
لاتضوجون عادي هسه قابل شصار يعني
احنه اهل ومحلوه بينه المشاكل على اسباب تافهه
مو صح شيخي لو شتكول

- ههههههههههههه من اكلكم شيخه ماترضون
صح يابويه صح ورب الصح هسه ياابو بسام
تهدا بالرحمن وريحن كلبك والولد ابنه شني
خما يذلن عرضه ويجيبن ليهه الاذى هو هم شاب
مثغف ويعرف الاصول والشباب هالايام بسوالف
المحبه والزواج يعاندون ويركبون راسهم خلي
الامور تهدا جم يوم ... وانته ياشهاب يا عنتر زمانك تعاااال تعذر من عمك وحب  راااسه يلا جداااامي يلااا

- حاااضر شيخنه شعندي انه غير عمي تاج راسي
وهاااي حبيت هالراس

- امشششي وخر عنننني انه مااطايك اشوفنك جداامي

- عمي شني والله مااريدن ليكم الاذيه لجن هاذ احسن للكل صدكني هذولاك راح يضلون يحومون فوك البت وانه اخافن اسويلي بليه بيهم عبن ماكضن رويحتي عنهم اعرفن بنفسي زين

- شهااااب

- اي شيخ

- جدااام عمامك كلهم اكولن ليك ان سمعت او شفت بيوم ضايكت شمسه بشي لو انك ضليت
تجبرهه عله شي او تحكم بيهه بشي خااارج عن كونك ابن عم ليهه اكصن رجوووولك واسكطك
وماايوكفني عنك حته ملج الموووت فهمممت

- ماتوصي حريص شيخنه انه عندياهه غاليه
وماازيدنهه الا غلا وعزه وانه اعوفنهه براحتهه
مالي شغل بيهه لحد مايجي اليوم والي توافك بي
برضاهه عله الزواج

- حيييييل راااايح بعيد هوه ياااهو الينطيك

- كيفك عمي لاتنطي انه هم مااجبرك كيفك
لجن انه عندي شرط

- شننننني النووووب تشرط علينه فوك هاذ كله!!

- اي جا موش تريدون مني اضلن بعيد وهاي انه لبيتكم انتم هم لبوني

- اي شني شرطك بووويه

- لو بعد مليون عام ربى ماتطب بيت خالهه ذاك
وان سمعت جاي هالمصكوع وشايفهه لو هيه
مخليته يحاجيهه لو كد سلام ماتلوموني بشني اسوي زييييين

- لااا مو زين شهاب تره يبقون خوالي يعني شسنو اكاطع خوالي !!!

- اي تكاطعين خوالج

- لااا مااكاطعهم الولد اني مالي دخل بي لا قبل ولا هسه ولا بعدين بس خالي اني مااكاطعه وعندي بنات خال وعزيزات عليه وهمه اهلي مثلكم وهالشي مرفوض

- وااانه عله مثل ماكالت بتي خوالهه مالهم ذنب شني تكاطعهم والله حضرت جنابك ماترضى

- انه مشكلتي ويه ابو عين زايغه مالي شغل بخالج
فهمتي

- هاي اذا عليه فهو اصلا مشايفني قبل حتى يشوفني بعدين واظن هالشي موجديد عليك

- جااا خوش مدامج حذره من هالناحيه زييين
هايهيه متفاهمين انتي خليج بحياتج وانه بحياتي
وبس يصيرن شي من هاذ الحجيته ذاك الوكت
محد يلوم بشي

- اممم

- استغفففر الله يعني شني بتي تضل معلكه بييييك
هالحجي اااانه ماارضاه شيخنه

- ابو بسااام ياخوي احجيهه ليك من الاخير انه
هالخوال من يوم يومهم مافاتو هالدماغ وبنيتي ماانطيهه ليهم ولو انهم هالنوبه احرجوني عبن
شيوخهم جثير وانه معروف باحترامي ويه الكل
وانحطيت بموغف محرررج وطلع شهاب هاي
ريحه كلبي من ناحيتهم عبن جنت خايف لا ساعه الساعه وتكولن اي انطي

- خويه همه الجماعه ماعايلين بشي والوليد انه اشهدن عليه زين وابن اوادم جا انه هم اخافن عله بتي بكعدتهه وحيدهه هناك وهمه بيت خوالهه موش غربه

- هالحجي مايوكلن خبز عندي هاي مثل ماكملت هالسنتين تكمل الباكي وهيه كاعده هناك معززه مكرمه وكلشي يصل لرجولهه ماشكت من شي
بكعدتهه لا تاخذوهه سبب موش سبب هاذ وانه
من زماااان مفكر لشمسه غير تفكير واذا تكولن عله هالقسمه زينه اجتي كبل الاحسنين منهه
ومارضيت بيهم ولا حرضى الااا بالي اباااالي ااانه ومثل ماامفكر ليهه يصيرن وحته انته ياشهاااب
لا عبالك بنهوتك هاي البت صارت ليك تره انه ساكت وراضي بس حته اطلعن من وجه خوالهه
ولو جان الوضع غير وضع اكص لسانك ساعه الحجيت بيهه فخلهه بالك سلطتك هاي مصلحه لينه موش شي ثاني

- شيخنه انه اليهمني هذاك يكطع نفسهه منهه وشتريدون تسون بعد هاي كيفكم كلتهه الكم
انه مالي دخل بيهه بشي بحياتهه تضل ماعلي بيهه ان رضت بالزواج عسى ما بعد خمسين سنه اتزوجهه وان مارضت كيفهه

- لجن خلهه بالك يوم الي اكولن انه تنفج هالنهوه
ماتناقشني بحرف واحد وكبل تفجهه يوم الي يصيرن الي براسي ماريدنك تعرضلي وان عارضت وسويتلك بلبله جيله واحطهه براسك ومايرفلي جفن عليك عبن انه عندي شمسه ومصلحتهه وحياتهه اهمن منك ومن كل هالدنيا

- ماشي من يجي هذاك اليوم نتفاهم ويصيرن الي يرضي الشمسه

- زين وهسه اريدنكم تراضون يلا عاد جفونا هالسالفه طالت انتم ولد عم واخوه ماريدن شي يتغير بينكم سمعت يابسام هاذ ابن عمك انه رايد الي سواه واضنك فهمت كلشي ماحاجه اعيدن كلساع

- فهمت شيخنه فهمت

- اي جا يلا تحاضنو وتراضو يلا عاد ماريدن بعد مشاكل وينجاب هالطاري نوبه لخ يلا عاد فضونه
وانته ياابو بسام تهدا تهدا والي كعده وياك ونتافهم

- الله كريم

- شيخي من رخصتك اني اريد اروح ماله داعي بعد وجود خلص الحجي

- اي بويه اخذي راحتج وماريدن شي يضيك بخاطرج شمسه الي صار لمصلحتج حبيبه

- عين العقل قرارك شيخي واني راضيه بي وافهم مقصدك وين ولا تخاف اني هالشي مايأثر عندي
وتعرفني كلش زين هالامور ماتاخذ اي اهتمام عندي بس الي اريده رجاءاً يعني ماريد بسبب الي صار اليوم تصير فد حزازيه بين الكل يعني خلو الوضع طبيعي مو بعدين اشوف واحد وجهه ثكيل ع اللاخ ومحد يطب لاحد هالشي هو الي راح يضايقني

- لاا يابويه انه ماارضى اهل بيتي وجوهم ثكيله بينهم لاتهمين ولا تخافين شيخج يحلهه

- عسى الله يخليك النه كل هالعمر مادامك موجود اني مطمئنه .. هسه من رخصتكم

- الله وياج بويه

مشت من جدامي ولا عاينتلي وطلعت مثل مااجتي بكل هداوتهه .. انه كل يوم يزيدن اعجابي برزانه
تفكيرها وثقتها بنفسها وقراراتها وتحكمهه باعصابهه والهدوووء الي ساكنهه هاذ عجيييب

تراضينه انه وبسام وضل عمي بعده مثكل وجهه وياي عاد طلعنه وخلينه عمومتي لوحدهم وياه
ومشينه انه ومحمد لوحدنا ...

- خويه والله انه ماضنيت راح تنهي و الشيخ يرضالك مبخوت عمي
- لمصلحته خويه موش حبن بيه ماسمعت شكال
- يجوز هوه يريدنهه ليك لجن ضامهه لبعدين
- لاااا مستحيل هاذ انه اعرفنه تفكيرهه وتفكير شمسته واحد واثنينهم مايردوني اعرفن شيردون كلش زين
- شنهو الي بالهم
- خليهه لوكتهه ياخويه خليهه
- انته ماتدري هالحجايه طشت بكل السلف ووكت الطلعو خوالهم مشو زعلانين والشيخ حته ماكال جلمه وحده الهم عافهم يمشون بكيفهم وهمه زادو نار وصياحهم رج السلف رج
- حييييل يستاهلون والله انه كبل نبهت عليه هالمصخم لجن مانرد وهاي تاليهه خسرته الاول والتالي
- وشراح تسوي وياهه صدك حتعوفنهه بكيفهه
- اي انه من زمان مااجبرتهه عله شي خلهه براحتهه تجيني
- شني اليخليك تثك بهالشي
- عبن حبي طاهر ليهه يجيبنهه ياخوي موش هالسنه بعد عشره او عشرين مايهمني اهم شي
اشوفنهه جدام عيني وبخير وهالمصكوع مايصلهه
هاي كلش كافي عندي
- وانته ياخوي شني توكف حياتك علمودهه ماتتزوج تضل ناطرهه
- جااا انه انهي واروحن اتزوج شني السالفه
لك هاي عزيزه كلبي مااذيهه حته لو انهه ماتريد الزواج الهه اسبابهه ويجي يوم وتخلص هالاسباب واخذهه اذا تزوجت انه حخسرهه
- والله سالفتك طويله ياشهاب
- اعرفنهه طويله وخلهه ماعندي شي انه
- الله يسهل ان شاء الله

من رديت للبيت سمعت بيت عمي حاتم ماشين
وتلكتني زهره ..
- ياشهاب صدك السمعته نهيت عله ربى !!
- اي
- عزززا بعيني عزااا لك خطيه البت شمسويتلك
- زهره سوالف جثيره ماتعرفينهه عوفي السالفه
- شني الي ماعرفنه ياخوي !!!
-زهرررره
- خويه ماتجيبنهه ليمنه جا مو صارت نهوتك عليش مخليهه بعيده غادي خلهه هنايه بينه وهيه شويه شويه تعلم عليك وترضى بعادكم هاذ ما منه فايده
- لج انتي ثوله لو تستثولين شلون اجيبن البت
- اي ياخوي اعقد عليهه سيد وجيبهه بينه وعود لا تكربلهه خليهه يمي وياي وياي تضل
- انتي صدك ماعندج عكل لااا بالعباس هنا حشيش بالجمجمه موش دماغ
- اي شني ياخوي شني حشيش
- جااا لوانج عندج عكل وتفكرين ماكلتي شلون اكسر هالبت واجيبنهه هنايه شني اذا هيه ماراضيه تزوج والشيخ وصى وحجه وابوهه مناك ينط كلساع وسريدن يشربن من دمي واخوهه حامي
وهيه البت بذات نفسهه ماتريدن زواج شني اصدددك ماسمعتييييي الحجي
- اا لاا سمعت لجن مو كلشي
-خااااب ميلي مني ميييلي انه عايزني دوخه راس
امشي حضريلي الحمااام يلااا بساااع تحرركي
- اي خويه تااامر

جنت اهجس راسي مسطور وعركان عاد طبيت سبحت وضليت جوه الدوش مغمض وواكف وبالي صفيته وضليت بس اسمع صوت الماي هديت وريحت جسمي وطلعت كبل رحت نمت ...

بهالنومه شفت امي جايه وتدور علي انه من شفتها حضنتها وضليت اشمن بيهه وهيه كعدت وحطت راسي بحضنهه وضلت تمسدلي وتلمس وجهي وتضحك وانه احاجيهه ماتردلي بس تضحك وعاد فزيت عاينت الفجر طر .. كمت صليت وقريتلها
الفاتحه وضلت بالي شمعنى هاليوم شفتهه بالمنام

عاد طلعت وشفت جدتي كاعده وحاطه الجاي يمهه
- صبحج الله بالخير جده
- صباحك عافيه ياايمه شلونك
- الحمدلله بخير
- شني هاي مسرحيه البارحه عليش هالشكل سويت
- جده شني جا ترديني انطيهه لخوالهه
- جا وشبيهم خوالهه ناكصهم ايد رجل
- جددده واليرحم اهلج لاتجيبين طاريهم
- اكول يامصيوب فد لا تطلع هالحمراويه هاي بالك من زمان
- ههههه جدده كولي يالله
- كوول كول بروح امك موش هيه هاا
- اي هيه جده
- وانه امك يامنذذذر جاا ماتحجيت ماكلت اجيبنهه من اذونهه لرجليك عليش ساكت وهيجت الوادم علينه
- جده البت محاجيهه وماترضى بالزواج وانه كتلهه سدي السالفه بعد وسدينا عليهه لجن انه كلبي يهواها وماكدرت اشوفن احد يحجي بطاريهه ولو ضال ساكت جان عمي زوجهه لهالمصخم هذاك
خلف الله عله محمد خابرني وكلي تعال الحك لو متاخر جان هسه طارت من ايديه
- اي زين ماسويت يايمه دامك نهيت عليهه تجيك تجيك ويجيهه يوم وتكنع لجن هاي شويه راسهه يابس وشايخه عبن الشيخ معلمهه عله الدلال والابهه ماتجي بالهين ياوليدي
- خلهه تدلل عسل عله كلبي جده
- ياااامدولب جاا دامهه عسل عله كليبك عليش تكافشون كلساع ماشفتكم يوم متصافين دومكم تناكرون يمتى اشوفن الهداوه بينكم ماعرف
- والله ياجده ماعرف انه عليش هيج ماكضن روحيتي عن الاعصاب وياهه كبل جلمتين منهه تشعل اهلي
- هااي جيف ما جايه بايدك خلهه تصير حبيبتك وشوف شلون تكوم ادكلهه ناعم
- ههههههاااااي الله يسمع منج جدده
- مستخف حرااااام موش ذاك الاولي
- الحب ااااخ ياجده دولبني
- اااهي دولبه جا غير انته المفلفل عليه هوه شكو
- جا غير جنه حبهه جده
- ماتكلي شحبيت منهه كومه بنيات احلى منهه
بس كول ايه واجيبنلك اغاتهه
- جده ياهو اليجي بجمالهه وين اشوفن مثل عيونهه وذاك النمش جنهه زبده تسيحن رويحتي شتحجين انتي يابنات ياصخام انه قافل عله هالبت لو اعيشن عمرين هم مااخذ غيرهه
- تهي بهي دامك متسيح بهالزبده عليش احجي بعد واتعبن لساني خلك منا لما تموع وتخلص
- هههههه احبج يامطررره ... اجيت اكلج شي
- اي شنهي
- اريدن اليوم تسون ثواب غدا للوالده وانتي اشرفي علي جده اخافن هاي العكربه تسوي
من ورا خشمهه  وتخلي سم علينه
- لاااه شني اكصن لسانهه تسوي ورجولهه فوك راسهه شني هم الهه عين وتحجي وانه موجوده
- يابعد رويحتي ياجده منهو اليكدر عليج انتي
ياشيخه
- صح كبرنا والحيل موش الاولي لجن الجلمه الشينه ماتعبر عندي .. شتريدن ثواب ؟
- شيجي من ايدجن انعم الله لجن خلنهه سفره
ثكيله وانه حعزم عمامي للغده وبلاخص هالحاتم بعده شايل علي بلكت يرضى
- اييي تسويهه عصفورين بحجر
- لاا تخافين ماتجي اعرفنهه
- جا حسب حسابك منا وهيج مامش طلعه وطبه لبيتهم وشوفاتك حتكل ليهه
- هسه انتي الا تحركين بكلبي جده خليني ناسي
- يايمه سوده بوجهي كلبك يتحرك ماعيشن انه
كون
- لااا عمرج طويل ان شاء الله بس انتي هم هذا حاتم ليني علي بارحه يكلي ماانطيك جا انه ابن اخوه ماينطي لجن للبعيد ينطي
- مااعليك بي هاذ طيب كلب جلمتين يكنع لجن انته هم لا تسويلك كلساع بلبله وياه خلك هادي ورزن جدامه وانته تريد هالزواجه تتم اربح كلبهه وهيه
تجرلك هالكوم كله وراهه طايعين ويرضون بحجايه الوحده
- جاا هوه انه شموكفني غير كلبهه بانيتله سور الصين منين اعبرنه مااعرف
- لك يمصيوب يا مدوهر خلك فطن لاتعبرن السور خلهه هيه تفتحلك الباب من ساعه التشوفك مثل مابالهه هيه بايدهه تفتحه ليك واطببك وتعيش بي بوحيدك بس العبهه عدل لا تضلن تصيح وتعيط عليهه يااامصخم البنيات يكرهن ابو اعصاب الفايره وهاي جنهه ثلجايه تضل تحرك باعصابك وتشيطك وهيه ولا يمهه السالفه عبن تعرف شلون تهدي نفسهه موش مثلك جلمه والثانيه وكبيت نار جيبها بالمسايس وانته ابو لسان الحلو
ماتعرفن تضحك بعكل البنننيييييه !!!!
- هههههههخخخخخخ جده من كثر حبي ليهه انه ماكضن اعصابي وياهه
- عسى الله يفرجها عليك يايمه
- امييين

بعدهه كعدت تريكت و طلعت للزرع افتريت شويه
ورديت للبيت حته ابدل هدومي واطلع لنعيم اشوفه
شلونه .. انه معلك صوره امي فوك جربايتي
بحيث اول مااطب الحجره اشوفنهه وهالنوبه من طبيت ضليت صافن بيهه واتذكر الحلم عاد ردني
الحنين لايامهه وكعدت اذكر تفاصيلهه وتذكرت
اغلى ثاني شي عندي منهه من بعد زهره طبعا
هيه غاليتي الاولى والثاني هو عود امي هدتيناه
من نجحت من الابتدائي جان هذا ملك ابوهه وهوه نطاه ليهه وكت تزوجت وكالها وارثي لابنج وانه
تعلمت اعزف عليه وجان دايماً يرافكني كل مسيه
واكعدن انه وياهه وكت ماجانت حامل بزهره
واعزفلهه عليه لجن من يوم ماتوفت وهيه وفاتهه صارت بعد ماجابت زهره بشهرين عبن هيه صحتهه تدهورت من يوم الولاده وصار عدها نزيف وضلينه بيهه بالدكاتره لحد ماوافتهه المنيه

انه اعتزلت عنه وضامه لهذا يومي مادكيت عله وتر منه لجن اليوم حسيت الحنين هاج ليه ورحت
طلعته وجريت الريشه وكعدت تلمست اوتاره واجيت اعزفلي لحن الجنت احبن اعزفه ليهه ودمعتي غلبتني ..انه حيل مستاحش بدونهه من ذاك اليوم لهاليوم ١٨ سنه وانه اهجسن فاركتني البارحه ..... خذته رديته لمجانه وبدلت وطلعت
لنعيم وضليت كاعد يمه تغدينه سويه وتشاقينه
وحجيتله عله الي صار البارحه وهوه شجعني عله خطوتي هاي ...

انه عرفت من صارت هالنهوه بعد مالي كعده وياهم بغداد يعني ذاك الشغل راح .. فتواصلت
ويه جماعه وصرت اشتغل  بمختبر اهلي هم
اخذ عله الشغله واشوفن شني الي يفيدني والي مايفيدني وشلون استخدم كل الاجهزه والاسعار
حته اضبط شغلي بين ماافتح مختبري ....

وراحت ايام واجتي ايام وانه مااشوفن ربى الشوك كاتلني عليهه لجن هيه تجنبني وكل حجيهه وياي لو لاكتني عله كد السلام ...

ورجع الدوام وراحو لبغداد وانه اتفقت ويه جماعه عله اجار حجرتين بعماره بالطابق الارضي
ووصيت عله الاجهزه من تركيه وجان لازم اروحن اسوي اجازه من وزاره الصحه وابلش بهالمعامله ...

وطلعت من الفجر لبغداد وهناك كضيتهه روح لهاذ وتعال لهاذ بهذلو حالي وماكملت عاد طلعت وجاي
اريدن اعبر الشارع للكراج حته اخذ السياره عبن
جنت حاطهه بعيد وجنت بعدني ماواصل الشارع
حته اعبرن للصوب الثاني جان يدك تلفوني
عاينت هاي ربى جاوبتهه وجان صوتهه مخنوك

- هاا ربى
- شلونك شهاب
- بخير انتي شلونج
- زينه انته وين
- بالشارع خلي اعبر الشارع واخابرج بس اجيب السياره
- لااااا لا تعبر خليك وياي
- ربى شبيج بالشارع انه وصوت سيارات وهوسه
خلي اصعد بسيارتي واحاجيج
- كتلك لاااا ضل وياي اريد احاجيك هسه بشي مهم
- استغفر الله بنتي شمالج فهميني
- شهاااب حباب روح عله جهه بعيد عن السيارات
لازم احاجيك هسه
- يلاا هاي رجعت من الشارع احجي شعندج
- هوو يعني
- ربببى احجيلي شني الي بالج يلا
- شهاب اني
- حسد الخط تره يلا احجي تره راسي مسطور من الصبح لهسه لاتشلعين كلبي
- لاااا لا تسد الخط خليك وياي
- ..........
.
.
.
يتببع 🙂🙂 شلوني بالخباااثه 🙂