رواية من فجر ديسمبر الفصل الثلاثون 30 - بقلم Zoka 🌷

من فجر ديسمبر
🍁
🍁
ضليت بالديوان لليل كاعد .. عاد من مشو الجماعه رحت للبيت وصحت عله زهره ..
- ها خويه
- ربى كعدت ! رحتي شفتيهه شلونهه
- خويه والله ماعرفن شبيهه جنهه سكرانه تتطوطح هنا وهنايه صعدت اشوفنهه وكلت اكعدنهه تتعشى
هيه بس تكعد تون تون وترد تنكلب بغير جهه تنام
وترد تفز عاد انه خفت صراحه عفتهه بعد ماصعدت ليهه
- زين زين

عفتهه ورحت لحجرتي ذبييت الدشداشه ولبست
بجامه مريحه وكعدت بره بالحديقه ادخن وصافن
بالسمه وبالي يمهه صوتهه بالتعبت بيه هواي اشياء تحسرت حته اعرفنهن ...

شفت ابوي طفى الاضويه مال بيت كلت هاي
كلمن راح لحجرته ينام ...عاد طفيت الجكاره
وطبيت غسلت وصعدت عله كيف ..
دكيت الباب خفيف جان تطلعلي زهره ..
- ها خويه
- فوتي وسدي الباب
-هاي سديته خير شني شصاير
- ااا شني رايج نبدل اليوم بالاماكن
- شنننني ؟؟
- اي انطيني حجرتج هالليله ونزلي لحجرتي
- ياااه شني خويه تريدين تنام يم البت موش عيييب
- زهررررره تنزلين لو شلووون
- ماانزل اضلن هنايه يمكم
- والعباس حملص اذاناتج مو مال عيني واغاتي انتي الج دكيكتين تاخذين هدومج وتنزلين وياويلج اسمعلج حس لو احد يدري بيج وروح امي اسكطج
- يممممااااي النوب انه اتسكط من وره معاشكم
اروحن احسن ليه
- علكيفج نزلي وقفلي لباب الحجره ولا تجين الصبح واليسال علي كليله طالع زييين
- زين خويه زين بس انته هم ديربالك ع البت ها خطيه لا تسويلهه شي
- خااايبه انجبي شني راح اكلهه امشي ولي يلاا يلا
- اخذ راحتك خويه وين الله ويجي يوم واشوفنهه بحجرتك ومريتك
- صوووتج فضحتينه امشي نزززلي
- هههههه نازله نازله

طلعت وضليت واكف اشوفنهه من الدرج تطمنت
محد شافنه ورديت للحجره قفلت الباب وضليت اعاينلهه وهيه حاطه ايدهه عله عيونهه ونايمه

مشيت رحت فتحت الشباج وشلت البرده شويه
خليتهه عليه وفاتلنه الهوا الطيب بهالليل وريحه الزرع المندي تهدي الروح .. طفيت الضوا وضل
بس ضوا الكمره بالحجره ..

اجيت اروحن ليهه وشفتهه كعدت وكاضه راسهه
وتبجي كعدت جدامهه ورفعت وجهه اعاينلهه هيه ما صاحيه وواعيه لجن عكلها صاحي ويخليهه هالشكل وهالشي يزيدهه تعب فوك تعبها عبن اعرفن هالحاله قاري عنها ..
رجعتهه للمخده واجيت تمددت بسدهه ورفعت راسهه خليته عله ايدي وحضنته حيل وهيه تبجي
وتون عله كيف ضليت امسد عله شعرهه وحاضنهه لصدري ومخلي رجليهه بين رجليه
شعور الراحه الي بيه وهيه بين ضلوعي صايره
ماتنوصف .. بحيث انه بساعتهه نسيت كل هالدنيا
وبس هيه بالي اهجس روحي وحيدي وياهه بهالعالم ... من راحت شعوري بكربها هالشكل واطمئنان گلبي وياهه مازارتني اي رغبه او اي فكره ثانيه وياهه وهيه بين ايديه جنت كل الي اريده بس هالليله تطول ويضل هالامان وياي

صح انه كبل ماانام ولا تغفى عيني الا وانه اتخيلهه باحضاني وافكر باشكال الشغلات وياهه لجن من صارت صدك ماشغل فكري غير بس اريدن انطيهه الامان واشيل ولو شي بسيط من خوفهه وكوابيسه العايشتهن ...
جنت امسد عله شعرهه واقرالهه ايه الكرسي وافرك راسهه من فوك حواجبهه وبين عيونهه
ولامست رموشهه الي كل عمري احلمن بيهن وانشده بشوفتهن ...
كل لحضه وياهه جان عگلي يكول لكلبي هيه هاي الجنت تدورهه هاي امانك وگلبي يرد عليه بفخر
ويكله بنيتي داريتهه سنين بحب ودعاء جبتهه بميه ركعه صلاه وسنين صبر من الوحده والغياب
بيهه حسيت بذاك الدفو الجنت احسه بحضن امي
وضحكتهه ودعائهه الي وين ماروح .. ملت صدري راحه وحسيت هذاك الحب كله المدفون بصدري من سنين كله هاج حنين الهه وكل هالسعاده وشعور الحب الي جنه طير ويفرفح
بالقفص جان هسه تحرر وضل حاير شلون يرفرف جناحه بطريقه تشبعه من ايام حرمانه
كلهه ختمتهه ببوسه عله عيونهه .. وهيه هديت ورجعت لنومهه عاد نزلت جسمي شويه وصرت حد بحد وياهه وضليت اعينلهه بكل تفصيل بيهه
واخذت ايدهه البارده وحطيتهه عله وجهي وكلساع اكربهه لشفتي ابوسهه وارجع اخليهه عله لحيتي
هنايه احبن نغزات البروده التصير بوجهي من بين شعر اللحيه الخفيف .. تخليني اهدء واسكن يمهه
كمت شغلت الضوا وجبت تلفوني واخذتلهه جم صوره بهاي نومتهه ....
كربت وجهي لوجهه وغمضت عيني وضليت اشتم نفسهه وغفيت عله هالحال تالي حسيت عله صوت
يم راسي فتحت عيني انداريت مامش شي بس انه
سمعت شي وحسيت بي !! تعوذت من الشيطان
ورديت تكربت يمهه بستهه من راسهه ويم اذانهه
عاد صارتلي نفس هذيج التصفيره بالاذن هيج تصير الاذان عبالك تنسد وصىت بيهه مثل الصفاره ... كعدت عله حيلي واتعوذت من الشيطان عاينت الساعه ٣ ونص استغربت هالجاي يصير ... رديت تمددت يمهه وسحبتهه لحضني
وغطيتهه وياي وغمضت عاد حسيت عله ايدهه
تشد عله بلوزي رفعت راسي عاينتلهه عاكده حواجبهه وشفايف ترجف عاد حطيت راسي عله راسهه وحضنته اكوى خليت يصير راسهه بنص ركبتي وايدي محاوطه ظهرهه ومغطيهه وجنت
اقرالهه المعوذات وامسد عله ظهرهه لحد ماهدئت
ضليت بحيره وخوف عليهه شني الجاي يصيرن ليهه هالشكل شال حالهه ...
بعدين كمت اتذكر كبل هم مجانت تنام واشوفنهه بالليل سهرانه وبالنهار تشتغل بس مجان باين عليهه التعب مثل هالمره ؟؟؟
بغداد شفتهه تسهر مرتين وجانت تضل تقرا للامتحان ماشفت مثل حالهه هسه !!!
هم غفيت شويه وسمعت صوت طركعه عاد فزيت
كمت فتحت الضوا مامش شي وحته هيه نفس نومتهه عاد عاينت من الشباج واشوفن بزازين
تتمالخ وصوتهه عالي كمت عاد سديته ونزلت البرده وطفيت الضوا ورجعت نمت وحضنتهه
وضليت عله هالحال للصبح يا يفززني صوت
او احسن اني لازم اكعد لو يفززني ونينهه
ليله وحده صبحت تعبان وراسي مسطور الله يساعدهه شلون هيج كدرت عشر ايام !!!
ماكدرت انزل جسمي تعبان وعيوني تاذيني
منايم وشفتهه هيه هم شكلهه مو مال كعده عاد
غطيت راسي ونمت وهيه بعدهه راسهه عله صدري ...
هالنومه صارت براحه وماكعدت بيهه لل٤ العصر
شفتهه منداره للجهه الثانيه عاد كلت يجوز كعدت
رفعت نفسي شفتهه بعدهه نايمه عاد تكربت وحضنتهه من وره والي تفاجأت بي ووكف كلبي للحظه انهه رحبت بهالحضن رده فعلهه جنهه منتظرته عاد وره ماتاكدت انهه بعدهه نايمه موش واعيه انه حاضنهه كربت راسي لشعرهه وشميته
وضليت حاط راسي بركبتهه شويه وهيه اندارت
انه من حسيتهه تحركت وخرت ايدي منهه بس هيه اجتي كربت راسهه عليه وجانت بايدهه تتلمس ادور الغطى عاد جريته وغطيتهه وهيه سوت حركه بجتافهه وكالت .. امممم خليني هناك
عاد ضحكت وجريتهه لحضني وانه حاط ايدي
عله خصرهه واحاجيهه ...
- وين هناك
- هنااك حلو
- بحضني
- اممم
- تحبي
-اممم
- اروح لو ابقى يمج
- لا تروح
- انتي وين هسه
- مكان ابيض بعييد
- شتشوفين هناك
- بعيد ودافي مابي صوت كلش بعيييد
- ووين وين هالمكان تعرفين انتي وين
- كلش بعيد ابيض وبعييد
- هههه يرويحتي تسمعيني
- ماكوو هنا هذاك ماكو

ضحكت وفرحت انهه مرتاحه بحضني وتحس بامان بي واعرفن هيه موش بوعيهه وتحجي
غالب عليهه التعب وباطنها يحجي بلا وعي منهه

كربت خشمي عله خشمهه وايدي عله خدهه وهيه مثل الذايبه باحلامها ... عدلت شعرهه وجريتهه
لحضني ازيد وهيه متجاوبه وياي كل ماكربهه ليه تاممم بصوت احلى من الكبله ...

عاد سحبتهه وخليتهه فوكايه رد فعلها جان حلو
بحيث حاوطت ايدهه من يم جتفي وانه اضحححك
ياريتهه تكعد وتشوف نفسهه شمسويه واشوفن عصبيتهه وخبالاتهه الي اطك ...

جريت الغطى عليهه لحد جتافهه وجان كلبي  يدك سريع عبن ملامسه جسمهه ويه جسمي هيج مادري شعملت بيه جانت شفافي متعطشه لشفافهه
بهاللحظه مو شهوه لجن اريدن امزج هالحب بيهه
اخلد هاللحظه بلحظه هيام وياهه .. جنت امشي ايدي عله طول ظهرهه الحلمت بي ايام واياام
هالظهر الي سلبني عگلي وسودني بيهه ومليت ريتي من ريحتهه الي دايماً تخليني ارتخي واصيرن حبيسهه ..
اعرفن انهه ماتسمعني واذا حته سمعت فتكعد كلشي ناسيه بس الحجي الي بصدري هاج اله يطلع

- لو انج تعرفين شكثر انتي ساكنتني وشكثر انه وضخامتي وهيبتي وصوتي العالي انهز جدام طولج حبج سودني بيج خله كل ما بعيني انتي
وكل احلامي جلمه وكعده حب وياج .. منهو هاذ العاف ليله وراحته وباك نفسه من بين اهله حته
يضلن وياج ويحاوطج بحنانه .. يخاف عليج من افكارج الي مايعرفهه لجن ماهمه شي غير شلون
يخليج تنامين براحه اااوف لو انج تحسين وتعرفين شنهو الي انه اسويه علمودج وماتضلين تجابليني بالجفا والصد والبرود الي يجرح وانه كلهن نسيتهن لخاطر. عيونج يا عيوني انتي يااول نسمه حب بهالگلب ....

هجست ارتاحيت شويه من حجيتلهه وهيه عله
صدري نايمه مجرد كربهه هالشكل جنه اليه
حته لو انهه ساعات وتكضي ويرجع البعاد بينه
بس هالساعات تحييني عمر ببعادهه ....

جان تلفوني يدك وانه مسويه هزاز جريته وشفت
نعيم يدك عاد جاوبته بصوت ناصي
- ها نعيم شلونك
- هلا خويه
- هلا بيك
- شبيك هاي انته وينك طريت السلف طول وعرض من الصبح ومالكيتك خلف الله عليك جاوبت
- خير صاير شي
- شبيك تهومس بالحجي وين انته
- بعدين ماكدر احجي هسه اذا صاير شي كول
- شني فهمننني وينك صاير وياك شي جماعه يمك
احجيي
- لك خا انجب جاي اكلك بعدين
- وين بس فهمننننني
- والعباس حسد الخط كول شعندك
- اريدن احلق وردتك وياي نروحن سوه
- خاب والغسسل اي والله امش امش كطعت علي
الجنه علمود حلاقه ماجي روح وحدك
- لك هااااا بيهه جنه يعني يم بنت العم مووش صحيح
- الله وياك خويه
- ههخخخخخخ الله يخليلك جنتك روح تهنى

سديته وانه اضحك واخافن تهتز بطني والنوب
تكِعد عاد ضليت اكطع بالضحكه واكتم بيهه

طكني الجوع صارت ساعه سته وانه لا ماكل ولا شارب حته حضرتهه تنام مرتاحه عله صدري
الي من تكعد راح تنكره وتصيحلي اكرهك

عاد كلت هاي صارن يومين وهيه كطره ماي ماحاطه بحلكهه وانه متاكد هيه مجانت تاكل هذيج الايام من التعب .. عاد سحبتهه بهدوء ونومتهه
بصفي وغطيتهه زين وعكست ايدي وسندت راسي عليهه وضليت اتحارش بيهه حته اكعدهه
العب بخشمهه واكرص خدودهه وبشعرهه كل شويه انثره عله وجهه وارجع ارفعه واحاجيهه
منا لحد مافتحت عينهه ضلت مركزه تعاينلي
جان شويه وجفلت ورجعت لوره ..
- هاي شجابك هنا
- ههخخخخخخ اجيت اكعد ياحلوه الدنيا صارت ليل واحنه هاي ثاني يوم
- عزاا بعينك يمه جفلتني
- ليييش جفلتج شني جني جدامج
- مادري بالي راح بعيد
- خاف جنتي تحلمين بيه
- يااحلام شبييك
- ههخخخخخخخخ اي اي هوه انه هم ادري
- شنو شتدري
- هههه مامش شي
- شهاب شكو احجي مبين من وجهك اكو شي
- بعدين تعرفين
- شوكت يعني
- من تكومين تنزلين وتصحصحين وتاكلين حتعرفين كبل
- عزاا شكو دحجي
- كومي يلا انه طكني الجوع من وراج
- ياا واني شعليه
- هسه مو جاي اكلج كومي شني ماشبعتي نوم
صار يومين
- افففف بعدد هسه انته شكو تكعدني منو كلك اني جوعانه ليش متعوفني اناااام
- انزلي اكلي ورجعي نامي يلاا شو جدامي كوومي
- اي اييي زين هسه بيش ساعه
- سته ونص
- حييل هاي من العصر البارحه لحد ليله اليوم
اني على نفس النومه
- ههخخخخخخ والله لو تعرفين
- ياااا احجي الله عليك شكو شنو حاجيه شي بنومي وماادري لو شنو
- ايي حجيتي اشكال
- جذذذذذذب شحجيت كلي امانه
- كتلج انزلي اكلي وتعرفين اذا اضلين هيج
نايمه مااكلج شصار
- يلا ماشي راح انزل بس تكلي مو تغلس
- لااا صار ادللي
- امم مادري ليش اشك بهالدللي
- هههههههههه حنتظرج جوه واليسالج كليلهم
جنت مريضه وتعبانه زين
- زين

كمت فتحت القفل عله كيف وطلعت عاينت من الدرج كلهم بالديوانيه عاد نزلت بهداوه وطلعت من باب الوره البيت ورديت مناك لفت واجيتهم ..
- هااا كوواكم الله
- هلاا خويه هلاا عيني
-هلا بيك يمه وين جنت نشدت عليك من الصبح ومحد يعرفن وينك
- جان عندي شغله جده كضيتهه واجيت
- هاااه الله يكوي حيلك وليدي
- يابعد حيلي انتي شلونج شلون عافيتج
- الحمدلله كواكه موش عافيه كبل
- ايي كلشي اله زمانه جده هسه اجه زمان اتضلين تدللين علينه واحنه نداريج ونوفيج حك رباج لينه
- يايمه من لسانك الي يكطر عسل
- اي جده نيال مرته عليه
- ههههه هااا زهره شو جنج كالبه علي اليوم
- لاااا شعندي وياك خويه
- جا شني اخيتك صدكت جا مرتك الف هنيالهه
عليك يايمه عزيز ابن عزيز تاخذه
- وهيه هم عزيزه جده
- هاااا جنك منيشنلك وحيده يامصيوب
-  جا حطب الثلاثين ومانيشنلي عله وحيده شكلولج علي جده جا  انه هم كلبي رجيج عله البنيات
- اااوف منك يامدولب ماينعرف صدكك من جذبك
جا مادامك منيشن ماتروحن تمشي عليهه شتنتظر المهدي يمشيلك !
- لاااا خلي اكون نفسي واروحن امشي عليهه
- ااااي عفيه بوليدي هيج اريدنك تكض ايدك وتبني عايله كافي مسرسحه كل يوم بمجان تزوووج واستكر وخلنه نفرح بوليداااتك جا شعدنه غيرك
احنه هم نريدن الفرح يطب بيتنه
- بحيل الله جده انتي ضلي ادعيلي صبح ومسيه تسهل سالفتي
- ان شاء الله بكوه الله تيسر امورك والعباس يوكفلك يابعد بيتي وطوايفه
- الله يسمع منج .. شني ماتحطون العشه
- خويه بعد وكت عله العشه بعد ماموذن
- انه جوعااان امشي اخذي اختج وسون الاكل يلا
وشوفن هاي بنت عمجن ماكعدت
- لاااا خويه تدلل هسه اروحن ركض ليهه خطييه
تعباااانه جانت اشوفنهه شلون صارت
- اييي عفيه بالسباعيه خياتي وين اكو مثلجن يرحلجن فدوه بنات هالسلف حطلي اكل زييين
وخدرن جاي مهيل وثكيييل اريدنه عبن راسي يوجعني شويه
- يااه يامصكوعات فلك طرجن كوومن جيبن الاكل لاخيجن ماتشوفنه شلون تعبان ووجهه كاضي غادي اصفر كركمه سوده عليه يدك شغل
وانتن هنايه خده وراحه وتاليهه تمرغلن عليه
-اي جده اصفراصفر وجهي دايخ انه دايخ مدري شجاني يمكن جيف ماتغديت دايخ اااخ راسي دايخ
- يايمه صخام بوجهي يايمه ضال عله لحم بطنك
هسه تخرب وتوكع
- اي جده هيج بطني تصوصي مابيهه لكمه وحده
تعاي فرجيلي هاي راسني ذبحني وجع اااخ وجع يسطر جده جيف ما كليت شي
- يااا مشعولات يا مصاكيع كوووومن كاضياتهه تصفن واخوجن يتلوى من الوجع كوومن جيبن الاكل بساااع لا بالعصايه اكرضمنجن بيهه يلاا
والغسسل اي والله وحدتهن هايشه زمانهه ومابيهن كل منفعه .. انه بزمانهن جنت هيج هاها زيبك
بصخرتي اهلي مايهجسون الا الصينيه انحطت وانشالت ولا كلت اخ ولا ايخ ولا هسه هاللمجلباتلي بيهه كل ماادزهن بشي وهسسسه
- ابسطيهن جده طالعه عينهن شني مايصتخرلج
كسرلج راسهن
- لاا يبعد عوينتي خطيه هنه هم جويهل بعدهن
- تووج تحجين عليهن
- لاا هم كايمات بواجبي خطيه لا تاذيهن يمه
هذني البنيات زينه بهالبيت يضونه وضعيفاات
حااال وكلوبهن رجيجه عله الاذيه تهدا وياهن
- يلاا هاي لخاطرج مااسويلهن شي
- اي يبعد رويحتي هيج اريدنك حنيييين ويه خياتك
- اي جده تااامرين

طبت ربى سلمت عليهه وبوستهه واجتي كعدت بسدهه وانه حاط راسي بحضن جدتي وهيه ع الصفحه الثانيه ..
- شمالج ياعويني هيج وجهج ذبلان ومصوفره
- مريضه شويه جده
- سوداا عليه يايمه جا ماخذتيلج ادوه اكلي بنيتي اكلي الاكل يجيبن العافيه للبني ادم لاتضلين صامه حلكج عن اللكمه
- لا والله جده اكل
- جا شمالج غاديه يتلولح بيج جنج عصا ماتصيرين مثل هالهوايش هذن العدنه وحدتهن ماتطب الباب من المتن
- هههههههه خطيه منيلهن هالسمن
- شني منيلهن غير وحدتهم تاكل الاخضر واليابس والوجه اهلعرضه والزند يكد راسج مرتين يجي
جا خماهن مثلجن ينكنكن شوفيهن شلون كويات ومتعافيات وحدتهن تطبكج وتحطج جوه باطهه
وانتي ضلي مسنحه ونايمه ولا اكل ولا شرب
- ولا يهمج جده هسه اكل مال ثلاث وجباب
- خلي اشوفنج بله شلون تاكلين والعباس ان ماكليتي مثل مايعجبني احطن الماعون براسج
- لااا وعيونج ادللي امسحهن مسح
- لا تخافين عليهه جده هاي صايره بالاكل ابوهه ماتعرفه
- ااي صلاااوات رادلهه هلهوله
- جده شو بطلتي ماتفرجين راسي موش كتلج ياذيني
- يبعد رويحتي نسيتن انه هالمدولبه طيرت عكلي عبن انه فكري يجيبن ويودي عليهه اكولن شجاهه هالبت ماتنصح وتعافى
- هسه عوفيه شبيهه هاي جنهه اسد كلشي مابيهه انه خطيه اااخ منايم زين رااسي
- اي ياجده هاي جاي افرجلك ايه
- شبيك ليش منايم
- ههخخخخ تكلي شبيك ااااخ اااخ
- هااا شهاب يعني هم رجعنه
- وين جنه احنه حته رجعنه شحجيت هسه انه
- شنو نسيت شكتلي
- لااا مانسيت انتي اكلتي
- لا بعدني
- اي اكلي ونحجي عايل وياج !
- لاااا
- جاا سكتي شويه خليني اصفي بالي
- اممممم
- وسم
- متكدر ادك بكلبك اذا متكولهه
- انتي هم ماتعرفين تحجيلج شي براسه خير شعلتي اهلي بيهه مكافي عاد
- يوووو واني شسويت هسه جده شوفي بس يلح وياي
- انتم عمركم ماتصافون لاا وحك محمد ضلو تهامشو ضلوو
- ههخخخخخ مافزعتلج
- اممم ولا فزعتلك هم
- انه ماريدنهه تفزعلي اعرفن افزع لروحي
- اي بعد احسن
- فرجيلي جدددده هذول وادم تسطر الراس
- اممم ياعيني خطيه

اجني البنات مدن السفره للعشه عبن انه استعجلتهم بي .. وكامت ربى تساعدهم وكعدنا عليه ركبه ونص وراهه شربت الجاي وكمت اريدن اطلع
انه هستوني عبرت باب الديوانيه بعدني بالكراج
جان تجيني ربى وعيونهه تجدح .. عرفت وكاله الانباء زهره طشت الخبر ...
- شهاااااااب
- ااااانه ماعلييه انتي كلتلي ضل لاتروح
- شنو كتلك شنوووو صاحي انته صااحي شلون تنام يمي منوو سمحلك
- والعبااااس انتي سمحتيلي جا انه من كيفي اضلن
- مااااكو هيج لتلوفهه عليه ماحجي هيج اني لو مو نايمه لتذبهه براسي
- بووويه وحك علي والحسين والعبااااس انتي
كتليلي انه سالتج اروح لو ابقى كتيلي لااا تروووح
عاد انه ضليت
- وااانته شجابك يمي شجاابك شصعدك اليه
- جا غير اتطمن عليج
- هسه اني عاتبه عليك ماااريد لا تطمن مااريد
- يله منا وهيج ان شاء الله
- لك حتخبلننننني ليش هيج سووويت لييش
- بويه هسه شسويت متكليلي هنه حضنتين وانتي جلبتي بيهن
- لك عزااا بعينك شدتحجي انته شدتحجججي ياحضن هذا يااصخاام
- هههخخخخخخخ اكلج السالفه موش مال هيج وكفه امشي نشوفلنه مجان نكعد بي عبن اكو شغله اريدن اسالج عليهه
- ماااريد احجي وياااك بشي عووووفني
- كييفج لا تردين بس انه ماحجيلج شصار ياام الابيض
- ياابيض عزا بعينك لك ياابيض شنوو شدتحجي
- تمشين نحجي لو لااا
- امشييي امري لله امششي
- تعاي نكعد بالحديقه

رحنه كعدنا بالحديقه ع الثيل وانداريت عليهه كلتلهه ..
- انتي تعرفين انه ضليت يمج الليله كلهه مو
- اي حجتلي زهره ومن وراك ضلت تسالني كلساع شسوالج وشحجيتو وشلون نمتو يعني حطيني بموقف ماانحسد عليه
- مايهم هيه زهره قابل مني
- هسه دفهمني شنو
- احجيلي شمالج هالعشر ايام شنهو الي صايرلج
وانه احجيلج
- شهاب هيج يعني شويه تعبانه واجاني ارق
- لتمشيهن علي هالارق لو انه صدك جان نمتي
بهالمنوم الشربتي
- يعني شنو اني مانمت !
- لا مانمتي جنتي تكومين تونين وتبجين وتردين تغفين وتردين تكعدين نوميش هاذ
- عزااا يعني حتى هيج
- ربى هو شنهو الصايرلج احجي اعرفن سالفتج جبيره خليني اساعدج لا يروح يصيرلج شي
- ماكووو شي شبيك هسه شفت صايرلي شي هنه كلهن كم يوم وراحن
- يعني ضاله مصره عله حجيج
- ماعندي غير هالحجي اصلا
- زين زين اجي وياج انتي تعبانه وعندج ارق موو
- اي
- زين انه شبييييه !!
- شنو انته ؟؟
- ليله البارحه ماضل صوت ماكعدني من نومي
وهالتصفير الي باذاني يصير كل مااكربلج شني هاذ شتفسري ولا تكليلي مادري ومدري شني ولا انه المتوهم انه ليله كامله افزن عله نفس الشي !!!

جانت صافنه وفاتحه حلكه وبعدين مسحت وجهها بايدهه وتتهرب بعيونها مني ...
- يمكن هم صار عندك ارق كلشي يصير
- ههههخخخخ شايفتني جاهل وتضحكين علي
- شهاب رجعني لبيتنه
-شبيييج يابيت بنص هالليل
- داكلك رجعني لبيتنه ضجت اريد ارجع
- لتجذبيييين كااافي جذذذب كاافي حطي عينج بعيني وفهميني شجاي يصيييير
- ماكو شي
- ربببى
- يعني هسه انته شكو تجي يمي شكووو عوفني اريد اموت خلي اموت يريد يصير بيه شي عوفني لاتتقربلي منو عاتب عليك وكلك تعال احضني بنص الليل ليش تتصرف من كيفك شلون شهااب فهمني شلون شسوي بهالمصايب
- هاااي انتي شبيييج فوك ماجاي اريدن اطمنج وازيحن همج تره انتي ماجنتي تشوفين نفسج شلون جاي تلوبين وحته زهره خافت وماصعدتلج بس انه كلبي يمج وضميتج بصدري وادعيلج وانشرلج بهالايات الليل كله عله بجيج وتاليهه هيج تجازين صدك وحده ماتستحين
- عوفني وحدي عوفني
- جاوبيني شني الصارلي ولييييش واعوفنج
- مادري
- الا تدرين ونص بس انتي تضلين تكتمين انه حعوفنج عبن روحي بزعت من حجيج اليغث
لجن اي شي يصيرن بيه مسؤوليتج فهمتتتتي!!!

ماحجت شي بس هزت راسهه وانه عفتهه وكمت طبيت جوه وضليت اروح واجي واعاينلهه من الشباج حاضنه رجلهه وصافنه .. طلعت رحت لبيت نعيم وضليت سهران وياه رجعت نص الليل
وطبيت لحجرتي شويه وجان تندك الباب فتحت
طلعت ربى واكفه وكاضه راسهه ...
- خيرج
- الشريط مال بارحه وينه
- كافي مو زين هيج كل يوميه
- شهاب فدوا راسي يوجعني
- بس هو مومال وجع راس اخذيلج حبايه براسيتول اذا راسج يوجعج
- ماااريد اني اريد اناااام انطيني حباب
- ربى شسالفتج فهميني موش كبل ساعتين تكليلي. ارق وراح شجاج هسه !!
- شهاب لا تزودهه عليه اني اعصابي تلفانه الله يخليك انطيني وخليني اروح انام واجفيك شري
- ماانطيج واريد اشوفن شتسوين
- افففف افففففف

دارت وجهه وراحت صعدت سديت الباب ورحت تمددت وبالي يمهه شبيهه؟؟؟ غفيت شويه وفزيت
ساعه ٣ ضليت اتكلب ومااجاني نوم .. كلت خلي اصعد اشوفهه نامت لا !!

صعدت ورحت لحجره زهره فتحت باب علكيف ومالكيتهه .. كلت ردينه للاكشن ...
نزلت كبل للحديقه ودورتهه لكيتهه كاعده وره البيت ومنتجيه ع الدنكه وصافنه رحت كبل كعدت يمهه وكلتلهه ...

- هاا مانمتي

عاينتلي بتعب ودارت وجهه وهيه متجتفه وصافنه
- شجاي يصيرلج ربى فهميني
- انته يرادلك حيل وخلك واني تعبانه عوفني
- شمالج تعبانه من شنهو تتعبين غير افهم
- شهاب تريديني اموت !
- اسم الله شهالحجي
- لعد كافي تضغط عليه
-  زين زين ،، انتي لو ترحين تتمددين بلكي تنعسين وتاخذج النومه
-  مااكدر
- عليش ماتكدرين النوب
- جربت ومكدرت مامرتاحه مثل البارحه
مادري هالحبايه الي اخذتهه خلتني هواي ارتاح
وكعدت نفسيتي مرتاحه وراسي زين حتى نومتي صارت مريحه هالمره
- هههههه لج بويه هاي انه موش الحبايه
- يعني هسه تريد تقنعني حضنك هو السبب !!
- واذا قنعتج. !!
- شلون
- انه اجيت اكومن العصريه وانتي بلايه وعي تحجيين وجلبتي بيه لاتروح اسالج انتي وين هسه
تكليلي مكان ابيض بعيد اكلج شلونه وشبي تكليلي حلو ودافي وبعييد
- عزااا كافي كافي اسكت عفيييه شلون بيه حتخبل والله لا بالنوم مرتاحه ولا بالكعده شسوووي
- ههههخخخ بذمتج شلون جان هالمكان اوصفيلي
- ههه اني جنت اشوف شي يشبه غيمه ترفه واتلمسهه شمدريني هذا انته
- ههههههههاااي شفتتتي شلون انه مؤثر
- ههه شهااب
- يروحه كولي شنهو التردي وحاضر
- الحبايه
- عليش ماتردين الحضن بويه والله الحبايه ماتشتغل بدونه
- شهاب شنو حضن شنووو
- اي شكو. شكووو شبيهه يعني بايكين ناهبين
- ماريد شكراً
- هسه وتالي شلون حتضلين كاعده للصبح ولج
بنتي هالاتج راح تصل لحلكج شوفيلج جاره
- ايييي كافي تحجي عليه يعني هسه اني عايزه
- امشي كومي وياي انه اعرفن شلون انومج
- شهاب اذا تتجرىء بشغلات ماارضاهه عوفني
- خااب كومي كووومي هوه انه الاريد اتجرا بي ماخذذ اذنج كوومي وياااي
- ماشي ماشي

طبينه وخليتهه تصعد كبلي وانه رحت اخذت القران عدنه واحد صغير اخذته وصعدت ليهه
طبيت وسديت الباب جانت زهره نايمه وهيه تحوص هنا وهنا ...
- تعاي افرشيلج هنا
- ليش مو يم زهره !
-  لااا تعاي هنايه احسن
- امم

جابت بطانيتهه والمخده ونامت جدام المبرده
اجيت كعدت يم راسهه وانه احاجيهه بهمس ..
- حخلي هالمصحف جوه راسج واريدن تضلين
مغمضه عينج وماتفكرين باي شي واي شغله تخطر بالج مو زينه وتعبج كبل اضغطي عله ايدي زين
- يعني راح اضل كاعد ماتنام !
- من اتطمن عليج نمتي براحه انزل انام
- ماشي
- يلا غمضي ولا تفكرين بشي
- شكراً لاهتمامك هذا نجاك ونجاني من هواي امور
- مثليش
- مثل راحتك
- مافهمت
- خلي نام نعست
- اي يالله نامي نامي
- اممم

ضلت شويه وحسيت عليهه غفت ماهلي اعوفنهه وانزل عبن مشتاكلهه ضليت كريب منهه واشتمن
عطرهه واتلمس شعرهه جان دفعتني بحركه مفاجاه بحيث انه ضليت صافن هاي شكعدها؟؟

عاينتلي ونفسهه عالي جان تهدا شويه وكالت
- نام شهاب الوكت تاخر
-شني هاذ السويتي هسه شيسمونه بله !!
- يسمونه لاتتقربلي حتى ماتشوف شي ياذيك
- انتي عليش تنكلبين كل ساع شكل حته صوتج يتغير شبيييج انتي فهميني
- صوتك لاتكعد زهره ماكو شي شهاب شبيك انته تضل توهس بيه يعني اني ماحب تتقربلي هيج وتستغل اني نايمه وماحس عليك
- بس انه ماسويتلج شي
- شنو ماسويتلي شي؟
- اي كلشي ماسويت بشنو انه تقربتلج هاا كولي
- يعني والسويته هسه شنو
- اي انتي كولي شني سويت يله
- تره حسيت عليك لا تلوفهه عليه زين
- اذا كد كلمتج كولي هسه شسويت يله اريد اشوفن شني هالشي العظيم السويته وهيج تصرفين وياي
ييييله احجججي شني سويت
- انته مو حضنتني مدري طخيتني هيج او تلمست شي مني
- هههه جذابه هاي احتمالات وكلهه غلط بغلط
وتره حبل الجذب كصير هاي انكطع حبلج انه
لا حضنتج ولا سويتلج شي
- لااا سويت
- اي شسويت هاا اني عله نفس كعدتي ودنجت
شميت شعرج هاي هيج احساسج شغال ماشاء الله وتحسين بخشمي من يشتم ؟؟؟؟
- استغفر الله شهاب خلص سد الموضوع اسفه ع الصار شويه اعصابي تعبانه
- خلي الاعتذار يفيدج ومشي هالسوالف عله
اهلج موش علي الي انه حافظج وفاهم شجاي يصيرلج
- شنو شنووو شفاهم
- ربى انتي عندج مشاكل بالعالم الثاني
.
.
يتبع !!!!