رواية من فجر ديسمبر الفصل الثاني والثلاثون 32 - بقلم Zoka 🌷

ظمن فجر ديسمبر
🍁
🍁
صوت هوسه وبجي وحجي ماافرزنه شني كلشي
غواشه بعيني وايد تهز جتفي عاينت وركزت زين
اشوفن اخوي محمد ويمه ابوي وعمي حاتم جيت
ارفعن جسمي جن سجين ونخزت بخاصرتي وحلكي يابس ماكدرت احجي حرف واحد ..

جنت مغمض واخوي عدل نومتي وشربني ماي
عاد كدرت افتح عيني واعاين زين للحواليه كلهه
متجطله هنايه والنساوين والجهال تتباجى ..

- شني الصار خويه
- يمعود الله نجاك بقدره قادر هسه انته بينه وتحجي .. طكت سياره مفخخه ع الشارع الي يم
الكراج ربك رحيم ياخويه الله يعلم شني مسوي من عمل وربك حبك عليه وحفظك ماصرت وصل حال هالوادم غادين لحم بالشارع متنثره
- الله يرحمهم الحمدلله عله كل حال
- ابني شهاب يابويه كطعت نياط كلبي بطيحتك هاي ثلاث ايام انه جارع المر عله جرحك يابويه
- شني من يمتى انه هنايه
- من ثلاث ايام ماصحيت ضلينه اول يوم ندور عليك بالمستشفيات لين مالكيناك احنه لاايد التنشال ولا رجل كاضين كلوبنه بايدنه عاد تالي لكيناك
هنايه بالكندي جانو كبل ساعات مطلعيك من العمليات
- عمليتيش
- شظايا بخاصرتك وفخذك مطلعيهن
- اكولن شني هالينخز بيه جنه سجين
- الخياط ياخوي جرحك بعده اخضر
- جا عليش ماصحيت هالايام
- ماعرفن كالو طايح راسك عله شي وضارب هاي بنهايه الجمجمه مدري شسموهه بس هيه
مسؤوله عله الوعي واحنه هالضلينه مجابيلك وكاعدين ونحمد الله عله طلعتك منهه بسلامه
- الحمدلله انتم شدراكم انه وين
- ربى كالت لابوهه جانت تحاجيك هيه ؟
- اي يمكن ماذكر بالضبط يمتى حاجتني
- اي هيه كالت جنت احاجي وصار يمه صوت عياط وضربه قويه عاد احنه كبل طلعنه لبغداد وسالنه عله الانفجار وين صاير ودلونه رحنه هناك وشفنه الشارع كله دم والاسعاف تنكل وماتلحك رحنه دورنه بالمستشفيات وجانو بعدهم
مامرتبين الاسماء وحايرين يداوون ضلينه كل واحد بمستشفى وننتظرهم لما جابو الاسماء ودورنا عاد لكيناك بالكندي
- هاا الحمدلله عله كل حال .. يمتى اطلع ؟
- بعد خلنه نشوف الطبيب شيكولن عله جرحك

عفتهم يحجون وغمضت عيني وتذكرت شلون
جنت امشي وداير ظهري للشارع وماهجست الا روحي مشمور وبس اسمعن الصايح .. حبل هالصوت يرعب ويدمي الكلب صياح الوادم انه
محظوظ وماعبرت الشارع جان صرت وصل لحم

جان هالجرح مربطني اذا تحركت شويه اعيطن
منه وهوه نازل عله فخذي اليسار وضاله هالجهه
اليسره من خاصرتي لفوك الركبه كلهه ملفلفه

ضليت يومين ثانيات بالمستشفى وطلعوني رحنه
كبل للسلف وهناك جانت امه محمد كلهه ملتمه
خوال وعمام وصحباني كلهه والشيخ ذابح وعازم
هالوادم كلهه .. وانه مشيتي زينه بس هالحركه الهواي تاذيني بحيث انه احركن رجلي هيدي هيدي حته لا يلجمني الجرح ومادنج وضال متربط
وكلساع سلام وعليكم السلام وكاعد من الظهر
انه لوكت مارادت تغرب الدنيه عاد تعبت مشيت
لبيتنه واجيت اطب لحجرتي اجتي عليه زهره
وتبجي وحضنتني وانه اطبطب عليهه واختي
الثانيه مناهل هم اجتي حضنتني وتحمدتلي بالسلامه وعاينت ربى واكفه فوك بدايه الدرج
مانزلت عاد رحت طبيت لحجرتي وتمددت
ووصيتهم يعوفوني انامن شويه .. عاد طلعو
كلهم وطفو الضوا غمضت اريدن انام وشويه
الجرح يحرك عاد انفتحت الباب وطبت ربى
جانت تمشي بهداوه ومدنجه راسهه اجتي ليمي
وانه مرجع راسي واعاينلهه نزلت دمعتهه وكالت

- اني اسفه شهاب
- عليش يرويحتي
- لو مخليتك تاخذ سيارتك وتطلع جان ماصارلك شي اسفه والله بس ردت
- ردتي شني انه مافهمت شردتي تكلين هذاك اليوم
- ماكو شي هيج هسه شلون صرت حمدلله على سلامتك سامحني شهاب
- تعاي ليه كربي

جريت ايدهه وكربتهه كعدتهه جدامي ومسحت دموعهه انه امسح وحده وتطيح الثانيه
- عليش تبجين بويه شني شصاير
- يعني انته ليش ماوخرت من كتلك روح بعيد دنحجي جان مصارلك شي
- والعبباس وخرت ورحت غادي ماتشوفين طلعت بسلامات ماجتني بس شويه شظايا اصلاً انه اشكرج لين خابرتي بهذيج الساع لو انه عابر الشارع وطاب الكراج جان وصله مني ماتلكون
- لا اسم الله
- الحمدلله عدت بسلامه وانتي الفضل ليج بكل شي
من بعد الله سبحانه .. لو انج مامخابرتني جان اهلي منين يعرفون شبيه مابيه وجان عبرت ورحت واصيرن ثريد لاتضيكين خاطرج وتشيلين هم السالفه يبعد هلي انتي لااطيحين هالدمعات وتحركيني بيهن
- ههه ماشي يعني مخابرتي فادتك
- اي والله كِلش جتي بوكتهه
- الحمدلله هسه ريحتني جنت متندمه كل هالاسبوع اكول لو عايفته يروح مجان صارله شي وحتى اتصالي اجه متاخر
- لاا لاا ماريدن تفكرين هالشكل ..هاي انه زين ومابيه شي عليش الندم والحجي هاذ .. هسه كليلي
شني الي ردتي تحجي هذاك اليوم
- ااا هيج جنت ضايجه وردت اتعارك وياك
- هههاااي اااخ بويه وعلي ضحكتيني بالله عليج هيه هاي جذبه بويه دوريلج جذبه براسهه خير
- جذبتيش شبيك
- اي جا ذيج وينهه مبينه
- لاااا
- ولوااا لا تعبيني احجي شني
- ماكو شي هسه نام ارتاح ماتعبت من الصبح لحد هسه كاعد ومنا جرحك بعده يحتاجله راحه
- لتغيرين موضوع
- يجي يوم ونحجي بي نام هسه
- جا زين اذا هيج جيبي ايدج
- هسه ايدي شكو
- اي مو تريديني انام وانه عيني توجعني وجسمي كله اهجسه حار ويون عليه اريدن ايدج بارده وتهديني
- ماكو هيج هسه اجيبلك خافض حراره وتصير زين لو اجيبلك مي وغسل وتبرد
- اااانه اريدج انتي شصخم بهذن
- شهاب شيكولون عليه يجون ويشوفوني كاعده يمك وفوكاهه مدري شلون كعدتنا
- بويه نسيتي انتي تخصيني مرتي ونهوتي وكل هالوادم تعرفج اليه عليش خايفه
- انته لتخبلني بهالحجي وتخليني هسه اسويلك عركه متخلص
- ربببببى
- هااااا
- انه بهالوكت محتاج امي ومااشوفنهه الا بيج
ضلي يمي وانه اطيب بسرعه

ماحجت شي ودارت وجهه انه جريت ايدهه بوستهه براحه ايدهه وخليتهه عله عيوني جني
ادمنت بروده اصابعهه ونعومتهن كبل اهدا بيهن
وانام .....

مادريت يمتى نمت ويمتى هيه مشت بس كعدت
عله صوت اخوي محمد جايبلي العشه والدوه
كعدت اكلت وعيني ادورنهه واخافن مشت لاهلهه
عاد اشرت لمحمد يجي يمي عبن ابوي وجدتي
وخواتي كاعدين ...

- اكول خويه ربى وين ؟مشت لاهلهه!
- ههههه لا مامشت ببيت الشيخ يم مرته الثانيه
- هاا زين
- تريد اكللهه تجيك
- ها كيفك
- ههخخخخخخ جا بعز المرض وادورنهه موش هالعايله كلهه عندك
- موش مثل هالربى ياخوي
- الله يهنيكم ياخويه
- ويهنيك

كعدت اسولف وياهم شويه لحد مامشو نامو وانه
ضليت بوحدي ضايج واكولن كلساع هسه تجي
تالي ردت اخابر عله محمد نسيت تلفوني راح
مدري وين اختفى وضال صافن ..

تالي اندكت الباب وطبت ربى كالت ..
- ها شهاب محمد كال تريدني
- ااا اي تعاي طبي وسدي الباب
- ماشي

اجتي تمشت وكعدت بطرف الجربايه يم رجلي
وتعاينلي وانه صافن شكللهه ..
- اي كولي شنو شمحتاج ؟
- انه موش كتلج اريدنج يمي عليش ترحين مدري وين
- شنو غير انته نمت بعد شعندي كاعده وحت اشوف الريم شويه
- عوفي الريم من انه اطيب واكومن عله حيلي يلا تمشين منا ممنوع تطلعين الباب تضلين يمي
- شهاب ميصير عيب من اهلك شنو اضل هنا كاعده شيكولون عليه
- انتي تخصيني واهلي واهلج وهالديره كلهه تعرف بعد شني موش مرتي انتي عليش هالحجي
- مو مرتك مابينه عقد ولا حتى موافقه زواج السالفه كلهه اتفاق وبس

كامت تريد تطلع وانه من اعصابي تحركت بسرعهوردت اكوم جان جرح خاصرتي اذاني
وصحت منه عاد هيه ردت رجعت وكضتني من جتفي وانه اتلوى منه

- شبيك شهاب شنو شيوجعك
- خاصرتي
- شو خلي اشوف وخر ايدك ،،، عزااا هذا دم
شسووي شلون خلي اصيح عمي
- لج اكفففي تعاااي
- داينزف جرحك ارجع تمدد هسه انته شجاك والله حتخبلني
- حته تركدين واضلين هنايه ماتشوفيني شلون تعبان حايره بالتفرفر
- هسه دعوف الحجي ارتاج وارتاح خلي اصيح عمي
-هسه عمج شيسويلي تعاي انتي جيبي هالعلاكه وداوي
- يمممه ماااخاف ماعليه
- شتخافين بنتي هو شاش شيلي وحطي غيره
- مااا والله اخاف اني ماتحمل هيج شغلات
- بالعباس اشو محد يسوي غيرج امشي يلا مابيه حيل اصيح
- شهاب والله اخاف عفيه
- ماعليج شي بس جيبي انه اعلمج شتسوين يلا

راحت جابت العلاكه واجتي طلعت الشاش والبلاستر وجابت الكطن وايدهه ترجف اجتي كعدت يمي وشايله بايدهه الكطن وترجف عاد كضيت ايدهه وكلتلهه ..
- موش شيختنه الي تخاف تحدي نفسج وخوفج وكوي كلبج بي يلا
- شهااب اخاف اذيك ماريد اسوي
- انه اريدج تسوي ماحبن اشوفن بيج خوف لشي
يلا مابي شي بس امسحي الدم ماتسوين شي ثاني
- ماشي بس اذا تاذيت كولي
- هههه لج بويه هوه بس تمسحي ماياذي
- ميخالف كلشي يصير
- يلا شوفيني سباعيتج

رفعت بلوزي لحد الصدر وكصت الشاش هذا المدمى وشالاته وهيه بالكوه ضابطه نفسهه مبين توترهه وخوفهه من شفايفهه وريكهه كلساع تبلعه
اجتي تمسح بالدم وانه ساكت وصافن عليهه وهيه
كلساع ترفع راسهه تعاينلي خاف متاذي من شي ماتدري انه ذايب باديهه .. واجتي تريد تحط الشاش تلفه عاد كالتلي ..
- لازم تكعد شويه حتى اكدر الفه
- ماكدر اكعد عدل هيج ينزف الجرح راح ارتاج شويه وانتي سوي
- ماشي

عدلت كعدتي وصرت مرتاح عله المخده واكو فراغ وراي تكدر تمد ايدهه بي عاد هيه تكربت عليه وصارت بكل لفه تكرب مني ازيد وانه اشمن عطرهه الي ضال نفسه بارده ريحته ...
وجسمهه يلامس صدري وايديهه اطخ ظهري  شويه .. لحد ماكملت انه روحي فرفحت عليهه
اريدن احطهه بضلوعي وانامن عله ريحتهه

- هسه زين
- اي عشتي شفتي ماتخوف ولا تاذيت
- اي الحمدلله
- جيبيلي غير بلوز
- اي ماشي

كامت للكنتور ادور بالملابس وجابتلي بلوز واجتي
- هاك البس
- شني هاك انتي لبسيني
- لاااا والله هواي تدلل
- جا مدلل عله حبيبتي انه موش غريبه
- شهااب
- ياعيونه
- راح اموتك من صدك كافي هالحجي
- ههههه احبن العصبي انه
- ههه لك كافي شلون بيك كاافي
- تعاي يلا لبسيني هاذ لعبت روحي منه
- اففف اخر مره هاي
- لاا بنيتي هاي الاولى الجايات هواي
- لوو تموت
- هههه جذابه هم اصل الموت والكاج تتبجبجين
- نننننااا غثيث
- اشتغلي وانتي ساكته احسن
- اممم
- امممين
- كافي عفيه

كالتهه وهيه تنزعني هالبلوز الي بي دم ولبستني
الثاني وانه اذوبن بكل لمسه منهه مادري شجاني
كلش تخبلت عليهه .. اتمناهه مرتي تصيرن وماتطلع من هالحجره وتضلن مدللتني هالشكل

- هسه كملت بعد تريد شي لو اروح
- شني تروحين ضلي يمي
- لا والله شهاب شو هواي ماخذ راحتك وياي
- يعني شني هالحجي هاذ بله انه ضايج وكاعد وحدي شسوي حته تلفوني راح بيمن التهي
- نام هسه اله تسوي شي يعني
- مانعسان
- اممم واني شسوي يعني
- انتي تضلين يمي وشتريدين سوي
- افف شهاااب
- وسم لاتاففين
- غثثثثييث

كالتها وراحت للباب صحت عليهه
- ووووين شحجيت انه
- اجيب مي اغسل ضجت عوفني مااشرد
- هههخخخخخخ متانيج

مشت بعصبيه وانه اضحك عليهه ماعرفن عليش تصير اعصاب وياي ! انه مامسويلها شي ..

اجتي وره شويه وجايبه وياها صينيه بيهه ماعون فواكه وبطلين ماي وجكليت واجتي حطتهن يمي
عله الجهه الثانيه من الجربايه لين انه جربايتي ام نفرين ... كعدت وكالت ...

- اكل لو هم متكدر
- هخخخ بويه الدلال حلو
- اممم
- ماتكومين تسدين الباب
-لا عوفه
- شني لا تخافين ماسويلج شي مابيه حيل
- هاي شبيك عيب من اهلك شيكولون علينه
- جا من يشوفونه كاعدين هالشكل مايكولون شي
- ع الاقل هيج كدامهم وكعدتنه مابيهه شي واذا تريد اروح عادي
- خوب انتي ماتصدكين تشردين
- اييي ،،، اكلك ماعندك هنا ورقه وقلم
-ترسمين؟
- اي شويه اتلهى بيهن
- اي كومي بهذيج الخانه تلكيهن

كامت ادورهن بالكنتور وشافت العود مشت ايدهه عليه واندارت كالتلي
- مالتك؟
- اي هاذ هديه من امي الله يرحمهه
- الله يرحمهه يعني تعرف تعزف عليه
- اي جا غير تعلمت عليه من الصغر
- لعد ليش ماشوفك اطلعه ولا سامعتك مره تعزف
- مو انه من وفاه امي ماكربتله
- هااا زين يصير هسه تعزف بي ولو شويه
- ههه تدللين جيبي جيبي

جابته واجتي ودزيتهه راحت سدت الباب ورجعت كعدت كدامي ...

جنت اتلمس اوتاره بخفه وانه اذكر هذيج الايام
من جنت فرحان بي وليل نهار انه اعزف عليه
- شوفي انه حعزفلج الاغنيه الي جنت دايماً
اسمعهه لامي من اشوفنهه تتعارك ويه ابوي ويضيك خاطرهه ومن تمرضت انه كل يوم اسمعنهه ليهه
- اي يلا سمعني

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

- شهاب
- ها
- ماعرف اذا امك الي تحبك اكثر على هالعزف والصوت هذا لو انته الي تحبها اكثر وتغنيلها هيج
- مايجي شي من دون شي لو ماحبها مااكدرن انه
اتعلمه وابدع بيه
- نيالهه عدها هيج ابن
- راحت بعد ..انه دايماً من اذكرهه مرتاح كلبي وضميري عليهه عبن رضيتها بكل شي حيل احبنهه اكثر من روحي ومن يوم الراحت بي انه ماغنيت هالاغنيه ولا جبتهه عله لساني لجن هاليوم
صارت لج عبن انتي الكه بيج راحه امي فحبيت
اسمعهه لج
- حلوه كلش ربي يرحمها ويسكنهه فسيح جناته
- امين
-زين اريد اطلب منك شي
- اي شني
- تلبيني ؟
- اريد اتضل تعزف بعد لاتتركه واكيد امك راح تفرح بهالشي لانها تحب فرحك ومادامهه هدتك
هالعود اكيد تريدك اطور موهبتك بي ويضل مرافقك كل العمر
- ماكدر اذكرهه بي
- اي هو الاحسن ليش تريد تنساها؟
- مادري بس حنيني الهه صعب
- والتناسي اصعب مو تكلي واجهي خوفج انته هم واجه .. يعني من تعزف اذكرهه بي وافرح لانهه هدتك لطريق موهبه هي عرفتك موهبتك وين افرح كل ماتتطور بي اكثر وتعزف شي جديد اشكرهه اذكرهه وحاجيهه واهديلها كل عزفك هيج
راح ترتاح اكثر صدكني
- حجيج حلو صح يمكن هيج اكدر اطلع من وحدتي بموتهه
- يعني لهدرجه متاثر بيهه بعدك
- انه من روحتهه ضلمت الدنيا بعيني صح سافرت ودرسيت وفريت الدنيا ماخليت شي بنفسي لا بالعراق ولا بتركيه بس روحي ضلمه انه فكدت
الامان فكدت الايد الي تمسح عله تعبي وتنهي وتطيب علتي فكدت من ادلل عليه ويتحملني بكل شي ماتفرك انه كبرت ولا صغرت الام ام ومايعرفها بس الفاكدها
- ربي يريح كلبك ويعوضك عن هالحزن
- انه اجاني احساس من كبل انه عوضني بيج بس انتي خشمج يابس ماترضين
- اي انته تروح تروح وترجع عليه
- جا عليمن اروحن
- مو عليه هسه انته لهيتني وماجبت الورقه
- روحي جيبي هسه انه كاضج
- انطيني ارجعه
- من اطيب اعلمج عليه
- صدددك خاف صعب
- لا سهل مايرادله شي
- اممم نجرب شكو بيهه

راحت اخذته ردته لمجانه وجابت قلم وورقه وكعدت بالكاع ترسم ..
- ماتجين تكعدين هنايه عليش بالكاع
- مااحب اني الا بالكاع يلا اسيطر
- زين شراح ترسمين
- العود
- هههه ادبرينهه
- تشكك بموهبتي شنو عبالك بس انته عندك مواهب تره مطور رسمي
- خلي نشوف بله اذا حلوه وتوب اخذهه منج
واذا لا خليهه الج
- بس لتحط عينك عليه وخليني اركز
- ركزي بويه كاضج انه
- اممم اكل انته اكل معليك بيه
- يلا هاي حاكل وانتي رسمي خلي اشوفن شتاليهه

انه جنت اكل وهيه ترسم اعاينلهه كلساع تفر الورقه بجهه وتضغط بالقلم وبعدين باصابعهه
تضلل وتخفف وضلت عله هالحال حوالي الربع ساعه وجان كامت وكالت ...

- باوع هاي هديه سلامتك تفضلاً مني الك انطيك رسمتي وبتوقيعي هم
- ايباااه يالفنانه خاب جيبي خلي اشوفن
- باجر عكبه من انشهر برسماتي ماوقعلك تره
- بويه لاتوقعين هسه ضاله عليج
- اي كيفك بعد احسن يلا هاك

اخذته منهه وشفتهه مرتبه وعبالك حقيقي وراح تكضه بايدك هوه كله ابيض واسود بس ماغاب عنهه ولا تفصيل ولا خط بي .. عاد عاينت التوقيع
حرف R ويمه نجمه

- يعني هالرسمه كلهه تجنن الا هالنجمه مخربته
- شنو ليش
- انه صارتلي عقده من نجومج اتعقدت منهن
لاتحطيهن برسماتي
- هههههه بكيفي رسمي وبكيفي
- لو بيه حيل جان لطختج عله حلكج الاعوج هاذ
- انته مترتاح اذا متتعارك وياي والله موصوجك
صوجي اني الصارلي ساعه مدنكه ومكسوره ركبتي وارسم لحضرتك
- بويه هسه شحجينه وتعصبتي
- انته تضوجني هواااي تضوجني
- اكلج بلا مياعه هسه امشي حطيهه بكنتوري
وتعاي
- اكلك شو بس تتامر انته
- وشني بويه عايز ترديني اتوسلج يعني
- لاا بس يعني شكو كلساع سوي هيج وجيبي هيج
-جااا ماتشوفيني مريض بيه حيل انه
- ايييي نسيت
- والثوول اي والله
- اممم

راحت حطتهه وسدت الكنتور واجتي تريد تشيل الصينيه كلتلهه
- وييين
- للمطبخ اوديهن
- لاا عوفيهن هناك حطيهن
- شنو النوب شكو
- اريدج بسالفه
- اممم متخلص سوالفك انته اليوم ادري
- ههخخخ جا مدامج تدرين ماتريحيني عاد
- هسه كلي شنو
- بربج اريدن تريحين بالي بسالفه عليج بروح العزاز
- اي شنو
- انتي تعرفين حيصيرلي شي مو؟
- شهاب
- تعرفين بالانفجار وردتي تلهيني ابتعد موش صح حجيي
- اي صح
- شلون عرفتي
- هاي متخصك المهم اني جاوبتك وكافي
-جا عليش من اكلج انتي عندج شي تكليلي لا وتجذبيني موش مبينه مثل عين الشمس
- شهاب لا كلشي ينحجي ولا كلشي ينفهم خليك بحياتك وخليني بحياتي
- وانه اريدن حياتنه وحده
- واني كايلتلك لا هالشي صعب يصير
- بس انطيني سبب انه اعالجه وامحيه واخلي يصير عليش تصعبينهه وياي بويه انه اتمناج كلساع عندي تضلين
- شهاب هسه نكدر ناجل هالموضوع
- عليش يعني
- لان من نحجي بالاسباب راح تتعب صحتك
تحسن ونحجي براحتنه
- وعد؟
- اي وعد
- موش تتهربين مني وماتحجين
- لا نحجي
- زين .. نعستي؟
- اي شويه
- انه هم تعبت ونعست تعاي جيبي ايدج
-هههههه والله حلوه هاي كل شويه جيبي ايدج
شنو مال مراد هي
- جا انه غير ادمنتهه والعباس مادري شيصيرلي بيهه بس اتحطينهه عله عيني كبل انام احبن برودتهه
- ههههههههه والله انته عجيب يعني شنو الحلو واحد حاط ايده على عين الثاني اني اتخبل اذا احد طخني مو عاد اني اجلب بي
- من تحبين تكومين تعرفين شكصد براحتهه
- اممممم
- هسه جيبي لا تضيعيهه علي
- وهم انتظرك لحد ماتنام
- نامي هنايه اذا يعجبج
- لااا بس نام انته هاي كلش كافي
- ههههههه متحلفلج بعركه بس اصبريلي اكوم عله حيلي اله اطلعهن هذن من عيونج
- شهاب ترا مانطيك ايدي كافي بس تتعارك وياي
- بويه خاب جيبي لانعل ساعه الحجيت بيهه

جريتهه وخليتهه عله عيوني وانه بيهه كبل اهدء
ورويحتي تبرد بكل طولهه وتالي غفيت عليهه

ثاني يوم كعدت مرتاح والضحكه ماليه وجهي
وادورنهه بينهم واشوفن محمد كلساع يغمزلي
ويضحك وزهره حابستهه يمهه ماترضى تهدهه
جنهه تريدن تعرف شني صار ماصار ام علوم اعرفنهه ماتركد الا تعرفن كلشي ...

لليل راحت لاهلهه ومناك رجعت لدوامهه وانه ويه الايام تحسنت صحتي وكمت عله حيلي ..
رحت اشتريت تلفون جديد هم سامسونك ورجعت هذنيج الحسابات ..

وره شهرين سمعت من اهلنه بيت عمي حاتم جايين عاد انه كلبي يمهه اريدن شوفتهه واستحي
اروحن ليهم بعد سالفه النهوه ماريدن اتجادل ويه عمي وبسام وضال اتكرظم عله شوفتهه ...

بدلت وطلعت لديوان الشيخ هناك وكفت وانتظرهم
لحد ما وصلو ونزلت من السياره بس هيه وابوهه
سلمت عليهم وجان ربى تفتح باب الوره وطلعت
لوحه جبيييره مغلفه عمي اجه اخذهه منهه وشالهه
- سوي درب ياشهاب
- اي عمي تفضل تفضل

طبينه الديوان وصاح عمي حاتم...
- ويين الشيخ عاين شنهو جبنالك
- خير ان شاء الله شنهو هاي
- شيخي السلام عليكم
- هلا بالشمسه هلا بويه حياج الله
- الله يحيك شلونك
- اذا انتي بخير انه بخير يابويه شنهي هاي جايبيهه
- هديه الك شيخي
- ااه
- افتحهه الك لو تحب انته تفتحهه
- لا افتحيهه انتي خلنه اشوف شني
- ماشي

وكفنا انه والشيخ وعمي وصياد وابوي هم طب
ويانه واكف وهيه جانت تفتح اللوحه من وره
لحد ماشكت الغلاف كله ووكفت عله جهه منهه
جانت الصدمه هنايه كلهه فجت حلوكهه عليهه

اللوحه بيهه رسمه الشيخ متجسده بتفاصيلهه وملونه وكل تفصيل بعباته بشماغه بخطوط وجهه
كلهه مرسومه ...
- هاي انتي رسمتيهه
- صراحه ساعدني بيهه رسام من المتبني ضلينه نشتغل بيهه اربع ايام اني ارسم وهو ينبهني عله التفاصيل ويعلمني اللون المناسب الهن وصارت مثل ماتشوفون
- عااااشت ايدج يابويه لوحه مفصلتني تفصيل
يابعد هلي وكل هالعكل انتي مشكوره يابنيتي
انه حيل انشرح صدري بيهه هاي اغلى هديه اجتني واعزهن علي
- تستاهلهه شيخي
- صيااااد
- اي شيخنه امر
- انته والولد علكوهه هنايه بساع يلا
- اي صار
- هااي تستاهل تصير صدر ديواني
- هههه فرحتني والله الحمدلله عجبتك جنت افكر بيهه من زمان بس ماجنت ضابطه كم شغله
وضليت اتعلمهن لحد ماضبطتهن يلا تجرات ورسمتهه
- لاااا كلش حلوه جنهه صوره طبع موش رسمه
انتي موهبتك ربانيه ياشمسه لا تتخوفين منهه
خليج واثكه دايماً مالج مثيل انتي شيخه بكل شي
- بوجودك شيخي هذا كله يصير

انه وصياد كضيناهه علكناهه وصارت هيبه بنص الديوان وضل الرايح والجاي يتصفن عليهه
وتوقيعهه جوه هالمره باسم شمس الشيخ بس بخط
مزخرف صاير والحروف واحد بطن اللاخ ممبين
للكل . انه بيهه تذكرت رسماتهه من بس عيون لو حلك اثاريهه جانت تتعلم بيهن ...

وراحت ايام واجتي ايام وعبرن شهرين وجانت العطله جايه وربى بيت اهلهه ...

وجنت انه ببيت الشيخ كاعدين ويه العمام جان الشيخ كال ..
- اريدنك ياشهاب تروحن تلملي ولد عمك كلهم
ماتخلي منهم واحد الا ماتجيبه وياك وتمشون
لهذيج الكاع
- يا كاع ؟
- كاع شمسه
- هااا صار شيخنه تامر
- انطيهم خبر وتعالي اريدنك
-صار

رحت خابرتهم ووصيت محمد ياخذهم للكاع وانه رحت للشيخ كعدت يمه شاورني ...
- راح يجون بيت عمك حاتم اريدنك تاخذ ربى
وتلحكني للكاع
- شيخنه خير ؟
- خير خير
- شنهي الكضيه
- جايبلها هديه واريدنهه تشوفهه
- هاااا شني المناسبه
- موش هدتني لمعزتي انه هم اهديها لمعزتهه موش لمناسبه
- ايي شكو بيهه
- يلاا انه ماشي جدامك
- الله وياك شيخنه
.
.
.
يتبببع
# هالمره صارت احداث سريعه حتى ندخل بالعميق بعد 😄 بس والله مدينطوني مجال اكتب
اني مالمعت نفسي مثل هالبيت والحياطين 😂😂
هسه استمتعو بهالبارت واني باجر هم انزللكم
الصدمه باجر .. واكتبولي شنو توقعاتكم للهديه ؟؟
وكل عام وانتو بالف الف خير وربي يعيده عليكم بالصحه والعافيه احبكم 💗💗