رواية من فجر ديسمبر الفصل الخامس 5 - بقلم Zoka 🌷

من فـجـر ديـسـمبـر
🍁
🍁
بعد مرور اسبوع صار يوم روحتنه لبغداد انه ونعيم للدكتور
وهناك اهل وليد ضيفونه خوش ضيافه وهوه طاير من الفرح
بينه واهجس نعيم يغار من يشوفن ضحكنه وشلون يلاشيني
وليد لجن اكو فرد شغلات ماترجع يوم تروح ...

العصر طلعنه للدكتور بالحارثيه وسوينه الفحوصات وضلينه
من مختبر لمختبر مدري شبيهه الوادم هنايه تحجي من وره خشمهه ويكصبون كصب بالاسعار شنهي سالفتهم هيج كالوهه

انه ماخليت نعيم يدفع شي منه وهوه دمعته بعينه مستحي مني
لجن انه ماحسسه بشي اريدن ابري ذمتي منه ..

بعد الفحص كال ان نوعه من سرطان الخليه الشعريه وهذا
ماله شفاء تام لجن نكدر نسيطر عليه لفتره طويله واول شي
لازم يسوي عمليه يشيل الطحال متضخم عنده

- شهاب خلك من العمليه انه ماسويهه
- شنهي بويه شسالفتك
- ياخوي هيه موتتن وحده عليش مبهذل روحي ومبهذلكم
سمعت شحجه ماله علاج فتره ويكضي بيه
- لاااااه يا نعيم انه ان ماسويتهه ازعل عليك وحك علي ولا
شوفنك وجهي .. ياخيي خلينه نعيشلنه جم يوم سوه مرتاحين
وربك رحيم هوه يحلهه بعدين
- خلي نرد هسه انه دخت بالله العظيم كل حيل مابيه
- تعال اسندك اصفريت شجاك ياخوي
- ردني البيت شهاب
- امش امش

سندته ووليد جاب السياره وطلعنه لبيت وليد نمنه الليله عدهم
وانه افكر شلون بيه ماريدنه يضل هيج وخليت وطلعت من
الصبح لغير دكتور وهم حجه نفس الحجي عاد انه كلت ماخليه
يردن العماره اله وهوه مسوي عمليته ...

ورحت خابرت عمي حاتم وصيته يدزلي شجم فلس العندي
خلصن وهنايه المصاريف غاليه .. للمغرب اجاني بسام جايب
فلوس العمليه وياه وانه جنت حاجز عله الخاص وبره يومين
سوه العمليه وانه وبسام ووليد وابوه واكفين ننطره بالردهه
لحين ماطلعوه انه جيت اختم القران .. جنت اتحمد ربي واتشكره
لين ردني للديره وكت عوزه صاحبي ليه وله جان متت بندمي
لو جاريله شي وانه بعيد ...

طلع من العمليه بسلامه وضلينه يومين وياه بالمستشفى وطلعناه
وكبل ردينه للعماره وهوه هالوجه مصفر ومابيه حيل يشيل اصبع من اصابيعه وانه وبسام حايرين بي نشيله منا ومنا

ردينه لبيتهم والشيخ دزله ذبيحه وضلو يشوونله تكه ومعلاك
ماضلت كطره دم بي .. وانه والولد عنده مجابلي وكاعدين
نلاشي وننصب عليه ونغيرله جو ..

جنت انه واخوه نشيله ونغيرله ثيابه ونسبحه وهوه بس يتشكر
بعد شهر ردت عافيه نعيم والعلاج وياه وياه وصار يمشي عله
حيله وصحته احسن من كبل ... ودوم يتشكرني وانه اريدن
ماعوفنه لحضه عبن اخافن يجي يوم ويودع وانه مو وياه

صارلي بالعماره شهرين وماضل شي لردتي لتركيه
جنت معوز فلوس كل العندي كتيتهن للعلاج وانه مو طبعي
امدن ايدي لاحد .. جنت امر للكاع اشتغل بيهه شوي وارد
البيت بالي اريدن اجمع شجم فلس اردن بيهن ماعندي بس
مصرف جيبي ...

اجه بالي بسام كلت ماكو غيره يدبرلي شغله هالشهر ورحت
لبيت عمي .. فتحلي الباب حيدر
- السلام عليكم
- ياهلا وعليكم السلام وين الغيبه
- جنت ملتهي بنعيم مايصحلي امرلكم شلونكم
- عله الله
- عمي وين بسام شني طالعين ؟
- اي ابوي بالمحل وبسام هسه عله جيه
- زين زين بعد اخوك ماكو غده
- جنك عله غده وينننج ربى حضري الغده يلااا

بس ذكر اسمهه كلبت معدتي هسه توكلني سم  هالصخمه
مو جنت خلصان منهه شهرين شجابني !!!

طبت مرت عمي ومن شافتني كالت..
- ياا هذا شهاب يمنه اليوم يمه نور البيت
- باهله ياعمه شلونج
- بخير شلون صحتك اخبارك شو اختفيت فد مره
- مو تدرين بصاحبي ومرضه ملتهي وياه
- ايي خطيه الله يشافيه شلون صار
-لا زين هسه كام عله حيله بس بعد شغلته تخوف
- الله كريم عمه الله يباوع لحاله خطيه ميستاهل
- ادعيله عمه
- ربي يشافي ويردله عافيته بجاه ام البنين ،، خلي احطلك الغده
- جاي تسوي ربى اكعدي انتي
- ياااه هسه تحركه خلي الحكلهه

كامت وانه ضحكت عليهه جا طلعت النوب حته اكل ماتدبره
لا خوش شمسه ...

بره شويه جابت الصينيه واكلت وحدي عبن همه سابقيني بالغده
كمت اغسل وطلعت ربى من الحمام حاطه منشفه عله شعرهاا
الاحمر عاينتلهه وهيه وكفت صفنت بوجهي وكالت ..
- هلو
- هلا
- شلونك
- زين

دارت وجهه وراحت صعدت انه ضليت اسبن بيهه بكلبي
ياخوي مادري انه شعندي حاط كورتي من كورتهه

للعصر اجه بسام وعمي وكعدنه حجينه شويه وحجيت ويه
بسام عله الشغل كالي ادبرهه ليك وراح ،، انه اخذتلي غفوه
بحجرته وحسيت عليهم يكعدوني عله العشه .. كمت لكيتهم
مادين السفره كلهم كاعدين الا هالصخمه ماكو خفتاً وراحه
كملنه اكل وبسام كالي ..
- شهاب دبرت شغلتك
- اي يالله وين
- هنايه اكو ٣ مشتملات نشد بيهن كهربائيات
- اي يمتى نبلش بيهن
- من باجر حضر روحك
- ماعندي شي انه الصبح تلكاني اكعدك
- جا خوش حته من نكملهن نرد نحول عله الصبغ
- لاا انه هنايه مافهم بالصبغ موش شغيلتي هاي
- لك يابه انته بس الزم الفرجه وهيه تدبر لوصهه منا ومنا
- لااا شنهي اغش الوادم انه ماعرف اخذ فلوس هيج للتلغمط
خلني بالكهرباء احسن
- كيفك

ثاني يوم من الصبح كعدت لبست هدوم عاديه للشغل وتريكنه
انه وبسام وطلعنه للشغل وهناك تعرفت عله شجم زلمه مرتبين
وكضينه الوكت نشتري غراض من الانشائيه وللظهر بدينه بشغلنه جانت فلوسهه زينه تمشي حال وكضيت هاليومين
بالمشتمل هاذ وباجر ابلش بالثاني ...

كاعدين عله العشه وهالمره تجرأت وسالت ...
- عمي شنهي بنتك مستحيه مني ماتجابلنه عله الاكل
- ههههه لااا وليدي انته عليش المستحه
- جا شنهي كضيتهه هاي انه ماشوفنها حته تكعد هنايه اخافن
انه السبب هيج مضايگم
- يمه شهاب لا تكول هيج البيت بيتك وانته حسبت ولدي
ليش تضايقنه عيب منك هالحجايه ابني انته عزيز علينه
- عله راسي ياعمه بس انه هيج حسبتهه
- شهاب لا تدوخ راسك بيهه هيه متاكل ويانه من زمان موش
علمودك
- هاي شبيك بسام يعني قابل متدري باختك متكدر تاكل هالاكل
- اييي تتمضيك براسنه
- اسكت اسكت
- شني عمه خيرهه
- ولا شي هيه ماتاكل غير فواكه وهيج شغلات خفيفه وحليب
ولبن هالاكل يمرضهه وياذي معدتهه راساً تتقيىء من زمااان
هاي حالهه من عمرهه سبع سنين بس تاكل تمن لو لحم لو مركه
هاي احسب بايتين بالمستشفى بيهه
- الله الله شدعوه هيج شني ماخذتوهه دكتور شي شلون عايشه
هيج
- اخذتهه بويه يكلون هاي قابليتهه خلوهه عله راحتهه وهيه
بعد صارت ماتدنى لاكلنه وانه عمك انكل بالفواكه واللبن
ومالحك
- هههههههه مبتلي ياعمي
- جا شلون غير هالوحيده الزغيره عزيزه هالكلب
- هاااا يابه هيج البنيات عزيزات واحنه بالشط
- جا هنه يدولبن اكبر واحد البت حياله لابيهه مو مثلگم تسحنون
بالاعصاب من دكايگم
- اسلم عله رويحتك حيدر تره ربى عدهه جيش جلمه منهه
تنام بالشارع
- ههخخخخخخ اي بالله عود انه المدلـلك بويه وعله مايك
هيج مالي گدر عندك
- الك بويه الك لجن لاتقارش بالعزيزه
- جا هيه شضلت كلشي ماخذته
- يبووو ياحيدر هسه تغار من اختك شبيك ياامي
- يمه جا متشوفين اهلنه كِلها شامرين رويحتهم لاجل عينهه
واحنه نجد ونتعب وتاليهه محد يعبرنه
- اني اعبرك وانتم ولدي عزاز كلبي انتم نور هالعين يايمه
- هااااذ الحجي الزين خلي تفيدك بتك
- تفيدني جا غير رفعه راسي هيه
- بعدهه جاهل هسه تكبر وتتمشيخ عليكم
- ياجهال لاتشوفهه هالكدادتهه تره هاي كل البله بيهه
- هاي النوب انته بسام شجاكم على البنيه يااا
- هسه مجذب هاي حتصير ١٨ وهيه تتلوك وتتموع بووويه
انه بس اخذهم بيت الشيخ اشرد ومااردن لليل عبن انه جبدي
يطك
- هخخخخخخخخخ من الغييييره هاي هيج مسودنتگم
- ششايف انته متكلي
- ياااا والله ظالميهه للبنيه شو هيه لا حس ولا نفس هاي على
نزاكتهه وهدوئها هيج مغثوثين منهه شمسويتلكم شو وحيدهه
وحيدهه ومداريتكم لبسكم غراضكم مو كلهه هيه مرتبتهن
سوده عليه ماتكعد دقيقه حايره بالبيت وبس الطبخ عليه
هاي تاليهه يابسام هيج تجازي اختك
- هااااااااا شفتتتتي بس واحد حجاله شغله عليهه كبل تكبون
بوجهه هي شعدهه كاعده بالبيت وغصباً ماعليهه تنظف هم
احسبوهه علينه منيه

عله هالحجي وطبت ربى وبيدهه تلفون انطته لابوهه وكالت

- بابه هاي تلفونك دك قبل شويه
- منهو هاذ يذكرنه بهالليل
- ماما محتاجه شي اسوي
- كملتي الملابس
- اي كملتهن ونظفت الحمام والممشى
- اي عفيه بنيتي
- راح اصعد لغرفتي ارتاح شويه وبراهه انزل اغسل مواعين
- على راحتج يوم

جانت تحجي ببرود وجنها ماسمعت حجي اخوتهه ولا همتلهم
دارت وجهه ومشت .. والولد سكتو ولا طلعلهم صوت جنها
صمتهم عله حلكهم بطبتهه .. انه الفهمته ان هالربى عدوه
كل الوليدات والبنيات  ومحبوبه الكباريه من اهلنه ...

ساعه ١٠ انه بالكراج احاجي وليد بالتلفون وطلعت ربى
ذبت جيس الزباله يم الباب وردت للمطبخ انه اشوفن وجهه
جامد كلت هاي اله متكدره من حجي اخوتهه ..

سديته من وليد وطبيت للمطبخ جانت تحط المواعين بالسله
وكفت حكيت لحيتي شويه وكلتلهه..

- جنج متضايكه
- لا
- جا وجهج يكول غير حجي
- ويهمك
- انتي عليش هيج تهجمين وياي بالحجي
- فاهم غلط
- لا فاهم صح انتي مدري شيجيج وياي
- امم
- وسسسم انه صوجي واجيت انشد عليج يطبج مرض
- شكرا

دارت وجهه وصعدت فوك انه ضليت اسبن بروحي جا انه
شوداني عليهه عساهه للنار انه شعلي منهه !!!

طبيت حجره بسام لكيته يخابر واشرلي اروحن فهمت عنده
صويحبه عفته وخذيت غطاي ومخدتي ورحت نمت بالديوانيه
حسيت عله صوت طركعه فتحت عيني لنهه ساعه ٦ الصبح
كمت من فراشي وطلعت بره جان تصير بوجهي هالصخمه
جا يوم الاكشر يصيرن اذا مصبح بوجهه ..
جانت كاعده عله المرجوحه وبيدهه كتاب ..
- شعندج هنايه من صباح الله
- مثل ما عندك
- تفكه مو لسان
- امم
- طبي جوه
- ليش
- شنو ليش كتلج طبي جوه
- مايعجبني اطب
- اللهم طولج ياروووح يبت الناس هالساع المطيرجيه راح
تسكن السطوح وانتي كاعده هنايه بستريجج وشعرج المحلول
شترديني اعاين واسكت
- اني راح اطب لان انته صرعت راسي
- خااايبه ميييلي منا مييييلي

مشت من يمي وانه رحت للمغاسل البره غسلت ورحت كعدت
بسام بطلعان الروح ريله كام ... تريكنه وطلعنه للشغل ..
جنت اجمع يوميتي ومصرفي من فلوسي البقن .. وردينه للبيت
العصريه  ...

بالليل نفس الشي بسام يخابر وماكدرت انامن عبن صوت دندنه
يدكن براسي خليت وطلعت للديوانيه وانه شايل فراشي وياي
حطيتهن ورحت للمطبخ فتحت الثلاجه لكيتهه مليانه حليب بالفروله وروبه وبطاله لبن جريت واحد ورحت اصب بالكلاص
جان اطب ربى من الباب الثاني اليطل عله الكراج جانت عركانه
وكفت تغسل وانه اشرب لبن واعاين ليهه .. عبرت من يمي
وصعدت فوك جنت انه حيل اتضايك من لا اباليتهه هاي يعني
اسلم اكولن محتاج شي كبل ماتعرف بس تشرد وتصعد ...

غسلت الكلاص ورديت لفراشي اتكلب منا ومنا عيني مااخذت نوم مدري شبيه جريت تلفوني وضليت العب بي جانت لعبه
سباق سيارات وتلفون دكمه ثكيله بزعت روحي شمرته وتغطيت
وبس اتكلب تالي سمعت باب المطبخ نفتحت كمت فتحت البرده
شويه وعاينت لنها ربى شايله غراض بايدهه وراحت بسطت
وكعدت بالحديقه ضليت واكف اعاين عليهه جان تفتح دفتر الرسم
وضلت ترسم لجن بحركه جن هالورقه حتنشك بايدهه انه جيت
اطلع ليهه تالي وكفت كلت خلني اشوفن تاليهه وضلت ترسم
سريع حته ماتمسح غلط او تاخذ وكت بفد خط بفد شي ابد ركض
ركض رسمهه تالي شمرت القلم من ايدهه ودفعت الدفتر هيج
حيل وراحت ارتاجت عله المرجوحه وراسهه للسمه رافعته
وصافنه انه طلعت ليهه عله كيف امشي ودنجت شلت الدفتر
جان تعيط ..
- عوووفه
- اريد اشوفن شهالرسمه الركضتي ركض بيهه
- شهااااب عووفه كتلك

ضحكت وانه بيدي الدفتر ورجعت جم خطوه وهي تعاينلي بعين
كلهه اعصااب ،، عاينت الرسمه جانت وجووه مشخطه وايادي
مكطعه والحلك مثل المخيط هيج كومه وجوه متلازكه رفعت
راسي عاينتلهه وهيه عينهه عليه ومجتفه ايدهه وهاديه بكعدتهه
ولاجنهه مهتمه ..
- شنهي هاي التخربط
- اني هيج احب اشخبط
- مادري ليش احسن وراج شي
- عادي
- انتي ليش هيج
- شنو
- غريبه
- عاديه
- لاا انه ماشايف هيج بشر بارد مثلج ربى انه حسبت اخوج
اذا عندج مشكله احجيلي احلهه لج
- تسلم ماعندي شي احجي
- لااا انه مارايد التسلم انه اشوفنجن مكدره ورويحتج تعبانه
لا تحسبينهه شي مو زين بس انه ماريدن بنت عمي تضل
همهه ذابحهه وانه اقسملج بالله مايطلع سرج لبني ادم
- مشكور لاهتمامك بس اني مابيه شي ولا حتى تعبانه
- جا شنهي سالفتج عليش تسهرين ومن الفجر انه الاكيج هنايه
لا تسولفين ويانه لا تكعدين حته اكل متاكلين بس شغل عليش
يبت الناس بيج شي كولي نساعدج واحنه الممنونين
-مابيه شي اني هذا طبعي تعود عليه وهسه انطيني دفتري
ونام وراك شغل
-وانتي ماتنامين
- مجايني نوم هسه
- هاج ولا تاخرين هنايه زين
- اي

عفتهه وطبيت وضلت بالي رسمتهه يعني الواحد اذا مابيه شي
عليش هيج يرسم هالوجع كِله !! انه ماصدك حجيهه لجن ضلتي
وراهه ليوم الدين الا اعرفن سالفتهه شني ..

الصبح عرفت هيه تحضر ريوكنه كل يوميه ومنهه عرفتهه
مانامت عبنهه نفس ملابسهه ودفترهه هنايه محطوط بعده
وبيومهه زادت شكوكي بيهه وكلت لو انه لو هيه ...

راقبتهه بالليل نفس الشي لجن هالمره بلايه رسم ضليت هالليله
كاعد للصبح اعاينهه لين انه خلصت هالبيت واليوم ماعندي
شغل بعد .. وللصبح هيه نفس الكعده حاطه السماعات باذنهه
وتلعب بشعرهه تضفره وترد تفكه لو تتمدد على المرجوحه
وتضل تعاين للسمه ولوجه الفجر اطب وتصعد فوك ومحد
درى عنهه ... 

انه اول ما طخ بالي كلت هالبنيه عاشكه لين هاي سوالف العشاك
اغانيهم وسهرهم وصفنتهم ماكو غيرهه بس شلوووون اعرفن
صحيح لو لا ؟؟؟

اليوم كله انه ماطلعت كاعد واعاينهه وين تروح وتجي وجان
تجي امهه وتكللهه ...
- ربى يمه امشي نطلع للسوك
- ليش
- نشتري شكم غرض باجر نروح لبيت خالج مرته جابت
ولازم نوجبهم عيب
- ماريد اروح
- شنو ماتروحين امشي وياي اضوج وحدي افتر يلا عوفي
الي بيدج واصعدي بدلي يلاا بنتي
-ماشي
- شهاب عمه عينك عالبيت احنه ساعه زمان وراجعين
- براحتج عمه

انه كلت هاي لكمه واجت للحلك كيفت .. بس طلعوانه ركض
صعدت لحجرتهه وهاي اول مره انه اصعد هنايه ..
طبيت واعاين الجربايه مرتبه وصايره بالنص من جهه الباب
وعله الجهتين ميز صغير وعليهن كتب والكنتور من الجهه
اليمنه صاير وجبير فتحت اول باب شفت ملابس طلعه كوومه
وضليت افتح باقي البيبان كلهه ملابس وجنط والعاب وبصف
الكنتور ميز المرايه وعليه مكياج وعطورات بس انه الجذبني
الجهه اليسره بيهه بس ميز وعليه الوان وفرش واوراق رسم
كبار والحايط كله رسمات ملزكتهن وجوه كل وحده تاريخ
وعلامه اكس بالاسود وبيهن بعدهن ما مأشرات بالاكس
جانت الغرفه هاديه وبارده مثلهه ضليت واكف اعاين للرسمات
بيهن ملونات وبيهن رصاص جانت بالنص رسمه جبيره وحولهن
باقي الرسمات الصغار .. هالجبيره جانت ايد ممدوده وبنصهه
نجمه اللوحه كلهه ملونه بنيلي بس الايد لونهه بسمار لون بشرتنه
والنجمه تلمع تاريخهه من ٢٠٠٧/١١/٩ وماعليهه اكس !!!

ضليت صافن عليش الاكس !!! وهالرسمه صارلهه ثلاث سنين
عجب هيه مامأشره وهذني الماصرلهن جم شهر مأشرات !!

شلت عيني منهه وضليت اعاين لرسماتهه الثانيه جانن نصهن
سواد وبيهن رسمات كامله بس مثل المشخوطه لو متخربطه
الوانهه وهيج نازله عله الرسم معانيهه موش واضحه زين

جريت دفترهه مالت البارحه وضليت اكلب بيه من اول ورقه
جان اسمهه مكتوب بزغرفه حلوه وملونه وبعدهه انصدمت
انه شفت منظر عجبت عليش ترسمه .. جان جثث مكطعه
ونار عله البيوت وكل الصفحه بيهه اسود ومشخط مافهمت
شني فكرهه هالبت ؟؟؟؟

جان كل رسم هالدفتر هالشكل جثث ونار وسواد ووجوه
مخيط حلكهه بس كل مره بوصف شكل عجزت افهم شني
رباط السالفه بينهن .. سديت الدفتر ورديته مجانه ورحت كعدت
عله جربايتهه وعاينت عله الميز جهاز مال ناقل صوت مثل
هاذ اليستخدمونه الاتراك بغرف جهالهم وواحد يمهم حته
يسمعون صوته من يبجي زين هاذ شكو هنايه شني جاهل هيه
ويخلولهه !!!!! ضحكت لجن بالي افكار تجيب وتودي

فتحت المجرات  ومالكيت بس كتب واقلام وادويه ..
كمت وانه افتر بهالحجره العجيبه مثل صاحبتهه وتالي نزلت
وويه كعدتي سمعت صوت الباب انفتحت وطبت امهه وصوتهه
عالي ...

- اييي لشوكت تضلين شالعه كلبي هيج متكليلي
- كتلج ماريد ماااريد ليش تلحين وياي
- هاي صارلي سنين عايفتج براحتج ويوم الاحجي اطلع الح
- يمه عوفيني ااااني عوفيني
- يبووووو هسه شسويتلج اني هنه لبستين فوك مااشتريلج
- اي مميته عليه ادري بيج حايره بابن اخوج شلون تكرين عينه
- ياااه ولج احترمي لا اكص السانج
- امي اني محترمه وعلى راسي انتي بس هالسالفه تدرين
بيه اموت منهه شكو تضحكين عليه وتاخذيني وياج هيج
هااا ليش فهميني ليييش
- وانتي شكو كبل ربطيتهه هيج اني كتلج اشتريهن دنروح باجر
وملابسج جديده وحلوه فوك مااريدلج الزين هيج تجازيني عفتيني
وطلعتي تركضين هيج ياابنتي هيج تركضيني وراج شبيج شجااج
- يمه فدوه اروحلج عوفيني لا تشتريلي ولا تجيبيلي اني عندي
كومه ملابس مااريد و بعدين منو كلج اني اروح باجر وياكم
مو تعرفيني ماطب بيتهم من زمان بعد شكو
- ولشوكت يعني ضلتج هيج هذول خوالج وعيب عليج
- على راسي خوالي بس انتي تفهمين واني افهم فسدي الموضوع
- تعااااي مخلصت حجيي وين موليه
- ارجوج اذا نفس السالفه عوفيني اروح
- ربى والسماج ربى ان ماشلتي هالسالفه من بالج تحلمين بعد
تعتبين باب البيت سمعتتتي تره انطيتج عين هواي كلنه صغيره
ومدلليج ونحبج بس كافي زودتيهه شنو اضل العالم تركض وراج
وانتي شايله خشمج على الرايح والجاي لشوكت يضل يتوسل بيج
لحد ما يشيب ويموت يله ترضين
- هسه اني كايلتله توسل كايلتله انتظر كلشي ماريد منه اصلا
هو كله مااريده ياامي مااريده ليش تجبريني هيج يعني لشوكت
اضلين تخططين من وراي لهالسالفه ماتعبتي تره اني اختنكت
كافي هيج
- لان انتي ثوله ماتشوفين مصلحتج وين شوفي البنات شلونهن
وانتي ضلي هيج حابسه نفسج بين هالدفاتر والرسم والتصفن
ضلي موتيهه لنفسج وارتاحي
- اني هيج عايشه مرتاحه ليش مغثوثه مني يعني اله اكعد اتمعشك
يله ترضين عليه بشنو قصرت وياج كليلي هالبنات التحجين عليهن مداريات امهاتهن مثلي مراعيات اهلهن مثلي شاطرات
مثلي كوليلي شو صوتي ماسمعكم اياه وممخليتكم حتى تحسون عليه بشي حتى مافد يوم طلبت شي منكم وهيج مراضيه عليه
- لا تشلعين كلبي اني اريدج اطلعين من جحرج الحابسه نفسج
بي ماريدج اضلين هالضله افهمي عاد مو بطيتي لكلبي
- امي من الاخير اكلهه الج حتى تكطعين هالسالفه هالولد حاله
حال الراحو سالفه وانسدت ولو مو يتوسل لو يصبني ذهب
ماترمش عيني عليه ماشي
- اوووووف يربي اووووف وشتاليهه بهالبنيه
- اعتبري محجينه شي وانسي الصار وهسه حصعد ابدل
وبره شويه عود انزل اغسل ملابس
- اوووووي يطبج مرض ضلي موتي بهالغرفه اني حطلع
لام جاسم تريح كلبي احسن من ضلتي هنا متشعوطه من وراج

هاي طلعت وهذيج صعدت وانه مثل كل مره اسمع وماافهم
شنهي سالفتهم !! بس مبين امهه مدبرتلهه رجال وهاي مترضى
يعني عاشكه اي انه كلتهه من الاول وهسه ثبتت شكوكي

وره شويه نزلت ورابطه شعرهه ولابسه البرموده اشو هاي
لا تستحي لا تحتشم شني مو زلمه وياهه بالبيت ولو هيه
وين شايفتني !!
كمت سويت نفسي اروحن لحجره بسام والحمام بصفهه
واعاينهه تحط بالملابس بعصبيه كلت استفزهه شويه ..
- ربى
-ها
- ماتسويلي اكل بعلي جوعان
- اي ماشي
- شو امج تكو تحركه عليج سمعه موش طيبه بالطباخ
- عادي اذا متريد ماسوي
- يابه امرنه لله سوي هالتكدرين عليه
- ماشي
- مو تذبين حركتج بالاكل وتالي اوكع واتسمم
-ماشي
- عاد حطي كلاص شربت شي مو تيبسيهه علي وماريدن
تمن سويلي تگلاه نشواف وهيج
-ماشي
- كبه ماعدكم كبه مشتهيهه بعلي
- مخلصين
- شراح تكلين بله
- هسه اشوف
- هااا شو بعدج هنايه تحركي حموت من جوعي
- ماشي
- خبزه حاره حميهه زين كسبيهه
-ماشي
- واهم شي الطرشي لا تنسيه
-ماشي
- طماطه هم اغمسن بيهه هيج مالحه اريدنهه لا تجثرين دهن
بيهه تره انه ماكل الشي الملووص بالدهن
-ماشي
- شو هم بعدج هنايه امشي بتي

هزت براسهه ومشت وانه انفجرت ضحك بالكوه لازمه اعصابهه جدامي انه حلتلي السالفه رديت وراهه للمطبخ
جريت كرسي وكعدت وهي طلعت البتيته ..

- لا لا ماحبنهه عيفيهه شوفيلي اكو بيتنجان
-اي اكو
- اي سوي احبنه مدور

راحت طلعت البيتنجان كتلهه..
- شو جنهن ذبلانات لا لا جيبي غيرهن معجبني
- مابيهن شي
- انه معجبني جيبي غيرهن
-ماشي
- اشو جن لسانج انبلع جنتي تصلين صلي وياي شنهي سالفتج
- ماكو شي
- اخافن امج ضربت ع الوتر الحساس
-امم
- وانتي شجاج هيج انحركتي من حجيهه حته وياهه ماتحترمين
-امممم
- بله شني سالفه هاذ الزلمه الخاطبج غريب كريب
- مايخصك
- شني جا غير انه ابن عمج وبرضاي تزوجين
- اكيف من مترضى ياابن عمي
- وانه ماامشي بالتكيفين عليه انه امشي بزودي
-اممم
- هسه ماكلتي منهو هاذ !!
- تجي امي واسالهه اعتقد محلوه اني احجيلك على الزلم
- هااا زين تعرفين بلاصول
- امم
- ليش متردينه مبين شاريج الزلمه
- بكيفي
- اخافن بالج شي يابنت عمي
- البال كلشي بي شتقصد بالضبط
- الفهمتي
- تريده مكسب هواي لو وسط
- شني
- البيتنجان
- مكسب،،، عليش غيرتي موضوع
- شسويلك بعد وياه بس طماطه
- مو احاجيج عليش تلفين وتردين للاكل
- لان اني داسوي اكل
- وانه احاجيج جاوبي
- ماعندي شي اجاوبك عليه
- يعني بالج شي
- امم
- خلي تطلع صدك وانه اعرفن شلون اعدلج للدرب
-ماشي

تحجي باسلوب عادي لا تكبر ولا شي جنهه هاذ اسلوبهه
لجن انه تستفزني وانه الجيت استفزهه واضحك عليهه

حطت الصينيه جدامي وراحت تكمل الملابس انه حته نفسي
انسدت عفت الصينيه وكمت افتريت بالحديقه ورديت رجعت
اكلت زين اكلهه جا عليش عمه تكول تحركه ؟؟

ولليل كاعدين ع التلفزيون وانه شفت عمي كام صعد كبل
رحت لعمتي كعدت جارهه ..
- اكولن عمه
- كول يمه
- اليوم انه مارضيت عله ربى جيف انهه هيج تحاجيج انتي
ام الطيب الحبيبه هيج تعلي صوتهه عليج ما مرجيه منهه
- ايي يا شهاب هالبنت فتته لكلبي فت
- عمه شنهي اشو ماحجيتي ع خطابتهه
- يبوو دسكت هسه اذا يسمع عمك يكلبهه للدنيه
-شنننني
- شهاب عمه حجي بيني وبينك
- اي فهميني
- هذا قبل ابن اخويه مؤيد اسمه هذا رجال مهندس وعنده
وظيفته هم ورايدهه لربى من عمرهه ١٤ سنه شافهه لو تخبل
عليهه وضل كل يوميه جاي علينه وهي حاكرته حتى سلام
متسلم عليه رحت كلت لابوهه يابه الولد رايدهه وكلشي يوفرلهه
ابوهه كال اسال الشيخ هي سمعت يريد يساله لو تخبلت ضلت
ماتحاجينه شهر تكميل هي تنزل تشتغل بالبيت متنطق بحرف
ولا تاكل ولاتكعد ويانه وجر هذا طبعهه لليوم بس الي اختلف
تحاجينه عادي بس هي من تمرضت كطعت الاكل هذا وكامت
تاكل لوحدهه فواكه لو شغلات خفيفه هيج وجان الشيخ يدري
هي كالتله وتاليهه كال يحرم عليهه هالولد واذا انجاب هالطاري
بعد احرك الاخضر واليابس
- جا شعندج بعد وياهه دام الشيخ نطه جلمته
- هو اني لو ابوه كل يوم والثاني داك عليه تلفون ويكلي الولد
قافل عليهه وخايف لا يزوجوهه لولد عمهه وداك رجل لو هي
لو مااخذ وهو اجانه بالعيد وشافهه كبرانه لو تخبل حتى اني
كمت ماروح لبيت اهلي من وراهم
- عمه لا تعبين نفسج اكطعي السالفه
- لك عيني الولد مايتفوت جمال واناقه واخلاق ومكمل دراسه
وجبير مو تكول بعده جاهل وطايش لا ٢٦ سنه عمره وابن
خالهه مو غريب وخوالهه يموتون ع الكاع التمشي عليهه ربى
- هااا جا شجاريلهه هالبت اخافن مضوجهه بشي منا منا
- ياااه مؤيد يضوجهه هو شايفهه ياحسره اكله سلام متسلم عليه
حتى اذا نروح لبغداد لاهلي تضل فوك كارصه يم خواته
وماتطلع الا واحد يصيحهه
- لاا لااا اكيد بي شي الولد جا عليش هيج كارهته
- هو غير عابدهه عباده عيد ميلادهه يدزلهه هديه اشكال الوان
بيد امه ويجي هنا بس يسلم عليهه ادير وجهه وتمشي
- يعني انتي ما تكيفين بنتج ثكيله وماتنطي مجال للرايح والجاي
تعتبين عليهه شتردينهه تسوي تكعد اطك سوالف وتمضحك وياه
- لااا عيني اشكهه بالنص غير بس اني داكلك شلون كارهته
للرجال وهو شلون شاريهه
- هو راكض عليهه لين حليوه
- اشو بناتنه هناك وحده احلى من الثانيه هي ع الحلاه
- خاف على فلوس لو طمع
- عدهم خير من الله معتازين النه قابل
- هاااا يعني تردين توصليلي هوو يحبهه ويريدهه
- اي لعد ها
- انه صراحتاً اكولن لو تخلين بنتج عله هواهه احسن بهواي
تره بس توصل السالفه للشيخ بعد يحرم طبتهم للعماره سدي
الموضوع عمه
- هاي ساكته اني حجيت كلت وحتى باجر حطلع اني وعمك
من الصبح وهي حتضل هنا اوووف من هسه حايره شجاوبهم
من يسالوني ليش ماتجينه والله مااريد اتفاشل وياهم شكللهم
بنتي وماكدر عليهه
- كليلهم الشيخ رايدهه عنده وهمه يسكتون وانتي اطلعين منهه
- الله كريم

ضلت هي صافنه ع التلفزيون وانه ضحكت بداخلي عليهه
عفيه نسوان جنهن سمجه بس يشمرلهن الشص كبل جني
بالايد .. زين من سوت ومانطته مجال بعدهه صغيره ومجلبيلهه
انه فرحت بتصرفهه كبرت بعيني هيج بس نفس الوكت عرفت
انهه عنوديه وخشمهه يابس بس عجب مارضت بي شو جنه
بيضه من ذهب ؟؟؟

.
.
.
يتبع