رواية من فجر ديسمبر الفصل السادس 6 - بقلم Zoka 🌷

من فـجر ديـسـمبر
🍁
🍁
ثاني يوم طلعت للشغل بالمشتمل  الثالث  وردت اخلصه كِله
بفرد يوم حته اشوفن غير شغله .. ضليت بلايه اكل بس اريدن
اخلصه واطلع خنكتني الترابه الهنايه وبوخه متت حر سبحت
بالعرك .. للمغربيه خلصته كِله وطلعت للشارع صعدت الكيه
ورديت للبيت ..اول ماطبيت كبل للحمام ...

طلعت رحت كعدت عله المبرده وحطو العشه اكلت ورحت
اريدن انام جسمي تعبااان مكسر تكسير غفيت شويه وكعدت
عله مغص بطني كطع مصاريني تكطيع كمت داايخ ولعبانه
نفسي رحت للمغاسل البره غسلت وكعدت بالكاع مدري شبيه
كلشي يوجعني راسي عله بطني عيوني كلهه توجع ...

زادت الدوخه ولعبت نفسي كمت للمغسله وضليت استفرغ
وبطني تتكطع وياهه حسيت عله ايد اطبطب عله ظهري
بعدهه رجليه ماشالتني كبل كعدت بالكاع رفعت عيني ولنها
ربى ...
- شجابج هنايه
- انته
- عوفيني رحمه لاهلج

رجعت راسي وضليت مغمض وانه بطني تمغصني .. حسيت
عله ايدهه عله جتفي عاينتلهه رافعه نفسهه وتنكع بالخاولي
دنجت وعينهه علي ومرتبكه انه غمضت ورجعت راسي للحايط
كامت هيه تمسح بحلكي ووجهي وايدي ...

- كوم فوت جوه الكاع بارده وانته مريض
- عوفيني شويه

حسيت معدتي كلبت رديت مره ثانيه استفرغت مدت ايدهه
للماي وغسلتلي وجهي ،، سندتني وطبينه جوه .. تمددت
عله التخم وهيه مدري وين راحت .. انه جنت الوب منا
مصاريني تكطعني ومنا الدوخه وجسمي المكسر ..

- شهااب  اكعد اشرب هالحبايه
- ماليش هاي
- مال مغص
-جيبي

خذيتهه وشربتهه ورديت تمددت .. اجتي غطتني وراحت
انه مدري شلون غفيت رديت حسيت عله صوتهه ..

- شهااااب
- هاااااااااا
- كوم شويه
- شبيييج وياي عوفيني
- دخذ هاي حتى ترتاح
- شني شعندج
- هذا كشر برتقال
- اكل كشر شبيج بنتي
- بس هيج لا تبلعه يوخرلك لعبان نفس والله
- جيبي

عله نومتي واخذته حطيته بحلكي شويه وذبيته وردت اجتي
جايبه كلاص عصير ..
- هاك هذا برتقال وليمون زين الك هسه
- والله زين زين تعرفين ادارين بيج خير مو بس لسان
- اشرب واسكت
-  دنجبي جيبي لو ما مريض جان فركته لحلكج
- امم
- اكلج انتي شعندج جنج خفاش ماتنامين الليل
- انام ليش مانام
- هههه يمتى نايمه من يوم شفتج وشفتيني وانتي نهارج تنظيف
وليلج صافنه تحسبين نجوم السمه
- اني مانام هواي اصلي الفجر وانام للظهر
- اييي مبين
- شلون صرت
- احسن
- زين لعد ارجع للغرفه نام اريحلك من هنا
- مابيه حيل اكوم عوفيني
- ماشي

دارت وجهه وراحت غطيت راسي وشويه وسمعت صوتهه
- شهاااب
- لج هاااا شون مانام
- هسه منو السانه اطول منه
- شتريدين
- مارايده شي جبتلك فراش ياافندي
- اي مشكوره
- تصبح على خير

سدت الضوه وراحت انه نزلت تمددت جانت فارشتلي شجاني
عليهه مو مداريتني وحارت بيه ..

نمت وماكعدت لحد الظهر كمت جوعان فد مره رحت للمطبخ
شفت ربى تنظف ...
- صباح الخير
- صباح النور شلون صرت
- زين الحمدلله .. اكلج انه جوعان بربج سويلي شغله اكلهه
- محضرتلك شوربه
- هاااه اكلج لا تضوجين من حجيي بس انه موش هلكد مرتاحلج
جيف انتي زينه هيج وياي
- هاي شغله راجعتلك المهم اني اسوي الي عليه
- اي شوفي انه اعرفن طينتج
- راح اصبلك هسه
- صبي صبي

تشتغل بخفيه وماحسن الا الصينيه جدامي نحطت .. اكلت واكلهه
طيب لجن بالله العظيم نكهته هَيج بروديه مثلهه هاديه وخفيفه

- اكلج يشبهج
-ها
- يشبهج نفس البرود ياسبحان الله
-اممم
- بالعباس عليج  ماتضوجين انتي هَيج سويكته دومج
- لا
- هاي انتي الجلمه عندج بفلوس ماتكلين غير وحده
- لا هيج بكيفي
- هاااا عجيييب
-امم

وسم كون وسسم هاي انه اكولنهه بكلبي  كل ماتكلي امم ...
للعصر رحت لخوالنه كضيت يمهم اليوم كِله ورديت ثاني
يوم الصبح لبيت عمي انه طبيت جان تطلع بوجهي المسعده
هي وصوندتهه والماسحه وهالرجلين الي تلالي والزنود
زمخت بيهه ...

- هييييي انتي ياصخمه ماتجوزين جم مره كايلج اتستري بلبسج
- معليك بيه
- شننني شننني جا منهو العليه هاااا
- ابويه انته ابويه !!
- انه ابن عمج اكسره لظهرج من تزلين سمعتتتتي لج يابت
الناس انتي ماتكلين هالزلمه وياي بالبيت احتشم شوي مفرعه
وكلنه ميخالف هالجسم علييييش توري للرايح والراد
- اكلك تره اني وحدي بالبيت شمدريني بيك حتجي هسه

بهاللحظه اندفعت الباب وطبت امهه ووياهه زلمه طويل معضل
كاشخ لاخر حبايه ورجال جبير انه انداريت عليهه مالكيتهه زين سوت وله
جان كضيتهه كطعتهه ..

- هااا عمه حياج الله
- هلاا يمه شهاب شلونك
- عله الله
- تعاال ابو مؤيد  فوت شعندك بالباب واكف
- السلام عليكم
- وعليكم السلام حياكم الله

انه رحت سديت البوري وهمه طبو للديوانيه .. طبيت وراهم
وكعدت جان امهه تصيح ..
- ربى وينج بنتي خالج اجه يشوفج تعالي يوم

راحت امهه للمطبخ وانه كاعد واعاين بالوجوه وطبت ربى
لابسه ثوب طويل وشامره الشال عله شعرهه ..
- السلام عليكم
- عليكم السلام ياهلاا بالورده
- هلا بيك خالو
-  شلونج ربى
- الحمدلله

هي نطته هيج نظره وحده ودارت وجهه لخالهه وهالاغم اكلهه
اكل بعيونه يبصبص بكل مكان وانه الوبن ماحلتلي كعده وهاذ
عينه تاكل بيهه وهيه تحجي ويه خالهه .. عاد حجيت بصوت
عالي ...

- ربى كومي شوفي امج شمحتاجه للغده
- ماشي ،، من رخصتك خالو
- مرخوصه خالي

جان يندار عليه الولد وكال ...
- انته  شهاب مو
- اي انه شهاب ابن عمهم
- والنعم  سمعت ماصارلك هواي جاي من تركيا  شلونهه الاجواء هناك
-  طيبه
- هاا شوكت ترجع
- ليش
- مو داشوفك تتاخر لو لا لان عندي كم شغله رايد اجيبهن
من الخارج كلت اوصيك عليهن خاف روحتي اطول
- هااا لا خويه اتاخر يلا ارد

طبت ربى ويه امهه وشايله صينيه الشربت اجتي انطت لخالهه
ولمؤيد وصلت ليمه وهو صفن بيهه يتفرس بوجهه وهي ضاله
مدنجه ودايره عينهه منه جضيت بي ..

- مؤيد
- ها ها
- اخذ كلاصك
- هههه شبيك يمه شهاب
- خير عمه خير

اخذ كلاصه ودنج راسه وابوه صار يتأفف وانه عيوني تجدح
نار اريدن بس اكضه واكضي بي التوبه ... اجتي ليمي شاورتهه
- تذبين صينيتج وتعدلين ربطتج وتجين هنايه بسدي
- ماشي

راحت وبره شويه جتي معدله ربطتهه زين وكعدت بسدي
وهاذ كامت عيونه تنط كل مايعاين عليهه اخزره وخالهه وامهه
يحجون زحمه اكومهه .. جان يطب عمي حاتم سلم وكعد انه
اشرتلهه تطلع وهيه ماصدكت كبل راحت حكهه تشرد منهم
اشو حاطيهه مثل لوحه ويتفرجون عليهه ...

كامت امهه تسوي الغده وضلينه احنه وانه ساكت واعاين عليه
وهوه نفس الشي نريد نتذابح لجن هالاهل موكفينه ....

حطو الغده وكلنه كعدنه الا هيه ماجتي عاد خالهه كال ..
- ام بسام بنتج وينهه
- ها خويه متاكل هيه هسه
- لاا شنو متاكل كومي صيحيهه خلي اشبع بشوفتهه قبل ماروح
- ها اي صار

كامت وانه ذبيت الخاشوكه من ايدي هاي شيفضهه اليوم !!!!
اجتي ووجهه كالبته ..
- ربى شبيج تتهزمين منه شنو
- لا خالو مااتهزم بس اني ماتغده هسه شبعانه قبل شويه تريكت
اكلو انتو بالعافيه
- لا يابه هاي صايره تستحي منه
- اي غير كبرانه قابل ماشاء الله صايره مره
- اي ماشاء الله عليهه
- من رخصتك خالو
- وين رايحه تعاي اكعدي يابه لتاكلين بس خلي نشوفج علينه
متجين من نجيج متكعدين شنو سالفتج
- هاي ولا يهمك خالو هاي كعدت
- ليش ماجيتي ويه امج البنات يسالن عليج
- الشيخ جان رايدني غير مره ان شاء الله
- يلا مره الثانيه اذا ماجيتي ازعل عليج
-  بعد بكيف ابويه اني ماكدر انطيك كلمه خالو
- الله كريم بنتي اكل ابو مؤيد

جنه ناكل وهيه بس روبه اكلت وهالاغم عينه ماشالهه منهه
عاد اشرتلهه تكوم وهي ماصدكت ..
- ها وين
- اشوف الجاي خالو
- بنتج صايره مره معدله ههههعععععع خوش جنه
- ههههههه بعدهه توهه تعلمت على شغل البيت
- لاا وين اكو من هالربى اني ماضيعهه من ايدي تره خاف تكولون هاي اني حاجيهه قبل واعيدهه الكم
- انه مافهمت بله فهمني عمي
- شهاب ابني
- هسه شحجينه عمي انه مافهمت كصد الزلمه بيهه شي !
- لاا ابني مابيهه شي اني رايدهه لابني وهيج قصدت بنيتنه تبقى
النه
- هااااااا ياهو هاذ التريدهه ليه
- ابني مؤيد
- هااااا شتكول عمي تنطيهه لبتك
- ابو مؤيد احنه حاجين كبل بهالسالفه وسديناهه بعد عليش نرد ليهه
- اي واني هسه ماكلتلكم جاي خطاب اني مخليهه على راحتهه
تكمل السادس وبذاك الوكت نكعد ويصيرلنه غير حجي
- ايييي رحم الله امك وابوك هسه الكِل تكف عينهه من البت
ويوم التجون ونكعد كعده زلم ونشورهه يصير خير زييين
هسه انه من رخصت عمي اريد اكولن فرد سالفه والكل تسمعهه
- مرخوص ابني كول
- انه ابن عمها ولي حك وجلمه عليهه وانه ماريدن بني ادم
يناظرلهه عبن هيه عرضي وانتم اجيتم بالاصول والخير والبركه
لجن حد وينحط اي انه ماارحم اليناظر عرضي بغفلتي يوم الي
هيه توافك وبكعده زلم ينشال هالحد
- يعني انته شنو دتقصدني تره هي بنت عمتي لا تنسى هالشي
- وانه ابن عمهااا خلهه بالك زين انه ماريدن اتمشكل وياك
لجن تحترم اهل بيتك وعرضك يوم التصيرلك مره عاينلهه بكيفك
هسه هالشي مايجوز عدنا وكلشي الا العرض ياخوي
- صح حجيك شهاب انه رايي من رايك
- ابو بسام صلي على نبيك
- عليه الصلاه والسلام الحجاه صحيح انه فهمت زين شيكصد
وانته ياابو مؤيد فهمت بعد .. وعرفت عليش هوه كال هالحجوه
- اي فهمت فهمت هايهيه مثل ما تردون يصير
- ياااابه
- مؤيد انته حسبت ولدي لجن هاي بنيتي ووحيدتي وانه مااجبرهه بشي وما ارضى بنظره موش زينه عليهه يجي
وكتهه والله يكدم البي خير
-  زين اذا هيج لعد مايكول لنفسه مو هم محرم عليهه هو
ليش بس عليه يضبط ويمه عادي فهمنه ابن عمها بس هم محرم
- انه مااتطاول عله عرضي وهيه حالهه حال زهره اخيتي
ماتزيد ولا تنكص عنهه
- بسكم ياولد بسسسكم سدو السالفه هاي فضت جلمه وانكالت
وانتهى
- هاي عمي انتهى

اعاينله وهوه وجهه يفور فور صار احمر .. ابوه مبين زلمه
فاهي جلمتين سكت ومافك حلكه بعد ..
شربو جايهم وطلعو وعمي صعد ويه مرته فوك واستلمهه
رزايل وانه جوه اضحك عليهم .. حيييل تستاهل جايبته وجايه
تتبختر بي والله يالله عبالهه تخليلهم الجو ...

كاعد اتفرج تلفزيون واجتي ربى ..
- شهااب
- ها
- شكراً ع السويته ويه هذا همزين خليتله حد
- انه ماارضى بهالسوالف وامج الصوج صوجهه جايبته وجايه
وانه كايللهه سدي السالفه وتدريج ماتردينه عليييش هالملحه ؟؟؟
والله لو يعرف الشيخ لا يكلبنهه جنهم عليهم
- اي والله بس هي مدري شعاجبهه بي ومجلبتلي همزين حجيت
وخلصتني
- چا اذا هيج اكوي ملابسي معلكهن بالزاويه
- ماشي
- اكلج انه ممتعود عليج هَيج حبابه بيج شي !
- همممم
- وسم
- شكراً
- ميلي منا ميييلي

راحت وانه ضليت اتفرج تلفزيون بعدين خابرني نعيم حته
نطلع ،،رحت بدلت وطلعتله للشارع جان جاي ويه صاحب
الي هم من السلف وطلعنه كلنه لكهوه وكضيناهه طاولي
ودومنه لنص الليل والهوسه والصياح تارسه المكان كِله

جينه نرد البيت اشو هاذ صاحبنه صادق ديور وطب بفرع
وطبك جدام بيت جبير ومرتب ..
- هاي شعندك هنايه
- هاا صادق مامش خبر منهم
- ااااخ هو انه كاضلي خيط منهم شيبت والصبر عله متوني
شايله
- ياجماعه شنهي الفلم فهموني بيتمن هاذ
- بيت الحبيبه
- هاه هاه صااادق !! لاااا ماصدكن تحب
- صدك ياخوي انه شيبني هالحب
- احجيلي شنهي العله
- البنت خطبوهه لابن عمتهه وصارلهه ٧ شهور مامنهه خبر
- شترجى خبر بعد جا هيه نخطبت جسب خما جسب
- ايييه تحجي بزودك ياشهاب ماحاكمك كلب انته
- لا تسودني خايب ادوسن عله الكلب وامشي ولا ادورن الباعني
- مباعتني هيه لجنها نجبرت بيهم العادات ظالمه ياشهاب بالله
العظيم كسرت ظهري وظهرهه جيف ان لحمهم مايروحن لغريب
جا والغريب موش بشر
-الله يكون بالعون وهيه وعدتك بشي
- وعدتني تفصخ تشوفلهه سالفه وتفصخ بلكن املنه بالله جبير
- عله ذمه رجل هيه ياخوي لا تكربلهه وخلوهه عله الله
- وانه هيج ضال انطر الوعد
- دمشينه امشينه نرد البيت
- خلني اشبع من هواهم
- بويه ياهوا رحمه لاهلك كله هوا الله و هنه حجارات وكاعد تعاينلهن من ساعه مامليت
- اااخ لو تعرفن هالحجارات شلون يردن رويحتي بشوفتهن
- مسودن ماعليك عتب اشبع بعد اخوك اشبع
- شهاب انه وياك ماطحنه هالطيحه ربك سترنه
- هخخخخخخ انه اطيحن مو بالحيف
- كفيلك محمد يوم طيحتك اسود يصيرن وكول نعيم ماكال
- شنهي بويه بيش طالبني
- يجي يوم واذكرنك بهالحجي
- خايب امشينه نرد شلون نضل صافنين بهالبيت امشينه لايطلع
حد من اهلهه ويبلينه
- شدهتني بعلي هاي مشينه

وصلوني لبيت عمي وهمه طلعو ... طبيت وانه اغني وكبل
رحت المطبخ طلعتلي موزه اكلتهه وانه اتمشى للحجره
طبيت جان بسام يخابر ويتمضحك هاذ هم عاشك شطلعت هاي
وين ماديرن وجهي كلهه عشاك ..

بدلت وكتله ..
- تخليني انامن لو تضل تبسبس فوك راسي
- هههه توكل خويه انه سالفتي مطوله
- شطلعت هاي مو عندك شغل شنهي ماتتعب من الحجي
- بلبل ويغرد يمي ياشغل يابطيخ
- ضلن يخايب غرد وانه اشوفلي مجان انامن بي
- ماتريدلك صاحبه تغرد وياهه تالي الليل هههههعععع
- خليتهن الك

خليت وطلعت انه وفراشي للديوانيه فرشت ونمت ...
ثاني يوم كعدت بالعشره كلهه بشغلهه رحت المطبخ واجتي
مرت عمي لابسه عباتهه وعربانتهه مال مسواك ..
- ها يمه شهاب صباح الخير
-  صباح النور عمه هااا رايحه السوك
- اي والله محتاج شي
- لا سلامتج
- يلا ديربالك ع البيت
- ماشي

جنت اتثاوب واتمطى وطبت ربى شايله سله الملابس
- انتي يمتى كعدتي
- من الصبح
- هااا نسيتن خفاش انتي ماتنامين
- امم
- سويلي ريوك
- شتريد
- شيجي منج نعم الله
- امم
- وسم

عاينتلي ورفعت حاجبهه ودارت وجهه للثلاجه انه رحت طلعت
للمغاسل ورديت ليهه جانت حاطه سماعات باذنهه والجهاز
مشكلته بالبجامه ..

- لا تجثرين دهن ،، هييييي صخمه

ماتردلي جان رحت ليمهه وعتيت السماعات من اذنهه عاينتلي
متفاجئه وكالت..
- شكو
- شكو بعينج مو احاجيج عليش حاطتهن
- معليك
- رببببببى
- ها
- وسمااااا كملي هالريوك خلصيني
- فوكاهه
- شني عيني شنني
- اي فوك ماانته العايل تجي تنافخ فوك راسي
- واكسره لراسج سمعتتتتي انه جيت اكلج لاتجثرين دهن وانتي
اطرشيتي شترديني اسويلج بويه
- بس عوفني كلشي ماريد واني اجيبلك الاكل بس لضل فوك راسي
- وانتي شدعواج هيج ماتحملين بلايه اغاني
-اني احبهن
- حبتج حيه كون وخلصتني من هالخشه
- امم
- وسسسسم كافي تاااممين
- هسه شلون يعني
- خلصينننني بتي وراي شغل مفارغلج
- اني لو انته
- خااايبه رووووحي مني
- انته روح اني داشتغل
- ولي ولي

طلعت للمرجوحه كعدت شويه وطلعت كالت...
- تعال اكل
- جيبي هنايه
- شنو سالفتك انته
- كتلج هناااايه جيبي يلاا تحركي

راحت جابت الصينيه واجتي حطتهه وراحت رديت صحتهه
- جايج بارد
- مبارد حميته
- بااارد يعني بارد تعاااي هاج اشتغلي عدل مو من وره خشمج
اليابس هاذ
- استغفر الله
- تحركي لا تماطلين امشي حمي
-جيب
- احجي عدل لاافركه لحلكج ولي يلاا

اخذت الاستكان وراحت وانه ضليت اكل وردت اجتي جايبه
ثاني ..
- تفضل
- اوكفي
- شنو بعد
- شكر شكر
- تره حطيت
- وانه اريدن بعد شلووون
- لااا انته تريدلك سالفه تتعارك بيهه
- اي ماعندي شغله وعمله غيرج
- شوف نفسك شتسوي واحجي
- اكلج جاي تمسلتين هواي وانه محترمج تره بالعباس اذا اكوم اسحلج هنايه من كشتج
- اكلك لا تسحل ولا شي هاي رايحه وعايفتك براحتك زززين
- وللللي روحه بلااايه رده

راحت وانه ضليت اسبن بيهه .. كملت اكل وشلت الصينيه
خليتهه ع السنك ودفعتهه حته اغسل انه اريدن اعاندهه اريدن
اكسر هالثلجه الي عله لسانهه ...

نفضت المي بوجهه ودفعتهه ومشيت وهيه جرت خلك بس عينهه
تريدن تنط من مجانهه ... رحت للديوانيه جان عله المعرض
دفترها مال الرسم جريته وكلبت لاخر رسمه جانت ..
خطوط وجه وركبه بداخل دايره سوده لجن الوحه موش كامل
رسمه  اخذته ورحتن للمطبخ ..

- هاي عليش مكملتيهه
- جيييب انته شعليك برسمي
- شعندج هيج ترسمين
- شهاب كافي جيب دفتري
- احجي وانطيج
- ماكو شي احجي جيبه
- لجج موش انه التعبر عليه هالتمثيليه انه اعرفن كِلش زين انتي
وراج انه موش خاليه لا وحك ابو فاضل
- هسه شعليك بيه انته
- هسه ماتحجين شسالفه هالرسمه
- هيج اني تعجبني وارسمهه شكو يعني
- اي مو شايفتني زعطوط جدامج ..وراج وراج لو تضمينهه دهر اله احجيج
- اي ان شاء الله
- بالعباس اكصهه لايدي منايه اذا ماطلعت وراج كارثه
- هاي شبيك انته
- تحجين لو شلون
- مااحجي
- زين جا هالدفتر ماتشوفينه
- شهاب كلشي ولا دفاتري عاند بغير شي هنا لا
- هو انه ماعاند الا هنايه وهالدفتر انسيه من اليوم ززززين
- شهااااااب دفتري لاتلح جيبه
- جاوبيني وانطيج
- كتلك ماكو شي ماااكو
- جا عليش هالرسمات التنطك بسكات هااا اخافن هاي انتي !؟
- لااا
- جا منهو
- رسسسسم رسسم هيج حاله حال كلشي
-لااا ماقنعت بعد
- اوووي اخذه خلصني وضل انته فكر بكيفك
- انه حخلي عندي ادرسنه زين وافهمن شكضيتج
- امم

راحت لشغلهه وانه خذيته وكعدت عله المرجوحه واكلبن بي
نفس الافكار مرسومه خمس مرات كل مره بصيغه شكل
هالوجوه مابيهه معاني بس شخوط وحلوك مخيطه جذبني
نجمه مرسومه بنهايه جم ورقه جنها مثل التوقيع هَيج يعني

رحت للحجره وضميته بنص غراض بسام كلت اخافن ادوره
بغراضي ماتلكاه .. بدلت هدومي وطلعت كعدت بالمطبخ اكشر
برتقال واعاينلهه وهيه تنظف عفيه بنت ماتركد بمجان هالرجول
ماتتعب من المهورف ...

ردت امهه من السوك وانه عفتهن وطلعت رحت للسلف مريت
للمضيف كضيتهه سلام وكعدت شوي بينهم وطلعت للزرع
واعاين هالخضار والطيور عاد نزلت للماي وخذيت المشحوف
ومشيت بهالماي الزلالي بوحيدي واعاين للمجان من كل صوب
واذكر وكت جنه جهال شلون نتسابك بالسباحه من هالصوب
للصوب الثاني ونصيد السمجات ونحط الحطبات نعلكهن ونكعد
انتدفى يمهن لحد ماتنشف جسامنه وهدومنه جنه نخليهن بعلاكه
ببطن علاكه ونشدهن زين ونعلكهن بركابنا وننزل للماي ... 

شافني صياد اشرلي اجي ليه وانه درت المشحوف للجرف
ونزلت ليه ...
- هاا شنهي حلتلك الفره بالماي
- ياخوي تريح رويحتي
- جنك مضايك عليش
- تريد الصِدك ياصياد انه رايدن شغل ومالكيتن
- هااه عليش الشغل خيرنه جثير ياشهاب
- انه ماطلبن من احد فليساتي اجيبنهن بجدي انه بس اريدن اجمع
فلوس السفر ماضل شي لردتي الدوام حيبلش  وهم يلا اروحن
ارتبن اموري غادي
- اي بالله صدكت جا ماتشتغل ويانه بهالكياعين
- وشكد احصل منهن !!
- هالكاسمه الله
-  لا يابه انه ماعندي غير شهر اريدن الملي خوش فليسات
ماريدن انطر الحصاد
- امشينه ننشد الشيخ
- لا لا ماريدن حد يعرف سد السالفه انه اجيتن اشم هوا واردن
لبيت عمي
- يااه شنهي عله بختك خويه ماتغده هنايه
- لاا اريدن امر لزهره انشد عليهه صار زمان مامجابلهه
- جا امشينه اوصلنك
- يلا امشينه

مشيت لبيت اهلي ونزل صياد سلم ورد لاهله ،، تلكتني زهره
- شهااب اخوي ياهلا ياهلا
- زهرتي شلونج ياخيه بالي عندج يشهد الله
- الحمدلله ياخوي زين انك جيتني انه طكت جبدتي عليك جا
بالديره وماشوفنك عليش
- حكج علي ياخيه انه هالشغل الكضه بيه وله انه رويحتي يمج
تعاي ليه عايني شجبتلج
- شنهي ياخوي
- هاي كلاده فضه عله كد الحال ياخيه ذكرتج بيهه باول فلسين
خذيتهن
- يابعد رويحتي ياشهاب يمه اروحلك سبع فدوات يابعد عيني
تشكر يابن امي يشهد الله بعدال كِل الذهب دامهه من جدك وتعبك
يارويحتي
- ههههههه امشي البسنهه لج
- ههخخخخخ يلااا اليوم اغورن بيهه بنيات السلف كِـــلهه
عبن اخوتهن مايداروهن مثل اخوي

طبينه لحجرتهه وذبت ربطتهه واجتي كعدت جدامي وانه لبستهه
الكلاده وكامت تعاينهه بالمراه وردت حضنتني ..
- يابعد رويحتي يمااااي اعشكنك انه ياخوي
- هههههههههه اكولن زهره مرت ابوي شلونهه وياج بعدهه
تلطلط كل ساع
- جا هي تتوب تهارف هنا وهنايه هذاك اليوم دكت رجل لابوي
اله ازوجن زهره
- شنههههي
- اي وحك العباس سوتهه ليله الكشره علينه لا تسكِت وتكض
لسانهه ولانهه الحاجيتلهه حجوه الزينه كاضيتهه تسم بهاذ وذاك
- منهو هاذ  التريد تزوجج ليه
- ابن رفيجتهه تريدنه عبن بتهم الجبيره يريدهه محمد ومايرضون يطوهه كالت ازوجن زهره ليهم واخذ بتهم
- وحك علي اشكع الكاع واطمهه بيهه هي ورفيجتهه شنهي
بويه تايهه هاي انه هنايه وهيج تلعلع جا من اروحن شتسوي
امشي صيحيهه
- شهاب عليك العباس ياخوي كف السالفه نسدت وراحت
- اليوم نسدت باجر ترد تنفتح كتلج امشي صيحيهه امشششي
- اي اي رايحه

راحت وردت جتي هيه ومرت ابوي جنها فيل اجتي ومتخوصره
- نعم
- ام محمد انه جم مره منبه عليج زهره مالج شغل بيهه هااا
- عشتو وانه شعلي منهه
- جا عليش هالحجي منهو هاذ الكلج دوريله عريس وهاجمه الدنيه عليهه عاتبين عليج اخيتي خط احمر لا تمسيهه لا بورد
ولا ماي وحك الحسين ان سمعت جايبه طاريهه بعد هالبيت اطبكه عله روسكم وابن ابوه اليفك حلجه جدامي هاي انه اخر
مره اكولنهه لج جيف انتي مره جبيره وحرمه ابوي هادي وياج
وله غير حرمه  انتفها
- خايب انه ردتن مصلحتهه صكد لو كالو خير تزرع شر تحصد
- كفي خيرج وشرج منهه ياحرمه انه اخيتي اريدنهه تتخرج
وتلزم شهادتهه ذاك الوكت يلا تزوج
- هه هاي تخرج بيهه خير هاذي
- عليش يمه مابيه خير احسن من بتج
- زهررره
- سكتت خويه
- ام محمد جلمه وحجيناهه وانتهى  ززززييين
- زين زين
- اخذي راحتج،، وانتي زهره امشي حطيلي الغده يلا وراي طريق
- شنهي خويه ماتبات هنايه
-  لاا عندي شغل خيتي جم يوم واردن
- الله كريم ياخوي

تغديت ورديت لبيت عمي وثاني يوم طلعت اشتغل عماله ويه
ولد صاحب بسام وصاه عليه ولزمنه بيت انه ووياي ثلاث ولد
بعد .. جنت اردن بالخمسه العصر كِلي تراب وصاير ابيض
من الشبنتو وايدي تجرحت وغاديات خشبه ...

بالليل بسام يتلفن سطر راسي والنوب حول عليه يريدن احاجي
بت خالهه لصاحبته وانه بزعت روحي شلت فراشي وكمت
نفس مچاني مديت الفرش وتمددت جانت ايديني مجرحه وتحرك
كلت اروحن لربى اخذ مرطب شي ادهنهن ...

صعدت جيت ادكن الباب ولنه مفتوح شويه دفعته عاينت ماهيه
انه ماشفتهه جوه مششيت منا ومنا واعاين من الدرج لفوك
باب السطح مفتوحه وانه كبل ركضت صعدت ..

وكفت صفح يم الباب واعاينهه بيدينهه شي تشكك بي وتتشاهك
انه حتسودني هالبت شمالهه!!!!
مشيت ليهه ..
- شعندج هنايه
- هم انته
- شبيج تعاي ليه
- مابيه شي
- عليش هيج نفسج سريع مريضه شبيج احجي
- هيج مختنكه شويه
- شمصعدج هنايه بنص الليل ماتخافين انتي
- هو شكو حتى اخاف
- شنهو الذبيتي هاذ
- هيج ماكو شي
- لتجذبين انه شفتج شكيتي شي وذبيتي
- كتلك ماكو شي
- اخافن هاذ من السحوره وكاعد تكطين بي هنايه بنص الليل
- هااي شبيك شهالحجي
- جا شني بويه شعندج سولفي بري موكفج
- ماكو شي احجي خرابيط هاي عوفهن وبعدين انته شكو لاحكني
- انه ماميت عليج هو انه روحي بزعانه منج
- اي مبين
- شنهههي لا تصدكين نفسج وعبالج انه كاتل روحي عليج
بنعال ماشتريج
-اممم
-وسمم احجي شجنتي تسوين هنايه
- ماكو شي
- رببببببى لا تجفريني بهاليل احجججي هاي شنهو الذبيتي
شمصعدج هنايه شنهي انتي ماتنامين ماتتعبين تهورفين ليل
نهار ولانوم ولا اكل شنهي بويه ملج جن انتي فهمينه
- عادي
- لجججج اسلوبج الزفت هاذ بطلي وياي لاافركه لحلكج
- اممم
- صبرك ربي تحجججججين لو شووووون انزل اصيحن ابوج
واحجيله ششفت
- انزل شسويلك كتلك ماكو شي هيج اني مختنكه واجيت هنا
شبيهه يعني
- ايييي وهالزفت البيدج مدري شصخمتي بي شنهو
- ماعليك شي يخصني هذا
- انه كايلج من كبل انتي وراج شي موش خاليه وهاي الله
يدزني عليج بكِل مسيه اشوفن صخامج
- يعني شوراي ها كلي بله شتفكر
- انتي التكليلي شنهي الوراج انه لا امج الحايره تجيبلج الصحبه
ولا ابوج الشايفج ذيج الجاهل انه عيني عليج واعرفنج ضامتلج
ضميمه وستين الف مره كتلج يبت الناس احجي اساعدنج انه
لجن انتي هالراس مايكصه فاس
- مشكووور لانتباهك ومساعدتك بس اني مابيه شي صدك هالسالفه عاد وكافي كل شويه ناطلي وشعندج وشعندج عوفني
عسى ما اطلع شيطان هم عوفني
- انه حجر خلك وياج واشوفن تاليهه وين يربى
- امممم
- وسسسسسم لهالحلك امشي طبي جوه
- هسه شعليك بيه روح نام عوفني
- اييي واعوفنج بنصاص الليالي بالسطوح مدري شتصخمين
طبي جوه وان عتبت رجلج الباب هاذ مرت اللخ اكسررهه
يلااا جدامي لاتخلين صوتي يعلى جداااامي يلاااا

نزلت وانه ضلت بالي شنهي الذبته من السياج ؟؟؟؟ طبيت وراهه
- هسه شكو بعد
- مالي خلكج هيي جيبي مرطب شي ادهن ايديني مجرحه
من الخبط مال الصب يبست
- اممم
- وسسسمممممم سممم
- هااك
- جيبي ولي انطمري يلا واذا شفتج تطلعين من هالباب اكسرهه
لرجلج تهدي واركدي لاتضلين تفرفرين بنص الليل جنج خفاش
نامي مثل هالوادم
- اممم
- لحِد ياعوبه

عفتهه وطلعت بعد مادهنتهه لايدي .. نزلت ردت انامن وهاي
بالي ضلت شعدهه هناك شسوت شمرت ؟؟؟؟؟ كلن كلبي هالاسئله تالي نمتلي ساعتين وكعدت بالخمسه بدلت وطلعت
للشغل وهناك انه منعس واشتغل وبالي هالصخمه شعدهه
كلت اضلن اراقبهه واشوفن تاليهه ....

رديت العصر سبحت واكلت وماشفتهه رحت نمت وكعدت
فايت وكت العشه صايره ساعه ١٠ خذتني النومه عمي جان
نايم وبسام بره وبس حيدر يتفرج تلفزيون انه وياه مانتحاجى
هواي هيج شجم سالفه .. كمت للمطبخ عاينت من الشباج
لكيتهه كاعده تقرا وباذنهه السماعات عفيه بت ماتمل !!
رحت ليهه ..

- ربى
-ها
- زين تسمعين زين
- شتريد
- كومي سويلي عشه
- ماشي

رديت وياهه للمطبخ وكعدت اعاينهه وهيه تسوي الاكل جريت
كتابهه وضليت اكلبن بي ... جان كتاب اسمه
"واحد ولا احد ومائه الف " ...
- شعجبج بهالكتاب
- ولا شي
-چا عليش تقري
- اكضي وكت
- ماتكضين وكتج بشي زين
-مثل شنو
- ....
- هاا جاوبني شنو الشي الزين !!
- انتي شتردين تصلين
- ولا شي انته حجيت واني سالتك شبيهه هاي
- بالعباس جنج حيه
- شجابك عله الحيه لعد
- بطني جابتني كملي اكل واسكتي
- انته اسكت واني اصلا ساكته
- خايبه ماتنجبين لا الطج عله حلكج ابلعج سنونج
-امم
- ميلي مني ميلي

خذيت كتابهه والام بي اثري وطلعت كعدت بمجانهه ارد اشوفن
شنهي العاجبهه هيج .. شغلت الاغنيه جانت " يمتى الكاك "
لسعدي الحلي انه انصدمت صراحتاً جا هالمسودنه تسمع سعدي!! وعليش بله هالاغنيه بالذات !!!

ضليت اسمعهه واكلب بالكتاب جانت مرسومه نجمه بنهايه
جم صفحه كلت ارد اشوفن شنهي هالنجمه الذابحتنه بيهه !!
قريت الصفحات هذن مابيهن شي هيج حجي عادي جا شنهي
الكضيه ؟؟؟؟

اجتي جايبه الصينيه حطتهه بسدي ووكفت متجتفه ..
- شكو تضيع وكتك هيج روح سوي شغلات زينه
- هااا حضرتج تبسمرين لو شني
- شعندك ماخذ جهازي مسمحتلك اني
- وانه مانطرج تسمحين ياست
- بس هاي مو اخلاق لازم تستاذن
- كييييفي انه اخذ ارد كيييفي
- زين لعد ماشي جيبهن واكل
- جنج استسلمتي هههخخخخخ
- اممم
- اكلج شنهي انتي ماتوبين من المأمآه
- لا ماتوب جيبهن يلا داروح
- وين رايحه
- بكيفي شعليك انته
- هااااا تردين تسوين مثل ماسوي
- ماحب اقلدك بس هي كل واحد بكيفه متشوفني سكتت لان كل
واحد بكيفه
- هاااا هم عندج عكل وتحسبيهه زين
- امممم
- وسسسسم هاج ويلاا ميلي
اكلج حضري الجاي يلا تولين لحجرتج
- امم
- وسم كون بهالحلك

ضليت اكل وانه اذكر جلمات الاغنيه ..
" ياواحه ورد وتفوح يا اول عشك بالروح
سالفتي طويله وياك يمتى الكاك "

انه كلت هالبت عاشكه وهاي كلشي يصير يثبت صحه شكوكي
بالله بس اعرفنهه صدك لاامسح بيهه الديره كِلهه واشمرنهه
للجلاب ...

رحت خذيت الصينيه للمطبخ ولكيت الاستكان محضر والجاي
ع المهداره صبيت وشربت ورديت لحجرتي ...

ثاني يوم  رديت من الشغل كِلي وصخ ورديتن المغربيه ماكدرت
اسبح غفيت بهدومي وهي نومه لل ٢ بالليل كعدت عركان
اعاين بسام نايم خذيت هدومي ورحت للحمام فتحت الباب كبل
وجان ماحسلك الا البخار بوجهي عاينت ولنهه ربى كاعده
وحاطه راسهه بنص رجليهه وايديهه لافتهن عليهن وشعرهه
الاحمر نازل منا ومنا وانه عيني صارت عله ظهرهه ابيض
كشطه والشامات ناثرات عليه انشدهت لا اعرفن ارد واسدن
الباب عيني ماتحرك ورجلي تيبست بمجانهه ...
زين اشو هيه لا حست لا تحركت شنهي ميته !!!!!
بالشافعات سحبت نفسي وسديت الباب وضليت احومن
عركت بالزايد انه شجاني شلون اعاين عليهه هيج انه اعاين
لعرضي من اهمداني ....

ضليت كاعد وانطرهه تطلع والدكايك جرت ساعه اعاين الساعه
صارت ٣ شنهي ماتحس ماتمل ؟؟؟؟ وانه احومن هالشوفه
ماراحت من بالي اريدنهه بس تطلع .. وتالي لل ٣ونص يله
طلعت لافه منشفه عله راسهه ولابسه برموده انه عاينتلهه
دارت وجهه وصعدت ...

رحت للحمام طبيت فتحت الدوش منهو اليسبح بمي حار بعز
الصيف شبلااهه هاي !!!!
حسيت رجليه خذتني للسله البيهه هدومهه وايديني بلايه
وعي جرت بلوزهه جيت اذبه ولكيت نفسي اشمه هنايه
انه انتهيت فر عكلي فر وعرفتن هالشوفه ماتعدي بخير
هنايه شهاب انغلب عليه .....
.
.
.
يتبع
اعتذر للتاخير حبيباتي وتعويضكم يجيكم ادللو 😍💜💜