رواية من فجر ديسمبر الفصل الرابع 4 - بقلم Zoka 🌷

من فـجـر ديـسـمبـر
🍁
🍁
طلعت للمضيف وكعدت حذو عمي حاتم جان يكلي ..
- بعد عمك كول للمره اتِحَضر ورانه رجعه
- شنهي عمي ماصارلنه يومين هنايه عليش مستعجل
- بويه انه عندي شغل وربى ممرتاحه تريد ترد
- هااااا اي كول المسعده امرت
- الزم لسانك شهاب لاتعدى عله بنيتي
- هسه شكلنه
- تراها العزيزه لاتغثنها فهمت
- هسه انه جاي صوبها كفيلك العباس سلام ممسلم عليهه
- هسه انه كتلك لا تسلم بس لا تناكر وياهه وفضت السالفه
كوم كللهن ايتحضرن يلا وليدي
- ان شاء الله عمي

كمت رحت للمطبخ ومن الباب صحت ..
- ام بسام عمه وينج
- هلا عيوني كول
- عمي يكول خلي يتحضرون وراكم رجعه
- هااا مو شلون
- شني اكو شي
- ههه لاا ماكو بس فدوه شهاب اقنع عمك منا للعصر نرجع
- الزلمه عنده شغل ومو بنتج تريد ترجع بعد عليش ضالين للعصر،، عمه شصاااير احجيلي حته اعرفن اتصرف
- صخام بوجهج يا ناديه اصخااام
- عمه هسه انتي شبيج تبسبسين احجي وفضيهه خلي افهم
- اروحلك فدوه يمه لاتخلي عمك يسمع هالحجي بروح امك
ياشهاب
- والحسين مااحجي بس فهميني شكووو
- هاي ربى مو هنا طلعت
- شنيييييي وين ولت
- جنه كاعدين يم الحجيه وهي شويه ضلت تتلفت وكالتلي راح
تطلع سالتهه وين كالت مادري بس اريد امشي لوحدي وراحت
واني هسه اجيت اريد البس عباتي واطلع اشوفهه وين راحت
وانته اجيت
- هيه هااااي سالفه ياعمه تخلين جويهل هالكد كدهه تفتر بروحهه
بهالسلف ادري ماتكضيهه من ايدهه واتكعدينهه استغفر الله نسوان عله بناتجن ماتكدرن ،،، طبي جوه انه اروحن اشوف وين
ولت ست الحسن

عفتهه تحجي وتوصي وطلعت واعصابي نار وين تولي هالصخمه لوحدهه ،،، ضليت امشي من وره البيت وكبل
للزرع واعاين منا ومنا وماهيه الدرب كله انه اسب بيهه
جان المحهه يم النبكه تروح منا وتجي منا ،،ضليت واكف
اعاينهه هاي شبيهه تسودنت !!!

مشيت الهه ووكفت وراهه بمسافه ...
- شعندج هنايه
- وانته شعليك

كالتهه بلا ماتندار عليه ضاله عينهه تفرفر كضيتهه من جتفهه
ودرتهه علي ،، عاينتلي هيج نظره ملل وتجتفت وضلت تصفن
بوجهي ..
- هاا
- وعلااا كون تعلعل ضلوعج شمطلعج بهالظهريه هنايه وحيدج
وجماله ملابسه عباه
- هسه غاثك هالشي
- چا حرمه مننه تفرفر وحيدها ومانغث شتردين يمه اصفكلج
- اريدك تروح
- امشي جدامي يلااا
- اني ارجع
- كتلج امششششششي جداااامي لاتخلين صوتي يطلع منا الوادم
- شهاااب

جنت اصيح وهيه كالت اسمي برتابه عاينتلهه وانه طابك حواجبي وهيه نزلت ايدهه وكالت ..

- اني اجيت عندي شي هنا اكمله وارجع هالمكان حافظته اكثر
منك مااتيه ولا يصير شي تكدر تروح تكمل شغلك وكول لامي
ماتاخر
- شنهي هالشغله بله
- خاصه
- ماعدنه خاص هنايه
- وماعدنه ملحه هم كلمن يمشي بشور جبير واني الشيخ منطيني
الحريه بمشيي وكعدتي وين ماريد لاتكعد تضبط عليه
- هو شطلع عينج غير الشيخ
- زين مدامك تعرف لا تلح وياي
- جنج نسيتي نفسج ياربى وتعدين حدودج وتجاوزين شنهي بويه
مالج رداد
- من اغلط اني ارد نفسي
- لساااانج كضي لاكصه الج انه مو مثل هالتعرفينهم تره انه
ماعندي مره تلعلع بلسانهه وتتمشيخ براسي
- شايف نفسك هواي هو اني شعليه بيك عندك وماعندك روح
بطريقك وخليني بطريقي
- رببببببى وحك العباس لو ما الوادم هنايه جان كسرت ضلوعج
- اممم

اندارت ومشت صحت عليهه ماترد جان تندار عليه ..
- اكلك تعرف منو يكعد هنا
- من تحترمين اجاوبج امشي للبيت يلااا كافي مصختيهه
- بس جاوبني وارجع
- وانتي شعليج بيهم
- شهاااب تجاوبني لو لا
- لا ماجاوب ارد اشوفن شسوين
- كيفك

انه انتجيت عله النبكه وهيه ضلت تفرفر بعيونهه على كل صوب
- هااااا يامسعده مافضت شغلتج سمطتنه هالشمس
- معليك بيه روح محد جابرك تبقى
- انه مارجع اذا مو رجلج عله رجلي وارد اشوفن شني الصارلج
ساعه تفرفرين عليه
- كيفك ضل شسويلك
- شكد صلفه
- امم
- صخمه مو شمسه انتي شكول شمس انتي ،، حرام بس خلقه
لا اخلاق ولا فهم ولا علم
- اممممم
- وسسسم كون
- امم
- حكفخج عله حلكج
- امم

ردت اكضهه الزكهه عله الشجره واجاني صوت نعيم وراي
انداريت وشفته يمشي صوبي ويأشر بايده واجاني يركض

- شهااب جنت ادورن عليك ياخوي كلت ماكو غير النبكه
- هلاا ياخوي جنت بشغيله هنايه يمتى جيت
- هالساع اجيت ماريدن افاركك

عاين عله ربى الي جانت واكفه وصافنه عليه وعاكده حواجبهه
وتعاين بنص عينه وهوه عين علي وعين عليهه

- كريبتك ؟
- اي بنت عمي

انطيته ظهري وغزرتهه وانه صاك اسنوني .. عاينتلي بعين
فارغه جنها تشوف ومتشوف وتالي دفعتني ومشت وحاطه ايدها عله راسها ،،

- نعيم اوصلن البت واردلك
- ميسر يخوي

مشيت بسرعه وراهه وكضيتهه من جتفهه ووكفتهه ..
- شجااااج هااا هاي جيتج هنايه تردين تشوفيه !!! منين
تعرفينه احججججججي لا بالعباس اصلخج هسه
- عوفني
كالتهه وهيه بالكوه تجر النفس دفعتني ومشت وانه كضيتهه
من زندها وجريتهه ..
- والسماج ربى اليوم اذا محجيتي منين تعرفينه لنعيم اكتلج
خلاص هنايه اذبحج ومايرفلي جفن سمعتتتتتي
- اريد الشيخ صيحلياه
- لاتطلعيني من ديني هالمصخم شمعرفج بي شعنددددج ووييياااااه ربببببى تسمعيننني مووو عليش متردين لاااكسرج بالقران احجججي صبري خلص وياج احجججي لاا اذيج

راحت وهيه لازمه صدرها وبالكوه تتنفس وجهه صار احمر دم
كضت شجره وانتجت عليهه ،، رحتلهه ودنجت ليهه
- شجااج يمعوده حتسودنيني بالعباس
- اريد الشيخ
- يامصخمه عنده ضيوف يهدهم ويجيلج !! شتردين كولي انه
عندج
- اريد هوا اختنكت
- جا هاذ هوا الله مو بيدي وانطي لج اكعدي وعلكيفج تنفسي

دنجت وتعصر بعينهه وترد ترفع راسهه وتتشاهك للهوه
انه انسطرت بالعباس جا انه وياهه عليهه مافهمت!!
- يبت الناس شجاج لا يبلوني هلج بيج كومي اردج البيت
- عوفني بس عوفني
- لا عبالج انسى سوايتج عليش هيج تعاينيله جا انه مو بعينج
ابن عمج وبسدج وعينج ع الزلم
- عوفني شهاب
- شنهههههي اعوفنج وسواااايتج هااااا
- هو حلو واباوعله ارتاحيت
- رببببببى

عصرت وجهه بايدي وهيه تتشاهك وتالي خربت وطاحت علي
انه حرت هنايه شسوي ياربي اضربن عله وجهه ماتصحى
تالي شلتهه وركضت بيهه .. هسه انه شجاني عليهه ماعفت الحجي بعدييين ،،، وصلت كريب البيت صحت عله الولد

- افتتتتتح الديوانننننيه
طلعت امهه تركض وتضرب عله وجهه انه عفت الكل وطبيت
مددتتهه واجوي ابوهه والشيخ ..
- بووويه شمسه شبلااههه شهاب
- شعرفني انه .. ضلت تشهك وتكولن اختنكت اريدن هوا
وتالي طاحت
- سوووده عليه ييمه ماتهنيتي بعمرج
- ذكري الله ياعمه جيبولي مي بسررررعه

انطوني كلاص المي وضليت اشمر عله وجهه وافك بربطتهه
وامهه تفرك بصدرهه وايدهه وهي ماكو فاقده جان الشيخ كال..

- شهااب وخر بعد ابوك .. كومي يحرمه علتهه عندي انه
- شيخ شني الكضيه فهمني
- بسك عاد شلشتنه جيبيهه ليه
- ياشيخ داخله عليك بروح اجدادك بنيتي امانتك
- دفجو عن البت خلها تنفس انه خنكتوني جا هيه شلون

وخرنه منهه والشيخ نزع عباته وخلاهه عليهه وشال راسهه
خلاه بحجره وضل يمسد عله وجهه وبيده الثانيه السبحه ومغمض
عينه ومادري شيكولن بس ابوهه واكف وساكت وعينه عله
الشيخ وماحجه لو حرف جا شني العزيزه وهيج ماهزت جدامه
عليهه !!!!

ماعدت العشر دكايك والبت فتحت عينهه رفعت راسهه ابتسمت
للشيخ وهوه ابتسملهه ودنج باس راسهه وهيه جرت ايده وباسته
براحه ايده اعاين لابوهه واكف يبتسم وامهه رافعه ايدهه وتدعي
ودموعهه تصب وانه مثل الاطرش بالزفه لا منا ولا منايه

- بويه شنهي واحد يفهمني شصار البت ماتت وحيت هيج
بجم ايه وتسبيحه !!!!
- جا صعبه عله ربك ومكدوره للدغتور!!!!
- انه اخوك شنهي شيخ بختك من ياجد طالع وهيج تحيي الوادم
- من جد الخلفوك يا مسودن تحجى عدل
- سموحه ياشيخ انه بس مصدووم وحك عينك انه مافاهم راسي
من رجلي
- احسن خلك مسطور ،، ها ياشمسه شبلاج بويه خذيتي حيلي
- اختنكت كتله اريد الشيخ وهوه ماقبل كلي عندك ضيوف ميهدهم
ويجيج
- هي هيييي شبيج انتتتي شبييج علكيفج يابه
- هص ولا جلمه حسابك بعدين ياشهاب كملي بويه
- اي وتالي بعد ماذكر شصار
- نامي بويه ريحي بالج وانته جداااامي
- شيخ
- جدداااامي شحجيييت

خزرتهه وطلعت واجاني الشيخ مشى ومشيت وراه وكف بعيد
المضيف شوي وكاض السبحه بايده ويأشر علي بيهه
- اسمممممع ياشهاب جلمتين ماينردن ولا لي غيرهه
شمسه ان كالتلك اريدن هالكمر تصعد تجيبه ليهه وترد وماتفج
حلجك بحجايه سمعتتتت
- شيييخ شنهي عله راسهه ريشه هالشمسه
- اي عليه ونص
- شيخ جلمتك عله هالراس انه ماكصر وياهه هاي بنت عمي
وحالهه حال زهره اخيتي لجن انه شلون اخذك من نص المضيف
ليهه جا ماترهم ياشيخ تعوف الوادم وتلحك للجويهل
- هالجويهل هاااذي لو صايبهه شي انه الوادم تفيدني !!! اهد
السلف كله واجي ليهه مو شجم زلمه ... شهاااب شمسه من
تنده وتكولن اريد الشيخ تعرررف شنهييي هاااي
- شنهي واليرحم والديك كلي انه حتسودن
- هنايه البت لاحول ولا كوه انه كوتهه وانه الاسند ظهرهه من
ينحنى هاي عينك تشهد شلون ردت الروح ليهه بيه شمسه كضيتي ومالي غيرها ولا ليها غيري ان تماطلت وياهه بالحجي
ياشهاب وحده ربك اليخلصك من اديني فهمت
- فهمت شيخ فهمت

دار وجهه ومشه انه من عصبيته بالحجي صدكت بحجي صياد
وزهره من كالو اليدنالهه الشيخ مايرحمه .. جا انه ماعرفت
اتلاشى اله ويه هالصخمه ؟؟؟؟

رديت للديوانيه لكيت امهه عدهه وابوهه راد للمضيف
وهالصخمه لساهه متغطيه بعباه الشيخ ولا جنها مسويه
مكسوره من كبل شوي ... انه ضليت الوبن وعمتي عينها
عليه وانه اروح وارد وبالي شعدهه ويه نعيم !!!
بس جنه مايعرفهه هوه الا هيه غاصت بي هيج بنياتنه غاديات
بلايه شرف !!!

- ماما اريد مي
- اي بنيتي هاج اشربي ييمه يابعد بيتي
- حمدلله ع السلامه يابنت عمي
- الله يسلمك
- مافض حسابنه تره خليها بالج
- مالي خلكك
- وانه ماميت عليج لجن هالصار ايتفسر ززززين
- اممم
- ابني شصار شنو فهمني
- هيج سالفه بينه عمه
- اي غير تحجولي شكووو شجاهه بنتي هيج انكلبت جانت
مثل الورد يمي شصااار وهيج وكعت
- الخووف يعمه الخووف
- عوفي ماما هذا ماعنده سالفه
- احترررررمي لج لا اعلمج الاحترام شلونه فوك شينه كوه عينه
- اكلك انته ماجوز مني
- من تجرين عدل اهدج انه ماطايكج سمعتي
- زين تعال كولي شتريد واكلك اني مابيه حيل كل شويه ناطلي
- جا خوش انه هم ماريدن شوفتج تجيب البله
عمه من رخصتج جلمتين احجيهن وياهه
- لااا والله ماطلع شنوو عينك عينك اضمضمون عليه
- لا ماما خليج اني ماعندي شي اضمه عليج حبيبتي احجي شتريد امي مو غريبه
- جا زين لا تهاب ولا تستحي
- اي شتريد
- الصار فسري
- ماعرفه بس بي شي جذبني وباوعتله بس هيج
- هاااا وحجيج مال حلو
- ردت اضوجك مو اكثر
- وشايفتني جاهل واصدكج
- هاي بعد ترجعلك تريد تصدك متصدك اني العندي كلته
- والسماج ربى ان ماحجيتي الصدك بعلي انعنع ضلوعج
- شبيك على البنت شهاااب اني بنتي ماتجذب سمعععت
- عممممه لا تجفريني انه واكف ويه صاحبي وهيه عينهه عليه
اكلته اكل شترديني اصفكلهه جا شني حرمه ماتعرف الاصول
ماتهاب ماعينهه تنكسر هيج ترباتكم تحط عينهه بعين الزلم وابن
عمهه بسدهه جا هسه الزلمه شيكولن علي بنات عمه مالهن رداد
هيج حريم الشيخ عينهن زايغه
- اييييي كااافي شخبصتنننه
- انننننججبي ادبسززززز زين مني وساكت لهسه ماحركتج
- شوف شهاب اني مااجذب والحركه الصارت لا اراديه هيج
هو بي شي خله عيني تركزله اني لا اعرفه ولا شايفته من قبل
- هييييه شنيي بي شي شعنددده هااا كولي ششفتي احجججي
لااا اسكطج ومحمد
- شهاااب
- ربببى تره ماضل دين برااااااسي تحجين لو احرك البيت عليج
- اففففف
- وسممممممم كوون بهالكلب الاكشر صخمتي وجهههي كدام
صاااحبي وتاففين

كامت واجتي ليه وكالتلي ..
- دنك داكولك
- احجي فضيهه
دنجتلهه كونن انه طويل حيل عنها .. شاورتني وكالت..
- صاحبك جان وياه شي يشبه الموت بارز بعينه
انه هنا جمدت شدراهه هيج نعيم موات !!!
- شلون عرفتي
- يعني صح
- اي شعرفج
- مادري لمحته بعينه هسه لا تضل تالف عليه حجي بكيفك
هاي حجيتلك وكافي سد الموضوع زييين
- موووو هيه بكيفج
- عفيه تعبانه عوفني لتلح
- انتتتتي لسانج ماتكضي
- امم
- انه اعلمج يربى ما انتهينه بعد
- ماشي ،، ماما عفيه اريد دفتري
- امشي نرجع هناك وتفهميني عدل شصار عوفي الدفتر
- لا ماريد ارجع عفيه هاي رباب ماطيقني ولا اطيقهه خليني
بعيده عنهه
- لعد فهميني هالحجي الكاله شهاب شنوووو حتخبليني
- ماما شبيج اني جنت واكفه يم النبكه واجه شهاب وتعاركنه
شويه واجه هذا صاحبه مدري شسمه واني هيج راحت عيني
عليه وهو كلب الدنيا
- اي اي مثل شربه ماي سويهه
- شهاااب هالحجي صدك
- اي عمه هاذ الصار ماكو غيره
- عيب بنتي من ابن عمج وياج عيب هالسوالف احترمي ولا تضلين تراددين اكبر منج عيب
- حاضر ماما مثل متريدين بس جيبيلي دفتري عفيه
- ديلا حجيبه انتي الزمي لسانج كافي مناكر

راحت وهيه ردت تمددت وتغطت بالعباه ...
- مو صرتي زينه جيبي العباه اردهه للشيخ
- ماا عوفهه يمي شعليك انته
- اللهم طولج ياروح يطبج حريشي هسه انه شكو حارك دمي
- متكول لنفسك
- انتي اله اكصه للسان البله هاااذ يله توبين
- اممم
- استغفر اللله استغفر الله

هديتهه وطلعت ضليت انافخ وانه بره وتالي جاني نعيم
- يابه وينك انه صارلي ساعه محموس بشمس الله وانته هنايه
- لك هاي طاحت وغمي عليهه ورديتهه
- لاااه خيرها
- هيج شويه اختنكت كلي شلون صحتك
- عله الله انه مسلمهه الروح لربك
- كول يالله يمعود انه وصيت صاحبي يدورلنه دكتور بغداد
ونروح ليه وان شاء الله تعافى
- ما منهه امل ياخوي انه كل اعضاي تنزف من سنتين
هاي شوفه عينك انه وجفيتي اتمشى جيف اذاني طاكه دم
كل ساع
- ربك رحيم ياخوي امشينه

مشينه غاد كعدنه وسولفنه وللعصر عمي واهله ردو بيتهم
وانه ضليت هنايه ماردت اعوفن نعيم خوفن يموت وانه بعيد
وضلت بالي حجايه ربى .. شي يشبه الموت بعينه بارز ..
صرت اعاين بعينه دوم بلكن اشوفن حجيهه ومامن فايده
جان ساعه الساعه خشمه ينزف لو اذانه حيل اتأذه عليه
كونن مابيدي شي عليه واشوفنه يموت جدام عيني ...

ثاني يوم جنت راد من بيت اهلي لبيت الشيخ المغربيه
وبين مافرغو من الصلاه انه خذيتلي مجان حذو الشيخ
وكعدت ..
- كول يا شهاب شعندك
- شيخ انه اريدن منك طلب
- ماردك لو كدرت عليه
- ما تكصر ،، شيخ انته البارحه بكل هداوه رديت النفس لربى
اريدن منك صاحبي نعيم وانته عارف بمرضه
- ههههههههه والله يا شهاب هاي انت مو الاول بهالطلب
لجن انه ماكدر عله هالسالفه الا ويه شمسه انه مو سيد اعالج
هالوادم ولا بيدي سحر ولا ليه نور ومعجزه شفاء من ربك
- جا وربى
- هاي بعد علمهه عند ربك لجن هيه من زغيره كل ما تمرض
وتطيح هالطيحه ماتصحى الا عله ايدي
- شيخ لا تسودني انه بلايه شي عكل مابراسي
- ما تصدكهه هااا
- اي بالله تصفن البال
- ياشهاب الجرى امر ربك بعد ماعليه حكم وهالوليد اجه
اجله مايرده الا ربه
- عوفلي نعيم ياشيخ فهمني عليش شمسه مو غيرهه عليش ليهه
تكدر ولغيرهه لا
- شمسه رويحتهه بيه والبني ادم ما يرد عافيته الا عزيزه
فهمت
- جا عليش رويحتهه بيك مو باابيهه
- هاي بعد كلب بن ادم ،، ولا تضل تلشلش وياي خلني اشوفن
الوادم شمالهه

انه هالسالفه ماتخشن ابالي لجن اسايركم لحين ما انه اعرفن
ساس البله وين ؟؟؟
.
.
يتبع