رواية من فجر ديسمبر الفصل السادس عشر 16 - بقلم Zoka 🌷

من فجر ديسمبر
🍁
🍁
وره ساعه طلع حيدر لابس الدريس وطلع
للعبه وانه ضليت افكر شسوي واحركن گلبهه
ماعديهه لا وحك علي ..
انه الما نزلت عيني لبنت وهنه يبوسن القنادر
تاليهه من اجي اعترفلهه بحبي هيج تسوي
انه شهاب انضرب من مره !!!!
مااطلع ابن ابوي ان عديتهه ليهه ..

كمت طبيت جوه وسديت علي باب حجره بسام وضليت افتر واشمر شكو شي جدامي
تالي سمعت امهه كالت راح تطلع لام جاسم
ووصتهه تغسل ملابس ..
انه طلعت من سمعتهه طبت الحمام رحت
صعدت لحجرتهه اخذت ثلاث دفاتر رسم
من هذني التحبهن ومكمله رسم بيهن ونزلت
طلعت كبل للحديقه جبت طاسه مال عماله
محطوطه هيج يم المولده اخذتهه وكضيت
الدفاتر شككت الورق وحطيتهن بي
طبيت للمطبخ اخذت الشخاطه وطلعت
جبت شويه نفط من وره البيت ووكفت وحطيتهن بنص الطرمه وصحتلهه ...

اجتي وهيه تتافف من شافت علكت عود الشخاط اجتي تركض .. كضيتهه من زندهه
- كتلج وروح امي ماعديلج الليله عله سوايتج
- شهااااب الا رسمي لاا اعتذر والله بس رسمي لاا الله عليك شهاب لااا تحركهن
- مايفيد تعديتي وكسرتي كلبي وهنتيني
احتركي مثلي هم ضوكي اللوعه

ذبيت عود الشخاط عليهن وكبت النار بيهن
جريتهه عله جهه وهي ادفع بيه وتبجي وتصيح

- هااا يوجع الگلب يوووجع مووو هيج انه نارري حسي بيهه اجيتج بحب شرديتيني
باهانه عايني شلون هالنار تسعر هالشكل
انه صدري يحترك

- الله لااايووووفقك حركت كل تعبي واحلامي الله لاييووووووفقك اني شعليه بحبك شعليييه

عتت ايدهه مني وطبت جوه وهيه تركض
انه رحت فتحت الصونده واجيت طفيت النار
وجاي اشيلهه افرغهه بالزباله سمعت صوت
شي انكسر ذبيتهه من ايدي وطبيت للمطبخ

لكيتهه بالكاع كاعده وكاضه صدرهه وجايتهه النوبه وجهه احمر دم والسراحيه مكسوره
جوه رجليهه .. انه نسيت كلشي وركضت
ليهه ..

اريدن اكضهه تدفعني ماترضى ..
- لتعاندين كومي وياي لاتنجرحين
ماترد علي ربس ادفع وهيه تشهك بالنفس
صوت نفسهه يخوف هيج هجست روحهه
حتطلع باي لحضه ... وعله هاي كعدتنه
وعياطي عليهه طبت امهه ولطمت عله صدرهه واجتي حضنتهه ..

- يمه بنيتي شجاج عفتج مثل الورد شجااج يمه لك شبيهه شهاب لييش هييج
- رحمه لاهلج عمه بعدين كوميهه جيبي علاجهه وينه
- ولج يمه ربى حاجيني عيني يمه اكومج عينيني

اجتي تريد توكفهه ماكدرت انه اجيت اريدن
اشيلهه خربت ووكعت ..
- يمه ربى لج يمه فتحي عينج لك شهاب الحكلي عمه بنتي راحت من اديه الحكككلي
ولج سوده عليه يممممه سووده علييييه لكك كوووم جيب سياره البنيه حتضيع من ايدي
وحيدتي يمه وحيدددتي يمه زهره عمرري
ربى ولج يمه حاجيني

- علكيفج عمه اهدي خلي اشوفن دربي
لبسيهه وانه حطلع اجيب سياره

ركضت طلعت وانه الومن بروحي شسويت
بيهه بس لا يصيرلهه شي ..
طلعت اركض مثل الهبل وكفت اول سياره
جتي جدامي وهوه من شافني مخبوص
كبل كلي اصعد اصعد واخذته للبيت

نزلت ركضت ولكيت امهه ملبستهه حجاب
وحاطه عليهه العباه انه جيت شلتهه وامهه
تغطي بيهه ولكيت الولد فاتح باب السياره
حطيتهه لوره ويه امهه ومشينه كبل للمستشفى

اخذوهه للطوارىء وكبل حطولهه الاوكسجين
وانه كتلهم عله گلبهه وضلينه ننطر بره وامهه
ادك وتلطم .. انه بس ادعي مايصيرلهه شي
ويضل ذنبهه بركبتي .. ايدي ورجلي ترجف
اخافن اخسرهه حسيت الدنيه وكفت بيه ..

طلعوهه ومدري وين اخذوهه وامهه كلبت
الدنيا بالصياح والبجي عاد انه عطت بيهه
يلا نصت صوتهه ...

ضلينه عله هالحال ساعتين يلا اجانه الدكتور
وفهمنه منه ... نوبه قلبيه والنفس انكطع كله بسبب الخفقان وكال رادلهه وكت تصحى
ومسويلهه تحاليل وبعدهن مطالعات ...

عضيت اصبع ندم عله هالسوايه بيهه لو بيدي
اكضن روحي اكطعهه ولا هالصار ..
عاد خابرت عله عمي وهوه ماطول عشر
دقايق ولكيناه يمنه وضل يسالني شلون
صارلهه هيج ..

ماعرفت شحاجي ولا كدرت اكولن انه هيج
وهيج سويت بيهه مو خوفاً بس مستحي
ضليت ساكت وعفتهم ومشيت ...

وره ساعه اجه الشيخ وولده صياد ومحمود
والشيخ عاف الكل واجه علي ..
- جلمتين اكولنهه ليك وترد ايه لو لاله
اذيتهه لشمسه !!!
- اي
- شسويت
- تعاركنه وهيه تجاوزت ورفعت ايدهه علي
وانه رديتهه
- شمسه ماتسويهه الا وانته متعدي حدك وياهه وجايد بيهه بنيتي واعرفنهه وتستاهل
وحيل بيك قسم بمن احل القسم اذا شمسه
صارلهه شي الجيله براسك وكلبك تنحط
ولا حسبن انك ابن اخوي ولا اخافن اجتلك
بكاعك وماترمشلي عين سمعععت

ضليت مدنج ماعرفت شكول هيه من باب
حكهه تدافع عن شرفهه ونفسهه وماترضى
حد يكربلهه هيج .. انه غلطت من كربت ليهه
هالشكل ..

ضليت كاعد لوحدي بعيد وادعيلهه وانذرت
اصلي  ميه ركعه بس تكوم بسلامه ...

وصار الليل وهمه مخليهه تحت المراقبه
ومحد يطبلهه وكلنه واكفين بره والشيخ
عينه من تجي بعيني تزرف كلبي جنه يريد
يكطعني وصل وصل وابوهه يلوب وامهه
هالدموع مانشفت تبجي وخدهه مزلغ واحمر

جان بالتحاليل من قريتهن فقر دم عدهه
حاد ومنا گلبهه تعبان نبضه صار بطيء
رغم شكد ماجان سريع بالخفقان هسه بطىء
اكثر من هوه صحيح ..

محد مننه رضى يرد البيت وكلنه ضلينه
بالممرات نفتر عاد للفجر وخابرو الشيخ
عنده فصل ولازم يحضر عاد اخذ ولده
ومشو وعمي اخذ مرته للبيت ترتاح عبن
ماضل بيهه حيل وهم يجيبون فلوس وياهم

وضليت انه اروح واجي من حجرتهه
توسلت بالدكتور بس اطب يمهه شويه
ومارضى عاد هوه راح انه انطيت جم
فلس للمرض وطببني ..

طبيت يمهه عاينتلهه شلون وجهه اصفر
وذبلانه رويحتهه وتذكرتهه من جانت توسل
بيه ماحركن رسمهه .. جا هلكد روحج معلكه
بي ياشمسه ..
دنجت ليم اذنهه وكضيت جتفهه وغمضت
وقريتلهه ايه الكرسي وحصنتهه بيهه
اذكر امي الله يرحمهه من جنت اطلع لمجان
بعيد لو يصيبني شي تنشرلي بهالايه ..

عاينت لشعرهه ملفوف بهالجيس غطيتهه
عدل وطلعت كعدت بالكاع وظهري عله
حايطهه صفنت اشوفن البني ادم شلون
ضعيف ساعه الساعه يكع وماينفعه شي
والعافيه ماتجيبهه لافلوس ولا صيت ولا محبه كلمن ورزقه بيهه ..

وره ساعتين اجه عمي حاتم وشافني بعدني
عله هالكعده اجه وكعد بسدي وكالي ...

- اعرفن تعاركتو وهالصار بسبت صياحكم
وعياطكم يول انه جم نوبه كتلك جوز منهه
- عمي بنتك تحجي الاخرس وحك علي لو
مانهه جافصه بمصاريني مااعاركهه انه
مااكرهنهه وروح امي ماريدن وياهه المشاكل
لجن هيه سوت الشي الماينسكت عنه
- شسوتلك احجي وانه اخذلك حكك منهه
- عوفهه عمي هسه مو وكتهه لا اريدن حك
ولا باطل كلشي ماريدن بس خلهه تكوم
سالمه وكلشي ماريد
- اااخ ااخ شيب كلبي من وكعاتهه
- عمي احجيلي عنهه
- بسنه ٩١ ام بسام حملت  وباول شهرين
تمرضت ماعرفنه شنهي علتهه كام جسمهه
يورم ونوبات يغمى عليهه والاكل التاكله تذبه
ضلت عله هالحال ثلث شهور اخذتهه امي
الله يرحمهه لجده من اهل البدو هاي يكولون
عليهه خبره والكل توصي بيهه ورحنالهه
جانت بوكتهه ام بسام جسمهه مورم كله
وصاير عدهه نزيف وهيه بشهرهه الخامس
عاد فحصتهه وكالتلهه لو انتي لو الجاهل
واحد منكم يعيش وعبنهه بالخامس ماكدرت
تنزله ليهه انطتهه اعشاب تشربهن توكف النزف بس جسمهه ضل مورم صارت هلكبرهه مابيهه حيل تتحرك منا لهنا
حته دوامهه عافته وضلت امهه يمنه اداريهه
واداري الجهال عبنهه ماتكدر تمشي عله حيلهه .. ومن طبت السابع جانت حيل تعبانه
وتكوم وتكعد وتنخى لاجل يعيش الي بطنهه
انه احبنهه تعرفني اموتن عله التراب التدوس عليه اهجس روحي ملك بحضرتهه وانه اشوفنهه هيج تعذب ووجهه اصفر وهلكبره صاير وتبجي ليل نهار .. عاد كلت لامي
ناخذهه لامير المؤمنين وهناك نطلب من
يكومهه بالسلامه بساعتهه انه ماردت الجاهل
بس اريدنهه ترجع لحيلهه وترد عافيتهه
والله ورحنه من الفجر طلعنه وويانه الشيخ
ومرته وامي وهناك طبينه زرنه وانه اندعيت
وانذرت اذبح بعران اثنين بس تكوملي الحبيبه بالسلامه حته مااندعيت للي بطنهه ولاردت
شي ليه خوفي عله ام بسام عمه عيني
وطلعنه بالدرب كالت امي اريدن ازور المرحوم ابوي والشيخ هم كال مايهلي امشي
وماازورن كبر ابوي عاد طبكنه السياره
بشارع المكبره الكديمه وضلت ام بسام ومرت
الشيخ بالسياره واحنه نزلنه للمكبره ...
ماطولنه قرينه الفاتحه وغسلنه الكبر وردينه
وجان اشوفن مرت الشيخ جايه وتركض
الحكو ام بسام تطلك .. انه مااحجيلك شلون
ركضت ليهه ماعرفن منين اكضهه شسوي
وين انططي وجهي بنص مكبره احنه
ولا بينه نحرك السياره اخافن ساعه الساعه
يكع الجاهل لو يصيرلهه شي من وره الطلوك
وهيه تصرخ ويامن يصرخ وياهه عاد امي
كالت انه اولدهه .. وجنه حاطين بطانيه
بالسياره فرشناهه بالكاع من جهه السياره الثانيه واحنه لزمنه العباه انه والشيخ وصادين
غاد وساترينهه وامي ومرت الشيخ يجيبنهه
وعاد ولدت وامي صاحت صلي عله نبيك
ياحاتم اجتك بنيه انه من لهفتي ذبيت طرف العباه وركضت واسمعن امي تصرخ وتكول
البت ميته ماتنفس انه عبالي ام بسام صارلهه
شي عبن صوتهه راح واركضن ليهه الزمت
وجهه وهيه بين الصاحيه وبين الغاميه تفتح
عينه وترد تسدهه عاد عاينت لامي واشوفن
انطت البت للشيخ وهوه حاط عباته بيديه
وحطتهه عليه عبنهه كلهه دم مامغسليهه
ولفهه بعباته ومسح وجهه من الدم وضل يقرا
باذنهه ويمسح عله راسهه والله يا شهاب
المنظر جان يكزبر الجلد البت كبل صرخت
وحركت بايديهه العباه وضل نفسهه يخرخش
وساعه ردت خنست انه كلت ماتت لجن الشيخ كال محميه باهل البيت وره هالساعه
فتحت عينهه وهاااديه ماطلعلهه صوت
انه رحت شلتهه شفت عينهه حمره وهالبوبو
ازرك خفت عليهه ضميتهه لصدري واكولن
جايز هاي من التراب هنايه وهيه طفله تحسست وبعون الله واهل البيت عاشو اثنينهم
وام بسام خذيناهه كبل للمستشفى وضلينه
الليله هناك والبنت مايطلعلهه صوت هاديه
حته الممرضات تعجبن بيهه وجان ماعدهه
شعر ابد ولا شعره براسهه لحد ما طلعت
الاربعين يلا شويه صار عدهه شعرات
ومن شافتهن امهه حمر تخبلت تكلي ناخذهه
لدكتور اكللهه يابه هوه الشعر انواع تكلي لا
بنتي بيهه شي وهاي انه وياهه ضلينه نتعارك
من يوم طلعن هالشعرات الحمر لهاليوم لو
عطست كالت اخذهه لدكتور بنتي بيهه شي
وشيبت راسي هم هيه وهم امهه

- عجيبه والله هيه وجيتهه لهالدنيه كلهه عجيبه زين عمي ومرضهه شلون بدا

- مرضهه هيج فجأه من عمرهه خمس سنين
جنه طالعين زياره لكربله ويه خوالهه وهناك
بالامام طلعت وتكلي بابه خنكوني منو همه
شكو مافهمنه طاحت وماتنفس وضلينه نصحي بيهه ماصحت الا بالطبابه حطولهه الاوكسجين يله وضلت من ذاك يومهه عله
غفله تجيهه نوبه

- وهاي من شوكت بطلت من المدرسه

- من صف اول متوسط طاحت هذيج الطيحه
شلون هاي هم بالويل يله ردتلنه وامهه دكت
رجل مااداوم بعد وربك ستر هيه مدرستهه
جانت نفس مدرسه امهه وتلاحكتلهه وله جان
راحت من ادينه .. عاد كعدت سنه وبعدين
كامت تروح تمتحن بس نص السنه واخير السنه وخلصت الثالث ورادت تدخل اعدادي
بس امهه تخاف عليهه كالت صارلهه شي
وانه مو يمهه شكول شحجي شتفيدني المدرسه
لو الشهاده وماخلتهه اداوم وهيه ضلت معنده
تريد اداوم عاد امهه قنعتهه تكعد تدرس للسادس وتمتحن خارجي يلا فكت شويه
وهالسنه امتحاناتهه

- اكولن ليش البت تعقدت من وره امهه

- شني تعقدت اشو ماتعرف تحجي انته

- اي عمي شني انتم ماتشوفون شلون عايشه لوحيدهه لا رفيجه لا اخت لا تطلع مخليهه
مثل الفراشه بجام خانه تره مو هيج درينه
تخافون عليهه لجن هم تريد تعيش حياتهه

- تره انه ماحابسهه ومدللـهه وشتريد بس
تطلب ينحط جوه رجلهه ماتذكر وكت المتنبي
هاي انه جنت بين جمعه وجمعه اخذهه لبغداد
افرهه واغديهه باحسن المطاعم اشتريلهه
كلشي تكع علي عينهه وعدهه ادباء تعرفهم
رفجه الهه هناكه وحت اهل المكاتب الي
بلاخير يعرفونه وكل مانروح يكعدون يطلعولهه شكو مجله نازله جديد شكو كتاب
حت الرسم تعلمته منهم جنت اخذهه من الصبح ونضل للعصر يلا نرد حته تتعلم
دروس رسم من كالتلي بابه حبيت الرسم
اريد اتعلمه لاتحرمني منه هم ماهان عله كلبي
اخذ فرحتهه بي وضليت كل جمعه وسبت اخذهه عله طول شهرين انه رايح راد لبغداد
وبيت خوالهه جنت اخليهه يمهم بالعطله هناك
يطلعونهه كل يوميه بس من صارت الاوضاع
مو خوش كمت ماخليهه تروح متشوف حجيهه بغدادي وكل هاذ تكول حابسيهه

- لا عمي انه المحبوس

- لعلمك هيه نبهه وشاطره بكلشي بالرسم
جان الرسام هناك متعجب عله خفه ايدهه وشلون اخذت بسرعه عليه وضل يفرهه
عله صحبانه ويشوفهم رسمهه ويكللهم هاي
من شهرين تعلمته وذاع صيتهه بينهم هناك
وياما حفظت اشعار من الي يحجوهن هناك
وصارت فصيحه بحجيهه مو بس لين عاشرت بغداد فتره من كد ماتقرا بهالكتب
والمجلات اخذ لسانهه عليه حته عماتهه دومهن يحجن عليهه يكللهه انتي عمارجيه
لا تسوين نفسج بغداديه وهيه تكللهم مو عله
شي بس متعوده من كد مااقرا

- اي صح انه هم حسبتهه من كد ماتقرا بهالكتب هيج حجيهه زين عمي وسالفتهه
ويه الشيخ عليش هلكد يحبهه

- هاي بعد ماعرفنهه

- هااه شلون ماتعرف

- اي وروح ابوي ماعرفن عليش هلكثر يحبنهه هي من كامت توهه تمشي صارت
روحه بيهه جان حته يبات يمنه علمودهه
وينيمهه يمنه متسودن عليهه .. جانت بس
تبجي من اخوتهه يغارون منهه وياذوهه
يكضهم يغسلهم غسل بالرزايل وياخذهه
يشتريلهه ويشيلهه عله ظهره عله عنادهم
هو زرع بينهم تفرقه حته ويه بناته هم هيج
جان يجايد بيهم بدلالهه وانه ماكولن شي
ولا اساله عيب زحمه اكله شعندك تحب بنتي
هالشكل عفته براحته

- ماتضوج عبن هلكد يحبهه

- لاا بالعكس افرح عبن عدهه اب ثاني
لا صارلي شي لا سامح الله اكو من امن
عليهه يمه وافرح ازيد عبنهه مدللـه شيخ
العشيره تكبر بحماه وبدلاله مايكدرن ياذيهه حد عبنهه مسنوده من شيخ موش اي حد
وهيه تعلمت من حكمته ورجاحت عگله
وانه اعرفن وواثك لو يريد يخلي شيخه
مايختار الا هيه لجن هوه مبعد من هالكضيه
عبن تصير حرب سوده بين العيال

- هخخخ حته رباب وغزاله وزينب يسون
عليهه سوايه اخوه يوسف

- اي بعلي من شرهن وحسدهن ماخلن عدهه
عافيه وله هي خطيه لا ماذيه حد ولاواصله حد اشو سويكته وهاديه ورزنه وجافه شرهه
من كل هالوادم ومالهه غير رسماتهه وكتبهه
واهلهه بالله العظيم تكسر كلبي من اشوفنه
تكعد لوحدهه وهنه متجمعات بس يحجن عليهه وهيه مالهه صاحبه منهن

- لا عمي شني زهره وياهه وتحبهه

- اي زهره خلف الله عليهه تواسيهه شوي
ولا ذنيج ساكياتهه السم

- حسبي الله عليهن الغيره والحسد عامياتهن
اكولن عمي بس تصحى بخير وسلامه اريدن
اخذهه لدكتور باطنيه يشوفون حل لمعدتهه
حته ترجع تاكل مثل هالوادم تره عدهه فقر
دم حاد متشوف مالهه حيل ونومتهه طولت

- ناخذهه بعد عمك ناخذهه بس خلهه تصحى
لو لمكه هم اخذهه

- اي مو تكلك ماريد وتعوفهه تره من هسه اكلك لو اشيلنهه عله ظهري اخذهه اخذهه

- هههه والله عليك سوالف ياشهاب خايب
انته ماتفهمني شسالفتك وياهه

- مامش شي هيج انه احبن الاشيهه هاي
جلمودهه اريدن اكسره اريدنهه تضحك تسولف ماتضلن سويكته وعازله رويحتهه
بس هيه الله يسلمهه تحسبني اريدن اذاهه
وتكرهني

- لا لا ربى ماتكره احد بس انته الكالك
غير درب وياهه هالملحه ماتفيد وياهه
بنتي واعرفنهه لو تحط راسك براسهه
ينكسر راسك وظهرك وهيه ماتنازل
ربات ايدي واعرفنهه

- الله كريم روح عمي لشغلك انه ماعندي شي اضلن هنايه

- لااا وين اروحن يابال هاذ اليحمل شغل
وبنيتي مدده هنايه

- ماتفيد كعدتك عمي انه بس تصحى اخابرك

- ابد والله مااحركن منايه الا وايدي بايدهه
انته كوم روح اكلك شغله من بارحه عله لحم
بطنك

- مابنفسي شي عمي خليني

- كوووم شني مابنفسك لاتروح تكع انته الثاني مابيه حيلك

- هاي كمت كمت

رحت نزلت للمحل اخذتلي كيك وعصير
اكلتهن بالكوه واحسنه مر بحلكي

ضليت اتمشى بره شويه واذكر حجي عمي
من كالي عله ولادتهه .. اغرب ولاده سمعتهه بحياتي بعد شترجى منهه اذا هيه نولدت بنص
مكبره اكيد تطلع مسودنه وكل عجايب الله بيهه ...

وانه ماحبيت الا هالبت ؟! هاي خلك الله
كله الا هالشمسه !!!
اجيت عله وين شلعان الكلب بايدي مجلب بي
هسه مارحت حبيتلي وحده من تركيه وحده
من هالكاتلات نفسهن ويردن حجايه مني
مارحت عله بنات خالي مكومات بنات عمومتي البقيه اشو كلهن ورد ومفتح
بس انه كلبي جنه يريد يتجوى بيهه اعرفنه
مايجوز منهه لو مو تصد وتتجاوز يضل
معلك بيهه ..

ومشى هاليوم وهيه ماصحت واجاني الشيخ
وكلبه موجر عليه ساعه الساعه ينفجر ..
عاد انه سلمت على رويحتي وطلعت رحت
للبيت نمت جم ساعه ورديت بنص الليل
وعمي رجع للبيت ويه مرته والشيخ جان
رايح عاد انه ضليت ويه حيدر وحدنه

وصبح الصبح وهيه عله حطتهه نزرع الخوف بكلوبنه عليهه صارلهه اليوم الثالث
عاد حاجينه الدكتور يكول ضاربيهه مقويات
بس هيه بعد هيه وجسمهه وقابليته ويكول
الگلب يتعب البدن موش هين ..

جنت الوب واريدن بس اصرخ واكولن ردهه ليه يارب واصونهه وماازعلهه بعد ..

ولليل كاعدين انه وحيدر وجان طلعت ممرضه وكالت المريضه تريد ابوهه

انه ركضت ليهه وحيدر راح يخابر الاهل
من شافتني دارت وجهه انه بهتت ضحكتي
وحسيت جن زلزال وصار بصدري هيج
حسيت كلبي انفطر .. طب حيدر ليهه حضنهه وباسهه وانه عرفتهه ماتريد اكربن
ليهه ضليت بالباب واكف بس كتلهه

- حمدلله عله سلامتج
ماردت بس هزت براسهه وره شويه طبو
عمي ومرته وانه عفتهم وطلعت كعدت لوحدي بعيد كلش عنهم .. واسمع صدى
كسر كلبي بصدري .. هجست جسمي
فرغ من روحي ماعرفن بس صافن
واكولن انه عليش هيج اتاثر بيهه عليش
احبنهه هالكثر عليش رويحتي تموت بصدهه
وينك ياشهاب جنت تضحك عله اليعشك اشو
هالطيحه طيحتك ماتكوم شبيك !!!!

هجست دمعه طاحت بضني وضحكت عله
روحي المكسوره بحبهه .. سمعت صوت
يمي عاينت لنه صياد اجه كعد بسدي

- شجاك ياشهاب وجهك مخطوف لونه
- تعبان من السهر هنايه مامش شي
- اشو جنك مافرحت بكعدتهه
- لاا شلون ماافرح فرحت لجن شويه التعب
بان عليه تعرف ثلث ايام سهر موش هينه
- اي حكك ياخوي كوم نرد البيت اهلهه ضلو
هنايه بعد كعدتك ماتفيد امشي ارتاح
- لا ماردن هالساع
- هاا عليش
- اردنهم للبيت وذاك الوكت عود اردن بيتنه
- هاا كيفك بعد جا انه امشي مامش احد بالبيت
- الله وياك خويه

مشى وانه ضليت اتصفن وتالي كلت بدال
ما اضلن مكسور كلب هالشكل اشوفلي
طريقه واراضيهه واكسب كلبهه واريحن
كلبي بيهه ...

.
.
يتبع
شلونكم ياحبايب كلبي ..
طبعا هاي اليوم الصبح ادور نت بالكليه
حته انزللكم البارت لان شبكتنه بيهه تصليح
وكلت خلي اكتبلكم بعد وهم ضليت طريق
الرجعه كله اكتب ولحد قبل شويه كنكن رصيد لخاطركم ..
كولو مادللكم كولوو 😒😒