رواية من فجر ديسمبر الفصل الخامس والخمسون 55 - بقلم Zoka 🌷

من فجر ديسمبر
🍁
🍁
الصبح كاعد اتريك واجاني بسام .. عاينتله وفهمت يريد نحجي .. كمت ومشيت جدامه للحديقه .. اجاني وكال ...
- خلي كل حساب بعدين هسه وكت نعالجهه شهاب
- ماعندي شي وياك يالعزيز انته صاحبي موش بس ابن عمي واظنك فهمت كلشي صار وعرفت بيه موش خوان
- فهمت كلشي بس الصار موش هين هاي اختي ياشهاب تفهمهه ثكيله عله صدري روحتكم وحجي الوادم بظهري والسمعه كلهه ماتنسي بالهين
- حكك ياخوي شنهي الي تريده انه حاضر لو تريدن كص هاللوزه ماكلك لا لجن لا تاذيهه بشي
الغلط الصار انه اتحمله هيه ماسوت شي
- ماذي لا انته ولاهيه مالي خلك شي .. كل الي بالي هسه اريدنهه ترد لحيلهه اخيتي الصغيره هاي احبنهه وعلي كلبي تدمى من سمعت خاطفيهه وهيج حالهه وتمنيت لو اكضه لهذاك الخنيث لجن الموت سبكني عليه
- هيه اخذت حكهه بايدهه لا تخاف
- ضلو هذولاك مااهدنهم
- الشيخ تكفل بيهم
- الله كريم .. اجيت اكلك انه ماعجبني علاجهه هاذ صارلهه يومين وعله هالحطه امي تكول ماتاكل شي شلون مخليهه هيج
- بعلي حاير حاااير وين اخذهه
- امشي نسفرهه لازم يشوفنهه دكتور مختص مايصير تضل هيج
- شوف انه موش مستهين بصحتهه لجن مسطور
فكري موش وياي الهبطه لساعهه مرجفه جسمي
ومااندل دربي منين
- والله الصار نشف دمنا كلنه .. زين انه راح ادور واشوف وين الكه مركز زين لعلاجهه واكلك
- ياريت ياخويه
- زين

راد يمشي صحت عليه اندار وجان اروح احضنه
- لاتضل شايل بكلبك علي خويي انته يعز علي صدك هاذ .. بعلي ماتهون علي عشرتنه هيج تصير

طبطب عله ظهري وضحك عاد ضليت اتشاقه وياه مثل كبل ونضحك وكبل مانسمع الا صوت هلهوله عاينت جان تطلع امه تهلهل ... كلش ارتاحيت من رد الصلح بينه ..

مشيت لديوان الشيخ كعدت شويه وجان يجيني صياد ..
- شهاب كوم خلنه نحجي بره
- خير ؟

طلعنه بره واخذني للبيت طبينه بالديوانيه كعدنا وكال ..
- بهذاك اليوم عرفت شني الصار؟ فهمت شي !
- لااا هذول ضلو يهلوسون ومدري شيحجون كلشي مافهمت
- اسمع بارحه بنتي جانت تحجي لامهه تكللهه
الولد  بزهه ابرهه لعمه وراد ينطيني حبايه وعمه ماخلته صيحت عليه وهوه ضل يصيح وطلع يركض
- ايييي والمره ماكالت عليهه شي
- كالت هيه ربى كايلتلهه غمضي وهيه من خوفهه مغمضه وساده اذنهه مادرت بيهه
- يعني ربى كبل مانجي جانت تحجي !!
- اي والله ياخوي هيج كالت واذا تريد اجيبنهه ليك واسالهه
- لاا لا خلهه مانريد نذكرهه كلساع بالصار طفله هاي خطيه
- والله انه متعجب عكلي ماجاي يفهم ويستوعب شني الصار !!!! انه من طبيت عاينتهه جنهه خشبه ومابيهه حته نفس شلون هيج سوت وشلون مات الزلمه !!!
- خويه يجوز هاي من خوفهه عله البت صاحت بكل كوتهه ومنايه تاثير الابره هم لاتنسه وحالتهه منهاره كلهن التمن سوه موش زين دافعت عله البت
- لااا والله ماتجازه
- اي هساع انته خلي عينك عله ولادك اخافن يسون بليه النوب
- الله اليستر

كمت طلعت وانه ادري الحجي الكلته جذبه ربى
عدهه شي ثاني لين مستحيل هيج صيحه عاديه من بت تسودن هيج زلمه ! والمره سالفتهه اكبر منه
بس لو تكدر تحاجيني وتفهمني شني الصار !!!!

مشيت رحت لحجرتي اشوفنهه .. لكيت امهه وجدتي كاعدات يمهه .. جدتي تقرا عله راسهه
وامهه تفرك بايدهه وهيه ماتعاين ليهم .. شفايفهه بيض غاديات والوجه اصفر ..
- عمممه البت كلت شي !
- لا ياعمه عايشه عله هالقطرتين مي هذني
- زين لبسيهه حناخذهه لدكتور
- وين يادكتور
- بغداد وليد حجزلهه يلا استعجلي

طلعت وخابرت وليد تاكدت من العنوان جان هوه يراسلني وكالي لاكي هيج دكتور وكلتله احجز ..

اخذناهه انه وامهه وبسام .. من وصلنه للعماره مال الدكتور جان اكو بالركن محل وعنده هاي الكراسي المتحركه ومال المقعدين وهالشغلات
عاد جابلهه وليد واحد من الكراسي وكعدناهه
وطبينه للدكتور .. دكاتره بغداد تحط ويه الكشفيه عشره لو خمسه يمشوك ويحطوك عله راسهم ماتحط تضل تنتظر سراك لنص الليل محد يعاين لحالك ...
دفعتهن وضلينه ننتظر لحد مااجه سرانه ..
فحصهه الدكتور وشوفته التحاليل اول ماكال
حطولهه مغذي .. وبعدين كتبلهه حبوب و وصانه عله العلاج الطبيعي مانعوفه ...
اخذنه العلاج وردينه للبيت ... رادو ياخذوهه لبيتهم ماخليتهم والشيخ هم منع اي واحد منهم
يروح خوفاً عليهم .... والليل مخلي جم زلمه يحرسون ويفترون بالزرع اخافن يجي احد

ماشفت الشيخ يجي عله ربى ويحاجيهه بس يسال عليهه الرايح والجاي عرفته مايكدر عله شوفتهه
وضال لحد هاليوم عكاله شامره ...

انه وبسام ضالين ندور عله دكتور زين عبنهه عله هالعلاج نفس الحال راح يصيرلهه تسع ايام عله هالحطه .. اروحن يمهه احاجيهه ابوسهه واشيلن هالبطل الفارغ واحط جديد ضاله عايشه عليه
وجهه ضعفان وجن روحهه ميته .. شنهي الاسوي ليهه ماتنطي عليه اي رد فعل ..
مرات العصريه اكعدهه عله هالكرسي واخذهه للنبكه وافرهه شويه يم الزرع واتوسل بيهه تحاجيني لو جلمه ومامش شي جني احجي وحدي

صار يوم المحكمه وراح الشيخ و وياه عمي حاتم وكاظم واربعه من ولد عمنه مسلحين ضلو بالسياره وراهم ...

انه جنت كاعد يم ربى واحجيلهه هيج وهيج صار
عاد هيه دمعت عينهه صرت احاجيهه اريدهه تحجي شي شكد حاولت وياهه ومامش فايده
عاد مسحت دموعهه وضليت كاعد اعاينلهه وافكر بالي جاي يصيرلهه ...

وره ساعه خابرت عليهم حته افتهم شني الصار وياهم ... جان عمي حاتم يكلي ... الشيخ جان
رافع قضيه عله خطف البنات وموكل بيهه محامي
ووكت الي صارت الجلسه المحامي انطاهم هذيج الصور وخله الزلمه يشهد شايفهم وصارت هوسه
لين بيت حمود ماسكتو طعنو بكل الادله لجن
المحامي دز عله اوراق القضيه مال الخطف واستغلهه ضدهم وبالتالي الزلمه انحكم مؤبد لين توضح هوه واحد من هالروس الكبار للمهربين
عله هالحدود والقضيه الثانيه انفتح بيهه ملف
وجايهم السره ...

سديته منه وحجيتلهم شني الصار بالمحكمه وضلينه ننتظرهم يرجعون ...

من رجعو كعدنا يم الشيخ وفهمنه شني الراح يصير ليهم .. دازين القاء قبض عله اخوه ماحضر بهالجلسه ..

ثاني يوم العصر اجانه خبر عليه جان طالع بسيارته شارد من بيتهم من الفجر طالع وع الدولي مكلوبه بي السياره وميت ...

ضلينه انه والشيخ صافنين وعمامنه يتشفون بي
عفتهم ومشيت لربى ... جانت متمدده وعينهه ع الشباج رحت كعدت بسدهه ودرت وجهه علي
لساعهه باهته عيونهه ماتغيرت .. حسيتهه محتاجتني عبنهه مادارت عينهه مني مثل كل مره
حته لو ادير وجهه عليه تصد عينهه غادي هالمره لا .. عاد تكربت حضنتهه وبوست راسهه
- لاتخافين انه عندج موش وحدج انتي يرويحتي

اجتي زهره وكالت بسام يريدني .. عاد كمت طلعت ليه ...
- ها خويه
- اكلك راسلت واحد صاحبي ابوه مسوي عمليه لركبته بايران ويكول عدهم خوش اطباء شتكول نروح ناخذهه هناك ؟
- غير تشوفلنا يامستشفى بيا منطقه حتى نروح
- اي سهله ادبرهه بس هسه مبدئياً ناخذهه؟
- اي اكيد جا نخليهه هيج ضبط السالفه منا لباجر
حته نبدا نتحضر للسفر
- ماشي هسه ارجع اخابره وافتهم منه واكلك

راح يخابر الولد وانه رحت للديوان كعدت يم عمي حاتم وحجيتله عله سالفه السفر وكال اي شي بس خلوهه تطيب .. وره ساعتين هم رجع بسام حاجاني وكلي مستشفى كسرى بطهران عدهم علاج طبيعي واطباء مختصين بالاعصاب والفقرات ...

بدينا نجهز للسفر الحجز والمترجم تكفل بيهن بسام ووليد .. صار موعد سفرنا بوكت امتحانات زهره وجنت شايل همهه .. عاد وصيتهه تعوف كلشي وتضل مركزه بامتحانهه و وصيت وليد كتله اذا مانجحت مامش زواج .. وهوه دك صدره انجحهه
معليك كلت خلي نشوف ...

  الشيخ كال انه اتكفل بكل مصاريف علاجهه لين حالهه بسببي ومارضى لا انه ولا ابوهه ندفع شي غير مصاريف السفر .. اخذت الفلوس حولتهن لحسابي وسافرنه انه وبسام وامهه لايران

من وصلنه تلكانه المترجم من معارف صاحب بسام وضل ويانه بكل شي ..
من اخذناهه للمستشفى طولو بفحوصاتهه ويدققون بكلشي وكالو يحتاجلهه ويه هالعلاج معالجه فيزيائيه وهمه عدهم بنفس المستشفى قسم مختص
بهالشي ...

واول مابدو بجلسات لركبتهه وفجهه وثاني يوم هم ردو عليهن .. وخلوهه تاكل بس عله كد سوائل
جانت غاديه هالكداتهه كل مااعاين لصورتهه
مخليهه خلفيه لجهازي جانت صورتهه بالثلج
كل مااعاينلهه وارد اشوفن حالهه هسه شلون صاير كلبي ينمرد مرد عليهه .. ونكول الحمدلله

جانت جلساتهه مرتين باليوم الصبح وبالليل ياخذوهه مرات ليزر مرات تدليك مرات يسون تخطيط للعضلات والاعصاب ماهدوهه ابد
ومن حجيت للدكتور المختص بحالتهه عله شلون صار وياهه هيج دزلنه دكتور نفسي كعد وياهه وحده بالنص ساعه وطلع كلشي ماحصل منهه لاحرف ولا رد فعل .. ثاني يوم هم رجع ليهه
ونفس الشي عاد كلتلهم عوفوهه ماتريده وهوه كال خلوهه براحتهه تحجي من وحدهه ...

رجعت ايدهه تتحرك وركبتهه وفجهه صارن احسن وضلت رجليهه ..
جنت اخابر الشيخ كل يوميه واطمنه عليهه واحجيله كلشي يصير ودزيتله فيديو شلون جانو يحركون ايدهه كلش فرح بي .. وعمي حاتم كل ساعتين يخابر وعمتي تحجيله كلشي ..

وليد يكلي موصي محمد ميخلون زهره تسوي شي بالبيت بس تقرا ومايخابرهه يروح يخابره ويكله شوفهه شجاي تسوي نايمه لو تقرا ويكول بس احاجيهه بالليل اشجعهه واضحكهه والصبح كبل الامتحان هم يحاجيهه .. ويكلي رحت زرت الكاظم ودعيتلهه تنجح وحته صلاه كام يصلي بس حته يضل يدعيلهه ...

اخذناهه جم مره طلعناهه من المستشفى نغير جو
بسام يحاجيهه ويحاول يضحكهه لجن مامش فايده
نشوف جسمهه يتحسن لجن نفسيتهه ضاله صفر
صار للحادثه شهر ماخلينه شي ماسويناه ..

امهه تكضي الليل كله تبجي وتتوسل بيهه تحاجيهه
وهيه صاده عنهه .. تروح الصبحيه ويه بسام للسوك تجيبلهه اشكال الملابس الي تكللهه اضمهن لعرسج والي تكللهه هاي من نرجع تلبسيهه والاحذيه تكللهه هاي كلهه رياضيه تريحج بالمشي احسن من الكعب مخبلتني بي .. وانه كل يوم اجيبلهه ورده كل يوم لون .. احاجيهه واكللهه
مشتاكلج تعبان بدون صوتج تصد عينهه عني

مرات اضل اصيح عليهه تنهار اعصابي ويخلص صبري اضل اصيح واكللهه خوافه ضعيفه ماتحبيني لو تحبيني ماتضعفين هيج وهيه ماتعاينلي حته .. اعوفنهه اليوم كله واردلهه ثاني يوم اتعذر منهه واحاجيهه لجن هيه تتجنبني
حته ابوهه مرات يفتح كاميرا ويريد يشوفنهه
تضل تعاينله وشويه وتدير وجهه والشيخ اصلاً
ماتصد عينهه ليه شكثر يحاجيهه ويريد منهه
وماتعاينله ... كلنه كعدنا عاجزين جدامهه ماترضى هيه ماترضى تعين نفسهه مستسلمه
وماتريد احد منه عدهه ماعرفن شني الغيرهه هالشكل .. كبل جانت تكافح بمرضهه تطيح يومين بالمستشفى وتصل الموت وترد تكوم وتطمنه وتضحك وتنسى وتنسينه مرضهه وعايشه جنهه اميره جمالهه صار ليهه صيت ويه عكلهه ورزانتهه وكشختهه هالساع غاديه وركه صفره
نحركهه من مجان لمجان ...

خلصت الفلوس الي عدنا والشيخ حوللنه بعد وكملنه بيهن الشهر الثاني هناك ..
امهه كالت خلي ناخذهه للامام الرضا نزورهه
بلكي ترتاح نفسيتهه .. ماعارضنه واخذناهه
الدرب جان طويل وهيه كضته نايمه ..
وصلنه واول شي كعدنا نرتاح بره وهيه تعاين للمجان وردت عاينتلي توسلتهه بعيوني تحاول وتتكوى .. دارت عينهه مني وانه كمت استغر ربي وعفتهم ومشيت رحت كضيت شباج الامام
وانتخيته ..
كتله مولاي صبري خلص كضيت نص عمري انتظرهه واداري بيهه وهالساع ردتني غريب عنهه مثل كبل كلبي مايحمل بعد ازيد من هيج
وينهه رحمتكم اهل البيت ارحموهه لا ترحموني
بس خلهه ترد لعافيتهه تعلعل كلبي عليهه

رحت صليت واستغفرت ربي وناجيته يفك شدتنه هاي وينطيهه الامل والگوه ويصبرني عليهه ..

طلعنه بعدين تعشينه وافترينه شويه بسام يمشي ويه امه وانه ادفع كرسيهه ..
ثاني يوم ردينه لطهران وارتاحينه هالليله والصبح اخذناهه للجلسه ... جانو بس يمشون عليهه جهاز
احمر وبعدين ييضلون يحركون بيهه يصعدون وينزلون بيهه ..يعوفوهه شويه ترتاح وتجي بنيه
تكعد تفرج جف رجلهه وتنغزهه بالابر حته تشوف
رد فعل جسمهه وكل يوم تقيسه من جديد والتخطيط كل خمس ايام يعيدوه بي تحسن هواي
وهاذ كله انه اوصله حرفياً للشيخ ...

بدو يوكفوهه عله حيلهه رجليهه ترجف ماتكدر تكف الا اثنين نسندهه تضل واكفه جم دكيكه ونرد نكعدهه وشويه وهم نرد نوكفهه ..
جنت اعاينهه بهاليوم دمعتهه بعينهه هجستهه مخنوكه عاد ترخصت منهم بالليل واخذتهه وحدنا
وكعدنه هيج بحديقه فارغه مابيهه اي احد

كعدت عله المسطبه وهيه كرسيهه بسدي
ضليت ساكت ماحجيت وياهه شي عفتهه عله راحتهه وشويه وكمت مشيت بعيد عنهه ردت اعوفنهه وحدهه وكلت اجيب ماي واجي المحل كريب من هنايه ...

اشتريت ورجعت من تكربت منهه عاينتهه مدنجه وتبجي ذبيت العلاكه بالكاع ورفعت راسهه وجهه احمر وتبجي حضنت راسهه وهيه عاد جلبت بهدومي وضلت تبجي وصوتهه يعلى ازيد ويه كل شهكه منهه .. جنت احسهه منهاره جم سنه انه اعرفنهه وبكل شده مرينه بيهه ماعاينتهه هيج تبجي زرفت كلبي بحالهه هاذ ضعفهه مايلوكن عليهه ومااتحمله انه ماتحمممممله دمعت عيني فرح بصوتهه وحزن ويه حزنهه ...

وخرت منهه وجبت البطل فتحته وغسلتلهه وجهه
وايديهه وبوست عيونهه وايدهه ..
- يارويحتي لاتكبتين شي بداخلج احجيلي سمعيني صوتج شاركيني همج انه احمله عنج بس احجيلي
فهميني شني الي بيج كولي شني الي تريدي يجرالج بس حاجيني فدوه اروحلج حبيبه لا تضلين ساكته هيج جاي تعذبينه تفهمييين شني تعذبينه
ولج بويه صرت اشتري الجلمه منج بروحي
لاتعزينهه علي

كضت ايدي وخلتهه عله وجهه عاد انه كمت ورديت حضنتهه ..
- ماشي اخذي وكتج مااضغط عليج هاي دامج
ترتاحين بعدج بكربي هاذ يريحن كلبي شويه
ويصبرني عله صوتج

كلتلهه نرجع ! وهزت براسهه بمعنى اي وعاد رجعنه ليهم ... نومتهه وضليت كاعد بره تالي كلت احاجي الشيخ ... خابرته مرتين يلا رد علي

- كواك الله شيخنه
- الله يكويك بويه شلونكم
- الحمدلله
- شمسه شلونهه ماتحسنت !
- شيخ اليوم جانو يردون يمشونهه وماكدرت تكف عله حيلهه جم مره حاولو وياهه ومارهمت عاد هجستهه مخنوكه خذيتهه وحدنه بره وجنهه ماصدكت تضل وحدهه بجتلك ذاك البجي وصرخت لما ملت وتعبت
- دخيلك ياربي دخييييلك ارحم بهالبت
- عدهه صوت شيخ بالله العظيم عدهه لجن هيه ماترضى تحجي ماعرفن عليش حتسودن والحسين ماضل صبر بيه بعد مافهمهه شتريد اتوسل بيهه
وعلي اتوسل بيهه بس تكلي شنهي التريده شنهي الي بيهه ماخليت شي ماسويته ليه النوب تكوم حته ماتعاينلي تصد وجهه عني زين والتالي شلووون
- والله ماعرفن ياشهاب انه تحيرت بامرهه كلت يوم يومين بعدهه بصدمتهه ونفسهه تعبانه من الصار لجنهه طولت وعله كولتك هيه ماتريد
موش بيهه عله لجن مالهه نفس
- اي والله مالهه نفس عبن انه جم دكتور جبته ليهه فحصهه يكول مابيهه شي واليوم بصريخهه ذاك ثبتتلي مابيهه شي لجن هيه ماتريد تحاجي احد
- هم صبرك عليهه شهاب البت تعبانه نفسيتهه
هيج بيوم وليله تلكه روحهه وحيده والله اليعلم شني الصار هناك وياهه بهذيج الثلث ايام والنوب تلكه روحهه ماتكدر تمشي صعبه بالحسين صعبه عليهه
طول خلك وياهه وان شاء الله تفرج
- مطول خلكي انه شعندي وياهه بس اريدن اعرفن ليش تصد عني موش جانت ترتاحلي شغيرهه
- ماعرفن والله هالجواب عدهه وحدهه تلكاه ..
هسه يمتى تردون ؟
- ما عرف والله ياشيخ بعدهه ما وكفت عله حيلهه شلون اردهه هيج !
- لااا بويه كمل علاجهه وجيبهه هنايه منهو اليعالجهه بعد ! بس انته هم حاجي الدكاتره يستعجلون بعلاجهه لا يضلون يماطلون
- الله كريم .. شني الاوضاع يمكم اهلنه شلونهم
- اهلك بخير وبعافيه .. ذكرتني اكلك شي عرفته البارحه
- اي شني
- تذكر الحرمه هذيج الجانت ويه رجلهه
- اي شمالهه
- كبل اربع ايام ميته .. يكلون جانت مسودنه كل هالشهور وتصارخ ليل نهار وبهذاك اليوم ضاله تلطخ راسهه بالحايط واهلهه يجرون بيهه وهيه تهمش بروحهه وبنص الليل هم لاكيهه تلطخ براسهه لما جايهه لاكيهه مدمايه ماخذيهه للمستشفى ليله وحده وصبحت ميته
- الله الاكبر شجاهه هاي !!!! شيخ هذول كلهم ماتو وواحد اتعس من الثاني جاي تفهمني مو!
- ههه افهمك اييي
- شلوون هيج !!! ربى شسوتلهم !! هالسالفه تخوف شيخ موش هينه هذول كلهم تسكطو وماتو فسرلي فهمني لاتضل ضام علي
- الموت واحد لجن متعدد الاسباب كلمن ياخذ جزاته ماعليك بهالسالفه
- صح العمر بيد الله لجن هاي هنايه سبتهه ربى
اريد افهم شسوت !!
- علمي علمك يابويه جا انه جنت وياهه !!
ننتظر فرج الله نشوف يمتى تحجي عاد هدت حيلي بعلي هاذ عمري كله ماطيحني شي مثل طيحتهه
هاي علاكه الادويه بسدي وكلساعتين ودزت هالريم جهاز السكر وجهاز الضغط مايدرون انه عافيتي تستعدل من اشوفن نورهه يرد لسلفنه
- كلنه طحنه بطيحتهه هاي والله لو تشوفن امهه تبجي الصخر تكابلهه وتبجي وهاي ليل نهار تكللهه ولج يمه ليش متحاجيني حارت شتسوي
وهالراس يابس مايلين
- شوف هيه وحده من الاثنين .. يا تريدن تعزل روحهه منه بعد .. يا مرضهه متعبهه لدرجه هاي
- اتمنى اثنينهن يطلعن غلط وهالمره ياشيخ ماتصدك بحجيك عبن كلبي اثنينهن مايحملهن
- انه هم اتمنى مايصدك هالحجي وتطلع فتره وتعدي
- ان شاء الله
- يلا خلي امشي انه وانته طول خلك وياهه زين
- زين زين .. سلملنه شيخ
- يوصل مع السلامه
- الله وياك

سديته ورديت رحت ليهم كعدت عاينتلهه وتذكرت سالفه المره وتذكرت شكلهه من جانت عدنه
اريدن رباط السالفه وين !!!
.
.
.
يتبع