رواية من فجر ديسمبر الفصل السادس والخمسون 56 - بقلم Zoka 🌷

من فجر ديسمبر
🍁
🍁
شلك علي يا زمن وشرايد
.. نطيتك الي ردته مني وزايد
ضحيت باغلى احبابي وخسرت كل اصحابي
شتريد تاخذ بينت ومعاود شلك علي يازمن وشرايد
نيشاان اكثر من جرح مو كافي كضيت عمري وياك مامتصافي .. الماي يمي والعطش بشفافي
شتريد تاخذ بينت ومعاود شلك علي يازمن وشرايد

جنت ادندن بهالاغنيه وانه كاعد يم ربى وانتظر
المعالج يجي ليهه ... جانت هالاغنيه صاحبتي بشدتي توصفن تعبي وهالساع اجتي بوكتهه

صار وكت علاجهه ضليت واكف واعاينلهه تعابير وجهه تبين الوجع الي تحسن بي من تنشال رجلهه وتنثني ... جم مره جنت احاول اخليهه تكض ايدي من تتاذى لجن ماترضى فصرت اعوفنهه براحتهه وماكرب ليهه ...

خلصت هالساعتين بالعلاج واخذتهه وردينه للبيت الي مأجرينه .. عفتهه يم امهه ورحت للحجره تمددت وغمضت عيني وانه افكر بهالحال ليمتى يضلن هالشكل   !!!  لازم اعرف اصل ليهه بشي

للعصر رحت جبتلهه حلويات .. اجيت كعدت يمهه
واحاجيهه وجنت اريد اوكلهه منهن وهيه صاده وجهه مني ومادايره بال لكلشي احجي واسوي
كلش انغثيت بتصرفهه عاد شمرت العلاكه وضليت امشي بالحجره وانه مختنك باعصابي
ضليت اصيح عليهه
- شغيرررج علي فهمييييني تصدين مني ليييش شمسويييلج انه لييش تضلين تحركين بهالگلب موش معيشج بي انه !! شيضرج كربي منج شيضررررج ليمتى تضلين ماتشوفين روحي الجاي احركهه بالصبر وياج لجن حسافه والله ويامن احجي انه ويه التخلت عني باول طيحه
ويه الي تجذب بحبهه ! ما افرضن روحي عليج
بعد

عفتهه وطلعت جان بسام يتسمع لحجيي واول ماطلعت لحكني ...
- شهااااب اكف خويه وين ماشي
- لجهنم لاتلحكني ارجع
- خااااب اكف شمااالك هسه تسودنت عليهه هيج شني جديد عليك هالحال
- بويه افهم مريضه تعبانه لجن انه ماردت منهه شي انته ماتشوفهه شلون حته عينهه ماتحطهه بعيني يعني انه اجي احاجيهه واريد اوكلهه وهيه صاده وجهه وضاربتني بعرض الحايط ليييش شني هاي هم بيهه مرض !!! تعبت والحسين تعبت مايصير هيج هسه لاتعين روحهه ولاتعيني النوب ردتني غريب عنهه
- والله حكك جا احنه هم حالنه حالك كلنه موش شايفتنه
- انه اختلف هاذ اللازم يصير لجن اااااخ ااخ عگلهه مدري شنهي الي بي
- الله كريم ياخويه امشي هسه خلي نرجع يلا امي جاي تسوي العشه موش وكت طلعه وخلهه هاي تعودنا عليهه
- ماريد شي عوفني انه ارتاح واجي

عفته ومشيت رحت افتريت بالشارع شويه وكعدت ادخن وحسبه تجيبني وحسبه توديني لليل يلا رديت
للبيت كبل رحت نمت ... وجان اكعد عله صوت باذني ونفخه هوا عله وجهي جفلت وراساً كمت عله حيلي اعاين مامش شي وحته بسام نايم
كبل رجلي خذتني ليهه .. طبيت بهداوه لحجرتهه
وفتحت الضوا عاينتهه كاعده وضلت تعاينلي
كلتلهه ..
- بيج شي ! محتاجه شي !

ابتسمت ومدتلي ايدهه .. رحت كضيتهه وجريت نفس براحه ضلت عيني بعينهه وشويه وجان رفعت ايدهه تلمست وجهي وياكثر ماجنت محتاج ليهه هيج .. كبل غمضت عيني واستشعرت برودتهه عله لحيتي  وعيوني ... دنجت وخليت راسي يم صدرهه وهيه ضلت تتلمس وجهي وشعري جنهه تريد تطمني وتراضيني مثل كبل

كلش ارتاحيت بهاي مبادرتهه بسيطه بس بيهه من الشعور الي يغنيني  عن الف جلمه ..

وره شويه بست راسهه ورحت نمت ..
ثاني يوم اخذتهه للعلاج وضليت وياهه ساندهه وكت الي توكف والبنيه تحرك رجلهه خطوه خطوه .. جنت اشجعهه حته تكمل هالخطوات عبن هيه جانت تبجي من وجع رجلهه من جنت اسال الدكتور يكلي تخيل هاذ اول يوم لواحد يلعب حديد وشوف عضلاته شلون تتشنج ومن يريد يحركهه شلون وجعه يصير هاي نفس الشي ...

خليتهه ترتاح شويه وبعدين اخذتهه ونزلنه للسياره
شلتهه وكعدتهه وره  وطبكت الكرسي خليته بالصندوك .. وبعدين كلت للسايق ينزلنه براس المنطقه الكاعدين بيهه ... نزلت وكعدتهه واخذتهه
وتمشينه شويه بعدين رحت جبت اثنين موطه وخليتهن بايدهه واخذتهه ورحنه كعدنا بمنتزه
خليتهه هيه تاكل وانه اكل واعاينلهه ..
كضيت ايدهه وابتسمتلهه وكلتلهه ..
- بنيتي اريدج كويه ماضل شي وتردين تكفين عله حيلج بس كوي نفسج يارويحتي ولاتضيعين تعبنه وصبرنا وياج تره هناك اهلنه كلهم ينطرون ردتج
تدرين بالشيخ لساعه ذاب عكاله مايرضى يلبسه
جيف ماردج بسلامه وهالساع هوه يتأمل بعد كل هالشهور تردين ليه بعافيتج ...
كلشي صار نكدر ننساه حبيبتي بس لو تخلين ايدج بايدي وماتصدين عني انه انسيج كلشي واردج لذاك النور الجنتي بي لجن عزلتج هاي ظلمه تضل محاوطتج تاذيج وتاذينه اضعاف .. ربى حبيبه
المفروض هاي شهور تحضرين بيهه لعرسنه ماتردين نتزوج ونعيش حياتنه سوه ! انه ماتخليت عنج ولا مره عفتج بشدتج املي بيج جبير لاتتخبين عني بنص الدرب ربى مو هيج انه اعرفنج واعرفن حبج لاتخذليني بهاي عزلتج .. حبي وبيتي ينتظروج يالغاليه

عاينتلي وابتسمت .بست ايدهه وكملنا مشي للبيت
تلكتنه امهه تسال شصار هناك واذا تحسنت لو لا
وبسام يكرص بخدودهه ويكللهه طلعي صوتج عاد خلي نتعارك مليت هيج ...

للعصر خابرني الشيخ وكالي البشاره ..
كبل رحت خذيت كيكه صغيره عله كدنه وشموع
ورحت للبيت ... حطيتهن عله الطبله وصحت عمتي ...
- تعاااي عمه جيبي بنتج وتعااي
- ها خيرك يمه
- رتبيلنه هالشغلات واكلج
- هاي ماليش الكيكه؟؟
- سويهن وافهمج

رتبتهن وبسام كلساع يسال شكو وشكو ماحجيت الا كملت عمتي وجبت ربى خليتهه جدام الكيكه
وهيه تعاينلي
- اليوووم عدنه بشاره تستاهل نحتفل بيهه
- دكول ييمه مو شلعت كلوبنه
- ربى نجحت عمه نجحتتتت بنيتنه نجحت وتخرجت
- يايمه صلواتت كلللللللوووووووش
- اييييي هاي الاخبار الزينه عفيه عليج خيتي بطله عمممممي هيه كووه صرنا انه وياج مهندسين افرحي ييمه هاي بيتج اثنين مهندسين شتردين بعد
- الف الحمدلله يمه الف حمدلله ماضاع بيكم تعب
رفعتو روسنه وبردتو كلوبنه

دنجت ليهه وكلتلهه ..
- مريتي يالمهندسه كصي الكيكه يلا فرحه نجاحج هاي حبيبه لاتضيعينهه بالحزن افرحي واضحكي

عاينتلي وابتسمت نطيتهه السجين وهيه تكربت وكصت الكيكه وامهه تهلهل وبسام يصوفر انه جنت اصورهم فيديو واصور ضحكتهه ودزيتهه للشيخ ولعمي حاتم هم دزيته كلت خطيه يبرد كلبهم شويه عليهه ...

كعدنا ناكل الكيك وامهه كل شويه وتكوم تبوسهه
وتحضن بيهه وتدعيلهه .. ضلت بس فرحتنه بصوتهه ناكصه هالكعده ...

ثاني يوم امهه  راحت ويه بسام وجابتلهه تراجي
ذهب لبستهه لنجاحهه .. وانه كلتلهه هديتج من نرجع بسلامه تجيج هيه بس تتبسم بوجوهنه

وره يومين وكت العصر جانو نايمين وانه كاعد اكلب بالتلفون وضايج كمت اريد اروح اكعد بسام
حته ننزل نتمشى شويه .. عاينت باب حجرتهم مفتوح كلت اشوفنهه كاعده نايمه ؟
عاينت شفتهه كاعده .. رحت يمهه تلمست خدهه
وهيه عاينتلي كلتلهه ..
- تريدين نطلع ؟
هزت براسهه باي .. عاد رحت جبتلهه جبتهه وشالهه لبستهه وكعدتهه عله الكرسي وطلعنه
تمشينه لراس الشارع .. جان هناك المنتزه الي دايماً نكعد بي .. حاطين بي العاب ومرجوحه
تتهزز وحدهه وبس صوت زنجيلهه من تتحرك
مالي المجان وكلشي هادىء ..

ضلت هيه تعاين ليهه وانه واكف بسدهه
وره شويه جان تكول ..كلشي كئيب.. بصوت ناصي حته انه توهمت اذا صدك حجت لو لا
بهاللحظه عاينت بسام جاي لينه اشرتله يروح
لا يجي ودنجت كعدت جدامهه بالكاع .. اعاينلهه وانتظرهه تحجي بعد شي ... بلايه ماتعاينلي كالت

- جان عمري سبع سنين من اول مابديت احس
بوجود شخص وياي  ومن عمر تسع سنين صار
وجوده يقوه ووكت الفجر يكعدني صوت
الصلاه ياعبد الصلاه .. ماجنت اعرف اصلي
واتجاهل الصوت هذا ويضل يتكرر بكل اذان
لحد ما كلت للشيخ ليش تصلون ؟
جاوبني .. خلقنه عباد لله فالصلاه طريقه للتعبد
واداء حق الله علينه شكر وتضرع وتسبيح
كلتله علمني الصلاه وعلمني عليهه .. صرت كل
ما يجيني الصوت هذاك اكوم اصلي وبيهه هم احس بوجود نفس يمي كمت اخاف اكثر لان بديت اوعى على اليصير واشوف هالشي مختلف عندي مو مثل باقي اهلي من احجيلهم يضحكون ففهمت اني وحدي الي اسمع واحس بهالشي

- كملي وبعد

- من جنت بالمدرسه بالابتدائيه البنات و ولد المعلمات يضحكون على شعري ورموشي لان بيض هواي جانو ياذوني بحجيهم على شعري لان احمر ومايصيحون باسمي كله الحمره فاني جنت انقهر واضل ابجي واحجي عليهم .. وره كم يوم ابن المعلمه جر شعري وضل يحط عليه طباشير مكسر واني اصيح حتى يوخر بس ماضربته فجاه هو من وحده وكع والبنات ركضو للمعلمه يكلولهه اني وكعته اجتي تحجي عليه وحجيتلهه الصار بس مصدكتني اخذت ابنهه جان بالكوه يتنفس واني ضليت كاعده وحدي وانتظر يخلص الدوام واطلع
جانت امي ماخذه اجازه بهذا الاسبوع وابويه هو يرجعني للبيت .. من اجه كلتله الي صار وراح حجه ويه المديره وتفاهمو بس وره يومين يله داوم الولد وكام يتجنبني .. مافهمت ليش هيج صارله بوكتهه بس بعدين من صارت هم ويه رباب هم جانت تخبث وياي ومره وكعت بنفس وكعه الولد
صرت كلش اخاف واتجنب كل واحد ياذيني ومااحجي شي لان اخاف يصيرلهم شي
ومشيت بهالعمر كله على عزلتي منهم

- وماعرفتي ليش هالشي منو سببه ؟

- سببه صديق الي مايرضى باذيتي

- وينه ؟

- مادري اذا موجود هسه ويسمعني لاني مارضيت عليه باخر مره  واختفى من فتره

- فهميني ازيد

- هذولاك ال٣ ماتو بسببي اني حامله ذنبهم بركبتي شهاب

- شمدريج ماتو كلهم منو حجالج

- محد حجالي بس اني اعرفه كل مايرجع الي من بعد اي حادثه تصير معناه اخذ بالثار ورجعلي ٣ مرات

- موش هوه  الينادي للصلاه

- لا همه اثنين

- شلون اثنين ؟

- اني متاكده همه اثنين .. واحد حارس وواحد معلم

- شلون هيج !!!! شني الي بالضبط جاي يصير
مجاي افهمج.

- انطيني ايدك

نطيتهه ايدي كضتهه وضلت تعاين بعيوني شويه
وجان اشوف بينه صغيره واكعه وجاي تبجي وصتهه باذني صار هيج كلهه مجرد لمحه مثل رمشه عين شفتهه واختفت .. ضليت صافن عليهه
جان اسمع صوت البجي نفسه انداريت ولن هاي نفس البت امهه شايلتهه وتمسح بدموعهه  رديت عاينتلهه وكبل ماحجي كالت ..

- هذا المعلم والموت الحارس .. فهمت. ؟

-  منين اجوج وشلون هيج فهميني كلشي

- من بديت بعمر البلوغ صرت اسمع هالشخص يحاجيني ويمي بكل وكت ماجنت اخاف بكد مالي رغبه حتى اعرفه منو .. جان يعلمني اذكار ويكلي
ردد ياعبد .. صرت اامن اله واحب وجوده علمني تسبيحات ومايتركني للنوم بالليل لازم اضل اصلي وهو وياي مااشوفه بس احس بي واسمعه وعلى
تراتيله اني اردد اله نوع خاص بالذكر والتهجد
حافظ كل القران تلاوته بخشوع يخلي جسمي يقشعر مايهدا من كل هذا الا بعد صلاه الضحى
من وحده يختفي يلا اكدر انام وبالايام صارت عندي عاده السهر وحتى وكت مرضي جنت احسه يمي ويردد بالاذكار ..

- كملي ليش سكتي

- راح تبقى تحبي بعد كل الحجي هذا والي يجي اكثر منه ؟

- شهالسؤال حبيبتي انتي روحي شني يغيرني عليج حجي !!!! موش روحج انه شلون اتغير عليج كملي وانتي مطمنه

- بعمر ال ١٤ صرت احجي للشيخ كل الي يصير وياي وهوه يسمعني ويدقق بالتفاصيل وراح اخذني لعالم ديني بالنجف وحجيتله كلشي ماصدكني بالبدايه واعتبره مثل المس بس بعدين ثبتتله العكس
جانت رده فعلي قويه ولساني نطق بثبات بوكتهه مارضيت احد يصغر من قيمه هالشخص الي وياي
كلش انفعلت تجاه رده هذا وكلتله ...
شنو الي يثبتلك ان هذا مس شيطاني !!! كالي
ماله غير تفسير انواع الجان والشيطان هيج تصرفهم يصير ويه الانسان .. كلتله ..
كونك عالم لازم تفسيرك يكون اعمق حتى ويه انسان عادي وصغير مثلي بهاللحظه اني فرحانه بمعرفتي حجم علمك اكثر من فرحي لو حصلت غايتي من جيتي الك .. سكت هو واني كلت للشيخ نكوم نطلع ..
من طلعنه جان اكو رجال  جبير يبيع مخضر
براس الشارع اشرلنه من بعيد ورحنه اله اول ماسلم علينه وردينه اله السلام ..انطاني تفاحه
وهو وجه بشوش ومبتسم كالي ...
شلونهم مدوخيج
اني تفاجات وماعرفت شجاوبه جان يضحك ويكلي
لاتخافين اسألي الي بالج تلكين مطلبج
ترددت اساله لو لا وباوعت للشيخ جان يساله
كله .. منو انته حجي ؟ كاله .. عبد من اهل الله والي تدوره بنتكم عندي كاله .. وشنو الي عدنا كوله؟ كله .. لو سألت السؤال الصح تاخذ الي تريده .. باوعلي وضحك وكال .. اكلي تفاحتج تازه هاي ... اكلتهه واني افكر شنو السؤال الانسب
الي اكوله وره شويه سألته ..
تشوفهم ؟ ضحك وكالي تكومين تشوفينهم مثلي
كلتله .. شنو هذا كله وليش اني بالذات ؟
جان يكلي ... انتي شتحسين هذا شنو وهم لو حقيقه لو عالم ثاني
كلتله ... حقيقه بالعالم الثاني كالي ..وبعد شتحسينه
كلتله .. جن مو انس كلي شلون جن ! يجوز يطلع روح بشريه ؟؟؟ كلتله ... قابليته ونفسه مو انسي
كلي جاي لمضرتج لو نفعج برايج ؟؟ كلتله وبدون تردد لنفعي عاد هو ضحك كلي حصلتي جوابج انتي كلشي تعرفين وراح تعرفين ازيد بس هدأي فكرج كلشي يجي ليمج وتشوفينه ...

عاد سألته .. هو شنو نوعه  وليش ياذي غيري اذا ينفعني ؟ كلي ... مو هو الي ياذي هذا جن صالح مسلم متعبد ااكدلج هذا جان رفيق لانسان مؤمن ومعلمه الي يعلمج عليه هسه محظوظه بي
كلتله ..شلون اجاني ليش اختارني ؟
كالي... انتقال الجان لانسان ثاني تكون بطريقين ياما موت الانسان نفسه وبهالحاله الجان يختار اما انه ينفي روحه لمكان ثاني او يرافق انسان ثاني بس بهيج نوع من الجان يدور على اطهر روح لان ميكدر يتاقلم ويه روح مليانه بالشر والذنوب وما الى ذلك ... والطريقه الثانيه ان الانسان نفسه يحرره منه ويرجع بالتالي هم يختار نفس اختيار الاول ...

صفنت شويه اريد اعرف باي الطريقتين اجه جان الشيخ يكلي .. لا تصفنين الاولى مبينه كلتله ليش
جان يكلي من ولادتج بين بعيونج ... الحجي كال
الولاده هي افضل اختيار اله لان مايلكى اطهر من هيج نفس .. الشيخ كاله ... انولدت بالمقبره الي هنا
ضحك هو وكال .. ورجعت لنفس المكان تدور السبب ... كلتله .. منين تعرف كل هذا ؟
كالي تصيرين مثلي بيوم من هالزمان ... كال اني
شخص عرفاني .. دريت بيج ترجعين لهنا من اول ما طبكت سيارتكم ونزلتو .. كال اني اشوف فوك نظر هالناس والي من المعرفه ما عزني بها ربي بس اني رجال على كد حالي ابيع واسترزق واجيب لكمه يومي وانام على حمد الله واصحى على بركه الله ..
كالي .. لا تخافين لان انتي رزقتي بخادم ورفيق
مؤمن يوصلج لله ومايضيعج ولو تهتي بدروبج
اسألي خالقه هو الي سخره الج وقدره من ولادتج
مايضرج بيوم وتعلمي تفرزين بينه وبين المؤذي

سألته على المؤذي ماقبل يجاوبني

- سبحان الله وتاكدتي هاذ حجيه صحيح !

- اي تاكدت من الرفيق نفسه كالي بالمنام
من الله والى الله لا ضر ولا ضرار ...
جان ياكدلي انه مو مضر الي وفعلا هو مو مضر ابد بالعكس اله من القدرات مايعجز العقل عن توقعها .. اني قريت عنه بعض العلماء يسمون هذا النوع بالجن الطبيب .. جان مسخر عند الائمه
بس مايكدر على تسخيره بناحيه الشفاء غيرهم

- وشني الي كدرتي عليه انتي؟

- كدرت على شوفته طلبت ولباني مرتين بحقيقه والباقي وكت غفوتي لاني جنت بسرعه اتعب واختنك واكضيلي يومين بالمستشفى بس من بعدهه
صار يشوفني هواي اشياء .. اولهه جان حادث لبسام على البايسكل اذا تنتبه لرجله بعده اثر خياطاته موجود .. ومن بعدهه يوم الي صارت بي
الدكه على بيت عمنه الجبير

- هاااااي وكت الدكه انه حاضر بيهه كبل سفرتي بشهر

- همزين جنت حاضرها حتى هسه ماتستغرب حجيي وتشكك بي

- انه موش اشك لجن اتفاجىء يعني شي مايدش بالعكل هيج راساً

- هه بعدنا ماحجينه شي

- عليج علي !!!! شني الضال بويه

- ضل حزني شهاب ضل وجعي وكرهي لنفسي
ولهالدنيا ضل كلشي حرمني النور

- عليييش هالحزن يارويحتي

- ماتو شهاب تفهههم ماتو اب وام تركو طفل وحده وماتو بابشع طريقه رجال ترك وراه عايله مستنده عليه كلهم ماتو

- يستاهلون الصار جا الي سووه كليل

- بس مو هيج جان ممكن ينسجنون او بفصل بين العشيرتين يصير جان ممكن يضلون عايشين ويه ابنهم واذا ماتو يلحكون يذكرون الله مو يموت متعذب هيج حررررررام الصار والله حراااام مو هيج الثار يصيييير ليش ماكو رحمه للبشر والله ماردت اذيهم والله صبرت عليهم ايام بس ماكدرت اكثر خفت على البنيه والله خفت عليهه ماردت اذي احد
- اهدي يارويحتي عليش البجي اهددي انتي ماسويتي الا الصح .. حميتي الطفله هاي وحميتي روحج وهاذ جزاه اليمشي اعوج

- ماكدر اسامح نفسي ابد ماكدر هاي موتتهم تضل بركبتي عليه حسابهه .. اني من تملكت هالشي مايصير استخدمهه بالسوء واذي بيهه الناس هذا راح اتحاسب عليه جبير همه شهااب والله جبير
ماكدرت اعيش من هذاك اليوم اني سديت كل باب
ماريد اذي بعد اكثر من هذوله كلشي ديصعب اكثر عليه كلشي ديخنكني حمل هالذنب ثكيل احسه بروحي ثكل لدرجه ان حتى الرفيق اختار وياي السكوت موتتهم بهالعذاب ثكيل حملهه

- بس موش ذنبج حبيبتي موووش ذنبببببج انتي اضطريتي لهالشي لو ما سويتي جان اثنيكنم خسرناكم ساعتهه شلون نعيش !!! والي مات لو ضال عايش جان اذى غيرج او يضل ياذي عشيرتنه لحد مايهلكهه ويهلك الدم يجر الدم ياربى
لو ضال عايش جان احنه ذبحناه ويجون اهله ياخذون بالثار ويرد هالثار مايخلص وتصير دم للرجاب بين هالعشاير .. لجن هالصار كطع الشك باليقين وكف مجزره جانت راح تصير وانطاهم جزاهم دزهم لابو الحق هناك يحاكمهم

- واني شلون حكدر اعيش وبسببي ماتت ٣ نفوس
هااا كلي شلون انسى !!!

- موش شرط تنسين لجن تقبلي الصار موش هيج جنتي تكليلي

- مااريييييد ماكدر راح يضل هالشي ينعاد من طفولتي واني اذي غيري كمت اخاف يجيكم يوم اذى مني

- واعتزلتينه !!! بعدتي عني ؟؟؟ ظنج هيج تحميني منج !!!!

- ما تعرف شيصير بيهم

- اعررررف ليش ماعرف شني نسيتي المره االصارلي بيهه نفس الشي شفت الموت بعينه
ولو ضال يوم ثاني هم جان تسودنت مثلهم

- مو هيج هذاك جان بس كتحذير بس همه لا

- بشني اختلفو ؟؟

- اختلفو انهم شافو من ياذيهم وماتركهم لحد ماخبلهم

- شلون كدر هيج  وبعدين موش كلتي هوه مايضر

- كتلك اثنين همه

- والثاني منين اجه !!!!!

- عوفه للثاني هسه

- ليييش نعوفه

- شهاب رجاءاً تعبانه

- زين زين ماشي نحجي بي بعدين بس خلني اكلج شغله ... اول شي انه حيل فرحت برجعه صوتج يارويحتي شلتي مني هموم هالدنيا كلهه بهالجلمات النطكتيهن .. وثاني شي ماريدج تستسلمين لحزنج هاذ صار مليون مره اوصيج لا تستسلمين انتي گويه ومتميزه انتي حبيبتنه واميره بينه لا تبعدين منه هاذ هوه الاذذذذى بعينه بعادج .. نريدج كريبه بزينج وشينج مامش بشر كامل وحملج لاذيتهم وحده يبريج من دمهم .. هاذ دفاع عن النفس موش ذنب انتي هالطيبه ام روح البيضه ما تشيل ذنب دمهم همه الجنو عله انفسهم لو ماعايلين بيج ماصار الي صار .. انتي معذوره جدام الله وخلكه
حك نفسج عليج لاتنسي تراهه تحاسبج عله الاذى ليهه وانتي جاي تعذبيهه بهاذ صدج من العيشه
موش انتي الدراسه الفاهمه الي تعرف الحك والرحمه شلون تظلمين روحج هالشكل ..

- خايفه شهاب هالصار تعبني اكثر مما تتصور ماجاي اكدر اواجه احد .. يشوفوني بريئه بس اني كاتله ٣ بدم بارد ماريد اصير ام وجهين ماتحمل تفههههم ماتحمل اعيش هيج

- انتتتي ماكتلتي احد خلي هالشي بمخج عاد
الي كتل موش انتي .. هذاك هو الي كتلهم موش انتي افهميهه عاد بنتي

- بسسس اني الدزيته اننني الي خليته يدافع عنه وهو هم تاذى محد سلم من الصار صدكني محد سللللم

- شني الصار ليه ؟

- عايش بحزن ووحيد

- مثل وحدتج

- وازيد منهه لاني منعته يوصلني بعد الي سواه
وهو كلش يحبني حتى يمكن اكثر منك يحبني حتى اكثر من نفسي بس هو مايعرف الا القتل

- ليش يحبج وشلون ؟

- سالفته طويله كلش عوفهه بعدين

- ماشي.. زين مدامج تدرين هوه السبب موش انتي عليش شايله هالذنب

- لاني صاحبته كلشي يخصه يعود الي

- بس محد يشيل حساب احد كلمن يتحاسب عله الي عملت يمينه

- مادررري شهاب مادري

- موش تثقين بيه ؟

- اي طبعا اثق

- جا انطيني ايدج ... عايني هاي جدام الخالك وخلگه .. انه اقسملج  انتي بريئه من دمهم وبدليل
عدنه بدينه انواع جهاد ومنهه الي يحامي عن نفسه واهله وماله .. وعدنه بدينه مباح الدفاع عن النفس بكل انواعه مادام النيه واضحه وعدنه بدينه محاربه الظلم والصار بوكتهه ظلم عبن انتو مالكم دخل بمشاكلهم وصرتو ضحيه ... ولو كل هاذ ماقنعج فعدنه من اعترف بذنب فلا ذنب عليه ومن تاب تبنه عليه ومن استغفر غفرنا له
بعد عذرج وين ؟؟؟

ماحجت شي بس ضلت حاطه ايدهه عله عيونهه وتبجي بحركه .. ضليت اعاينلهه وكلبي يوجعني عليهه اعرفنه موش بالهين هيج شي وعله بنت مثلهه ماتعرف تاذي نمله موش عاد السالفه بيهه موت .....

كمت حضنت راسهه ومسحت دموعهه وكلتلهه
- والله لو جنتي كافره وعله هالدمع والخوف ربج يغفرلج ويحببج بدينه ... بسج عاد رويحتي بسج تعب وحزن كفاج هالشهرين تعذبين بروحج
بسج ملامه لروحج وكره هيج انتي جاي تغلطين ازيد عبن الله يريد التواب الي يؤمن برحمته ويستغيث بيهه موش يريد القصاص من النفس

- والنعم بالله

- مدام ايدج بايدي لاتخافين شي كلشي ينسي وداعت هالعيون .. بس لاتحرميني صوتج بعد
والعباس تمرمر كلبي ..يالتدورين الرحمه ارحمينه هالشوك يذبح بهالصدر يمتى تحنين عليه

- بعدك تحبني وبكلشي بيه !

- صرت اعشكنج عشكين فوك حبج ولج بويه انه من حبيتج اعرفن يجي هاليوم وتكعدين تحجيلي
موش مستغربه ولو اريد ابطل جان من زمااان بطلت ورحت تزوجتلي تركيه حليوه

- نار التحركك انته وتركياتك

- هههههههههههههههاااااااااااااي يااابويه شكثر مشتااااااك لحجيج وغيرتج هاااي ولج انه بدون صوتج ظلمه دنيتي وعلي ماعايش

- ايييي مبين

- شني المبين !!! لاتخليني اطلع ضيم كلبي

- لااا لاا

- هسه اوعديني تشيلين هالافكار من راسج

- شهاب

- توعديني لو لاا

- ماشي اوعدك

- وتوعديني تسلميني نفسج وتمشين عله خطاي وتخليني انه اطلعج من كل هاذ

- تريد تحقق الحلم

- جا نخلي ناكص !

- ماشي اوعدك راح اخليلك مطلق الصلاحيه بكلشي يخصني

- عفيييييييه هييييج هسه نزلت علينه رحمه الله
اضحكي لج خلي اشبع بهالضحكه ياام سنون حلوه

-ههههه شهااب

- ياعيونه ونظرهن كولي

- احبك

- اووووف ربببي رحيييم رحييم وانه احبنج يارويحه شهاب انتي

بست ايدهه وهيه تضحك عاد اخذتهه للبيت واول ماطبينه هيه صاحت لامهه واجتي امهه تركض ليهه وتصلي ع النبي وضلت تحضن وتشمشم بيهه
بسام هم ضل يحاجيهه وكلساع يكلي لك هاي تحجي شسويتلهه ....

بعدين خابرنه عمي حاتم وضلت تحجي وياه وهوه صوته من كد ماطاير بفرحته ومامصدك يعيط من يحجي وصوته عبر سماعه التلفون كلنه نسمعه
ونضحك ..

وخابرنه الشيخ كال افتحولي هالفديو اريد اشوفنهه بعيني تحجي ... وفتحنه الكاميرا وضل يحاجيهه
وكلساع يكول الحمد ياربي لك الحمد ...

.
.
ملاحظه :

العرفان هو من اعلى الدرجات الي يوصلهه العلماء هذا يكون بالفطره عرفاني يعني مثل مانكول رباني .. مثال عليه السيد الصدر اذا تقرون عنه راح تشوفونه عرفاني وهو تعلم
الاصول العرفانيه من هذا الحجي ابو المخضر
تكدرون تقرون بسيرته وبالروايات عليه وتتاكدون من صحه كلامي ... ممكن البعض يكول تبالغ او خيالهه واسع بس اني على ثقه تامه بكل شي اكتبه لان مامعقول اكتب تلفيق واختراع من يمي بهيج مواضيع ممكن انسأل عنها من اي متابع اليوم او بعدين باعتبار هاي القصه راح تبقى واكيد الي يجون راح يشككون بهالكلام فخلي هذا تذكار للكل ... اني مسؤوله عن كل كل كلمه انذكرت هنا والي يريد يحاجج بيهه الي كل الشرف بمناقشته ...

راح احجيلكم فد سالفه صغيره توضح معنى العرفان .....

" بزمن قبل جان اكو مصريين يشتغلون بالجنوب
واحد منهم جان دائماً يتواصل ويه عائلته بالتلفون الارضي من المحلات فصدفت مره راح يخابرهم ومايحصل وضل يحاول وياهم سنتين
ويدز بريد الهم وماكو جواب وهو رجال فقير
جان الفلس الي عنده يدزه الهم ويه البريد
تمرض بعدين على اهله ضلو الناس حايرين بي
بعدين دزوه لواحد من الساده بالنجف هناك كله
احجيلي سالفتك كله المصري هيج وهيج السالفه
السيد هذا انطاه ١٣ درهم بظرف حطهن بايده
وكله روح خابرهم هسه المصري ماقبل ياخذه
بس هو ضل مصر الا ياخذه وياه .... راح المصري خابر جان تطلعله زوجته وضل يحجي وياهم ويبجي وسمع اخبارهم من سده تذكر هو ماعنده فلوس شلون يدفع فلوس الاتصال هذا ؟
فطلع الظرف وكال للرجال شكد المبلغ ؟ جاوبه
١٣ درهم ..شالهن وانطاهن اله ....

السؤال هنا شلون عرف ان التلفون راح يجاوبوه ومبلغ المكالمه شكد ؟؟؟؟؟ "

هذا مايسمى العرفان .