رواية من فجر ديسمبر الفصل الخامس والثلاثون 35 - بقلم Zoka 🌷

من فجر ديسمبر
🍁
🍁
ضلينه وحدنه وانه شربت كلاص الماي وعاينتلهه
كاعده بعيد اشرتلهه تجي تكعد يمي .. كامت واجتي كعدت بسدي وتعاينلي ...
- شلونج ناديه
- بخير شلونك انته
- عله الله .. اعرفن جان لازم احاجيج واتواصل وياج هالجم يوم بس انه شويه مضغوط بالشغل
ومحتار بصاحبي مريض وماخذ كل فكري
- مو مشكله اني موجوده الك دايماً
- ماتكصرين .. اريد اسالج شي
- اي كول عيني
- عليش وافكتي بهالزواج !
- مابيك شي ينرفض حته ارفضك ومناسب اليه من ناحيه الشغل جدي كال راح تفتح مختبر وكالي اساعدكم وافتحي عياده بنفس البنايه انتي وياه
واهلي مدحو هواي بيك بعد البنيه شتريد اكثر من هيج
- زين زين
- وانته ؟ سمعت ناهي عله بنت عمك
- هاذ شي خاص بيه لا تجيبين طاري الي الج
الاحترام والتكدير والاهتمام اي شي كبل جيتج لحياتي لا تسالين عنه زين
- ماشي مثل ماتريد يصير
-  زين لازم امشي هسه ،،انطيني رقمج ونتخابر
- بعد ماشبعت من شوفتك
- الجايات هواي
- لا تطول عليه
- ان شاء الله ،، جم يوم واجيبلج تلفون
- لا عندي هذا جديد مابي شي
- كيفج انه اجيبلج يجوز يعجبج تبدلينه وان ماعجبج عوفي
- تسلم حبيبي

عاينتلهه وانه رافع حاجبي من يمتى صرت حبيبهه!؟
- يلا انه امشي صيحيلي الاهل خلي اسلم عليهم
- خابرني وطمني عليك خصصلي وكت احبن احاجيك
- ان شاء الله

راحت صاحت خالي وابوهه سلمت عليهم ومشيت
وطول الدرب انه اتصفن شجابني عليج ياناديه
منين لوين صرتي ام بيتي ...

لليل خابرتهه حجي عادي وياهه وهيه احسهه تريد تنكربلي بكل شي .. لجن انه حجي جامد وياهه
وضليت هالشكل كل يوم تخابرني الصبح والظهر
والعصريه ادزلي مسجات اشعار وكله تصيحلي حبيبي وابو بيتي وهواي تكلي معجبه بطولك وحلاتك وتغزل بس ماهزت لو شعره مني بحجيهه
عله كد واجب اكضي وياهه بالحجي والهي نفسي
وياهه وبس .. ماكصرت وياهه بشي انطيهه مصرفهه وجبتلهه تلفون ورصيدهه كله علي
بس مالي نفس بيهه ودايماً انساهه لحد ماهيه تخابرني يلا اذكرهه واضل اتحجج بالشغل
عزمني خالي عله عشه يمهم واخذت زهره ورحت
ليهم .. تلكتني بضحكه وتتلمس ايدي بالختله وانه
بس اتبسم بوجهه كلشي مااحجي ...
كملنه العشه وانه رحت وياهه للهول وحدنه والاهل ضلو هناك بحجره الخطار ..
كالتلي شويه واجيك وراحت وانه ضليت اكلب
بالتلفون لحد مااجتي رفعت راسي شفتهه مغيره
لبسهه .. اجتي لابسه دشداشه كصيره حمره
ومخصره عله جسمهه وصدرهه نصه مبين منهه
ورجليهه وزنودهه وفاكه شعرهه واجتي يمي
كعدت ولزمت ايدي وباستهه ...
- ماعرفت منك اذا تحب جسمي لو لا
- ا اي احبنه حلو
- شو ماحس هالشي
- لا عليش
- هسه شكد احبن اتلمس جتفك وصدرك ووجهك
بس انته لا ليش يعني مو مرتك اني احب احس منك هالشي
- مايصيرين مجال لهالشي وعبالي ماتحبين هالشي هسه وماكربتله
- لاااا امووت انه بلمساتك حبيبي
كالتهه وكربت وجهه لوجهي وباستني وشالت ايدي خلتهه عله صدرهه انه حيل كرهت هالتصرف منهه .. دفعتهه شويه مني وكلتلهه....
- لا يجون اهلج زحمه منهم
- انته متريدني مالك نفس بيه لتتحجج باهلي
- لاا ناديه مو هيج جا عليمن خطبتج لو ماريدج
بس هنايه ماخذ راحتي كلهه جم يوم واخذج لبيتي واشبع من هاللحمات هذني

كرصتهه بزندهه وهيه حضنتني وضحكت
عاد كامت راحت بدلت واجتي وطلعنه يم الاهل
واخذت زهره ومشيت .. وجنت احسب الفرك بين
هالربى والناديه هاي تريدني بكل روحهه وتسوي كلشي حته تكربني منهه وانه عايش وياهه مثل ماربى عايشه وياي ....
شكد جنت اتمنى لو شمه من شعر ربى .. لمسه من ايدهه البارده تحييني هاي اكرهن حته ريحتهه واجتي بحضني وحلالي وماكربتلهه شلون بيه !!

ضلت مخابرتنه كل يوم وهيه بحجيهه تتموع وتحاول تجيب طاري يوم العرس وانه اغلس جني ماسمعت وبمرات روحتي عليهه تضل تتكربلي وتحضن وتبوس وانه مره وحده تجاوبت وياهه
بالبوسه واختنكت حسيت كلبي حيطلع من صدري
كل ما اريدن اتكربلهه وانسى بيهه ربى ارجع مخنوك وملعون اهل اهلي ...

رغبتي كرجل كرهتهه ماكدرن اكض شبر من
مرتي وانه بيهه واضل مشعول بنار ايام وايام
لحد مااجتي ربى علينه من بعد هالشهور كلهه
اجتي ويه اهلهه بعطله نص السنه وصدفه شفتهه
ويه زهره وره البيت مارحت ليهه انه بلايه شي
متسودن النوب اكربن ليهه ...

ضليت لليل بره ومن رجعت شفتهن يم حجرتي واكفات انه بلايه وعي مني كبل مشيت وجريتهه
من ايدهه وطببتهه الحجره وسديت الباب ..

جانت تعاينلي متفاجأه وانه حبستهه عله الباب
وضليت حاط ايدي فوك راسهه واعاين لوجهه
وانافخ هالنار بوجهه ...
- شمسويتلي فهميييييني
- شهاب
- محترك اهله شهاب ومنعول اليوم الي نولد بي
-اهدء
- تدرين انه كل يوم ادعي ربي يكرهني بيج
اريدن اكرهج كره العمى انتي جيتي لعنه بحياتي
لا الرحمتي ولا الخليتي رحمه الله تنزل
- اهدء اهدء
- اكرهج بالعباااااس اريدنهه تصيرن صدك واكرهج ياريتني ماعرفتج ولا كعدت هذيج الليله
- شهاب
- اسكتي اشششش

كربت وجهي ليهه وشميت نفسهه وتلمست جتفهه وانه جسمي يرجف عليهه وللحظه اجيت احضنهه وتذكرت صياحهه وكت التكول ماريدك اطلع من حياتي عاد دفعتهه وفتحت الباب وطلعتهه ورديت
سديته وضليت افتر وانه الرجفه بعدهه بيه عليهه
مارغبت مره مثلهه ولا كدرت ..

من بعد هاليوم ماشفتهه وضليت الليالي كلهه احرك روحي بالجكاير ادخن باكيت وره باكيت وانه مشكل السماعات واحاجي ناديه الي ماكدرت تصلني لو بشبر واحد وكل حجيي وياهه افكر بهذيج نسمتي البارده وهواي يشرد فكري بيهه وانه احجي بالتلفون  ..

خلصت العطله ورجع الدوام وانه جنت اشتغل
بالمختبر بعدني اتدرب وياهم بين مادبر فلوس
المختبر الخاص بيه عبن هذنيج كل مااجمعهن يطيرن من ايدي وارجع للصفر ..

بيوم رحت اودي فلوس الجهاز لناديه حته تبدي ترتب امورهه عبن الزواج تقرر وره شهر
اخذتلهم علبه حلويات وياي ورحت .. كعدت
سلمت عله خالي وامهه وابوهه وهيه اجتي سلمت
وكعدت شويه وحانت تراسل بالتلفون انه مااهتم
لهالسوالف دايماً اشوفهه تراسل باول جيتي ليهه
ومااسالهه منو .. لجن هالمره امهه صاحت عليهه حته تكوم للمطبخ فهي جفلت من صوتهه وذبت التلفون بسرعه وكامت انه صار عندي فضول
اعرفن ويامن تحجي وهيج وجهه مكلوب ..

جريت التلفون وعاينت رسايل ع الفايبر من وحده اسمهه لمى .. طبيت لمحادثتهم وهيه جانت تكللهه
لتصيرين فاهيه هاي فرصتج ماضل شي للزواج
استخدمي الكتلج عليه ..

صعدت بالرسايل واشوفن ناديه تكللهه ..
مافاد شي وياه شكد لبست ردت منه مايهتملي
ولا تتحرك شهوته ولا شويه
لمى تكللهه.. انتي فاهيه مو تعوفي بكلمتين ضلي لحي وياه بالحجي وطولي بالسوالف للفجر هيج وكت يروح ينتهي بس شويه تموعي بصوتج
وضلي شوقي الج ..
وناديه ترجع تكللهه .. مابقيت شي مسويته
حته بحضنه كعدت وابوس بي وهو ولا يمه

ضليت اصعد بالرسايل اريد اشوف عليش هالشكل تسوي .. جان اشوف جم رساله عركه بينهن
ولمى تكللهه ... انتي زماله بعتي نفسج ماصدكتي تسافرين ولعبتي لعب
ثوله شلون تقبلين تتزوجين مافكرتي بليله العرس شلون
كم مره كتلج امشي سويهه هناك قبل لاترجعين للعراق مو كتلج خاف اهلج يجبروج وتروحين بيهه ليش مارحتي وسويتيهه وخلصتي جان هسه
ماذليتي نفسج هيج اله ويروح يولي طز بي

ناديه تكللهه.. جم مره كتلج المركز مو امن وهواي حالات نزيف صاير عدهم شلون اروح اموت نفسي بايدهم .. ولتضلين تحجين عليه تدرين بيه
جنت سكرانه شمدريني هيج يصير
هسه روحي دوريلي حل شوفيلي دكتوره براسهه خير حته لو انطيهه اضعاف الفلوس بس خلي تخلصني عاد مو متت

شسويلج يعني من اجيبلج دكتوره ترضى هيج هنا
هذني سوالف يسونهه الاجانب مو العراقيات حبيبتي اصحي عااااد .. كدامج حل واحد تروحين
تغريه وتشربي شي وخلي ع اساس هو سواهه
وضلي تبجبجي كدامه هسه يضل يرجف رجف ومتشوفين الا يومين ومسوي العرس واذا مادبريهه فسخي خطوبتج وضلي هيج كاعده احسن ماتصير فضحيه وكاتل ومكتول

بعد ماكدرت اقرا ازيد من هالحجي عبن النار عمت عيني كبل طبت ناديه بيدهه صينيه عصير
صحتلهه من بين سنوني حجيت ...
- ناديه امشي اريد احاجيج
- اي ماشي

عفت خالي الجان صافن عليه اول مره هيج اطلب منهه جدامهم ... مشيت جدامهه للهول وهيه طبت وسدت الباب انه كبل جريتهه من شعرهه وحطيت ايدي عله حلكهه ...
- تضحكييييين علي ياااساقطه يااااعاار هاااا
جايه تكربسين فضيحتج برااااسي !!! شني جاهل جدامج اااانه ومافهم

ضربتهه راشدي ورديت جريتهه من شعرهه ولطختهه بالحايط وانه اضغط براسهه عله الحايط
وهيه تون ..
- منهوووو هاااذ الكسرتي نفسج ويااه منهووو جاااوبي لا ادفنج وحك علي احججججججي
- مادري والله بالغلط صارت
- غلطيييييش لج كحبه انتي غلطيييش ياخذون شرفج وتصيحين مادرررري جا يمتى تدرين
يااااجايفه انتتتتتتتي كليلي منين هاااااااذ احجيييي
- هناك ويانه بالجامعه بالخارج والله مادري ششربت وكتهه واخذوني وياهم مادري غلطه والله غلطه مو بوعيي
- عااااااار انتتي عاااااار ترديني اصدكج هاااا
اصدكج !!! وانتي جايه تردين تسوين بيه نفس الشي وتكربسيهه براسي وتتبجبجين وتضيعين
فضيحتج والله لو تشيطنين ميه عام وياي مالج
مجال وهاي ربج فضحج جدامي واااانه الزوج
الجاي انطيج فلوس جهازج من خرب بقسمتي السوددددده
- شهااب لا تحجي لاهلي الله يخليك
- انجببببببببببببي ووولي مني وللللللللللي
- انته شكو حارك اعصابك عليه انته اصلا متحبني ادري بيك تحب بنت عمك هذيج وننطتك مجال وجيت عليه

صلختهه براشدي ورفعتهه من ركبتهه ..
- طاريهه لو انجاب بلسانج الجايف هااااذ اكصه
لج .. منهو انتي وجايه تحجين بحبي ليهه قندرتيش انتي وجاي تحجين وياي هالشكل .. انه غلط مني
وصابرلج  لهسه بس دواج الكبر انتي سم عله هالكاع تضلين تسمين بالوادم .. نزلتي راس اهلج بالطين وجايه تحاججين ويااااي

- شهااب والله هسه اذا طلعت وحجيت لاحد
اسويلك فضيحه لا عبالك اسكت لاااا والله تشوف وجه ماتعرفه مني
- شنننني شننني ولج مو امعصه لراسج هسه
وافصله من جسمج كلج دوده بايدي تجين وجاي تهددين خااااب انجبببببببي احسسسلج
- والعباس هسه اطلع واشوفهم شلون شمسوي بيه
واكللهم اغتصبني واهلي يصدكون بيه لو بيك !
- امشي يلاا اذا انتي مره سويهه يلاا هاي هديتج امشي اطلعي صيحي يلاا
- اصبرلي

هديته وضليت اعاينلهه شتسوي جان تشك دشداشتهه من الصدر وكفشت شعرهه ازيد
ورادت تطلع جريتهه وضربتهه بوكس عله خشمهه ودفرتهه ببطنهه

- هاي حته تمثيلج يصير صدك ... وقسم برب العباد لو سمعت مسويتلج بلبله اجي اسحلج لكبرج
انتي كلج ماتعنيلي شي مااشتريج بنعاااال بس خالي
مكامه جبير عندي وماريدنه ينزل راسه جدامي
وانه لو حجيت انتي تسكتين عبن الدليل عندي هاااذ التلفون بايدي كلشي بي لا عبالج تهددين وتسوين كلج ماتهزين شعره مني وضلي هنايه
تعفني وحيري باليدك بابج ياعااار

دفرتهه وطلعت كبل مشيت لباب الشارع لا سلمت ولا شي كبل شغلت السياره وطلعت وانه كاره
الدنيا والنفس الي بصدري يخنكني ...
ملفين بين اهلنه وحده كحبه شرابه عرك مكسوره
وتالي تصير بذمتي من خرب بحضييي الاكشر
وانه العاند ت عليهه وكاطعت اهلي حته اتزوج
وانسى هالربى اثاريهه تطلعلي هيج !!!!
منين الكاهه ومنين .. خرب بهالنسوان الكشر
ماشفت منهن راحه عسى الله ياخذني ويخلصني من هالعيشه بينهن

ضليت احجي ويه نفسي واضرب بالستيرن كلساع
وخالي يخابرني ارفضه واخير شي غلقت التلفون
ولكيت نفسي طالع لبغداد اروحن اأدي الامانه
يوم الي كالتلي تعالي وكت تعرف ...
والذنب ذنبهه بكلشي ذنبهه عليش ماكالتلي البت هالشكل بيهه خلتني امشي بعمى عيني كضيت شهور انه اتلوع عليهه واحسن بالذنب عله ناديه
حته بالاخير تطلعلي كحبه!

وصلتهم بالليل طبكت جدام بيتهم وفتحت تلفوني
خابرتهه راسا جاوبت ..
- انزلي افتحي الباب بساع
- ماشي ماشي

اجتي فتحت الباب وانه كبل طبيت نزعت الحذاء ورحت كبل للحمام فتحت الدوش وطبيت بملابسي جواه وانه انافخ نار مو نفس ....
ضليت هيج لحد ما رخت اعصابي بس نار كلبي
تزيد ماتنكص ... طلعت بس لابس البرنص وكعدت بالهول .. شويه واجتي جايبتلي ملابس
حطتهن بسدي وراحت ...

شفتهن ثخينات وانه مختنك اخذت بس البجامه وفانيله لبستهن وكعدت بالكاع وسديت الباب والضوا جنت صافن بالسكف عله هالدنيا الغبره
اشكال شفت منهه كمت ماامن بعد حته بخيالي

طبت ربى علكيف وفتحت الضوا واجتي كعدت بسدي نفس كعدتي مرتجيه ع الحايط ... مدتلي باكيت حليب الفروله ..عاينتلهه وهيه تاشرلي بحواجبهه اخذه وجاي تشرب بي ...

- ماريد عوفي
- اخذه يهدي اعصابك ماتخسر شي يلا
- جيبي
- شعرك مبلل هسه تتمرض خلي الخاولي عليه
- ربى مالي خلك هالسوالف عوفيني

جنهه متسمع مني شكول كامت جابت الخاولي واجتي كعدت جدامي وكامت تمسح الماي الي عله جتفي وركبتي .. اوخرهه ومتهتم ترجع تنشف بايدي .. جنت للحضه راح اصيح بيهه بس من تكربت كلش علي وكضت جتفي بايدهه البارده ازيد من جسمي وكعدت تنشف شعري هدئت
وضليت اعاينلهه وانه عاكد حواجبي .. حيل مشتاك لكل شي بيهه هالرموش الشكر ينسني الدنيا
ويه زراك العين ...
- لازم تلبس هالبلوز شهاب الجو بعده بارد وبيتنه مو دافي
- ماعليج بيه ماموت برد
- لا تعاند
- انتي لاتعاندين وياي عوفيني وروحي

ماحجت ششي كامت اخذت الخاولي وطلعت انه ضليت افرك بلحيتي ووجهي وجنت مدنج شويه
واجتي وكفت جدامي ومدتلي ايدهه ..
- شكو
- كوم وياي ولا تسال رجاءاً

حطيت ايدي بايدهه وكمت جاي نطلع وكالت
- حليبك اخذه وياك
- لج هسه وكت حليب
- هذا مهم لازم تاخذه
- هاي اخذته

مشينه وصعدنا الدرج وانه بعدني كاض ايدهه وصلنا لحجرتهه وجنه اثنينه نشرب بهالحليب
طبينه وانه ضليت واكف وهيه سدت الباب ..

- شعندج جبتيني هنا
- شنو رأيك بمرسمي الجديد
- حلوو
- تحب تجربه !
- انه ماعرف ارسم
- واني هم ماعرف ارسم
- جا وهاللوحات
- هاي احساس .. الرسم احساس شوف هاي الالوان والدفاتر كلهه تبقى بمكانهه اسابيع
مالزمهن لان ماعرف استخدمهن الا وكت الي
احس بفد شي لازم ينرسم
- وشلون ارسم الاحساس
- راح يخيلك شي احساسك راح يتجسد بشي
وهالشي يصير مثل الغشاء كدام عينك تشوفه انته وحدك وتعيش تفاصيله ودماغك يمشي ايدك على
حدود وتفاصيل هالشكل الي جسده الك وساعتهه
راح تنبهر بمقدرتك على رسم هيج شي
- هاااا هيج السالفه يعني
-اي هسه هاي ورقه حره بين ايدك وكل انواع الالوان كدامك عيش عالمك

جرت وصله جبيره فرشتهه بالكاع ونزلت عليهه
الالوان كلهه سطرتهن وخلت الورقه والفرش
واجتي يمي ..
- نافسني باحساسك
ابتسمتلي وراحت طلعت وسدت الباب ،، انه استغربت هدوئها لهدرجه وياي هالمره وحته انهه ماسألتني عليش جاي وشصاير وياي ..
مافهمت عليش جابتني للرسم ؟؟ موش المفروض نحجي ؟؟!

جنت صافن واعاين للالوان الي بالكاع واكول
شنو مغزى من هاذ كِله ؟
تالي ذبيت باكيت الحليب وكعدت بالكاع وتلمست
الورقه ..اول شي راودني باحساسي ان هالورقه مالازم اتضل بيضه مو حياتي هاي ..

عاينت للالوان وجان بينهن عصارات وقواطي صغار فتحتهن وضليت اجرب عله ايدي ياهو الاثخن وشفت العصارات انسب .. اخذت اللون الاسود وبايدي ضليت ارسم وحيل اندمجت بيهه
بحيث ايدي ماوكفت ولا اهتميت اشوفن كلساع شلون الرسمه جاي تصير .. مركز بس بالشي الجدام عيني جنت اشوفه وهوه جان شكلي وانه
احاول اصرخ واطلعن هالنار الي بصدري

لحد ماكملتهه عفتهه ماعاينتلهه ذبيتهه عله جهه
واجيت امسح وجهي شفت ايدي كلها ملونه وانه
جنت تعبان كمت رحت تمددت ع الجربايه وكبل غفيت بس شميت ريحتهه الفاكدهه من شهور
نمت .....

حسيت الصبح عله صوت الطكطكه يمي .. فتحت عيني وشفت ربى واكفه يم الكنتور ...
- بيش ساعه
- ب٦
- شمكعدج هسه
-عندي دوام واجيت اخذ ملابسي
-ربى
-اممم
- ضلي اليوم لا اداومين
- بنفسي مااداوم بس عندي امتحان .. تجي ترجعني بس اخلصه ؟
- يعني بيش ساعه
- بالعشره اني مخلصه اعوف المحاضرات ونطلع
- ماشي اذا هيج

راحت مشت وشالت ورقه الرسم وعاينتلهه باعجاب وكالت..
- رسمه قويه مثلك
- شو خلي اشوفهه شني انه نسيتهه وعلي

دارتهه علي وشفت انه راسم شكل راس يصرخ
وملونه كله بالسواد ومن بلعومه لخارج حلكه
احمر ومشخط البلعوم باللون الاحمر هم وصاير بنص السواد فمبين بي مكصدي من التجريح هالشكل .. الشكل مابي ملامح بس مجسم شكل راس وركبه كله اسود ....

اخذتهه علكتهه بصف رسماتهه وكالت ..
- مرسمي يرحب بيك بكل وكت
- انه ردت احاجيج موش ارسم
- واحنه حجينه
- يمتى حجينه
- اني حاجيتك وهذا يكفي
- يمتى تعاي فهميني
- راح يجيني الخط ..انتظرك بالعشره

كالتهه وطلعت وهيه ماخذه ملابسهه وانه جريت الغطى الي مادري يمتى انه تغطيت بي المهم جريته ورجعت نمت ..

همزين كعدت عله صوت التلفون جان ابوي يخابر
جاوبته ..
- ها بويه صباح الخير
- وينك يامسعد من البارحه ساد تلفونك ماتكول وراي اهل صخام بعينك
- خلص شحن
- وين انته
- بغداد يم صاحبي
- شوداك احجيلي شصار وياك
- مامش شي بويه هيج جنت ضايج واجيت لصاحبي
- يمتى ترد
- باجر ان شاء الله
- زين لا تسد تلفونك نوبه الثانيه
- ماشي

سد التلفون وانه عاينت ساعه تسعه وربع كمت
ع السريع نزلت اشوفن ملابسي وكلت بس لا ضالات مبللات ولكيتهن مصفطات ومكويات
اخذتهن كبل بدلت جوه ووكفت مشطت شعري
بسرعه رحت شربتلي كلاص ماي ودورت محفظتي وين ..
لكيتهه محطوطه عله الكاونتر والفلوس الي بيهه
مفتوحه حته تنشف وهمزين انه عايف هويتي بالسياره جان راحت ...
لميتهن وخليتهن بالمحفظه وطلعت كبل شغلت
السياره ومشيت لكليتهه ...

بالعباس مامش شي بهالدنيا يخليني اطيرن هالشكل غيرهه ساحرتني هالبنيه ...

وصلت هناك وكبل لا انزل رشرشت عطر وعدلت شعري ولحيتي ونزلت وكفت يم السياره وانه اخابرهه ..وانتظرتهه تجي ...

اجتي لابسه تنوره رصاصي وقميص نيلي وشالهه
مشجر وتتمشى بالكعب النيلي .. ركزت بوجهه ماحاطه غير كحل ومسكارا هيه بدون شي تضوي
اجتي تكربت يمي وانه رفعتلهه حاجبي وكلتلهه
- يمتى تبطلين مشيه الكعب
- من اطول
- لا هاهيه نشبع حريج
- ههههه خلي نمشي

صعدنا بالسياره وكلتلهه ..
- اكلتي؟
- لا مالحكت
- وانه هم كعدت متاخر واجيت ركض ركض
- لعد نروح ناكل سوه اذا هيج
- بعده وكت ريوك البوفيهات مفتوحه هسه
- بيا مكان
- الجادريه
- اوووكي
- عليش تخربين رموشج الشكر بهالاسود
- احبهن هيج يصيرن اثخن واحلى
- لا شكر احلى
- هسه شعليك بيهن
- احب اشوفهن شكر لوبيدي هسه انزلج تغسلين
-لا والله
- يلا هالمره سماح مره الثانيه انه اغسلهن بايدي
والعباس بس اشوفج تسوديهن هيج اغسلج بايدي
- عفيه شهاب معليك بيهن يعني شحلاتهن هيج
حتى يبرزن العين
- وانتي رايحه تشوفيهم حلات عينج
-اففففف

دارت وجهه للجامه عاد كلتلهه ...
- ماكلتيلي شلون حجينه
- مو رسمت وشوفتني شنو بداخلك هنا حجيتلي
اكثر من الكلام
- وانتي شلون رديتي
- بهدوئك هذا الي انته بي اني رديت
- هههههه بالعباس انتي كارثه هالكتب مسويتج
لسان تفكه
- هذا واقع عزيزي
- اي عزيزتي اي شكراً عله الهدوء هاذ
-عفواً

رحنه لمطعم بالجادريه حته نتريك هناك .. جانت هالطلعه وياهه مثل جرعه نشاط ليه ماضيع لحضه بدون ماعاينلهه واشوفن شلون تعكد حواجبهه وتقلص عيونهه من الشمس ..

رادت تكعد جدامي بس ماخليتهه الا بسدي تكعد
حته اضلن اشمن ريحتهه وانه بالاصل احب كربهه
اخذنا الاكل وكعدنا وهيه ابد ماغيرت طبعهه وياي
بناحيه خجل او شي دايماً تصرف طبيعي جدامي
وكعدت تاكل وهيه ساكته .. انه هم ضليت اكل
واريح نفسيتي شويه هم الجو حلو وبارد وكربهه
يمي ينعش روحي ... نسيت كلشي لحد ماهيه كالت
- ليش نازع حلقتك
- ماتسوه تنلبس
- اممم
- وفيت الامانه
- وافتهمت قصدي هم
- عليش ماحجيتي وكلتي هيج وهيج
- ماكدر عيب احجي
- شلون عرفتي
- احساس
- ربى
- مامجذبه داكلك احساس
- واحساسج يكلج هيج وهيج بالتفصيل
- لا بس اني اعرف افهم احساسي
- جان لازم تنبهيني
- حجيتلك اكثر من مره بس انته ماسمعتني
- جان كلتيلي البت مو زينه
- بكل الاحوال ماجنت راح تصدكني لان اذا متشوف بعينك متصدك واني ماعندي شي يثبت صحه كلامي لو طالبتني بي وراح اطلع مو خوش
- هو حظي بعد
- كلشي قدر ومكتوب وكل شي بي نيه ماكو شي عبث بهالدنيا شوف شنو يطلع نصيبك من الخير بهل الناديه
- ههههههه
- شبيك
- تكلين اسمه عبالك جاتله اهلج
- كتلك ماحبيتهه من البدايه
- مشتاكلج وحك الحسين مو عيشه هاي عليش ماتجين علينه بويه شني مكاطعتنه !
- ابويه ميقبل اروح
- شني عليش بويه
- يكول كافي بعد عيب روحتج عليهم الناس تضل تجيب وتودي بالحجي لانك خاطب والي بينه وهيج
فيتلافى المشاكل
- هاذ ابوج ماعنده سالفه وعلي بس هو كارهني من يوم النهوه
- هههه اي
- شعجب مامهتمه للموضوع هاذ
- احسن خليني هيج خلصانه من حجي امي والكليه
- شبيهه الكليه
-مابيهه شي
- احد محاجيج جاوببببببي
- شبيك شهاب يعني ماتعرف هالسوالف تصير دائما
- منين هذول
- كم واحد من الشعبه ومن غير اقسام يدزون بنات واني كايلتلهم ابن عمي ناهي عليه وهمه شايفيك فسدو الموضوع
- خرررررب ااااااخ لج شلووون ببج شلووون هسه لو حاط هالحلقه بيدج جان هم زمال منهم فج حلجه وحجه بس انتتتتتي اااااخ منج انتي
- اهدء شبيك
- خااااب اسكتي رحمه لاهلج اهدء !! لج انه اتكرضم عليج وهالادبسزيه فاجين عيونهم عليج
- شهاب شسويلهم يعني
- لو بيدي وعلي ابوشج
- الحمدلله مو بيدك
- ربببببى استري عله رويحتج ولاضلين جدام عيونهم تكملين دوامج كبل للبيت حته كعده بالسنتر لاتكعدين
- يعني وين اروح اصعد للسطح
- اكعدي بمجان بعيد من عيونهم لو يعجبج يضلون فاجين عينهم عليج
- هاااااي شبيك تره كافي زودتهه يعني شبيدي اني
- انتي تجيبين التايه مو صوجج صوج جمالج
- هو صاير عليه غضب هالجمال
- ههههه يعني تعرفينه غضب
- استغفررر الله يعني ماكعدتلي كعده وياك اذا ماتعاركنه
- احب العصبي انه
- شهاااب
- لج بويه انه بودي احطج بضلوعي هيج من تعصبين وتحمرين
- كافي عفيه
- شو عاينيلي اريد اعرفن هالخدود تحمرت خجل برد شني
- هههه لك كافي هسه شعليك بيهن

دنجت ليم ركبتهه وشميتهه شويه ووخرت كلتلهه
بصوت ناصي يم اذنهه..
- اموت عليج

دارت وجهه وسوت نفسهه تطلع مبايلهه وكالت
- خلي نرجع هسه بسام يجوز يرجع ويضل باله
- يلا امشي

كمنه دفعت الحساب وطلعنه كضيت ايدهه وهيه
عاينتلي اشرتلهه تسكت عاد محجت شي ومشينه
للسياره كبل مانصعد كلتلهه ..
- اريدن طلب منج
- اي كول
- صوره سوه تجمعنه
- اممم ماشي

اخذت صوره النه وصعدنا بالسياره ومشينه للبيت
هناك ضليت متمدد واعاين للصوره بين ماهيه تبدل وتالي هيه نزلت تغسل وطب بسام سلمت عليه وكعدنا نسولف وكتله عندي شغله واجيت
ارتاح شويه وامشي لين حسيت عليه ماراضي بجيتي وكعدتي وحدي ويه اخته ...
والي فهمته ربى ماحاجيتله عله جيتي بالليل وانه هم غلست عليهه ما حجيت ..
دزيت رساله لربى ..
لاتجيبين طاري جدام اخوج عله طلعتنه شكله ماعاجبه جيتي وكعدتي وياج وحدنه
ردتلي ..
ماشي واني هم ماكلتله على البارحه خليهه بينه

تطمنت من هالناحيه وطلعت رجعت للعماره
جان اليوم كله ناديه تخابر وخالي وانه ماجاوبهم
عاد من وصلت البيت تلكاني ابوي ويصيح
- هالزفت الي بجيبك المن حاطه متشيله ترد ع الوادم
- عليمن ارد
- خالك موش حركه عليك شني ماتجاوبه تفشلني وياه هالشكل عليش ضارب البت ومزوركهه هيج
شمالك تسودنت
- هاااا كاعده تتشكى زين زين
- شهاب شني الكضيه فهمني
- مامش شي بويه خالي هسه اخابره

شلت التلفون وخابرت خالي وكتله يومين واجيكم
ونتفاهم والبت ماريدن طاريهه ينجاب ضل يحجي ويريد يفهم شني ماحجيت وياهم شي

كضيتهه بيت نعيم والشغل وحاير المن احجي هالسالفه الطاحت علي .. وحاير بزماني ...

بيوم انه راجع من الشغل بالتسعه بالليل عزلت
واجيت اتمشى حته اعبر الشارعين ومن هناك اتمشى للكيات التودي عله بيتنه اركب مرتين
انه فهالمره اجيت عبرت الشارع وجاي اريدن امشي بنفس السايد بس جان اكو حفريات مال مجاري كلت عليمن ملوص نفسي بهالطين خلي اطب بالفرع واطلع كبل مناك ...

طبيت بالفرع وتمشيت لنصه واشوفن مره جبيره
عباته عله جتافهه وتبجي وتنوح وادك باب البيت
وتصيح ..
- وين اروحن يمه وييين اروحن بهالليليه خاف ربك بيه وانه مره جبيره موش ربيت وكبرت ماوكلتك لكمه حرام اااانه عليش تعيل بيه

رحت ليهه وشلت عباتهه حطيتهه عله راسهه
وجريتهه كعدتهه ع العمود وكعدت جدامهه
- خيرج حجيه شني شمالج
- ابن بطني يذبني بالشارع من صبااااح الله
والوبن انه بهالفروع وين اروحن وييييين لا بيت عندي لا بت الكريبه وامشيلهه فلوسي خذاهن
فرهدني مابكالي غير هالثوب العليه وين اروحن ااانه وين ولك يمه موش كلبي مفطوووور جا هيج اتجازى من هالربى بزر بطني يضربني ويشردني ربببببببي فدواتك رببببي وين اروحن انه بكبرتي هاي اسكن الجوووول وانه الجنت عززززيزه

فار الدم بعروكي وكبل كمت رحت فلشت الباب عليه لحد ماطلع جريته من هدومه ولزكته بالحايط
وركع بوكسيات  ..
- جلللللب امك هااااي امك وين غيرتك يااااعار زلمتيش انتتتتته وتهد امك بنص الشارع وتنام بالخده والراااااحه لك حرااااام بيك الهواااا واللله حرااااااام حراااام لك اااام هاااي ام تعرف شنننني
اااام
- هيييييييي وانته ياهو الجاااابك بالنص شعلللليك جلبيش انته وجاي تنبح هنايه وللللي منااا يلااا
- ااااانه اعلمك الجلاب شلونننننههه

مطلته بالكاع وكضيتهه ادفر وبوكسيات ماكمت منه الا من جر امه وهيه تصيح
- يمه وليدي راح يموتن جوه ادينك عله بختك خاله
- عللللليش تفزعيله شني نسيتي السواااه
- ميخالف انه اسامحنه بس لا يموتن اطك بكهري وراه رباي هاذ شكى سنيني
- هااااا يالعاااار سمععععت شتحجي علييييك وانته شتسوي بيهه حط عكلك برااااااسك عاااد لاتنال غضب ربك
- لااااانعل ابوكم يااااابو الجاااااابكم اممممممشي انته وياااااههه امشششششي لاااااريدهه ولاريد خوفهه اخذذذذههه عجوز السسسسم هاااي امششششي يلاااااا يلاااااااا

جنت اجر الحجيه وراي وهوه يدفع بينه انه عيني عله دمعتهه وهذاك يشتم بيهه عاد صحت بي
- وحك العباااااس ماعوفنك
- ااااانه الماعوفنك تتهجم علي يااااهو انت وتمد ايدك عللللي اله اسحلنك بعشيرتك
- عشيييرره الجيفه مثلك ماتخوفني ... ولد شيوخ احنه والكل تشهدد والكل تسمع هالحجايه بيني وبينك كووووااااامه شيخنه معروف وسلفنه يشهد
ماتعدي عليك ليلتك وجلمتي ماتثنى .. وهالحرمه
اليمد ايده عليهه اكصهه واوكلهه ليه من اليوم دخيلتنه واليمسهه بحجايه يتوكل للجلاب

ججريتهه من بين هالوادم وهيه تمسح بشيلتهه وجهه وانه اجرت تكسي وصعدتهه وهيه كل الدرب تبجي .. انه شلت التلفون ودكيت عله الشيخ
- الوو شيخنه
- ها شهاب خيرك بويه
- شيخنه عندي كوامه دز عله عمامي انه جاي بالدرب ونحجي
- يلا تعجل تعجل

سديت الخط وانه افووور باعصابي افووور جا هيج الام. خصت بهالزمن هضيمه والحسسسسين هضيمه ال ما يبر امه عليش عاييييش غاضب ربه واهله شيريدن من هالدنيا شيررررريد ....

وصلنه لاهلنه ونزلت فتحتلهه الباب وسندتهه
ومشيتهه .. جانو عمامي كلهم متحضرين وواكفين
باب الديوان انه اخذت الحجيه ومشيت لبيتنه وصحت عله زهره تاخذهه يم جدتي ومشيت لعمامي ..
- كواكم الله
- الله يكويك شني السالفه فهمنه
- اكعدو خلي احجيلكم من الاول

وحجيتلهم كلشي الشيخ كبل انتفض وكال ...
- هالحيووووان هاااذ عيشته حرااام
- شيخنه انه كتله كوامه وياك عبن تجاوز وهدد
ويضرب بالحرمه يعني منين ماجيهه ماينسكتله
- امششش دلينه بيته ااامش يستكوي بيمن هاااذارد اشوفن ياعشيره التلفي هيج نغووووله ااامش

طلعنه اربع سيارات واخذتهم لبيته والشيخ نزل علي فرد نزله وعمامي هم وياه وهذاك انخرس
نكله من يااعمام خابرهم مايرضى عاد شكينه بي
ماله ظهر ومتخارب ويه اهله .. الشيخ كال هاذ
فيطي ومحبس مرته ... عاد رزله وهدده وصاح جدام الكل ..
- الحرمه حرمه بيت الشيوخ بعد من هاليوم لليوم الدين والي اله عرضه ديواني موجود ويجي يحط جلمته واشوفن ياخير اليجي منكم

كلهه سكتت ودنجت روسهه عاد احنه ركبنه سياراتنه ومشينه هاذالحجي بالوحده بالليل
يلا طبينه البيوت ...

رحت شفت الحجيه كاعده بحجره جدتي وناطرتنه
عاد من طبيت وكعدت اجتي ليمي وتشمشم بيه
- يمه بيا جزا اجازيك
- بسلامتج يمه .. من اليوم مجانج هنايه ابيتنه
امنه تصيرين ومانعز عليج شي ولو تضل عدنه كرصه خبز وحده اتكاسمهه وياج وازيدج من لكمتي بس لا تكهرين روحج ولا تنزلين دمعتج
مايسوه هذاك ابنج  وتبجين عليه
-  اانه ابجي عله زماني الشمرني هالشمره
جنت عزيزه وبت عز ومال وجااااه ودار بيه زماني وخذا مني حزام ظهري وترملت وتيتمت
وضليت وحيده وتجالبت علي هالحواوين والي انه عليتهم طيحوني وخلوني بلايه خيمه

ضلت تبجي جريت راسهه بستهه ومسحت دموعهه واجتي زهره جايبتلهه الماي شربت
وجدتي وانه هونه عليهه واجتي مرت ابوي
جابتلهه فراش فرشت يم جدتي ونامت ..

طلعنه وعفناهه نايمه وانه سمعتهم كلهم
- وحك ابو فاضل لو سمعت بيوم احد منكم
مسمعمهه حجايه لو عاصيلهه امر يصيرن عليه يوم الاسوووود جبيركم وصغيركم .. هااي بحسبه امنه ووصايه الشيخ لينه الي يغثهه ينغث فهمتتتو
- اي خويه مفهوم
- ام محمد عينج عليهه
- ان شاء الله
.
.
.
يتبع