رواية من فجر ديسمبر الفصل الرابع والثلاثون 34 - بقلم Zoka 🌷

من فجر ديـسمبر
🍁
🍁
-- ان ماتزوجتهه اتزوجج انتي .. كولي اذا توافقين بالزواج هسه ادك تلفون والغيهه !!
- موصوجك والله ..اني الغبيه الي جايه عليك واريد انصحك بكيفك روح اتزوج عسى ما عشره
ماتهمني انته حير بنفسك
- اي جفيني شرج احسن

طلعت وركعت الباب حيل انه ضليت صافن عليش
ماتريدني اتزوج اذا انه مااهمهه ؟؟؟؟

ثاني يوم الصبح رحت للشيخ عبن دك تلفون علي
يريدني ... طلعنه نتمشى عله الشارع وكال...
- جن كلبك ملجوم يا شهاب
- من زمان شيخنه
-  عليش تحبها
- ماعرف هيج انه ماهجست الا رويحتي متعلكه بيهه ولا انهه مابيهه شي زين الي وماشفت منها غير شلعان الكلب والعرايك والصد بس موش بيدي
- ههههههه جا دامك هالشكل تحبنها عليش رايد اتزوج غيرها ماتصبر عليهه
- شيخنه انه اذا عله الصبر كلت ليهه اصبرلج عمر واجيت وياهه من كل درب وصار خمس سنين انه صابرلهه تجي بالتالي تدوس عله كلبي
وتهين كرامتي شني اضل مذلول الهه ماغلطت بشي انه وياهه وحك علي حفظتها حته من نفسي
لجن هيه ماتجازيني الا بالصد وهاي اخرهه كرامتي وهسه لو يصيرن نفسي عليهه ماديرن بال ليهه بعد
- اهااا مثل ما ظنيت بالضبط .. خلني اكلك حجايه خذها بدربك كل العمر .. كلبك اختار ووثك اختياره بالسنين تجيب وحده تجيب اربعه مايحيل
ويزيدنك اذى لعلمك ها زواجك مايجيبلك غير الاذيه عبن موش الي بالك كلبك عمره مايكنع
لو تصبنك المره ذهب تضل رويحتك ترفرف هناك وهاذ موش بايدي ولا بيدك هاذ حكم هالكلب
وشغله الثانيه ... الي كلبك هواها شمس والشمس كربها اذيه وحريج اذا اتحمل نارها انه بيدي ازوجنهه ليك لجن تصبرلي شويه واذا ماتكدر
عله هالحمل توكل بالله وشوف درب اليريحك

- شيخنه يعني انته موافك عله زواجنه ! موش بالك شي و
- ايي انه بالي شي وهالشي اثنينكم ماتعرفونه
- شيخنه يعني انه اتحملهه بكلشي لجن تجي تذلني هاي ماتصيرن لو مو انهه رويحتي لو تصيرن
عله ايدهه عيشتي ماانزلن نفسي ليهه بعد
- هاذ حجيك مابيه العيبه زلمه وكرامتك عزيزه
لجن هالعكل ربنه المن حطه !!! لو تشغلنه شوي
تشوفن بي الف طريكه حته تاخذ حكك منهه بلايه
ماتورط روحك بالاكبر
- شلون يعني شسوي
- انته فكر وحط عكلك براسك بلايه طيش موش زغير واعلمك انه

سكتنه شويه وانه افكر بحجيه يعني اذا صبرت بعد عليهه الشيخ يزوجنها الي ! بس انه كلبي جز منهه
هذاك حجيها ينخر بروحي نخر واريدن انساها وانسى هالتعب عليش ضال مجلب بيهه وهيه حته
لو صار هالزواج ترضى لين جلمه الشيخ عدها
عزيزه وماتجادل بيهه موش حباً بيه هيه عمرهه ماراح تحبني عبن موش انه الساكن احلامهه

- هاا هسه شكلت
- ماتحبني هيه شيخنه لو اضلن صابرلها عمرين
موش انه الي بالهه وهاذ يحز بروحي ازيدن من حجيها السم
- انه ماعلي بكل هالحجي انطيني جواب
- اتزوج بنت خالي
- هاي روح بفالك وربنه اليسعدك ويهون عليك
- ان شاء الله
- انه راجع للديوان
- الله وياك شيخنه

مشى الشيخ وانه كعدت عله الرصيف كلبي يعصرني انه ادري بي مايكدر واذاه جاي يزيد
لجن هاذ حكم العكل بعد وانه حكمت بي عبن شفت
كلبي شلون خلاني انذل لمره عمرهه ماتحس بيه
فهاذ كله درس لكلبي حته يجوز من حب خناكه

لليل جنت كاعد ويه الاهل نتفرج تلفزيون وجان
ابوي يكول ..
- شهاب خالك خابرني مساع
- ها اي شكال
- كال جسلي نبض شهاب اخافن موش رايد الزواجه هاي بكل كلبه
- اي
- عاد انه كتله لا ابنه جلمته وحده وبتكم نريدهه
وهالسبت نجي نكرا فاتحتهم
- اي زين
-منذر عليش تكرر بكيفك موش لازم تشوفن الوليد يريدن هالساع لاله
- شني يمه هيه رادلهه شوفه بت وحجينه بخطوبتهه عليش نجر ونعر بالسالفه
- يمه ياشهاب يبعد بيتي لاتمشي بهالدرب يايمه
موش بخاطرك اعرفنه
- اي جده انه هم من حجيج خويه بداعتي عليك
لا تتزوجهه
- عليش يمه مايتزوجهه شبيهه البت جمال وشهاده
وخير من الله وخوالكم بعد عليش تعرضين لاخوج
- انه كيفي اكولن لاخوي الي اريدنه ماعليج بيه
خاله
- زهررره
- ها خويه
- امشي حضري جنطتي
- شني وين النيه
- بويه انه من باجر اطلع  عندي شغل اكمله واجيكم السبت
- شني هالشغل هاذ بخمس ايام مايكضي ! موش
وراك مشيه ماتحسبلهه
- اي ماعلي شي السبت انه يمك ونطلع ولو تسويهه كطع مهر فد نوبه احسن
- شلووووون
- اي بويه انه عندي شغل ماعندي مجال كل يوم
رايح راد خلهن يوم واحد احسن
- شهاب بويه عليش مستعجل هالشكل
- عندي شغل
- شنهيييي هالشغل هاااذ
-بويه شغل شني بعد .. خابر خالي وكله خلي يحاجي ابنه ويشوف شيردون مايردون وانته شني
اليعجبك من حجيهم وافك عليه والمايعجبنك احجي
بي وسوي اللازم
- وانته شني مالك راي هنايه
- الراي رايك بويه وانه وياك بي ... هسه من رخصتكم انه اروحن انام وراي طلعه الصبح
- شهااااب
- ها بويه
- موش بعدين تجي تكلي ماريدن وروح حاجيهم
انه حسوي الواجب وياهم والمره حتصيرن بذمتك
بعد موش جم يوم وترجع لسوالف كبل فهمممت
- ان شاء الله
- روح نام
- تصبحون عله خير

رحت لحجرتي وسديت الباب ونزعت ملابسي
طفيت الضوا وتمددت عله بطني وانه افكر بجلمه
ابوي .. المره تصيرن بذمتك ... يعني هاي بعد مامنهه مجال وياج ياربى . خلص كلشي وكل صبري لج ضاع بهبه ريح ...

ثاني يوم طلعت من الصبح للنجف رحت زرت
الامير وصليت ركعتين الزياره وطلعت للمكبره
رحت لامي غسلت كبرها بماي الورد وعلكتلهه البخور وكعدت يمهه ماحجيت شي بس ساكت واعاين لاسمهه المحفور عله الكبر واشوفن هالزمن منين جابني ولوين وداني وحاير بالمضموم بعد من هالايام ....

جنت افكد هالشعله الي تحفز الانسان بالحياه بكل ساعه تمر تنطفي عندي شويه منهه... جان التعب
والثكل الي بصدري اكبر من احجي بجلمتين لامي
اكتفيت بالسكوت والمعاين لكبرهه ...
وره ساعه قريتلهه الفاتحه ومشيت .. طلعت لبغداد
وصلت المغربيه رحت كعدت بفندق واول ماطبيت
الحجره نمت لحد ثاني يوم بالعشره الصبح كعدت
سبحت ونزلت .. طلعت تريكت بره وضليت اتمشى واتذكرت مكان اسمه كهوه وكتاب هاذ
جنت اروحنله ويه خال وليد ونحضر بي امسيات
رحتله وكعدت لوحدي واخذت كتاب شعري
وضليت اقرا بي واشرب الكهوه وضليت هناك
ثلاث ساعات ومشيت .. شويه ارتاحت نفسيتي
هناك هالمكان حيل احبنه يجمع بين الطرب والثقافه والهداوه ...

رجعت للفندق تغديت وصعدت لحجرتي وضليت
اتفرج افلام بالساعات ... جان ابوي يخابر ونعيم
و وليد وانه مسوي صامت وعايفهم مالي خلك احد
اجتني نوبه سكوت ويه نفسي مااحجي ...

بالليل طلعت رحت حضرت امسيه وجان بوكتهه
الفنان جمال كريم وغنى لقحطان العطار اغنيه
شكول عليك ..
شكول عليك اكول انسااك روحي وياك
شكول عليك اضل زعلان مر فركاك
ومثل فزه طفل روحي تفز لو سمعت بطرواك
ومثل ورده وشحيحه ماااي مزنه مطر تتنخاك
واكلك هاااك  شوف جفاااك ... شوف شسوه بيه جفااااك .. شوف شسوه بيه جفاااك ...

جنت اشرب الكهوه واستمعله بهدوء والكل جانو
متفاعلين وياه ويغنون وكلمن يطلب منه اغنيه
ومخبوصين بي .. جان يجيني رجال جبير بس
شكله من هذول البغدادين الاوليين اصحاب الجريده والشعر الابيض المصفط والقميص جوه الجاكيت وبنطرون قماش جوزي .. اجه يمي
-مساء الخير عليك ابني
- حياك الله عمي تفضل تفضل
- تسلم تسلم ... اني تعبت من الهوسه هناك يعني
هو مكان استراحه وتصفيه للذهن ومكان قراءه
غير يُحترم المكان بعدم الضوضاء لو شتكول
- لاا حجيك صحيح عمي بس هيه امسيه وبعد
لازم تصير الاصوات عاليه بيهه موش الصباح
خلو هالمكان هادي هاي الليله للطرب بعد ماترهم
- وشلون يعني الي يعجبه يقرا بالليل مايلكه مكان اله هنا
- لا هسه هيه ساعتين وتخلص الامسيه ويرجع الهدوء هنايه
- مايخلصوهه للصبح ابني .. انته من وين
- من العماره
- هاا ياهلاً وسهلاً شلونهه العماره مدينه الطيب والكرم
- حياك الله بيهه عمي تشرفنه بكل وكت
- تسلم ابني تسلم ... شنو جاي وحدك احد وياك
- لا وحدي اجيت اريح بالي جم يوم
- هاا كأن بالك مو خالي من هالزمان مو صح
- اي صح
- شكد صارلك هنا ووين كاعد
- اجيت البارحه وكعدت بفندق هنا قريب واجي اكضي وكتي هنا احب هالمكان
- تعال وياي لبيتي ضيفني هالايام ونتونس سويه
- لااا عمي تسلم ماريد ازعجنك انته وعايلتك
ماعلي شي بالفندق
- لاااا والله الا تجي وياي اني ماعندي احد كاعد
بيت صغير وحدي عندي اولادي اثنين تزوجو
وكلمن طلع بيت وابني الثالث يطلع بشغله ومايرجع لنص الليل يكضيها فره ويه الاصدقاء
- ها وشلون مدبر عيشتك وحدك ماعندك بنات!
- لاا مارزقني الله بالحور هذني .. اني بعدني بحيلي اسوي لكمتي وجايي ولبستي هسه امشي
وياي ونكمل حجينه هناك
- لا عمي مشكور بس انه اريدن اضل لوحدي لحد السبت من الصبح ارجع عدنا مشيه
- مشيه شنو
- خطوبتي
- هااا واكو واحد مشيه خطوبته وشارد من اهله هالشكل
- بعد الحال اقتضى هالشكل
- انته سالفتك طويله واني اريد اسمعك فكوم وياي وخليني اشربك هذاك الجاي البغدادي المعدل
يلا يا شسم حضرتك
- شهاب
- يلا ياشهاب خلي نمشي نلحك نتعشى ونسولف
شعندك ضال بالفندق بوحدك بغرفه مامليت
- عمي
- هاا اهاا هاي طبكت الجريده وراح اطلع كدامك
- هههه هاهيه ماشين

مشى جدامي وانه اخذت محفظتي والجكاير ورحت وراه وتمشينا بشوارع الكراده اخذنا
عشه كباب شوي وصمون حار وبطل لبن
وتمشينه ...
- عمي بيتك بعيد منا  ؟
- شنو تعبت من المشي
- ههه لاا بس انه عبالي كريب عله المقهى
لين عرفت من حجيك تجي دايماً هنايه
- هو البيت مو كلش قريب بس اني احب اتمشى
واسلم بالطريق على كم واحد من معارفي وهم نشم هوا ونحافظ على الصحه واللياقه الوحده مؤذيه
للبشر
- مو دايماً مرات العزله مريحه للبشر ازيد
- هاي تصير مريحه من بعد مايضوك المر
من المعاشرهم فيرضى بالوحده .. اكو فد نص قريته باحدى الروايات وضل عالق بذهني يكول
.
ندرك في وقت متأخر من الحياة، أن معظم المعارك التي خضناها لم تكن سوى أحداث هامشية شغلتنا عن حياتنا الحقيقية، يجب أن نحصل على هذا الإدراك مبكرًا ما أمكن
.
- فعلاً هالحجي صحيح يمكن انه حصلت هالادراك هاليومين هذني
- اذا هيج كلش زين

وصلنه للبيت جان بت بحايط ناصي والوان هادئه
داخله كله تحفيات وشغلات اثريه وخشبيه ولوحات لشعراء وبالممر صايره مكتبه معلكه بيهه قطعه صغيره مكتوب بيهه ..

أنشئ ببيتك مكتبة ولو من ثلاثة كتب ، وستقاوم جُزءاً كبير من قباحة هذا العالم .

اجه يمي كتله ..
- شنو فايده هالمكتوب اذا انته عندك مكتبه
- هذا المكتوب اجه ويه المكتبه هاي هديه من
زوجتي وقت خروجي من خساره باهضه باحدى اعمالي بالابنيه صارت بيهه سين وجيم وخسرت كلشي فهاي كانت هديتها الي ورجعتني بيهه لحيلي
- وينهه هسه
- راحت لدار حقها
- الله يرحمها
- تدري هالمكتبه صارتلي نقطه لبدايه حياه جديده
زوجتي كانت تكره كم تصرف مني سابقاً كوني
اسهر ويه جماعه لاعبين اقمار وحاولت لاكثر من مره تنهيني من هالشي وكنت اقابلها بالاستهزاء
والاسلوب الرذيل ... لكن من وقت خسارتي وتبعتها خسارتي بالاقمار هم وتخلي الاصدقاظ عني ادركت كبر خوفها عليه واهتمامها من هذا الحجي والتكراركله كان لاجلي خوفاً علي مو منكه
فمن بعد هالوكعه الصارتلي وعيت على هواي امور بالحياه .. وطريقتها باختيار المكتبه الي كانت تعويض عن فراغي من الشغل والسهر والاصدقاء
ورفع لمعنوياتي واعاده لبناء نفسيتي وتكبير الوعي
عندي .. فبقيت هاذ المكتوب بمكانه حتى كل مااقراه اذكرهه واروح اشتري كتاب من نوع جديد

- مرتك هاي اصيله الله يرحمها
- ويرحم الجميع .. ومرتك الي راح تخطبها شنو وضعها
- مادري ماعرف عنها شي
- هاا كأن هذا الزواج بالاجبار!
- لا ياعمي احنه زلام ماعلينه حكم غير الله
- ها لعد ليش هالحزن بصوتك بذكر الموضوع
- الكلب ياعمي يريد والعكل يريد وانه تايه بينهم
- وهاي من حكم العقل مو
- اي
- وام الكلب وينهه
- موجوده
- خلي نتعشى واكعد احجيلي سالفتك

حطينه العشه واكلنه كملنه وشربنا الجاي المعدل
جان يكلي ..
- احجيلي هسه سالفتك حتى افتهمك عدل
- عمي احنه موش حريم ونتشكى هوه الي بالكلب بالكلب والدنيا تدور بالجبير والزغير موش جديده
انه بس مكبل عله حياه جديده انه رغبتهه وهيه موش رغبتي لجن هاذ انسب شي .. فاجيت اريح
نفسي شويه واعيشن ويه روحي جم يوم لحد ما الاهل يكملون تجهيز المهراروحن اكطع مهر وارد لبيتي
- وهيه هناك قريبه منك جيرانك اقاربك ؟
- بنت عمي
- هااا بنت عمك ! والي تاخذهه
- بنت ابن خالي
- وتريد تنسى !
- لا اريدن اكره
- اليحب عمره مايكره هاي فطره البني ادم ابني
كلبك وين ما اشر هنا تنسعد لاتظن بالكره تكدر تعيش بالعكس كرها ياذيك ازيد من حبها
- مالي غير حل ان ماكرهتها ماكدرن انساها
- عندي حل افضل الك
- شني هالحل
- تقبل عدم وجودها بحياتك اعتبرها نصيب ومو الك واستعمل سياسه التصالح الذاتي ويه نفسك
يعني لا تنساهه ولا تكرهه بس تقبلها مو الك وعيش الحب ويه الثانيه مالها ذنب بفشل حبك الاول
- راح اخذ بنصيحتك واجرب بيهه بلكي اكدر

ضلينه نحجي شويه وطب ابنه اسمه مُحي يطلع اصغر مني بسنتين هيج .. سلم علينه وراح لحجرته وماشفناه بعد .. انقهرت عله الزلمه
وحيده عايش ومحد دايرله بال ..
صارت ساعه ١٢ كتله ..
- عمي انه لازم امشي
- وين تبات يمي
- لا عمي غراضي بالفندق ودافع فلوس حرامات
نلتكي باجر وناخذلنه فره بشوارع بغداد
- اذا هيج زين لعد باجر اخذك للاماكن الي ارتدالهه بايام الشباب
- اي كلش زين .. مشكور عمي عله هالضيافه والكعده الحلوه هاي
- لاا تدلل ماسوينه الا الواجب
- يلا تصبح عله خير

طلعت واخذت تكسي للفندق .. رحت سبحت ونمت
وطولت بالنوم لحد ظهر ثاني يوم كعدت بال ٣
انه من عادتي كلما اضوج انامن هواي وجان عندي استعداد اكمل اليوم نايم بس تذكرت الزلمه
واعدته وهوه خطيه زلمه جبير يضوج اذا خلفت وياه ومارحتله هسه يحس محدا يحبه ويديرله بال

انه جنت ماخذ رقمه خابرته واتفكنه نطلع لابو نؤاس وانه كتله حجيبن السمج ونشوي هناك
وطلعت اخذت سمجه جبيره وخبز حار والشوايه هم اخذتهه اجرتهه مارضى ينطيهه الا بفلوس
لو عدنا اشيله المحل كِله بلاش بس هذول نفسيات

ورحت لابو نؤاس كعدنا هناك شوينه ونسولف ونضحك واخذت وياه صوره تذكاريه وراهه
تمشينه وهوه كلساع يحجيلي شغله عله فرد مكان
هنايه وذكرياته بايام كبل وانه استمعله ..

رحنه رجعنه الشوايه لصاحبهه وطلعنه للمقهى هذاك شربنه الكهوه وبعدين هوه كال تعبان يريد
يروح ينام شويه وراح لبيته واني ضليت اقرا
بروايه لحد المغرب خلصتهه وطلعت ...

وضليت هيج كل يوم اطلع اتمشى وحدي اتغدا
كل يوم برا واكضي وكتي لو بالنوم لو بالقرايه
بهذاك المقهى واحضر الامسيات وتلفوني ماجاوب
عله اي احد بس دزيت رساله لمحمد كتله
عندي شغل لا يضل بالكم ..

جنت هالايام احضر بيهه نفسي للعيشه ويه بنت
ثانيه غير الروحي متعوده عله ريحتهه .. اشيلن
اسمهه من الساني وانسى طراوتهه ..وضعفي جدامهه جنت احاول اسيطرن علي وابدي صفحه
جديده بحياتي مابيهه شي لربى اعتبرهه شي ومامقسوملي واعيشن بعيد عنهه ...

ليله السبت ابوي دزلي رساله من بعد خمسين
مكالمه مارديتهن مالي خلك احجي ويه احد منهم
اخافن يبين عله صوتي تعبي وماريدن هالشي انه
بعدت عنهم حته ماحد يعرفن الي بيه ..
كالي بالرساله ...
باجر حيصير كطعان المهر انه اخذت عمامك
واخوك ورحت قريت الفاتحه وشفتهم شيردون
وباجر وره الغدا نتحضر ونطلع لا تتاخر بجيتك

انه قريتهه وذبيت التلفون ماهتميت لشي كبل
جريت الغطى وتغطيت ونمت ...
جان حسيت وره جم ساعه عله صوت التلفون
يهتز عبن انه مخلي بس اهتزاز عاينت جانت
هاي المكالمه السابعه لربى ..

تفاجات عليش تخابر هلكثر والساعه ب ٢ بالليل
بعدني صافن عله التلفون ورجعت خابرت جاوبتهه ....
- الو
- شهاب وينك
-نايم شتردين
- انته وين بيا مكان
- شعليج انتي هاي مخابرتني بنص الليل تسالين ويني !شعندج كولي
- اهلك خايفين عليك ليش متجاوبهم
- كايللهم عندي شغل شكو بعد
- واذا عندك شغل متعرف تجاوب
-هسه انتي شعليج اجاوب لا شخصج انتي
- شهاااب
- هااا
- لاتتزوج
- ردينااا
- الله يخليك شهاب لاتتزوج
- من الله ياخذني ويخلصني شتردين مني فهميني
شني غايتج وياي ساعه تكليلي روح ساعه لا تتزوج فهميني شلون بيه وياج
- شهاب عوفني لا تفكر بيه مااسوى وهيج تحرك بروحك علمودي لا تسوي شي مو بنفسك فدوا
تعال خلي اشوفك ونتفاهم بس لا تروح باجر تخطب ارجوك
- ربى انتي تاذيني بكل حجيج حته هاذ هم اذيتيني بي ماشفت راحه منج وياريتج تكدرين تعبي وياج
وتحملي الج واكولن تسوه اصبرلهه واضيعن العمر لجن انتي ماهاويتني وانه ماجبرج علي
ولا عاتبج عله هالشي بس هسه جايه تكليلي لاتتزوج عله شني هاا خايفه علي منين من مره
حتصير ام بيتي وتصونه ولو حته جانت مو زينه
شني انه ماعرفن اضبهه واذا مالكيت الراحه عدها
مو مشكله انه بكل الاحوال مالاكيهه عندج ولا بدونج فعله شني ماترديني اتزوج كليلي
- لان اخاف عليك افهم هالشي ارجوك
- ماخفتي علي من هذاك حجيج شفتيني احترك جدامج وتصيحين بشكو جلمه تزرف الكلب هسه جايه تخافين علي لااا بعد وكت
- شهاب اسفه اعتذرلك الف مره بس لا تخطي هالخطوه ارجوووك
- جيتي متاخره ابوي انطه جلمه للجماعه وهذول
خوالي عيب مو لعب هيه
- تكدر ؟
- ربى شسالفتج عليش هالسوال
- مادري شهاب اني من يوم الي شفت هالبنيه
مارتاحيتلهه والله وصدكني هسه تتزوجهه وتشوف شقصد ردت ابعدك عنهه لان ادري بيهه شي مايوالمك واني ماريد اذيتك شهاب صدكني اني من نفسي مقهوره ومراضيه لان اغثك واقهرك مو عاد ادري اكو الموزين واسكت
- ششفتي منهه للبنيه
- انته حتشوف بعينك بعدين
- ربببببى وتالي وياج
- شهاب امانه عليك امااانه احلفك بكل شي تعزه
يوم الي تحس انك عرفت ليش اني ماريدك تتزوج
تجيني
- ليش حته تشمتين
- احنه اهل ياابن عمي عيب منك هالكلمه
- استغفر الله
- اني وصيتك وانته بكيفك بعد تصبح على خير
- وانتي من اهله

سديته وانه صفنت بحجيهه عليش هالشكل متاكده
بيهه شي هالبت شني تعلم الغيب !!! والله حيرتني
وطيرت النوم من عيني

ضليت كاعد للفجر افكر بحجيهه عاد نمتلي شويه
وكعدت صوت التلفون اخوي محمد يخابر عاينت
ساعه تسعه كلت هم يلا اطلع .. عاد جاوبته
وكلتله راح اجي ... سبحت ورتبت لحيتي شويه
واخذت غراضي وطلعت من الفندق وكبل لكراج
النهضه ومناك طلعت للعماره ...

وصلتهم ويه الغدا سلمت وكعدت اكلت ورحت
اخذتلي قميص وبنطرون لبستهن ومشطت شعري
شلون مجان وطلعت لكيت الكل مخبوص وكاشخ
وزهره طالعه تخبل لابسه ثوب وردي طويل وملمع وهيه مربربه صايره كيكه عاد انه كلتلهه
- ها خيه شني هالجمال كله منين جايبته
- شني خويه خجلتني جا انه موش دايما حلوه
-لا اليوم غير شكل
- غير انه اخت العريس شلون ماصيرن حلوه
- ديربالج من عين الوادم خيه وماتمشين بدون عباه
- اي خويه ان شاء الله

طلعنه لبيت خالي وهناك مدري شلون مشى الوكت
انه كضيتهه بس اهزن برجلي واعاين للشيخ الي
جان هادي وماله شغله باحد لحد ماصار وكت
العقد كمت وكفت يم الباب والسيد يحجي لحد ماسمعت موافقتهه ضغطت عله ايدي وكلت نعم
وعلت الهلاهل وكضيتهه مباركات من عمامي
لحد ماصار وكت طبتي عليهه .. انه حته مادري
شمتفقين مشترين ذهب لا كلشي ماعرف ..

شفتهه لابسه خليجي ابيض وذهبي وشعرهه اسود
طويل فاتحته ومكياجهه طوخ وبارز ملامحهه الجاده مابيهه اي روح طفوليه .. كعدت يمهه
وانه عاكد حواجبي ماحبيت عطرهه القوي
ضليت عاكد الحاجب واعاين للكيكه الجدامي
وصفنت بالمكتوب
.. (عقد قران مبارك ناديه وشهاب )
وين جان احد يتخيل يجي يوم وينحط اسمي ويه
اسم بنت ماعرفن عنها غير اهلها واسمها
حسيت عله ايد زهره عله جتفي عاينتلهه كالتلي
- خويه لبسهه الحلقه عاد يلا
- وينهه
- هاي مو مرت ابوك شايلتهن
- اي
اخذت الحلقه من مرت ابوي وجريت ايدهه لبستهه وايدهه موش بارده شلون بيه اذا تعبت منين اجيبن برودتهه هذيج ... مديتلهه ايدي ولبستني الحلقه
فضه ساده وهيه ذهب ساده .. عرفت ساعتهه جايبين بس حلقات .. كل ساع جايه وحده من عماتنه وخالاتنه يريدن ياخذن صور ويكربني منهه وانه حيل كاره عطرهه سطر راسي سطر
بس اريدن اطلع اشمن هوا لعبت نفسي النوب اجتي امهه تكللنه كصو الكيك واجتي تصب العصير اشرتلهه لاا .. اثنينهن تفاجأن كلتلهه
- ماحب هالسوالف
عاد كبل جريت السجين وهيه مدت ايدهه وياي
وكصيت الكيكه واعاين للوجوه نكلبت .. عاد صحت لزهره اجتي شاورتهه ..
- بعد اكو شي لو امشي
- خويه وكلهه هيه لكمه عيب من الوادم
- لاتخليني احط راسج بنص الكيك هسه ماعليج
بيه ولا بالوادم اكو شي لو امشي
- لا خويه امشي
- زين سوي درب يلا

راحت وكالبه وجهه وانه مادري شجاني هيج
بس لعبانه نفسي حيل منا خنكه ومنا هالعطر السطرني ولعب روحي بس اريدن امشي
انه اعاين لزهره وهيه تحاجي النسوان يوخرن
شويه وحسيت عله ايدهه دغتني عاينتلهه وهيه
تكربت شاورتني ..
- صاير شي جنك ممرتاح
- لا مامش شي ،، راح امشي محتاجه شي
- لا سلامتك
- اودعناج
كلتهه وكمت طلعت وانه مخنوك ولعبانه روحي
وراسي يوجعني رحت كبل للسياره كعدت وفتحت
الجامات وفتحت دكم القميص وضليت مغمض
وكاض راسي اريدن بس اهدا وتروحن من خشمي
هالريحه الخنكتني ... عاد حسيت عله باب السياره انفتح عاينت اخوي محمد واكف ..
- هاا سلامات شمالك طلعت تركض
- شويه دايخ
- خيرك
- تعبان من الشغل هالايام وجوه خنكه ودخت
- خويه شجابك لهدرب ماتكلي مو جنت بالجنه
عليش ياخويه عليييش
- محمممممد فج مني دخيل الله ماعايز انه
- زين زين
- جيبلي ماي وكللهم خلي نمشي يلا شكو ضالين
- ماشي

راح وجابلي الماي وبعدين بدو عمامي يصعدون سيارتهم والحريم طلعت هم ومشينه للبيت ..
وهناك كبل طبيت سبحت ورحت قفلت الباب ونمت شكد رادو دكو ماحجيت ولا طلعت مالي خلك نفسي مو عاد اكعد واجامل ..
جريتهه نومه لثاني يوم وره صلاه الفجر يلا كعدت .. تريكت ويه جدتي وهيه كل ماتسالني عله شي اكلهه مادري ومن شافتني هالشكل مالي خلك
سدت السالفه وانه عفتهه ومشيت للزرع اكضي
وكت بجم شغله هناك ...

ومشت الايام هالشكل اكضيهه بشغل واتهرب بالنوم تالي ابوي اجاني للزرع واخذني عله جهه
- اكولن بويه شمالك انته ماتعلمني شني سالفتك
- شني بويه شمسوي
- موش خاطب انته ووراك مره ماتخابرهه تسال عليهه تروحن تشوف شبيهه مابيهه اشو كبل تلفونك مايسكت الليل كله طن وطن وتكهكهه للصبح هسه حته ماتعرفن رقم البت شلونه
- اي بويه ناسي هالسالفه يصير خيير ان شاء الله
- هيه شني ناسي اكو واحد ينسى مرته مايحاجيهه
لك بويه هاي فتره خطوبتكم لازم تعرفون وتتفاهمون تكعدون تطلعون جا هيه هالنوبه بالعمر
شمالك انته هالشكل كاضيه رويحتك والشعر مالي وجهك ماتعاين بالمراه انته
- ماتشوفني ملتهي بالشغل
- الشغل ماواكف عليك امشي روح زين وروح لبيتهم شوف البت واكعد وياهه
- بعدين بويه ماتموتن البت ان ماشفتهه هالساع
- شهاااب دامك مهاويهه عليش خليتنه نخطبها
مدام رويحتك بعدهه عند الحمره عليش تعلك بنات الوادم بذمتك وتمشي شني زغير انته وماتعرف واعلمنك شني اليصير ومايصير
- بويه عوفني رحمه لاهلك
- ماعوفنك وانته جاي تلوص بالزايد ..كبل كتلي بنت عمي اريدنهه ماعليكم وعفتك تنهي عليهه
وتخاربت ويه اخوي لاجلك تالي تجي تكلي بنت خالي واريدنهه وهم تخاربن ويه اخوي عله هالزواجه ولاا انته الحضيت بهاي ولا انك المرتاح بهاي
- حضي الاغبر غير
- شهاب بويه هسه مايفيدن الحجي بعد بنت عمك
موش نصيبك وهسه بذمتك مره حافظ عليهه
اكعد وياهه وانسى بيهه انسى هاي الحمره
طلعهه من بالك وشوف حياتك الي اختاريتهه
محد جبرك وكلك روح تزوج بايدك انته جبتهه ليك
عيب بعد تصد عنهه هالشكل صير كد جلمتك واختيارك
- صح حجيك بويه انه الاختاريت وانه الاحمل
كل المسؤليه
- عفييييه عليك .. هسه اريدنك انذب ملشي من ايدك وتروحن ليهه
- صار بويه

بست راسه ومشيت وانه احاجي نفسي ..
انه الردتهه ولازم اتعامل وياهه بالحك عيب صارلي عشر ايام ماعارف شي عنهه وهيه بذمتي صارت .. وبنفس الوكت انه لازم اطلع من شباج ربى الوكعت بيهن وهاي انسب حل اليه ..

رحت حلقت وسبحت لبست بنطرون وقميص
واخذت السياره ورحت بالدرب طبكت اخذت
جم علبه حلويات وياي ورحتلهم ...

انه من كبل افتح سيم الباب واطب جفت لجن
هالمره وكفت دكيتهه يلا عبن انه مامنطيهم خبر
بجيتي ... طلعلي اخوهه سلمت عليه وطبيت
سلمت عله خالي وهوه كعد يعاتبني جيف هيج
مسوي ببنتهم وتعذرت منه ومن ابوهه وتحججت
بالشغل عاد شويه وطبت ناديه شايله صينيه
العصير قدمتلي وتشكرتهه وشويه وترخصو
خالي وابنه وضلينه انه وياهه ....
.
.
.
يتبع