رواية من فجر ديسمبر الفصل السادس والثلاثون 36 - بقلم Zoka 🌷

من فجر ديسـمبـر
🍁
🍁
ثاني يوم نزلت السوك وكصيت قطع قماش للحجيه وجدتي واخذتلهن شيلات سود وجم كيلو فواكه
وانه جنت موصي محمد يصيد السمج حته نسوي
غدا مرتب للحجيه ماريدن يطلع منه كصور باول
جيتهه بيتنه ...

طبيت لحجرت جدتي وانطيتهن علاليكهن شفتهه فرحت ودمعت عينهه وبس تشم بيه وتبوس خدي
وتدعيلي وانه احبن الاشيهه بلجن يخف عنهه حزنهه لجن انه اشوفنه بحسرتهه كل ماتشوفنه شلون مجابلين جدتي وعله امرهه نتمشى
ومشت ايام واحنه مداريهه من كل صوب خذيناهه فريناهه بالزرع والهور وكلشي جبنالهه جديد
حته عباتهه جديده خيطنه ليهه والكل تصيحلهه يمه لحد ماهدت نفسهه شويه والفت الجو بينه كامت
تطبخ ونفسهه شلون طيب بالاكل .. انه كل مااشوفنهه بالمطبخ اذكر امي لو عايشه هيج تطلع بعمرهه وتصيرن نفس وكفتهه هاي ..

جنت كاعد مثل كل ليله مصاحب هالجكاير وكلاص الجاي ومدد عله الطبله واعاين للسمه
واسمع اغاني وجان يدك علي رقم غريب مجان الي خلك اجاوب عفته مره مرتين ثلاث كلت خلي اشوفن منهو هاذ بنص الليل .. جاوبت وجان تطلع ناديه ...
- شتردين ماعندج كرامه انتي
- خلي هالسوالف الك واني مجايه حبن بيك
- هاا زين جا شعندج خلصيني
- شوف كدامك حلين يا تتزوجني وتستر عله روحك واهلك واهلي يا اسوي الفضيحه المصايره
وانته تتحمل مسؤوليه كلشي
- خاااب ماتنجبين زواجيش هاذ مسودنه انتي اااانه اتزوج وحده بلايه شرف واجيبنهه لبيتي !
- مشكلتك بعد انته اجيتني مادزيت عليك ولعلمك هذاك اليوم انه ماكعدت ابجي وانوح عليك لااا عينيييي لااا انه مهدت وسويت تكتيك عمرررك
ماتفكر بي شنهو حته وكت التريد تلعب بذيلك
تلكه الحرب علكت علييك
- ولللليييييي هيييييي ولللللليييي ماعايزني بس الساقطات يجن يميسلتن براااسي روووحي علكي الحرب الثالثه مااكلبج بنعااااال وشوفيلج كواد مثلج يلفيج ولييييييي يلاااا سكط

سديت التلفون وحضرتهه وكمت ادخن واتمشى
كاره روحي عليش تورطت بيه انه ماسمعت حجي ربى وخلصت من هالمصيبه هااااي الطاحت علي

جنت امشي وادفر بكلشي جدامي حته الكلاص شلته وشمرته .. جان اسمعن صوت من وراي
عاينت هاي الحجيه ..
- هلا يمه شمصحيج هالساع
- صوتك يايمه هجستك مالك خلك وجن عندك مشيكله مضايكتك
- اوووووف يايمه الله العالم بالحال
- تعال ليه يايمه اكرب صوبي اكرب

مشيت ليمهه وهيه كعدت بنص الحشيش وتربعت
وانه كعدت بسدهه .. كضت ايدي وهيه تكلي

- احجيلي يايمه بلجن اساعدك بشي وان ماكدرت عليه ادعيلك عبن انته تستاهل كل خير

- تسلمين يايمه ماتكصرين

- كِلي شنهي سالفتك تحرج برويحتك بهالتتن ليل نهار شني شمالك

- يمه هالتسمعي مني اليوم ماريدن يعرفنه خيالج
دخيلج

- كول يمه والساتر الله عله سرك كول

- انه احبن بنت عمي اكيد سمعتي عنهه

- اي موش شمسه

- اي هيه يجي يوم وتشوفينهه كمره موش بت
خذت كلبي وطيرت عگلي لجن شني ماترضى اتزوجهه وانه نهيت عليهه وهيه ولا يمهه السالفه

- هاااه عليش

- سالفه طويله ..المهم حبي ليهه صارله خمس سنين ومامش فايده ماحصلت منهه غير شلعان الكلب عاد بيوم داست بكلبي كِلش وانه ردت اخلصن منهه وانساهه رحت مشيت عله بت ابن خالي وليش ماكبل جم يوم اعرفنهه موش بت

- دخيلك ياعلي شلون هاي

- بلايه شرف يمه

- صخاااام يايمه يايممممه شني هالجيييل

- اسمعي الازيد منه ..انه قريت حجيهه ويه صاحبتهه بالتلفون وتريدن تكربسهه براسي حته ع اساس انه غلطت وياهه واتزوجهه وتمشي عاد سالفتهه

- يااايمه دخيلك ياعلي شهالبشر هذول

- شوفي الكباحه شلونهه .. واجهتهه واجتلتهه
بيتهم وبكل صلافه تريد تطلع لاهلهه تكلهم راد يغتصبني وانه كضيتهه دفرتهه وطيحتهه بالكاع
ومشيت ليش ماانه باعصابي هذيج وانسى التلفون
هناك انعميت هذيج الساع دربي ماعرفنه منين

- ييمه حكك جا شني موش هينه مصيبه وطاحت عله الروس

- اي وهالساع تخابرني تكلي لو تتزوجني لو اسويلك فضيحه وانه من ذاك اليوم من طلعت من بيتهم موش طكيتهه جنهه رايحه مسويه فلم يم اهلهه ومدستره لهالسالفه وهسه انه حاير بهالسالفه لا انه الاكدر احجي واوجهن اهلهه عبنهم خوالي روسهم تنكس بالكاع شلوون مارضاهه وتالي اصيرن سالفه بحلج الوادم عبنهه مرتي وبنت خوالي هم .. ولا الاكدر اسكت وابلع هالسالفه ماتنبلع يايمه شسوي انه مسطور وزماني دار بيه

- اااويلي عليك يايمه شني من حظ حظك طيحم بهالغاكه هاي ... صرت مثل بلاع الموس
اووووف يايمه كليبي طك واحترك علييك والله انهه مصيبه شني هالبنيات مايهافن ربهن مايحشمن اهل عمام خوااال شني هيج هالزمان ضيع الحيا؟؟

- شياطين موش بشر هذول يمه موش بشر

- انه اخافن يايمه لاتروحن صدك وتسويلك مصيبه هذن مفننات وحك علي مادامهه ماستحت وماعدهه ذره حيا كلشي يطلع منهه موش بعيده حته سحوره تسوي ليك ولاهلهه وتسد الحلوك اي موش بعيده
كلشي توغع من بني ادم هالزمن انه شفت المراار والتفنن من مرت ابني شفت العجب عينك عينك تجذب وهالدموع التماسيح هاااي تنكط عشر عشر

- بله اسود موش نسوان

- اووووف يايمه احنه بزمانه مانعرف غير ضوا الله والطبخ والنفخ حته زواجتنه مانعرف شني ماشني عليهه جابونه امهاتنه كعدنه حطلنه هالديرم
وتكحلنه وفرحانين بالثوب الجديد وخذونه لبيت العيال وهناك يله عرفنه شني يصيرن بين زلمه ومريته موش بنيات هالوكت مفتحات باللبن

- هههخخخخ بس محبوبتي نسمه من زمنكم
يايمه طيره بيضه شامخه ونويعمه وتسحر عين اليعاينلهه

- جا عليش ماصبرت عليهه يايمه طيحت رويحتك بهالطيانه هاي

- داست بكلبي يمه وعمت عيني عن كلشي
هسه كليلي شلون اخلصن منهه

- شدراني ييمه هنه نارين يوم التريدن تفصخ
منهه اهله يحاججوك عليش شتكللهم واكيد هيه ماتكعد راحه راح تسويلك بليه واطمسك وياهه بالطياني

- جا شلون اضلن مربط هالشكل

- انه اكولن لو انك اتزوجهه جم شهر وطلكهه
هم تستر عله بنت خالك وعرضهم عبن يوم التعوفنهه اي شي يصيرن تكول شهاب هوه هيج سوه بيه واهلهه يصدكونهه عبنهه حياله وانته ماعندك دليل عليهه تلفون وراح شتكللهم بعد

- اااااااااخ يمه ماااريدنهه انه بلايه شي جنت جارعهه بالف ياعلي

- ماعليك منهه يمه انته جيبنهه هنايه وعيفهه بحجرتهه لاتكربلهه وانه امشي عليهه العصه
اسوكنهه سوك وجم شهر وردهه لاهلهه
هم تخلصن من حجي الوادم وترفع راس اهلك
وتخلصن من بلاهه

- خلي افكر بيهه بعد موش هينه هالسالفه

- اي فكر وشوف شني اليدليك عليه كلبك .. هسه امش نام وريح هالعكل مشغله ليل نهار خلهه يرتاحله سويعه

- اي يلا يمه كايم انام

مشت هيه جوه وانه هم طبيت لحجرتي وتمددت
وكلت ماريدن افكر بشي ونمت ...

ثاني يوم كعدت الصبح وصفنت وانه بالفراش
تذكرت حجي امي البارحه وجبته منا وديته منا
حجيهه صحيح وهيج انه احفظ سمعه خوالي عبنهه لو طشت السالفه تمسنه ازيدن منهم وعندي اخت وراهه زواج تلحكهه هالسالفه للممات وماتخلصن
منهه وخالي ينجلط بساعتهه من غير الفضيحه
التاكل وجوهنه فخلي استر عله الكل واتزوجهه
واسويهه لرب العالمين ...

رحت كمت غسلت واجيت صليت ودعيت التوفيك بهالخطوه هاي وبعدين بدلت ومشيت لبيت خوالي
طبيت سلمت عليهم ووجوهم ثكيله شويه عرفت هالناديه مصخمتلهه شي وياهم عاد كلت اخصمهه بساع وامشي لاهلي ...

- خالي انه جاي حته اكللكم اريدن العرس يصيرن عله السبوع الجاي
- هااااه؟
- اي خالي وراي شغل ولازم اسافر واريدن اتزوج ماضل رايح راد انه
- اي كيفك المره مرتك كيفك يمتى ماتريدون عرسو
- جا زين اذا هيج .. هاي فلوس جهازهه خلهه تستعجل كدامهه بس هالاسبوع
- عليش ماتكللهه انته موش مرتك هيه لو انه غلطان
- خالي انته الاولى منهه
- بلايه هالسوالف فهمني شمالكم
- زعل حبابيب خالي لاتهتم سوالف وتصير
- هااا خير ان شاء الله خير
- يلا انه اترخص سلملنه عله ابو ناديه خالي
- مستعجل شعندك ماتكعد اتغده
- لاا وراي شغل غير مره ان شاء الله
- براحتك
- يلاا اودعناك خالي
- الله وياك بويه

طلعت وانه اهجس جني داخل حرب خاف تطب ويصيرن بينه حجي وانه كاره النفس التاخذه

ومشت الايام واهلي يجهزون للعرس انه عايف كلشي ومكضيهه كعده ويه نعيم وليلي سهر واغاني
وجكاير وجاي ... حته غرفه مارحت اشتريت وشكد لحو بهالسالفه ورادو قفلت ماشتري ماتستاهل اذب فلوسي الهه ...

كبل يوم الحنه وصيت اختي زهره تفرغ خانتين بالكنتور ليهه وتحط فرشه جديده واجني امهه واختهه العصريه رتبن غراضهه ومشن وانه كل هالفتره ماحجيت وياهه ولا هيه الخابرت ابد

صار يوم الحنه انه جنت طالع يم مهره ربى
امسدلهه واحجيلهه ضيم كلبي ولحد العصر يلا
مشيت للبيت لبست قميص وبنطرون عاديات
وطلعت سلمت عله الولد وهوسو وركصو لحد الغروب وكفو للاذان وانه كلتلهم كافي هيج
وجبرتهم يكفون هالهوسه وعفتهم ومشيت لبيت
نعيم ..

- شعندك جايني موش عرسك هاليومين ماتروحن ترتب امورك
- اكِلك ااانه جاي حته انام موش تكعد تنك علي
عوفني واسِكت
- شهاب شسالفتك علمني
- نعساااان اسكت عاد
- اريد اشوفن شلون حتنام بهالفكر

درت ظهري ليه وتغطيت وكبل نمت مايدري انه صويحبي النوم وكت تضيكن بيه الدنيا ...
وماكعدت لحد فجر ثاني يوم ... كمت صليت وطلعت لبيتنه طبيت سبحت ورحت تمشيت بالزرع وسلمت عله ولد عمي ورديت للبيت
اهلي مخبوصين وانه رحت كعدت يم الحجيه

- ها يمه كواج الله
- الله يكويك يابعد بيتي
-شلونهه نفسيتك زوينه
- الحمدلله خلهه تصير لوجه الله
- اي يايمه ربك ستار ويحب الستر ويجزيك عليهه كلشي بكتاب محفوظ مايضيعن شي عد ربك وانه امك
- والنعم بالله
- اكلك يمه شهاب هاي شلون بهاليله نيشان البت شلون تدبره؟!!!
- ماعرفن يمه واسي مسطور وصاير هالكبر
- سوده عليه يايمه منين طاحتلك هاي لا ذابح لا ناهب عليش هالشكل اوووف اووف
- الله كريم يمه الله كريم كلشي قدر ومكتوب
- الحمدلله

عفتهه وطبيت لحجرتي تمددت وضليت صافن بزماني شسوي انه بيهه هاي !!! لو اكطعنهه وصل مايشفي غليلي ...

اخذتلي غفوه شويه وكعدت عله صوت زهره تندهني ... كمت سبحت ولبست قاط اسود وطلعت
كعدت بره وبايدي تلفوني اريدن اسمع صوت ربى
محتاجهه حيل وادري بيهه ماراح تريحني بحجيهه
وضليت حاير والوبن عليهه لحد ماصارت الزفه
مشينه والكل تهوس وهورنات وخبصه وانه ساكت
وعاكد حواجبي وطالعه الدنيه من عيني ...

طبينه بيتهم وشفتهه بدلتهه البيضه كاعده وتعاينلي وتضحك صفح انه ماهميتلهه كعدت واعاين للمجان لحد شويه وطب خالي كمت بوسته وهو وصاني عليهه وعاد كمنه اجه ابوهه سلمني اياهه
وتشكرت منه ومشيت وانه اكولن بداخلي كله لاجل عشرتكم ياخوالي ...

جان بسياره الزفه ابوي واخوي محمد واحنه وره
انه صاد وجهي لجهه الثانيه واستغفر ربي طول الدرب عبن ماريد اكضهه واكسرن عظاهه ...

وصلنه البيت وهيه طبت جوه وانه ضليت بره ويه الزلم لحد مازفوني عليهه ...
طبيت وكبل رحت كعدت وانطيتهه ظهري وهيه جانت كاعده وفارسه بدلتهه عله طول الجربايه
كلتلهه ...
- موش تصدكين نفسج عروس ..تره جيتج هنايه ستر لخوالي وعشيرتنه وكل سكوتي وصبري هاذ
لاجل عين خالي ماريدنه يموت بكاعه وكت اليسمع بهالشين وانه مالي شغله بيج تكعدين هنايه خطار الج جم شهر وتمشين لاهلج
- يعني تريد اطلكني
- جا اخليج عليش عله ادبج عله شرفج عله شني
لا احبج ولا اريدج جبتج لاجل عين خوالي وسمعتهم موش ازيد من هيج
- اييي فهمت عاد
- اسمعي لج لسانج هاذ تكضي زييين ولا قسم بالله ابلعنه لج فهمتتتتي ... وتنسين سالفه طلعه والطبه
وحته تلفون مااشوفن بايدج وان شفت اكسرهن لاصابيعج ومحدن يعتب علي فاهمه ..
وعندج الحجيه هاي امي تطيعينهه بالحرف الواحد وحك الخلكج لو سمعت غاثتهه بجلمه وحده اكسرن كل طولج واطلعن بيج كل ضيمي

عفتهه وكمت اريد اطلع وتذكرت هالساع الاهل ينتظرون بره عاد ضليت افتر بالحجره وافرك بوجهي وافكر شلون احلن هالسالفه عاد كالتلي

- كافي تفكر وحاير كلشي مدبر عندي
- شلون بله
- هاذ النيشان اخذه ليهم

طلعت من جنطتهه البيضه الصغيره جفيه وبنصهه محطوطه وصله وعليهه الدم صفنت عليهه وكلت ياستار يربي من هالمره ..

- كحاب مفننات غضب الله عليجن
جريتهه من ايدهه وطلعت وسديت الباب ورحت انطيتهه لجدتي وهيه بوستني وهلهلت وهناك وابوي وعمامي بره ضربو الجيلات وانه طلعت كبل مشيت وحيدي للنبكه ... ضليت كاعد هناك
وصافن عله الماي وانه افكر شجاي اسوي بروحي انه ..هاي تاليهه اخذ نشيلن مزور واخلي ليله عرسي !! من خرب بهالزمن الخلاني هيج

ضليت اكثر من ساعتين كاعد ولحد مالحو علي بالتلفون يلا رجعت ليهم لكيت ابوي اعصابه فايره
- خيرك بويه
- اااانه لو انته خيرك ..وين مولي بهالليل موش معرس انته ماتركد بحجرتك تضل تلولح هنا وهنايه
- اي هاي رديت

عفتهه ومشيت اريد اطبن للحجره واجتي الحجيه
طبطبت عله جتفي جريت ايدهه بستهه وابتسمتلهه وطبيت ...
لكيتهه متمدده ولابسه ثوب النوم الابيض وكله فاضح لكل شي بيهه ..انه جريت هدومي وطلعت
رحت سبحت ورديت لكيت حاطين صينيه العشه
جريتهه وكعدت اكل حته مصحتهه .. كملت اكل
صحت بصوت عالي عله زهره اجتي دكت الباب وطبت ..
- تعاي خيه خذي هالصينيه وجيبيلي جاي بدربج
- اي خويه تامر

خذتهه وعينهه عله ناديه الي جانت متغطيه ودايره ظهرها لينه ... انه كاعد بالكاع ومدد رجلي
وره شويه جابتلي الجاي جنت اشربه واجتني رساله من ربى مكتوب بيهه ....

" اتهنى بقرارك ابن عمي ربي يسعدك "

بساعتهه حسيت كلبي نغزني وضليت كاض التلفون واعاين للرساله واكولن بداخلي
دامج تحتركين مثلي عليش تصدين عني عليش ضيعيتني من ايدج وضيعتي حياتي وياج انتي السبب بكل دماري بكل وجعي بكل كرهي لروحي ولعيشتي ولحبج ....

شمرت التلفون وكمت رحت غسلت واجيت جريت مخدده وطلعت بطانيه من الكنتور وتمددت ونمت
بالكاع ...

ثاني يوم كعدت عله صوت جدتي وهيه تدك بالباب
كمت دحست البطانيه والمخده جوه الجربايه ورحت فتحت الباب ..
- ها جده صبحج الله بالخير
- صباحك عافيه يايمه شني كلنه عرسان ماتكعدون للظهاري !
- لا جده هاي كعدنا
- اي يبعد بيتي امش عمامك ينشدون عليك وجاياتنه حبايبنه يردن يشوفن العروس
- اي ان شاء الله

مشت هيه وانه انداريت شفتهه كعدت كلتلهه
- امشي اطلعي ليم جدتي وتصرفي عدل ماريدن حجايه منا لو منا فهمتي
- ماشي

اخذت هدومي وطلعت للحمام بدلت ورحت كبل لعمامي سلمت عليهم وهمه باركولي كعدنا تريكنا سويه وانتبهت الشيخ ماله دخل بيه من يوم الحنه
لليوم عله كد المبارك وبس حسيت بوجهه ثكيل علي كلت اروحن اشوفن شماله ..

رحت يمه وهوه جان واكف بره الديوان ..
- شلونك شيخنه
- هلا بالمعرس شلونك
- حمدلله
- عليش وجهك مبوز هالشكل ماتفجهه وتضحك هاذ شكل عريس بصباحيته لا تطلع موش شابع بليلتك ههههههه
- اييي
- شني شمالك
- مامش شي
- شني بعدك تحب ؟؟
- شيخنه ... ماتكدر فحل نخله تحبلا
     ولايكدر شخص ميحب تحب له
    انزرعت بكاع مو كاعي نحت وتسودن الناعي
  شحجي وشوصف اوجاعي ناي وانباك من راعي
  بحرت وتشمت ذراعي كريم وكاضم امتاعي
  ثكيل ويوجع اوداعي بحيث اتخوصر اشراعي
عليمن جاي تسألني تحب !لا؟
ولا جنك تعرف منهو المحبوب اليه

- موش كتلك حكم عگلك يابني اسأل مجرب ولا تسأل حكيم ... حط عينك عله حرمتك والزمن كفيل بكلبك

طبطب عله جتفي ومشى وانه حطيت عيني عله هالسمه وكلت .. ربي عندك حكم الامور وانته الحك كِله انصفني يارب ...

مشت هالايام وانه كاضيهه بالكهاوي لو يم نعيم
لو اطلع للزرع اكضي وكت كلشي اسوي بس لا اكعدن يمهه .. تلفونهه سحبته منهه من اول يوم
قفلته وضميته وموصي امي الحجيه عليهه وهيه صاكرتهه وماشوفنهه بس بالليل اجي اجر فراشي وانامن بالكاع ..
رادو يسون سبعه وهوسه وحفله مارضيت كتلهم التعلك اغنيه اكسرن ايدهه .. اجني بس اهلهه
سلمو ومشو اهلي ضلو يحجون عيب من الوادم
خوالكم وشلون ماشلون كتلهم جلمه زايده اعوفلكم البيت وامشي عاد سكتو شويه ...
وانه هم كضيتهه بره يم صحباني .. ومشى هالشهر
بخير كلشي ماشوفن منهه كله بالمختبر اروحن العصريه لحد العشره بالليل اطب البيت والصبح
بالزرع اشوفلي شي التهي بي ...

بهالشهر الثاني ناديه بدت سوالفهه تتغير صارت
كل مارجع باليل الكاهه متحضره وعطرهه يكفخ
وتجي تريد تلزمني اجرن ايدهه الويهه واشمرهه ع الجربايه واطلع وماارد الا فد يومين يلا ..

ماجازت ضلت تحاول تتشاقه وياي وتطخني
من احنه جدام اهلي وانه اعاينلهه صفح واعوفهه
تخربط بكيفهه .. وبالليل ماتخليني انام تضل تحوص لو توكف تتصلخ جدامي وتضل تسوي
سوالف جايفه لو تجي تتكربلي وتتمسكن وانه
كل الي اسوي اجرهه واشمرهه من جدامي عبالهه
اضعف جدام رغبتي واطيحن ليهه ماتدري انه
جنت احترك حريك جدام ربى وماابينلهه هالشي
ومره وحده غلطت وكضيتهه ومن عدهه ماسويتهه بعد وهاي صارلنه سنين ... تجي هسه هاي الزباله تدني نفسي عليهه !!!! لو تطخن السمه بلسانهه
مايصيرن الي بالهه ...

عفتهه عله هالوضع وهيه ماتجوز شكد اكتلهه
اهينهه ماتجوز تاخذلهه يومين ثلاث وترد لسوالفهه

جنت حيل اشتاك لربى لدرجه عيني تدمع عليهه
بنت عمي ونهوتي ورويحتي وماشوفنهه من شهور ولا سامعن صوتهه وانه هالدنيه حملهه يزيدن علي واحتاج ليهه لجن ادري بيهه اذيه
لي وكرامتي ماتسمحلي بعد اصلهه لو بسلام
جنت اعيشن الليل انه واغنيه ياس خضر ..
كولولها ... هالاغنيه تاخذني لعالمهه بس ومااملنهه
كل ليله اسمعهه وانه ادخن ووياي كلاص الجاي
يجيني نوبات ابوي يحجي علي جيف عايف مرتي
وحيدهه ومجابل هالسمه وكاعد وانه اطنش جني ماسمعن حجيهم ...

صاحبي وليد عرف انه تزوجت ورحت لبيته
اراضيه وافهمه شلون صار هالزواج وعليش ماكتله... ومن سمع بالسالفه تعذر مني وواساني
وشجعني عله هالقرار المشيت بي عاد ضليت يمه يومين ورديت لديرتي الصاير اختنك بيهه وين
جنت حر وكت اليعجبني اطكن جوازي وجنطتي واهج ويمتى مايعجبني ارد هسه كلشي تغير
صرت سجين بهالوعود والعشك الي انبليت بي

ومشى عله هالزواج اربع شهور وكل ماريدن اطلك اهلي يعرضونلي وعمامي يتدخلون ومايخلون خوالي يدرون بالسالفه وضال معلك هالشكل وهجست روحي تورطت بيهه فد ورطه
عاد باليل كعدت دعيت وحجيت كل الي بكلبي
لربي وشكيتله هالهم الي سلني .. كل هالوادم تشوفني مكصر بحكهه وماحشمتهه وداريت خوالي وعشرتهم ومايدرون انه لاجلهم جرعت المر بسكته ... وضال خوالي من جهه وابوي وجدتي من جهه .. وهالمخلكنه تكمز فوك راسي ومكرهتني عيشتي لا من لسانهه السم اخلص ولا من جيافتهه ...

كعدت ثاني يوم حوالي ساعه ١٠ ونص طلعت للمطبخ كبل شفت ناديه ومرت ابوي واكفات يتبسبسن كلتلهم ..
- شني منهو عدنا اليوم
- خطار يردونك
- منهو الجاي
- بنت عمك ربى

رفعت حاجبي باستغراب ومشيت رحت غسلت وعدلت شعري وطبيت للديوانيه وانه كلبي يرفرف
من ساعه السمعت باسمهه ... شفتهه كاعده وجبتهه السوده مفروشه فوك رجليهه ورافعه راسهه تعاينلي .. ابتسمت ووجهه منور جنه العافيه
انه رجعت عكدت حواجبي وطبيت عبن اهلي كلهم عينهم علي ...

- السلام عليكم
- عليكم السلام .. شلونك شهاب
- بخير الحمدلله وانتي شلونج
- الحمدلله زينه
بهاللحضه طبت ناديه واجتي كعدت بسدي انه ماهميتلهه اصلا مادرت وجهي عليهه عاد ربى
شالت عينهه من عله ناديه وعاينتلي بكل ثقه
وكالت ..
- شهاب الشيخ دزني الك بشغله خاصه ممكن نحجي وحدنه
- الشيخ ؟
- اي ضروري نحجي
- ماشي كومي يلا

كمت ومشيت جدامهه وهيه شالت جنطتهه واجتي وراي وكفنه يم الباب وكالت ..
- شهاب خلي نصعد لغرفه زهره نحجي
- شني سالفه عليش هالشكل فهميني
- اريد نحجي بهدوء رجاءاً
- امشي يلا اصعدي

صعدت جدامي وانه اجيت اصعد اجتي ناديه كضت ايدي .. عتيتهه منهه وخزرتهه ..
- شعدكم صاعدين ماتحجون هنا لو هاي حيله
- وانتييييي شعلييييج شحارك حمامج ولي من وجهي يلااا ولي

دفعتهه وصعدت لكيت ربى واكفه وحاطه ايديهه عله وجهه وتفتر بالحجره ..عاد سديت الباب وكلتلهه ..
- ربى شني الصاير فهميني شماله الشيخ
- شهااب عوف الشيخ هسه ..اريد منك شي
- اي شني
- تغمض عينك شويه
- ربى
- ارجوك لا تسألني شي بس هالمره خليك هادىء وياي بس هالمره ارجوك
- ماشي يلا غمضت

سمعتهه خرطت البرده وصوت الضوا وهيه تطفي
وقفل الباب وسمعتهه كالت ..
- افتح عينك

فتحت وشفتهه جايه تمشي ناحيتي وشعرهه منثور
ولابسه بنطرون وبدي ماعرفت اميز لونهن عبن الضوا موش كوي بس ضوا الشمس العاكسه من البرده .. اديهه كلهه طالعه تمشت بهداوه ناحيتي
واجتي وكفت كريب كلش مني وتعاينلي بنظره كلش ثابته مركزه بنص عيني .. رفعت ايدهه البارده مشتهه من اطراف اصابع ايدي لحد لحيتي
جنت اضعف بلمساتهه هاي بس اريدن اضل مسيطر جدامهه حته افهمن عليش تسوي هالشكل
لجنهه زادت هالشي بلمستهه عله خدي وركبتي
واطراف اذاني وعينهه الي حولتهه عله تفاصيل وجهي شويه ورفعت ايدهه وغمضت بيهه عيني
وضلت مخليتهن عله عيوني وانه هنايه انتهي
من احسن ببروده اصابعهه عله عيني اتخدر
وبين ماانه تايه بلمساتهه البارده حسيت بشفتهه
عله شفتي بكل هداوه باستهه ضليت متصنم معكول هاي ربى !!!!!!!
ردت رفعت نفسهه وبعدهه ساده عيوني ومسيطره علي بهالحركه هاي وبايدهه الثانيه حاوطتهه عله ركبتي ومصت شفتي بهداوه كِلش وردت تبعتهه
بمصه اكوى ثارتني بيهه كلش عاد جريتهه من خصرهه الي ورفعتهه وصارت بطولي وهنايه عاد حولت بوستهه للساني وصارت تبلعني ريكها
وانه ابادلها هالشي وفصلت عن هالدنيا كلهه وياهه
حته النفس نسيته وضايع بشفتهه الي مثل العسل ريكها عندي ينزل ... طولت بوستنه هاي وهيه مستمره بهالشي وانه تفننت بشفايفهه وطلعت بيهه كل شوكي وحركتي وماوخرت منهه الا من حسيت عله دمعتهه طاحت عله وجهي .. وخرت عنهه متفاجىء وانه اشوفنهه تكت بهالدموع ...
كضيت وجهه بين ايديه وبابهامي مسحت دموعهه
وانه اكللهه ...
- عليش الدموع هاي يرويحتي
- ماكو شي

وخرت ايدي منهه وراحت كعدت عله الجربايه وحاطه راسهه بين ايديهه وانه اجيت كعدت يمهه
وساكت انتظر حجيهه عاد مسحت دموعهه وكالت..
- ضجت مني ؟
- لاااا انتي حييتيني  بريكج هاذ سكيتي كل عطش بيه من سنين
- شهاب
- اهدي اهدي عليش هالنوبه موش هاديه مو عوايدج
- مابيه شي هدئت .. اريد اكلك شي
- اي احجي
- اليوم اني الي سويته هو قرار اتخذته بدل عنك
فاعذرني بس للضروره احكام
- اعذرج وكت التفهميني كلشي بالتفصيل .. يعني شني الصار وخلاج تجين بعد كل هالشهور !
- انته .. اني جيتي عليك انته
- وشنهو الي اختلف !احجيلي شني هالقرار
- اني قبل خيرتك وانته ماعرفت تختار ولاتتصرف بس اليوم من بعد تفكير طويل
اختاريت اني بدل عنك .. اختاريتلك كلشي بقربي وحتى لو كان عذاب واذى فاني اعرف اداويك منه بس غيري ماكدر عليه فهمتني
- تقصدين بغيرج منو
- ناديه اعذرني بس مو مره صالحه هاي
- هاااا وشنهوالتعرفي عنهه
- الي اعرفه انهه ناويه عله شر وياك واني ماكدرت اسكت هالمره واخليك تروح وترجع متندم بعدين فتصرفت
- شنهي الي سوته بوستج فهميني انه اعرفن هاي موش رغبه منج لا ادري بيهه غايه
- اعذرني ماعرف اشرحلك شنو الي بيهه بس يجوز انته تشوف بنفسك
- هااا .. زين وتصرفج هاذ راح يحميني من الندم !
- يحميك من كلشي عداي ولا تتندم عليه لانك تخسر بهذاك الوكت
- انه ندمي بحبج الي ماحضيت بي
- مو مشكله انسى الندم وانتبه هالفتره كلش زين
شهاب رجاءاً لا تاخذ كلامي بالاستهزاء مثل كل مره ارجووك ولاول مره اني جايه واطلب منك شي لا تخذلني واني متأمله بيك تفهمني هالمره
- عيوني الج امري
- تسلم .. اول شي اعذرني على صعوبه هالكلام واني مالي حق اتدخل بهيج امور بس اسمحلي بيهه هالمره وكلشي لمصلحتك مو الي
- احجي الي بالج لاتخافين
- مرتك حتى كلاص المي ماتاخذه من ايدهه
ولا حتى لبسك ولا عطورك واي شي يصير وياك ماتفهمه تخابرني رأساً بنفس الدقيقه خابر بأي وكت جان خابرني وكلي هيج وهيج صار وياي
- يعني شني مرتي تريدن تسويلي شي ؟؟
- يجوز الله اعلم بس انته انتبه ماراح تخسر شي
- انتي منين تعرفين هالسوالف وشمعنى هاليوم يلا
- اكيد انته سويت شي وخليتني اجي هاليوم
لان اني جنت حاجيه ويه الشيخ قبل اربع ايام
وهو خلاني اختار واني ضليت افكر ومادري ليش الصبح حسيت لازم اجي وخابرت محمد جابني
- شني الخيرج بي الشيخ ؟
- خيرني باذاك من غيري لو مني وكلي اسألي
واتصرفي باللازم بس اني ماسألتك تصرف رأساً
لان حتى لو اختاريت اذاك من غيري ماخليك
- عليش ماتخليني وهو اختياري
- لكوني مسؤوله بيك مااسمحلك تضيع نفسك
- انتي لغز حيرني حله
- بس تعيش الهدوء تحلني وتفهمني
- تكصدين هدوء الروح ؟
- واكثر منه بعد الهدوء الي يحسسك حتى بصوت قطره المطر وهي تنزل بوسط المي من توصله تفهمني
- واكدر املكج؟
- لا اني ماانملك شهاب اني اجي بارادتي
- وانه انتظرج تجيني مايملي روحي وكلبي غيرج
خلي هالشي ببالج كل العمر
- اعرف هالشي اعرفه
- زين انه بعدني مشتاك وانتي مسؤوله بيه
تعاي وخري شوكي
- ماكو هيج شهاب اكعد راحه
- وعلي ماهدنج اليوم .. لك بويه انه شهور جهنم كلهه ساكنه صدري تعاي اطفيهه ببرودج
- شهااااااب
- اشششش ارحمينننني اهدئي بصدري اهدئي

حضنتهه وهيه شويه يلا هدئت وانه نزلت راسي لركبتهه شميتهه هيه جفلت وشدت عله هدومي
رديت وخرت شعرهه ومصيت ركبتهه من وره
وانه شادهه لصدري تسودنت عليهه بس هيه ماتنطي مفكه ادفع واتريد بس تنهزم عاد وخرت
عنهه وانه اضحك عفتهه كامت وانه تمددت واعاينلهه راحت فتحت الضوا وهيه ادردم
وانه خربااان ضحك عليهه عاد راحت للمرايه
تعدل شعره واجتي وهيه تصيح ...
- لك شسسسسسويت انتتته عزااااا بعيييينك
شنو هااااي شنو شنووو
- شنو شنو شمسوي هيه مصه ومخليتيني اتهنى بيهه
- لك الساااانك فضحتني من عزااا بعينك
اني صوجي واكول خطيه واجي واحلك مشاكلك
بس لو تمووووت بعد ماعليه بيك غثييييث لك موتتني شهالجرااااائه عزااا بعينك ياشهاااب
شسوي شسوووووي
- هههخخخخخخخ الطمي يلااا الطمي
- اسكتتتتت اسكتتتتت
-خهههههاااااي  لج بويه حطي عليهه ثلج وهسه تروح منا ليومين تختفي
- ثلج الي يثلجك ان شاء الله عووووفني لاتحجي شي تسوي المصيبه وتجي تتمضحك ااانيي ثوله والله لو ما ثوله مااجي واكعد هالكعده وياك
- هااااي شبييييج هيييي شني شو كمتي تمسلتين
- اووووف راح اطلع واخلصك مني زييين
- لاااا خليج بويه ماشبعت منج
- اي حتى اروح بيهه منا لدقيقتين بعد
-ههههههااااااااي ياااابويه شننني انتتتي عكلج فهيم
-غثيث اكرهك
- اروحن سبع فدوات للهيج تكرهني
- امممم
- بووووويااااي وحك علي مشتااااك هالاممممم

خزرتني وهيه تلبس بشالهه وتعدل جبتهه وجان توصل ليم الباب تفتحه واندارت علي كالت ..
- مو تنسى عود خابرني وكلي شيصير وسوي الوصيتك بي
- ههههههههه بعيونننني صااار وضلي اكرهيني زين
— للموووت اكرهك غثيث

طلعت وانه خربت ضحك عليهه تالي كمت عدلت
شعري ومسحت شكو حمره بشواربي وشفتي
ونزلت وانه وجهي يضحك وكفت باب الديوانيه
واحكن بشعري واعاينلهه وهيه ادير وجهه مني
ورديت عاينت الحجيه وجدتي يعاينلي ويضحكن
ويتبسبسن عاد رحت كعدت يم الحجيه وبوست ايدهه كالتلي بصوت ناصي ...
- جنهه العافيه هالبت غزاااال وايتمشى لاتضيعنهه من ايدك تره هالصيادين كثر
- من الله كسمتي هاي يمه وهسه تشوفين
- وين الله وابو الحسنين وتصيرن صدك واهوسن للصبح بعرسك
- هههه بعون الله ادعيلي يمه
- صبح ومسيه انه اندعيلك يفرجن همك ويريحن صدرك وخاطرك ويرزكك امنيتك يايمه
- اللله يخليج لينه ياام الكل

شفت ربى كامت ويه زهره للمطبخ وهوه صاير جدام باب الديوانيه واشوفهن عاد شفت ناديه تحوم يمهن كلت اروحن ابعدهه احسن ..

انه مشيت توني بعدني ماواصل كلش يمهم
ويمعت ناديه تكللهه ..
- لا تضلين تحومين فوك زلمتي لو يريدج جان اخذج من زمان موش هسه تفطنتي بي وكمتي تحنين .. ولو هسه تضلين جدامه عمر مايشوفنج

عاد ربى جرت الكرسي وكعدت وحطت رجل عله رجل وبايدهه كلاص الماي واشرت بي عليه
وكالت ...
- روحي يلا وشوفيني شلون يشوفج
يلا خلي يريدج روحيله

رفعت الكلاص وشربت الماي بكل هداوه وبرود اعصاب وهيه تاشرلهه بعيونهه بمعنى يلا
وهذيج فااارت باعصابهه صارت حمرره وكبل طلعت ومشت لحجرتهه وانه واكف واتمضحك
كلش عجبتني هالفقره .. بالله العظيم هالربى
تاخذ جايزه اعظم مستفز نفسي ماينكدر لبرودهه
ولا تستفز تحرك الجدامهه وهيه تضحك وكاعده ولا جنهه بس حكهه تعرفن كلبي ومفتاحه بيدهه
تحجي بزودهه ...

اخذتهن وطلعنه للخيل نشوفهه وضلينه هناك لوكت الغدا يلا ردينه وهيه مشت لبيت الريم مارضت تضل يمنه واحنه عفناهه براحتهه نعرفن الجو مكهرب هنايه ...

ولليل ردت ويه ابوهه لبيتهم .. انه هالليله ماطبيت الحجره ابد كضيتهه متمددعله هالحشيش وصافن
بهالسمه وانذكر بوستهه وريحتهه وطراوه جسمهه بين ايدي والضحكه شاكه الوجه حته وانه اتخيل
واسترجع هذيج اللحظات اضحك فرح بيهن

ثاني يوم الظهريه كبل مااطلع للمختبر رحت
لحجرتي عبن هالناديه موش هنايه هالوكت
وخابرتهه ...
- هلاا شهاب
- هلاا بيج شلونج
- بخير ها كولي صار شي
- اي صار
- شنو احجي
- اشتاااااكيت صبري جاي يخلص اريدن بعد
- يااا صدك تحجي واني عبالي صار شي
اني مو كتلك تخابرني من اكو شي يصير
- جا هسه موش صار هالشي انه كبل ماجنت هيج اشتاك هسه تغير شوكي موش شي هاذ لو شني
- لااااا شهاب
- يرويحته
- هسه وكت هالحجي دوختني عبالي صارلك شي
زين سويت مثل ماوصيتك
- اي اصلا ماطبيت الحجره
- كلش زين
- شجاي تسوين
- اسوي بورك ويه امي
- هاا جا اذا هيج امشي كملي انه هدء شوكي بصوتج
- بس بعد مو تضحك عليه هيج خابرني من صدك يصير شي
- ههههههه ماااشي ماشي يلا انتهي عله روحج
- اووكي بااي

سديته وكمت لبست وطلعت للشغل ...
وره جم يوم بالليل جنت راجع وتعبان طبيت لحجرتي نزعت الجواريب وفكيت دكم القميص
واجتي ناديه شايله كلاص ماي صديتهه وكلتلهه
ماريدن منج شي راحت وكالبه الوجه عاد اجتي
زهره وهم جابتلي كلاص ماي اخذته شربته كله
جره وحده و .....
.
.
يتبببببع