رواية من فجر ديسمبر الفصل التاسع والأربعون 49 - بقلم Zoka 🌷

من فجر ديسمبر
🍁
🍁
اجتي يمي كعدنا وجان عمي يكول ..
- جلمتين احجيهن والخيار لج ... يا تردين وياي البيت وتمشين مثل ماانه اريدن وماتفتحين حلجج بحرف ياتضلين هنايه وتنسين اهلج

انه كبل عيني هجستهه راح تنط من مجانهه وعاينتلهه هيه حايره وتعاين بالوجوه .. ضلت
ساكته وتعاينلي ودمعتهه بطرف عينهه وانه اعصابي تفور وكاعد عله نار اريدن اكضه واطلع بي كل ضيمي لجن هالحظ خلاه ابو الاريدنهه اي زله تخسرنياهه .. كلتله ..

- عمي ماناكل بشر احنه واذا ضلت بينه شني يعني تخافن عليهه مني !!!

- موش خوف لجن انه هالصار كله موش راضي عليه ومن اول كتلك ماانطيهه ليك وخذيتهه بالغصب والحيله

- ماتحايلت اااانه موش حجاي وجهين انه من سنين كايللكم البت اريدنهه ونهوتي وجدام خلك الله كلهه انه طلبتهه منك بعد شتريدن ازيد من هيج
انتم ماخليتو لينه مجال بساعه زمان تبريتو منه شتريدن اتيهه بالشارع !!!! لو اخليهه للشماته !!

- وتنهزم بيهه !!! هاذ الربيناكم عليه !!
زين مني ساكت وما ذبحتكم وكصصت ركابكم

- مابينه عيبه عمي التريدن تذبحه ذاك وينه ساد بابه وكاعد. موش احنه العلنه .. تذكر زين منهو البدا ومنهو العاااال جا احنه عليش مانصيح ونهدد ونصلخ ونذبح موش النه حك عدكم !!!! اشو بس انتم كلمن شايل تفكته ويهد !!

- جا شني عملتكم هينه!!! خليتم الوادم تاكل وجوهنه بالحجي والكاعد والكايم يحجي بسيرتكم !! هاااي شني شيسموووهه !!!! حجيت بيهه بس مابينكم كطعان مهر وتمشي بيهه بزودك البت بعدهه محرمه علييييييك وانته موش جاهل واعلمنك اصول ديرتنه طلعتكم ماتنبلع ولا ينسكت عليهه يوم اللبست عباتهه ولحكتك ماحسبت لابو ولا لاخو كطت كلشي وره ظهرهه ومشششت نست التعب ورباتنه بيهه كلهه تبخرت من عينهه
لجن الصوج صووووجي اااانه الماعرفت اربي
عدددل و ثقيت بيهه ازيدن من اللازم وانته بعد هم خنت الثقه طببتك بيتي شهووور انامن وانه مطمن ولد اخوي مايغدرن بيه اثاريك طلعت عينك تلولح عليهه من جوه لجوه وترسم بيهه بخيالك هيج تجازيني ياشهاااااب هيييج

- عمي حكك علي لجن انه ماذنبت انه كلبي موش بيدي وماتعديت للحرام انه داريتهه مثل بنتي يشهد الله علي . . ويوم المشيت وياهه انتم جبرتونه لاتنسون هالشي انه ماخذيتهه وهديت السلف بليله ظلمه لاتنسون شحجيتم علينه وشني جانت عملتهم
اسألك بالله عمي .. كبل هذيج الحادثه شفتني كربت صوبكم بيوم ؟ شفتني فد يوم لاحكهه جابرهه بشي
سايم عليك محمد جاوبني شفت مني العيبه وياهه

- لااا ماشفت شي

- جا لو ان شيخكم ما عالك هالنار بينه جان انه ماجبت اهلي واجيت خطبتهه وخذيتهه بالرضا
شني شايفني كليل اصل لو انه العبن بسمعه هالبنات .. بس انتم جبرتوني اهد هالسلف واخذهه
واليعلمك عمي انه كبل يوم طلعتنه باسبوع جنت متعارك ويه الشيخ وتبريت منه ومن عشيرته وهوه نفس الشي لجن ماكدرت امشي فكري بيهه
ويوم الصار بيه الحجي ماكدرت اعوفنهه وامشي وانه ادري لو مشيت مالي رده لهالديره وتضيعن مني

- مااااعلي انه لا بشيخ ولا بيك انه حسابي وياهه
وهيه جلمه ورد كفاهه يلاااا ربى تجين لو تضلين

- رضاك يابه .. اجي وياك

- رببببى

- شهااااب ابني خلهه

- بوووويه شننني خلهه شننننني

- لبييييت ابوووهه ماشيه شمااالكم تسودنت اركد لا تسويلنه سالفه النوووب

كمت مشيت بسرعه رحت لحجرتي وركعت الباب
ردت الباب انفتحت وطبت ربى .. اجيت كضيتهه من زندهه ...
- شننننني تمشششين ربببى موش هيج حجينننه عليييش تنكثيييين بوعدج وياااااي
-بس اهدا حبيبي بس اهدا خلي افهمك
- شهدااااا لج انتي ماتتتتفهمين من تمشين منااايه ماينطوج ليه افهممممي ابوج كارهني كره العمى
تضيعيييين من ايدي رببببى عللييييييش تهدددينيييي هيييج تنسيييييين تعببببي كلشيي تنسيييي وتمشششششيييييين

جنت اضرب عله الكنتور وانه اصيح بوجهه وهيه بس دموع عاد خلت ايدهه عله وجهي وخرتهه وردت خلتهن وركزت بعيني ..
-حبيبي اهدا بس اسمعني روحي انته افهمني ابويه هسه ان مارضيته اخسره كل العمر بعد شهاب هاي فرصتي الاخيره وياه افهمني ماكدر اعيش بلا رضاه صدكني مانتوفق وعيونك عيشتنه مانرتاح بيهه اذا اهلنه مراضين علينه

- ربببببببى وتااااااللي جمممم دوب اضلن رضا هااذ وذاااك يمتى ارتااح فهميني

- وعيونك حبيبي بس خلي يمشن كم يوم واراضي بيهن وهو يهدا شويه ويقبل بزواجنه صدكني هو كلبه طيب ويحبنه بس مارضى بتصرفنا وحقه
الناس مترحم ومتعرف شنو الصار ويانه .. شهاب روحي انته لاتحرك كلبي عليك هيجي كافيني الي بيه لاتحملني فوك همي هم خليني قويه بيك عمري
محتاجتك بهاليوم وياي لاتصير ضدي مثل الكل

- مااااكدر بدووونج افهميني يابت النااااس مااكدرن بفرااكج

- اعرف يروحي والله اعرف ولاتتخيلهه سهله عليه روحتي منك تدري بيه شكد احبك ومتعلقه بيك بس لازم نصبر شويه اهلنه الهم حق علينه حبيبي وعد يجي اليوم الي نمشي بي بينهم ومحد اله كلمه علينه
بس شويه اصبر ياروحي بس كم يوم واني الك ماروح من ايدك لاتخاف وكت الي يخلص عمري يلا اروح بس كل حياتي تضل على اسمك ابو الشهب حبيبي اعرفك قوي وانته الي تطمني وتهديني مو انته سندي ماريدك تنهار هيج خليك قوي محتاجتك

هي بجت وانه حضنتهه هديت اعصابي ببروده ايدهه وحجيهه ..تحولت كل عصبيتي لشوك ليهه
وخوف عليهه .. ضليت حاضنهه وهيه تشد عله هدومي وانه اشمن بيهه شويه وهديت هيه كلتلهه

- محتاجج هالليله انه تعبااان ماريدن افارك حضنج
- اسم الله عليك من التعب حبيبي .. تعال

اخذتني وكعدت ع الجربايه وكعدت عله رجلي
تلمست لحيتي وعيوني وباستني بخدي وكالت ..
- حبيبي اهدأ وشيل كل خوف من بالك ماريد يضل بالي عليك يروحي
- بس بيج اهدأ بروحتج مايضل عكل براسي
- اعرف ياروحي والله اعرف بس هالمره اني اريد منك هالطلب ماتلبيني ؟
- لبيج يارويحتي امري
- تكون عون الي بهالقرار تعاوني حتى ارجع رضى وثقه ابويه
- يجرالج الي تردينه بس ماتكطعين وياي تخابريني من اي تلفون
- اكيد حبيبي .. امي كالتلي تلفوني بعده موجود
يمهه اخذه واخابرك
- انه اخابرج حته تحفظين هالرقم وكل مايصيرلج مجال خابريني تدرين انه بلايه صوتج اغدي نار
- مو تدلل حبيبي
- زين وعمليتج ربى ماريدنج تتاخرين عليهه شلوون
- ميخالف كلهن يومين واحاجي اهلي بيهه بس تهدا الامور شويه احاجيهم ونروح نسويهه
- استعجلي شكد مابيدج
- من عيوني
- ديربالج عله روحج لاتنسين شموصيج لا شغل ولا تعب وعلاجج بكل وكت تاخذينه
- ماانساه لااتخاف حبيبي .. هسه عوف كلشي تعال تمدد خلي اتطمن عليك حتى اروح عيب طولت هنا
- رببى
- حبيبي تعال فدوا لاتصعبهه عليه تره بالكوه جارعتهه ومكابره الله يخليك كون وياي

حضنتهه حيييل اريدن اشبع منهه كبل ماتروحن
وبعدين تمددت اجتي غطتني وكعدت يم راسي
باست راسي وايدي وابتسمتلي .. خلت ايدهه عله
عيني وراسهه عله راسي وكالت..
- حبيبي تعبان ولازم ينام ويرتاح ويخليني اطمئن عليه
- مرتاح بوجودج حبيبتي
- واني موجوده وياك دائماً .. من تشتاقلي ضل ردد باسمي وراح تحسني قريبه منك وتلكاني اخابرك .. ماعوفك ياروحي دائماً يمك ولو بينه مسافه واهل بس كُلي وياك

جنت شويه شويه اغفي من كد ماانه اهدا وابرد بايدهه هيج وصوتهه ونفسهه كريب مني حسيت بالراحه وماعرفت يمتى نمت وشني اخر شي سمعته منهه وماحسيت الا عله صوت وليد
يكعدني ... فتحت عيني وضليت اعاينله ..

- شكو شتريد
- هاي نايم من صدك !
- ايي
- عليك الله شسكتك هيج ونومك اني كلت لو يكتلهه لو يكتل ابوهه هسه .. شو ماشوف الا ربى طالعه
وبيدهه جنطتهه وحضرتك نايم ! شسوتلك وهيج نسيت الدنيا ونمت ؟؟؟؟
- هههخخخخخخخخ شكثر ادقق لخاطر نبيك ماتعوفني جنت مرتاح ونايم شذكرتني من طاحضك عله هالدكه
- عليك الله بس احجيلي شلون تكدر عليك هيج
بس فهمني ضلت حسره بكلبي اريد اعرف شلووون هيج تكدر تسيطر عليك بقمه اعصابك
- الحبيبه هاي موش اي وحده
- لعد اني اصير عصبي اختك تهد علي والله العظيم اني اروح اراضيهه ماتنطيني مجال تطلع النوب هي الزعلانه
- هههاااااااي شورررطك ماتكلي هههييي يريد
يتعارك ويه زهره وتسكتله لك بويه انته شتحجي ماتكلي شتحجي
- عليك الله يعني تورطت !!!
- انته شتشوف
- اشوف انسحلت خويك شضال بي
- هاااااا اشوفنكم تبسبسون شعدكم
- يمه اسم الله الرحمن شجاااابج !
- جيت اشوفن اخوي شني اتسمي من عندي !! جني جدامك !!
- لااا ههههه كمر ههههه اييي شلونك شهاب زين مرتاح مو
- ههخخخخخخخخخ كلشششش مرتااح متونننس
- عندك هيج مره ومترتاح اذا هيه نومتك باعصابك شتريد بعد عمي حظوووووووظ
- وليييييد
- ها عيني
- اهجسك تبسمر مادري انه هيج اهوجسن وحدي
- لا حبيبتي تهوجسين مو يمج السالفه
- هااااا اي جاا خوش
- ولج زهررره
- ها خويه
- اخافن ما سمعتي وصيتي لج !
- ها شني بيمن
- بصويحبي .. جنج موش عله مرامه
- هىىىىىىىىىىىىىىىئ اااااانه !!! لا ياخوي ماداريته مثل الماي بالصينيه هَيج انه شايلته بعيوني جا غير زلمتي شلون اضيكن خلكه
- بعد روووحي لاا والله اصيله وين اكو منها
- هاااا زين زين جا امشو من جدامي وخلوني انامن يلاا عاد تحركوووو
- شني خويه ششفته منك وتنامن
- والحمزه تعباااان لك شدعيلك وليد عله هالكعده اااااخ اااخ كون تطيحلك بعركه تسطرن راسك
- بعدددد اخوووك هو اني عااايز
- جااا امشي منا يلااا سد الضوا والباب يلاا لحد يكعدني بعد امشووو
- اي خويه مشينه نومك هني
- الله يهنيج

مشو وانه رديت نمت وماكعدت لثاني يوم بالعشره الصبح .. كعدت مشتاك ليهه تعودت اصبح بوجهه
عاد اخذت التلفون وخابرت عليهه يدك يدك ومتجاوب .. عفته كلت يجوز بعدهه نايمه

رحت سبحت واكلت وضليت كاعد يم جدتي
نسولف وابوي جان ذابح وكاعدين يسون الغدا
انه كمت رحت لبيت نعيم كلبي مثل النار عليه
رحت وعاينت حاله يبجي الصخر نايم وبس العيون مفتحه والصوندات مشكله بجسمه ..

دنجت ليه بوسته وضليت حاضنه وهوه يبجي
وانه ابجي ماتحملت اشوفنه هيج ضعيف ..
ضليت كاعد يمه حجيتله شني الصار وياي
وهوه يحاجيني عله كد جلمتين وبالكوه ...

عفته ينام ورديت للبيت خلكي ضايك ومنعزل وحدي .. وليد يكعد يسولف ويتشاقه وانه موش يمه
عاد للعصر مشى لاهله ...

ضليت اخابر عليهه ماتجاوب كلبي موش مرتاح
لجن نطيتهه وكت كلت يجوز اهلهه كاعدين وماكدرت تحاجيني ... ولليل هم نفس الشي حركته للتلفون ومامش احد يرد ...

رحت عله ابوي بالديوانيه ..
- بويه امشيينه لبيت عمي حاتم
- هااااه شعدنه بهالليل
- بويه البت اختفت اكيد هاذ ابوهه سوالهه شي امشينه نشوفهه ونرد مانطول بس جلمتين ونرد
- خااايب ماتركد تسودنت شمااالك بنص هالليل تمشي لبيتهم تحاجيهه !!!! شمالك يامصكوع موش اخوتهه وابوهه هناك ماتحشم انته ماتخجل
- بوووويه جاا اضلن هيج ماعرفن شي عليهه
- حرررريشي مايطكهه كلشي مابيهه بيت ابوهه كاعده شني تخافن عليهه من اهلهه اركد عاد بسك فضايح ومزامط
- اووووووف يالله اااانه ناكص عكل ورديت
- والله ماعندك ذره عكل هالعشك المصخم سودنك وكطع خيوط عكلك جايني وامش نشوفهه تههي بهي زلام تالي وكت

عفته ومشيت بره للحديقه افتر وبايدي التلفون كلساع اخابر وما مش احد يرد بالف ياعلي مسيطر عله اعصابي لا اسويلي بليه النوب ...

ضليت الليل كله سهران واعاين لصورنه واذكر هذيج ايامنه ما جن صارلي يوم واحد بعيد عنهه
جني تغربت سنين بلياهه ...

ثاني يوم وهم نفس الشي لا حس ولا خبر منهه
ضليت الهي نفسي بجم شغله حته اصبر شويه لحد الليل ماضل بيه صبر بعد .. كمت مشيت لبيت الشيخ طبيت للديوانيه ودزيت محمود يندهلي عليه

وره شويه اجاني ...
- هاا ياشهاب خيرك !
- شييخ حك هذيج الشهور اريدنه هالساع
- اي تاخذه من هالعين كول
- تمشي تخطبلي هالساااع
- تهدا بويه شمالك بنص هالليل
- ااانه اعرفن ربى بيهه شي صارلي يومين بالكوه كاض روحي هالساع ان مامشيتم وياي اروحن وحدي والي يصير انتم تحملونه
- امش بويه امش سودنه العشاك احنه وين نكدر عليهه امش جدامي انه البسن عكالي واجيك

طلعت رحت لابوي كعدته ..
- هااا خيرك شني
- بويه اكعد انه وشيخكم راح نمشي لبيت عمي
- لك بويه انته ماتكلي بيمن بليتنه من طركاعه طاحت عله راسك هاذ الكوي ماتركد عاااد بزعت ارواحنه من معاشكم هاذ هسه حتموتن لو ماشفتهه اركد يامسودن لاتطيحني ويه اخوي بليه
- بووووووويه اااانه تسودنت زييين ... حمشي هالساع تجي وياااي لو لاا
- اييي ايييي من غضب الله عليكم وكفتونه تك رجل عله هالزواجه كلب هوه لو بليه كشره

مشيت رحت شغلت السياره وضليت ادك هورن لحد مااجوي .. الدرب كله يحجون علي وانه ماردن عليهم بشي بالي كله شني الصاير ليهه
وعدتني تحاجيني عليش هيج سوووت علييش؟؟؟

وصلنه ليهم ونزل ابوي دك الباب جان يطلع لينه
حيدر سلمنه وطبينه .. عمي تفاجىء بجيتنه لجن
رحب بينه .. كعدنه وهوه يعاينلي عاد الشيخ كال

- ابو بسام بنتك عايشه ميته !!
- عايشه ماعليهه شي
- هالعكل مايرضى يتهدا بعد واحنه اجينه هالساع
نريدن نطلب ايد البت لابن عمهه عله سنه الله ورسوله
- جيتكم عله هالراس لجن ماعندي بت للزواج
- عممممي كوول يالله
- شني انته ماتفهم جم نوبه كلتلك مازوجنك البت
- استغفررر الله استغفرررر الله
- خويه موش هيج الحجي الزلمه رايدهه من زمان
منهو الاحسن منه ليهه !!! البت تعيشن بين اهلهه
وشني نسيت يوم الاختارته!!!
- تختار متختاار ماعلي بيهه موش بعد هالصار وجاي يخطب !! بيا عين !!!

بهاللحظه طبت ربى كمت ليهه رأساً وخذيت
الماي من ايدهه حطيته ع الطبله وضليت واكف جدامهه ...
- تلفووونج ويييين حركته عليج عليش ماتجاوووبين
- مو عندي اخذه بسام
- لانننننعل .. شلونج طمنيني عليج حركتي اهلي من نعلى عله ذيج ساعه الكشره الطاوعتج بيهه
-شهاب اكعد منا اهلنه شبيك
- كعدددتيش انتتي انه موش كايلج ماتكطعين بيه
مخليتي معتلج بهالنار الله محمد يرضاااااهه
- اهدا بس اهدا

اجتي امهه سلمت وعاينت لربى وكالت..
- امشي ربى شري الملابس يلا بنتي
- هيييي ياملااابس شماااالج عمه صدددك تحجين
ربى ماتشتغل شييييي شموصيج ااااانه
- لعد منو اليشتغل عيني؟
- موش ولدج هنايه مايكومون شبيهم تكرمووو
البت تتعب ماتشتغل شي
- ياااه اخلي ولدي يشتغلون ويخدموهه هسه هي سله ملابس مراح تموتهه شدعوااك
- شهاب خلي اروح بعدين نحجي
- ووووووين ماااشيه انتي من كل عكلج ترحين
تشتغلييين تردين اضيعين تعبي ذاااك كله انتي
امشي اكعدي هنايه لا ابتلي بيج
-شهااب وين اكعد خلي اروح
- جااا انه جاي عله الحياطين اكعددددي واسكتي
بلايه حجي زايييد تردين تجلطيني انتي بالحسين
علكمتي ريكي اكعدي عاد

كعدتهه بسدي وهيه تعاينلهم وترد ادنج راسهه
عاد مدت ايدهه تريد تاخذ الماي ايدهه ترجف
جريت الكلاص منهه واخذته شربتهه ..
- تضلييين ام راس يابس جم نوبه كايلج ماتشيلين شي وماتشتغلين موووش وصيتج ماتتعبين جا انه هذيج الشهور وتعبي وياج بيهن تردين تضيعيهن وتطيحين نوبه اللخ وتجلطيني .. هسه ادينج ترجف
ماتعرفين تاخذين ابرتج اجيب واكوم بهالادويه المن لابويه ماتشربيهن شليتي حالي

جنت اشربهه المتي وهيه تعاينلي وانه احجي عاد
خليت الكلاص ورديت عاينتلهه ..
- رجلج شلون صارت ؟
- زينه خف الورم مالهه
- من يمتى مشاربه دواج !!! عفتج يومين اجي الكه طولج يرجف ومابيج حيل عفيه بالسباعيه هيج انه موصيج عفيه
- شربت والله شربت بس لان تعبت شويه هيج صار
- وانه دازج تتعبين !! اكعدي بحجرتج واسكتي
البيت ماعليه شي لو مااشتغلتي ماحجيتي لاهلج جاي تتعبين
- لااا ماحجيت لاحد
- جا تنتظرينهم يحسون موش مثلي هذول بويه
لو مانطكتي محد يعرفن شنهو الي بيج .. هسه
عوفي كلشي كليلي نفسج خما ضايك !!
- كلشي زين بشوفتك

ضحكت ودرت وجهي عاينت الشيخ يضحك ويعاين لينه وابوهه عاكد الحاجب ونافخ صدره
وابوي يهز بايده ويعوج بحلكه .... عاد الشيخ كال

- هااا يا ابو بسام بعد الشفته مااضن اكو حجي ينكال جدام هالخوف والمحبه هاي
- اااوووف اوووف همه شخلو بينه شلشونه وحركو ابهاتنه .. انه بعد الشفته جدامي اتوغع هسه حجايه النوب وشهاب يكوم يحرك هالبيت عله روسنه
- اي خويه انه ابصمن ليك بالعشره ولدي عكله طريته بتك كطعت خيوط الضالات بي غادي
لا فكر ولا حسبان غير يا وينهه يا صارلهه شي
يا امشونه عليهم زلاميش ماتكولي انتم جيل هالوكت
- هههههههه بعد اخوك هاذ عشك الشروك مايعرفن عكل عنده باليعرض ليه ياكاتل يا مكتول
- اييي صدكت عمي
- هااا ياابو بسام نقرا الفاتحه

رادت تكوم ربى كضيت ايدهه وكعدتهه
وضلينه نعاين لابوهه ..

- عله بركه الله خويه
- يالله يااللله .. بسم الله الرحمن الرحيم

قريت الفاتحه وانه اضحك وهيه تريد تمشي وانه اخزرهه وابوي يعاين ويضحك .. عاد الشيخ كال
- يمتى تريدن الملجه ياشهاب؟؟
- عكب باجر
- لااااااا شهاااب شنوو مو هسه
- شني شتردين بعد شيبت وانه انتظر هاليوم شعندج بعد
- شهاب شنو نسيت شبيك
- اييي بعلييي راح من بالي هوه ضل فكر بهالراس
- خير شعدكم !
- عمي كبل جم شهر ربى طاحت ومرضهه زاد
سويت ليهه فحوصات وكلبهه يرادله تبديل صمام
وجهاز ينضم دكات الكلب انه جنت اكللهه تسويهه
ومارضت الا تشوفك يلا وهالساع شافتك وتفاهمتو
خلونه نسوي العمليه عبن التاخير جاي ياذيهه
- من يمتى هالحجي !!! وشني الصار ليهه
- شهاب عليش ما كلت لينه من وكتهه ضال ساكت عليييش مانطيتنه خبر واحنه نجيهه شمالك انته
- هسه الصار صار انه اكللهه لاتتعب ولا تشتغل
لجن هيه راسهه كوي ماتسمع الجلمه عاين رجيف ايدهه شلونه
- ربى عليش ماكلتيلي بويه شني تضمين علي هيج سالفه !!
- ماصار مجال نكعد ونحجي يابه
- زين شهاب هالمستشفى مضمونه شغلهم زين؟؟
- هيه من احسن مستشفيات اربيل ودكاترتهم زينين وهوه الدكتور مشرف عله حالتهه كل هالشهور انه ماعفتهه كل عشر ايام تحليل وتخطيط وعلاجهه مايفوت وكته لجن ماجاب نتيجه ساعه الساعه تطيح ويكف كلبهه ومايرد الا بالف ياعلي
- لااا اسم الله الرحمن عليج بويه .. جا هاليومين نمشي ونعيد الفحوصات ونسوي العمليه مانضيعن وكت اذا هيج سالفتهه
- اي عمي لازم نروحن باكرب وكت عبن انه اعرفنهه تعبانه وماتحمل بعد ازيدن من هيج موش بصالحنه
- هاذ هوه جا نتوكل بحيل الله هاليومين
- عمي نكطع مهر ونمشي لاربيل
- شهاااااب صاي عله نبيك وكت مهر ماتشوف البت وحالهه نرد ويصير خير
- لااااا والله مامش هيج حجي نكطع مهر وانه مسؤول بكل عمليتهه محد يحط ايده بشي
- هسه هيه موش بالفلوس خلي تردلهه عافيتهه وبيك خير وتدلل
- عمي دخيل جدك لا تعرضلي انه ماتحمل اشوفنهه طالعه من عمليه وبعيده من عيني اكطع مهر ومحد اله حجه علي بعد .. عود مانسوي حفله جبيره بينه عله كد سيد وحلقه وبس تصير زينه
اسويلهه حفله الما صايره
- شهاب لا خليهه بعدين لا نستعجل هيج
- بنتي هالسالفه اطلعي منهه تره بعدنه مامتفاهمين حسابج بعدين
- شكوو ياحساب شمسويتلك
- كتلج بعدين خلي افض هالسالفه
- ابو بسام خلينه عله حجايه شهاب عبن السالفه من تطول تصير بيهه جره وعره خلي نفضهه ونمشي
- خويه تعجل بمهرهم عليك العباس خلني اريدن ارتاح كل يوم وكاض كلبي بايدي من وره هالاثنين بالله ماضل بيه كطره دم من صخايمهم خلصنه واليرحم والديك

ضل صافن شويه وبعدين كال ..
- ماشي بس عله كد عايلتنه ماريدن هوسه وتعب ليهه
- اي عمي بس ترد لحيلهه شني الي بخاطرهه يصيرن
- ان شاء الله انه اهم شي اريدن ترد عافيتهه كلشي بلياه موش مهم
- عمي اذا هيج جا عكب باجر نجيب السيد ونجي
- هلا بيكم
- هااااا ياشهاب هساع ارتاحيت دكت ال ١٢ خلنه نمشي عاد
- ههههههه اييييي هسه نمشي
- ههههههههه مسودنين بعلي هاذ شيبي وماشفت ولا سمعت بهيج وادم مثلكم

ضلو يصنفون علينه وهيه مدنجه وانه كلساع اندار اعاينلهه كلبي مفرفح عليهه مامصدك حتصيرن
الي واخلصن من الكال والكلت ...

كامو ابوي والشيخ مشو بره وانه كلتلهه ..

- هاج هاذ تلفوني خلي يمج وحخابرج من تلفون زهره وباجر اجيبلج واحد جديد
- ماشي
- لااا شهاب اخذ تلفونك هساع انه اردن ليهه تلفونهه
- لا عمي مايحتاج خله عدهه باجر يجيهه جديد
- كتلك اخذه لا تعاند
- صار صار بس لا تزعل صاار

ضحكت وحجيت ليهه بصوت ناصي
- ماانام انتظر تلفون منج زيين
- زين تدلل

غمزتلهه وطلعت حضنت عمي وبوسته وكتله
- انته وبنتك تدخلون الجنه عله ضمانتي عمي
- ههههه شني هيج حصلنه بيك اجر
- هناااك تشوفنهه يم ربك شكثر اجرهه جبير
- امش امش رد لبيتك ونام عيونك محومره
- جا ما تحنن علي من زمان
- من دكايك غير جا انته شخليت ماسويته
- عليمن اطلع غير عله عمامي ههههه اكلك عمي وبسام شلون بي
- الله كريم هسه امش والصباح رباح
- زين تصبح عله خير عمي الغالي ابو الطيب كله
- هههههه تلاكي الخير

مشيت للسياره وشغلت وحركت والضحكه مافاركت وجهي ابوي والشيخ يحجون وانه بغير عالم رايح .. جا لو ادري من زمان هاد السلف وماشي ومخلي كل هاذ يصيرن ..دخيلك ربي من ترحم ترحم ...

اول ما طبيت البيت تلكتني زهره ومنال
- ها خويه شصار خوما البت بيهه شي اخوهه كتلهه !!
- خااايبه والصمخ اسكتي عاد
- جاا هسه غير تحجي وتريحن كلبي شني مايرضون تطب علينه بعد حبسوهه!! لو تمرضت! خاف يزوجنها بالغصب !!! اي بعلي
- لج لااا غير اخوي ناهي عليهه شني نسيتي
- اييي هم صدك جااا ماتحجي ياخويه
- ارد اشوفن يمتى هالسان يتعب ويسكت
- مايتعب خويه هاذ اكوى عضله بجسم الانسان شيتعبه ودامه عندددي ههييي يلولح للصبح احجي مو بطيت روحي
- جيبي ماي واحجيلج
- اركضي ولج جيبي الماي اركضي

راحت منال تركض للمطبخ وانه مشيت لحجرتي تمددت وهيه فوك راسي واجتي منال جابت الماي شربت ومديتلهه الكلاص خذته ويعاينلي ..
- هااا خويه احجيهه عاد
- حضرن روحجن عكب باجر
- اييي شني عكب باجر
- نكطع مهر
- كلللللللليييييشششش فجت جبستكم وعلي لج هلهلي يامنايل هلهليييي
- كللللللوووووويييششششش بالمبارك خووويه والله والنعم من الاختاريتهه خوش جنه جبت لينه
- ايييي يبعد رويحتي هاي صويحبتي وتصيرن مرت الغالي يايمه وينج كونج حضرتي هاليوم
اروحن اكعد جدتي ابشرنهه
- خايبه اكعدي خلهه باجر احجيلهه لا تكطعين نومتهه
- لاااا شيصبرني انه لباجر هساع اطر السلف كله
- ههههخخخخخ يامسودنه لج لا تكلين لاحد بينه تصيرن بس عمامنه
- هااا يعني مامش دك وغنه وحفله وهَيج
- لااا عله كدنه نسويهه وتالي عود نحتفل
- شننني عليش خويه مانحتفل جا شني ماخذيهه فصليه
- لج خايبه ماتطكين اختج عله حلكهه افصلج انتي كووون
- هااااااه خويه بعدهه ماجت وهيج تبريت مني
- جا كضي لسانج وافهمي البت عدهه عمليه نسويهه وعرد نحتفل
- صخااااام عمليتش هاذي النوب
- لكلبهه
- يماااي عزا العزاني سوده عليه مكروده ماتعافت بيوم
- بسج عاد لج انتي شني كلياع موجه توج تهلهين
هساع تولولين شني انتي ماتفهميني
- انه كشكوليه خويه جا شني ماتحبن طبعي
- اكول امشن منا يلا يلااا امشن
- هااا التلفونات بدت من هالساع
- وحك العباس حكوم اصلخ جلدجن من لحمجن ولن من وجهي

طلعن يتراكضن وسدن الباب وانه كمت كفلته وطفيت الضوا واجيت تمددت ورديت خابرتهه

- الو حبيبي
- اوووووووف يهالصوت بويه جني مفاركج سنه موش يوم
- هههههه اشتاقيتلك
- وانه مشتاكلج يبعد رويحتي شلونج
- مرتاحه حبيبي وفرحانه كلش مداصدك الصار ابد ابد يعني هيج بلحضه وحده ابويه قبل !
- جا عوزه يخلينه معلكين ازيد بعد هوه مل من عدنه وشافنه مانجيب ليه غير وجع الراس كال ازوجهم واخلص
- هههه ايييي والله صدك تدري البارحه بسام كلب الدنيا هنا بالصياح
- صدك هوه وينه ماشفته
- ابويه طرده جان يريد يجي يكتلني واني ختلت بغرفتي فوك وضل هوه وابويه يتصايحون لحد ما تجاوز وضل يفشر عاد ابويه طرده وراح لبغداد
هسه مادري شراح يسوي اذا عرف
- شيسوي خلي يسوي مايهمني بعد ماطول ابوج نطاني جلمه خلص بعد مايهمني اكبر واحد
- خايفه شهاب معقول هيج راح تعدي على خير بهالسهوله ؟
- وعليش ماتعدي عله خير شني اليمنع بعد
الشيخ وخلصنه من سالفته وابوج وتراضينه وياه
والعمليه ونسويهه شني الضال بعد !!!
لا تضلين توهسين بنتي خلينه بفرحتنه
- اييي الله كريم
- لج يا مصخمه انه موش موصيج ماتشتغلن عليش تكسرين جلمتي هيج
- شهاب يعني غير امي وحدهه بالبيت شلون اعوفهه وهي تصخرني اكلله ماكوم ماعليه
- اي وشني واذا كلتي جا صحتج اهم لو الشغل
- ماصار شي حبيبي هسه هم ابويه نبه عليه ماسوي شي بعد
- ايييي فضل منه
- شهاب
- اي اي ماحجينه شي .. مشتااااك انه ولهان عليج بويه انتي ماتكليلي عليش رجعتينه موجنه بالعسل
هساع شيكضي الليل
- ههههههههه يكضي حبيبي هاي مو دنحجي
- مامتعود ع التلفون انه كلشي عندي حار بحار
- ههههههههه بطل سوالفك هاي
- مابطلهن انتي بطلي تخجلين
- امممم اكلك حبيبي
- ياعيونه كولي
- يعني اني شلبس بالمهر والله مافهمت شي
- هههههه هسه انتي حايره باللبس اي شي عسى ما دشداشه عبايه كونيه اي شي الجان
- ياااا عزا هاي شبيك غير مهرنا شنو مااكشخ
- كيفج بنتي شيعجبج البسي بس هيه حتصير كعده بسيطه بين اهلنه ومن نرد من اربيل بسلامه اسويلج حفله الما صايره وتكشخي شكد ماتردين
- زين ليش متخليهه فد مره وره العمليه
- لاااااا ربى يعني شلون انه ماكدر اشوفج غير اتسودن ومحمد اذبحهم اذا مايخلوج تضلين يمي
هيج احسن بعد محد اله حجه علي اطب اطلع اداريج اضل يمج محد يحجي
- اي مو هيج راح تصير خبصه بخبصه
- بنتي لا خبصه ولا شي باجر شوفي شتلبسين
وانه اجيبن الحلقات وثاني يوم نفضهه شكو بعد
- امممم
- شو جن معاجبج الوضع
- لااا عاجبني بس دافكر بشكلي
- ههخخخخخخخ بالله انتي تضحكيني من تكلين هيج لج بويه بس غسلي وجهج وتعاي كعدي هوه انتي كيمر السده جايه تفكرين بشكلج شني
- هههههههههه والله عليك سوالف
- شبيهن
- يخبلن مثلك حبيبي

ضلينه نسولف للفجر عاد صليت ونمت وثاني يوم
خذيت محمد ومشينه للسوك اخذنه الحلقات والعصريه رحت للحلاق رتبت لحيتي وشعري
والبيت كله مخبوص وانه عايف كلشي وكاعد اراسل بيهه.. هيه راحت السوك ويه امهه وكالتلي جهزت المحتاجته ماحجتلي شجابت مارضت تكول
عفتهه احبن مفاجأتهه ..

خابرت وليد اجه وعماتي وعمامي كلهه تحضرت
وثاني يوم وره الغدا مشينه ليهم ....
.
.
.
يتببببع
❤️❤️❤️

التكمله باجر ببارت اطول .. توقعاتكم ؟