رواية من فجر ديسمبر الفصل الثالث 3 - بقلم Zoka 🌷

من فجر ديسمبر
🍁
🍁

- انه موات ياشهاب
صفنت عليه وعاينت وجهه المتعوب ودمع عينه المكابر وخذتني
الذاكره للايام العزيزه  ...
نعيم صاحبي الي اشد بيه الظهر من سنين عمري ال١٠ لحد
يوم التفاركت خوتنه بي .. جان يوم موتي الثاني يوم كسر ظهري
حزام ظهري ..
انه عندي من امي خوال ثلاث واحد منهم ماعنده خلفه وعنده
كيعان وحلال جثير وكت الي توفت امي نطاني كاعين وحده
كريب كاع خوالي والثانيه بديرتنه بس بعيده شوي ...
من صار عمري ١٧ كلت لابوي انه اريدن استغل هالكاع الي
بديرتنه وازرعهه وارتبهه واسويلي راس مال منها وافتحلي
محل بالولايه حته هناك اشتغل بي وادرس بالجامعه ...
ونعيم جان مساندني بهالفكره واهلي وافقو وبدينه انه ونعيم
نحرث هالكاع ونتعب عليهه ليل نهار وزرعناهه حنطه ونص
الثاني زرعناه خيار وبيتنجان ... وحصلنه منهه خير من الله
اهل نعيم جان حالهم عله كدهم فشاركته بالمحصول نتكاسم
بالنص شنحصل من البيع وكدرت اجمعهن فلس عله فلس
واشتريت محل بالولايه بالسوك وصرت ابيعن بي من زرعنه
من البساتين واهلي يدزولي منهم صناديك البتيته والبصل
ومن زرعي البيتنجان والخيار ويدزولي الخباز والتمر والرارنج
واللوبيه والباكله يضلن شكم شغله يجيبهن نعيم من العلوه
جان المحل نربح منه خير بهذاك الوكت كله تازه والوادم مكيفه
عليه ... انه جنت افتح الصبح والعصر بالسوك ونعيم يجي
وياي الصبح يوكفله شويه وبعدين يشوف شمحتاج يروح للعلوه
يتسوك ويجي وانطيه هالقاسمه الله ...
خلصنه السادس وطلعلتي كليه علوم كيمياء ونعيم طلعتله
كليه علوم رياضيات .. جنه حيل فرحانين نفس الجامعه
وعدنه فلوس وجنه مفكرين نزيد شغلنه ونجمع ونشتري
سياره وهم نتشارك بيهه جنه مانتفارك ليل نهار احنه سوه
باول سنه بالكليه بعدنه جدد ومانعرف احد شوكت مانخلص
محاضرات لو انه اروحله لو يجيني وشويه شويه صار عدنه
صحبه هناك بس ماغيرت صحبتنه ضلينه نفس المواصل ...
صارت الامتحانات مال اخير السنه انه جنت حاط عيني عله
وحده من بنات قسمي وحاجيله لنعيم عليهه جنت اكله اتقدم
بس خاف مايرضون اهلهه جيف بعدني طالب وانه اخافن
تروح من ايدي جان يكلي لا ماتروح اصبر بعدنه اول سنه
كملنه السنه ورجعت اشتغل بالمحل الصبح والعصر بالدوام
جنت افتح من ٣ للمغربيه اعزل .. بالعطله صار نعيم يشتغل
وياي باخر شهرين من العطله صار ياخذ مكاني الصبح وانه
اروحن للكاع اشتغل بيهه لين انه وكت الدوام خليته بيد ابوي
وموش عله مرامي صارت فرجعت ذبيت حيلي عليهه من جديد
جنت اروحن العصر للمحل حته نعيم يروح يرتاح بيتهم وانه
اكمل شغل .. من جنت اجمع الدخل كبل ماعزل المحل اشوفه
موش مثل اول اعاين للمخضر ماضل بي شي يعني اكو رجل
عله المحل جا ليش الدخل كليل ؟؟ استحي اسأله هاذ صويحبي
خويي هسه يكول تشك بيه وبعد مايجي هنايه .. انه خما اخسر
صحبته عله شجم فلس هو الله الرزاق ....
رجعنه للدوام سنه الثانيه اول شهرين نعيم كال حشتري سياره
انه تفاجات هو انه صارلي اجمع بيهن كوم شهور ومكدرت
اشتري لهسه هوه شلوون؟؟ كال انه جامع شجم فلس وامي
انطتني ملاوي ذهب بعتهن وحشتريهه كتله يابه بالخير والبركه
ونهايه الاسبوع نعيم جاب السياره وصار يجي يوصلني بيهه
كام نعيم يتكشخ ويتعطر كل يوم يابه شكو يكول انه احبن اكشخ
صار اكو سفره لقسمنه نعيم اجه وياي وانه هناك ازامط بي
وصاحبي من الصغر ومالي غيره والكل تحسد صحبتنه وكعدتنه
وهو خلاهم يرحون بالكوستر واخذني وياه بسيارته طلعنه وحدنه
ورجعنه وحدنه ...
بره اسبوع اجاني ولد من شعبتي كالي تره صاحبك هاذ خذ
بالك منه ياخويه الوجوه ماتأمن انه تعاركت وياه جيف يحجي
عله صاحبي وهوه زعل ومشه وبره شهر جنت جاي متأخر
من وصلت شفت الشباب طالعين كلت هاي خلصت المحاضره
الاولى راحت عيني تدور عله هذيج البنت وين كاعده انه هالسنتين سلام ما مسلم عليهه بس اعاينهه من بعيد لبعيد
طبيت النادي شفتهه كاعده ويه اثنين بنات واثنين ولد ونعيم وياهم
انه استغربت ردت امشي اروحلهم اجه هذاك الولد لزمني من
جتفي وكالي .. فتح عكلك وشيل هالغشاوه من عينك رايدلك
الخير انه مو طباب شر بينكم .. كتله فهمني مكصدك  ..
كالي انه ماكلك انته اسمع وشوف ...
رحنه كعدنه كريب منهم انه منطيهم ظهري والولد بصفي
جنت افور اعصاب بالكوه كاعد واسمعهم شلون يتمضحكون
وشويه ووحده من البنات سئلته .. نعيم شو صاحبك ماكو اليوم
ماحضر المحاضره مو من عوايده خاف صايرله شي ..
جاوبهه ... لا ياابه لا شيصيرله تلكيه مكابل المخضر وكاعد
يكش بالذبان من عليه .. رجعن سألنه اثنينهن .. ليش هو يبيع
مخضر ! واحد من الولد كال .. شنو ماتدرن مو من شوكت
من جان يتاخر نعيم يكول يروح للعلوه يجيب مخضر ..
رجعت البنيه الردتهه كلتله .. انه عبالي مثلك لين اشوفكم سوه
ماعبالي يشتغل بالسوك ممبين عليه .. كاللهه ...
تجيبين البكال عله الباشه

هنايه انه بعد مالزمت نفسي من سمعت ضحكه ويستهزء وانه
عيشته من تعبي وجدي يجي هيج يحجي عليه ويصغرني جدام
الغرب وجدام البنيه الرايدهه بالذات .. كمت جريته من ياخته
ووكعت بي دك بوكسيات الولد يجرون بيه يردون ماهديته
وهو خنس حته ايده مارفعه وحامى نفسه من تعبت من ضربه
رفعته من ياخته وحطيت عيني بعينه وعيني تعاتب وشاعله نار
هوه دنك راسه شمرته عله جهه وطلعت اجوي الامن وراي
تلاغيت شويه وياهم وهذاك الولد هداهم يلا فكوني وطلعت
رحت افتر بالشوارع مادري وين اروحن هيج كسر بداخلي
يوجع نار كبره شبت بيه اهجس راسي راح ينفجر ..
رحت لاهلنه ورحت للكاع كعدت هناك اصرخ واكطع بالزرع
واشمره نصه خربته هيج انتف بي واشمره ..
لليل وانه هناك محني الظهر وكاعد جن خنجر وانطعن بنص
ظهري لا انه الكادر اطلعه ولا الكادر اعوفنه هيج جنت ساعه
اصرخ بصوت يجرح البلعوم وساعه اللخ اسكت واعض اصبع
ندم شلون ثقيت بي وماشفت وجهه الثاني ..
طلع الفجر عليه وانه بمكاني كاعد كمت رجعت للبيت غسلت
اجاني ابوي يحاجيني ماردله صوتي انبح وحيلي انهد عفته
وتمددت بفراشي للظهر اجاني اخوي من ابوي اسمه محمد
كالي صاحبك نعيم بالباب مارديت عليه راح هوه وشويه
ورجع وياه نعيم انه من شفته رجعلي كل الحيل كمت وضليت
ادفع بي واصيح عليه جان يكلي ...
صويحبي انته مالي غنه عنك جان حجي شقه
جنت اكله .. لو ذابحني من الوريد للوريد ولا دكتك هاي بيه
تشمت بيه بين هالوادم وتضحك لضحكهم عليه هيه هيج الخوه
هيج الصاحب يصير انه جنت انطيك شكاي وتعبي واكولن خويي
وصاحبي ومحاسبتك بشي وانته تفهم شكصد مووو ينعيم
يكلي .. اي افهم .. ومدنج راسه
لك يالعااار يالاااغم لك جدااامن تحجي هييييج جدااامن ياجلب
لك جدام الردتهه هييييج هي الخوووه يخسسسسييسسس هيييج
تعيرني بشغلي ولك مو رفعتك بي مو سويتلك شان بي مو لبسك
وكلك وصعدك هالسياره هاااي كلهه وتعيرني يالباشاااااا

كعد بالكاع ودنج راسه وضل يبجي ويكلي ..
اسسسف ياشهاااب سامحني انه نغريت بالفلوس والمظهر
ضيعتني الدنيه سامحني ياخوي

كتله .. مالك سماح يمي والجان بينه انحرك وصار رماااد
وانعل ابو الخوه الخاويتك بيهه
كلي .. شهاااب انه صاحبك انه اخوك الزغير لا تشيل بكلبك علي
انه غلطت سامحني

كتله .. اسمع يانعيم ...
وعر دربي وجدامك ماتكطعه
جنه بحبل عزتي ما تكطعه
السمه الخلص حياته ومات كطعه
خركه ومايفيد بكل قضيه ... وانته هَيج عندي ماتفيد بعد خركه
صرت بعيني من يوم الطعنت ظهري ومن اليوم الدرب التلكاني
بي دير وجهك وامشي ولاتفوت من يمي ولا حته السلام ماريدنه
منك ... كوووم اطلع بررره كوووم خلي صحبانك يفيدوك روح
شوفهم هم يضحكون عليك بظهرك روووح لاتضل اعمى مثلي

ضل يبجي ويتعذر انه عفتهم وطلعت رحت لخوالي ضليت يمهم
خمس ايام ورديت لهلي وضليت اشتغل بسكات سويتلي جواز
سفر وجمعتلي شجم فلس فوك الي عندي ومن صاحب لصاحب
كدرت اعرف شنهي الدراسات الي بالخارج وسعرهه مناسب
رشحولي ( ماليزيا و تركيه والاردن ) انه كلبي كالي تركيه
وحجيت ويه اهلي بالموضوع ما رضو رحت للشيخ حميد بوكتهه
وفهمته شلون الدراسه هناك زينه وسمعه حلوه بيهه ولغه اتعلم
وضليت يومين يلا قنعته وهوه بدوره قنع والدي وصرت ارتب
للسفر وكل هالفتره انه ماحاجي ويه نعيم كرهته كره العمى
وهوه شكد يدزلي ناس يحاجي الشيخ ابد مارضيت احاجي بعد
وبعت المحل وسلمت الكاع لابوي وسافرت ....

- ياشهاب ياخوي حاجيني بالله عليك
- شتريد من بكال شيكدر يسويلك هاا
- ندمااان عله حجي وحك هو الحك والله من يومنه ذاك وانه
ماشفت الخير شلونه لابشغله ولا صحبه ولا بدن
- نعيم انه مارايد اذلك يشهد الله علي بس انته جاي تعب نفسك
هيج ماكو شي عندي انطيكياه هاي الخوه ماتت من سنيييييين
انه نسيت كلشي بينه من ايام ومسامحك ومحاللك ومواهبك
بكل شي
- انه اريدن جلمه ياخيي منك ماريدن غيرهه يبعد اهلي
- استغفر الله .. شبيك مريض ؟
- من سنتين صار عندي سرطان بالدم ومالكيتله علاج
- لا حول ولا قوه الا بالله تعال اكعد ارتاح وجهك اصفر
وخلي الحجي بعدين
- ياشهاب
- بعددددين كتلك اسكت وطب الديوان يلا انه عندي شغل اروحن

عفته ومشيت مدري شصارلي من شفت حاله مكدرت اضلن
جدامه واشوفن وجهه المتعوب واسمع بمرضه ...

رحت سلمت عله الشيوخ وعله كل عمامي وولدهم وولد ولدهم
والصحبان كلهه جانت ملتمه هاليوم ... بين مافرغت من سلامهم
رحت للبيت ادورن جدتي هي كاعده بيت ابوي كونن هي مو ام
الشيخ فما تجي هنايه الا بالمناسبات .. طبيت المطبخ وعليت
صوتي ...
- يا الله جددده انتي هنااايه
- اي يابعد بيتي اكررب يايمه انه ريولي مايعنيني اكومن لك

طبيت للحجره الجوه يكعدن بيهه الحريم دايماً ... جانن نسوان
عمومتي موجودات كلهن الي منهن تثرم البصل والي منهن
تنظف الخضره والي تحضر بالمواعين ... سلمت عليهن وهنه
يعاينن لطولي ويسلمن رحت دنجت على جده حبيت راسهه
وايدهه وهي حاضنتني وتشم بيه ...

- يايمه يوليدي شجاااك عله الغربه وهاد اهلك ياشهاب خفت
اموتن وماشوفنك يايمه ياابن الغالي
- لااجده عمرج طويل ان شاء الله بالي دايماً الله يشهد مانسيتج
وللساع العلك الشديتي بايدي موجود بمحفظتي خاله اذكرج بي
كل يوميه
- اففيييش يريحتك يايمه بلجن تكول اردن يوم يومين اشوفن
اهلي افكدهم شبيهم مابيهم تشوف اخيتك هالضلت لا ام ولا اخو
- شسوي جده كل ماريدهه تسهل تصعب بالزايد وهالسنه ربج
سهلهه عليه واجيتكم وبعدين اخيتي انه مو خليتهه بامانتج كتلج
انتي امهه شلون تكلين مالهه ام
- يااه يامدوهر فلك طرك كون شلون سواهه فراره عليه
- ههههههه يااابويه شكثر مشتاااك لسوالفج يامطره
- استحي يولد شيباتي ملت راسي وتكلي مطره
- مطره مطورتي يمه العجيزات  الحليوات
- دنجب يخايب شني بزر السنتين جدامك ومادري يااه علينه
شهاب ومدوهرته النوب
- هههخخخخخخخ ياخايبه غير احبنج والاشيج هاي كايم
وعايفج ضلي هيج تصفني لا منا ولا منا كتلج اخذج من جنتي
بحيلج اشمرج على فد شايب تركي مارضيتي هاي عجزتي
وضليتي تحسرين
- دهر صابك يامصخم امش منا اممششش

طلعت وانه اضحك لحجيهه حيل احبنهه هالجده ..
صار الغده ومدو السفره عله طول المضيف والديوانيه هم
مدو سفره بيهه والي بره هم حطو صياني للجهال والاكل
كفى وزاد انه نزلت جتيل عله الاكل .. هَيج تشاريب وثريد
ولحم هبر عله التمن انه ادورهن دواره بووووياي اريدن
معده ثانيه تكفي اشبع بس ماريدن اشبع هيج اريد اطلع فرق
السنين ... عود انه جنت كله اكل صحي ونظام ولا دهون
وبالك عنه اجيت هنايه طيرت ابو النظام حسويلي كرش
من بره هالتمن كل وجبه اكله ...

جابولنه الجاي شربنه وحجيه منا ومنا ونعيم كاعد بالمضيف
ويعاينلي ويدنك كل شوي انه بعدني حاير بامره مادري شسوي
وياه لجن خاف يموت واضلن بعذاب الضمير واخافن من الجاي

الشيخ جلى صوته والكل سكتت تسمعه ...
- يا جماعه الخير والبركه هاليوم انه مفرحتني لمتكم وهالوجوه
الطيبه انه استبشر بيهه واريدن اصفي فرد حساب قديم
وهالخيرين انه رايدهم شهود وكلهه طبابه خير بين هالزلمتين
شهاب ونعيم

من ذكر اسمنه انه عاينتله راساً وهوه ضحك ورجع دار
وجهه للوادم ..

-هالدنيه فانيه يولدي واليوم اليروح مايعود الا بسنه وانتم
صارلكم جثير متفاركين عليش كسوه هالكلب ياشهاب انتم
اهل والبني ادم خطاء وربك يسامح احنه شني ومنسامح

- يا شيخ انه مسامحه ومابكلبي عليه شي وانه كلتله هالحجي
مو صح يا نعيم

- اي صح ياشيخ هو سامحني لجن ماراضي نرجع صحبتنه

- اهاااا دام هيج السالفه كلبك ماصفى من ذيج الايام ياشهاب
لو ان كلبك مابي شي عليه جان ماكعدتكم هيج صارت

عاينتله والشيخ ضل مصفن بوجهي وبعدين نفض عباته وكام
كلهه كامت لكومته هاي عدنه معناهه الامر انتهى والشيخ يامر
هنايه وانتهى تمشي الجلمه بعد بلايه نقاش ...

- هالساعه لو اتصالحون جدام هالوادم لو تطلعون ومالكم رده
لمضيفي المايحترم الجبير ويحسب حساب الكاعدين مالفيه عندي

كالهه بحزم وعينه تعاين لجدام مو علينه انه استغفرت ربي
ومشيت لنص الديوان واشرت بايدي لنعيم يكرب وهوه اجاني
مدنك وحضني وحضنته ضل يبجي ويضغط عله جتفي جان
يتشاهك مثل جاهل وانه اطبطب عله ظهره ... هالساع يله
حسيت بخفه بكلبي جنت هذيج السنين كلها اكولن نسيت وماهتم
لجن احسن بفراغ بعده والعتب ضل مكتوم بصدري وماخفت جمره لليوم بالمسامح يله انمسح كلشي من كلبي وردت روحي
خفيفه ....

- نعيم بسك يااخيي بسك كطعت نياط جبدي ببجيك
- ياخوي انه جنت احلم بهاليوم سنين ،،جثير انه الومن نفسي
وكعت الدنيه من عيني يوم الدرت ظهرك ومشيت وهديت الديره
- هاي رديت وتصافينه
- يا صاحبي خلك بايامي الاخيره وياي انه ماريدن غيرك يجفني
- اذكر الله يرجل عمرك طويل ان شاء الله امشنه نطلع لمكانه
مثل كبل امش

رفع راسه وضحك مسح وجهه وتشكرنه من الشيخ وترخصنه
وطلعنه للشط يم النبكه وين ماجنه نتعلل ايام كبل ..

- نعيم عليش ماسافرت تعالجت
- الوالد تمرض وتعب والشغل يادوب يكفي البيت وعلاجه
واخوتي كلمن تزوج وحار بامره
- وانته ليش ماتزوجت
-ماحلت بعيني مره ياخوي كل ما ارد امشي عله مره واذكر
ماتحضر عرسي ابطل وهاي ضليت هالضله وبعدين اجاني
هالمرض كملهه علي
- محلوله ان شاء الله
- انه ماريدن شي من هالدنيه بعد دامك رجعت تحاجيني
ورديت للديره اشوفنك كل يوم هاي نعمه من الله لاريدن صحه
ولا مره ولا جهال
- ههههههه شني عاشكني ومادري
- اااخ دولبتني الدنيه بفركتك ياخوي احجيلي شني اخبارك
- انه قدمت عله تحيليلات مرضيه بتركيه وهاي بعدلي سنه
واتخرج
- هاا يعني هم ترد لتركيه النوب
- اي فد ثلث اشهر وارد اكمل السنه واردن هنايه
- هااا وشلون عايش هناك
- اكو شقه مأجريهه وياي ولد اثنين واحد من بغداد وواحد
تركي هم يدرسون
- هم تشتغل هناك لو شلون
- اي جا شلون اصرف عله نفسي خما اعيشن براس اهلي
هناك اشتغل انه ووليد الوياي بالشقه بمطعم حلويات
نشتغل بالشفت المسائي وكبل اشتغلنه باسواق مركزيه
ومرات بمحطات البانزين وين مانلكه شغله مسائي نروح
نجيت عليهه هم نكضي وكت واحنه اثنينه نحجي عراقي مايفهمونه نضل نمسلت بالحجي عليهم لحد ما نمل
- ههههههه والله من يوم يومك جادود

جريت نبكات مسحتهن من التراب وانطيته وضلينه ناكل نبك
ونسولف لحد العصريه كمنه افترينه بالبساتين وبعدهه رحت
عله اهله سلمت عليهم وتعشيت يمهم وحلف الا ابات الليله عنده
وضلينه الليل كله نتسامر مثل كبل وامه كل شويه جايبتلنه ماعون
فواكه وحب وونضل ناكل وماحسينه الا على اذان الفجر صلينه
ونمنه ....

ثاني يوم رديت لبيت الشيخ طبيت سلمت عليهم وكعدت جان
يخابرني وليد طلعت بره احاجي وكلساع مكطوعه الشبكه
عاد كالولي اصعد للسطح تجي شبكه اقوى ورحت صعدت
خابرته ..
- هلا ياخيي شلونك
- وينك عيني نسيتني شنو لاحس لا خبر
- والله ملتهي هنايه بين الاهل كلهه ملتمه ومالحك احك راسي
- هااا زين زين احسك فرحان ونفسيتك مرتاحه
- ايييي بالله هيج صدري منشرح ارد اكلك سالفه
- ايي يالله كول
- اريدن تدورلي عله دكتور زين عندي هنايه صاحبي مريض
بسرطان الدم من سنتين ووضعه تعبان شويه
- لاااه
- اي والله انه ادري بيك كدها يالذيب روح فرلي بغداد شبر شبر
وشوفلي يادكتور براسه خير واحجز
- اي تدلل غالي والطلب رخيص اتغده واطلع ادورلك
- ماتكصر بعد اخوك ماوصيك
- لا يمعود شنو السالفه بغداد مزبلين بيهه الدكاتره هسه افرهم
فر واجيبلك اغاتهم صدك جذب هلااا وتجي بيتي تكعدلك شكم
يوم بووووويه يوم السعد هذا
- هههههههههه هسه خايب الكه هالدكتور وعود اجيك
- اكلك سده يلا خلي اروح اخابر عمي هو يعرف بيهم اكثر مني
حتى يدليني عله الزين بينهم يلاا روح
- الله وياك يبعد اهلي
- تلوك تلوك ياابن منذر
- لوتفاً ويليد لوتفاً
- ههخخخخخخخخ خرب بحظك ذكرتني بزين المكرود هسه
ضال يتصفن بالحياطين وياكل بهالجبس
- ههههههههه يابويه مشتاكله بعلي هالصغيرون
- من تجي نشد رصيد دولي ونخابره
- اي ان شاء الله يلا روح حيخلص رصيدك
- ديلاا مع السلامه
- هلا بيك

سديته واجيت انزل اسمع بنات يتبسبسن .. هاذ التركي هنايه
يااه شلون حلو يحجي

ضحكت وكلت .. احمم احمممم
ودفعت الباب هنه شليع ركضن ماشفت غير الباب انسدت
نزلت اريد اطلع من المطبخ صارت بوجهي ربى عاينتلي
ورفعت حاجبهه واندارت ومشت شكد اكرهه هالحمره هاااي
بويه ولا اهضمها هيج جنها جالي عله المعده تضل محمضه
.
.
يتبببع 🍁