رواية من فجر ديسمبر الفصل الثالث والثلاثون 33 - بقلم Zoka 🌷

من فجر ديسمبر
🍁
🍁
مشى الشيخ وانه ضليت انتظر عمي حاتم بين مااجوي عمي سالني شني شعدكم كتله الشيخ وصاني اخذ ربى والحكه كال الله وياكم ومشينه
سوه ورحنه للكاع جان مامش شي هناك الكاع
فارغه تصوصي وولد عمنه كلهم حاضرين هناك
والشيخ كاعد بسيارته ومن شافنه وصلنه نزل
وعينه بتلفونه .. اجه ليمنه ...

- ها بويه شمسه كواج الله
- الله يكويك شيخنه شلونك
- نحمدالله بنص الخير
- دايما ان شاء الله ،، شنو شيخي شو الكل مجتمعه هنا اليوم اكو شي ؟شو شهاب استعجلني بالجيه
- اي بويه فرد سالفه هنايه صايره لاجل عينج
- اني !! شنو هي
- اصبري شوي عله ما تصل
- شيخي شنو كولي فدوه
- هسه تعرفين بس صبرج دكايك
- ماشي

رحت يم الولد وكلهه تسائل شني المضموم ؟؟
لحد مااجتي سياره بيكم من هاي الجبيره اجتي
طبكت بسد سياراتنه وعاينت شني البيهه واشوفنلك
هذيج المهره التعجب كبل درت عيني للشيخ مامصدك لهالدرجه هوه وياهه ...
يعني يهديها خيل !!!!!!

جانت ربى بس فاتحه حلكهه وصافنه عله الخيل
والشيخ يحاجي صاحب السياره وسلم عليه وودعه
وذاك مشى والخيل لجامهه بيد الشيخ جرهه وجابهه ليم ربى وكال بصوت عالي ...

- مهرتج يا شيخه
- يااربي شكراااا شيخي ياروحي يالله ماعرف شحجي والله متفاجاه يعني مادري شكول كدام
حبك وكرمك هذا كله وياي
- جا انتي هم خليتي لساني يعجز جدام هذيج اللوحه
- بس هي قليله بحقك كلشي بهالدنيا قليل بحقك شيخي
- وانتي شني شمس الشيخ شيخه البنات انتي كلشي يرحص لعينج .. هاي المهره اجتني هديه من عشيره من اهل السماوه شيخهم عنده حلال خير من الله يزيدله ويبارك بي كالي احنه نعز غالينه بهديه راد يهديني مره رفضتهه عاد كال المهره بدال المره وانه كلت شسوي بالمهره مالي حيل اركبنهه كلت ماتلوك غير لشمسه واجتي عدله عبن انه جنت حاير شلون اردن عله هديتج
- والله مو حاجه تردلي شي بس اشوف فرحتك كافي
- ههههه انه فرحتي بفرحج تكمل

جانت الخيل تصهل وتحرك بنفسهه تريد تمشي
وخبصت الدنيا عاد اجوي جم واحد من ولد عمنه
عليهه يريدن يهديها ويكضها ماتهدا تصههههل
وصوتهه يزرف الاذن عادربى كالت ..
- عوفوهه الي
- بويه اخافن ترفسج لو يصيرن شي لج
- لاا شيخي هي بس خايفه
- شعرفج بيهه
- احساسي

كربت ليهه والخيل بعدهه تصهل عاد ربى وكفت
جدامهه وتجر براسهه وهذيج معانده لحد ما ضلت
تمشي ايدهه عله ركبتهه وشعرهه النازل تلعب بي
ويم عيونهه وبين اذانهه لحد ماهدئت شويه كربت
ليهه وحضنتهه والفرس هم براسهه كربتهه ليهه وضلت هيج مخليه راسهه وره جتفهه وربى تمشي
ايدهه برهاوه عله ظهرهه وتمسد شعرهه ....
كلنه صفنه شلون هديت هالشكل جا مو بس انه
الي اتخدر بكربهه ولمستها حته هالفرس مثلي
والشيخ بكربها يهدا وكل من كربها مايصدن عنهه
بيهه شي سحري نفسي اعرفنه !!!!!

وخرت شويه منها وضلت تضحكلهه والشيخ كال
- شتسمين مهرتج ياشمسه
- الهيام شيخي هاي صارت هيامي مهرتي الهيام
- والله والنعم من هالاسم انتن اثنينجن همتن من اول ساعه زين هالاسم جاي بالمضبوط
- لولاك شيخي مايصير هالهيام الشكر الك بكل شي
- تدللين انتي غاليه ويرخصلج كل شي ... هسه
اريدن من بينكم ياشباب خيال لمهره شمسه
انه جمعتكم حته اشوفن من منكم يتكفلهه ويعلم
شمسه ركوبهه
- كلنه حاضرين شيخنه
- زين اريدن هسه كلكم تجون هنايه الا شهاب
اريدنه يمي
- شني عليش شيخ
- انته مامشمول بالخياله
-شننني !!! انه اولى من الكل شيخنه
- تعال ليه
- شيخ
- يامصكوع هوه انته كادر على مهرتك هاي !
روضهه بالاول وتالي تعال صير خيال للهيام
-شيخنه ماتحمل انه غيري يمهه
- اركد واسكت جلمتي ماتغير ... يلااا ياشباب
شوفونه همتكم
- شيخي كلهم يعرفون يركبون الخيل
- اييي كلهم عبن ولدنا من الصغر نعلمهم خيل وسباحه ورمايه هاي لازم تصيرن عد كل رجل
وولدنا سباع كلشي يعرفون
- اي والنعم من ولد عمامي رجال ماكو مثلهم
- انتي المن تريدين منهم
- الي يكدر يركب الهيام بخفيه ويمشي بيه عشر خطوات هو يصير الخيال
- هاي مثل ماتردين يلا منهو يبدا بيكم

بدا بيهه ابن عمي حميد الجبير وكدر عليهه
وراه كل ولد عمامي منهم الكدر ومنهم المارغبته الفرس لحد ماضلو الكدرولهه بس ٣ وعاد هيه
اختارت منهم ابن عمي جاسم اسمه سلام يطلع بعمر الثلاثين خوش كدر يداري المهره بخفيه
ورهاوه موش جبر وقوه ...

- يا سلام من اليوم اريدنك تشوفلك جم واحد وياك
وتسوون مجان للهيام هنايه عبن انه اريدنهه تضل
هنايه وشمسه يمتى مايعجبها تجي وتركبها هاي
كاعها ومهرتها وبكيفهه

- ان شاء الله شيخنه تامر

- وشغله الثانيه اريدن باب وقفل زين ماريدن احد
يصلها وانته اختارلك واحد من ولد عمومتك تناوبو
عليهه ماتنهد وحيدهه بالليل اخافن كلشي يصير والكاع جول هنايه خذوها ومشو شلون شنسوي
فاريدنكم تناوبون عليهه .. هاي بعد سلام انه سلمتك هالامانه تصونهه زين

- زين شيخنه بعون الله اصونها

- ان شاء الله .. يلا شوفو شتحتاجون وتعالو ليه
بالديوان نتفاهم ..

- ماشي شيخنه

- شمسه بويه تجين لو تضلين هنايه

- لا اريد ابقى يم المهره شويه

- زين زين ..شهاب ديربالك عليهه

- بعيني شيخنه

الشيخ اخذ سيارته ومشى وانه ضليت ويه ربى
كاض لجام المهره وهيه تمسدلهه وفرحانه بيهه
- مهرتج حلوه مثلج
- اييي بس حرامات مو بيضه
- لااا المهره بسوادها تعجب وهاي سوادها ليل
من تتعلمين عليهه تشوفين شلون ركبتها حلوه
وشلون كويه هالمهره
- امممم ،، تعال جرب اركبها
- لااا مادام الشيخ مارادني من الخياله مااصلها
- بس هسه داكلك بس اركبها شويه
- ابد نفسي ماتدنالها بعد
- كيفك انته الخسران
- تصدكين هالشيخ صفني بهداياه لج
- ههههه لعد شعبالك شيخي كريم اسم على مسمى
- انه متعجب بشغله شلون كدرتي تهدين المهره هالشكل يعني بلمستين منج لانت وهديت
- ههههه ايدي مباركه
- لااا من صدك انه متعجب شنهي الي بيج هالشكل
ويخلي كلمن تكربيله ينصاع لج هسه الشيخ عليش
ما خذاها للريم عليش يمج يرتخي وحته الريم بجيتهه ماعوضتج
- الريم لو هاديته  مثلي جان ردلهه بالمثل مو سمعته كال رد لهديتج
- زين هاي فهمناهه... انه عليش هيج متسودن بيج
هم بايدج اسكن وانسى روحي
- امممم
- شني اممم
- قبل اول عركه النه انته جنت مسوي شي اني ماارضاه لو عرفت ؟
- عليش هالسؤال
- ماراح تجاوبني
- اجاوبج بس فهميني عليش تسالين
- حتى اشوف شنو علتك بالضبط
- يعني لو انه مسوي شني الي يصيرلي
- مثل ماصايرلك هسه
- يعني حبي الج. !
- يمكن مايكون حب يمكن وهم تخيل تمني مو بعيده صح !
- يعني جاي تشككين بحبي !!
- لو تجاوبني حتى ابطل شكوك
- شلون تبطلين الشك بله فهميني
- اني بس اعرف شغله وحده وابطل شك ويجوز
حالك هم يتغير بس كولي اي لو لا
- اي
- هااا شمسوي واني مادري !!
- من تكليلي شنهي الي بالج اكلج شسويت
- اممممم يلا مو حاجه اعرف شنو المهم توضحتلي الفكره
- ربببى انتي لا تذبين جلمتين وتمشين فهميني شني السالفه
- تدري اكثر شي مااحبه بيك هو عدم فهمك لكل شي وتريديني اني افهمك .. جرب تشوف غير الي تشوفه وراح تفهمني بدون حجي .... خلي نرجع
للبيت اريد ارتاح شويه
- يجيج يوم وتكعدين تحجيهن وحده وحده
- اممم ،، صيح سلام خليي ياخذ الخيل وخلي نمشي عفيه تعبت من الوكفه صار شكد اريد ارجع
- امشي للسياره هسه اجيج

اخذت الخيل وانطيتهه لسلام ورحت للسياره
ماحجيت شي وياهه خلهه تفكر براحتهه وتشوف
هذا حبي صدك لو وهم مثل ماتكول حضرتهه !!

للمغرب جابو الخيل ربطوهه بالمراح وخلوهه تاكل ،منا لحد مايحضرون المجان ليهه هناك

مشن هاليومين والولد كل شغلهم بهذيج الكاع لحد
ماكملو وسولهه اسطبل واخذو الخيل هناك وبمثل
اليوم العصريه راحت ربى وزهره ويه سلام
حته يعلمهه ركوب الخيل ....

انه جانت الف حسبه وحسبه بالي عليهه اخافن حته لو يكضن ايدهه لو يكف كريب منها عكلي شاش
عليهم وجان اروحن وضليت واكف بعيد واعاينلهه
شلون راكبه ع الخيل واللجام بيد سلام ويتمشى
بيهه شويه شويه ...

اجتي يمي زهره وكالتلي..
- خويه اشو جنهه حلوه ركبتهه انه هم اريدنلي مهره جا شني بس ربى عدهه
- عجبتج ؟
- اي خويه حيل طبعت بالي حاجي ابوي يجيبلي مهره هيج حليوه مثل هاي وانضل انه وربى نتسابك بيهن
- صار ماتغلى عليج خيه انه حدورلج يمتى ماالكه اجيبن لج زين
- يبعد رويحتي ياخويه يمااي شكد احبنك
- هههههه رويحتي انتي خيه شعندي غيرج
- اكولن خويه صدك انه ماحجيتلك هاذ ابن حرمت الشيخ الجديده
- لابان شماله!!
- اي هاذ مدري شنهو من اسم اسمه
- هههه لج هاذ يعني ابيض
- هاااا مثل خشته البيضه ،، غددي شكد اكرهنه
- شماله شمسوي
- ها هاي من شاف المهره بالمراح ضال يحوم
حواليهه جان يحاجي محمد كايله هاي شكد سعرهه
لو تنباع ؟ محمد كايله ماعليك بهالسوالف وهاي موش للبيع ولا تمدن ايدك عليهه هاي خاصه بالشيخ عاد هذاك ضال يتصفن عليهه  ومعاجبه الحجي انه كلت اخافن يسونله سالفه كلت اكلك
تاخذ الحيطه عليهه
- هااا والله انه هاذ المصكوع من اول ماعاجبني
اعرفن وراه بلاوي لجن زين سويتي وكتيلي عليه
- اي خويه حته سلام هم كِله
- الله كريم ... تعاي اركبج عليهه شويه طلعيهه من نفسج
- اااييي خويه فدوه رحتلك
- ههههه امشي يلا

جانت ربى هستوهه نازله من عليهه وزهره كالتهه
تريد تجربهه وهيه ماعارضت ...عاد انه ساعدتهه
وصعدت عليهه واخذت اللجام ومشيتهه شويه
وهيه كلساع يماي حكع من عليهه حتفصخ اخافن ترفسني شلعته لكلبي لحد مانزلت ...

- يمااااي شني هاي جني جنت عله جبل ماريدن خويه لا تجيبلي ويني وين هالسالفه انه
- هههههه شو بدلتي رايج موش كبل ساعه تنكين عليهه
- لاا لاا ماريدنهه يماي اخافن انه جا شني ساعه الساعه اكع ويتكسر طولي شكولن شحجي خلني هيج يمتى ماتطخ بالي عود اجي اركبهه دكيكتين
واطلعنهه من نفسي
- كيفج موش تكلين اخوي مايجيبلي هاي انه كتلج بعد
- لا خويه ماتكصر اريدنك سالم
- يسلمج الله خيه ،، امشي صيحي ربى ويلا نرد البيت غربت الدنيا
- اي يلا رايحه

مشت جدامي وراحت صاحت ربى الي جانت
ويه سلام مادري شتحجي وانه ضال بالي عليهه
وبالكوه كاض نفسي عنهم لا اكطعنهم باديني
مشينه سويه للبيت ...وانه حجيي وياهه عادي
عله كد جم سالفه ..

وره جم يوم جنت راجع من الزرع وشفتهه هستوهه مشت ويه زهره وسلام وكلت هذن
اكيد رايحات للمهره .. عاد طبيت سبحت ومشطت
ولحكتهم من وصلت اشوفنهه تسابك الريح بمهرتهه .. تفاجات هاي يمتى هالشكل تعلمت عليهه ؟؟؟ والمهره تجي بايدهه منين ماتجيبهه
وضحكتهه عاليه وجهه اجتي ليمي ووكفتهه وهيه
نفسهه سريع وعالي ...

- شلونك ابن عمي
- بخير الحمدلله ،،، ماشاء الله بساع تعلمتي عليهه
- اي .. سلام كل يوم يركبني عليهه مرتين لو ٣
لحد ماتعلمتهه سهله
- والله لايكلج ركوب الخيل ياربى تاخذين عكل اليشوفج عليهه
- ههههه مبين اخذت عقلك
- من زمان انتي ماخذته لجن اليوم فجرتي بي الشوك
- اممم
- بعدج تشكين بيه ؟
- لا تاكدت
- شتاكدتي !
- بعدك ماتحبني
- شننننني!!!!!
- مثل ماكتلك صدكني ويجي اليوم واثبتلك بي
- شتخربطين انتي
- مو خربطه بس واقع ... من رخصتك

دارت مهرتها ومشت وخلتني بالحيره والحركان
كلب .. جاا انه شني الضال ومسويته ليهه وهالشكل تجي تحجي !!! شني اثبتلك شني ماتحبني!!!! هااي فاصل عكلهه اكيد .. جا انه كل يوم ببعدهم يمرن علي بسنه والغيره حاركتني عليهه وساكت لاجل ماضيك خلكهه وتجي تكلي ماتحب ؟؟؟؟؟

عفتهم ورديت للبيت كعدت بالحديقه ادخن وصافن بهالسمه جان يجيني ابوي ...
- هاا بويه رجعت تصفن
- جا وين اروحن
- شني الشاغل بالك .. العشك!
-ههه لاا بويه
- ولواا جا تجذب علي موش اعرفنك من كبل
عليش ماتخليني احاجي الشيخ ونخطبلكم
- لا بويه شني السالفه
- اااي جا ضال معلك البت عليش لا انته المتزوج
وماشي بدربك ولا المخليهه تمشي بدربهه ضالين مربطين اثنينكم عليش !!
- بويه انه مافجن نهوتي وربى مالهه غير دربي
- اي انه ماعارض ربى تصيرن جنتنه بنيه والنعم منهه فاهمه وحليوه ومثغفه ومنا وبينا وعزيزه اهلها اتمناهه اليوم كبل باجر تصيرن بينه واحنه كلنه نحبها جدتك واخواتك واخوك كلهه تحبها
- اي بويه اعرفن بس هيه ماترضى تتزوج شلون اغصبهه علي ماترهم
- بويه خلني احاجي الشيخ وهوه يتكفل بهالسالفه
ويكنعهه اكله البت نريدهه والعمر جاي يمشي
وانه احاول وياه وهوه اخوي مايردلي طلب
- لاا يابويه انه اريدن بقناعتهه هيه موش بضغط من اهلهه خلهه للايام هيه توزنهه بعكلهه وتجيني
انه واثك بهالشي
- واذا ضلت بهالخشم اليابس شلون
- اي اضلن عله جلمتي وياهه انه كايللهه مالج درب غيري خلهه تاخذ هالسنين كلهه وكت ليهه
تاليهه تردلي
- والله مادري شني ضامنلك لجن هاي حياتك وانته حر بيهه مدامك واثك منهه كيفك نصبر ونشوفن تاليهه وين تصفى
- الله كريم

ومشت الشهور وانه عمامي كل جم يوم يدزون علي خلنه نحاجي الشيخ ونعقدلكم عيب تضلون هالشكل .. وانه اسكتن بيهم ماريدن اجبرهه علي
اريدنهه برضاتهه تجيني وتشوفن حبي ليهه وتحس
بيه مثل احساسي بيهه مااجيبنهه غصب ...

جانت كل خميس تجي لينه وتضلن مكابله المهره
وكاعده ترسملهه وتغسللهه وسلام وياهه وياهه
من الزين انه متزوج وعنده ولد وانه ناهي عليهه
جان ضليت اخافن يحط عينه عليهه واسويلي مصيبه ويه هالشيخ جيف يخلي يمهه ....

كل مااريدن امشي لبغداد واكمل اوراق المختبر
ابوي يعرضلي صارت بي خوفه .. وماخلاني اروحن حط علي يمين وماكدرت امشي بعد
وضل هالمختبر ماانفتح .. الاجهزه ماكدرت اجيبهن اله بهالاوراق وانه مامسويهن وضاع
من ايدي الايجار هم ورجعت للصفر بهالمختبر
الاكشر الي شلع روحي وماجاي يدبر ...

جنت متعارك ويه ابوي هم موكفلي شغلي وهم
ينك فوك راسي عله سالفه النهوه عبن عمي حاتم
يحاجي بالختله حته يخليني افج عنهه جيف ابن خالهه بعده يريدهه وبعده يحاجي حته يشوفله حل
ومناك امهه مفلفله عليهم وخاليني بين نارين يا تتزوجهه يا تعوفهه لابن خالهه وانه اثنينهن ماكدرلهن عاد تعاركت ويه ابوي وعمي كاظم
هم لين جان صاف وياهم وتكاطعت وياهم شهر
همه زعلو مني وانه طكت روحي من نكهم
عمي حاتم وجهه ثكيل علي وحرت بامري
كلت اروحن احاجيهه بلكت تلين شويه ...

جان يوم جمعه بشهر ال١٢ وهيه بيتهم ..
انه اعرفن وكت طلعت عمي من البيت واستغليت هالوكت ورحت ليهم ... طبيت سلمت عله مرت عمي والولد اثنينهن طالعين جانو عاد كعدت اشرب جاي واجتي مرت عمي يمي كعدت...

- شلون اهلك يمه شهاب
- بخير عمه زينين ..عمي يتاخر
- اي معزوم على العشه كال من يخلص شغله يطلع ويه جماعته
- هاا خير ان شاءالله ،، اكولن عمه انه اريدن احاجي ربى شويه ماتصيحينهه ليه شويه
- والله ياعمه ربى نايمه من بارحه لحد هسه العصريه ماترضى تكعد
- هااا شعجب خاف مريضه
- مادري تكول تعبانه اريد اشبع نوم
- هاا زين اكدر اشوفنهه بلكي تكعد لازم احاجيهه
- خير شعدكم
-سالفه
- هاا .. دكوم اصعدلهه شوفهه بلكي تكعد علواه
هم تجي يومين وكلشي ماشفت منهه
- هسه انه اكعدهه الج لا تخافين
- يلا الله وايدك

كمت صعدت لحجرتهه ودكيت الباب متجاوب
عاد فتحته وطبيت .. جانت فارشه بالكاع ونايمه
متلفلفه بالبطانيه ،،كعدت يم راسهه وشلت الغطى
من وجهه فتحت تك عين وعاينتلي وردت جرت الغطى لوجهه ..
- كومي احاجيج
- شهاب متشوفني نايمه بعدين
- الينام ساعه ساعتين موش من البارحه لليوم
- نعسانه عوفني
- اكعد جاي اكول ..ربببى بالعباس اذا ماكمتي هسه اشيلج وانزلج
- افففف شكو شكو هسه شعليك بيه عوفني انام ماعندي شي
- مو جاي اكلج اريد احاجيج .. يعني انه جيتي عليمن جا غير عليج
- اممم

نزلت الغطى وخلته بس عله صدرهه وعاينتلي
وانه صفنت بحمار وجهه وشفايفهه وهالركبه الزبده بدون شي انه ميت عليهه النوب اشوفنهه هالشكل مكشفه وبس خيطين من الملابس عله جتافهه بوخت كمت ماعرفن شحجي ..
- يلا كولي شنو تريد نحجي
- ااا كومي البسي شي وخلي نكعد نحجي مثل الاوادم
- زين لعد دير وجهك لو تنزل
- لا حدير وجهي يلا

انداريت وعفتهه تلبس وانه امسح بالعرك من كصتي اتهستر عليهه بالعباس مادري شيجيني هيج

- تعال اكعد هنا واحجيلي شنو
- اول شي كليلي شمالج متضايكه
- مابيه شي
- لاا انه اعرفنج من تنامين هواي معناه متضايكه لو راجعتلج هذيج السالفه مال الارق
- لا بس جنت تعبانه من الدوام وهذاك الاسبوع كله امتحانات وماانام بس ساعتين مادري ليش مايجيني نوم فمن رجعت هنا حسيت بنعاس قوي
وردت ارتاح اعوض هذيج الايام
- هااا اي هسه شبعتي نوم كافي صار يومين
- اي
- ربى اجيت اريدن اكلج سالفتين
- اي شنو
- حاجيني بصراحه بعدج تشكين بحبي لج ؟
-شهاب
- ربى انه جاي اتعب من هالشي بالله العظيم انتي ماتعرفين شلون انه متعذب هسه انه ماريدن منج شي ولا اعتب عليج بشي بس فهميني عليش تشكين بحبي بشني انه غلطت بي هاا شني شفتيني مجاوز وياج بشي صديت عنج وكت احتاجيتيني
كصرت وياج بشي عيني مااحاطهه عله بت غيرج
عليش تشكين بيه
- مادري شهاب احساسي يكلي هذا مو حب
- جا شنهي الحب عندج فهميني
- مادري شمعرفني شنو الحب
- ربى جم دوب انه اضلن احاول وياج هاي بعد جم يوم حنطب بسنه الخامسه وانه طبيت الثلاثين
فهميني شلون
- شهاب ماكدر افهمني
- عليش بس فهميني علييش
- عوف الموضوع
- ماعوفه انه اليوم جاي اريدن حل ربى انه تعبت
شوكي عليج ذابحني وغيرتي حركت كل اعصابي ودافنهه بيه ماريدن اضيك خلكج واتعارك وياج
بله العمر يمشي فدوا الج هالسنين بس كون الكه نتيجه منج اريدن لو مره وحده بحياتج تكفين وياي
اصبرلج خمسين سنه بعد اذا تردين وكت وترتبين امورج ونفسيتج وتتخرجين شني الي تردي حاضر انه بس كون تكليلي اصيرن الك .. بس انطيني جلمه ..امليني بشي .. كليلي تعبك هاذ مايضيع بس اصبر علي وحك العباس اصبرلج عمر وماسالج بعد عله شي وروحي سوي الي تردي بحياتج
ماكلج عله شي بس كون تردين ليه كون يجي
اليوم الي  اغفى بي واصحى عله ريحتج
- شهاب شلون انطيك كلمه واني مارايده هالشي
ماكدر هواي شغلات متخليني اكدر املك على شي
- يعني انتي مارايدتني !
- ارجوك
- جاوبييييييني
- اي

هجست جن نار وشبت بضلوعي بجلمتهه هاي
كمت وضليت افتر بالحجره وافرك بوجهي عاد اجيت ليمهه وهيه جانت واكفه يم الشباج ..

- بعدج تردينه لهذااااك موووو بعدج تحلمين بي
بكل ليله وتصحين عله فكرج بي
- شهاب كافي ارحوك
- جاااوووووبيييني بعده ساكن احلامج .. لااا يجوز لكيتي
- شبيك شهالحجي
- جااااا مدامج مالاكيته ولا تعرفينه عليش هالاصرار عليه !!! علييييش فهميني .. دم كلبي
حطيته لج وماترضين صبرتلج سنين وماترضين
ولا يغزر بعينج وهاذ حلم هيييج بس حللللم وفكره
ومجلبه بي وترفضيني علموده !!!!!!!
- ماعليك بيه اني احلم اريد ماعليك
- انجببببي لج انه عمااامي واهلي كاطعتهم علمودج ،. شهووور وانه كل يوم اتعارك وياهم
وصادهم كلهم واكلهم مااغصبنهه علي برضاتهه
اخذهه وماريدن افج النهوه لين اعرفن بيج ماتردين
هذاااك ابن خالج وضاله تحامين بيه عليه لج ابوووي ابوووي كاطعته ولساني ماطخ لسانه من شهر لين اكله اخليهه براحتهه وهيج اتجازى !!
- عوووفني شهااب عووفني لاتسويلي شي كلشي ماريد منك بس عوفني
- علييييشششش تردددددينه عليييييش
- لك بالكيف هو اليحب بالكيييييف
- جااا انه عليش حبج مو بالكيف عندي عليش ضال مسموم بي لااهوه المهنيني ولا الكاتلني ومخلصننننني
- عوووفني داكلك عوووفني مااريدك عوفني
- لج علييييش فهمييينننننني عليييييش

جنت كاضهه من زندهه وحاصرهه عله الشبج
وبالتيد الثانيه ضربت الجامه من وره البرده تكسرت وهيه عاطت رديت من حركه كلبي
ضربته من فوك مره الثانيه وهالمره نبتت الكزازه بايدي .. نزلتهه نفضتهه حيل وتطافر الدم منهه
وربى جلبت بهدومي وتبجي عاد جريت ايدهه
عتيتهه وكلتلهه ...
- وروح امي يوم الاسمعن بي جايج ابو نجمه
ماحاجيج شي كبل اذبحه واخليج ادوسين عله دمه
جوه رجليج انه احطه مكطع وهاذ قسم علي ومو رجال ولا علي هالشارب لو اخلفت بهالقسم
- لك خبلتنننني عوووفني معليك بحياااااتي معلييك
مااريدك اطلع من حياتي
- ويطبببببج مررررض لاتردين ماضاله بس عليج
- لك انته ماتفهم عمرررك ماراح تفهم
- من اليوم انه الي مااريدن افهمج وخاف كبل جنت اكولن اخليهه عزيزه احبيبتي اتزوجهه عزيزه ماجيبنهه نهوه لجن من هالساع انتي كسرتي كلشي وانتي الي حتندميييين وراسج اليابس هااااذ اكسسسره وتحملي كلشششي من ايدددج

دفعتهه للكاع وعفتهه تبجي وطلعت نزلت وانه
النار تطلع من عيوني واشوفن يم الدرج واكفين
عمتي وحيدر درت وجهي عنهم ومشيت طلعت كبل للشارع اخذت سيارتي ومشيت ... اهجس
راسي راح يطك من الاعصاب وايدي كلهه دم
رحت للبيت ..طبيت كعدت بحجرتي وصحت عله زهره اجتني تركض ...
- ها خويه ... يااايمه اسم الله شبيها ايدك ياخويه
شمالك شنهي الصايرلك
- تعااااي دااااااويهه وسدي حلكج
- اي اي خويه صار
- تحررررررركي
- اي اي اجيت

اجتي كعدت يم رجلي وجرت ايدي اداويهه وانه بالي بعيد صافن عله حظي الجابني عله هيج وحده بلايه احساس كلبي رغم كلشي يريدهه كل هالتعب
والصبر وتاليهه ماتكدر شي !! ولا كلبها رف علي
ساكنه غيري هذاك الماينعرف اصله منين ملكته
كلبهه بلايه شي وانه الدفعت عمري لعيونهه ماتشوفني

- خويه كملت
-زين
- شمالك يابعد بيتي هالحزن عليش
- اطلعي وعوفيني
- ياخويه مايصير هالشكل
- زهرررره امشي طلعي بررره يلااا مالي خلك احد
- صار خويه صار

كامت طلعت وانه كبل جريت بلوزي نزعته وشمرته كلشي اهجس يخنكني وجسمي صاير نار
راسي اهجس صاير هالكبر وعروك ايدي راح اطك .. كمت شربتلي حبايه وجع راس واجيت
تمددت ومطفي الاضويه ومغمض واكول لو انه
ماراجع هذيج السنه ،،،لو ماكاعد هذيج الليله جان
ماسكنت بالي ومنهه تسللت لكلبي وضيعتني ..
بس هاذ حظي وقدري جابني عليهه من بين خلك
الله كلهم ماحبيت الا هاي !!!!

ضليت اكل بروحي من الملامه بحبهه والجكاير مانزلت من ايدي لحد ماخلص الباكيت كمت لبست
وطلعت للمحل اشتريت اثنين ورحت كعدت بالحديقه نفس كعدتي كل مره وادخن اريدن بيهه
احركن روحي الحبتهه واحركن ذاك اليوم الجابني عليهه .....

ضليت افكر شسوي واكسر خشمهه بعد ماريدن وياهه الحب وماعاملنهه الا بكل شين ماتستاهل
شي لا والله ....

عاد ثاني يوم اخذت زهره وابوي ورحت لخوالي
والنيه بالبال ... وهناك تغدينا وكعدنا نشرب الجاي
عاد كلتلهم ....
- خالي انه جايك بطلب
- ها خير ان شاء الله
- من رخصت ابوي انه راح احجي ... خالي
انه اريدن بنتكم ناديه مره ليه وجاي اطلبنهه منك
واريدنك تيسرهه ليه
- هااه
- شهاااب بويه شني سالفتك وبنت عمك شني
- هذيج عوفهه سالفتهه وحد هسه شكلت خالي
- بويه انته ابن العزيزه مانرفضلك طلب كبع واخذ
بس حجايه ابوك صحيحه موش ناهي عله بنت عمك !
- اي وانه وياهه متفاهمين هيه ماتريد الزواج
وتريدني اضل ناهي عليهه وانه ماريدن اضل
موكف حياتي اريد اكون عايله وكلت بنتكم تناسبني
نشتغل سوه ونكون بيت وعايله وبنت عمي ماعليهه شي يمتى ماتريد نهوتهه تنفج ماعارض انه
- اذا هيج زين .. البت الك
- اسألهه خالي شورهه شوف نفسهه تهوى الزواج مني لاا هاي سنه نبينه مانقرر عنهن احنه شورهه وردلي خبر
- هاي ان شاء الله وين نلكى مثلك احنه منه وبينه
زلمه والنعم منك اخو خيتك واجاويدي نتشرف بيك
- عله راسي انتم خالي

جان ابوي وجهه مدخن وبس طلعنه منهم كب عليه
- ااااانه شني عندك رجل كرررررسي تجيبني مناك لهناااك وما تكلي تريدن تخطب بنت خالك
وتكعد وتحجي بلايه ماتشورني
- بويه حكك علي لجن انه ماردت احد يعرضلي
- انتتته متسودن عشك هالحمره مسودنننننك
مخليك ماتشوفن جدامك ووين جاي تمششششي
مافكرت الشيخ شراح تكله !!! لو كلك فج النهوه
وراح زوجهه لولد خالهه اصدك راح تسكت !
- منهو كالك انه اخليهه تتزوج
- جا تريدن تضل كاسر بخت البنيه وانته تمشي وتتزوج
- اي انه اريدن اصير مو خوش ادمي
-شهااااااب حط عكلك براسك لا ساعه اعصاب
اتضيعن بيهه الاول والتالي
- مامسوي شي انه اريدن اتزوج وهاذ حكي
- وهالوااااادم شتكولن علييييينه ناهي بنت عمه ويتزوج بنت خاله تتمضحك علينه انتتتتته
لك ابوهه ماراح يسكتتتت لااا تورطني ويه اخوي
شهااااب لاتخلي بينه المعاتب والمشاكل ماريدن اتكاطع ويه اخوووي
- بويه اخوك مالي شغل بي هاي حياتي وانه اريدنهه هالشكل وكلشي يصير ذنبه يكع بركبتهه
لا تجي علي روح حاجيهه الهه
- لااا تسوووودني وتخليني اشكن هدوووومي
شماااااالك جاهل انته جااااهل وهالعناد براسك
جااا انه ربيت وكبرت وهيج اتجازى تطيح ماي وجهي جدام اخوتي بهالعمر
- لااا يابويه انه مامسوي شي يطيحن ماي وجهك انه رايد اتزوج بشرع الله والبت هيه ماتريدن الزواج انه ماجبرتهه اروحن اشوف حياتي
وهي خلهه
- فج نهوتهه اذا هيج الحجي
- مافجن النهوه انه اقسمت ماكدر
- شهاااااااب عيب تضل البت معلكه الوادم تاكل وجوهنااااااا
- ماامكربلها ااااانه بويه هيه بصوب وانه بصوب
عليش يحجون
- جاااا غير هاي عزيزه الشيخ وينهي عليهه وينكسر راسهه بمره فوكهه وتضل معلكه هالوادم تضل تشمت يابويه اووووزن عكلك شوووويه
موش صغير واعلمك
- الحجايه الشينه علي انه وهيه ماعليكم منا
كلمن يحمل ذنب فعله .. بويه اذا تريدني اضلن
بهالبيت لا تجيب هالطاري بعد تره والعباس انفكست مرارتي منه
- لاااااانعل سااااعه السوده الجيت بيهه علي
مامحصل منكم بس شلعاااان الكلب ويباس الريك
من خرب بهالبزرررر الاكشر

ضل الدرب كله يسب ويغلط واشكال حجى
وزهره خانسه وتسمع للحجي ... نزلتهم للبيت
وطلعت لنعيم ...
- هااا خويه كواك الله
- الله يكويك شو مانشوفك وينك
- تايهه بهالدنيا الكشره
- شمالك سولف
- راح اتزوج
- ااااه رضت بنت عمك
- لااا غيرهه بنت خالي
- هاااااه شني شسالفتك احجي شغيرك
- ياخوي ماتسوه خلك جاهل مدللـه وانه تعبت منهه حبهه تعبني وانه اخوك مرمرت روووحي
صارلهه اربع سنين وحطب بالخامسه ومافاهم منهه الا الصد وحركان الكلب وهالمره مست كرامتي وحركه كلبي ازيدن من كل مره عاد كلت
هاذ انسب حل
- حتكدر ؟
- بعون الله
- والنهوه
- ماعليهه شي ضاله
- شهاب عمامك شيخلصك منهم والله ليحدون سنونهم عليك
- هلا بيهم انه ماخافن من احد وانه اقسمت هالنهوه ماتنفج لو بموووتي هم ماانطكهه
- تهدا ياخوي البت شذنبهه وتكسر بختهه هالشكل
- ذنبهه هيه تعرفه
- الله يهدي بالك والله انه جنت من زمان اريدنك تتزوج وتنساهه عبن اعرفن هاي تاليهه بس سالفه النهوه موش زينه بحكم وانتم شيوخ وعلاقتكم طيبه وراح تخاربون من وره مره
- انه اتفاهم وياهم وان شاء الله ماتصيرن مشاكل
- ان شاءالله ،، الله يهنيك بزواجتك
- ان شاء الله .. شلون صرت
- عله حطت ايدك اعاين لرحمه الله
- الله كريم ياخويه تفرج ان شاء الله

ضلينه نسولف وتعشينه سوه ورديت للبيت بنص الليل مالي خلك احد وكلبي يوجعني عليهه بعده
يريدنهه مايرضى بالغير ... انه عله عمى عيني
رحت طلبتهه من ضيم كلبي منهه وحجيهه السم
بس خلهاا مايتندم غيرها عبنها ضيعت هالحب
من ايدينهه ....

وره يومين خالي خابرني وردلي خبر محاجي البنيه واهلها وموافقين عاد انه عزمتهم عله غده
يمنه حته انتعرف عليهم عبن احنه مالنه علاقه
ويه عايلتهه انه طلبتهه من خالي الي يصير جدهه

حاجيت ابوي عله سالفه العزيمه وهوه شايل بخاطره علي راضيته جم مره مايرضى الا افج
النهوه وانه مافجها لو تنكص ركبتي لين انه اريدن اذاهه وذلتها ...

عمامي محد منهم يعرف بالسالفه كلت بيوم العزيمه احاجيهم وخلهه تعلك مره وحده احسن
من كل يوميه ... حددت هالجمعه العزيمه وخابرت
عمي حاتم عزمته ويه عايلته وترجيته يجي وانطيت خبر لجدتي الي جانت هم معارضه عله زواجتي هاي وكل سالفه بالف ياعلي يلا اخلصن منهه يمهه من كد ماتاكل راسي بالحجي ...

رحت الخميس بالليل حلقت وثاني يوم من الصبح
كعدت تكشخت وتعطرت وانه الجم بكلبي بكل خطوه اخطيها ادوسن عله الي جابلي الاذيه والندم
عله الخلاني اطخ راس لمره وماانامن ليلي عليهه
حيييل الجمن بي واكولن تستاهل انته الردتهه تحمل الاذيه يالجبتلي الاذى ...

واجوي بيت خالي وشفت البنيه كاشخه ومرتبه
وهيه طويله وجسمهه مليان لايك ويه طولهه
وثكيله وملامحهه حاده كلشي بيهه عكس ربى تماماً .. اشوفنهه واقارن بالي بينهه وبين ربى
بكل تفصيل واكولن احسن مااريدن شي يذكرني بيهه بعد ...

سلمت عله ابوهه واخوتهه اثنين وخواتهه اثنين
وكعدنا نسولف منا لحد ماحطو الغدا .. انه جنت
عازم بقيه عمامي هم وسوينه سفرتين للحريم وحد وللزلم وحد فما شفت ربى ولا شفت هالناديه بس
من طبت عله كد السلام ....

وضلو يمنه للعصر ومشو انه لا ردت اشوفنهه
ولا سالت عنهه لناديه اصلا مالي خلكهه وروحي
جازه منهه ومن كل مره بهالدنيا ....

وره ما مشو رحنه انه وابوي لديوان الشيخ
وكعدنا ويه كل عمامي ابوي كال ...

- شيخنه اكو فرد سالفه لازم نعلمك بيهه
- اي خير كول
- ابني شهاب يريدن يتزوج بنت ابن خاله
- هاااااا كتلي يتزوج
- اي ماعرفن شجاه بيوم وليله قفل الا اتزوج يمعود عدل بدل هالراس تحجر بعد
- اي خويه خلهه يتزوج شعلينه منه هاي حياته خله يفج نهوه عن بنتي ويروح يتزوج عسى ما اربعه نفرحله احنه
- اي ياخوي ابني مايرضى يفجن النهوه انه عجزت منه يبس ريكي وانه احجي ومامش فايده
هاذ هم ابنكم وانتم تفاهمو وياه
- شني مااايفج جاا يتزوج وبنتي تضلن معلكه عليييش بويه !!! الله محمد يرضاهه
- لااااا مامرجيه منك ابني شهاب عيب بنت عمك هاي عزيزه عدنا مانرضالهه هالشي
- شننني يفجهه ورجوله فوك راسه
- اكفووووو خلني افتهم منه ،، شهاب
- نعم شيخ
- هالزواج بقناعتك لو جبرت نفسك علي
- بقناعتي شيخ بقناعتي
- زين دامك تريدن بنت خالك عليش مجلب بشمسه
هدها وشوف حياتك
- شيخنه تعذرني انه اقسمت من كبل وماحيلن
عن قسمي وانته كتلي يمتى مايجي الوكت المناسب
الي نعرفه اثنينه شنهو بذاك الوكت انه افجن نهوتي
- هااا دام هيج الحجي زين .. هاي خلوه براحته
انه راضي عليه
- شيخنه شني نخلي بنتي هااااي بنتي مارضاهه
تشمت بيهه الوادم وتصيرن علج بحلوكهم
- اكصن السانه اليحجي عله شمسه حرف واحد
وبنتك عزيزه عندي وانه مخليهه هالشكل لاجل مصلحتهه انه اعرفن شنهي التريده وراسمه ليهه
نهوه شهاب حمايه ليهه موش اكثر
- انه مايرضيني هالحجي شيخنه البت بحمايتي انه
- والنعم منك لجن نهوه ابن العم ماعليهه جلمه
وانته تفهم كصدي زين ... سدو هالسالفه وانته ياشهاب النه وكت ونحجي سويه زييين
- ان شاء الله شيخنه يمتى ماتريد حاضر انه
- الله كريم

ضلو عمامي كلساع واحد معترض وعمي حاتم مايقنع كلساع وهاد عليه لحد ما كام الشيخ ونهى
السالفه كلهه ومشى وانه هم كبل رحت للبيت حته اخلصن من عمي وحجيه ...

وهناك انه طبيت لحجرتي اجيت انزع هدومي
جان اطب ربى كبل تفاجات من جيتهه هالشكل
بلايه ماادك الباب حته .....

- شبيج ماتعرفين ادكين الباب
- نسيت
- شعندج
- شهاب لا تتزوج
- هههههههااااااي ضحكتيني وعلي عليش بويه
شني حنيتي !
- شهاب مو وكت شقاك هسه داكلك لا تتزوج
- وانه شني اسمع جلمتج يعني
- فدوه لاتتزوج
- عليش يعني موش ماترديني هاي انه عفتج براحتج موش تصيحين عوفني ماريدك هاي صارلج التردي عليش ضايجه بعد
- هاي لااتتزوجهه شهااب ارجوك
- عليش يعني فهميني انه اشوفنهه زينه وعجبتني حلوه ودكتوره اسنان تناسبني ومن خوالي هم
يعني احنه مناسبين من نفس المستوى
- انتتتتته شوكت رااااح تفهمني شهاااااب لاتضل تنعمي بالمظاهر عوفهه لاتتتزوجهه الله يخليك
- ماعليج بيه زينهه شينهه الي
- داكللك الله يخليك ارجووك لاتتزوجهه شهاب
فدوا اسمع مني بس هالمره لا تخلي الاعصاب والعناد ياثرون عليك بهيج شي .. اثق بيهه بس هالمره الله يخليك
- ان ماتزوجتهه اتزوجج انتي .. كولي اذا توافقين بالزواج هسه ادك تلفون والغيهه !!
- ..........
.
.
يتبببببع
💗💗💗💗💗