رواية من فجر ديسمبر الفصل السابع 7 - بقلم Zoka 🌷

من فـجر ديـسٓمبر
🍁
🍁
ثاني يوم طلعت للشغل وبالي مشدوه مدري شريدن ماعرفتن
شنهو الناكصني هَيج ..
من رديت للبيت تختلت منهه وتالي ماكدرت انامن كمت
دورتهه اريد اشوفن درت بيه عاينت عليهه لو لا ؟؟؟

رحت ليهه للمطبخ جريت بطل الماي وكمت اشرب وعيني
عليهه .. اعاين ظهرهه واتخيله مثل ماشفته البارحه اتذكر
تقاسيمهه الشامات ..صرت اعاين لركبتهه تلالي من البياض
ورجليهه المشدوده وطويله حجل رجلهه الناعم وكعبهه الاحمراني صاير بنص هالبياض ... واردافهه البارزه وطريه
مبينه من حركتهه .. درت وجهي وطلعت للحديقه لانها ماهمت
لوكفتي يعني مادرت بيه اصلا هي فاصله جانت مدري وين
بالهه ؟؟؟؟؟

انه شبلاني بيهه صرت احترك حرك كل ماشوفنهه عيني تتفحص
جسمهه شبر شبر ...
ضليت الومن بروحي شوداني ليهه عليش ماطلعت بسرعه
شلون بيه انه اناظر لعرضي وانهه الوادم منه وانه استغله !!!
- شهااب
- ها ربى
- تعال صبيت العشه
-اي

جنت احاجيهه وانه مرتبك اخافن تكشفني باي لحظه جني مذنب
جدامهه واخافن الفضيحه ...
طبيت كعدت عله الصينيه واكل ومدنج لا حاجيت احد ولا عاينتلهم احسن بعيبه ساكنه صدري ومنزله راسي هذول
اهلهه مآمنين بيه انه شلون هيج اسوي واكشف عله بتهم !!!!

رحت تمددت بسد بسام وهوه يخابر وانه فاصل عنه بالي بمصيبتي شلون بيه وبهالفضيحه !!!!! كل مااذكرن شكلهه
اكرهن نفسي جيف ماتحركت وطلعت وارد اذوبن بشوفتهه
واتخيل كاعد اتلمسه وامشي ايدي من ركبتهه لخصرهه
وافز من تفكيري واتعوذ من الشيطان تالي كمت طلعت
بالحديقه اتمشى وبيدي وركه شجر اكطعن بيهه وارد اكض
الثانيه وهم اكطعنهه ...

كلت لازم ارد لبيتنه هنايه اذا اضلن اسويلي مصيبه
بعدين تذكرت انه البيت بعدني مامكمله وعايزني هواي
فلوس اذا رديت منين اجمع فلوس بعد ؟؟؟؟

هسه انه شبيه هيج صرت رجيج وماكضن رويحتي عليهه
هنه جم يوم واخلصن شغل واهج من الديره كِله مو بس بيتهم

طبيت جوه ورحت نمت ... وطلعت ثاني يوم للشغل ومن
طلعنه اجاني بسام مشينه الدرب سوه جان يكلي ..
- اكلك شهاب اكو بلبل يريدن يحط بحضنك ترضى لااا
- شنهي بويه
- ايي مثل ماسمعت لك شلون بلبل صدقه لربه يشك شك
ومتانيه بس رقمك وكلشي عليهه
- هاااي شبيك شنهو كلشي عليهه
- شبيك رصيد طلعات كله منهه همه طاكين هاي نفسهه الجنت
اكلك عليهه وانته تعوفني وتمشي
- هاااا بنت خالهه لصاحبتك
- اي هيه متخبله عليك
- هيه شمعرفهه بيه
- انه حاجيلهم عليك ومره من جنه نشتغل بالمشتمل الثاني
هنه جانن بنفس الفرع مدرستهن وشايفاتك بالحله وياي
- هااا خايب انه بيا حال وهنه بيا حال انه ماكلب هيج زبايل
- شنهي تنكرط بالعباس
- خليتهه الك انه زلمه اريدن الم فليساتي واردن لتركيه
ماريدن غير دروب ادشلهه وهالسالفه سدهه رحمه لابيك
- كيفك انه عليه كتلك
- اي رحم الله والديك

ردينه البيت سبحت ونمت ماكعدت للعشه مالي نفس اجابلهم
رويحتي تختنك من اشوفنهم يضحكون وياي ومامنين بيه وانه
ماكضيت نفسي عن بتهم ...

تالي الليل من حسيت الكِل نامت كمت للمطبخ اطكطكلي
جم شغله اكِلهه .. بالصدفه عاينت من الشباج واشوفنهه
كاعده لا يالله انه كوه كوه اريدن انساهه تطلع بوجهي

اخذت صينيتي ورحت فتحت التلفزيون وكعدت اتفرج واكل
ورويحتي تلوب تريدن تطلع ليهه واكضنهه حته الاكل ماحسيت
عليه شوكت خلص ماحسيتله بطعم ابد ....

كمت اخذت الصينيه حطيتهه عله السنك وضليت اعاين ليهه
تالي طلعت ومشيت ليهه ووكفت يم العمود مال المرجوحه
وميلت راسي عليه واعاينلهه وهيه جانت تلعب بشعرهه
الاحمراني وزنودهه بيض وهالاسود اللابسته مسويهه كمره

- رايد شي ؟
- رايدج
- شنو
- مواعين رايدج تغسليهن
- فد شويه اكوم اغسلهن
- عليش تسهرين كل يوم ماتعبين !
- لا
- ربى
- ها
- شعندج ويه النجوم انه حاسن عندج فد كضيه وياهن
- لاااا ماكو شي
- لااا بالحسين اكو شي شوفي انه ماريدن اجبرج تحجين
بس انه ماشوفن بيهه شي تضمي علي يعني بس كليلي
عليش النجمه

جنت احاجيهه بهدوء وانه النار تشب بيه شويه شويه واعاين
لنمش وجهه منثور من جوه عيونهه وخشمهه وهيه دارت
وجهه وصفنت بالسمه ..

- النجمه دليل ونور بنص الظلمه واني ادورهه لهالسبب
- جا انتي عايشه بظلمه وتدوريهه !
- كلنه عايشين بظلمه صدكني
- شلون فهميني هسه انه ماعايشن بظلمه
- مو عندك جزء من حياتك تايه بي هذا ظلمه مو بس الحزن
والكئابه ظلمه الضياع والحاجه هم ظلمه وكل ظلمه يحتاجلهه
نجمه
- شنهو ضياعج
- ماعندي ضياع
- جذبتي
- حكوم اغسل مواعين
- اكعععدي جاي نحجي عليش تهربين
- شهاب
- هاا
- بس اسألك انته شتستفاد من تدخل بخصوصياتي هاا
- ماستفادن شي بس اريحن هالبال السودنتي بفعايلج انه كايلج
احسن وراج شي ومايهدالي بال الا اعرفنه شنهو
- لعد ابشرك اذا اتضل وراي مايضلك عقل فكف الشر وامشي
بطريقك وخليني بطريقي
- انه كايلج اجر خلك وياج لجن ماهدج زيين يا بنت عمي
- زين على راحتك
- طبي جوه يلا
- اصلا اني جنت رايحه
- اي يلا امشي منا

مشت من يمي وعطرهه ترس ريتي ضليت الوبن وتالي
كعدت وسديت عيوني بايديه اريدنهه تطلع من بالي الكه
نفسي اتذكر شعرهه شلون ينكط ماي على متونهه وشلون
ظهرهه مصقول صقل والماي يتمشى عليه بخفيه تسحل
رويحتي هالذاكره بالله العظيم كل مااريدن اكف عنهه الكه
نفسي ازيدن بمشتهاهه ....

ضليت يومين انه ماشوفن اهلهه بس اكعد تالي الليل اسوي
الاكل واعاينلهه واتفحص جسمهه من كِل شبر ... انتبهت
صايره تلبس عريض كلت هاي انتبهت علي وغيرت لبسهه
ماتدري انه بالعريض هاذ تحلالي الشوفه ازيد من الضيك
اكومن اتخيل حجم جسمهه بي وشلون تقاسيمه وهنايه طري
ويلوح لوحده وانجن الا شويه بي ...

صارلي خمس ايام انه محتركه عشيرتي واسبن بيهه ليل نهار
عيني تعودت عليهه ماكدرن اشيلنهه من طولهه بودي بس اكضن
اصبع منهه اريدن اطفيهه لهلنار الشابه بيه وماخمدت ..

هاليوم بالليل اجيتن للمطبخ وجان اشوفنهه كاعده بالكاع بسد
السنك ومجلبه بي بايد والثانيه ع الكاع مستنده بيهه وعينهه
ماعرفتن افسرهه بس صافنه اجيت عليهه ..

- ربى ربببببى تسمعيني
رفعت راسهه عاينتلي بصدمه وفاكه حلكهه وجان تكف عله حيلهه وطلعت ركض للكراج وتتشاهك بالنفس اجيتن عليهه
كضيتهه من جتفهه ..

- شبييج مختنكه هاا كليلي احجي فهميني

ماترد عليه بس تشهك تالي كعدت بالكاع وتعصر بصدرهه
دنجت عليهه ..
- ربى بس اهدي اهدي كليلي شجاج عندج دوه اجيبه شسويلج
فهميني
- شهاب
- احجي اسمعج احجججي
- كلبي

كالتهه وصارت تلوب وانه كاضهه من جتفهه لاتوكع وهي
صارت حمره دم وتلزم بكلبهه تالي كضت زندي وضغطت عليه
- تحملي شويه حاخذج المستشفى زين

هزت براسهه وتالي انه عفتهه وركضت جوه خذيت السويج
وجريت عبايه امهه وطلعت ليهه حطيت العباه عليهه وسندتهه
وهي كاضه ايدي وضاغطه عليهه وصوت نفسهه من تشهكه
يخوف .. تالي كعدتهه وسديت الباب ورحت فتحت الباب
وطلعت السياره ونسيت اردن انزل اسدهه كبل شخطت
السياره ومشيت ...

اعاينلهه واكولن هي حتموت ماضل بيهه صبر بعد ايديهه
ووجهه حمممممر تالي جاي ننزل للمستشفى وخشمهه
طك دم انه كمت اصيح عليهم يفتحون الباب وهمه انخبصو
كبل فوتوهه للطوارىء وانه فوك راسهه ...

اول ماحطولهه الاوكسجين وشهكته كضت ايدي انه اعاينلهه
عينهه الزركه صايره بنص حمار والوجه احمر وخرتني
الدكتوره تريد تسويلهه تخطيط لكلبهه ... طلعت وهي سدت
البرده وانه عركت وايديني ترجف هاي شجاهه حتسودني بعلي

تالي شفت الدكتوره جرت الجهاز وطلعت وانه رحتن ليهه
- ربى شلون صرتي

ماتردلي بس هزت راسهه واجه الدكتور والممرض وياه
يريد يحط المغذي ..
- دكتور فهمني شنهي سالفتهه
- هاي عدهه خفقان همزين خشمهه نزف خفف عليهه
- وهاي نفسهه يضيك بسبب كلبهه
- اي هو من عنده عيني حطيتلهه بالمغذي جم ابره تريحهه
هسه وحكتبلكم جم حبايه تاخذ وحده كبل متنام والثانيه بره الاكل
وشوفولهه دكتور يتابع حالتهه احسن لان مواختصاصي قلبيه
- هااا جا شنهي اختصاصك
- باطنيه
- شنهي ماكو هنايه مناوب قلبيه
- للاسف
- خلف الله عليك دكتور

درت وجهي اعاين ليهه واشوفن هالممرض يطلع بالابره
وعينه عليهه وعله شعرهه جان جضيت بي ..

- بعد اخوك خلي عينك بشغلك
- هسه شمسوي متكلي
- تعرف زين شمسوي كف الشر وكمل شغلتك
- فهمت

كربت ليهه وجريت العباه عله شعرهه انه اثول طلعتهه هيج
كبل بلايه حجاب .. راح الممرض وانه ضليت واكف فوك
راسهه اجر كل شويه بالعباه عله ركبتهه وشعرهه وهيه غافيه
تالي كعدت وضليت صافن عليهه ...

شنهو الوراج ياربى سودنتيني بعلي شلون اضلن هيج اهوجس
بيج ماكافيني الغازج جماله شكلج وجسمج اليتمشى عله اعصابي

كربت ليهه خليت ايدي عله وجهه مشيتهه تلمست نعومتهه
جريت نفس واتعوذت من الشيطان تالي كمت مشيت شوي
ورديت شفت النسوان عينهن عليهه هيه تضوي بالاسود
وشعرهه اضمه منا يطلع منا تالي اجيت عدلته .. وعاينتلهن
هنه دارن وجههن شفت المغذي خلص سديته ودنجت ليهه

- ربى تسمعيني ربببى اكعدي بنتي حاجيني شويه رببى
- هاا
- شلون صرتي
- احسن
- نفسج زين هسه لو بعدج مختنكه
- لا احسن بس تعبانه
- كومي خلي نرد للبيت وارتاحي هناك انه اذا اضلن بيج هنايه
بعد شويه اسويلي مصيبه
- ليش
- هالوادم كلتج بعيونهه كومي رحمه لاهلج
- ماشي

سديت الكانوله وهي كعدت وعدلت عباته وكامت اجيت اكضهه
مارضت مشينه وهي تمشي علىه كيفهه عاينتلهه تغمض بعينهه
بوجع وتضغط عله شفتهه ..
- شبيج ربى شنهو اليوجعج
- كلبي يتقلص احسه
- خلي اخذلج هالدوه بلكي من تشربي تسكنين شويه منا لباجر
اشوفلج دكتور اختصاص
- لا ماريد
- شنهي ماتردين
- عندي كومه دوه بالبيت لا تعب نفسك وتجيب
-جا ما تشربيهن
- شهاب امشي عفيه
- استغفر الله تعاي ليه
- شهاب
- لاتعاندين ربى مو وكت نتكافش هسه

كضيت ايدهه اليمنه بيمنتي واليسره حاوطتهه بيهه ومشينه
انه ضحكت مادري عليش حبيت وكعتهه هيج حسيتهه جتي
رحمه ليه ...
- خلي نوكف شويه عفيه تعبت
- يلا ماشي

وكفنه ونزلت ايدي منهه وهيه تاخذ نفس قوي وتزفره انه
خفت عليهه الصراحه وجع كلبهه مبين عله وجهه وايديهه
الترجف اخافن لا يصيرلهه شي بهالليل وحته المستشفى
مابيهه دكتور يشفي الكلب ...

رحت ليهه وهي عينهه بعيني وبيهه لمعه دمع ...
- ربى نمشي
- لا بعدني مابيه حيل امشي خليني شويه
- تعاي اشيلج
- هه لااا عوفني اني هسه اتحسن
- جنج متعوده لهالسالفه
- اي هواي

بهاللحظه جتي سيارات الاسعاف محمله بالوادم متكطعين
والامه نخبصت عليهم عاينت لربى مغمضه والدموع تنزل
وايدهه عله كلبهه وزامه شفايفهه .. كربت ليهه جريت عباتهه
عله شعرهه وهمستلهه ..
- شبيج ترجفين وعليش هالدموع
- رجعني للبيت
- سمي بالرحمن وامشي

مشينه شويه وردت التفتت تعاينلهم انه سديت عينهه ودرت
وجهه وهي دنجت ومشينه للسياره صعدت وخلت ايدهه عله
وجهه ..انطيتهه كلينس مسحت وجهه وانه شغلت السياره
وردينه للبيت وهيه كل الطريق صافنه للسمه وشعرهه يلعب
بي الهوه وانه اضحك عله نفسي جيف كل ساع اخذلي نظره
خطف لحد ماوصلنه البيت جانت الباب مسدوده نزلت اريدن
افتحهه جان يفتحهه عمي ووجهه نار صاير ... رديت صعدت
بالسياره وفوتتهه للكراج ونزلت فتحتلهه الباب وعمي استلمني

- وين جنتو بنص هالليل متشيل تلفونك انته عليش مشتري
- عمي بعدين رحمه لاهلك

نزلتهه وسندتهه وهوه ضل صافن علينه طبينه للديوانيه
كالتلي ..
- عوفني هنا
- امشي لحجرتج تنامين اريحلج
- مابيه حيل بعد خليني هنا
- براحتج تمددي

ذبت عباتهه وتمددت عله القنفه جرني عمي من ايدي وطلعني
بره ..
- شبيك عمي
- احجيلي شنهي الصار شهاب وحك محمد ان جذبت اكسره لراسك
- عمي شبيك جنه بالمستشفى
- مستشفى عليش شبيهه بنتي
- جانت بالمطبخ دتسويلي اكل واختنكت رحت ليهه كالتلي
كلبي يوجعني وانه من خبصتي طلعت ونسيتن اخذ تلفون
كبل شغلت السياره وخذيتهه تالي خشمه نزف وهناك سوولهه
تخطيط لكلبهه وحطولهه اوكسجين كالو عدهه خفقان واخذوهه
لدكتوراختصاص
- بويه ربى بنتي وحيدتي

عافني وركض ليهه يبوس بوجهه وايديهه وحضنهه وصاح
عله امهه نزلت ومن شافتهه لطمت عله صدرهه وضلت
تبوس بيهه وصعدت جابتلهه دواهه وانطتهه وجابولهه فراش
فرشولهه ونامت امهه يمهه وابوهه ضل كاعد بره يدخن رحت
ليه ...

- اكولن عمي من يمتى هيه عدهه خفقان
- من زمان عمي من زمان جانت بالخمس سنين عمرهه
وصار عدهه اول مره
- هاااه ماعالجتوهه
- خذيتهه اشكال دكاتره فريتهه هنايه وبغداد وبالنجف ينطوهه
علاج وتصير زينه ساعه الساعه تجيهه النوبه وتوكع هالوكعه
هسه عبالك حتكوم منهه
- جا شني زينه صارت
- كفيلك العباس تاخذلهه بالكليل ٣ ايام نايمه هالنومه يله ترد
تكوم عله حيلهه انه حافظهن لهلنوبات شيبن راسي وهبطني
- متستاهل والله بعدهه زغيره وينهه وين الكلب وامراضه
انه انشدهت ماعرفتن شبيهه اشوفن وجهه حومر وماتتنفس
وتصيح كلبي ركضت خذيت السويج والعباه وطلعت اعذرني
عمي خليت بالك علينه
- لاا ابني المهم سلامتهه مشكور لو ماكاعد انته جان ضلت
ومحد دره بيهه
- جا هاي كبل شلون تعرفونهه
- انه شريتلهه جهاز مال صوت بحجرتهه جيف مرتين صارت
ومادرينه بيهه الا هيه جتي لينه وجان وجهه كله دم فانه كلت
لازم الكالي فد شغله وجان شريتلهه هالجهاز كل ماتتعب اسمعنهه
واروحن اركض بيهه للمستشفى
- هاااا خوش فكره ،،، عمي اخابرلك صاحبي بغداد يشوفلنه
دكتور زين ناخذهه ليه مو احسن من ضلتهه هيج هيه حته
مشي خطوتين وتتعب ماتكدر تمشي
- والله ياابني انه كتلك خذيتهه نص دكاتره بغداد يشهد الله
ماعفتهه بس بعد كيفك لو لكيت دكتور زين هم بلكي عله
ايده تطيب
- انه باجر الصبح اخابره واوصيه
- الله كريم روح نام تعبناك
- لا عمي اهم شي سلامتهه من رخصتك
- مرخوص وليدي مرخوص

طبيت جوه ومريت عليهه شفتهه نايمه وحلكهه فاتحته شويه
وامهه متمدده يمهه وتقرالهه ايات وتمسح عله صدرهه

طبيت ذبيت هدومي ونمت بالشورت حسيت بره شوه من
نومتي بسام يكعدني ..
- يمعود كوووم حتصير بالسته
- لك توني نمت عوفني
- شغلك بويه شنهي نسيته
- استغفر الله هاي كمت كمت

كمت لبست ورحت للمطبخ لكيت عمتي محضره الريوك
وانه منعس منايم زين .. شربتلي كلاص جاي واكلت وطلعت
للشغل وهناك بالكوه اشتغل مطفي فدنوب عاد تغدينه وكمت
كملت شغل واتذكرت وليد وخابرته وصيته ع الدكتور ورديت
للشغل لحد الخمسه العصر يلا طبيت البيت ...

من طبيت الديوانيه شفتهه بعدهه نايمه عاد سالت امهه..
- عمه شنهي ماكعدت
- لا كعدت بس شربت دواهه ورجعت نامت
- ماكلت شي
- لاا وين بزعت روحي واني اكعد بيهه وما تكعد
- عمه بنتج هيج حتكضي عله نفسهه هاي دوه كلب مو افلاونزه
رادله اكل
- هسه اني عازته عليهه والله محروك كلبي عليهه بنيه مثل
الورده هيج هالنومه نومتهه ليش يربي شمسويه منهه عليهه
- كولي يالله عمه هاي كلمن وقسمته روحي حضريلنه الاكل
وانه اكعدهه بس خلي اغسل واجي
- علواه يمه
- حضريلنه اكله زينه وعوفيهه عليه
- يبعد كلبي ياشهاب يمه هيج وتكعدهه وتاكل واشوفهه ترجع
لعافيتهه وين الله وابو الحسن
- ان شاء الله عمه ان شاء الله

رحت غسلت وبدلت بسرعه واجيت ليهه كعدت يم راسهه
عاينت مامش احد هنايه مديت ايدي لشعرهه رفعته شويه
من خدهه وجان مثل المي بيدي .. ضليت اعاين لرموشهه
الشكر وحواجبهه الخفيفه الشكره لو ما هالشعر الاحمر جان
كلت عليهه برشه ... جريت نفس وبعدت شويه منهه .

- ربى رببببى ياشمسه ياصخمه يااربببببى

ماتكعد جا شجاهه مو جانت ماتعرف النوم شلونه هسه خشت
غيبوبه شني !! ضليت اهزن بجتفهه تالي فتحت عينهه ليه
والضوه يضرب بزراكهن انه صفنت ونسيت شرد اكولن
- شبيك شهاب
- هاا كومي صارت المغربيه
- عوفني
- شنهي اعوفج من بارحه ماحاطه لكمه بحلكج وراج دوه اكعدي
اكليلج لكمه تسندج
- مالي نفس والله بس اريد انام تعبانه
- اعرفن تعبانه لجن موش حاله هاي انه وصيت امج تحطلنه
الاكل وهالساع تجي وتكعدين تاكلين وياي
- ماريد كتلك ماريد
- بالعباس ان ماكعدتي كليتي شعرج اهلسه سمعتتتي
اي بلايه هالنظرات انه ماعندي بنتي وحبيبتي فاهمه
- محد عاتب عليك تره
- انجبي و اكعدي ..فضيهه عاد يلا كافي دلال
- اني ادري حتى من اموت هم الكاك فوك راسي تنك
- شنهي بويه سمعينه
- اي مثل مسمعت مابيه حيل اعيد
- رببببببى ااااخ بيج بخت مريضه وله بالعباس جان سويتج
وصلتين
- اممم
- وسم
- هاي شبيك
- انتي الي شبيج
- انته اجيتني مو اني
- وانتي تنرفزين
- عوفني لعد
- اكعدي واعوفج
- اي مو كاعده بعد شتريد
- اريد تسدين حلكج
- لتضل تحاجيني لعد

طب عمي يضحك علينه وكعد وكال ..
- يابه لو صغار ونكول عليكم رويسيه اشو واحدكم بطول الباب
يمتى تكفون عرايك
- عمي متشوف بنتك تحجي الاخرس
- انته تلح وياي اني معليه بيك
- شلحيت ولج فوك ماريدن اوكلج لكمه هيج اطلع
- اي هي بس هاي والحجي والتهديد مالتك اكفش واصلخ واذبح
- بسسسسكم عاااد شلون تضلون تصرعون روسنه هيج
يامره جيبي الاكل خلهم يسكتون اسطرو راسي

اعاينلهه صفح وهي عاكده حواجبهه وتعاينلي وابوهه يضحك
تالي جابت امهه الاكل وكعدنه وهيه جانت حاله شعرهه ومخليته
وره اذنهه ... جنت اكل وهي كحت رفعت راسي ليهه وانتبهت
لجسمهه يهتز مالابسه شي جوه بلوزهه .. درت وجهي وانه
استغفر الله شلون بيه بهالبلوه اضلن محترك هييج شلون يربي

انه مسحت الاكل كِله وهيه كضتهه روبه وخيار وركي
جيت احجي عليهه واتذكرت من امهه كالت ماتكدر تاكل
هالاكل ... دخيل الله شلون عايشه هالبت انه حتسودن !!!!!

كامت تغسل كبلي وانه شلت الصينيه للمطبخ طلعت اريد
اروحن للمغسله وشفتهه كاعده عله الدرج ومدنجه صدرهه
مبين درت وجهي ورحت اغسل واحاجيهه ..

- شبيج كاعده هنايه
- تعبت وكعدت ارتاح
- هاي خطوتين تعبتي
- اي تعبت بيهه شي
- عمي اسفين بس حكج تتعبين هو اكلج مايوصل باب الحجره
من تاكليلج شي يسند كلبج ماتتعبين بعد وعايفتج ترد
- ماعندي مثل معدتك
- انطيهه الج اذا تردين
- امم مشكور
- امشي وياي اساعدج تصلين لفراشج
- مامحتاجتلك اني اكوم
- يلا كومي خلي اشوفن
- فد شويه اكوم
- هالمعاند والمكابر ذبيهن هالجم يوم
- شنو معاند كتلك هسه ارتاح واكوم انته دتحجيني هواي وتعبني
عوفني
- حكج يابه هاي سكتت يلا ارتاحي
- من تروح من يمي ارتاح حتى هنا فوك راسي
- اي اضلن فوك راسج
- والله لو بيه حيل جان صعدت وقفلت باب غرفتي واخلص منك
بس مبيه حيل هالدرج
- نعمه من الله تعبج هاذ عليه
- اي يحلالك ليش لا تضل تحرك باعاصابي
- هو انه لو انتي التشعلين اجداد اجدادي
- اني وين جايه يمك واصلتك انته تطلع بوجهي
- غير انه الله بلاني بيج ويحطج بدربي وله انه ماميت عليج هي
- امم
- وسم
- بكلبك كون هالسم كافي عاد دقيتني
- عليمن هاي ولج شو طولان لسانج هاي هيج اليمرض يكوم
صوته يلعلع
- شوف نفسك اطلع الواحد عن طوره
- عدلي اسلوبج هييي لا افركه لحلكج بالعباس هسه لو مو مريضه لو بفراش الموت اكسرهن لضلوعج ان ماجريتي عدل
- روح مني الله يخليك احسن الي والك
- خايبه نجببببي نجببي

عفتهه وطبيت لحجره بسام تمددت وانه اضحك عله عصبيتهه
كدرت اذوبن هالثلجه الي عله لسانهه وطلعت اعصابهه تجين
يربى تجين رادلج صبر وانه خلكي طويل ...

ثاني يوم خابرني وليد وانطاني عنوان الدكتور من رديت من
الشغل كعدت وياهم بالديوانيه هيه صارت الكِل تكعد هنايه
يم ربى ...
- عمي خابرني صاحبي اليوم وانطاني عنوان دكتور زين
خاله مراجعه ويمدح بي
- شمسه خاف رايحيله
- اسمه حيدر علي بساحه بيروت
- هاا لا مارايحين هناك
- اذا بيكم حيل نروح ليه باجر
- شتكولين ربى نروح
- هو المن الدكتور
- الج غير
- ماريد مو عندي كومه ادويه
- اي يابتي مافادن نجرب غيرهن
- مابيه حيل يابه والله اني هسه لغرفتي ماصاعده تريدني
اروح لمدري وين
- عمي لاتخليهه تدلل علينه هي سياره من الباب للباب
- كتلك اتعب افتهم مابيه حيل هالطريق
- يابه جا ماتاكلين حته يصيرلج حيل بربج هم اكو بشر ماطب
ابطنه لحمه شحمه لا تمنه لا شي منين يجيج الحيل دطكيلج
ماعون تشريب لحم معدل وشوفي الحيل شلون يصير
شتكول عمي
- حجايتك اصح من الصحيح غير انه بتي جنهه نستله مايعه
من الهوا المار
- ها يابه شو كلبت عليه
- هسه غير واحد يحجي الصِدك انتي لو تاكليلج لحمه سمجه
صدر دجاج شويه تشريبه يخنينه تجيبلج الحيل وترد الدم بوجهج
- هسه اني شعليه تحجون عليه يعني ماشفتو بعينكم شيصير
بمعدتي من براهن
- اذا انتي معودتهه عله الركي والروبه حكهه ماتتحمل الشتريب
- اكلهن انته وخلي الحيل الك
- اي متشوفين بيه حيل اعاركج كل ساع عبن انه اكلي كوي
انتي جلمتين وتكومين تأممين
- اممم
- هااا شفتي
- لا تفر الموضوع روحه مااروح
- وانه كلت ترحين
- ماروح
- ترحين
- مارووووح
- ترحييين ورجلج فوك راسج وارد اشوفن مره التكسر جلمتي
- ماكسر كلمتك انتو سالتوني وكلت ماروح
- وانه كلت ترحين يعني ترحين
- شنو هيه بالكوه
- اييي بالكوه الفين مره كتلج انه ماعندي دلال
- هسه اني ميته على دلالك بس عوفني والله كلشي ماريد بعد
- لااا انتي مشتاكه للمكافش مالنه وانه عايفج اكولن تعبانه خطيه
بس شكلج تردين نرد ليه
- هاي شبيك اني اكلك ماريد اروح تكلي نتكافش شبيك ابني
- منهو هاذ ابنج ولج زلمه بطول وعرض تكليلي ابني
- امم
- و
- وسم اي وسم فهمت وحفظت كافي عاد فدوه والله دتعبني
- انتي الكافي تبطين كلبي وانه اجرن خلك وياج
- لتجر خلك لتجر خلك عوفني بس عوووفنننني بس هيج
- يبوووووووو منكم ولكم بسسس بسسسس كليتو راسي
بسسسس الله ياخذكم شلون اثنين انجمعو فوك راسي انه
عايزني صياااح مكافي البشارع اريدن ارتاح صموو حلكم
- عمي كللهه لبتك خل تعكل وتمشي باجر لا تضل تعاند
- يابه كله خلي يعوفني
- انصممممو طيح الله حضكم جهههاااال انه عندي جههااال
مزعطه ويتمالخون جدااامي واحدكم بطول البعير ومكضيهه
انته وانتي جااان استحيتو عله طووولكم من خرررب بحضي
اي والله اللفالي هيج شكولات
- هاا ارتاحيت خليت ابويه عصبي
- مو تعرفي عصبي متسكتين
- لاننننعل ابوكم يااابو الخلفكممم امشو كوووموو كووومو
انه اضلن اسكت واسكتي
- هاي عمي كمت كمت خلي بتك ترتاح زعجانهه للست
- اي والله كلش
- انه اعلمج بعدين عابلج فضت اصبريلي
- تلكاني نايمه
- اجرج من سابع حلم اصبريلي ياصخمه
- صخمه بعينك
- لانعععععل .. ربىىىى استري عله رويحتج لا انعنع ضلوعج
- شهاااااااااب بسسسسسك عاااااد
- عممممي بتك تحجي الصخر سكتهه رحمه لاهلك
- ربببى سدي حلكج حجايه النوب ابتلي بيج
- ماشي

عاينتلهه بغضب وهيه جرت بطانيتهه وسوت نفسهه تثاوب
وترفع بحاجبهه وتعاينلي .. عفتهه ورحت تمددت والوبن منا
ومنا طب بسام همزين جان مكاعد ويانه ولا جان كبت العيطه

- هاي شبيك جنك سمجه مزوهره
- اختك شيبت راسي بالعباس
- ااه ربى شبيهه
- راس يابس جبتلهه دكتور اكللهه امشي باجر تكلي مابيه حيل
وكبت العيطه بينه وابوك كملهه يكف وياهه
- هههههخخخخخخ انه سامع من امي تكلي شهاب وربى
مانسمع منهم بس العايط والمكافش بس ماعبالي هيج السالفه
- شنهي امك سامعه عركاتنه
- ههخخخخخ اييي تكول مامر يوم ما تعاركو بي لك يابه عوفهه
هاي مدلـله وعنوديه لاتعب نفسك وياهه هسه لو مو تحط راسك
براسهه ماتلكه منهه غير دوخه الراس والتزوه. الهاذ انته بي
- بويه هسه انه شريدن منهه بس تكف لسانهه اكلهه شيش
تكلي بيش بالعباس نعلت اسلافي
- هههههههاااااااااي اكسرهه الك ادلل
- استر عله رويحتك هو انه جلمتين وابوك طردني انته يروح
يعلكك بالتيل
- ههخخخخخخخخخخ لك هاي ماخذتنه حاصل فاصل
- اي بعلي خلني انام واخلص من شرهه
- انه خلي اشوفن حبيبتي شبيهه ماييهه
- بالعباس اذا تلفنت فوك راسي لاطلع حركت اختك بيك
كافي عاد مصختوهه تره
- خخخخخخهههههه شدعواك بويه هيج اعصابك مشتاطه
- روح خابر بره لا تخليني ابلش بيك
- نام نام بله هسه انه منهه عليهه انطرد من حجرتي
- لو تنام مثل الاوادم ماطردنك بس لاتضل هههيي وحبيبي
وكلبي وتسطره لراسي
- تغاار حكك كتلك انطيك شلون صاكه بس انته ماتريد
ضل هيج انته وهالمخده
- عوفني رحمه لاهلك روح اطلع وخلني انام
- ناااام نااام

طلع وانه ضليت اتكلب مدري اضحك عليهه مدري اذكر
لمسه شعرهه وايدينهه الطريه مدري اعصابي التحترك
من حجيهه سودنتني بالعباس ..
.
.
.
يتبع