رواية من فجر ديسمبر الفصل الثامن 8 - بقلم Zoka 🌷

من فـجـر ديسـمبر
🍁
🍁
ثاني يوم كعدت الصبح مثل كل مره وطلعت للشغل هاليوم
اكملن شغلتي بهالبيت وارتاح .. كملت شغلي حسب الاصول
وخذيت يوميتي ورديت للبيت طبيت كبل لحجره بسام واشوفن
ربى نايمه هنايه ومكشفه ... صدرهه مبين من البلوز وركبتهه
جنهه ليلو وعظامهه البارزه هنايه صفنتني انه احبن هالصفه
بالبنيه وهاي اول مره انتبه ليهه ...

سديت الباب وضليت واكف واعاينلهه شلون طلع هالحسن
كِله من نص الجلحان الملحان هذول ؟؟؟؟
ردت اكرب ليهه وجان تندك الباب فتحتهه كبل ..
- هاا يمه شهاب
- هلا عمه هاي بنتج شجابهه هنايه
- هو اجيت اكلك ربى نامت هنا مو اجونه خطار وكومتهه
ونامت هنا
- هااا من يمتى هاي نايمه
- من ال١١ نامت هنا وهي اصلا مكعدت الصبح هاي على
كد ماكومتهه ورجعت نامت سوده عليه مابيهه حيل تكعد على
حيلهه
- ايي انه حاخذ هدومي واطب اسبح شعلي بيهه
- اي يمه ولو انته تعبان وتريد ترتاح بس شسوي ماكدر اكعدهه
- لااا خليهه شريد منهه

طبيت الحمام وانه فكري بيهه ..شكثر شايف بنات اشكال الوان
لجن مانفسي صارت بوحده مثل هاي انه ادري ماطيقنهه لجن
تغريني بحسنهه حييييل تسودني بي اعرفن انه وهيه نار وشرار
الا هالجسم الاكشر الفار عكلي عليهه شلون بي .!!!!!!!

طلعت ردت افوتن ليهه وكلت زحمه رحت كعدت بالمطبخ
ومرت عمي تصب الاكل ... كلت وشربت الجاي كلتلهه ..

- عمه بلايه زحمه عليج اريدن فراش انامن بعلي غادي خرده
- هاا يمه اصعد فوك نام هنا حيجون بسام وعمك وحيدر وجماعته يسهرون هنا مايخلوك تنام روح فوك على راحتك
هم خطيه شغلك يكسر الظهر وطالع من الصبح
- وين اروحن فوك
- بغرفه ربى محد يوصلك
- هااا خاف تكعد تسويلي سالفه بتج مابيه حيل مناكر وياهه
- لاااا تره كلبهه طيب وهاي اني اول مره اسمعهه تتعارك
ويه احد دومهه ساكته همزين حجيتهه وخليتنه نسمع صوتهه
- انتو مدلليهه زايد
- غير هالوحيده وحبيبه الشيخ
- ايي خلهه تفيدكم انه اروحن انام من رخصتج عمه
- اخذ راحتك يايمه نومك هني

كلت هاي فرصه ادعفس بغراضهه اشوفن شعدهه ماعدهه
طبيت وقفلت الباب وضليت اعاين بيهه تالي رحت فتحت مجراتهه وطلعت البوم صورهم من جانو صغار ..

ضليت اكلب بي واضحك شفتلهه صوره ويه الشيخ هنايه
بيتهم ومالكيتن صور ليهه بالسلف الا جم وحده اثاري صدك
ماتروحن هواي غادي ..

شفت صوره ليهه وجانت لابسه بيهه بدله سمائيه مدلعه وهيه
صغيره تطلع بعمر ٧ سنين بس جنهه كمره شعرهه الاحمر
منثور على جتافهه وايدينهه بيض وعينهه الزركه تلمع وهالشفايف جنهن فروله حمر وصغار والنمش التارس وجهه
جريت الصوره وجانت صغيره تطلع بعرض اربع اصابع
خليتهه عله جهه كلت اريدن اخليهه بمحفظتي ...

انه ماعرفن عليش ردت اخذهه بس كلت اضلن اعاينلهه لحد
ماتطفى ناري واردهه ...
تالي كمت ضميت الالبوم بمجانه ورحت لرسماتهه وضليت
صافن برسمه الايد والنجمه عليش هالوحيده المكبرتهه ؟؟؟

كلبت بدفاترهه نفس رسمات كبل ماضايفهه شي جديد
رحت فتحت كنتورهه وكلبت بملابسهه صدك لو كالو
هالوحيده سوك العماره كله بهالكنتور .... شفت عدهه
ملابس نوم خفيفه مصفطتهن وحدهن وكلهن لون ابيض
وصلوخ وناعمااات وكصار يصلن جوه الخصر بشبرين

انه خذيت واحد منهن وصفنت عليه وتخيلتهه بي يامحمد تضوي
تطلع بي انه جيت اشيلنهه من بالي لو ازيدن بهالحريج ؟؟؟؟
صفطته وجيت اخلي بس كلت اشمه وشميته ريحته مثل
الفانيلا اي بالضبط مثلهه هيج ريحه حلوه عله بارده هي
كلشي بيهه بارد حته الوانهه هم بارده مثلهه ...

ماكدرت امنع نفسي من تفكيري بيهه ولكيت روحي متمدد
وهالثوب على صدري وواشمن بي كل شوي واتخيلهه بي
واتخيل جسمهه وخصرهه وذاك الظهر الكلب موازيني
واذكر الشامات وعظام الركبه واتخيل كاعد اتلمسهن
انسطرت بالحسين جا هنه فكرتين وهيج سطرتني اذا صارت
صدك شلون !!!!!!

تاليهه طفيت الضوا ونمت وانه حاطه عله المخده واشمن بي
كلساع لحد ماغفيت وكضيت هالليله بمجانهه وعله ريحتهه
واشوفنهه بحلمي مثل فراشه خفيفه والاحكنهه وماكدرن اصل
ليهه اطخنهه وتختفي وترد تطلع كدامي ...

كعدت هادىء وعيني عله ثوبهه رديت غمضت واذكر الحلم
شجابني عليج يابت عمي سنين انه لا عرفنج ولا تعرفيني
تاليهه من ادري عنج تكلبين موازيني هَيج !!!!

عاينت الساعه ١٠ الصبح حيييل انه نايم من التسعه باليل لهسه !!!!
كمت وكفت مشطت شعري وعاينت عطورهه جريت واحد شميته ماعجبني جريت الثاني هم لا الثالث هاذ اعرفنه هاذ
الانسطر بي واملي ريتي من تفوت بسدي ..

ضليت اشمنه شلون اريده شسوي ؟؟؟ كمت رشيت تشيرتي
كِله ورجعته واخذت ثوبها صفطته ورديته بالكنتور.وطلعت
اول مانزلت كبل للحجره مالكيتهه هنايه زين ..
كبل نزعت التشيرت وصفطته وخليته بعلاكه ودحسته بالجنطه
كلت خاف ماسيطر عله رويحتي هاذ يفيدني حته ماتجرأ واكربلهه اضلن عله ريحتهه واكضن رويحتي عنهه ...

لبست غيره وحطيت من عطري القوي وطلعت غسلت ورحت
للمطبخ لكيتهه هيه وامهه كاعدات بالكاع ...
- هااا صباح الخير
- صباح النور شلونك يمه شهاب
- الحمدلله
- هلا شهاب
- هلا بيج شلون صرتي
- زينه
- مالله هداج وترحين للدكتور
- لا بعدني مانهديت
- هااا من تنهدين كليلي زين
- زين
- احطلك الريوك يمه
- اي والله عمه تسوين فضل
- لاا يمه شنو السالفه
- عمه بنتج عليش ماطلعت عليج هيج حبوبه ونفسهه طيبه
لا شكل ولا كلب جا عليش بتكم
- ههههههههه لااااا شهاااب لاتكول هيج هاي ربى ذهب وين
اكو مثلهه وكلبهه طيب بس انته ماتعرفهه
- انه ماعرفنهه اي صح هيه عليش تضل شايله خشمهه
هاي بله شتوزنيهه !!!
- اكلك يعني انته ماعندك سالفه غيري
- ماعرف انه من اشوفنج ماكضن رويحتي من الحجي بيج
- امم
- انتي لو بس تبطلين اممه جان انه بنص الخير
- ابشرك مابطلهه
- اعرفن جا انه ماعرفن تضلين تبطين كلبي بيهه
-اممم
-وسم
- هاااا يمه شفتي منو يتحارش
- هههه هسه انتو ماتكعدولكم كعده بلا مناكر
- اني معليه هو اليبدا
- اي وانتي شلون حبابه وفقيره ماشاءالله عليج
- امم
- ربى لاتخليني ابلش بيج من صباح الله
- هسه شمسويتلك انته التحجي
- وانتي تدرين بيه اكرهن حجيج هاذ عليش تسوي
- شسويلك واذا تكرهه
- هاااا شفتي اسلوبج الزفت هاااذ هوه اليجيج المناكر كضي لسانج احسن ماكصه لج
- اكلك اني اكوم احسن كعدتنه بنفس المكان كارثه
- ميلللي مني ميييلي خفت هالشكولات
- اي والله
- لاننننعل عشيرتج اليوم

طكتهه بركضه وانه ركضت وراهه وطلعت بره بالكراج
جريتهه من شعرهه ورجعتهه علي وهيه مجلبه يايدي ..
- عوووف شعرررري عوووف
- اعتذرررري
- مااعتذري ماحجيتلك شي انته تلح
- بالله العظيم ان ماعتذرتي اشلعهن لشعراتج هذن
- لك انته شكووتلح وياااي عوفني داكلك كااافي شهاااب كااافي
- جري عدل واعوفنج انه ماميت عله شكولج تكضين لسانج
تسلم رويحتج فهمتتتتي
- ايييي بس دوووخر
- اعتذري
- انته اعتذر على ملحتك وغلطك عليه واني اعاذر
- خاف ميعجبج
- لعد عليك حلال وعليه حرام
- ايييي عليج حرررام سمعتتتتي هم عايز تجاوزين عليه هي بس
هاي الضلت
- لعد متكول لنفسك شكو تجاوز اذا متقبل احد يتجاوز عليك
- وانتي شنهي تسويهه وحده بوحده
- مثل ماتضوج اني هم اضوج انته تحس واني احس فاحترم تحترم
- خايبه انتي منيلج احساس جنج قالب ثلج
- اي اني ثلج عوفني لاتجي عليه
- مامييييت عليج هييي انه الله بلاني بيج الكاج بوجهي كل صبح
ومسيه
- بس عوفني وماشوفك وجهي بعد زين هيج
- ولييي مناا يلااا اذا شفت شكلج جدامي هاي بعد الله كتبهه عليج
- امم
- وسمم كون بهالكلب الاكشر
- هو مسموم متحققلك هالشي
- ربببببى امشي مناااااا امششششششي
- اي ايييي

هديتهه وراحت جوه رديت طبيت وعمتي تضحك وانه مبوز
كعدت اكل ومن ساعتهه ماشفت وجهه بعد ...
طلعت ويه نعيم وصادق ورحنه للكهوه وهم رد اخذنه صادق
لبيت حبيبته وانه هالمره سكتت وصفنت عليه شلون عينه
الدمعه مجلبه بيهه كوه حته ماتطيح وصفنه ماخذته عله حجار
بيتهم ....
عاد سألت نفسي ... انه هم اطيحن هيج طيحه اشو جنهه السالفه
من تصير صدك واحد مايكدر يكضن رويحته ويعدلهه !!!

رديت البيت وماشفتهه اجيت انامن وطب بسام يحجي بالتلفون
اشرتله يروح وشمرت عليه البطل وهو ضل يكمز ويهوس
تالي طلع وانه ضليت اتكلب اريدن اغفى ماكدرت عاد كمت
طلعت تشيرت واخذته شميته ..
مخلوط بي عطرنه وعطرهه طاغي عله عطري ... هيج من
اشمه ترخى اعصابي جا عليش جدامهه اثورن واتنرفز ..
انه وين اريدن اصل بهالسالفه !!!!
شبيه ادورنهه وادورن العركه وياهه كوه وتالي اردن لعطرهه
اذوبن بي ؟؟؟؟؟

من رخت اعصابي بهالشمه كدرت انامن هالليله والصبح
كعدت سمعتهم يردون يرحون لبيت الشيخ طالبهم يجون
سامع بشمسه مريضه ويريدن شوفتهه ومايكدر يعوفن السلف

والله للظهر تحضرنا وطلعنه واشوفن ربى وجهه تفح وتكشخت
صح هيه ماتلبس ضيك من تطلع لجن كشاخه حيل بلبسهه ..
انه احسن الهه نظره ثانيه للدنيا ونفسي اعرفنهه ...

نزلنه لبيت الشيخ وتلكاهه بالاحضان وضل يشم بيهه وهيه
ساكنه بحضنه بس تعاينله وتبتسم .. كعدنه كِلنه وهيه مثل
مجانهه بسده والشيخ يحجي جلمتين ويرد يدير وجهه ليهه
ويتبسمون وانه مثل فزاعه خضره بنصهم جنهم يتمعشكون
واحنه نعاينلهم انه بدون شي انغث منهه الدور سوالفهه هاي
بوياااي اهجس النار تطلع من خشمي ...

راحت ويه امهه جوه واجوي زلم من الديره عدهم طلابه
والشيخ تغير ولاجنه هذاك اليشمشم بيهه مساع صارلك ذيب
اسود يهز الديوان هز بصوته انه اتعجب عليه شلون هيج
يصيرن شخصيتين !!!!!!

طلعت بعد مامشو الزلم انه وصياد وجم واحد من ولد عمومتي
ومشينه للشط صيدنا سمجات للعشه وتسامرنه شوي وردينه
كالو الولد احنه نشويهن وجبنه الحطبات وطب صياد انطاهن
لامه غسلتهن وملحتهن واحنه نحضر بالحطب سوينه سبع
شوايات وخليناهن وضلينه واكفين يمهن ونشوي جان يمر
علينه الشيخ وابوي وعمي حاتم ...

- هاااا كواكم الله
- هلاا شيخ الله يكويك
- اليوم الصيد جثير ماشاء الله
- اي بويه هاذ رزك شهاب
- هههه والله انك صدكت ياصياد عبن شهاب بينه هاليوم رزكه
وياه اجه جثير شلون كيفك وليدي
- عله الله شيخ مرتاحين الحمدلله
- الحمدلله
- اكولن شيخ اريدنك بفرد سالفه بالي من زمان
- امشينه يلا
- تسلم ياشيخ

نفضت دشداشتي ومشيت وياه غاد عن البيت ...
- شيخ انه سالفتي اريدنك تفهمني شبيهه ربى

-شنههههي

- شيخ احجيه ليك هَيج عدله

- اي

- انه هالبت ماارتاحلهه وحك علي وحك هالمغربيه ان ماطلعت
وراهه سالفه وسر جبير انه معتب وكلشي مافهم

- هااااااااا وانته عليش حارك رويحتك حته تعرفن سريرتهه

- لين انه حتسودن بمحمد ضالات خيطين براسي وحتكطعهن
هالبت شيخ اشوفن العجب وياهه تعرف شنهي العجب انه
حساسي مايخطىء بيهه لا وحك نور محمد

- اسمممع ياشهاب انته ابن اخوي وحسبت ولدي وعله هالراس
لجن شمسه ياشهاب شمسه خط احمر تعبره غصب عنهه تموت
ماكِلك غير هالجملتين زييين

- شيخ شنهي بروح العزاز خلصني من هواجيسي بيهه انه
وين ماروحن تطلع بوجهي وكل موكف يصيرن جدامي ولا الثاني اكللهه يابت الناس بيج شي اساعدج انه تنطيني كل جلمه
تخليني اشب بنار وماانطفي هاي انه وياهه صاير مناكرنه
صبح ومسه

- انته عليش حاط كورتك من كورتهه شعلللليك منهه لاتطلع
عينك عليهه يامصخم

- شيخ رحمه لذاااااك الاب الطيب انه اشوفن دم سنوني ولا اشوفنهه هيج احجيهه لك اي هالبت ربتلي عله بعلي

- اشوفنك نسيت رويحتك ياشهاب شنهيييي جم مره نبهت عليك
انه ماتصل صوبهه انته شنهي ماتحترم ماتسمع الجلمه

- لااا ياشيخ جلمتك عله هالراس والله بس انه اجيت احجيلك
الي بصدري انه هواجيسي بيهه ذابحتني تعرف شنهي ذابحتني
وفوكن منهه معاركنه الماتخلص انه اريدن افهم شسالفتهه
حته اجوزن منهه بلجن اعذرهه بشي لاسلوبهه وياي واكفن
منهه وتكف مني وانخلص

- انته متسودن موش ذاك شهاب الاولي

- اي بعلي صدكت خلصني شيخ بروح العزاز

- امشي رد لشغلك

- شيييخ

- امممممش كتلك يلاا ميل من وجهي يلا

- تآمر شيخ

مشيت وانه روحي بخشمي يمكن اعاركن حته خيالي هيج وصلت بيه الاعصاب جا شنهي انه اضلن معلك بهالربى
اريدن اطلعنهه من هالبال رويحتي تلوب عليهه وانه اكرهنهه
شلون رهمت وياي ماعرف حتسودن وحك الحسييين ...

ضليت مجابل هالولد وكاعد كملو النص الاول مال الشوي وردينه حطينه السبع سمجات الباكيه ...

كملناهن وكعدنه ناكل وانه ذبيت حركتي كلهه بالاكِل وحدي
خلصت سمجه وهالزلاطات والطرشي وياهه عدلت مزاجي
بيهن ... وضلينه كل ساع جاي ...

طلعنه انه والولد اشترينه حب وخذينه مفرش ودلال الكهوه
والكهوجي ويانه ورحنه كريب الزرع فرشنه والتمينه وكعدنه
وكلساع يصبلنه الگهوه عدلنه بيهه الراس وجماعه يكرزون
الحب انه ماكليته جيف شربت الگهوه ماحبن شي بعدهه
وكاعدين ونتسامر وهاذ اليشعر وذاك يرده وجان يجي علينه
وليد صغير كال ...

- منهو منكم شهاب
- انه خيرك ؟؟
- الشيخ يكولن خلي يجي يترس المبرده
- شننننهيييي انته تضحك علي لو شنهي سالفتك ياولد
- لا والله هو دزني كال اريدن شهاب يجي يترس المبرده هسه
- اهاااا
- كوم ياخوي لا تروح ضلوعك تتنعنع ههههههاااااااي
- انه خايف لا يفصلني من العشيره عبن طلايبي جثرت عنده
خلي اكومن واشوفن شنهي سالفه من رخصتكم
- الله وياك

مشيت للديوان والمبرده يمهه تانكي مليان ماي وبي سراحيه
اخذتهه وضليت اديرن للمبرده وارشن البوب وجان اكو فتحه
من البرده والشباج مال المبرده مبين منه الجوه واشوفن ربى
والشيخ كاعدين .. كلت هاي رادني اجي متعمد ...

ذبيت السراحيه وكربت للشباج وصرت اتسمع عليهم واعاينهم
جانت ربى ذابه ربطتهه ودشداشتهه ضيكه مخصره ورديه
وكاعده بسده ويشربون گهوه واشوفنهه شلون البسمه عله وجهه
تالي الشيخ رفع صوته وكاللهه ...

- اكولن شمسه شنهي ماتغنيلي الليله
- لا شيخي شلون مااغنيلك تدلل
- اريدن سعدي تعرفين شكثر احبنه من صوتج
- هههههه من عيوني شيخي

هذول منهم ؟؟؟؟؟ !!! انه بيه شي لو همه تغيرو لو شنهي !!

عاينتهه عدلت كعدتهه وصارت تغني بصوت شجي ...

- يمتى الكاك .. يمتى الكاك يامضيع سنييين العمر بفراكك
يمتى الكاك اغنيلك واجمع شوكي بااشواكك ...
.
.
ياواحه ورد وتفوح يااول عشك للروح ..سالفتي طويله وياااك
يمتى الكااك ....
لانتظرك واشد عيوني لهلالك واضملك جلمه مامرت على بالك
واطشن ضحجتي بوجوه عذالك ...
ياواحه ورد وتفوح يااول عشك للروح
سالفتي طويله ويااك يمتى الكاك ...
.
.
- الله الله عله هالصوت العذب كملي بعد ابوج انه مااملن من هالاغنيه
- ياحنضل فراكك ياعسل شوفك ..اضل عطشااان الهي الروح
بطيوفك ..ذبلت وردتي والماااي بجفوفك
ياواحه ورد وتفوح يااول عشك للروح
سالفتي طويله وياااك يمتى الكاك ...

- ااااه ياذاك الزمن اااه رديتيني وين ووين ياشمسه
- هههه شيخي احنه مو نكول ننسى
- ننسى بعد ابوج ننسى ...
وله هيه انه اعرفن  تحولت  بعد هالاغنيه  لابو نجمه
- هههههههه
- بعدج تنطري ما مليتي
-  شيخي هو اني متأمله بي شلون امل
- وان مااجه ؟؟
- يجي يجي اني واثقه يجي
- اخافن يجي وماتعرفينه
- لااا تدليني عليه نجمته
- ههههههههههههههه كومي بويه كومي انه لاجل عين ابو نجمه ضاملج شغيله تحبيهه
- صدددك جبتهه !!
- ههههه اي اي كومي بالمعرض طلعيهه هالباب الاول
- ههههه اييييي اخييراااً

اشوفنهه تضحك وكمزت فتحت الباب وطلعت علاكه بيضه
وكعدت بسد الشيخ وفتحتهه وطلعت منهه علبه بقلاوه زلابيه
وماعون جبير مال كنافه ...
انه كلهه بجفه وكمزتهه لحضن الشيخ وبوسته بجفه لااا وهوه
صوت ضحكته يرجن بالبيت ...

- من ايدي شيخي
- ههخخخخ زاد الحلا اليوم يفولن السكري
- ههههههههه خلي نضرب النظام اليوم بكيفنه
- انه ماخذ دواي وكليني بعد ابوج
- ههههههه من عيوني

مرتجي حضره الشيخ وحضره الشمسه توكله كبل ماتاكل
ومن كل علبه اكلت وتالي حطت الكنافه ونزلو عليهه اثنينهم
مارفعو روسهم لحد مانسفو الماعون هاي عود الشيخ عنده سكر!!!!

- شنو شيخي ماكو ابوذيه شي
- اسمعي هاي ....
صبرنه حان عله الدنيه ورعنان
كحيله عنان كطعهن وره عنان
لكه الخياله مو كدهه ورعنان
استهضم خافن تركبه الرديه

- الله بعد بعد شيخي

- اهااا اسمعي هاي ....
يكلبي بس المعدل ولك ماش
عمر خلصته بالعركه والكماش
فضلو عله الخلك سمسم ولك ماش
تحذر لا تلهمه بلا وعيه ...

- هههههههه ذكرتني بعركاتي ويه شهاب هو يشوفني ماش
ههههههههه
-ان اخوك يشوفن الشمسه ماش !!!
- خلي براحته شسويله
- ااااه كليلي شمسه اشلونه شهاب
- ههههه موش اجاويدي
- ان اخوك عليييش اخافن جيف اتناكرون
- لا لا هو صح يلح هواي بس ماعليه بي
- جا شنهي
- النفس غلابه شيخي
- اهااااااااااااا فهمت بويه فهمت ماتكملين
- شيخي مو تسويله شي خلي هو اله مواقف زينه وياي ماريد هو
هم يكرهني تره هو صح يتناكر وياي بس كلبه طيب خطيه
- هههههههههههههههههه بس موش اجاويدي
- ههههه ايي
- اكولن بويه كومي لدارج انه اريدن اكضيلي شغيله نسيتهه
- ماشي شيخي بس عود اخذ دواك قبل متنام للاحتياط يعني
خاف سكرك يصعد
- لااه بويه لاتخافين انه حديد وهالسكري يجي من المغثه
موش من حلا الكيمر هاذ
- ههههههه شيخي الله يخليك الي
- انه وياج لحين مايجي المسعد واسلمنج ليه واريحن
- لااااا والله شنو تعوفني والله لعد ولا اريده
- هههههه هاااا تنازلين عنه
- وعن اهله هم شنو كلهم مايجون بكد شعره منك شيخي اني
اشوفك دنيه وهمه اشوفهم نظره
- ااااخ من لسانج اليدولب هههههههه وياج انه اضلن يرويحتي
- يابعد كلبي وعيوني ونظرهه يابعد هلي ياشيخ
- ههههههههههههه تعاي ليه بويه اشمن ريحتج يشهد الله جيت
اتصركع يوم الدريت عنج طحتي مريضه
- اسم الله عليك شيخي هي كلهه نوبه حالهه حال غيرهه تجي وتروح ماعليه شي
-شمسه انه لو بيدي انعملج حته الهوه واجيبنه لصدرج ولا يضيكن نفسج دكيكه لجن امر الله ونرضى بي
- محمود مشكور ربي انطاني اياك بدال الصحه والهوه وبدل
الدنيا كلهه
- هههههههه يامسودنه امشي لدارج لا تعطليني تدريني ماكدرن
عله مفاركج
- لاا شيخي رايحه وباجر اشوفك الصبح حتى نطلع سوه مو تنسى شيخي عفيه
- لا بويه تآمرين انتي
- تاج راسي انته .. تصبح على كل الخير شيخي
- وانتي من اهله يابعد رويحتي

باس راسهه وهيه باست خده وراحت وانه واكف وفاك حلكي
وصافن وماحسن الا الشيخ جدامي ويحاجيني ...

- طب جوه يلااا
- شيخ
- جـبببببب ولاااا جلممممه يااا معزه انه اجيبن واوصي وافهمن بيك وانته تزل نفسك عله شمسه الشيخ يااااامنعوووول هيج علمتك تركيه نستك اصلك وطبايعنه يشهد الله لو ماالفضيحه وحلج الوادم الماينسد جان انه مكطع هالعكال عله متونك واسيبنك بهالجول ياااكليل الشررررررف حساااافه بيك التتتتتعب
- شيخ اسمعني
- كووووول
- انه مازلت نفسي عليهه ولا كربتلهه بشي انه بس لبسهه يضايكني واكولن ليهه تحتشم بلبسهه ماترد علي يجوز هيه
فهمت نظرتي لبسهه هيج لبعيد
- شوووف ياشهاااااب انته تعرف شي وانه اعرفن شي من
تكول شمسه شي مااجذبنه لو تحلفلي ميه يمين سمعععععت
- بالحسين بالعباس مامكربلهه بشينه غير عركاتنه انه ماواصل ليهه شنههههي شيخ تره انه شايف وشابع نسوان شنهي بس هيه
مره
- شهااااااااب هالمره اعديهه ليك مره الجايه وحك ابو فاضل
لاخذك واكسرن امتونك واخليك حجوه بلسان الشماته فهمممممت
- تآمر شيخ السموحه ياشيخ انه ماكاصد وياهه الزله وحك عينك
وهاي راسك احبه
- اكعد اكععععد
- صار

كعدنه وهوه جر الماي يشرب وضل يستغفر لحد ماهدىء عاد
حاجيته ...
- اكولن شيخ انته دزيت علي عليش ؟؟
- موش طلبتني المغرب احلن سالفتك
- اي
- وهاي حليتهه
-شنهي شلون
- فتح هالعكل وتعرف شلون
- شيخ انه مافهمت
- كلشي بالحكمه ياشهاب كلشي بالحكمه جيتك هنايه وشوفتك
لينه بيهه حكمه لجن فتح هالعكل واحسبهه عدل وراح تريح
بالك وتخف هواجسك وانه حته الابوذيات كصدتك بيهن
- اي اعرفن علي
- اي خلك فطن
- ان شاء الله بس كلي منهو ابو نجمه !!
- انه اروحن انام تصبح عله خير
- وانته من اهله شيخ

خوش طنشني والشمسه يكلهه تآمرين ....
كمت طلعت كعدت عله الدجه البره وبايدي عود اكسرن بي
وافكرن بحجيهم ...

هنايه ربى مختلفه جنهه غير بت يعني يجوز هيه ضامه هالشخصيه عننه ؟؟؟؟ لو بس للتحبهم هَيج تصرف !!!!
زين هي شلون عرفت انه دنت نفسي ليهه انه مامبينلهه هالشي
ومامكربلهه ومن اعاين لجسمهه هيه صاده بغير جهه ،، ووكت
الاحاجيهه عيني تكب بيهه النار من الاعصاب من اسلوبهه
ماادورن هالسوالف وياهه جا شلون عرفت ؟؟؟؟؟؟

كلهه بجفه وابو نجمه التنطره بجفه منهو هاذ ؟؟؟ هوه صاحب رسمه الايد والنجمه !! شنهو العرفهه بي ووينه هااذ. هسه ؟؟
تريده صاحب ،،حبيب ؟؟؟ انه اليوم يتكطعن خيوطي الضالات
اي ماتنومني الحكمه هالليله ....

.
.
يتبع ...