رواية من فجر ديسمبر الفصل السابع عشر 17 - بقلم Zoka 🌷

من فجر ديسمبر
🍁
🍁
بالليل طلعناهه من المستشفى بكرسي متحرك
لان الدكتور وصى ماتتعب نفسهه كلبهه ضعيف بعده ...
كعدوهه بحجره بسام وضلت امهه عدهه
انه بعده كسري باين عله وجهي لجن تذكرت
نذري وماردت اتماهل بي .. طبيت للحجره
خذيت هدومي وهيه جانت نايمه وطلعت
سبحت وبعدين اخذت سجاده وصعدت لحجرتهه فصلت عن هالعالم وبديت اصلي
وبالركعه الميه الاخيره دعيت ربي يهديها
علي ويملكني كلبها ...

جنت اسبح وطبت مرت عمي كالت ...
- ها تقبل الله شنو صليت مال اسبوع ليكدام
كم مره اجيتك وبعدك تصلي
- جان نذر ووفيته
- هاا شنو هالنذر كم ركعه
- ميه
- صلوات على النبي ليش يمه هالنذر المن
- بيني وبين ربي عمه
- يمه الله يريح كلبك وانشاء الله ينطيك عله كد نيتك
- ان شاء الله عمه انه راح انامن هنايه تره جسمي مكسر وغادي خرده
- اي نام عمه نام البيت بيتك يمه تصرف براحتك
- تسلمين عمه
- اني اجيت اخذلهه ملابس هسه ماطول
- براحتج عمه

كمت تمددت عله فراشهه وكبل غفيت عله ريحتهه ....
ثاني يوم كعدتني عمتي الصبح وكلتلي انزل
جوه لين راح تطلع للدوام تسوي الاجازه وترجع وحيدر بالدوام وعمي بشغله ...

نزلت جوه غسلت ورحت للمطبخ كلت اشوفنهه بلكي ترضى نتريك سوه
رحت دكيت الباب وسمعت صوتهه ..
- تفضل
- صباح الخير
من شافتني دارت وجهه وماردت علي انه
طبيت كعدت عله طرف الجربايه ومدنج
واحاجيهه ..

- ربى انه اسف انه سبب مرضج وتعبج ماجنت ناوي اذيج هالشكل بس من حركه
گلبي انعميت الي صار موش هين علي واعرفن موش هين عليج هم لجن انه گلبي
فلت من ايدي جنت ايام وايام كاضه عنج وماريدن نصل لهالحال هاذ وبعدت وسافرت
لاجل مايصير بينه الي صار بس ماكدرت
من كتلج احبج انه كاصدهه من كلبي ربى
انه انه ماضعفت جدام شي مثل حبج بالله العظيم هجست الدنيا بكبرهه اظلمت بعيني من وكعتي حته من كثر الدعاء يمكن ربي ملني من كثر مادعيتلج .. ماتحمل اشوفنج متاذيه بشي مو عاد اذاج مني انه اعترف غلطت بكلشي وياج ماجان لازم ابديهه هالشكل وياج بس بعد ماكدرت اضبط نفسي
اعذريني يابنت عمي

رفعت راسي وانه اهجس كلبي يدك براسي
وانه اعاينلهه وهيه هاديه ولاجنهه تسمعني
ولا تاثرت بشي ونظرتهه بارده مثل مااعرفنهه ..

- لاتنتظر مني رد لكلامك اخذ راحتك
- شني عليش هالشكل ربى كتلج انه اعتذر
- واني ماكتلك شي
- ربى دخيل ربج خلنه نتصافى جمره بكلبي صدج هاذ
- انته شتريد بالضبط
- اريدج
- شلون
- ربى انه احبنج وحك علي شني شلون اريدج مره ليه
- بس اني ماريدك
- ربى
- لاتكول شي تره اني مو دااقسه عليك بس
اني ماريدك لانك ماتحبني انته حالك حال كل الي اجو قبلك وراحو هم حجو وتوسلو وحلفو
وهذولاك همه كل واحد منهن بيت وعايله عنده
- وانتي تحسبيني جايج اضحك عليج
- لا ماتضحك بس انته ماتحب
- شني مااحب فسريهه بله اقنعيني
- شهاب خلي نكون واقعيين انته ماتحب الا جسم ربى شكل ربى عطر ربى بس شخصيتهه اسلوبهه شنو بيهه ماتحبه ولا تعرفه وماتتحمله اصلاً ف وين الحب الي تحلف بي
- وانتي ماتعرفين شهاب شني معدنه وانه اعرفن كلبي من يدك مره موش اثنين وجنت
اكدر اسوي كلشي وانه بتركيه ولو انه مثل ماتحسبيهه رايد جسمج وشكلج فميه الف وحده هناك اكدر اخذ منهه هالشي لجن انه
رويحتي ماترغب غيرج ومااجذب عليج
انه جربت مااطلعلج نفسي نبي زماني
احجيلج الصدك انه جربت اعيشن ليله ويه
وحده بس وروح امي الي مااحلفن بيهه جذب
لو عله كص اللوزه ماكدرت انه جنت ادورنج
بيهه وبكل بت تجي جدام عيني انه ادورن بيهه شي منج ومالكيت ولا اريدن الكه انه
كبل جنت اريدن انسحب من شباجج لجن لكيت روحي كل ماابعد اكترب ازيد من كبل
وجايه تكليلي ماتحب بويه انه عاشك مو بس احب

- اممم

- دخيل الله عله هالبرود العندج بويه رديلي رد يشفي كلبي بالعباس نار الشابه بيه ماتنطفي الا بيج

- اني تعبانه مااكدر احجي هواي

- ربى جلمه اخيره كوليهه واعوفنج بس ريحي كلبي

- نظرتي ماتغيرت بعدهه وماريد تفتح هالموضوع بعد وهسه اريد انام من رخصتك

- زين والاعتذار ماتصافينه

- انته هذا طبعك ماتغيره لا باعتذار ولا شي
واعتذارك مرفوض طفي الضوا وياك

- ماشي يصير خير

طلعت وركعت الباب حيل انه اعرفنهه ماتريد تنام بس تريد تخلص من السالفه ..

ضليت الوب من جهه كلبي الي تفشل وحب
وحده ماتشوفه اصلاً وماتصدك بحبه ومن
جهه زعلهه يزرف بروحي هو انه جاي هالاسبوعين علمودهه تاليهه حته حجي ماراح احاجيهه ونكضيهه زعل ...

حته مااكلت ضليت افتر بالحديقه وافكر شسوي واراضيهه عاد طبت مرت عمي
وانه ماصدكت رجعت رحت كبل لحجره بسام ومالكيتهه .. جنت مستعجل بدلت هدومي واخذت فلوسي وطلعت لاحسن
مكتبه وضليت اكلب بالدفاتر مال الرسم
واخذتلهه ٣ بدال الحركتهن وكلهن راقيات
من جنت ادفع الفلوس تذكرت من جنت اكللهه
"انه مااصرف غير عله امي ومرتي وانتي ولا وحده منهن "

ضحكت عله هالقدر وين وصلني ...
حطيتهن بعلاكه من هاي الكارتون وكلهه
كلوب وشغلات وحطيت كارت كتبت بي
" اعتذر لإذيتج "

رجعت وخليت العلاكه يمي بالحجره وانتظر
فرصه مناسبه وانطي ليهه ..

كملنه الغده وانه ماشفتهه سألت عنهه كالت
امهه صعدت لحجرتهه ...ضليت انتظر لليل
صعدت حطيت العلاكه جدام بابهه ودكيت
الباب ونزلت ..
وضليت كلساع اعاين ليهه واشوفن العلاكه
بمجانهه غديت نار كبرى اي شني اسويلج بعد وترضين !!!!

ثاني يوم شفتهه نزلت سبحت وتريكت انه
عاينت من الدرج شفت العلاكه مخليتهه بسد
الباب يعني ماتريدها !!!

اجيت اريدن احاجيهه تتهرب مني المجان
الي اطبله تطلع منه وانه منا اعصاب وحرت
شسوي اخافن اروح احجيلي حجايه اضيع الاول والتالي وماكضن روحي جدامهه
عفتهه براحتهه ...

ورحت لبيت اهلي متونس هناك ويه نعيم
شويه صحته تحسنت وكمنه نطلع ونسهر
لجن كل بالي يمهه اريدن طريقه اصلهه
مامش شي يوصلني لكلبهه ..

ماكدرت اخلصن الاسبوع وانه هناك رديت
رجعت ليهم ... عيني ماكدر اشيلنهه من عليهه وافتر وراهه مثل جاهل ومضيع امه
بس اريدن منهه حجايه بس هيه ابد حته صوتهه ماتسمعني اياه خلتني اتكرضم بصدهه هاذ ...

جنت بايت يمهم والصبح سمعت صوت مرت عمي طلعت لدوامهه وضلينه بس احنه بالبيت
صعدت لحجرتهه طبيت كبل بلا ماادك الباب
وانه موجر نار ...

- ربى ليمتى تضلين هالشكل وياي هااا
حاجييييني لااديرين وجهج
- شتريد
- انه لو انتي الي شتردين بعد حته ترضين
حركتي اهل اهلي شتردين بعد فهميني تعذرتلج وجبتلج بدل هالدفاتر و
- هاا ذكرتني دفاتر اي دفاتر

بكل عصبيه منه جرت شكو دفتر جدامهه
وشمرته جوه رجلي وراحت جرت كارتونه
من جوه الجربايه طلعت منهه شكو دفتر وهم
شمرته كومت كل دفاترهه جوه رجلي ..

- هاااك اخذهن اني ماارضى بانصاف الاشياء من حركت نص هاك كمل البقن
شايفهن هذني كلهن جانن تعب عمري جانن
كل شي حلو بحياتي كله هسه مااشتري برماد
تفهم .. اخذهن واطلع بره ماريد اشوف وجهك كدامي ولا اريد اسمع منك شي

- رببببى كااااافي كاااافي يابت الناس غلطت
وتعذرت شلون احركلج روحي وترضين

- لاتطلع كدامي بعد وماالي حجي وياك
واخذ كل هذني وياك ان ماحركتهن انته اني احركهن

- يابت الناس هواي كبرتي السالفه بويه انه
بروحي شاريج ربى لا تحركين گلبي ازيد
من حرگه هاذ

- وخر من طريقي

دفعت ايدي وطلعت وانه ضليت اصرخ وادفر بالهدفاتر تالي كعدت وانه ايدي ترجف
من الاعصاب شسويله هالخشم اليابس هاااذ

استغفرت ربي وكمت لميتهن ملهن بالكارتونه
ونزلتهن وياي للحجره قفلت الباب وكعدت
اطلع واحد واحد واعاينله جانن من اول ماباديه بالرسم وكلشي مر بحياتهه راسمته
حته باكيت الحليب بالفروله هم راسمته
الهور والشجر والمشحوف ..تنور الطين
الزرع ..شكل بيت الشيخ .. غروب الشمس
وشكل طفله لامه نفسهه ونايمه ... شكل
الايد ام النجمه جنهه جانت تتدرب عليهه عبن
مرسومه اكثر من مره بنفس الورقه ...

من جنت اشوفهن شكثر متعوب بيهن واذكر
شلون شمرتهن جدام رجلي بحركه كلب عرفت شكثر انه اذيت كلبهه وضاله كاتمه
قهرهه بصدرهه وتكابر وتعاند ..

انه من هالموكف عرفت انهه من اتأذه من شي تتخله عنه وتعيش الوجع ولا تنزل دمع
هيه تكابر ويه نفسهه ازيد من اللزوم ..

للعصر رديت البيتنه واخذتهن ضميتهن بحجرتي وهجست مشتاك لامي اريدنهه
طلعت صورهه وضليت صافن بيهن
وثاني يوم من الفجر طلعت للنجف بدون
مااكول لاحد ... وهناك زرت الامام علي
عليه السلام وطلعت اشتريت ماي ورد
وبخور ورحت لكبرهه ...

انه كبل جنت دايماً اسويلهه ثواب اذكرهه بكلشي لجن مااجي وازورهه عبن ماريد
اضعف ويرجع بيه الوجع لجن هالمره انه
جيتهه مشتاك اريدن ذاك الحنان من ايدهه
اريدن انام بحضرتهه وامن من الدنيه يمهه
مثل كبل من اعرفن امي موجوده مااهتم لشي بعد وهالساع انه محتاجهه ...

دنجت غسلت الكبر وعلكت البخور وقريت الفاتحه وضليت احاجيهه ونزلت دموعي
عله شوكهه بس ارتاحيت بكربهه حسيتهه
من صدك يمي ...

ودعتهه ورجعت للعماره ... ضليت نايم اليوم كِله لحد ثاني يوم اجاني صياد وكالي
عرسه هالاسبوع ويريد ينزل يشتري هدوم
عاد طلعنه للسوك واشترينه اللازم واختاريتله
قاط العرس توسل راد مني اشتري بس انه
مالي نفس بكلشي بالكوه متحمل روحي  ...

صار اسبوع العرس وكلهه مخبوصه الا انه
حته لحيتي مازينتهه .. واليسألني اكِله تعبان

سمعت كبل يوم الحنه ربى جايه ويه اهلهه
بيت الشيخ وزهره رادت تروح ليهه ..
عاد اخذتهه وبالدرب زهره كالت ...

- خويه تره من هسه اكِلك انه ماحبن حنه الزلم اريدن اضل يم بيت العروس

- شني وانتي بكيفج

- اي جا شني هسه انه شردت هوه من يرحون ايحنوهه انه اضلن هناك ماارد وياكم
اريدن البس بكيفي اكعد اشوف انشاف هنايه
اضل شعندي حابسه روحي بزويه عليمن

- اي ضلي وفد مره الصبح بالزفه رجعي
وياهم شكو شعندج بعد

- هم خوش فكره اضلن وارد ويه الزفه

- انصمي لج تايهين بويه احنه شني

- خويه هسه شني هذول بيت عمنه وهذول هم شني شتفرك

- وين ماانه اكعد انتي تكعدين ززززييين

- زين خويه زين

وصلتهه وضلت روحي مفرفحه تريدن شوفتهه ومنين ماادير وجهي مالكاهه
عاد ضليت احوم يم البيت لحد ماشفتهه
جايه من الزرع وهيه لابسه الدشداشه
والشال طالعه مره معدله ...

من شافتني دارت عينهه جنهه ماشافت بني ادم واكف جدامهه بالعباس انه هيج عناد وبروده اعصاب مشايف ولا راح اشوفن

ضليت هالليله سهران ويه الولد ونضحك
عله صياد ونلاشي لحد ماتعبنه ونمنه ..

ثاني يوم بدت ترتيبات الحنه والعشه وجيب
الكراسي والماي والببسيات وتيبست رجلي
من الوكفه من الصبح لحد مااصار العصر
يلا رحت بدلت ولبست بنطرون وتشيرت
عاديات وطلعت وياهم لبيت العروس ..

هو طب يحنيهه واحنه بره نهوسله والكل
خابصين الدنيه ابن شيخ بعد ...

ومن الكل طلعت انه ضليت اريدن ارجع زهره وياي دزيت عليهه وضليت باب المطبخ واكف انتظر ...

عاد اجتي زهره واشرتلي اطب وجانت حاطه
شال عله جتفهه ومتمكيجه والشعر محلول ..
- لج هاي شمسويه بنفسج
- شني خويه شمسويه
- عليش هالمكياج والشعر هاا
- خويه شني غير حنه بعد تريدني اكعد
بالعباه ووجهي ممولح رحت لربى كتلهه
تمكيجني هيه خوش جانت مسويه مكياجه
مال اكابري موش هذن المعدان الملزكات اللمع بخشومهن
- هاااا وهيه شلابسه هم مشلح مثلج
- ياااه انه مشلح !!! اشو ثوبي يسحل وراي
وين المشلح خو لو تشوفنهه شلابسه جان شفتني شلون مستره
- هااااا هيج الحجي
- اي خويه لاتضلن ترزل بيه انه لبسي محشم
- ماادري مااقتنع هيج
- يعني شتريد اشوفنك البنيات وحده وحده
واكلك شوف انه احسن من لبسهن هيج تريد
- اي شكو بيهه
- ياه يااااه اشو جن رويحتك تحومن هنايه خويه شني سالفتك
- مامش شي امشي صيحي ربى اريد اكلجن
فد حجايه
- خويه شني اجرهه من نص النسوان
- امشششي بلايه لعلعه وهاا لا تكليلهه شهاب
يريدج بس جيبيهه وتعاي
- بالعباس اكصنهه لايدي اذا ماطلعت وراك
كضيه مدوهره
- خااايبه وحريشي انه شحجيت امشي تحركي
- رحت خويه رحت

جنت كاعد عله كرسي بسد الثلاجه مامبين
واهزن برجلي يمتى تجي اريدن املي عيني
منهه ذبحني شوكهه وصدهه ليه ...

وعله كعدتي هاي اسمعن صوتهه ويه زهره
عاد كمت وكفت وعاينتلهه هيه من شافتني
رفعت حاجبهه باستغراب وعاينت لزهره
وزهره دنجت ماعرفت شتحجي ..

انه ضليت اعاينلهه من كعبهه الابيض ورجولهه الزبده وثوبهه الذهبي الي لازك
عله جسمها وردانه لحد العكس وكلاده
شمس الشيخ تبرج بركبتهه ولمعتهه ويه
لمعه الثوب رديت صفنت بوجهه مكياج جوزي طوخ بس هلكد مخلي هالعين تلمع لمع من الزراك وشعرهه الكصير ملولو والكذله
صايره صفح نسيت حته شردت احجي
وانه جانت لحيتي شعلوهه ووجهي تعبان
وحته مكاشخ ...

- زهره مو كتلي تريديني بسالفه هي هاي
سالفتج!
- هاا خيه والله ماعرفن شكولن
- انه دزيت عليج اريدن انطيجن شغله اثنينجن
- جنت تكدر تنتظر من نرجع للبيت محلوه وكفتنه هيج

ابتسمت وكربت ليهه دنجت وشاورتهه
- كلبي من الشوك مل ياشمسه
- امم

بعدت وطلعت من جيبي اسوارين واحد
بي حرف Rوالثاني Z ..

- هاي جبتهن الكم من النجف
- شني خويه يمتى رحت للنجف
- رحت هسه شعليج يمتى
- عليش ماخذتني وياك ازورن امي
- غير مره اخذج

مديت ايدي لربى واعاينلهه بنظره اريدن
احطهه بنص ضلوعي واشمن كل ذره عطر
بيهه ... لجن هيه تكابلني بالصد والبرود
وبلايه ماتعاينلي جرت السوار ...

- شكراً
- مشكور خويه عاش ذوقك هسه اروحن
اغور بي كل البنات عبن انه وربى نفس الشي
خلي يموتن بغيضهن هالحيايه ،، لبسنياه خويه
- جيبي

اخذت البسه لزهره وعيني كلساع تروح لربى
وهيه كاضه السوار ومدنجه تعاينله وشعرهه
ينزل عله عيونهه وترفعه باصابعهه الرفيعه
دخيل محمد شلون بساعتهه اشتعلو اجدادي

زهره مخبوصه تضحك وتكمز وبس تريد تفلت وتروح للبنيات وانه عيني هامت بيهه
نسيت اختي موجوده وضليت صافن عليهه
كل شبر منهه يشل حال حالي ...

جرتهه زهره وراحن ركض جوه وانه اعاين
لظهرهه وطولهه بالله العظيم ماعرف شسوي
انه حتسودن وعلي لاكادر اصبر بلياهه ولا كادر اصل ليهه واطفي ناري ...
عمي كلشي ماريد بس تحاجيني مثل ااوادم
بلايه خشمهه اليابس وحجيهه الجنه سهام
وتزرفهن بروحي ...

طلعت ورديت لبيت الشيخ وهناك جانت باديه الحنه والركص الجوبي والمواويل ومعلوكه
الامه .. انه اريدن اطلعهه من بالي اهجس هالهوه موش كافي لريتي ونار تسعر بيه
ان ماكضيتهه واجعصن ضلوعهه بالحضنه
ماارتاح ولا يصفالي بال ....

صار العشه ما كدرت اكل عاد ضليت الوب
وتاليهه وكعت عيني عله تكه جكاير رحت
جريت باكيت واخذت جداحه ومشيت من يمهم ... رحت كعدت عله كرسي بعيد عن هالوهسه وكضيتهه جكاره وره جكاره
وكل ماتخلص وحده ادوسن عليهه برجلي
بكل حركه كلب جني ادوسن عله كلبي هالشكل اريدن اسوي بي ....

انتبهت نعيم واكف فوك راسي اشرتله يكعد
وهو جر الكرسي ودناه يمي وانه بعدني ادخن...
- هيج مارايد رويحتك حركتهه حرك بالدخان
انطي مفكه شبيك مهموش جكاير
- خلني انه ان ماحركت هالجكاره احركن روحي
- دخيلك ياعلي هاي شجاك
- مامش شي
- هااا هالسوالف مال العشاك ماتعبر علي
سولف شبيهه وياك
- حركت اجدادي شبيهه بعد ،، خشم يابس
عناااد اكشر وجمال اوووف دخيل الله تخليني اتكرضم بكل شوفه اسلوبهه جااااف يشك الروح وانه كلبي كل حب ترف يحبنهه شلون ارهمهه وياهه ماعرفن
- تهدى تهدى
- منين الهداوه اجيبنهه هالبال المصخم مجلب بيهه مجللللب انه شجابني لهالدرب من خرب
بحظي من ساعه السوده الرديت بيهه
- يابه هي قسمتك هاي بعد لو راجع وره عشر سنين مقسومتلك هالبت تعلعل گلبك
- ماتصيرن صدك وتصيرن قسمتي بويه نذر علي اعشي الديره كلهه بيوم العرس
- ههخخخخخخخخخخ من طاحضك اذا هيج
يامدوهر هاي هيج عاشكهه
- مو سالفه عشك بس انه مشلول حالي بيهه
لك بويه بذاك اليوم اذا صارت راح يصفى
بالي واخلص من المعارك وياهه ومااضلن
مشعول الاسلاف بشوفتهه ااااااخ بويه جنه
دخيلك ربي ماتعاين لحالي وعلي زلمه فقير
ومااضاحك عله البنات بس هالمصكوعه هاي اريدنهه
- هههههعه انه كمت اتخيلك تهز بزفتك
- حته اصبعتين اطك بس خلهه تصير
- جا ماتروح تخطبهه من عمك
- تههههي حته خاف هسه اشوفنهه ساعه
بعد تحرم علي اعتب دارهم بويه شبيك انته
هاي بخشمه اليابس يمكن حته خيالهه ماتخليني المحه بعد واموتن بشوكي
- وهيه شدعواهه هيج شني ماصارت بت مثلهه
- وين اكو وحده مثل احبيبتي عمي حكهه
تدلل وحكهه تنغر جا ياهو الي بجمالهه
- انته مسودن ماعليك عتب هاي طلع الوادم
كلهه فزاعه خضره وبس حبيبتك الله ناطيهه
حسن
- ايييييه بعلي انه هيج الوادم بعيني صدك
هالشيخ من كال شمسه ااااوف يمه مااتعاينين
حالي ترضيهه هالشكل وليدج يتكرضم من وره هالبت.!!!!!
- ضل انته ناجي وانذر وحش بهالجكاير
انه اكومن خنكتني
- مودع بالله ياخوي

خلصت هالحنه وانه كاضيهه بس جكاير
لنص الليل راسي هاج علي سطرني رحت
لبيتنه وكعدت زهره جابتلي حب وجع راس
وراحت تسويلي اكل وانه كاعد يمهه بالمطبخ

- اكول زهره  انتي مو جنتي تردين تباتين شرجعج
- عبن ربى مارضت تضل وياي انه هم كلت
شعندي ضاله ورديت
- هااا منهو رجعكم
- حيدر اجانه
- اي زين
- خويه شسالفتكم انته وياهه اشو جن كلوبكم
موجره هيج هجستكم
- شني ششفتي منهه
- ما شفت شي لجن هيه بس تافف وكلبت
خلقتهه من ردينه كلبي حسني جن بيناتكم سالفه
- هااا اي متعاركين
- يااه عليش خويه هاي طيبه عليش تعاركهه
- خشمهه يابس
- لاااه والله انك ماتعرفهه جنهه الندى هيه
- بس وياج وياي لا جنهه توثيه
- ههههههههههه وانته عليش حارك روحك
عيفهه براحتهه
- هسه سدي هالسالفه راسي يوجعني ومالي خلكهه
- اكولن خويه فرد سوال بالي تجاوبني علي
- شني كولي
- بروح امي عليك  عليش كصيتهه كص بعيونك اخافن بالك شي منا منايه
- خايبه وزمخ اشو لسانج طولان
- هسه شني انه اكولن اخوي كبر وعله باب زواج واريدن اشوفن شني باله
- مشكوره خيه حيري بروحج انه اعرفن ادبر اموري ومن اريد ازوج مااجي اكلج
دوريلي انه اخذج كبل للمشيه
- يماااي يبعد رويحتي هيج واشوفنك عريس
هسه ماكتلي عليش هيج تناظرلهه
- هيه حلوه شسوي يعني
- هههخخخخخخخخ صاير ادور حلوات
- بسسسج عاااد ماخلص هالاكل
- اي اي خلص

كعدت اكل وهيه كلساع تتمضحك وتكول حلوه ها .. لحد ماانه انفجرت بالضحك وياهه

ثاني يوم الكل مخبوص بالعرس من الصبح
وانه رحت حلقت لحيتي ولبست دشداشه
نيلي وشماغ وطلعنه بالزفه وصار الرمي
والتهوس والامه مكلوبه ... عاينت زهره
وربى مايتفاركن يكومن ويكعدن سوه فرحني
هالشي احبن اشوفنهه تختلط بالوادم وتطلع من وحدتهه شوي ...

صار وكت العشه والكل ملتمه ومخبوصه
هاذ اليودي وهاذ الي يجيب ....
ماخلص هالعرس الا واحنه مفصوم ظهرنه
اريدن شوفتهه وماكدر اطب كلهه ملتمه جوه
عماتنه وبناتهن ...

كلت الصبح اشوفهه عبن عرفت انهم مايرحون هاليوم ... رديت البيت وجان
اجتني زهره وانه متمدد ..

- اكولن خويه
- هاا
- تدري شصار اليوم من جنه بيت عمي عمران
- شصار
- موش ربى لابسه ثوب طويل اجتي رباب
وداست عله طرف ثوبهه ودفعتهه جان تكع
ربى عله مره وهاي طلعت خالتهم الجبيره
- اي
- اي جان كضت رباب رزلتهه رزاله وكعت
ماي وجهه ورباب ماسكتت وكبت العيطه بينهن بس هاي الحجي احنه اخذناهن بالمطبخ
كلنه خطيه العروس تروح تنهبط من العركه
- اي وهسه انه شعلي بهالسوالف
- جايتك السالفه .. من فكت العركه بينهن
ربى حجت ويه المره وكالتلهه .. انه ماريد
احاجيهه والصار خلي يعدي ماجان اله داعي
الصار .. هذيج كالت .. لا انتي تسكتين هالمره انه شفتهه ورديتهه وكضيتج مره الثانيه يجوز تسوي الاكبر منهه وتروحج
شر النفوس يعمي .. جان ربى كالت ..
كلمن ينال جزا اعماله لا اني الادفع عنهه شي ولا هيه خليهه شتريد تسوي تسوي وترخصت منهه ومشت ... ليش ما انه جاي
اطلع وراهه جان جرتني وكالتلي
هاي بنت من ؟؟ عاد انه كتلهه بت عمي حاتم
كالت شوفيني امهه ورحت صحت لامهه
ووكفت سمعتهه كالتلهه هالاثنين احنه يمكم
وامهه رحبت بيهه
- يعني تريد تخطب مو
- اي مبينه هيه كِلش حبتهه
- وانتي من تعرفينهه هيج عليش ترحين تصيحين امهه عليش ماطلعتي نفسج من السالفه دازج تشتغلين دلاله هناك
- شني خويه المره سالت وانه دليتهه شني
ماغلطت
- غلطتي ونص بالله العظيم هالسالفه ان انعادت يازهره اكسر اضلوعج كومي منااا
يلا وتكليلهه لربى باجر ان جت هالمره ماتطلع ولا تشوفهه خيالهه زيييييين
- شهاب
- زيييين لو لاااا
- زين زين
- يلاا ولي من وجهي
- خوويه
- من احترك اخوج امشي ولي منا

زمخت بيهه وهيه طلعت وانه طار النوم من عيني .. النوب علي اختي تروح تجيب خطابه للي اريدنهه من خرب بحضي المصخم اي والله ...

ضليت ادخن وانه افتر بالحديقه وافكر شلون
احلنهه هاي راسهه كوي وماترضى بساع
ومنا هالوادم عينهم عليهه يخلوني اشب بنار
فوك ناري هاي ... نمت وجه الفجر وللظهر
طلعت اتمشى بالزرع ومناك افتريت لبيت الشيخ سالت عن زهره كالو ويه ربى طلعن
يتمشن .. ورحت وراهم اعرفنهه تروح للنبكه

من وصلت ليهم جانن كاعدات ياكلن النبك
بالفي ...
- السلام عليكم
- عليكم السلام
- زهره كومي انتظريني هناك شويه
-امشي زهره نرجع
- انتي ضلي عندي حجي وياج
- يلا خويه انه انتظرك

راحت زهره وانه وكفت جدامهه وراسي مدخن من الاعصاب وهي صاده لغير جهه

- حجتلج زهره شوصيتهه
- اي وانته مالك دخل بيه اريد انزل مانزل معليك
- سمعيني ياربى انه خلكي طال وياج تزعلين وتصدين عني اعذرج والج كل الوكت ارضي بي مااكلج شي لجن تطلعلي سالفه مثل هاي
واسمعن بوادم يردوج لو يفكرون مجرد تفكير
تصيرين ليهم مره وحك علي وحك علي احركنهم واحركج فهمتي
- شهاب تره هواي تدخل بحياتي انته
- مالي شغله بحياتج شتسوين سوي هسه انه حاجي شي بس هالسالفه خليهه ترجيه باذنج
خاف عبالج اسافر بعد جم يوم وعبالج اعوفج
لا وروحهه لامي لو بعد ميه عام واسمعن
ببني ادم رايدج ماتعرفيني شلون اصير
- واني لا اريدك ولا اريد اي واحد هم خلي هالسالفه بالك ولو تجيني الف مره هم مااقبل
- هااا عليش بله
- الي اسبابي
- واولهن ابو نجمه مو ،، اي بلايه هالنظره
كتلج انه اعرفنج باشبارج مو عاد مااعرفن بيمن تفكرين وتحلمين
- ضل فكر براحتك وكافي تلحكني
- انه بعد حجيت وان سمعت صاير غير حجي صدكي ماتلومين الا نفسج .. انتي
مرتي انه مايصلج لو خيال ثاني وانه اشمن الهوا فهمتي .. حطي هالحجي جدام عينج
كل عمرج زين !!!

ركزت بعينهه وبيهه نبره غضب بس كاتمه عليهه .. عفتهه ومشيت لزهره وكتلهه ترجع
ليهه وانه طلعت رحت لنعيم ...

جانت امه مسويتلنه عصريه خبز مكلى وعليه شكر وجاي وحاطين الصينيه باب الشارع
وكاعدين ناكل ونضحك عله الرايح والجاي
صار المغرب رديت لبيت الشيخ جان صياد
كاعد بالديوان هم سلمت عليه وكعدنه تعشينه
ويه الشيخ وجان وره العشه كال الشيخ اريد
اروحن اشوف الجده واسلم عليهه عبنهه
جانت تعتب عليه مايسال عليهه ...

مشينه انه وياه وابوي وزهره وربى وامهه
جدامنه يمشن ...
طبينه وكعدنه سلمنه عله الجده والشيخ وياهه
يتلاشون وتساله عله اوضاع السلف ..
كمت انه طلعت بره والجو بارد هالليله
وعاينت ربى تتمشى من بعيد وتلعب بطرف
شالهه مارحت ليهه عفتهه كلت خلهه براحتهه
طلع الشيخ واجه يمي وكفنه غاد عن البيت
ويحجيلي شلون صياد فرحان بزواجته وجان
يكلي شناوي تسوي وره تخرج وجان يجينه
الكهوجي يصيح ..

- يااشيخ الحك ياشيخ
- شني شمالك
- محروستك شمسه

انه بس اسمعت اسمهه ركضت بلايه وعي
كبل للبيت كلت هاي هم وكعت وكلبهه طبيت
ركض للديوان ولكيتهه تتشاهك بحضن امهه
من شافتني رفعت ايدهه وصاحت باسمي
دنجت ليهه وجرتني من جتفي كربتني ليهه
وهي صوت نفسهه الي يخوف باذني يعلى

- شهاب الحك اخوك حيضيع من ايدك روح
الحكه
- منو منهم منووو
- محمد
- شماله فهميني
- لك روووح امشششي روح

دفعتني ورجعت راسهه بحضن امهه وهيه
تتشاهك ووجهه انكلب احمر دم انه كمت ركضت طلعت اسل عن محمد ودلوني
عله الدرب المشه بي عاد اخذت السياره
وشخطتهه ومشيت واحنه من عوايدنه لازم
بكل سياره نحط سلاح .. طلعته وسحبت اقسام وحطيته بحضني....
.
.
.
يتبع