رواية من فجر ديسمبر الفصل الثامن عشر 18 - بقلم Zoka 🌷

من فجر ديسبمر
🍁
🍁
خليت السلاح بحضني ولحكته وجان اشوفن
بايسكله مطبوك يم نخله انه طبكت بعيد عنه
ونزلت وبيدي السلاح وركضت ادورن عليه
وجان اشوفنه واكف ويه ولد اثنين ويمهم
دراجه تكربت وختلت وره النخل واسمعه
يكول لمحمد

- انه من اول كتلك شكد ماتدفع انطيك هسه
جايني ولا فلس شني انه اوزعهن ثواب لروح جدك تجيب فلوسك تاخذ ماتجيب ولي منايه

- ماعندي هسه كتلك اصبرلي جم يوم واجيبهن انه يمتى خلفت وياك بالفلوس

- حجي يفيدك هاذ .. جيب العندك يلا جيببب

- مانطيهن هذني الي ماانطيهن ماانطيهن

ضلو يتعاركون وجان اسمع صوت السلاح
وانه كبل ركضت جريت محمد وخليته وره
ظهري واجتي الجيله بزندي .. انه كبل
رميت عليهم اثنينهم واحد بصدره والثاني
بظهره عفتهم مجطلين بالكاع وجريت محمد
الي جان يرجف ويهذي
"ماانطيهن هذني الي ماانطيهن " احاجيه
جنه مايسمع جريت ايده فتحتهه والكه بيهه
جيس بي طوز ابيض رديت عاينت لوجهه
العرك يزخ ويرجف رديت رحت للولد
فتشت بجيوبهم لكيت مثلهن جيسين وجيس
بي حبوب ناعمه بيض عرفتهم هذول مخدرات واخوي محمد متعاطي مخدرات

انه نسيت الجرح والدم الغرك هدومي وضليت مشدوه شسوي بهاذ هسه !!

اثنين جتلتهم ودمهم بركبتي وهاذ منا مدمن
شكولن لهلي شسوي !!!

جريته للسياره وخذيت منه الجيس ضميته
بجيبي وهوه تسودن يصرخ ويضرب براسه
عاد زمخت بي وضربته راشدي ..

- اصبر اصببر خلي نصل البيت وانطيهن الك
- هذني الي الليييييي
- اي اييي الك ماانطيهن بس هسه نصل وانطيك تره اذا اسمعلك صوت هسه افرغ المسدس براسك فهممممممت
- اي اي ترجعهن الي الي اي
- اششش اشششش مااسمعلك نفس

هوه خنس وانه طلعت كبل للمستشفى مو مال اكع هسه وهالسالفه براسي رادلهه حل ..
قفلت السياره عليه وخليت الحارس يحط عينه علي كتله اخوي عنده صرع وهوه ضل واكف يعاينله من بعيد ....

طبيت للطوارىء وانه بالكوه اتوازن بمشيي
وايدي تنكط دم من اصابعي وبلوزي كله دم
وراسي يفتر كعدت واجتي الممرضه كصت
البلوز من يم الجتف وبدت تمسح بالدم وبعدين
طب الدكتور وصار يسالني شلون الحادث وسوي بلاغ وهالسوالف .. كتله عدنه عرس
واجتي هيج تايهه .. هوه مااقتنع بحجيي لجن
انه مو بحاله ...

خدرو ايدي وبدو يطلعون بالجيله ويخيطون
الجرح وتالي حطولي بطل مغذي عبن نزل
ضغطي حيل وبين مايجيبون بطل دم ..

انه متمدد وافكر شراح يصير بعد ماانجتلو
هذول والمن اكول اخاف ان عرفو اهلنه اطش بين الوادم عله ابو محمد مدمن مخدرات وتضيع سمعتنه واحنه عمنه الشيخ

وشلون لو جوي اهلهم لذولاك وصارت فصول شيفضهه النوب !!!!

ضليت ساعتين عله ماخلصت المغذي والدم
وطلعت شويه ردلي توازني .. لكيت محمد
نايم بالسياره شغلت ومشيت للبيت وانه
كل ساع اسبن بي مدري انقهر عليه ماعرفن
راسي مسطور !!!!

طبكت السياره وكعدته ...
- محمد تسمعني زين ركز وياااي ركززز
- اي اي احجي اسمعك خويه
- راح انطب هسه كبل تصعد لحجرتك
وماتفج حلجك بحجوه جدام اهلنه وامك شتسألك كللهه مامش شي فهممممت
- اي فهمت
- يلاا كبل تصعد وتقفل بابك مااسمعلك حس
زييين وانه اجيك اكملن جم شغله واجيك
- زين

نزلنه وهوه كبل صعد وانه طبيت الديوان
وعاينت ربى غافيه بحضن الشيخ من شافني
بهالحال ايدي مشدوده وهدومي كلهه دم
كبل نزل راسهه من حضنه واجاني ومرت
عمي هم اجتي ولطمت عله صدرهه وجده
كامت تولول ...

- يابه فكونه مامش شي سوالف رجال
شلون صارت البت

- نامت قبل نص ساعه وشويه ها احسن

- عمه ماتخلوني اخذهه بنفس للدكتور انه كل مره ينشف دمي بوكعتهه ماتكلولي شلون صابرين عليهه هالشكل

- ليش احنه بيدنه شي عليهه هاي قسمه ربنه بعد

- شهاااب

- اي شيخ

- امشي بدل هدومك وارتاح وعوف الحجي

- اي انه جنت اريد اروحن يلا من رخصتكم

طلعت ورحت غسلت وبدلت والنوب اجتني زهره وتلطم شبيك وشبيك سكتتهه وتمددت
اخذتلي غفوه شويه من التعب وهالوجع مال
الخياط بدأ يطلع وكعدت عليه الوبن منه

كمت رحت لمحمد كبل .. جان قافل الباب
عاد ضليت ادك بي يلا فتح .. جان شكله
يخوف وجهه مصفررر وشفايفه ترجف رجيف ودنج لرجليه مجلب بيهه ..

- ابوس رجلك انطينياهن شهاااب ماكدرن بعد انطيني لو كطره منهه بس اشمنهه دخيلك

- كوووم كوووم اكعد فهمني شني سالفتك
كوووم احاجيك

- اريدهن انطيني كطره منهن بس اشمنهه
انه مااخذ بعد اي ماخذ بس هالنوبه اريدن

شفته مو مال واحد يفهم منه شي عاد جريته
وكعدته ع الجربايه وضليت اهز بجتفه

- جوااازك وين اسمعننني بس اسمعننني جوازك وييييينه احجي تره ماانطيك احجججي وينه

- بالكنتور بالجنطه السوده

دفعته وكمت انبش بالكنتور لحد مالكيته
حطيته بجيبي وطلعت الجيس هوه من شافه
كمز عليه ويتلاهث بالكوه وخرته مني ايدي
وجعهه ذبحني وهاذ يكمش بيهه ..

ذبيتله منه شويه عله الميز وهوه ضل يشم بيهن والباقي كام يبلعهن وعاد يلا فك ورجع
لوعيه وكام تمدد بفراشه وتغطى عاد رحت
وكفت فوك راسه ...

- منين هذول الجماعه من يمتى انته هالشكل
- هذول من الصوب الثاني عرفتهم من كبل سنه ونص
- عليش تعاركتو اليوم
- انه هاي حصتي ماخذهه من ولد ثاني
وهمه يردوهه يبيعوهه كتلهم انطوني الحبوب
بدلهن مايرضون اله فلوس .. انه جنت اريدن
اكطعهه وكبل اسبوع انه عفتهه بس ماكدرت
اهجس نمل وياكل بلحمي بدونهه واجاني الولد اليوم نطاني هاي عبن انه توسلتله تصبيره بس .. وهذول جانو يردون فلوسهم
- نام بعدين نحجي وهالسالفه ماتطلع مثل ماوصيتك اي حجوه منك اجتلك مثلهم

ماحجه شي بس غمض عينه ونام وانه نزلت
ولاكتني امه ع الدرج تعاينلي بشر وكره
انه تجاهلتهه ومشيت .. هيه هاي رباتهه
الخابصتنه بيهه !!!

نزلت كعدت بره جدام الحديقه وبايدي عود
واكسرن بي ومااهجس الا الشيخ فوك راسي
كعد بسدي وكال ...
-  كبل مااعرفن شني الكضيه الصارت اريدن اعرف عليش شمسه رادتك
- رادتني !
- اي جا ماسمعت الكهوجي
- لا انه بس سمعت اسمهه ركضت شني رادتني مافهمت
- الكهوجي كال شمسه وكعت وتريد شهاب
انه تعجبت عليش تريدنك ماتريدني
- ههههه والله ماعرف لجن بالله العظيم فرحتني بهالسالفه مشكور والله
- اهاااا عليش تفرح بعد عمك
- عبن الخلك ضايك ياشيخ
- شني الجره
- شيخ محمد متورط ويه جماعه مخدرات
من ذاك الصوب من سنه ونص
- شنههههييييي احنه ولدنه تاليهم يدمنون !
- هاذ الجره ياشيخ وانه ربك دزلي هالشمسه
ودلتني عليه وله جان راح من ادينه هاليوم
جان الولد الوياه شايلين سلاح ورادو يضربوه
وهوه وحيده وصارله اسبوع مماخذ جرعه
غاديلك طلي مايندل دربه ويتوسل بيهم ينطوه
ولو ماانه لاحكه جان الجيله الاجت بزندي
تجي براسه وتجتله بمجانه
- انه عمك ياشهاب اثاري الماي من جوانه
يجري واحنه مانعرف
- شيخ ازيدك سالفه انه اجتلتهم اثنيهم واحد بصدره والثاني بظهره عفتهم بمجانهم ومشيت
- اي والله زين ماسويت هذول لو ضالين
يضلون يمرضون بهالويلاد هذول لا تشيل
هم هذول جتلهم خير الله يحي اصلك ياشهب
هاليوم بروحتك حميت هالسلف كِله من هالمخانيث وحته حك اخوك اخذته بدمهم
كلنه عشاير ووطن نشجعك عله هالعملته
بيهم خلهم يصيرون عبره غيرهم

- واهلهم ياشيخ انه مااريدن تصير سالفه بالسلف عله اخوي

- لا تخاف انه هنايه اسدن حلج اليحجي
وبعدين هذول اهلهم لاتخافن منهم عبنهم
مخانيث مثلهم وبعدين منين يعرفونك ويجوك
اسمعني يا شهب ...
اريدنك تمشي مرفوع الراس والجره اليوم
تنساه هذول هدر دمهم حلال

- ان شاء الله .. شيخ انه اريدن اخذه لمحمد
وياي لتركيه هناك اعالجه هاذ اذا يضل هيج
لو يموت لو يفضحنه

- اخذه اي اخذه هناك يتكبلون هيج حالات
هنايه عدنه مغطايه بالعيب والشلون اخذه
هناك واريدنك ترجعه احسن من اول هاي
مسؤوليتك بعد واعرفنك زلمه مامثله زلمه
تكدر عليهه

- بعون الله
كوم امشي نام وريح بالك اليوم انته رفعت راسي بيك والله ونعم من اختارلك هالاسم
شهب تنيشنهه صح

-  تسلم شيخ

هوه مشه لبيته وانه طبيت لحجرتي اخذت
المسكنات ونمت وثاني يوم اول ماكعدت
كمت اريدن اشوفنهه وين ...
لكيتهه راجعه لبيتهم .. يعني هي تعرف انه
اريدن احاجيهه عليش تشرد مني !!!!

ضليت هاليوم ماطلعت مالي خلك شي
كلهه التمت مره وحده علي هم هالربى
وهم هالسالفه ...

ثاني يوم رحت حجزت ورتبت امور السفر
وبعد يومين اسافر ..

حاجيت ابوي اريدن اخذ محمد وياي وامه
نبصت وعرضت عاد مدري شعجب هالمره
محمد حجه وسكتهه ...

ابوي ماارضى رحت للشيخ حجيتله وهوه لليل ردلي خبر موافق بروحته وياي ..

وبدينه نرتب غراضنه للسفر وانه كبل يوم
السفر رحت لبيت عمي حاتم هم اخذت غراضي وهم ضليت انتظر فرصه احاجي
ربى بيهه ...

وبس شفت امهه طبت تسبح رحت ليهه بالمطبخ .. اعاينلهه بشوك وتعب اريدن
راحه يمهه وهيه جنهه ماتشوف بني ادم جدامهه ..

- ربى عوفي الي بيدج اريد احاجيج
- مشغوله ماتشوف
- ماعندي وكت حسافر باجر عوفي خلي احاجيج
- اي شنو كول
- شلون عرفتي بمحمد
- شفته من بعيد
- لتجذبين المجان الراحله بعيد مو مال تشوفينه
- هسه انته شتريد من هالسالفه عوفهه راحت
- لا ماراحت انه هالسوالف جثرن جدامي
وانه عايفج لاجل انتي مشعوطه كلبي وانه
مادري احيرن بهاي لو بهاي
- امم
- ربى وتالي شلون هاي صارلي اسبوعين
اتعذرلج مايصير هالشكل يبنت الناس شني
ماتشوفين الي اسويه لج ،، ابسطهن انه عفت
كبريائي لخاطرج واريدن رضاج عبن انه كلبي موجر من صدج هاذ
- واني بعدني مانسيت السويته
- بويه حكج اعرفن اذيت كلبج بس انه تعذرتلج ربى جاي اكلج حسافر باجر وماارد
منا لبعد اربع شهور شلون ترديني اروحن
وانه بالي يمج
- توصل بالسلامه
- هاذ اخر شي عندج
- اي
- هين ياربى هييين يجيج يوم وتحسين بالجاي احسه ،،، انه حطلع هسه بس تخلين بالج حجايه ... يوم الاسمع بي احد جاي يمشي عليج وترضين بي بالعباس بالعباس اسويهه
دم وذنبهم كلهم يطيح بركبتج زييييين فاتجفي
شري ياربى انتي الي لو بعد خمسين سنه
مرجعج هناا لنص صدري
- نشوف
- يجي اليوم وتشوفين بي زين واذكرنج عود
- امم

اندارت هيه وانه اجيت اطلع وصلت لباب
المطبخ الخارجي وانداريت عليهه كلبي يتكطع بصدهه ياالله ...
شلون بيه مااشوفنهه بعد اربع شهور
رجلي ماتكدر تعتب هالباب وكلبي يعصرني
عليهه شلون بيه ..

طبكت الباب ورديت ليهه ع السريع جريتهه
لصدري وحبستهه بين ايديه وحطيت راسي
بشعرهه وشميتهه بكل قوتي عصرتهه بحضني وانه اشمنهه وهيه ادفع وتضرب بصدري بس انه ضليت مصر الا اشبعن
منهه واملي ريتي بيهه يلا اعوفنهه
عاد دنجت ليم اذنهه وكلتلهه ...

- هاذ الموادع الاريده تكرهيني وماتدرين
بيه رجولي ماكدرت تعتب هالباب وتعرف
ماتشوفج بعد شهور .. يجيج يوم وتحسين
بهالگلب شلون متعذب بيج
- عوووفني عووووفني
- انتي ماتحسين بالموادع شلون صعب تريدين تخلصين مني وانه اريدن اطولن
الثواني وياج ،،، اووووووووووف ياريحتج
شلت حالي ... انتي ملكي يجي يوم واكلج
شلون ملكتج
- مااريدك وخر
- احبنج ياسحاره

كرصت خدهه وطلعت وهيه تصيح اكرهك
لجن انه مايهمني كل حجيهه المهم روحي هديت واكدر اروحن وانه مطمن ....
.
.
يتبع

بارت سريع لفضولكم الي احبه 🤗🤗🤗