رواية من فجر ديسمبر الفصل الثامن والأربعون 48 - بقلم Zoka 🌷

من فجر ديسمبر
🍁
🍁
هاااي شمااالج انتي ... تريديني اردن مكسور ليهم !!! شيخج اجه النه حجه سالفه ابو نجمه للودام شيريد يكولن هااا!!! شيكللهم والله انه جنت اريدهم واحد يحب اللاخ واريدنهه تعرفه هوه الجانت تحلم بي !!!!!! كليلييييي هيج يحجيلهم!!!
لو يروحن يكول اي انه عفيت عنهم واحنه اهل ومابينه شي والفات مات ويطلع هوه ابو الحك واحنه المغضوب عليهم .. هيييييج احسبيهه هييج
انه ماردن واخلي علي شاااامت لااا وحك الخلك هالروح

- لعد شلووون نضل هيج وحدنه شهاب اريد اشوف اهلي كافي هلكد والله مشتاقتلهم حس بيه
الله يخليييك

- ربببى افهميني بويه روحتج هناك خطره هاذ شيخج انه ماامن بي بعد كلب عاليهه واطيهه وخله
الجلاب كلهه تعوي بظهورنه ويجي ارجعو وياي خلص اختباركم هساع بسام شيسكته لو يجي الحمزه مايهداله بال

- اريد اهلي شهاااب

- ربببببى بسسسج عاد اوزني حجيي عدل ولو شفتي معيوب اخذي حكج من هالعين

عفتهه ومشيت طلعت بره كعدت عله الرصيف
واستغفر ربي اريدن هالسالفه تفض جزعت روحي
كل يوم حسبه شكل ...

رديت صعدت للشقه شفتهه كاعده ع القنفه وتعاينلي والدموع تصب .. رحت كعدت بسدهه
وهيه اجتي حضنتني وخلت راسهه بركبتي ..

- لاتضوج مني روحي انته والله اعرف حجيك كله صح ومابي عيب بس كلبي يريد اهلي افهمني والله تصعب عليه واحنه كل ماتزيد الفتره تجينه مشاكل اكثر

- رببببى انه كل هاذ مايهمني هساع لو يحركون روحهم مايهموني كل همي عمليتج بس اخلصن منهه كلشي تريدي يصيرن حكج انتي اهلج وتردينهم افهمج بس خلصي العمليه وتدللين

- ماكو هيج ماسوي العمليه بدون اهلي

-هااااا ربى ردينه للشلاع كلب

- شهاااب اريد امي اذا مو وياي ماسويهه افهمني اريد اشوف ابويه اعتذرله هسه اشكال سمع حجي عليه وبسام حالته حاله شهاااب ميصير نضل ساكتين هيج والله ميصير لك افهمني كلبي ديحترك عليهم الله يخليك

- انطيج تلفون حاجيهم بس روحه ليهم مامششش
زييين لو اعيييد

زعلت وكامت للحجره سدت الباب حيل وانه دفرت هالطبله الجدامي حركه هالاعصاب هاي ماتخلص ابزعت رووووحي وماعولت تخلص
تالي نردن ليهه !!

للعصر خابرني الشراي وكالي يومين واجيك
رحت دكيت عليهه الباب ماترضى تفتح
- ربى موش حاله هاي اطلعي عاد موش جاهل انتي امشي اكلي وراج علاج تاخذي
- عوفني شهاب مالي خلك شي
- زين خلي اجي يمج افتحي خلنه نتفاهم
- كلشييي ماريد عوفني
- هسسسسه الراس اليابس هاذ عليييش يابويه اكلج اخافن عليج هذولاك ثعالب بالحسين لاتامنين بيهم بعد عليش ماتصدكيني
- اصدكك بس افهم اني بروحتي هاي جبت الحجي لاهلي افهمني اريد ارجع واتفاهم وياهم ماريد يضلون هيج منزلين راسهم بيه ليش مدتفهم شقصد
- افهمج بويه بس خطرررر علييييييج
- عوفني خلي اموووت ولا يضلون اهلي هيج ماريد اعيش واهلي منزلين راسهم من وراي اني ماغلطت بشي وصنتهم كل عمررررري ماريد يضيع هالتعببب ماااكدر هيج افهمني والله مااكدر
- افتتتتتحي الباب بنتي بس افتتتتتحي

ماردت علي وضلت تبجي عفتهه ورحت ضليت اروح منا واجي منا ساعه نتعارك ونرد نسكت نهدا وساعه اللخ نرد نفس الشي ولليل وهيه ماترضى تطلع لا اكل ولا شرب عاد رحت ليهه

- ربى وحك الله ان مافجيتي هالباااااب هساع اكسرنه واكسرج وراه بسسسج عاد عنااد تره جرييييت خلك وياااج فجييييييي لااا اكسره ومحممممد اكسره فجججججي

فتحته وراحت للجربايه تمددت وغطت راسهه
اجيت ليمهه شلت الغطى من وجهه ردت جرته
عاد كعدت بسدهه ..
- رببى تعبتيني لاتضلين هيج بنتي شبيدي عليج
جا انه موش مثلج زين انتي ماتخافين عله روحج خافي علي ... تردين الوادم تشمت بيه !!!
-لاااا
- زين تردينهم يكلون علي ماكدرت اعيشن وحدي ورديت ليهم معتاز ! لو تردينه نتعارك انه وبسام !! زين ابوج شلون وياه فهميني شحاجي
وشيفهمه الصار!!!! تره هالشيخ كل الي يحجي ليهم عوفوهم مالكم دخل انه اريدنهم وجبتهم لو انه سويت كل هاذ ورحت رديتهم لو ولدنا ومانهدهم مايحجي شي من الحكيكه الصارت تفهمييييني انه ماريدن يصير هوه صاحب الحك وانضل نتعذر احنه ماغلطنه بشي هوه العلك الدنيا موش احنه عليش احنه نتعذر ونطيح ماي وجوهنه لوادم ماوكفت ويانه بحجايه هااا كليلي عليييش !!!

- مانعتذر لاحد شهاب بس ابويه لازم نحاجي
- نحاجي صار بس خلي تهدا الامور ونشوف هالشيخ شيريد يسوي وياهم ونحاجي تدللي

تمددت بسدهه وحضنتهه من وره وضليت اشم بيهه عاد اندارت علي ودحست روحهه بصدري
حضنتهه ازيد وبعدين كلتلهه..

- اليوم لا اكلات طيبه لا حلويات لا حتى بوسات شني حصار مسويه علينه بويه
- مابيه حيل
- شني بس لا كلبج يوجعج
- لا مابي شي بس تعبت من البجي
- جا ماتبطلين بجي عليش بله تبجين صايره كلش حساسه كبل جنتي جبل مايهتز
- مو كل شي مثل ماتشوفه ... راح اكوم اسبح شويه اتنشط

صفنت بحجايتهه هاي وحسيت وراهه بعد شي مضموم !!!
طلعت وسوينه اكل وكعدنا نتفرج تلفزيون وناكل جن شي مصاير بعدين راحت للمطبخ تغسل مواعين وانه يمهه كملت جان اجتي كضت ايدي
وكالت...
- خلي نطلع نتمشى
-اخاف عليج اليوم تعبتي
- لا مابيه شي بس اريد اتمشى شويه مانروح بعيد
حباب
- ماشي يلا امشي بدلي بس اخذي علاجج بالاول
- تدلل روحي

راحت بدلت ونزلنه ايدهه بايدي ونتمشى بالمنطقه
انه ماحجيت شي ساكت وانتظرهه تحجيلي الي بخاطرهه وهيه تمشي وساكته جان كالت ..

- خلي نكعد هنا ع الرصيف
- وييين ع الصيف امشي نشوفلنه مجان زين نكعد بي عليش هنايه
- لااا هنا اني عاجبني اكعد هنااا
- انتي شسالفتج
- المزاج هيج يطلب
- اكعدي خلي نشوف هالمزاج شجاه اليوم

كعدنا وجان الشارع اظلم بس جم ضوا اصفرمن العواميد ...
- شتعرف عني شهاب؟
- ههه سؤالج فاجأني !!
- لا من صدك شتعرف يعني كونك راح تصير زوجي شنو التعرفه عليه !
- يعني اعرفن اطباعج وشتحبين وتكرهين اعرفن شلون اهديج واسعدج بعد شني الازم اعرفنه !
- باوع هسه هالشوارع من مكانك تباوع عليهه هادئه وكلشي ماكو يلفت الاهتمام وتشوف ان الليل هذا مغطي على هالمنطقه بكل امان وطمأنينه
- اي ؟؟؟
- بس اذا كمت تمشيت شويه بالافرع والاماكن الظلمه تشوف فقير فارش كراتينه ونايم وبغير فرع ممكن تشوف شخص مهموم وكاعد يبجي وحده
متخذ الليل وظلامه غطاء اله وممكن بمكان ابعد يكون اكو طفل يبجي من جوع او من يتم او ظلم او مريض من شباك غرفته يباوع لنفس السمه الي تباوعهه ويشكيلها ضعفه ومرضه يعني كلشي موجود هنا بس اذا تعمقت وباوعت من زاويه اعلى للحد الموازي لعينك

- طبعاً الدنيا تحمل اشكال الهموم والليل مثل ماكلتي غطى للبني ادم يصيرن بس شني ربطه بيج !

- لاني اريدك تعرفني مثل هالليل شبهت شكلي ومواصفاتي بالفجر بس لاتنسى قبل كل فجر اكو ليل والليل كلشي يحمل هناك تعرفني هناك تلكى ربى الي ماشايفهه غير ربهه

- شلون اكدر لهيج !

- اني دليتك الطريق وانته امشي بي بعد .. هسه خلي نرجع

- بس لحضه يعني لو ماكدرت اعرفنه هسه ياثر بزواجنه ؟

- لا حبيبي انته لتخاف من هالناحيه زواجنه وحياتنا وسعادتنا ماعليهه اي شروط حتى تصير
اني هديتلك روحي بعد شنو هالحجي !! وانته مامجبور تعرف اذا متريد اني بس كتلك هيج اذا تريد تعرف تلكى الطريق كدامك واذا تشوف مو لازم فما يغير شي من حبك هذا ولا ياثر بحياتنا

- اموووت عليج رويحتي انتي اعرفنه ان شاء الله انه اريدن اصير هالليل الي يحتويج وكل شي بيج مهم عندي ماريدن بس زواج وعيشه عاديه اريدنج روح متفاركني واعرفن بيج راح تسعديني انتي
نعمتي وحب ربي ليه

- ياكل سعادتي انته ربي يخليك الي ابو الشهب حبيبي

-ههههه وعليش مو ابو نجمه

- ههههههههههه والله مامتعوده عليهه وياك

مشينه رجعنه للشقه وضليت هالليله كلساع افز مدري شجاني اكعد اعاينلهه نايمه وشكلهه جنه العافيه الي يشوفنهه مايتخيل وراهه كل هالاسرار
بس انه كلبي يحسني بيهه شي متعبهه ولا جان ماحجت وتريدني اعرفنه عبن هيه تدري انه ماخليلهه تعب بحياتهه واساعدهه واحميهه من كل شي ... ضليت بخوف عليهه وثاني يوم اعاينلهه بكل لحضه مافاركت عيني وحجيهه بعده بالي يدك

جان للعصر كلتلهه تبدل حته نروح نسوي تحاليل
عبن انه كل عشر ايام اسويلهه فحص للدم وتخطيط لكلبهه حته اتطمن عليهه وكلت اشوفن شني النتايج حته نستعد للعمليه ...

رحنه للمختبر سحبو الدم وكعدنا بره جان اكو هوايه بنات ونسوان كاعدات وجم زلمه واكفين
انداريت ليهه شاورتهه ...
- رويحتي خما تعبتي !

ماردتلي عاينتلهه صافنه عله بنيه جدامهه كاعده
بس ماجانت مثل كل مره صفنتهه اهجس عينهه فارغه هالمره لاا عينهه تلمع ومركزه بيهه ضليت اعاينلهه شويه واعاين لهذيج البت جان وره شويه
البت كضت راسهه وكامت ركض للحمام ضلت
تستفرغ وامهه يمه تسمي عليهه عاد عاينت لربى
كالتلي ..
- شوكت يخلصون مو طولو هو تحليل دم

صفنت شني الصااار !!!كلشي مافهمت عاد شويه
البت اجتي مشت خطوتين وطاحت غمي عليهه
والوادم نكلبت عليهه خذوهه وطببوهه لدكتور بسد المختبر صاير رديت عاينت لربى كالت بكل هداوه

- هسه تصير زينه ماعليهه شي
- شني السويتي فهميني !!! شسويتي للبت !!
- ماسويت غير الواجب .. حبيبي كوم شوفه اذا يتاخر خلي نرجع لان بعد مابيه حيل
- يمعوده لج البت خاف صارلهه شي
- هسه شويه وتشوفهه تجي ويه امهه لاتخاف شبيك خاف عليه اني داختنك كتلك خلي نمشي
- زين زين

رحت شفته جان يكلي انتظر شويه .. ضليت واكف وعاينت ربى صارت تكح وكامت ليم الشباج رحت ليهه وجان تكلي ..
- خلي نرجع
- هسه بس اجيبن الورقه ونمشي تعاي وياي

كضيت ايدهه وهيه تكح مادري شجاهه هيج عاد كبل الولد نطاني التحاليل اخذتهن ومشينه للسياره
وبسرعه مشيت للشقه .. بين ماوصلنه جانت بالكوه تجر النفس عاد اول ماطبينه رحت جبتلهه
البخاخ اخذته وضلت تحط منه وتجر بالنفس لما
شويه هديت ..
جبتلهه الماي شربت وتمددت ع القنفه وغمضت
كعدت بالكاع وايدي عله شعرهه ..

- شجاج بنيتي عليش هيج تجيج هالنوبات حتسودن بعلي شلون بيج فهميني
- صرت زينه لاتخاف
- تكومين تبدلين وتنامين موش احسن؟
- لا عوفني هيج مابيه حيل بعد

غمضت وحطت ايدهه عله عينهه.. انه كمت رحت بدلت واجيت كعدت يمهه شويه وكومتهه
بدلت وغطيتهه نامت وانه رحت فتحت التحاليل
قريتهن .. جانت نسبه الدم زينه ارتفعت من هذيج المره والتخطيط طبيعي جا عليش هيج صار ؟؟؟

ضليت اشتغل ع اللابتوب لليل وهيه اجتي حضنتني وضلت تعاين للشاشه ..
- شلون صرتي حبيبتي
- احسن عمري لا تخاف
-الحمدلله
- راح اسوي العشه شنو تريد ؟
- اريدج تكعدين وتحجيلي تره عكلي ضرب شيش بيش عوفي العشه
- هههههه ماكو شي شبيك
- جا الصار شني !!!
- نحجي بي من تتعمق اكثر هسه ماراح تفهمه
- لااا افهمهه احجي
- وغلاتك حبيبي كلشي احجيلك بس بوكته
- وليمتى اضل انتظر هالوكت!!
- انته بايدك تقلل او تكثر الوكت شحجيتلك البارحه
- يعني الا هيج يلا اعرفن !
- اي .. هسه كمل شغلك واني حسوي العشه
- زين يلا بس انتبهي واذا احتاجيتي شي صيحيني
- تمام

كملنه العشه وبعدين ضربتهه الابره وكملت شغلي
هيه كضتهه بس نوم وثاني يوم هم نفس الشي بس نايمه تكعد عله كد تسوي الاكل تاكل شويه وترد تنام حسيت وضعهه موش طبيعي ماتسوي شي بس نايمه حته متحاجيني وتعبانه ... رحت كعدتهه
وكلتلهه ...
- تره جاي اشتاكلج عليش هيج عايفتني ماشبعتي نوم
- حبيبي نعسااانه
- لااا موش نعسانه انتي جسمج تعبان ادري بيج
لاتجذبين جم مره منبهج ماتجذبين علي
— اييي تعبانه عوفني انام
- بسسج نوم فهميني شمالج تردين اخذج دكتور
كلبج ياذيج !! احجيلي
- مادري بس احس جسمي كله مكسر ورجلي
دتورم ماكدر اوكف عليهه هواي وجسمي نحلان
- شننننني جااااا كل هاذ وضامته علييي!!!!!!
- حبيبي ماريدك تكلي امشي للدكتور لان بزعت روووحي من هالسالفه
- خرررررب ربى وحك الخلكج لو عدتيهه النوب ماتلومين الا نفسج ... شوفيني رجلج منين مورمه
- علكيفك اهدا هسه ماصار شي
- اسكتي ماريد اسمعلج حس

جريت رجلهه ورفعت بجامتهه شويه جانت مورمه من الكاحل اليسره .. انه عرفت من سبب الدم الي مايجري بانتظام عبن هاي وحده من اعراضهه .. وتعبهه كله من كلبهه وجاي تريد تغطي عليه بالنوم ...

- ربببى راح اخابر الدكتور واحدد موعد العمليه
- لااا فدوا لااا ماريد
- موووش بكيفج ماتردين عايني حالتج ليمتى ترديني اسكت بعد لما يكف كلبج جدامي !! هالمره موش بكيفج عبن انه نطيتج اسبوع وزاد فوكهن ثلاث ايام
- شهاااب ماسوي العمليه الا اشوف اهلي
- رببببى لاتطلعيني من طوري وتخليني اشيلج وغصب افوتج
- شهااب ماسوي ماااسوي لو اهلي لو مااسوي
- الللهم صبرررج ياروووح وتااااالي ويه هالراس اليابس ولج بويه نضل كل يوم نعيد ونسقل بهالسالفه !!!!!!
- الله يخليك حبيبي اخذني اشوفهم بس يوم ونرجع
والله اذا تكول نرجع ماعارضك بشي وعيونك بس خلي نروح نحاجي ابويه الله يخليك رووحي انته افهمني كلبي يوجعني عليه وعيونك ممرتاحه ولا ارتاح اذا مااشوفه
- ربببى هسه اخابرلج عليه واحجي وياه للصبح
بس لتحطيني بين نارين عبن هالاثنين يحركني
روحتج ومرضج علكم صارن بزردومي
- اوعدك بس اشوفهم واعتذر لابويه ونتفاهم ارجع واسوي العمليه ثاني يوم وشتريد يصير بس اخذني اشوفهم حتى لو يوم واحد الله يخليك عود مانروح للسلف هناك لبيتنه فدوا حبيبي بس هالمره
- ربببببببى وتااااالي
- يعني تريدني اموت واني بحسرتهم
- شجااااب الموت بالنص بنتتتتي لا تسودنيني
- لعد هسه اني راح ادخل عمليه قلب واشكال راح يسون بي صار شي بنص العمليه واني ماشفت اهلي شلوووون !!!!!
- كوووولي يالله حبيبه شهالمفاول كتلج عمليتج تنجح بس توكلي بالله ومايصير شي
- اريد اهلي شهاب عشت ولا متت اريدهم اريد نتزوج ونعيش وياهم براحه ماريد تضل حجايه عله اهلي بسببي افهمننننني شبيك يعني متعرف هالشي شلون صعب عليه !!!! افهمنننني شهاب اريد اخلصهم من حجي اليتشمتون هسه تلكى بنات الشيخ يكومن ويكعدن يحجن بسالفتي وكل الناس هناك مالهم سيره غيرنا خلي نروح ونخلص هالمهزله الصارت والي بداه الشيخ بايده ينهي
اني هم حقي سمعتي واريدهه منه حياتي هم اجيت اخسرهه بلحضه بسببه كلهن اريدهن منه زعل ابويه واخويه وبهذلتنه وتعبك ومرضي كلهن لازم يرجع حقهن ارجوووك خلي نروح ارجووك

- وشتضنين راح يرد هالحك!

- طبعا ينطينه حقنه مو لهدرجه هو مو زين شهاب لاننسه وكفاته قبل والغلط الي صار هسه لازم يتصلح لشوكت نضل مبتعدين وناجل بالسالفه
اني احب اواجه مو اهرب

- وبسام ؟؟؟ لو سوه شي شسوي انه هاا !! اروحن اجتله ونرد لنفس الموال

- لااا مايصير شي ثق بيه ارجوك

- اثق بيج بس باخوج لا

- ارجووك شهاب ارجووك لاتخلي هيج كلبي محترك على اهلي

عفتهه وطلعت مارديتلهه شي .. ضليت اتمشى بالشارع وافكر بحجيهه .. اعرفنهه ماتسوي العمليه لو يظهر المهدي هسه ماتمشي وشلون اخذهه وهالجلاب ماامنلهم بعد ..

رجعت لليل لكيتهه كاعده تتفرج تلفزيون اول ماطبيت اجتي ليه عاينت بعيوني ورفعت رجليهه وشبكتني ..
- اشتاقيتلك ليش عفتني وحدي هيج وبالي يمك
- جنت محتاج اكعد وحدي واصفي فكري شويه
- اسفه تعبتك حبيبي اسفه
- مامش تعب يارويحتي تعاي شوفيني رجلج شلون صارت
- بعدهه نفس الشي
- زين تعاي اكعدي لاتضلين دايسه عليهه

اخذتهه كعدتهه وتمددت وحطيت راسي بحضنهه
دنجت باست عيوني وانه جريت ايدهه بستهه وخليتهه عله عيني ... كلتلهه..
- ربى نروح بس بشرط
- اامر وتدلل
- تضلين يمي تشوفين اهلج بيتنه تردين يوم يومين بس بيتنه ماترحين غادي عبن انه اعرفن كلش زين بس تمشين من جدام عيني ماتردين ليه
- ماشي اعتبره صار
- كعده وحدج ويه الشيخ مامش واذا يكلج كليله يجي شهاب يلا مفهوم
- مفهوم
- الج يومين ونرد نرتاح يوم والثاني للمستشفى كبل زيييين
- زين
- باجر الصبح نمشي
-صدددددك ارووووحك فدوااا فدوووا روحي انته اموووت علييك
-ههههههه فرحتج وصحتج اغلى عندي من كلشي
لخاطرج انه حطب السلف ولا انه شايل هالسالفه من زمان من بالي ولو يحتركون حالف مااطبلهم
بس انتي ماكدرن عليج من شفت حالج هيج نار وتوجرت بصدري موش عاد اشوفنج تكضين ايامج كلهه هيج ماتحمل
- ياروووحي وعد كل الي كلته يصير واني هم ماريد اضل بعيده عنك ماكدر بدونك ابو الشهب
- ان شاء الله روحتنه تصير خير .. كومي نحضر غراضنه حته من وكت نطلع
- اييي يلا

رحنه للحجره وحضرنه الجنطه ماخذنه عله كد لبستين ... راحت تسبح وانه تمددت وجنت اراسل وليد .. وصيته يجي هناك ويشوفله طريكه يجيب امهه هناك لين ماريدن بيتهم كل حكي يضيع

اجتي لابسه دشداشه كصيره وجسمهه طابع بيهه
ضحكت بصوت عالي وهيه خزرتني عاد كملت تمشيط واجتي كعدت جدامي وضلت تمشي ايدهه عله لحيتي ورموشي انه من زمان يوم التلامس وجهي اهدااا واهجس البروده تسري بجسمي
- اخاف ماكدر اكعد وياك هيج بعد راح اشتاقلك
- وانه مشتاكلج من هالساعه
- مو تعوفني وحدي
- لاااا شلون اعوفن روحي ؟؟
- هههه حبيبي انته .. رغم هذا اليوم جنت منتظرته بس هسه داحسه صعب عليه
-هاا شعجب؟
- لان راح افارك حضنك تعودت هههههه
- هههههههاااي جنج عله حضن اجيج بالليل مثل كبل بالختله اصعدلج
- اييي حتى زهره تلعب بينه لعب
- موش بحالنه هيه هاذ وليد تلكي مايفارك التلفون
وياهه
- هههههه اييي اكيد يستاهلون اثنينهم كلبهم طيب
كلش متراهمين
- واحنه هم متراهمين
- احنه مخلوقين سوه وروحنا سوه حبيبي مو بس متراهمين
- اااااوف ياحبج سجل كلشي بيه باسمج صرتي انتي تحكمين بيهن كلهن
- اممممم احبهن واحبك واحب حبك
- ههههههههه اعشكج اااانه اعشكج تعاااي خلي اشبع بحضنج هالليله تعااي

حضنتهه وبوست خدهه وهيه ضلت تلعب بلحيتي وتحط راسهه بركبتي تشتم وترد تعاينلي وتكلي احبك .. جانت هالليله كلش كصيره كضيناهه غزل واحضان وللفجر يلا غفينه وكل واحد كلبه وعكله عند الثاني..

بالعشره الصبح طلعنه .. مرينا عله ليال سلمنه عليهه وانطيناهم خبر بروحتنه ونزلنا للسياره
توكلنه بالله ومشينه ... وكل مانعبر منطقه نتوتر ازيد ولحد ماوصلنه العماره بالسته ضبط طبينه ع السلف شبعنه ازدحامات و منا تفكير بالراح يصير ومنا هوسه الدرب وتعبه وصلنه هلكانين ...

من شميت ريحه الكصب وريحه ديرتي هجست بيبان كلبي تفتحت ونسيت كل القلق وعيني راحت
تعاين لكل شبر بي اخافن تغير ومادريت عنه
كلشي عله حطته ..الجهال تراكض وره السياره
والولد كلهه ترفع ايدهه للسلام وبوجهم الصدمه كلهه تسآل عله جيتنه مبينين بلايه مااسمعهم عيونهم وملامحهم حجت وكفت ووفت ...

نزلنه عله شارع بيتنه وهيه كضت ايدي وتعاينلي
- شهاب مو تعوفني
- تطمني بنيتي ماهدج بروحج بينهم اريدنج كويه وماتسكتين عن حكج تره مايصير ازيدن من هالصار بعد ويانه فهمتيني
- اي حبيبي فهمتك
- اروحلج فدوه بعد كلبي انتي يلا انزلي مرفوعه الراس مامنج زله انتي بنيتي غيرج اللازم ينزل راسه ويتعذر موش انتي
— شهاب
- عيوني
- احبك
- اوووف اموتن عليج رويحتي

طبكت السياره جدام بيتنه و جم واحد من ولد عمي وكفو وصافنين علينه ..انه ماهميت ليهم رحت ساعدت ربى نزلت عبن رجلهه زاد ورمهه سندتهه ومشينه جان تطلع امي تركض وتهلهل
- ياااايمه رد الغالي لينه رد كلللللووووش وينك يامحممممد ولج زهره تعااااي اخيج رد

جتي حضنتني وعينهه تصب بهالدمع بوست راسهه وايدهه وانه بعدهه ايدي عله جتف ربى ماهديتهه ..
- مشتاكلج يمه شلونج
- يابعد رويحه امك شحالني بدونك يايمه جني تيتمت من جديد
- لااااا يمه لاتحجين هيج شوفي هاي جيت ومابيه شي عليش تبجين
- من فرحتي ياوليدي .. تزوجتو !! شلونج يابعد كليبي يايمه محبوبه الغالي ردت وياه يايمه فرحتي هاليوم شيسسسسعهاا

اجتي زهره تركض وابوي حاط ايده عله عكاله
ويهرول لينه ...
- يماااااااي اخووووي يابن اميييي ردددديت لينه
يابعددد بيتي ويييين هديتني ومششششيت علييش ياخوووي عليييش
- خيه كولي يالله هساع تلكيتنه بالبواجي انطتن صبر خلنه نطب تكسرنا بالعباس من الصبح لهسه راسنه انسطر

مشيت سلمت عله ابوي حضنته وبست راسه وزهره اخذت ربى وطبو واحنه مشينه للديوانيه
هستوني كعدت جان يطبون عمامي كاظم وعمران
سلمت عليهم وضلو يسألون وين جنت وشصار ماحجيت شي كلتلهم تعبان جان دربنه طويل
كمت اريدن اغسل .. واكف ع المغسله غسلت راسي واريدن خاولي جان عاينت اختي منال
واكفه غادي عني صحتلهه..
- وينج خااايبه ماتجين هنايه
اجتي ركض نطتني الخاولي ومدنجه نشفت وحطيته عله جتفي عاد هيه عاينتلي واجتي حضنتني بسرعه انه تفاجات هاي عمرهه مامسويتهه لو تسلم علي لو ماشوفنهه حته

- اخووووي والله هالبيت بلايه روح بلياك انه حيل اشتاكيتلك والله كل يوم امرن حجرتك واتخيلك تجينه
- هههههههه يبعد كلبي هاي انه اجيت افرحي عاد ماريدن بجي ياخيتي ياحليوه ارفعي راسج اشووف

وخرت مني وضلت تعاينلي وتتبسم انه ضحكت ودنجت بست راسهه هيه حيل فرحت جريتهه وضربتهه عله ظهرهه مرتين وهيه تضحك اجتي
عاد امهه سلمت علي رديتلهه السلام عادي ومشينه لحجرتي جانت ربى متمدده وكاعده بسدهه زهره

رحت وكفت يم راسهه وكلتلهه .
- خما تعبتي ؟
- لا عيوني ماتعبت
- اكيد؟؟
-اي وداعتك
- ورجلج شلونهه
- شويه احسن
- تضلين كاعده هنايه ماريدن فرفره البنات يجن يمج بس ماتطلعين بره ومثل مااتفكنا البارحه زين
- ماشي تدلل
- اكووول خويه
-ها خيه كولي
- هاي انتم نفسكم الي جان صياحكم يسمعنه كل السلف !!!! ولج يامدوهره هيج صايره طينه وياه
وين صوتج وين المعاند هذااااك
- هههههههههه عينج يمعوده
- هههخخخ لاتخافين زهره هاي بعد تجيهه شخطات وتلكين اخيج يدك عله راسه من الاعصاب
- عزااا بعينك شوكت اني هيج مخليتك عصبي
- اهييي جا صارلنا يومين شنسوي
- اي يعني بس هذني
- وال..
- لا عااايز اسكت بهذنيج
- هههههااااي هاااا شفتي بعينج
- هههههههههعه والله انتم ماتصيرلكم جاره لو يجي الحمزه ابو حزامين
- اييي شكو بيهه احنه مرتاحين هيج
- اييي مرتاحين واذا تعاركنا شويه اصلا مرات واحد يضوج شيسوي يعني
- يجي يتعارك موو
-لعد هااا
-لااا بويه تعاركي شكو عليج هوه منهو المحروك جبده
-اممممم
- اكلكم ماتهدون شويه خلنه نفهم منكم شسويتم تزوجتم بعدكم وين جنتم
- اسرار هاي بويه موش للحجي يالصحفيه بسج عاد استلمتينه امشششي حطي العشه يلااا متت جوع
- يايمه يخسى الجوع هساااع احطلك الاكل

كامت ركض ويه منال وانه فكدت جدتي كمت
رحت لحجرتهه طبيت عاينتهه ذبلانه ونايمه وصايره هالكداتهه رحت كعدت جدامهه ودنجت بست راسهه وشميتهه اوووف ريحه الجنه بيهه
- مطرررره يامطوررتي يااجده شني ماشتاكيتيلي
خاايبه اكعدي ياجده
- هااا هااا شني هدو علينه
- ههخخخخخخخخ اييييي جاج ملج الموت
- يااااه ياااه هاذ انته شهااااب لو انه اتحلمن
- كيفج انتي شتكولين
- يااااابعد طوااااايفي ياااايمه ردددديت تعالن اشمنك احوووووووي شكثر اختاضيت عليك
يااايمه يااايمه بعد جبدي وكل عضااااي رديت حييييلي ياجده بجيتك هاااااي
- هههههه الله يطول بعمرج ياجده ويخليج لينه
شلونج شني صاير نومج ثكيل
- يااااخايب جا غير انه اغرن بهالادويه المصخمه مادري شتعملن بيه
- هههههههههه لااا انتي كبرتي وصرتي رجيجه ومجلبه بهالمخده اعرفن بيج
- ايييييي ياوليدي جا العمر يكضي مايدومن لاحد
- يحفظج الله جده

شويه وطبت ربى دنجت سلمت عليهه وبوستهه
وضلت كاعده بسدي عاد اجتي زهره حطت العشه
النه وحدنه .. اكلنه وعيون جدتي علينه وفرحانه بينه .. كمت اخذت الصينيه للمطبخ ورحت جاي اغسل شفتهه تتوجه ع الحايط .. كضيت ايدهه
وابتسمتلي ورحنه للمغسله .. هستونه غسلنه جاي نمشي ومانسمع الا صوت العايط ...

وجان يطب بسام شايل سلاحه ومحمد و وليد يجرون بي وابوي يهدي بي وهوه غادي نار كبرا
اجتي امهه تركض ليهه حضنتهه عاد هديتهه ومشيت وكفت جدام بسام ..

- شمالك تصيح شني جاي هداد علي يابن عمي !
- انننجببببب خسسسسيسسسس تخووووني بعررررضيييي بعررررضي ياشهااااب هيييج
اااانه امنك واطبببك بيتي وتخووووني بيهه !!!!
- مااخنتك خويه كل الصار سوء تفاهم
- لااااااا جاااااي ومترهي وواكف بزوووود طينت وجووووهنه علييييش جااااااي هااااا شببببعت بيهه وردددددديت
- بسااااااااااااااااام
- اااااااانه حااااالف يمين ذبحكم هالجلاااااب انتم
عاااااار عااااار نزلتتتتتتتم ماااااي وجوهنه والعباااااس ماخليكم تهنننننننون رببببببببببببى
هييييييج احننننه ربيناااااج هييييج يابت الشيوووووخ هييييييج الشرف يغددددي رخيييييص

طال المصايح بينه وهوه ماينكض ولا يسمع من احد عاد طك هالجيله واجتي بالحايط انه بسرعه برجلي ضربت ايده وطيحت السلاح منه ودفرته عله صدره والولد جروه لبره ....

- ياااااااجلببببببب يااااالجااااهل هييييي اثووووول حط عكلك براااااسك موش احننننه الغدررررنه ولا احنه المانعرف الاصوووول عااااين عدددل وتشوفن منهو هاااذ ابو البليه

- لااااتذب ذنبك عله غيييييرك منهووو الخذاهه ومشه !!! هاااا منهووو ابوووووي !!!!! تحط عينك عله عرررضي ياشهاب هيييييج ترررربينا
لووو انه مسوي باختتتتتك هالسووووويته ترضاااهه !!! الوادم كلت وجوهنه بالحججججي
ولد الشيووووخ هيييج يسوووون هييييييج !!!!!

- ماااااا مشيت منااا مترهي مشيت من ضيم لضيم
يوووم الي تحجي وتصيحن ولد الشيوخ جاااا وين جنت يوم الطاحت اختك من ابن الشيخ هاااا وييين
علليييييش ماتحطن بااااالك حميتي ليهه!!!!!
مووووش عمامي كلههه جانت تشهد ع الصاااار
لوو ذااااك ماتسمعوووووه تردون زله تجلبون بيهه
شطلعنه من السلف غيييير شيخك كلييييي مووووش هوووووووه لووو انه كضيتهه وشردت بليله ظلمممممه !!!!!!

- خليييي حجيك الك ماااااعليييي بفلاااان وعلاااان
عاااااار وينغسسسسسل سمعتتتتتتت

- باللله ماااااامش عاااار غيرررررك

- شهااااااااب

- اسسسسسسسمع هييييي نطيتك مجاااال زاااايد
كل الوااااكف جداااامي خله يسممممممع هالحجي
ااااانه مشيت بزود ورديت بزوووود لااااني محتاااج لاحد ولاااا جااااي حبااا باحد بيييكم انتم
يووم الطعنتم هالظهرر انسييييتم كلكم وهالعشيررره انه المتبري منهه كبل مايصرح شيخكم .... والبت شرف وعزه وراااسهه مرفوع
ان راحت وان ردت وياي هيه شيخه طاهره واليحجي عليهه جلمه الشينه فهو النكسسس العاااار
الي مااااعنده شرف يشوفن الوادم كلهه مثله
والله وقسسسسم بالله قسسسم بالي نطك هاللسان
الي يجيبن طاري حرمتتتتتتي اسحله من خوانيكه
انه ماخافن غيييير ربي وانته تريد حكوك وتهد امشي ذاك ديوان شيخك روح خله يحكك

عفته ومشيت وهوه يفشر ويغلط ماهتميت ليه اجه جدامي الشيخ ..
- هاااا حمدلله ع السلامه والله ونور هالسلف بيكم
- الله يسلمك عمي
- ماعليك ببسام انه اتفاهم وياه
- موش لازم انه تفاهمت كبلك .. من رخصتك

عفته ومشيت ورحت طبيت للبيت وكبل رحت ليهه عاينت امهه كاعده وحاضنتهه وربى وجهه اصفر وزهره ومنال وامي وجدتي كلهه هنايه
سوتلي مجال واجيت كعدت يمهه ع الجربايه

- شهاب شصار
- مامش شي بنتي هاي تفاهمنه
- احججججيلييي
- كتلج مامش شي سدي السالفه هالساع كليلي شلونج ! تعبانه ! بالي يمج
- شويه بس كولي بسام شلون بي هسه
- انحلت بنتي انحلت لا تخافين ... شلونج عمه
- شلووني شخليت بيه من اخذتهه لا روح ولا عقل
- جا ماجيتي دورتي عليهه
- ماخلينه مكان مادورناه اني ادري انته وين شردت بيهه
- خذيتهه للجنه موش صحيح
- ايي
- هههههه عمه بنتج صايره تخجل تغيرت جثير
- عمه والله انته مادري شبيك النار فوك روسنه وجاي تتمضحك
- شكو ناريش انه هنايه منهو اليصلهه لا اخو ولا ابو ولا عم ولا خال يمسنهه بحجايه
- اي والنعم منك

بهاللحظه طب محمد ..
- شهاب خويه كوم الشيخ يريدك
- يلا جيت
- شهاب
- بويه بسج خوف شوصيتج انه
- انتبه على نفسك
- صار وانتي دواج وكته لاتنسيه زين

ابتسمت ليهه ومشيت ويه محمد جان يكلي
- اكلك خويه انتم رحتم طبيب نفسي اخصائي علاقات اجتماعيه شي .. شني الغير حالكم
- هههههههههههه الحب خويه اكبر طبيب هاذ
- لاااا عليك علي رضت !!!
- اييي جا عليش ماترضى
- تزوجتم !!!
- لاا بعد
- يلااا زين حتى نتزوج سويه
- هاااا جن لكيتلك طيره
- فختيه تلالي
- هههههه تتهنى تتهنى خويه .. خلي نشوفن هاذ شيخكم شيريد وينه هساع
- بالديوان هوه وعمامي
- امش صيحه انه ماطبن ديوانه
- خويه لاتكبرهه مايصيرن هيج خلنه نحلهه بينكم عاد
- لاتماطل بالحجي امش كله يريدنه نحجي هاي انه واكفله هنايه يطلع يحاجيني ديوانه ماعتب بابه
يكولن مايحتاج ارد لحجرتي انام عبن راسي غاد طبل
- امرنه لله

مشى للديوان وانه وكفت واعاين للشجر جان هالمجان راحتي هساع صرت عنه غريب
عجيييب هالدنيا ششايله من اقدار؟؟؟

شويه وشفت طلع محمد وياه ابوي وعمي كاظم
وليد والشيخ اجه اخر شي يتوجى عله عوجيته
مشيت ليهم ..
- كواكم الله
- الله يكويك .. شني ماتعتبن ديواني ياشهاب!
- ماعتب باب الطردني .. خير عمي محتاج شي
- حته جلمه الشيخ نهيتهه من لسانك
- مامش شيخ للي عاف ربعه وانه هديت هالعشيره وانته فصلتني منهه بعد مايربطني غير الدم بيكم
- عليش هالكلبك محمل علي هالكثر موش اجيتلك وتفاهمنه
- عله راسي جيتك لجن موكفي ورد فعلي هاذ شي خاص بيه محدن يكدر يجبرني اتعامل بشي انه ماهاوي
- يعني موش هاوي اهلك بعد ولا هاوي الصلح بينه !
- اهلي يضلون اهلي لجن تردوني اكعد جن
ماصاير شي واجابلكم بعد لاااا هاي غدا وكتهه
- اعرفنك كوي راس وعزيز نفس لجن موش عله اهلك ياشهاب .. الصار عرفت سبته وهاي انه اريدنكم تردون بينه كل حككم يرد ليكم ولدنه واعزازنا انتم ذب الصار وره ظهرك وحكك تاخذه من هالعين
- مشكووور ماتكصر لجن انه ماريدن لا حك ولا باطل ... انه مااجيت الا بملحتهه هيه تريدن تتعذر لابوهه وتشوفن امهه جيت عله عمى عيني لخاطرهه مريضه ماريدن اتعبهه بيهم غير هالسبب مامش لجيتي .. باجر من صباح الله انه اخذهه وامشي ولاجنكم شفتونه ولا سمعتك عننه شي
- كووووول يالله بويه وين ماااااشي وهادنه جااا انه اريدنك لكبرتي تهدنننني وتمشي ويه حرمتك !
- بويه الكرامه عزيزه .. لااا تزعلن مني لجن انته تعرفني ومامش حجي بعد بهالسالفه
- زين زين خلك براحتك انته تمشي بشور راسك
مانكدرن عليك لجن امش طيح عله عمك حاتم
تعذر منه وطيب خاطره
- وينه هوه ؟
- جوه بالديوان
- ماعتبن هالديوان اااانه عمي لا تسوولي سالفه
- سالفتيش عمك جوه امش ليه جا تريدنه يجيك برجليه !
- انه حمشي اجيبن ربى ونحاجي سويه لجن خله يطلع من الديوان يكعد باي مجان اجيه هنايه لا
من رخصتكم

درت وجهي ومشيت لبيتنه طبيت لحجرتي وكضيت راسي سطرني وعيوني مجمره
ربى كامت اجتي ليه ..
- شبيك عيني تعبان؟
- راسي حيييل ياذيني
- اسم الله عليك اكعد خلي اجيبلك دوا
- لا عوفي بعدين امشي هسه ابوج هنايه خلي نحاجي
- صدددك ابويه هنااا وينه وين كاعد
- امشي هسه عوفي الحجي
- يلا اي هسه

عدلت شالهه ومشينه جانت تمشي بسدي كلش وكلساع تعاين ليه واطمنهه لحد ماوصلنه جدام بيت الشيخ جانو كلهم واكفين عاد هيه كالت..
- السلام عليكم
كلهه ردت ليهه السلام وهيه عينهه للشيخ وهوه يتبسم ويعاين ليهه ..
- شلونك شيخ ان شاء الله بخير
- الحمدلله زارتنه البركه بجيتكم بويه
- البركه بيك شيخ
- ههههههه جن بعدج شايله بخاطرج علي ياشمسه حالج حال شهاب
- لا ماكو شي
- اي اي امشو لبيتي الثاني هناك نكعد عبن هالعنتر مايرضى يعتب الديوان
- شهاب نروح؟
- اي امشي

مشينه بس احنه وعمامي ردو الديوان بسام بعد ماشفته وين راح وشني ناوي عليه ..
مشينه لبيت الريم ..هلت بينه ورحبت ..طبينه للهول وهناك جان كاعد عمي حاتم .. عاينت لربى
وهيه دموعهه تصب .. كبل راحت ليه جرت ايده
دفعهه ردت كعدت بسده ...

- بابه حبيبي والله ماسويت شي اني وعيونك ماسويت الي يغضبك بس الصار كله مو بايدي
شفتني جنت الضحيه بكل شي مو شفت بعينك شنو الصارلي وما وكفت وياي بشي انته ليش يابه لييش
ماحجيت ولا كلمه دافعت بيهه عليه والله ضل موقفك هذا كل هالشهور يحز بكلبي جان المفروض انته الي تدافع عليه وتصدكني يوم جذبوني كلهم وماوكف وياي غير شهاب وصرتو ضده !!!

- عمي بنتك ماتريدن غير خاطرك كلبهه يمك شبعت بواجي عليك وعلكمتني لخاطر جيتهه ليك
جبتهه وانه ادري هنايه نار تحركنه وماهمينه ليهه
لخاطرك لانك عزيز علينه

- يابه اسسفه والله ماردت اقلل احترام وياك ولا اغضبك بشي كل عمري طعتك وماسويت اليزعلك مني بس والله مانتبهت بحجيي هذاك اليوم جنت عصبيه مانتبهت من عليت صوتي اعتذر يابه الله يخليك سامحني فدوا سامحني والله اموت اذا اتضل هيج شايل بكلبك عليه ماكدر اعيش واني ماراضيتك

جانت تبجي وتشهك بكل جلمه وانه بلكوه ساكت اريدنهه بس تسكت هيه بلايه شي التعب كاضي بيهه النوب تبجي هيج وتتوسل وهوه ولا جنه يسمع
ليهه ... والشيخ ساكت ويعاين لينه ماتدخل ولا جنه هوه الشعل هالنار ...

- يااابه ارجوووك لاتصد عني هيج والله كلبي مايحمل زعلك هذا والله ماريد شي ولا يهمني غير رضاك الله يخليك ابويه ياروحي لاتحرمني رضاك هيج ارجوووك

- اودعناك شيخنه

كام عمي وهيه صارت تبجي وتصرخ كامت ركضت وراه انه كضيتهه ...
- شهاااااب ابويه مايريدني راااح ولك مااايريدني لييييش لييييش والله ماسويت شيييي والله ياااااابه
عفيييييه لااااا لاااا ارييييد ابوووويه شهااااب اريددده والله ماتحمل بدوونه والله
- اهدي يارويحتي بسج عاد هلكتي روحج كومي وياااي كوومي بعدين نرد نحاجي بس اهدي اهدي

كبل كضت ايدي وضلت تشهك انه تسودنت عليهه عرفت هالنوبه ماتعدي بخير .. ضلت كاضه صدرهه وطاحت بين ايدي تعاينلي ووجهه احمر صاير تتشاهك واجه الشيخ صحت عليه ..
- لااااااتكررررررررررب
رويحتي خلج وياااي لاتستسلمين خلج كويه

شلتهه ومشيت لبيتنه جانت تشد بهدومي واعرفن كلبهه شلون جاي يتعصر هالشكل طبيت بيهه كبل لحجرتي وامهه اجتي تركض عليهه .. مددتهه
ورحت للجنطه كلبتهه كلهه وطلعت الادويه
وكلهن تجمعن فوك راسهه عاد صحت بيهن ..

- امشششن برررررررره يلاااا الكل برررره
- يااه عمه شجاك وين اعوف بنتي
- امششي الحكي رجلج وعوفيهه مثل ماعافهه لكم خااااافو ربكم البت بينهه وبين الموووت شعره
امششششن عااااااد بررررره

طلعتهن كلهن وكفلت الباب رحت انطيتهه البخاخ
ابخلهه وهيه تشهك وتبجي وتعصر برجلي ..
- حبيبتي بنتي بسج عاااد كطعتي كلبي عليج بسج يابنتي ماضل بيه حيل خذيتي حيلي كله بطيحتج تكوي وعينيني

حضنتهه وهيه تبجي وصوتهه يعلى ازيد بالبجي وامهه تدك بالباب خبصت الدنيا .. ضليت مخلي راسهه بصدري وهيه تبجي عاد كمت اخذت الابره وبالكوه قنعتهه حته تخليني اضربهه جنهه
تريد تضل مختنكه هيج ماتريدن تتشافى بعد

كعدت ع الجربايه وحاطه راسهه بين ايدهه وتبجي
انه كل حيلي باد وماعرفن شسوي بعد ... رحت كعدت يم رجلهه وحطيت راسي بحضنهه
دنجت خلت راسهه عله راسي وانه اسمع بجيهه
وافكر بالجاي يصير شلون ينحل وتاليه وين!!!

مابيدي شي عله ابوهه واخوهه كل البيدي سويته
وهالشيخ شال ايده من السالفه ولا جنه هوه الي بدا بيهه واجانه يتوسل !!!

خوفي عليهه اذا تضل هيج يوم الثاني يكف كلبهه
هيه بالف ياعلي جاي تجر بالنفس وهذول كلهم
مايرحمون ولا يراعون مريض ولا يشوفون حك الله وين ...

جريت ايدهه بستهه ورفعت راسي وضليت امسح دموعهه نزلت بالكاع يمي وتمددت وخلت راسهه بحضني ضليت امسد عله شعرهه واكللهه ...

- همه الخسرو حبيبه انتي العليج سويتي وماكصرتي صوج هالحاسب روحه علينه شيخ
يلدغ ويضم راسه .. كتلج ثعالب يابويه لا تأمنين
وادمي واعرفنهم

- مو تعوفني شهاب ماريد اشوف احد بعد بس خليك انته يمي اريد اضل نايمه هيج ماريد احد منهم بعد

- نامي حبيبتي نااامي محد يكربن ليج وانه موجود
وباجر من صباح الله نمشي ونكمل حياتنه مثل مابديناهه

عله نومتهه ضلت هيج وانه مرجع راسي ع الجربايه ومغمض عيوني مجمره من التعب
وحيلي باد وشايل همهه وراسي مسطوور مالحكت اكعد مثل هالوادم كضيتهه صياح بصياح ..

وره ساعه اندكت الباب بس هالنوبه صوت ابوي
- شهاااب بويه اطلعو عمكم هنايه يريدنكم يلااا بويه تعجلو
- خيييير النوب شتردون ازيد بعد
- امششش بويه لاتجادل البت ابوهه يريدنهه يلاا

كعدت هيه عله صوتنه وضلت تعاينلي ..
- امشينه لنشوف اخرتهه شلون
- شهاب خايفه والله ماتحمل بعد اكثر من الصار
- اعرفن والله اعرفن بيج تعبتي بس شبيدي يابويه ماتكليلي ابوج هاذ ماكدرن احجي عليه شفتيني ويه الكل مااحترمهم بجلمه بس ابوج صعبه احاجي
- لااا ياروحي ادري بيك بس مادري ماعندي بعد قوه وحيل اواجهم والله كل جسمي يرجف
- ااااوف يرويحيتي عساهاا بالخان وغدر وتوكلي
بالله يلا بنيتي

كامت وانطتني ايده كومتني وردت تكربت حضنتني وانه شميتهه وبست راسهه وطلعنه
للديوانيه جان ابوهه وابوي كاعدين ويمهم جدتي
ومحمد وليد وامي وامهه احنه طبينا وضلينه واكفين ونعاين بالوجوه جان ابوهه يكول ..

- هلاااا والله شني ساعتين يله خطيتو باب الحجره
جنكم نسيتم الحيا !!!
- عمي البت تعبانه وجنت انطيهه علاجهه عليش هالحجي
- وماتنطيهه امهه انته شكووو
- اااانه مسؤول بيهه صارلي خمس شهور اداريهه واعرفن شني اليهديهه موش اخليهه هالساع اعوفنهه وحيدهه ومايعرفون شني علتهه
- شهاب خويه اكعد ارتاح
- تعاي ربى

اجتي يمي كعدنا وجان عمي يكول ..
- جلمتين احجيهن والخيار لج ... يا تردين وياي البيت وتمشين مثل ماانه اريدن وماتفتحين حلجج بحرف ياتضلين هنايه وتنسين اهلج
.
.
.
يتبع
💓💓
شلونكم بنات 💗💗💗 جنت طالعه وماحصلت نت ضليت اكتبلكم هالبارت الطويل حتى اعوضكم بي .. توقعاتكم ؟؟؟ وشنو رأيكم بتصرفات شهاب؟