رواية من فجر ديسمبر الفصل السابع والخمسون 57 - بقلم Zoka 🌷

من فجر ديسمبر
🍁
🍁
يوم ثاني بمركز العلاج بس هالمره اختلف بصوتهه كِل الممرضين الي هناك فرحو بيهه
.. ماجانت تضحك ترد بابتسامه جذبيه تلاطفهم موش ازيد وحجيهه عله كد المهم .. انه احاول وياهه واضل اطلعلهه مواضيع من تشوف السالفه تطول تكضيهه اممم يعني سد السالفه ماريدن احجي هاي كمت افهمهه ...

صرت بالبيت كل ساعتين اكومهه تتوجى علي
وامشيهه جم خطوه هيه بالف ياعلي تشيلن الرجل الوحده وتضل تتوجع منهه بس انه ماخليهه تستسلم اخليهه ترتاح وارد النوب هم اكومهه تمشي ..

المغرب كملت صلاه واجيت كعدت يمهه جان عاينتلي وكالت ...
- خابر على محمد
- محمد ! عليش؟
-دخابره هسه  نحاجيهم شويه شكو بيهه
- موش مرتاحلج
- اي خليك دائماً هيج

ابتسمتلي وانه فهمت اكو شي ... رحت جبت تلفوني وخابرته ع الفيس ميجاوب ضليت ادزله رسايل تالي يلا خابرني ... وصوته مبحوح ..
- هااا ولك شمالك
- شهاااب خويه
- خيررررك احجي شصاير
- خذوهه مني هالطيره خذوهه
- لااااا عليك علي شصار
- امهه لاكفتهه تخابرني بالليل وماخذه تلفونهه واختهه كلتلي كاتلينهه وابوهه داري بالسالفه
وهم راد كاتلهه واجني عماتهه ماخذيهه يمهم
لك خويه شسوي اااانه وعلي روحي جاي تحترك عليهه شلون هيج يسووون بيهه وانه كاعد وساكت شلووووون
- جا شتريدهم يصفكولهه ياخويه تهدا بالرحمن
وكوم غسل وتعال اكلك شتسوي يلا خويه يلا
- ماشي

سديته وعاينتلهه وضحكت وكلتلهه ..
- بعلي رادارج هاذ بالمجان
- ههه اصلي هذا ماكو منه .. شبي ؟
- حبيبته اهلهه لاكفيهه تخابره عالكه بينهم
- ياااا خطيييييه وشراح يسوي
- بعده مسطور .. هاذ جاي يخابر اكفي
ها خويه
- شهاب شسوي هساع فهمني انه حاجيت ابوي نروح ليهم نخطب مارضى بيهه هاي كبل ساعه تعاركنه عله سالفتهه وامي النوب طبكت وياه
- هااا عليش مايرضون النوب
- يكول مو خوش بت التصادق من وره اهلهه اخذلك من بنات عمك لو خالك مانجيب غريبه
- ايييييييي عله هالسالفه الماتخلص بويه هسه شني البت كفرت خماهه كفرت معليك انته انه احاجي ابوي واقنعه بس انته تهدا وتوكل عله الله واخلي يروح يمشيلك عليهه هاليومين
- بعد اخوووك اريدنهه منك
- تدلل خويييه شني اعوفنك بحريجك هاذ لااا وسفه.
- لااا والله اعرفنك ماتكصر
- زيين هسه امشي تعشى وريح بالك وانه شويه واخابرك عود دزله التلفون
- اي ماشي ماشي
- يلاا مع السلامه

سديته وكلتلهه ...
— هالنوب اهلنه مايرضون يمشون ليه جيف غريبه
- امه هم ماتقبل
- اي تريدله بنات اختهه من زمان وهالساع راح تجلب بالسالفه
- هاااا شوكت راح تخابرهم
- خلي يتعشون هسه ... بس هاذ ابوهه شراح يقنعه بعد الصار !!! والله ليلعب بيهم لعب
- ههه لااااا تصير تصير ماعليهم شي
- هااا وشدراج تصير
- مو يريدوهه تصير هاي تجرالهم كلوبهم طيبه مايستاهلون الاذى خطيه
- هم الج ايد بالسالفه !
- ههههه شهاب
- جا والعباس صدك الج ايد بيهه هالضحكه اعرفنهه
- كلشي بيد ربك اني شعليه
- لا هاذ رادارج يسوي العمايل اعرفنه
- هسه اهم شي نلم شملهم مو مهم الطريقه المهم الغايه
- هااااا واحنه يمتى نلم شملنه
- شعدنه احنه مو ملتمين
- مشتعل صفحات اباهتنه لو مانج تدرين
- اممم هم سهله
- شلوون بله سهله
- مادري هاي انته تجاوبهه .. اني ماسوي شي بعد سلمتك كلشي تصرف انته
- هاااااا جا يصير خير

وره شويه خابرت ابوي وضليت احاول وياه لحد ماقنع يروحن يمشي ليه وكال باجر يرحون ليهم
من سديته منه عاينت الساعه تسعه بالليل ...
انه ذابحني الشوك ليهه صح جدامي هيه وكاعدين سويه لجن مشتااك ليهه موش براحتي اتصرف وياهه ..بسام فوك روسنه دايماً استحي حته اعاينلهه واتصفن بيهه ...
هيه تنام من وكت ماتعدي العشره الا وهيه نايمه
عبن دواهه يرخي الاعصاب وينومهه بساع

شفت بسام راح للحجره يخابر وامهه كاعده تحجي ويه خواتهه عاد رحت ليهه لحجرتهه وسديت الباب ورحت كعدت بسدهه وهيه نايمه ..

احبنهه وعلي ما تحمل بلايه ماشمنهه واتلمس شعرهه الاحمراني وهالزبد هاذ اتلمس نعومته
صح هيه ضعفانه هواي وبعدهه جامده معالمهه
والمرض ماخذ من حيلهه لجن تضل احلى حرمه بعيني لا اشبع ولا امل وانه اعاين للنمش نوبات اضل احسبهن وتالي اخربط ويضيع عندي الحساب واضل اضحك عله روحي شجاي اسوي انه !!!

تمددت بسدهه وحضنتهه وخليت راسي بشعرهه
اشمن بي وتالي هيه تحركت وفتحت عينهه عاينتلي وتبسمت وردت غمضت وكبرت راسهه علي .. خذيت ايدهه وخليتهه عله لحيتي احبن برودتهه هنايه ماشبعن منهه .. كالتلي..
- شعجب اجيت هسه يمي
- جابني الشوگ ياحلوه
- امممم زين خليك نام سوه اليوم اني هم مشتاقتلك
- وامج شلون
- مااا عليه باحد ابقى يمي
- ههههه صار

نزلت شويه وخليت ايدي جوه راسهه وحضنتهه
ضلت مخليه ايدهه عله لحيتي وتتلمس بيهه وتعاينلي بكل هداوه .. بستهه بشفتهه بنفس الهداوه هاي وضليت اتمعن بيهه لحد ماغفت هيه وانه ضليت اتلمس بشعرهه والنوب خليت ايدهه عله عيوني ونمت ... نمت براحه بعد كل هالشهور
هجست ذبيت كل حملي من تعب هذيج الايام وصبرهن كلهن ذبيتهن وره ظهري ونمت فارغ البال مرتااااح مأمن من كل شي دامهه بهالحضن ....

الصبح كعدت عله صوتهه وايدهه عله وجهي
عاينتلهه وكلت ..
- هلا بهالصباح الي يبدي بهالوجه
- صباحي جمالك يااسمر
- يارويحتي من يمتى كعدتي
- ماصار هواي
- زين وامج اجتي شافتنه مو ؟
- اييي واذا قابل شمسوين
- طالعه عينج ولج
- امممم .. هسه كوم خلي نتريك وخابر محمد شوفهم شوكت يروحون
- ايي بعلي ذكرتيني

كمت خابرته وكال ربع ساعه ويطلعون ..
تريكنه وبسام جان يكول ..
- اكلج يمه هاي كلهه  تمعشكت و عرست ضليت بس انه
- يايمه هو انته عايزك
- ههههاااااي جبتيهه بالعدل عمه خاب لحك عله صاحباتك بالاول
- لاااا انتم ماتدرون انه ضاملي وحيده للزواج
- ااااه هم بيك البله منين هاي
- ماتعرفونهه المهم انه اريد اتزوج كلي لابوي يحضر نفسه
- اي يمه الساعه المباركه هاي راد اطكطكلك حرمل يمه على هاي هدايتك
- طكطكي يمه ابنج صابوه بالگلب علعلوه
- لااااااااااااه لاااه ماصدك
- صدك لو تشاقه !
- والله شبيكم
- شلووون ويمتى وشني التغير
- كبرنه عاد ملينه من اللعب وهيه اجتي عدله
مثل مايكلون عثره بدفره كبل طحت بيهه
- ماصدكك ياخوي اعذرني عبن ماظن كلبك يرست عله وحيده انته تاليتك اربع جناسي تحط بجيبك
- هههههخخخخخخخخخ رادلهه بخت هاي
- هااااا شحجينه موش نعرفك ياخايب عجين ايدنه انته
- هههههههههعععع لااا هوه مال حبيت اي بس مال استقر واكعد راحه لاا هاي ماكدرلهه يااخي هيج اهجس اختنك اذا ما الكه فد خمس ست بنات مراسلاتني
- ايييي ضل تمضحك عله بنات الناس تاليهه تطلع ببنتك
- اكص راسه اليصل بنتي
- هاااا عليك حلال وعلى غيرك حرررام والله وكت كامت العالم تحلل بكيفهه
- يييممممممه هيه لو مارخيصه ماتجي تحجي
ماتعرفيهن شني هذني زايعتهن الكاع واحنه نضحك عليهن
- مدامهن هيج شكو رايحلهن لعد
- قابل اروح اتونس بالزينه واجذب عليهه هذني مثل شغلات خمسه بالف تحجي ويه وحده تجرلك وياهه عشيره كلهه تكهكه وياهه وبعدين يطبكن ع الخط .. يمه شعبالج انتي اروح عله بنت الاصول
اتمضحك وياهه تاليهه اتورط
- هاااا شتتورط يعني من تكلك تزوجون!هاي ورطه
- اي جا شني انه موش مستعد للزواج من هسه
- هاي يمه لعد شوكت يبعد عيني
- مادري اشوفن يمتى يصفى بالي وافكر اكون عايله
- شتنتظر ينزلك الوحي يمه ويكلك يلا
- لاااا والله انتظر المره الزينه هيج كون من اشوفنهه اكولن ايييي هاي راح تعجب امي الغاليه تلكينه جايج ركض
- عزززا بعينك شلون لوتي فرهه عليه ميكول اني بعدني مشابع ونسه بهالبنات شلون شلون
- ههههههه والعباس يمه لو اشوفنهه ترضيج اجيبهه بس هذني كلهن هيج كَلك مابيهن فايده
بس يطكن بهالبنطرون ويتمخطرن بالشوارع والسواكه ميفيدنج
- ماتكولهه لنفسك اني شكو كاعد تفهمني عليهن شنو قابل ماعرفهن ! انته جوز منهن
- الله كريم ادعيلنه

جانت ربى تضحك عليهم وتكلي .. مايتزوج هذا اخذهه كلمه مني ...

للوحده الظهر خابرني محمد يهووس وفرحان
- ولك خويه نطوهه ليه نطوووهه
- عليك الحسين صدك تحجي!
- اي والحسين ... لك سهلت مثل شربت ماي
- شلووون يعني ابوهه ماحجه شي ماكال
- لااا حجه ورزلني هذيج الرزاله العدله انه كلت هاي رحت بيهه تالي شو صارت صلاه الظهر
وهوه كال اروحن اصلي وابوي وعمي كاظم  كامو وياه انه بالاول كلت هاذ شماله يعوفنه ويمشي يعني مايريدن ينطي اخافن يطردنا هيج ؟ ضليت اهوجس وهوه راح يتوضى عاد كمت وراهم هم توضيت بس كملنه صلاه اشو هاذ كوم وصيح جيبولنه الجايات بعد ! صفنت وابوي هم تفاجىء جان عمي يكله .. هاا حجي مارديتلنه جواب .. شو هاذ كال اشربو جايكم ونتفاهم بالخير

- دخيلك ربي سبحانك

- والعباس ماعرفن شهداه هيج علينه ! عاد كام يسأل عله بيتنه وشغلنه وعايلتنه وتالي كال تبشرون

- بالمبارك ياخوي والله تستاهل هالفرحه ربي يتممهه بالخير

- الله يبارك بيك خوويه يلا بلكت تصيرن صدك ونعرس سويه

- ههههه ان شاء الله خويه

- يلا بعدين نحجي خويه اودعناك

-الله وياك

سديته ورحت لربى وكفت جدامهه وضحكت وانه اشر بالتلفون عاد هيه ضحكت وكالت ..
- نلحك نرجع على خطوبتهم ؟
- هههههههه بالله انتي كارثه شسويتي للزلمه
- تريد تفسير من ياناحيه
- من ناحيه الصار كله
- انته تعرف ان رفيقي مؤمن وعالم .. علمني الهدوء والتركيز ومن خلال هالطريقه الي تعلمتهه بالتركيز الي يوصل ابعد من النظر على مد البصر
كدرت اتواصل وياه وبطلب بسيط لناس بسطاء ونيتهم صافيه صار مثل سكينه وهدوء  اعتلىت افكار هذاك الشخص وغيرت عصبيته كلهه لهدوء وخلته منصاع لرغبه الاهل
وبقناعته هو وافق
- هااااااا والله عمي كل البله بيج
- ههه دير بالك تندك بيه
- لا بويه شمالي تسودنت
- ههههه لا حبيبي انته في حصن حصين
- اكيييد ؟ خاف بساعه مايطبكن عندج ولنج مروحتني
- لاااا هناك استخدم عقلي الانثوي مايحتاج كل هذا
- هوه هاذ وحده كارثه عاد النوب هالسوالف الصفح الله يساعد كلبي بس الله يساعده

ضحكت وانه كرصت خدهه .. اتعجب عله كل هالعمايل تطلع من وره ام شبرين هاي !!!!

جان وليد يخابرني وكل يوميه يسألني يمتى ترجعون اريد اتزوج .. وانه اكله بعد واصبر
وهوه مشلوش تسودن يكلي حته النتايج راح تطلع شتريد مني بعد ... اضل اضحك عليه وهوه يحرك بدمه ..

وره اسبوع بدات ربى تمارين عله اجهزه رياضيه
واحد مال مشي والثاني مال بايسكل .. سرعتهن
بطيئه بالاول عله كد ماتضل تحرك بالعضله لربع ساعه واستراحه وترجع هم ربع ساعه ..

جنت انتظر هاليوم الي اردن اشوفنهه تمشي باريحيه مثل كبل .. كلبي مفرفح لهذيج اللحظه
وادعي ليهه كل صلاه وكل لحظه غروب ...

بيومهه من طلعنه اخذتهه لمكتبه  بيهه قسمين رسم والوان وكتب  ..خليتهه  تختار بالالوان وانه رحت اكلب بالكتب جان عاينت كتاب اسمه ..
" سندريلا سيكريت "
فتحت عله ثاني ورقه وجان مكتوب ..
"   الى كل روح تعشق الحياه .. الى هؤلاء الذين فقدو شغفهم فمضو ببريق خافت .. ينتظر من يشعل فتيله .. إليك ِ انتِ.. "

كلبت وقريت المقدمه وجان الوصف بالمصري
وباسلوب جديد مثل مايسموه " دس السم في العسل" عجبني وكلبت لبدايه الروايه وجانت تحجي عله بنيه تحاجي امهه عله قصه سندريلا وشني الي صار وره ماتزوجت الامير ..
اخذت عليه لمحه سريعه وكلت هاذ الي احتاجه
اخذته ورحت ليهه لكيتهه تتلمس الفرش وحاطه يمهه كومه اصباغ خشبي وعصارات ودفاتر واحد اسود اوراقه وواحد اصفر و واحد جبير ابيض 
دفعت حسابهن واخذناهن وطلعنه ..

من ردينه للبيت خليتهه تاكل وترتاح وانه ضال بالحجره اكلب بالكتاب واقرا واضحك جان لهجته
حلوه بين المصري والفصيح ...

تالي كمت رحت ليهه وكعدت بسدهه ..
خليت ايدي وره راسهه وانطيتهه. الكتاب ..
عاينتله وكالت ..
- سندريلا !!!!
- افتحي بالاول

فتحت وقرت اول مقتطف منه وعاينتلي وضحكت
سديته وخليت ايدي عله ايدهه وكلتلهه ...

- شني رايج لو هالمره مانعاين للعالم
- يعني !
- يعني ناخذ مثل الاجازه جم يوم ونعاين للخيال
خيال طفولي بناتي بهذاك عالم ديزني يشاركنج بي
جم بنيه وهلوستهن باحلامهن الورديه بذاك القصر والامير والاحصنه وهذيج السحاره الي كلجن تحلمن بيهه هنايه موجوده هيه تحاجيكم بس موش بالسحر بالعگل مثل ماتحبين
- امممم يعني نحول العقل للخيال
- ونعيش ونستفيد بي .. بلايه ماضي وبلايه افكار
جدامنه للساعه ١٢
- ونرجع للواقع !
- واقعج انه ياحلوه ترجعين من خيالج الي
كل يوم بعد ال ١٢ تهدين الكتاب وتجين ليه ماشي

ضحكت وباستني بخدي وكالت...
- ماشي حبيبي
- يلا اخليج تقريه واروحن انام شويه

بستهه ورحت لحجرتي ونمت وانه مرتاح لهالخطوه .. من ضحكتهه هاي عرفت اختياري صح لهالكتاب ... هيه تحتاج تسمع من عگلها
بالاول وتبدي التغيير من داخلهه حته يفيد تعبي ليهه ..

كضت هاليوم كله تقرا بالكتاب انه اكعد جدامهه اشوفنهه مشغوله بي واعوفنهه ماحاجيهه وحته امهه هم نبهت عليهه تعوفهه وحدهه تقرا ..

لليل تعمدت اضل بالهول متمدد وانتظرهه تجي
عبرت ال ١٢ بخمس دقايق ويلا اجتي وهيه تتوجى عله الحايط وتمشي علكيفهه .. كمت ساعدتهه وكعدتهه عله الدوشك بالكاع .. مددت رجلهه وانه هم كعدت بسدهه ومددت رجلي
كلتلهه ..
- تاخرتي بخمس دقايق
- ايي سرعتي بطيئه ههه
- هههههه هالمره سماح مره الثاني ياتسرعين مشيج يا تكومين من وكت
- نسرع ان شاء الله
- ما ضل شي الحمدلله

كربت راسهه لجتفي عاد انه خليت ايدي عله جتفهه وحضنتهه ليه .. كالت ..
- انته  تعرف ليش عايش ؟ وشنو سبب شغفك بالحياه !!
- بصراحه .... عايش حته اخلي الي بصمه بهالحياه ..شي اخلي بي اسم شهاب يعلى وهاذ نفسه شغفي
- وبشنو راح تسوي؟
- جنت كبل افكر بالمختبر والبحوث دراسات عله جم مرض فايروسي هذني جانن بالي بس الزمن اله غير راي بعد
- يعني هسه انته محدد هدفك وتنتظر بس تتحرك اله بالوكت المناسب
- اي بس يرادلهه وكت وانه هسه موش هامني هالهدف بكد ماتهميني انتي
-بشنو اهمك ؟
- شوفي انه يوم الاتزوجج هاي بيهه ارضى عله حياتي العشتهه من كبل كلهه
- واهدافك؟
- هاي من وره مانتزوج ابدا افرغ نفسي ليهه واحققهن ان شاء الله
- ان شاء الله تحقق كلشي بنفسك
- وانتي شني شغفج !
- قبل جان عندي اصرار وشغف للنجاح وعليه جنت اقاوم كلشي حتى انجح واحصل شهاده وحصلتهه هسه وكونت الي اسم مهني بس احس مو هذا الي ردته من صدك
- يعني !!
- يعني اكو شي ناقصني بعد ماعرفه شنو بالاخص هسه من قريت الكتاب بي هواي اسئله حتى تعرف البنيه شخصيتهه وهدفهه وسبب حياتهه وهواي منهن مالكيتلهن جواب
- زييين هاذ شي حلو مدامج حددتي  السؤال راح تلكين جوابه
-شلووون! دايخه بيهه
- تردين اساعدج ونلكاه سويه لو انتي تحاولين تعرفي؟
- مادري انته شتكول شنو الاحسن
- انه بالاثنين ماعندي مشكله لجن برأيي تحاولين بنفسج تعرفينه وتجين تكليلي هيج وهيج عرفت
- امممم ماشي
- عجبج الكتاب ؟
- كلششش يجنن ماقاريه من قبل هيج شي فكاهي ونفسي واجتماعي بنفس الوكت
- ايي انه من الاول عرفت راح يعجبج
اريدنج تكملينه واريدن اشوف تاثيره عليج
- شهاب حبيبي
-ياعيوني
- ماكو منك بهالدنيا والله احبك .. هواي تهتملي واني بس متعبتك
- لااااا يرويحتي تعبي ليج راحه تصيرلي انه كلشي عندي يهون بس اشوفنج تضحكين ومرتاحه
- ياروحي ماعرف شلون اعوضك هالتعب كله
- بس ردي هذيج الشمسه العرفتهه كلشي بيهه تعوضينه
- هههه ان شاء الله حبيبي

باست خدي وانه حضنتهه وبعدين اخذتهه حته تنام
وانه هم رحت نمت مرتاح لشوفتهه هيج بدت تحاول ترجع نفسهه  ...

ثاني يوم هم اخذتهه للعلاج وجانت تحاول بنشاط ازيد من كبل اعرفنهه كويه رغم الصار موش هين  كضت عمرهه بالمرض والمستشفيات لجن اعرفنهه طموحه وروحهه تحب الحياه جانت بس محتاجه تصفي بالهه وتشحن طاقتهه من جديد ..

بهالليله اجتني ساعه ١٢ .. انه متعمد اعوفنهه اليوم كله وحدهه وانتظرهه بالليل ...
من اجتي جانت شايله وياهه الكتاب ..تمشي بالكوه رحت ساعدتهه وخليتهه تكعد بالكاع ..
كضيت ايدهه وبستهه وكلتلهه ...
- اشتاكيتلج ياحلوه
- واني اشتاقيتلك حبيبي
- اي شني احجيلي شتغير اليوم
- باوع هاي اكو كم سؤال حاطتهن الكاتبه اني جاوبت عليهن واريد اشوفك شنو جاوبت وتكلي رأيك
- اي يلا شوفيني
- هذا اول سؤال ..
"ايه اكتر جوانب في حياتي مش راضيه عنها ؟"
اني فكرت هواي اليوم كله اني بس افكر حتى اجاوب هالاربع اسئله وطلع وياي ..
' صمتي الزايد ، قلقي للمستقبل ، وزني القليل ، جسمي مو متناسق ويه عمري ، تعب شهاب عليه،
حزن امي وخوفهه ، والاكثر علاقتنه مامنطيه حقهه '

- اي حلو هالجواب كملي الثاني
- " ايه الي انا بعمله غلط ومحتاجه اصلحه ؟"
' كرهي لنفسي ، الاكتئاب '
- حلو هاذ جواب دقيق عفيه عليج عجبتني صراحتج ويه نفسج هالشكل
- تعبت يلا لكيت الجواب تره
- وهاذ الزين حته يطلع جواب بالمضبوط ..كملي
- الثالث ..
" ايه الي بعمله كويس ومحتاجه ازوده ؟"
' صراحتي ويه شهاب وحبي اله ، اشارك ايامي الماضيه وياه '
- حلوووو كلششش عجبتيني كملي
- الرابع ..
" لو قررت من النهارده اتحمل١٠٪؜ زياده من مسؤوليتي تجاه حياتي ..ايه القرار الي هاخذه مهما كان بسيط ؟"
' قراري الاول .. اني اتقبل واقعي بروح طيبه لانه مو شر هو نعمه خصني بيهه الله ..
قراري الثاني .. اكون مسؤوله عن صحتي ونفسي واسترجاعهه واتحمل كل صعوبه تواجهني بطريقي لنفسي ..
قراري الثالث .. ابني حياه جديده بسعاده ويه شريك عمري واحافظ على كل مايسعده وينطي الامان والراحه وياي .. '
- تكدرين عليهن انه واثق بيج يارويحتي
- يعني هسه هاي الاجوبه كافيه ؟
- اييي كلش كافيه خليهن جدامج وامشي بيهن عله راحتج .. مدامج حددتي وجهتج وين تصلينهه ..
- مادامك عندي كلشي اكدر اسوي .. اني من اشوفك وياي احس بطاقه اكثر انته دافعي الوحيد حتى ارجع كلشي خسرته
- يابعد كلبي وهلي انتي .. وياج انه لاخر نفس

ضحكت وخلت ايدهه بايدي وضلت تعاين للمحبس وتتلمسه جان تكِلي ...

- بما اني قررت اشاركك الايام الماضيه خلي احجيلك شنو قصه هالمحبس
- هاا بي قصه ! موش كلتي مشتريته جديد!
- هههه لااا ..شوف هاي قبل ماترجع من تركيا بسنتين .. جان اكو رجال صديق الشيخ وكلش عزيز عليه من اهل الناصريه .. هذا عنده بنته
على فجأه صارتلهه حاله اكتأب بس فد مره البنيه انتهت حاولت تنتحر اربع مرات ويتلاحكولهه تكوم تمشي بالبيت مثل المخبله تتلفت وتحجي ويه نفسهه اليوم كله ولا تاكل ولا تشرب بس تبجي وتحاجي نفسهه .. جانو اهلهه حابسيهه بغرفه ومخلين امهه يمهه .. فهذا الرجال غني كلش عنده من كلشي بيوت واراضي و ولده كلهم سيارات وضباط وهو هم اله صيته .. ماخلى مكان ولا دكتور مااخذهه اله كلشي سوالهه والبنيه على حطتهه .. عاد اجه للشيخ فد ليله وكعد يشكيله
همه وجان محتار والدمعه بعينه فالشيخ كايله
نريد نضيفكم اني وبنتي كاله حياكم الله ..
بنفس الليله دز صياد جابني اله وحجالي سالفته
وكلي .. تروحين تشوفيهه بلكي تفهمين شبيهه
كتله ماشي والصبح طلعنه ويه الرجال لبيتهم
هناك شفت بيتهم قصر مو بيت بهذاك الوكت وهو بيته دبل فاليوم وكله سيراميك ويلمع بالاضويه والثريات والتحفيات .. الحلو بي بيومهه فرغ نفسه بس النه وماخلى اي احد يفوت يمنه حتى ولده دزهم بره وبقى بالبيت بس احنه والبنيه واختهه الصغيره وامهه والحجيه .. اخذني لغرفتهه اني من قبل مايفتحون الباب اجتني رؤيه بيهه ..

- شني هالرؤيه ؟
- شفتهه يم قبر وتبجي عليه .. من طبيت شفتهه
حاضنه رجلهه وتتشاهك بالبجي وشعرهه منكوش
وسواد عيونهه ماخذ نص وجهه .. سلمت على امهه وباوعتلهم وكلت للرجال يطلعون ويعوفونه وحدنه .. هو هم اخذ مرته وطلعو .. ضلت البنيه تباوعلي ومتخوفه مني .. اني رحت كعدت بسدهه
ومسحت دموعهه واني اضحكلهه كلتلهه ..
عيونج كلش حلوه ليش مخربتهه بالبجي
مجانت ترد عليه بس تصفن بوجهي .. اني بهاللحظه حسيت بشي هنا موجود جنت خايفه اندار بس رفيق كالي .. يا عبد .. اني اعرف من يكلي هيج معناهه موجود اني ومسيطر بكل شي ..
انداريت وشفت جان قزم كاعد بنفس كعدتهه بهذيج اللحظه صح عندي خوف بس حسيت بقوه اجتني
وبيهه كدرت اكمل حجيي وياهه طبيعي كأني ماشفت شي .. حضنتهه وكلتلهه..
تعرفينه منو مو صح ؟
كالتلي اي .. كلتلهه منو صاحب القبر هذاك
جان تكوم تبجي وكالت .. ابن خالي جان حبيبي وانكتل غدر .. ضلت تحجيلي شكد تحبه وشلون هو جان مسوي شغل عند واحد من الساده ع اساس يخليهه بس اله تتزوجه ماياخذهه غيره لان جانو عمامهه يردوهه .. فعرفت من ساعتهه هذا الي وياهه من شغل هذاك وصار مثل الي انقلب السحر على الساحر هذا بدال ما يسهللهم بالخير ربطهم بجان ومن مات الولد ضل هذا ويه البنيه وهي من كد ماتشوفه وحزنهه على حبيبهه سوا بيهه الخوف هذا كله ودمر نفسيتهه اكثر مما هي مدمره وهذا القزم بالاصل يخليهه مريضه وصايره هوسه عليهه
- وانتي شسويتي ليهه بهالشي؟
- اني كلتلهه تريدين تعيشين وتخلصين من هذا لو تموتين ..كلتلي اريد اموت .. كلتلهه ماشي اذا تريدين تموتين كومي صلي ركعتين استغفار واطلبي الراحه بالممات وبعدين اموته وانطيج حبايه تموتج بهدوء .. هي كيفت ورأساً كامت
كلتلهه اسبحي بالبدايه لازم تتنظفين قبل الصلاه
عاد راحت ركض طلعت ملابسهه وطلعنه اثنينه
شافنه ابوهه اجه يركض يريد يفهم شصار كتلهم
تريد تسبح عاد اخذتهه امهه وراحت للحمام
بقيت ويه الرجال والشيخ كتلهم اريد حبايه فاليوم
ضلو يسألون ماجاوبتهم كتلهم اريدهه ووياهه مصلايتين وقران ... راح الرجال يجيبهن واني طبيت للغرفه فتحت الشبابيك وشلت الفرشه ذبيتهه بره وصحت لاختهه جابت وصله مسح و وصيتهه تحط بالسطل مي وملح وتمسح الغرفه كلهه
ورتبتهه من اجتي البنيه سابحه ومرتبه ومشطه شعرهه كعدنا وحدنه وانطيتهه لبست الشال والعبايه حتى نصلي .. فهي سألتني ليش تصلين وياي ؟  كلتلهه .. اني اليوم اشاركج بكلشي
ماحجت شي وبدينا نصلي .. طبعا اني بالبدايه
كلتلهه نصلي ركعتين بس البنيه استمرت بالصلاه
من وحدهه تصلي وتبجي ماحاسه على نفسهه شكم ركعه صارن .. من شفتهه كملت وكعدت تتشاهد
كلتلهه رددي وياي .. ورددت تسبيحات جنت متعلمتهه من الرفيق .. كلتلهه بعدين افتحي القران وشوفي ياسوره تطلعلج نقراهه سوه .. فتحته وطلعت سوره الملك .. قريناهه وهي جانت تتلكىء وتضوج تريد بس تكوم اني مخليتهه .. حضنتهه
وضليت اقرالهه السوره مرتين و٣ وهي تردد وراي لحد ما سديت القران جان اجاني صوت يكول عوفيهه عرفت هالصوت للرفيق وعفتهه
وخرت منهه وكمت لميت المصلايات وهي كاعده ولازمه راسهه ومغمضه شويه وجان تكلي
تعبت من هالوجع انطيني هالحبايه خلي اخلص مابيه حيل بعد لشي
كلتلهه .. مو راح تنتهي حياتج هنا بعد ماتريدين تسوين شي بنفسج قبل ماتطلعين من هالدنيا
هي صفنت شويه وكالت .. اريد انام
كلتلهه ..والحبايه ؟
كالت .. بعدين اريد انام هسه
عفتهه وطلعت شويه وجان تصيحني رحتلهه
وجان تكلي انطيني الحبايه .. اني ماحجيت شي كبل انطيتهه ووياهه المي وقبل متشربهن رحت
حضنتهه وبستهه وكلتلهه .. حبيتج كلش وتمنيت لو تبقين ونصير صديقات مثل ابوج وابويه بس انتي اختاريتي الوحده والموت واني اريد من يعيش وياي الحياه بحلوهه ومرهه نتعاون بوكت المر
ونتجاوزه ونفرح بوكت الحلاه ونعيش كل لحظه
.. ضلت ساكته وترددت تشربهه لو لا بعدين شربتهه وتمددت اني سديتلهه الضوا وطلعت
يم اهلهه رادو يروحولهه ماخليتهم كتلهم نامت
راد الشيخ نرجع كتله لا بعد .. ضلينه تعشينه يمهم
وجان مانحس الا البنيه طبت علينه .. كام ابوهه
حضنهه ويبوس بيهه وهي بس تباوعلي اني ضحكتلهه ورحت يمهه وحضنتهه كلتلهه ..
شفتي الحياه شلون غاليه على الانسان عيشيهه
فهي كلتلي شكراً وضلت تضحك وتبجي .. كامت امهه تهلهل وابوهه حار شيسوي يصيح على الولد يرمون طلق ويجهزون لذبايح باجر وانخبص

- يعني كدرتي بالحيله تطلعينهه من وحشتهه ؟
- اي ومن تخلصت من هذاك الجان هي انفتحت روحهه للحياه ازيد .. لان هو جان يريدهه تموت مثل ما مات ابن خالهه لان كتلك هو شغلهم ربط سوه وضل هذا ياثر عليهه
- وشلون خلصتيهه منه
- طيرو الجماعه هههههه
- ههههههه الله حيهم .. والمحبس شني ربطه ؟
- هو وراهه البنيه مقبلت نروح الا ابات يمهه
وضلت حاضنتني الليل كله ونايمه والصبح هم
مجلبه بيه ماتقبل اروح لحد العصر خلصو العزيمه
والبيت بدا يفرغ من الناس فكعدت حجيت وياهه
ووصيتهه تعيش حياتهه وربنه من انطاهه حياه ثانيه فاكيد كاتبلهه شي جديد وقسمه احسن من الراحت .. من ردنا نطلع الرجال راد ينطيني فلوس ماقبلت اخذهن والشيخ هم زعل عليه شلون هيج يسوي .. فراح جاب علبه بيهه خرزتين
وحده جوزيه والثانيه هاي الي بايدك هسه
كالي .. هذني من تاجر من اليمن اثنينهن مختومات  للحظ ومو ياهو الجان يكدر يحصلهن اني ضامهن من سنين لان اجني هديه والتاجر اختفى من يومهه كال ..اني مجربهن كال عندي هاي الي بايدي جابتلي كل هالخير اخذي التعجبج من بينهن .. هاي بيهه اني انطيج كلشي تريدي مثل ما رجعتيلي بنتي وهي كلشي اريده من هالدنيا ...
فاختاريت النيلي عجبتني اكثر .. ووره فتره صغتهه على هالمحبس وضميته كلت هاي نصيب ابو نجمه
- هااااااا يعني بهذاك اليوم انتي جنتي تدرين انه هوه نفسه من لبستيني المحبس !
- اييي جنت اعرفك
- جا عليش ماكلتي ماحجيتي
- هههه شلون شكلك بوكتهه اني جنت بالكوه مقتنعه انك هو من صدك
- وعليش بويه مامقتنعه !!!
- اييي مو جنه بس مشاكل وهواي شغلات يعني مجنت اصدك انته نفسه الي كرهني عيشتي هذيج السنين كلهه
- من ايدج حبيبه شوفي شلون من انعدلتي وياي
شلون تغيرت وصرتلج انعم من الماي بس انتي كبل جنتي تجايدين بيه
- هههههههه اروح فدوا للي يتغير مزاجه بحبي
- اي اي قشمريني اي
- هههههه احبك والله احبببك
- اعشكج يارويحتي .. اي يعني هسه انه بايدي محبس حظ ومادري !! خايبه ماكلتي ماحجيتي جان استفاديت منه بشغيله منا منا
- شنو عبالك ممستفاد منه !!!
- جا شني !
- ههههه روح جرب بأي شي يعجبك وشوفه بعينك يجوز قبل ماحاس عليه بس هسه جرب
- زين باجر اجربه واشوف واذا طلع جذبي اشمره بوجهج
- ههههه راضيه والله

ثاني يوم ضلت بالي سالفته ومحتار شلون اجربه
خابرني بالليل وليد ويكلي يريد يسوي سلفه ومثبتيله اول اسم حته ياخذهه ويصرفهه ع العرس
فكلي تريد تشارك تفيدك تجمعهن وراك عشرين مليون وانته كاعد ومصفط بعدك .. كتله سجل اسمي وياك وشوف شيطلعلي يااسم وكلي . .

ثاني يوم العصر خابرني كالي .. سوينه القرعه مرتين اسمك طلع بالاول واني ماخذ الاول الي فراح اخليك الثاني .. انه ضحكت وكتله هاي الثاني ماشين ...

بساعتهه فهمت شلون شغلته عدله وهيه اصلا كايلتلي انته شني الي تريده سهل يصير ماعرفن شلون بس ادري كلش زين هاي حجايتهه موش حجايه التنكال لا هيه مسويه شي ..

ثاني يوم الصبح من راجعين من العلاج كالتلي
- شهاب حبيبي اريد شي
- شني ياعيوني
- اريد اروح ويه امي للصالون
- شعندج ؟
- شنو شعندي باوع وجهي شلون صاير مادري انته شلون متحملني بهالشوارب
- هههخخخخخخخ وينهن هنه بويه بس انتي تشوفيهن
- ياااا هاي كلهه وتكلي وينهن !!
- شواربج بيض مدري شكر مايبين الا بالشمس ماعليهن شي بقيهن
- عزااا صدك تحجي !!! شبقي منهن اني بالكوه متحمله شكلي هيج عفيه خلي اروح
- روحي بويه روحي
- زين اريد بعد شغله
- شني بعد
- يعني اريد فلوس اسوي كم شغله
- ايي سولفيلي شني هالجم شغله بله
- هو شغلات للوجه مال بنات معليك بيهن
- هههههههه والله ياسوالفج .. عايني سوي كلشي بنفسج بس الممتلكات ماتطخيهن ..نمش  ،شعرج
ولاتكلبين لون حواجبج اسكطج اذا تسويهه
- ماسوووي والله ماسووي مدري شعاجبك بيهن هنه شعرايتين وبين كل وحده ووحده شبر
- ااااانه عاجباتني تحجيييين !!
- لااا شحجي واني اكدر بعد
- اي عفيه .. يله شوفي امج  يمتى تروح حته اوصلجن

صاحت امهه وحجت وياهه وكالت نتغده ونطلع
عاد تغدينه وانتظرتهن بالساعه عله ما بدلن واخذتهن للصالون ورجعت لبسام طلعنه افترينه منا لحد ماخابرت عمتي رحت جبتهم ..

جان وجهه يلمع والخدود حمممر غاديات ما صدكت اصل البيت واكضنهه ...
غالفت امهه ورحت ليهه .. جريتهه لصدري ورفعت وجهه كلتلهه ...
- هالشمس ردت تنور علينه
- امممم
- شو خلي اشوف وين راحت الشوارب
- ماكو بعد اختفن ههه
- والحواجب الجانن يم عينج نص ومنا نص شو صايرات خير من الله شسويتيلهن ولج شوصيتج
- ماسويت تاتو ولا شي هاي هيج بالقلم
- هاااا زين زين .. حليانه ولج هاي الشوارب هيج تاثر
- لعد شعبالك تكلب الخلقه كلهه
- اكووول هاي جن شفايفج مورده لو انه هيج صرت اتخيلهه من شوكي
- هههههه لا هي هيج
- هااا شو خلي نجرب طيبات بعدهن لو تغيرن
- عفيه لا
- لج هيه حلات هالبوسه بالعفيه لا ..ماهدج بعد

ضحكت وانه خذيتهه ببوسه طويله ارتويت بيهه من صدك ارتووويت جنت محروم منهه شهور
من هديتهه عاد صاحني بسام .. عفتهه ورحت ليه
كعدنه نتفرج ع الطوبه .. بالي كله بعده عله هذيج الشفايف شعلت اهل اهلي ضليت مسطور كل اليوم لحد ماصارت ساعه ١٢ جنت انتظرهه تجي وتاخرت شويه عاد كمت جاي اروحن ليهه وعاينتهه طلعت من الحجره عاد ضليت واكف باب الهول انتظرهه تتمشى براحتهه لحد مااجتني ..

خذيتهه وسديت الباب .. كعدتهه وضليت اتلمس بشعرهه وابوس وجهه وركبتهه جنت كلش اريدنهه هالليله .. مشكلتي وياهه من كبل انهه يوم
التثيرني تثيرني من صدك ويم التطيرن هالسالفه من بالي مايجيبهه شي بعد ... وبهاليوم ببوسه وحده منهه هيجت صبر شهور ..

مثل عادتهه ماترضى اتعدى وياهه بوسه الشفه والركبه حته جسمهه ماترضى اتلمسه .. لجن ماغير من انفعالي بيهه شي .. حجيت وانه حاط راسي يم اذنهه ...
- اريدنج تفهمين هالشي
-شهاب مو حاجين بهالشي عفيه
- موش وكته ربى تره ماضل بيه صبر ارحميني عاد
- عفيه لا عوفهه هسه
- بس سلميني روحج ومعليج لاتخافين
- لاا كتلك لااا عوفني

سحبت نفسهه من حضني ودارت وجهه .. انه صرت اعصاااب وبالكوه ضليت ساكت عليهه
عفتهه وكمت طلعت دخنتلي جكاره وضليت اهدي بروحي ورديت طبيت عاينتهه تريد تطلع جريت ايدهه وخذيتهه كعدتهه ..
- شهاب
- اسف انه مجان لازم اضغط عليج .. هسه بس خليج هنايه هسه اجي

رحت تطمن بسام نايم ورديت طفيت الضوا وسديت الباب ورحت ليهه تمددت وكلتلهه تجي
لحضني .. اجتي امت عله ايدي تلمست شعرهه وكلتلهه ...
- تخافين مني ؟
- لا والله ماخاف منك بس هالشي يعني مو مفهمتك عليه
- زين ليمتى نضل هيج .. شوفي انه مراعيج بكل شي وعاذرج ونطيتج مجال كافي حته تفكرين بالسالفه وتهيأيين نفسج عله راحتج وتجيني موش صح
- اي صح بس مصار مجال بعد
- زين هسه عدنه مجال
- لااا شنو هسه
- اي شبيهه شعدنا .. حبيبتي خلي نتفاهم عله هالسالفه هسه ونخلص لين انتي حتضلين تأجلين بيهه منا للعرس ادري بيج.. فخلي نخصمهه
- اممممم .. شلون يعني
- يعني انه اتذكر جانت مشكلتج المستحى ومالج عرفه بيهه وبشني انه اريد وارغب
- اي هو هذني
- زين المستحى شلناه بينه يعني انه موش كشفت جسمج جم مره وشفتج فهاذ عبرناه
- بس مو كله تره يعني شويه احسن من قبل بس بعد اكد مستحى
- عمي ميخالف ينشال مااخلي يضل بس اصبريلي
- هههههه
- هسه نجي ع السالفه الثانيه
- شهاب استحي عفيه لاتحجي بهيج شغلات
- هو شني لاتحجي تره رجلج انه وهاذ شي عادي بينه هسه عاد انه مامسويلج شي كلهن حجايتين
- ماشي يلا احجي اني هم اريد اخلص من هالسالفه مسببتلي قلق ودتخرب النظام الي ماشيه بي
- اي جا خلي نخلص منهه حته يضل نظامج ماشي
- اي
.
.
.
يتبع

قفله مال نذاله 😌😌
طبعا تاخرت بالتنزيل بسبب الكتاب هذا جنت ادوره حتى اجيب الاسئله ..

💓💓💓