رواية من فجر ديسمبر الفصل السابع والثلاثون 37 - بقلم Zoka 🌷

من فجر ديـسمبـر
🍁
🍁
اخذت الكلاص من زهره وشربته جره وحده ورحت اخذت هدومي وطبيت سبحت وطلعت
مالكيتهه بالحجره كبل اجيت تمددت عله الجربايه
جنت تعبان وماريدن النومه بالكاع تكسر الظهر
فعاد نمت هنايه ...
لشويه وحسيت بصوت يمي رفعت راسي شفتهه
جاي تبدل هدومهه ومنطيتني ظهرهه بس اشو انه عيني ضلت مركزه بجسمهه وجنهه حست بهالشي
واجتني عريانه انه كضيت ايدهه لويتهه وهيه تتموع جدامي وتتلمس بركبتي مادري شجاني هالشكل بس حيل جانت رغبتي عاليه بهالساع
تكربت هيه وبوست ركبتي وثارتني ازيد واجتي نامت فوكاي ورادت تتكرب تبوسني انه بلايه وعي دفعتهه ودفعتي جانتي كويه لدرجه انشمرت بالجهه الثانيه من الجربايه هيه ضلت فاجه حلكهه وتعاينلي انه كمت من الفراش وجسمي حاار نار
غادي وعركان كبل اخذت تلفوني وطلعت للحديقه
وراسي يوجعني وبعدهه الحروره بيه كعدت عله الحشيش وخابرت ربى جاوبتني بسرعه ..
- هلا شهاب
- محتاجج
- احجيلي شصار وياك
- راسي حيطك وجسمي حار وايديني ترجف
مادري شجاني هالشكل
- احجيلي اكثر بعد اريد الي قبل هذا
- ماكدر
- هاهيه فهمت .. اخذت شي من ايدهه
- لا
- متاكد ؟
- لا مادري شصار رجعت تعبان شربت ماي سبحت نمت كلشي ماصار غير هذن
- ها يعني من كعدت من النوم هيج حالتك
- لا مو هيج
- اوك لاتكمل فهمتك .. انته وين هسه
- بالحديقه
- كوم اتوضى وارجع خابرني
- ماشي

سديته منهه ورحت للمطبخ توضيت ورديت طلعت خابرتهه ..
- تكدر تطلع شويه بعيد من البيت
- اي
تمشيت ليم بيت الشيخ الثاني وكعدت هناك كريب منه
- فهميني ربى شني الجاي يصيرلي
- المفروض متسأل هيج سؤال بعد
- ها ليش؟
- لانك لازم تعرف ان جيتي عليك مو عبث مااعتقد هالشي هم يحتاجلهه شرح وتفهيم
- هااا يعني كلشي بعد مرتبط بيهه
- اي والي سويته اليوم اذا تريد ماينعاد الي بيك لا تسوي بعد
- وشعرفج انه شسويت
- مبينه مايحتاجلهه فهم
- هالشي شدخله بيج هاي مرتي شني الدخلج بيهه
- لاني اختاريتلك وانته رضيت بي وراح احجيلك فد شغله تخصم بيهه كل هالموضوع
- اي شني
- لو الي صار بينكم هو بوعي ومن دون تدخلات
ثانيه جان ماتخربطت احوالك واحمد ربك لوجع راسك وحرارتك فعسى ان تكرهو شيئاً وهو خير لكم اتمنى تكون فهمتني
- فهمتج فهمتج
- زين هسه سد هالموضوع لان الي ردته عرفته
هسه خليك هادىء شويه ماحب يضل وضعك هيج
- انتي هديني
- غمض واخذ نفس
- غمضت
- اخذت نفس اقوى بعد .. تخيل هالليله انته بوسط شط وماكو شي حواليك غير النجوم والكمر الي ضواه عاكس على كل المي والهوا يجيك ببروده مثل بروده شهر تشرين ناعمه وتتغلغل لوسط صدرك براحه وتعيشك كل الهدوء وكل صوت تسمعه هو بس صوت المي وانفاسك المنتظمه
وبعد ماتملي عينك من هالمنظر وتحفظ كل تفصيل من حولك شلون صاير راح تغمض وتصفي فكرك
كأنك تشيل منه كل شي يثكل عليه وتخلي يمشي ويه هالمي وتبقى تستشعر البروده على جسمك
وخفيه روحك بوسط هالراحه وصدرك المنشرح
بنص هالهدوء

جنت استمعلهه واتخيل كلشي تكوله لحد ماهديت
وارتخت اعصابي وضليت ساكت واسمع نفسهه
وانه لاول مره هيج احسن بفكري فارغ وروحي ماوراهه شي .... وره هدوء طويل مني ومنهه
كلتلهه ...
- بيج انه اهجس ربي يحبني
- شكراً
- شكراً الج لكل شي
- هسه صرت احسن؟
- احسن من كل يوم بحياتي مضى
- تمام لعد ارجع لبيتك ونام
- ماشي ... تصبحين عله خير
- وانته من اهله

سديته وانه اهجس رويحتي خفيفه وبيه ضحكه راحه هنه جم جلمه حجتهن وكلهن خيال بس ماعرفن شلون كدرت بيهن هيج تشيلني من نص النار للجنه شني من بت هاي ماعرفن !!!

رديت للبيت ونمت بالديوانيه وثاني يوم الصبح
رحت للحجره وجانت ناديه تعزل .. جريتهه من
زندهه ودفعتهه عله الكنتور ...
- شمفينه احجيييي
- شبييييك
- انجببببببي واحجججي شمسويه البااااارحه هاااذ الكلاص شني جااان بي تحجيييين لو اسكطج هسسسسه
- مااااسويت شي
- ومصره تجذبييييين

كضيت شعرهه وجريتهه للجربايه شمرتهه واجيت ضغطت عله راسهه حيييل ورديت فريت وجهه وضربتهه جم راشدي ورديت جريتهه ولطختهه بالكنتور ..
- هااااا تضلين تجذبيييين
- لك حرااام عليك لتذلني هيييج كاااافي كااافي
- احججججججججي والعبااااس ماهدج اليوم اكسرج هنايه ومحد يخلصج مننننني احججججي
- بس عوفني احجي بس كااافي هيج كااافي

شمرتهه عله الجربايه ووكفت بعيد واعاينلهه
كعدت هيه وكالت ..
- مرت ابوك جابتلي حبايتين
- ماليش
- حته ارغبك بيه
- والثانيه
- الي حته تساعد ع الحمل
- شنننننننني حممممممل !!! هاااي انتي شمخربطه جدااااامهه انه شموصيييييييييج جم مره كتلج مالج دخل بيهه ولاتحجيلهه شي
- يعني تريدني اضيع حياتي هيج هم رجلي واريدن حياه وياك ويصيرلي جاهل
- لااااااا انتي تريدين تربطيني بيج بهالحمل موش حباً بحياتج هوه انتي لو تردين عايله ورجل جان فكرتي بيهن من زمااااان موش هسه تندرتي بيهن
- شهااب تعبت من عيشتي هيج صارلنه اربع شهور عله مخده وحده منايمين ليمتى تضل هيج وياي
- انتي جااي تصدميني بحجيج ..يعني من كل عكلج تفكرين يجي يوم وتصيرلنه عيشه سويه !
شجاي تخربطين انتي شتمسلتين شمالج ضاربيج براسج انتتتي !!! شني نسيتي حجيي باول ليله وياج موش كتلج جم شهر ونتطلك هاااااا نسيتي
- ماريدن اطلك ماااريد اريدك رجلي وحكي بيك اريدنه
- لو ادميه وعندج اخلاق وعزيزه نفس جان انطيتج حكج وفوكه هم بس انتي زباله ماتسوين
انه ماكلج عله غلطج كلنه بني ادمين ونغلط بس لو شايفج ادميه ومتندمه من صدك وتحجين الحجي الزين وتردين تعدلين حياتج باليرضي ربج جان
وكفت وياج وصرتلج ستر وغطى بس انتي جملتيهه بلسانج الزفر واسلوبج الجايف مشكلتج انتي هاي ذبتج مشيتي بالجذب والدروب الوصخه ماتنعدلين لو يجي الحمزه تضلين بعواجج
وخليج يطبج مرررض ماتهميني لو بكد شعرايه
بس ياناديه لاتلعبين بهالوصخ ويااااي لين تدمرين تفهميييييين شني تدمرررررين اول شي اسوي اسكطج واخليج لا ايد ولا رجل فجفي شرج
عني

عفتهه وطلعت وانه بالي حجايه ربى من جانت متاكده انهه مسويه شي وعفت كلشي وضليت افكر شلون عرفت وتاكدت هيج؟؟؟

وره جم يوم صار لازم نطلع ويه الشيخ للبصره
جان اكو طلابه هناك ويه جماعه من كرابتنه
ورحنه انه ومحمود ابن الشيخ وعمي كاظم
وضلينه هناك ٣ايام وردينه للديره ...

صارت طبتنه وكت الغدا وانه جيت اطب للديوانيه واشوفن الحجيه كاعده وتبجي وتولول وبيدهه بقجتهه ويمهه جدتي رحت كبل ليمهم ..
- كواجن الله
- هلا جده هلاا يمتى رديتم
— هستونه .... خيرج يمه شمالج تولولين وتنعين
شني الصاير
- يمه ومرت ابننني يالحنينه يمه ولفت غداي بالحضيييينه وترد وتكِلي لا تاكلييييننننننه
- خاااب فهمني شمالجن
- يمه مرتك شتمتني وطكتني ولعبت بيه فلك
- ااااااه طكتج!!!!!
- جا هاي الغاكه شيترجى منهه ااانه العزيزه لا دهر لمني ولا ابيت اتشتم من المفاعييييص ااااخ
يويلج وحسرتج يارازقيه ياوووويلج وحسرررتج
- بسج يمه لا تبجين وتحركين افادي عليج انه اعلمنهه اليوم ..

طبيت ركض للبيت وصحت عليهه اجتي وكبل جريتهه من حجابهه وهيه تعيط وتطوطح منا ومنا
- شنننننني المفينته النووووب ويه امي
- ماسويتلهه شي
- احجججججججججي لاااتهددددين اعصااااابي عللييييييج احجججي بالعباس هسه اشلعن شعر راسج
- هيه ماتنحمل انه ماعليه
- شننننننني ماتنحمل شننننني انتتتي ياهي وتجين تشتميههه شلوووووووون تسمعيهه جلمممممه التغثهه يااااهي انتي وتنزلين دمع عينننننهه هاااا قندرتيييييش انتي وجااايه تحاجينههههههه
هااااي انه اطلعلي جم يوم ارد الكاج تبجينهه !!!!
- جذاااابه ماشتمتهه والله
- لتكلييييييين عله امي جذااااااابه انتتتي الجذابه مامش غيرررررج
- ماشتمتهه
- جااااا شكلتتتتتتي هاااااااا احجججججي
- جنت اسوي الغدا وهيه تنك فوك راسي عاد كلتلهه روحي من وجهي مو شغلج وهيه من شافتك كامت تتمسكن
- يممممممممه يممممممممه ويننننج تعاااااي
- ها يايمه
- شني الصار احجيلي بالتفصيل
- واجفين بالمطبخ نسوي الغدا وهيه تشمر بالمواعين وتشتغل من وره خشمهه عاد انه رزلتهه
وهيه جضت بيه تكِلي امشي منا شلج دخل بيتنه
موشفتي شفقنه عليج جم يوم وتشيخين براسنه
رديت انه ضربتهه بالعصا وهيه كامت تصيح
وتكولن امشي مناا هو انتي ياهو اليحملج اذا ابنج ماحملج تردينه احنه نتحملج امشي عاااد زهكتينه
واجتي تدفع بيه عاد انه يايمه كليبي ورث منهه ورحت خذيت هديماتي واجيت امشي وجدتك جلبت بيه وهالجيت وشفت
- اييي جده واااانه اشهد عله هالحجي كِله وجنت اسكتنهه واصيحن بيهه بس لسان السم لسانهه لاتحشم ولا تهااااب صارلهه يومين تفرعنت علينه
وهذيج الحيه هذيييج اااخ كِله منهه تلدغ وتضم هالرااااس الاسوووود هيه تعلمهه وتحش بهالراس
- هاااااااا يامصخمممممممه هاااااا شفتي درب الجذذذب شلووووونه جم نووووبه كايلج لااتجذبيييين من اسألج وماتجوزززززين
انتي بطيتي روووووحي امشششششي جدااامي امششششي

اخذتهه ادفع للحجره وخليتهه تلبس عباتهه وطلعت
وانه اجرهه وياي للسياره وكبل حركت ومشيت
لبيت خالي والدرب كِله كضيته اصيح عليهه وهيه ماتسكت عاد اول ماوصلنه طبيت كبل وخالي طلعلي مخروع .. خذيت نفس وكضيت جتفه وكتله

- خااااالي نطيتوني بتكم امانه وحفظتها هالشهور كِلها وماشكيتلكم بيوم منهه وحفظت عشرتكم بيهه
بس لهنااا وكاااااااافي عاااااد بتكم ترجعلكم
- شننننننني الصااار فهموني
- خالي ترضاهه وحده من جناينك تهين امك !
وتعيرهه وتطيحن دمعتهه بنص هالظهاري!
- اكصن راااااسهه
- جااا هاي بتكم وهاي عملتهه شتريدني اصيرن مكرن واسكت ليهه واهينن امي!!! ياخالي هالسالفه ماينسكت عليهه ولاابلعنهه وهالمره ليوم الدين بعد تحرم علي
- تهدااا ياابويه كول يالله
- خااالي انه متهدي وماعندي شي ... جاا ترضاهه انه صارلي ثلاث ايام ببالبصره وراسي مسطور وارد تعبان الكه امي وجدتي كاعدات وينوحن من عملتهه وحجيهه السم وياهن !! هيه هاي ام البيت هيج تحشم اهل بيتهه ؟؟؟
- اذاا هيج الحجي بويه حكك بكلشي
- رحم الله والديك ... امانتكم وصلت وطلعت من خطيتي بعد
- شهاب
- انتي تسكتين ماسمعن منج حرررف
- جدي احجيلك شي
- من فواينج انه شحجججججججي
- ناااديه انتي طالك ... اودعناك خالي

عفتهم وكبل مشيت للسياره وعفت صايحهم وعايطهم وراي .... وطلعت صح مغثوث بس هم وانزاح من جتفي ..

رديت للبيت وكعدت بالديوانيه وصحت عله زهره جابتلي ماي واجني الحجيه وجدتي يمي كعدن
وحده تفرج بجتفي والثانيه برجلي ..

- هااا يمه شصار يبعد بيتي
- اي ياجده كووول خالك شحجه شعمل
- سكت وكالي الحك وياك وانه طلكته ومشيت
- هييييي يايمه طلكتهه!!!
- اي جده ولا تعرضين وتحجيلي شي تره واصلهه حدهه عندي
- لاا يمه هاي سكتت
- هيج احسن ليك يايمه
- ماريدن يضل شي بالج يمه ماعليج بحجيهه
انتي عزيزه هالبيت وعله روسنه تضلين
- لااا يالحبيب كفيت ووفيت وماكصرتم وياي بشي يشهدن الله علي احسنن من ولدي واحن منهم علي
- رضاج مانريدن غيره
- راضيه عليك يايمه دنيه واخره

فرحت بجلمتهه هاي هجست بيهه ربي عوضني عن باب من الجنه انسد بوجهي من زمان وهساع رد انفتحلي حيل فرح گلبي وشرح صدري ..

كمت لحجرتي وهستوني اجيت اتمدد وطب علي ابوي يصيح ويعيط ..
- هااا بويه شني مانرتاح اليوم
- شلووووون تروحن وتطلك واااااانه ماعرفن
- بويه شني السالفه مايحتاجلهه شوره
- لاااااا يحتااااج ونص موش جبير هالبيت انه شلون تمشي وتزفهه يم خالك وتخلي يخابر وحاير بهجمان بيته هالشكل
- يطببببهم مررررض بوووويه ماريدن اطلع الموزين هسه خلني ساااااكت واليرحم اهلك
وهالبت تطلكت وخلصت السالفه عاااااد خلني ارتاح راد من درب بعييييد وراسي مسطور

دفر الباب وطلع وهوه يهوس رديت انه طبكت هالباب حيل واستغفرت ربي ورحت تمددت
واخذتلي غفوه شويه وكعدوني عله الغدا كمت اكلت ورديت نمت وماكعدت للغروب ...

مشيت وصيت خواتي يلمن شكو شي لناديه ووصيت محمد ياخذهن لبيتهم ...

وره يومين رحت عله محامي وبلشت باجراءات الطلاك وبنهايه الشهر صارت جلسه المحكمه
وكبل مانفوت رحت حاجيتهه ..
- شوفي يبت الناس انه من يوم جبتج لبيتي وكتلج دربنه هالشكل يصيرن ماعلت وياج الا من تدوسين بطني موش صح
- اي صح
- اي فانه اليوم اكِلج انه مسامحج بكل شي صار بينه بكل مشكِله وكل حجايه وهالزواجه انه بالاول ردت بيهه انسى وابدي بصفحه جديده بس الله كاتبلي اضل عاشك .. وتالي ردتهه ستر لج وماعلينه كدرتي هالشي وله لا المهم انه حفظت
ماي وجه اهلج وصنتلج الماكدرتي عليه .. واليوم
انه جاي اردج لحياتج معززه مكرمه حكوكج كلهه تاخذينهه ومودعه بالله
- الله يسعدك
- وحطي عينج عله سمعه اهلج ابدي حياه جديده
وداري خوالي زين واحفظي شيبتهم وخلي الله بين عيونج بكل خطوه تمشيهه
- ان شاء الله

مشينه للقاضي وتطلكنه وانه انطيتهه كل حكوكهه
وبعدين سلمت عله خالي وابوهه ومشيت ويه ابوي للبيت ... جنت محتاج ابتعد عن الكِل واعيدن حياتي الكديمه .. وره يومين خابرت وليد واتفكت
وياه نروحن اسبوع للشمال ...

ورحنه صيفنه هناك وتونسنه وانه ذبيت كلشي ورا ظهري وناطر الجايني بعشك هالشمسه واشوفن دربي وين يصل وياهه ...

وره شهر اجه عمي حاتم للشيخ ودز عله ابوي
وكعدو بوحدهم يحجون وتالي دزو علي وطلع
عمي يريدن افج النهوه من ربى جايينهه خطابه
ويريد ينطي ...

انه سمعت هالشكل لو تسودنت كمت ماخليت شي ماحجيته وطلعني صياد من الديوان بالكوه
عاد هديتهم ومشيت لكاع ربى واخذت مهرتها
ودكيت عليهه ...
- الو هلا شهاب
- اريدن مهرتج محتاجهه وجيت استاذنج
- اخذهه براحتك
- اخافن مامتعوده عله غيرج؟
-لا راح تتقبلك لا تخاف
- شلون
- اركبهه وشوف
- زين

سديت الخط وصعدت عليهه وجريت لجامهه وهيه صهلت واستعدت وطاوعتني باريحيه وطاردت الريح بيهه ... جنت محتاج اذب هالاعصاب بشي
يتعبني وضليت اطارد بيهه لحد مابزعت وريكي يبس واختنكت من التراب الصار عجاجه هنايه

عاد تمشيت بيهه بهداوه ورديتهه لمجانهه وكعدت
واصفنت عله هالسالفه يمتى تفض .. جا انه اكومن من وحده اطيحن بالثانيه هاذ عمي مايجوزن مني

حاجاني الشيخ باليل ..
- شهاب بعدك تريدنهه؟
- مااملن منهه شيخنه
- ابوهه مايرضى وانه بعد ماارضى
-هاا عليش شيخ شني تغيرت وياي
- انه نطيتك فرصتك بالاول وماكدرتهه ماتلكاهه نوبه الثانيه
- شيخنه دخيلك لا تطعنن بيه هالشكل وحك علي تعبت
- الله كريم .. هسه انته شوفن عمك حاد سنونه عليك بنته راح اتخرج ان سكته هالسنه سنه الجايه ماتكدرن علي
- والحل شيخنه شلون بيه انه ويه ربى لو كاتل لو مكتول
- حلك وياهه وبايدهه وخلهه بالك اذا هيه كالت هالنهوه ماريدنهه بعد بنفس الساع تفجهه ولاا تحجي حررررف الواااااحد لين انه موش حاتم واسكتن انه كايلك من كبل شنهي شرطي السكتتلك بي
- يعني هسه الحل والربط كِله بايدهه
- من زماااان هوه بيدهه ويضلن بايدهه يا تكنع بيك وتحصلنهه يا تخسرنهه بجلمه منهه

سكتت بعد انه شحجي جدام هاذ الحجي وهوه صحيح كلشي بايدهه ابوهه والشيخ وعيشتي
وراحتي وضيمي كله يمهه وهيه ماعرفن وصالهه شلون يصيرن ....

وحيرني زماني بيهه ..
.
.
يتبع
بارت تصبيره وحتى تحضرون نفسكم وتصفون بالكم للجاي هنه بارتين راح يشيلن هالقصه كلهه
من مكان لمكان ...
استمتعو ❤️🌸