رواية من فجر ديسمبر الفصل الثامن والثلاثون 38 - بقلم Zoka 🌷

من فجر ديسمبر
🍁
🍁
كاعد اتغده ودك عليه وليد ..
- هااا يالعضيد شلونك
- شهاب بزعانه روحي وكولش مختنك
- ها سلامات عليش
- تعاركت ويه ابويه علمود الشغل وكاعد بس يحجي عليه كرهني عيشتي
- اكِلك انته وين هسه
- كاعد بكهوه هجيت من البيت من الصبح
- زين عليش ماتجي علي تسير جم يوم موش احسن ليك من الكهاوي
- اي والله جبتهه بس خاف عيب من اهلك
- خااب انجب امشي رد لبيتكم حضر جنطتك
وانه حاخذ السياره واجيك
- لك هلااا يلا انتظرك
- هههه يلا روح

سديته وكلت لجدتي ..
- جده انه حطلع لبغداد اجيبن صاحبي حضرولنه عشه زين وحطو فراشه بحجرتي
- هلا ورحب بيه روح يمه انه ادبرن كلشي
- ماتكصرين ..يلا انه حمشي
- دربك سالم يايمه

مشيت اخذت السويج وطلعت كبل لبغداد وهناك
هو جان واكفلي براس شارعهم واجه صعد وياي
وشفته متغير صاير كِله سبايكي وكلايد فضه وبناطير مدري شني لونهه .. بس جان ضايج خلكه ويضرب صفنات كلساع ..
- شمالك يامصكوع شجاك
- لك هذا ابويه خبلني كل يوميه طالعلي بشغله صفح لو امشي اشتغل هسه غير اني داكون نفسي وافتحلي مختبر براسه خير رادله كومه فلوس اكله دايني هو عنده خير من الله اكله ساعدني بيهن بس افتح المختبر اوكف على حيلي وارجعهن الك مايقبل يكلي بايدك طلعهن ماانطيك اني .. زين يابه فهمناهه هاي اروح اشتغل بمحل ملابس باسواق يجي يصيح ويعيرني اني المحامي الي اسمي يرن بالمنطقه ابني كاعد يبيع جباسه !! يابه شسوي يعني غير شغل مو تريدني اجمع منين يعني ابوك خما ابوك شغل حالي حال هالعالم
يكِلي هذا ميصرفلي هيج شغل امشي دورلك غيره
- جا لا يرحم ولا يخلي رحمه الله تنزل
- خبلني والله شوكت مايشوفني كاعدلي بمحل لو يسمع بيه طالع ويه جماعتي يجي يهوس يريدني هيج كبل حبهه ولبط
- ههههههههههههه هم صاير ادور امثال
- يمعود دعوفني رحمه لاهلك
- مااااعليك منه هسه انه اخذك للسلف واطيرن عكلك هناك وانسيك ابو الشغل وابو ابوك هم
- ايييي يرحم والديك كون هيج اريد ارجع شباب
- ههههه جا هسه انته شني
- احس نفسي شيبت وحيل مابيه
- هسه نردك جويهل تلعب بالطياني وتركب عله المطيه
- هههههههههههه اسويهه اني لا عبالك تره كلشي يخطر ابالي اروح اسوي مو تكلي عيب ومدري شنو
- لاااا بويه ماكلك شي انته شتريد سوي الديره ديرتك
- اي خوووووش لعد اذا هيج استعدووو نييااااههههااا
- يمتى تبطل هالضحكه
- من اتلفن
- هااااا لساعك مامليت
- من الكه بت الحلال ابطل
- جا هذن بنات حرام
- اي كلهن ساقطات يدورن سوالف مكسره واني شعندي اكضي وكت وياهن
- انه خايف من تاليتك
- ادري بيهه سوده مصخمه
- ههههههههههه جا ما تهدا شوي وتركد
- كلبي رجيج
- ههخخخخخخخخ انزول عله كلبك
- ههههه لتعيب لك

ضلينه نتشاقه طول الدرب وهوه سوالفه حلوه
وتونس .. ولحد ما وصلنه نزلنا وهوه يعاين داير مدايره وكال ..
- هاي ريحتيش
- مال الكصب والتراب من يتبللن هيج تصير ريحتهن طيبه
- اااااخ يايابه تنعش
- بعدك مانعشت من صدِك امش جدامي

طبينه للديوانيه وجان ابوي ومحمد كاعدين سلمو عليه واكلوه اكل بالسلام وهوه يستحي صار طماطه ومايكول غير الله يسلمك ومدنج ..
انه عفتهم ورحت للمطبخ صحت عله امي ..
- ها يمه كواج الله
- هلاا يبعد بيتي هلاا
- عشاج يمه الولد بالمضيف
- اي يايمه هاي البنيات يصبن دكيكتين واندهلكم
- جا انه اروحن بحجرتي ابدل هدومي
- اي يايمه اندهلك من يكملن
- زين زين

مشيت لحجرتي شفتهم حاطين بطانيه ثانيه عله جربايتي ومرتبينهه .. رحت بدلت هدومي وطلعت
اخذت السفره مديتهه وكام وياي محمد ونكلنه الاكل وكعدنا ناكل وانه كلساع ادغه واكله اكل لاتستحي طلعلي مفجوعيتك هذيج وهوه يضحك من جوه لجوه يستحي من ابوي ...

عاد شربنه الجاي وانه ترخصت من ابوي واخذته ومشينه لديوان الشيخ عرفته عله عمامي وولدهم
وسلم عله الشيخ وكعدنا شويه شربنه الكهوه ومشينه ...
- شوف وليد هااذ بيت الشيخ الاولي وهذاك الثاني
هالثاني كاعده بي محبوبته وامها وابنهه وهاذ بي ولده ومرته الاوليه
- هاااا هم عنده محبوبه هالشيخ
- جااا غير سالفته تشيب الراس عله ايدي انه زوجته
- هههههخ عليك الله صدك ! يعني بهالعمر تزوج
- اي والعباس كبل سنتين تزوج مرته من الموصل
مسيحيه وعدهه ولد هو جان كبل اكثر من عشرين سنه يريدهه وابوهه مانطاهه وتزوجت وعاد ليش مايموتن رجلهه وابوهه هم وضلت وحيدهه ويه امهه وبعد ماجيب ودي وعمك وخالك يلا دبرت زواجتهم
- خطيه هلكد صبرلهه
- جا شعبالك الحب لعبه
- والله اني اذا خابرتهه وضوجتني اسد الخط بوجهه وامشي مو عاد تزوج وانتظرهه اذا لحت عليه بسالفه اضربهه بحظر
- انته ياهو مثلك بويه معدل انته
- ههخخخخخ تستهزء ولك
- جااا انته وينك وين الحب
- اي عيني خلينه الحب الك شمستفاد منه هاي صارلك خمس مدري ست سنين تهورف وراه وكلشي ممحصل
- كلشي بالنصيب
- مادري سالفتك طويله .. اكلك اني نعسان ماتروح نام شويه
- يلا امشينه

اخذته ورحنه للبيت انه هم جنت تعبان كبل لفينه راسنه ونمنه ....
وثاني يوم كعدته من الصبح وبلدفرات شلته من الفراش .. طلعنه تريكنه ويه جدتي وامي جانن حاطات السياح ومخدرات الجاي والبيض عين
وكعدنه نسفناهن وكمنه مشينه للزرع ..

وانه احجيله عله كلشي بدربنا نشوفه وهوه كلساع يوكفله بمجان وتعال اخذلي صوره ...
عاد اخذته للنبكه وجنت احجيله هاذ المكان جنه نكعد بي انه وصاحبي نعيم وهوه كلش عجبه المجان وضل يصور بي من زاويه ...
تالي كتله امشينه ناخذ فره بالمشحوف ...

ورحت ويه ولد عمي كل اثنين ركبنه سويه
ورحنه صيدنه السمج وهوه كلساع ويصيح
راح اوكع ولك هاذ شلون متوازن ..
خربت ضحك عليه ...
تالي نزلنه وهوه كعد عله الجرف ونزع شبقته
وغسل وجهه ويون عاد ذب روحه وتمدد
- خااايب شبيك تطوطحت هنايه كوووم منا الوادم شتكول عليك
- لك عوووفننننني قاربيش هذا بكد الماصوله
يمممه كلبي احسه يدك براسي
- ابو يدوووك كوم لاا دفرك يلااا ولك الشمس تصكع بروسنه امشي
- ايي هم صدك خاف يصيرلي تيفو
-لك انته شمالك شو غادي رخي فرد نوب
- شنو رخي يعني هسه لويصيرلي شي شيفيدني
- نيااال امك اي والله

كفخته عله راسه وجريته ومشينه للبيت .. جنت كِلش اتونس عله ثوله ومياعته يمكن هوه بين اهل بغداد تلكاه النجر مالهم بس يمنه ياكلونه بكشره
هنايه زلامنه لاتكدرن عليهم لا بلسان ولا بمعارك

وره الغدا اخذنالنه غفوه شويه والعصر مشينه
لبيت نعيم كاسر خاطري حاله مابيه يتحرك
منا لباب الحجره .. ضال جلد وعظم وعيونه
جواهن سواد واصل لنص وجه وشعره كِله وكع
بس انه روحتي يمه ماحسسه بشي واضلن الاشي
وهالنوب وياي وليد وهوه شقايجي وماسكت ولا دكيكه يجرش بهالحجي وياه ويرد ليوره .. سندناه اثنينه ومشيناه بره كعدنا بالحديقه وجبنه الطاولي
وكعدنا نلعب وانه كلبي يعصرني من الكهر عليه
بس من اشوفن شلون وجه يتبسم اهود شوي

لليل رجعناه لجربايته وسلمنه عليه ومشينه لبيتنه
وكبل رحنه نمنه وانتبهت وليد مايخابر وتلفون من يدك يسوي صامت ويعوفه ماحبيت الحن وياه بهالسالفه كلت هوه لو راد يحجي مايستحي يكول شعنده ومن ماحجى معناهه مايريدني اتدخل بشي

ثاني يوم بالعشره الصبح جنه رادين من الزرع
وشايلين مخضرات للبيت بسلال طبيت انه احطهن بالمطبخ وضل وليد بره .. ذبيتهن وغسلت وطلعتله من الباب الوراني وشفته صافن احاجيه بس يضرب صفنات ..
- خايب شمالك طاح عله راسك شي
- لاا مابيه شي
- جا ماتمشينه عليش تصفن
- يلا ماعندي شي

مشينه لديوان الشيخ وشفت اكو وادم غرب هنايه
وهاذ موش مثل زلامنه يتفرفر بكلايده وشعره الواكف واليلمع بالجل وهذول مشايخ حته يسونه بزخ درت وجهي ومشيت وهوه لحكني وبعده متدوهن مدري شصابه ..

اخذته ومشينه لكاع ربى شوفته المهره وجان سلام
مطلعهه ويغسللهه وهوه تعجب بيهه وراد يصورهه انه مارضيت عبن هاي خاصه للربى
موش لاحد يتفيك بيهه ...

ضلينه نفرفر وناكل بهالعرموط والتفاح الاخضر الصغار جان وكتهن وهوه كِلش حبهن يمشي وتارس جيوبه منهن ..

بالليل نايمين وهوه يتكلب منا ومنا شلشني ..
- خايب ماتفهمني شمالك ماتركد
- ماداكدر انام
- عليش اشو كل يوم لو ادكن طبول يم راسك ماتكعد شجاك اليوم
- عوفني عوفني راح انام كافي اسكت اجتني النعسه
- ههههه بعلي موش صاحي

لشويه ونام وثاني يوم عفته ويه محمد ورحت اجيب علاج لنعيم من الولايه ورديت ليه العصريه
واشوفنه متدوهن مادري شماله هاليومين عاد للثاني يوم الصبحيه طلعنه عود نريد نصيد السمج
جان هوه جرني واخذني غاد عن ولد عمي وكالي

- شهاب اني راح انفجر بعد ماكدر اسكت اكثر من هيج
- اي وانه اريدنك تحجي لين من يمي بزعت من حالتك هاي احجي شمالك
- اريد اختك
- شننننننننييييي!!!!!!!!!
- اقصد اتزوجهه يعني اريد اخطب اختك زهره
- لااااا اكسرررنه لفجك لا تجييييييب طاااريههه
شنننني حاااط عينك عله اختتتتي يامصخممممم
- مادري بيهه اختك اليوم عرفت
- استغفر اللله احجيلي من اول شصار
- هذاك اليوم من جبنه سلات المخضر ورحت توديهن
- اي
- اي اني مو جنت واكف وره البيت انتظرك
فسمعت صوت قريب مشيت شويه ع اليمنه وشفت بنات واكفات يم تنور الطين جانن ٣ وهي جانت
ترزل وحده منهن بس خويه حجيهه ماسامع مثله
رشاشه مو لسان خلتهه مدنكه وماتعرف شتحجي
اني الصراحه من ساعتها جني انضربت على راسي
- شوف وليد انته ماتعرفن شني الاصول بهالسوالف فانه اعذرنك عله حجايتك مال اريد اختك عبن اعرفنك تجفص وماتعرفن شتحجي
بس هالجلمه نوبه الثانيه لو انحجت اجفص بنص مصارينك فهمممت
- يابه اعتذر والله بس اني شمدريني شلون احجيلك السالفه كلتك الزبده كبل مو صاحبي انته ماعرف اضم عليك
- يامعزا هسه انته شجابك عليهه هاي خلك الله كلهه جاي عله اختي بويه هاي لو تزل وياهه بجلمه تسويك ثريد وتتغده بيك
- اي هو اني هيج اريد .. شهاب اني اريدهه هيج سبعه ماتنغلب مره تكدر تغيرني اني احب المره القويه ومن شفتهه كلبي كالي هااااااي بس هاااي
ماريدن غيرهه والنبي بس هالمره شفتهه وحرف واحد ماحاجي وياهه والله شهاب ماسويت شي يضوجك عليك الله حاجيهه بداعت خوتنه
- بوووويه حط عكلك براسك ماتوالمكم وعلي تمشيكم عسكر انته واهلك
- لك هلاا عليك الله هيج تسوي
- اي وعلي تراهه نجره وتجيبن حكهه من حلك السبع والجلمه تردهه بميه وماتهابن احد
- ياللله لك هاي امي غير تخرب عليهه والله العظيم يمكن تذبحلي طلي لو جبتلهه هيج جنه
- شوووف هاذ البطران اكله شيش يكلي بيش
- والله ياخويي ماعوفك من هااسالفه ومااطلع من منطقتكم الا اخذ الاوكي
- ابو الاوكي انه انطيك اختي وانته مكلب شكو بنيه نخلكت
- يااابه والحسين عايفهن كلهن وهذا تلفوني هاا اهاا
شال تلفونه وانطانياه وطلع من محفظته سيمكارتات اثنين هم حطهن بايدي

- هسه هاي كلهن عندك احركهن كسرهن شمرهن شتريد تسوي سوي بس لا تحرمني من طلبي
- والله صدمتني مادري انته وشوشت هالساع
- لااا والله احجي صدك هاي اكثر مره اني جدي بيهه بحياتي ،،، شهاب حبيبي صاحبي ياروحي
جاي على الله وعليك خو انته شفتني شصار بيه
ماجذب عليك حتى نوم بالكوه انام .. الله يخليك شهاب صاحبك اني شنو متامن بيه ماتعرفني اني شنو .. والله اني بزعانه روحي من كل حياتي واريد ابديهه بالزين ماتريد صلاحي انته

صفنت عليه شويه وكتله ...
- احاجيهه واشوفن ردهه يلا
- الضللللع الشههههب حبيبييي استعجل الله عليك
- بس عينك
- والنبي مارفع عيني عليهه والنببببي لاتوصيني
- بعد انته حلفت وتره بالعرض تعذرني تشوف غير شهاب تره
- اعرف بيك اعرف متشوفني ماكدرت اضم عليك
لك اليصيبك يصيبني لتصير مطي
- انته صحصحلي شويه وماتحط شي بالك ركز بهالسمج هسه زييين
- ايي بالسمج عقلي ويه السمج ادلل

ضحكت عليه ومشينه انصيد وهوه مايرضى يصعد المشحوف يخاف فعاد ذبينه الشبج وننتظر
السمجات ...

خذينا الصيد وردينه للبيت وهوه كبل مشه طب للحجره وسد الباب انه ضليت افكر بسالفته وبعده تلفونه والخطين بعدهم يمي صاحبي واعرفنه مايسوي هالسوايه لبت لو تصيرن بت نبي شمعنى
هالنوبه لا ؟
ضليت افكر بيهه بعدين كلت احاجي زهره واشوفن شتكول ... تغدينه وهوه راح نام وانه
صعدت لحجره زهره احاجيهه ..
كعدت يمهه وجنت متردد ماحاجي كبل ويه اختي بهيج موضوع ...
- اكولن خيه عندي فرد سويلفه هيج اشوفن رايج بيهه
- اي خويه شنهي كولن
- صاحبي وليد
-شماله
- طلبج مني

- شنننني !! اشو هاذ مايستحي ومايحشم حاط عينه عليييي؟؟؟؟

- اهددددي واستجلي شويه خلي افهمج
الولد ماعاب بشي وانه اشهد عليه لجن هو سمعج ترزلين بوحده من البنيات وعاجبته شجاعتك وكوتج وهو فطير وعله نياته وانه لو اعرفن بي معاينلج بشي مو زين افكسهن لعيونه بس هو اجه وطلبج مني بكل زين وانه اجيت اشوفن ردج يلا اخصم السالفه

- اااانه اخذلي هيج واحد مهتلف !! لك خويه صوتي انه اخشن من صوته .. شاربي لو اربي يطلع اثخن من شاربه شجااااي تحجي انته !!!!
انه اصلا متعجبه عليك شلون تصاحب هيج خفيفي

- هههخخخخخخخخخااااي وعلي انتي كارثه

- شوف خويه انه اريدنلي زلمه حوك هَيج كون يهابه جبير وصغير ويكدرن علي ماريدن واحد انه
اصرخ بي يخنس ويصيرن هلكداته ... وكون الكاه معدل زلمه والنعم من كال زلمه بيده تفك موش سوارات وبناطيره يردن يكعن من عليه ..
ابو شعر المنتول يجي يردني اااانه بنت الشوخ والاجاويد اخذلي هالجنه مطيرجي شبيه تسودنت

- هو صحيح شكله مدري شلون لجن الي يعاشره ماوده يعوفه .. وعكله جبير بس هو هيتي شويه
هسه انه اردله جواب ما موافكه واسدن السالفه
لا تغثين روحج

- اي خويه رحمه لاهلك خله يصد عني عابت وبلت عله هيج شكول غدددي يمه من اشوفن شعره المدهن ييييييع اريدن اطشن عليه طشت ماااي واجلفه

مشيت وانه اضحك عليهه هاذ وين وده روحه
الاغم مايدري اختي هسه بودهه تحطه وتطبخه مثل كرعان الباجه ...

رحت للحجره اجيت تمددت وانه اضحك وهوه كبل كعد عله حيله وجلب بايدي ..
- هاا شصار قبلت ؟
- ههههههاااي يكلي قبلت خويه استر عله رويحتك وصد عنها وعلي هاي بس تريدلهه فرصه وتشغل عليك الرشاش مال لسانهه وجيب اليخلصك بعد
- لا عليك الله ليش شمسويلهه والله مامسويلهه شي
حتى ممباوعلها وداعت خوتنه
- بويه ادري بيك لجن هيه مايعجبهه لبسك هاذ عيني
- شبي ستايلي تره ع الموديل كله وماركات هم
- هههههه عوف الماركات ياخوي
- شهاب احجيلي طك بطك لا تحرك باعصابي
- اسمع .. شايف زلامنه هنايه شلونهم
- اي
- والشيوخ
- اي
- تريد هيج واحد
- يعني هسه المشكله بشكلي ولبسي واطباعي لان مو مثلكم
- اي
- من رحتلهه فدوه لك شهاب اني هاي اختك اجتي هيج ع الجرح والله اااااخ
- كووووم امممممشي من وجههههي كوووم
- شبييييك ادفر هسه شحجيت داعبرلك عن مشاعري لعد المن احجي
- يامصكوع اختي هااااي اختي
- ادري هسه شحجيت قابل ... والله مادام هيج ماعجبهه شكلي ولبسي هذا وكلشي بيه يعني هي
الي راح تكدر تغيرني واصريت اكثر عليهه كوم شهاب
- شكو شتريد
- كوم سويلي شي غير شكلي خلي اصير مثلكم كووووم شكو تصفن
- هاي انته من كل عكلك !
- اي والله شهاب خيي الله يخليك اني اريدهه هاي المره الي راح تعدل حياتي
- اكِلك هو ياهو الكالك انه اريد ازوجهه
- شهاااااب ليش تصير ضدي مو صاحبك اني ضلعلك شبييييك لما عايشين عمرنا سوه
- مادري هالسالفه انه ماعاجبتني
- شتريد يصيرلك بس كول .. اختك ماتريديني هيج صار اتغير شني الي بالهه اصيرن وانته شتطلب الهه حاضر دراسه تكمل وهناك اخليهه باحسن كليه وبكيفهه شتريد ذهب اصوغهه من فوك لجوه
بعد كولي بشنو قصرت بس احجي كول هيج اريد ومعتب الي ماينفذلك
- شوف انه راح اساعدك بهالسالفه عبن انته صاحبي وعضيدي ماكسرن بيك بس بعد اذا كدرت عله الي اريدنه منك اوافك بهالزواجه واذا لاا بعد تعذرني
- اكدرله ان شاء الله بس كولي شنو
- تشتغل بكاعنه شهرين وتعيش عيشتنه ولا بنات ولا اتلفن بعد تحضر بالدواوين كل يوميه وتسمع وتفهم شينحجي هناك والي بي عبره تاخذ بيهه
والي بي نصيحه تخلهه بالك واريدك جادود فهمت
- من هالعين قبل هالعين
- يسلم عينك

كمت للكنتور طلعت دشداشه والشماغ وشمرتهن عليه ..
- هاي شنو
- شنو شنو كوم البس
- ليش
- جا شحجينه هستونه
- ها اي اي زين ضيكه هاي
- وليييد دشداشه هاي بويه موش بنطرون
- ديلا امري لله خلي اشوف بيت المنذر وين يودوني

ضحكت عليه وهوه جان ينزع وذب الكلاده ونزع السوارات ولبس الدشداشه وبعدين دزيته يغسل شعره وراح غسل واجه مشط ولفيتله الشماغ وعدلته اله ...
- هسه تووووب
- زين راح تشوفني لو هم ميصير
- انته تريد ترضيني لو ترضيهه
- هاا مادري شو انتو اثنينكم تتطلبون هسه خلي نبدا بيك من ترضى انته يعني يصير الي بالهه هم
- اي جا اذا هيج السالفه خلك وياي ولا تحط بالك يمهه زيييين سوي الوصيتك علي وهالسالفه نحجي بيهه بعدين
- ماشي ماشي تدلل ابو الشهب
- امشينه يلا
- وين
- للزرع غير اعلمك شتسوي
- ها من اليوم يعني
- جا شتنتظر
- لاا يله شهرين هنه مو
- اي شهرين
- زين وها تلفوني اقفله ماريد احد يشوش عليه واهلي عود اخابرهم منك
- ماشي يلا امشينه

طلعنه ورحنه للزرع وعلمته شلون يحوي المخضرات وشلون يسكي .. واخذته لكاعي
جان بيهه جهه حاوينهه وردينه كلبنه تربتهه وراحت زرعاتهه بعد وانه لهيت عنهه فعاد خليتهه اله ووصيته يرجع يكلب تربتهه ويشيل الحشايش
منهه ويصفيهه حتى نرد نزرعهه ..

ومن ثاني يوم الفجر كعدته وكمنه تريكنا وطلعنه
للكاع وانه علمته بالاول شيسوي وعفته ومشيت
رحت لنعيم جان وضعه تعبان وبس نايم بوسته
وكويته بجم جلمه وطلعت رديت للبيت وكت الغدا
جان رجع وليد وشايل عله جتفه الكرك وعركان
اجه ليمي ضربني عله جتفي وكال..

- تعوفني وتروح لااا يالنذل
- غير تشوف شغلك انه شكو
- ايباااه الشغله حلوه احفررر وارجع ليوره
- لك حفريييييش انه كتلك اكلب اكللللب التراب اكلبه
- اي شلون اكلبه غير احفره يلا هو اني حفرت حفرت ورجعت كلبته ورحت غير جهه هم حفرررت ورجعت كلبته
- اكلك انه كلبي مامطمن خلي اروح اشوفن شمسوي

رحت ركض للكاع واشوفن مسويله بحوالي المترين ونص وحافر ومسويهه نكره شكبرهه
- لك هااااي شسويت
- حفرت مو كتلي احفر
- لك هووو هيج بويه اشيلن كد جفه هالكرك واكلبنه بعد هالمسوي شني خو احفرلنه بير بعد
طلعلنه المااااي
- هااا هيج السالفه .. يلا عود باجر اسويهه
- شني باجر هوه انته ششتغلت اليوك كلهن مترتين
من الفجر لهسه
- غير تعبت وبعدين لتكلي مترتين شو اني احفر واكلب من الصبح واروح اخذلي فره اتبرد وارجع وهم احفر ويلا طلعن هالكد
- هااا كتلي تاخذلك فره
- اي شبيك اروح اشربلي مي اغسل اكعد بالفي شويه وهسه كلت اخذلي غفوه هم
- ههههه لك ولييييد واليرحم اهلك موش هيج الشغل
- لعد شلون
- اااااخ بويه انه منين تجيني هالمصايب

كعدت اعلمه شلون يشتغل وجريت خلك وياه عبن هوه عمره مالازم مسحاه وكرك ولا شايف التراب شلونه .. وضل كل يوميه يكعد من الفجر يروح يعدل هالكاع ويرشهه ماي ويرد يعدل بيهه وعلمته شلون يزرع البتيته وخليته يزرع بيهه يومين عبن هو شغلتهه بطيئه ولازم كل شويه رايح متمدد وياخذله فره عله ولد عمي يشاقه وياهم ويضحك
ويرجع يشتغل وهم شويه وينز لمجان ..

مره اجيت سالت عنه ماهوه عاد مشيت واسمعنه يصيح علي والكاه متعلك فوك النخله ويه ابن عمي كاظم ويصيح صورني صورني ...

عنده خبالات ماعد بشر بس ضل يحاول واشوفنه شلون يتعب يجي كبل للحجره وره الاكل بملابسه ينبطح وينام لا يحاجيني ولا شي كبل ينام ويضل فاج حلكه من التعب ... وكام يتعود عله كعده الفجر
من وحده يكوم يطلع وصار مصاحب جدتي كل صباح اسمع طكت استكاينهم وكركرتهم ..

ونوبه جنت هستوني مبدل اريدن اطلع للمختبر
جان اسمعه يصيح يلاا حبوبه وينننج ..
- هااا خيرك
- معليك انته روح دروح لزكت هنا
- اكلك شعندك ويه جدتي
- اريد افررهه شويه
- شنننني !! يمعود لا تبلينه
- والله ماعليه هاي صاحبتي هنا واني صارلي شهر اتعب وازرع خلي تجي تشوف شغلي
- لك مابيهه حيل تمشي يول مو بت الاربعطعش هاي استر علينه
- هسسسه دروح شخبصتني معليك اني مدبرهه

راح لحجرتهه وطلعت وهي تتوجى عله عوجيتهه
وامي وياهه تمشي جان بس طلعو باب المطبخ
دنج وحطهه عله ظهره وشالهه وهيه تصيح يبوي
هساع يجيني منذر يمصكوع نزلني وهوه يصيح
لج حبوبه اليوم افرج هالسلف كِللله كِله كِله
وضل يغني وكِله كِله ...

ومشى بيهه للزرع انه رحت وراهم شفته مكعدهه عله جذع مال شجره صغير مدري منين جايبه هالمسودن ويكلهه شوفي بتياتي هسه يطلعن مدبدبات و يلمعن وهيه تضحك لسوالفه ...عاد طمنت عله جدتي ومشيت للولايه وانه افكر بسالفته واضحك عليه ....

جنت هالفتره حيل مشتاك لربى واريدنهه بس تخابر تسأل مامش شي منهه حته علينه ماتجي
عبن عمي حاتم مانع جيتهه لهنايه من هذيج عركتنه وانه اكضي الليل ويه ياس خضر اتصفن باغانيه واجر بهالجكاير عطبت روحي ومامش
شي تغير بحياتي ..

هالشهرين كضن ووليد جان يحسبهن يوم يوم كل ليله يكلي ضال هلكد واتردلي جواب مو تغلس
وابد ماحط عينه بعينهه والمجان الي يعرف هيه بي مايصله .. ويطلع من الفجر مايرد الا وكت الغدا يكعد بالديوانيه يتغدا ويطب يصلي وينام
ويكعد ب ٣ العصر هم يطلع ومايطب البيت ولا يجي حواليه الا من انه موجود ..يروح يكضيهه
ويه عمامي مسوي خوش صحبه وياهم ويجابلهم بالدوواوين ويكعد والليل يرد ينام من وكت وانه
اطلع اسهر ويه هالسمه وكلاص الجاي واشواكي

فرد ليله شفت ابوي يحوم ويريدن بس يجي يحجي علي بشي وانه روحي صايره بخشمي وماتحمل
احد عاد طلعت من البيت ورحت ليم الشجره الي بسد بيت الريم وكضيتهه تدخين واسمع شعر
ووييين وجان يجي الشيخ كبل مايطب لبيته اجه ليمي ..
- هااا ياشهاب اشوفنك الليله يم دارنا
- والله ياشيخ هجيت من ابوي
- شبيه ابوك بعده يحوميلك عله مره
- جا هو شعنده غير هالسالفه
- وانته فهمني شكصتك تكضي عمرك اتحسر واتحرك بهالجكاير مابزعت
- بزعت شيخنه بزعت والعباس عايش بس نفس
كل روحي محتركه ماتشوفلي جاره شيخنه الي تحييني بايديك امرهه
- كلبهه موش بيدي ياشهاب
- هاهيه شيخنه فهمت مشكور
- درب العشك طويل وبعدك باوله
- حتصيرلي ست سنين شيخ شني من اول هاذ
- يجيك يوم وتعرفن شكصدي ..يلاا تصبح عله خير
- تلاكي الخير شيخنه

كلهه مسدده بوجهي وانه حته طاري النسيان ان فكرت بي جنه يسلم علي ويمشي ...

ثاني يوم مشينه وره العشه انه و وليد للكهوه
وجان هناك ولد اسمه ياسين هاذ شني سالفته
من كبل جان يحب بنت جيرانهم وهيه تحبه
وضلو علاقتهم سبع سنين وليش ما بدايه نزول
الموبايلات صاير عنده واحد ومدري شلون متعرف عله بنيه وضال يحاجيهه ويراسلهه
وره فتره عرفت بي حبيبته يخونهه عاد تمرضت
وره اسبوع صار كطعان مهرها وهوه ضل يتوسل بيهه وماحاجته لو حرف واحد وعرسهه ماطول شهرين وتزوجت وهوه مثل المسودن عليهه
بيوم عرسهه واكف شايف فاتت من جدامه سيارتهم عاد هوه جار المسدس وضارب جف ايده
جيلتين يكول هاي الايد الخانتهه انه كطعتهه وضاعت ايدي مثل ضيعتهه .. وضال لليوم يتحسر عليهه دايماً نشوفه عازل روحه مكتئب وماتزوج
عاد هالمره مشينه كعدنا يمه وشربنه جاي سويه
جان يكلي ...
- ياشهاب تلاحك روحك ياخويه لاتخلي الروج كيفه يجيبن ويودي بيك
- شتكصد ياخوي
- موش عاشك نهوتك
- شدراك
- تسألني انه عله العشك !!! شمالك شهاب عيب هالسؤال
- ههه لا بالله تعذرني انته الاسطه مالتنه
- اي جا اسمع نصيحتي وروح شوفلك جاره
- ماضل شي اسوي انه عيني بعين الله ومتاني القدر اشوفن وين تالي يرميني
- انته كل عكلك تآمن للزمن ؟؟
- جا شني البيدي عليهه بعيده وماكدرن اكرب صوبهه صوتهه انه ماسامعه خيالهه من شهووور
ماشايفه ابوهه حرم جيتهه علينه ولا بيه اصل بيتهم منين الاكيهه ماتكلي ياخوي خلي الي بالكلب بالكلب لا تنبشن بجروحي
- اصلاً انته من البدايه ماتعرف تتصرف وياهه
- شلون بله
- كم مره كلتلك لا تخليهه وحدهه يجي غيرك وياخذهه كم مره كتلك البنيه عليهه الف عين شمتاني انته ربك يدزلك وحي الهه يحنن كلبهه عليك وتجيك بليله  كمره روح تزحزح سوي شي
- وليد يعني شسوي اضل اذب بروحي عليهه ماتريد البت ماتريييد شسوي
- لعد ضل اتصفن واحرك بهالجكاير لحد مايزفوهه كدامك هاي حتى الشيخ شال ايده منك
- انتتتته ويااااي علي شنني سالفتتتتك ياسين ماتحاجي يفج عني تره بعلي روحي بزعانه
- انه اريدنك تسمع هالجم بيت ...
كلبي طفله وانسأل عنج رعيد
شحجي وبزردومي زفتج واكفه
شاطر وبحجايتي اضيع المضيف
وهسه ماكدر اضيع السالفه
واحترك شحترك عصفوره وبتنور اطيح
وعاشكه التخبز واجني سوالفه
حركه الرداف الامه بلايا بال
وبالتمضحك مرت ابوه اتصادفه
شافت وعافت وجع روحي وحراام
مثل الادنك وجع ماشايفه
الليل يندسني واكوم عله الجروح
بالجديد الجم وافك الرايفه
وتبدي عيني ادير من كل صفحه ماي
مثل بكمه بمتن عرجه وخايفه
بشر كد مااحلم اتعب وانه انام
وماتوشل عيني تشبه بير امام
مثل مايتسرسح الماي عله جام
ادندل من الحافه للحااافه

ياخوي هاي تالي اليأمن للزمان جمعتلك كل حال تمرن بي بهالجم بيت هذن ديربالك لا تطيحن مثل طيحتي ترا مامنهه وكفه يابعد اخوك وصويحبك
حجيه صحيح الحب مثل كهوه ودلتهه ماتنعاف تبرد لازم دايماً اضلن عله الجمر تهدر ..

سكتت وانه افكر بحجيه واشوفنه صحيح هيه بلايه شي مارف كلبهه ليه عاد انه عفتهه وشترجى !!
يجوز عينهه راحت لواحد وياهه بالكليه ؟؟ يجوز
لكته لابو نجمه مامعكول كل هالسنين ومااجه !!
وانه شلون يصيرن بحالي راح انترس شيب و
عمري راح يخلص وماسامع منهه جلمه الشلونك

عفتهم وكمت طلعت بلايه مااحجي شي مشيت
ولحكني وليد ..
- اوووكف وين رايح
- عوفني دخيل الله مالي خلكك
- دصبر احاجيك تعال نكعد ونتفاهم

عفته ومشيت ورحت للنبكه ضليت كاعد وصافن
عله الماي واتذكر حجيهه من جانت تخليني اتخيل
حته اهدا جا دامج هيج تعرفين تصليني وتهديني
عليش بعيده عني موش ماضل بيه حيل ببعادج

طلعت صورهه الي عندي بالتلفون وضليت صافن عليهن وانه هايم بيهه نسيت كلشي واخذني الشوك
لعيونهه وضليت صافن بيهن وبهذاك النمش السلب عكلي ورحت اتذكر اول مره شفتهه بالحمام وذاك
الظهر الزبده واتذكر حالي شلون جان بوكتهه واكول شدراني هيج الدنيا كاتبتلي بيج اتعذب

كضيت هالايام كلهه متكئب والدنيا طالعه من عيني
جان يجيني وليد العصريه وانه كاعد عله الشارع
- ها ياصويحبي مامليت
- جا هو الملل هالشكل مسوي بيه
- لك هسه شعليه بسالفتك انته هناك يم ربك قضيتك بهذيج المحكمه تنحل عله سالفتي خلصن الشهرين
مامليت مني اريد اروح لاهلي عاد شلون بله
- مادري
- شنو ماتدري شهاب الله يخليك تعبت والله واني اشتغل ومبقيت شي مسويته لا خليت عم ماصاحابته لا حجيه ماساعدتهه وضحكتهه لا خليت جبير ولا صغير بسلفكم ماسويت صحبه وياه بس حتى اتقربلكم واصير منكم وبيكم لك شوفني اني نفسي ماعرف نفسي شلون متغير هيج
لك حتى عضلاتي طكن والله نخلكم تشلبخته كله
وتمركم نصه اني حويته مايوكف بعينك ولك
- هههههههه لااا ولك كفو منك والله عجبتني زين زين سبع تتحمل كلشي
- لعد شعبالك يابه
- الصراحه وليد انه ماامانع زواجتك من اختي
موش علمود اشتغلت وصرت مثل مااردت منك
لا لا بس كبل انته حجيتلي شغله وهيه الوكفت بعيني بهاي سالفتك
- شنو ياشغله هاي الشفعتلي هيج
- تذكر من ردت اخذ البت من الملهى وردت اصعد التكسي وجنت سكران انته كلتلي بوكتهه
لا تروح شهاب هاذ زنى موش نسيان لا توصخ نفسك هيج وانه صح رحت واخذتهه بس ماكدرت
اسوي شي عفتهه وطبيت سبحت وماكربتلهه
ولليوم انه اخلي ليك الفضل بسحب ذنب مني
صح انه جنت موش واعي بس انته ماعفتني هالشكل ووعيتني بحجايتك هاي
- يعني هالموقف هو الشفعلي هيج ؟؟؟
- اي هوه عبن مادامك مارضيتهه الي ماترضاهه الك وهاذ يدل عله ان اكو بداخلك مخافه الله حته لو لهيت هواي بس تعرف حدك وين وهاذ الي اريدنه
مايهمني هالشكليات انه ولو هنه يهمن اختي
- لكككك هللااااااا هلاااا لعد ماكتلي هيج من البدايه مخليني مسموط بهالشمس من طاح حضك على هالدكه دكوم امشي شوفهه شتكول ماتكول تره خلص صبري بعد امشي واليرحم اهلك برد كلبي
بداعت الخوه شهاب كوووم حاجيهه
- هههههه امش امش انه هم طولتهه وياك
- نذذذذذل ايبااااه عايفني بناري وانته اصلا ماهمتك هالشغل كله
- لااعبالك ماراح هالشغل هيج راح تربح شغلتين اولهن البتيته كلهه الك وثانيهن راح تفيدك وياهه هالسالفه
- اييي فدوا اروح لبتيتاتي متكلي شوكت يطلعن
- هسه فد يومين
- اي زين زين لعد ابقى اطلعن يلا اروح لاهلي
- براحتك خويه البيت بيتك ضل شكد مايعجبك

اخذته وردينه للبيت وهوه كعد بالطرمه ينتضرني
وانه رحت اخذت زهره ورحت لحجرتي ..
- ها خويه
- زهرره عله هذيج السالفه مال صاحبي
- بعددده هالمدوهن .. خويه هدني عليه انه اليوم افكسهن لعيونه هالمسربت هاااذ
- ولججج دستجلي شجاااج جنج ابو طبر ااااكفي
بله هسه هم صايره دايره بت تروح اتهجم هيج عله زلمه شطوله
- يخسسسسى زلمتيش هاذ حايرلي بهالبتيته عود مسوي انجاز
- وشدراج بالبتيته ؟؟
- جاا انه تنضمن علي سالفه غير اعرفن من جدتي
تكوم وتكعد وتحجي بي ماخذ عكلهه
- ماتبطلين علوم انتي
- خووويه انه هاذ الا اربطنه بالمراااح ويه المطايه يلا يجوزن من دكته هاي شني ماله رادود هنايه
- وحك العباس انه ماعرفن شحب بيج عله هاللسان الزفر هااذ لج نتي لا تسودنيني ضبببي للسانج
شيكلون علينه مانعرف نربي شنيييي اربطه بالمراح شني مطايه لج بووويه زلمه هاذ زلمه
- ااااي خويه ااانه ماحبن هالسوالف مال المسربتجيه اليحجي علي اشدنه من ضلوعه واحطه بالخيييس وادوسن فوكه
- ههههههههه انه وعلي ماعرفن عليش جار خلك وياج بس انتي حجيج يضحك جا اذا هيج ضلي هنايه عنسي عله كلبي ضلي يابعد اخوج انه وياج واحد يجابل الثاني نعجز سويه
- هههههعععععههههههه والله ياخويه عليك سوالف شني اعنس انه شناكصني واعنس
- ناكصج لسان مضبوب
- خويه هسه شني خلني اتحجى بكيفي شني الجلمه بفلوس
- ياخيه انه افهمنج واعرفن طبعج لجن الغير من يشوفنج هيج تلعلين شيكولن عليج اول مايجي علينه اهلهه ماعرفو يربونهه ولسانهه هالطول
مو صحيح
- اي خويه صحيح بس انه شسوي كلبي بساع يحترك وماعرفن اسكت واضمضم هَيج اكتهن
كلهن بالوجه شسوي انه هم ابتليت
- هسه كليلي شردن جلمه للزلمه يريد يمشي لاهله
هو ضال هالشهرين حته يرضيني ويسوي كل الاريده وتغير وثبتلي انه زلمه حوك ومابيه العيبه
بس ياخيه لاتحكمين عله شكله من الاول تره همه
هيج اهل بغداد موش مثلنه وهوه من شاف هالشي مايرضينه تغير وعاف كلشي حته تلفونه مسلمني اياه من اول جيته واهله يحاجيهم مني وانه اعرفنه من جنت بتركيه يمشي وياي وياي وكل طبع عندي عنده انه عن نفسي راضي بي عبن اعرفنه
شبر شبر وادري انه انطي لايد امينه مايجي منهه الا الخير ونفوسهم طيبه اهلهم كاعد وماكل وشارب وياهم وادم من اهل الله
- مادري ياخويه انته كيفك شتكول
- انه اكول فكري ورديلي خبر هاليومين وخلهه بالج انه ماجبرج عليه بس اجيت حجيت عبن هوه صاحبي الروح بالروح وكلشي حجيته موش اكنعج بي لاا بس هو حك الله وحجيته حته تعرفينه شني
- هاهيه خويه خلني ادانش فكري ويومين واردلك خبر
- ان شاء الله يلاا امشي وضبي للسانج شويه زين
- زين خويه زين

طلعت رحتله وهوه جان يفتر ومن شافني كبل اجه عليه ومخبوص..
-ها شكالت شكالت احججي لتخبلني
- كالت افكر يومين
- شتفكر شتفكر من احتركو اهلج خررررب
- هااااي شبييييك اهلمن التحرك
- شهاااب عوفنننني تره طلعت روحي والله مو حاله هااااااي هسه خلي تكول اي لا شنو افكر
استغففففففر الله هم اضل معلك هيج
-حيييييل حته تحس بيه شوووف الدنيا دواره
- زين خلي احاجيهه بس مره والله كلمتين بس افهم ليش هيج تسوي
- انننننجب لك اننننجب حجيش هااااذ كلتلك يومين شكو بعدددد
- لك حتخبل والله ماصايره هاااااي والله يعني اهلي عايفهم شهرين حتى بس ارضيهه وتجي تكلي افكر شتفكر من خرب بقسمتي السوده شتفكر
- اصببببببر شمااااالك تسودنت بعدين اكلك هيه خما بس حجايته وراك ابوي وعمامي
- ااااااخ يابه لااا دخيلك شهاب ماضل عندي حيل
هاي انتو كل واحد منكم رادله شهرين هيج تخلص السنه وبعدني مامرضيكم لك خيي سهلهه رحمه
لترابات امك
- بسيطه بسيطه بس اصبر شويه ويصير خير

ضل كاعد بالكاع ويصفك باديناته ويشتم بنفسه
وانه واكف اضحك عليه شصاير بحاله والله
كلشي تخيلت من هالدنيا بس مال اشوفن وليد
يضوك المر من وره اختي ام لسان اليلعلع هاي
لا بالبال ولا بالخاطر ...

ثاني يوم جنت راجع من المختبر وشفت طابكه سياره عمي حاتم يمنه انه كلبي رفرف رحت كبل للديوان طبيت سلمت عليهم جانو حيدر وبسام موجودين هم عاد كلتلهم ..
- وينك عمي صار زمان مشايفيك ولا حته الولد
- ملتهين بهالشغل وعاد اليوم مامش احد بالبيت كلنه نجي هنايه شعدنه ضالين وحيدنه
- هااا جا الاهل وينهم
- بغداد يم خوالهم
- شنننننني عممممي
-شمااااااللك تصركعت
- عمممممي اااااانه شحاجي من زمااان علييييش تجيبون الشرررر كووووه
- شهااااب لاتعلي صوتك عله ابووووي
- بسااام معليك بيه انتم تحركون وماتردون دخانه
يعني هسه ربى بيت هذاك خالهه ؟؟
- شعليييييييك باختي تروح تجي شعليييييك
- عممممي جاوبني بروح الاعزاززززز جاوووبني
- اي بيتهم شهاب لاتسويلنه سااااالفه هذول خوالهم مايصير هالشكل ابني اكعد وتهدا
- والعببببااااس ماااضل دكيكه هنااايه هسه تمشي وياي نجيبهم
- خااااايب اكععععد واننننوجب شهلتمسلت
- وحك علللللي ان مااااااجيت وياي ودليتني بيتهم
اجتله لهالولد من باااااجر اجيبه لو جان بالجباااال
واااانه حلفت بعد
- شهاااب بويه اكعد وخل نتفاهم
- شيخنه انه شرطت هااااي صار سنين انه سويت شي ! كلتلكم عله شي ! حفظت طلبكم عليييش ماتحفظون طلبي مووووش كلت شرطي مااااتطب بيت خاله شلوووووووووووووون تاااااخذهه بيدك ليههههههههم شلللللللللون
- بووووووويه مايصيرن بيت خاللللللهه اهل امهه مايصيرن هالشششششكل اعككككل عااااد
- واللله وقسسسسم بالله قسسسم بالله ان ماجيت وياي هسه ياعمي لاخذهه منكم بالغصب واجتله للولد وانه قسمممت مره وهاي الثانيه لاااااتطلعني من طووووووري ياعمي تررره انتم العايلليييييين
- حااااااتم اممممش وياه وجيبو البت
- شييييخ شني هيه بالكووووووه
- اااااي بالكووووه عبن سالفتك عوجه الزلمه كلك هاااذ شرط عليش تغدر بي الحك ويااااه امشش يلاا بلايه فضاااايح جيبو البت وسدو هالسالفه
.
.
.
يتببببع

عوضتكم ببارت ابو ٥٠٠٠ توقعاتكم 🌸🌸