من فجر ديسمبر
🍁
🍁
- ربى ذبيهه هاي وصخه شلون تكضيهه هيج
- هههه
- شمالج !!
نزلتهه بالكاع والبزون مشت وهيه كالت..
- خلي افوت اغسل ونحجي
- زين يلا موش تاخرين
راحت وانه كعدت بره انتظرهه شويه واجتي مبدله ملابسهه وكعدت يمي بالحديقه والعطر يفوح منهه
عاينتلهه وهيه تكربت تلمست اصابيعي وردت رفعت راسهه تعاينلي .. كلتلهه..
- اول مره اشوفنج تكضين بزون هالشكل
- هههههه
- عليش تضحكين كل ماجيب طاريهه
- اذا اكلك مو تنصدم
- لا بويه تعردت عله سوالفج انه كولي شسالفتهه
- امممم هذا الحارس
- شنننني!!!!!
- باوع هاي تكدر تفهمهه مثل انه جان يريد قربي كتلك اني هو كلش يحبني ومتاذي بصدي عنه
- ربببببى شني يحبج شننني فهميني شسالفته
- اهدء شبيك
- كليلي شسالفته من الاول تره ماضل عكل براسي
- تمام ماشي اهدء واحجيلك
- هادىء انه كولي يلا
- اني راح احجيلك بس اذا تشكك بحجيي من هسه كلي
- هاي شمالج !!! بويه انه بشني شكيت كبل حته هسه جاي تحجين !!!!
- ماشي لعد ...اسمع هالسالفه...
قبل كم سنه تقريبا قبل ما امتحن ثالث خارجي
لمده اربع شهور اني جنت اسمع اصوات غريبه ماتنفهم شنو شي مثل بجي طفل او شهكات مال واحد مخنوك وديبجي .. ماجنت افهم شنو هاي والمن حرت شسوي حتى اعرفهه .. صار نومي كله عباره عن اربع ساعات او خمسه باليوم لان اضل بس افتر بالبيت بالكراج ادور مصدر الصوت ... مرات اجي هنا افتر المكان كله شكو وحده عدهه طفل اسويلي حجه واروح اشوفه اخاف منه الصوت او اكو شي يخصه وماكو ملكيت شي ...
كلت خاف هاي وساويس شيطان كمت التزم بالصلاه اكثر ودائماً اسمع قران بس اشو هاي كامت تزيد ماتنقص حتى رؤيه صارتلي بيهه
المهم وصلت لمرحله كلش تعبت ووكعت مريضه اسبوع اني كضيتهه بس نايمه وابر موسعه قصبات كلش جنت اختنك بوكتهه ...
من صرت زينه شويه ورجعلي حيلي جنت مصممه الا اعرف هالصوت والرؤيه لمنو وليش
اني جان عندي كتاب بس ماحب اقراه يحجي عن التواصل ويه الجن وشلون يصير ... جنت محتاجه اتواصل ويه الرفيق وبوكتهه ماعرف شلون لان جربت اكثر من مره احاجي بصوره عاديه وماكو ما احس بوجوده ... فأضطريت التجىء لهالكتاب
المهم رحت قريته واجيت اسجل اول سطور مكتوبه حتى تعرف اسمه وجان ينسد الكتاب رأساً
وماحسيت الا والرفيق يمي يكلي .. غلط هذا خطر
لا تسوي ... اني جنت بحاله رهبه اذا تذبحني بوكتهه قطره دم ماتلكه بيه ....
- والله عمي حكج زين ضاله وصابره هيج
- بقدره الله
- اي كملي
- ضليت اخذ نفس وجمعت قوتي وسألته وين جنت
كالي جنت اتواصل وياج بس ماتفهميني .. كتله شلون .. كلي كلشي شفتي وسمعتي فرأساً كتله منو هذا الطفل ؟؟ كال ساعدي واختفى ...
ضليت افكر شلون ومنو هو وليش اساعد طفل!!
وبعدين باوعت للكتاب وخفت منه اخذته كبل وضميته ...
وثاني يوم رحت حجيت للشيخ كلشي صار كالي انتظري يوم يومين بلكي يجيج جواب منه ...
وضليت انتظر وماكو شي والصوت بعده رجعت للشيخ كتله اخذني لهذاك الحجي العرفاني اكيد راح يعرف شنو هذا ... هو مقبل ياخذني بس اني ضليت اليوم كله الح عليه لان ماضلت عندي قابليه اتحمل هالصوت اكثر اريده بس يخلص بأي شي جان ... عاد اخذني وره يومين ...
من وصلناه لكيناه هستوه معزل وكاعد ع الرصيف
يشد بالعلاليك ... سلمنه عليه وجان يكول ...
" جنت منتظركم اليوم غداكم يمي "
هالمره احنه ماتفاجئنه ولا سألناه شلون عرفت لان فهمناه بعد ...
اخذنه لبيته جان بسيط كلش هول بي مدات اثنين وحصيره ومكتبه هيج قديمه حاط بيهه كومه كتب
ومعلك سيف الامام علي عليه السلام ...
كعدنه وشويه وجابلنه الغده ولد يطلع بعمر ١٦
سلم ع الشيخ وطلع ..
ضلو يسولفون هو والشيخ وهو كلش بشوش وسوالفه طيبه ويضحك هواي انسان كلش بسيط
كملنه الاكل وتشكرنه منه .. جاب الجاي وكعدنه نشرب وجان يكول ..
" شلونهم بعدهم متعبيج "
اني ضحكت وكتله " مدوخيني مافهمهم "
هو ضحك وصار وجهه احمر جان يكلي
"احجيلي مطلبج "..
كتله .. السالفه هيج وهيج واريد افهم منو هو وشلون اساعده ...
سألني " انتي تريدين تعرفين حتى ترتاحين من الاصوات لو حتى تتعنين وتساعدين "
سكتت شويه وفكرت صدك اني شريد منهن !!
اني اثنينهن اريدهن ؟؟؟؟ بعدين جان كلتله..
" اريد اساعد واكمل الطلب الي رادني بي "
ابتسم وكالي .. " شكد قدره تحملج للمجهول "
ضليت صافنه ماعرفت شجاوب جان يعيد السؤال وكال " شكد تتحملين تصبرين على شي تمشين بي وماتعرفي ويضل يلازمج عمر "
كلتله" حالياً قليله بس اذا روضت نفسي بالايمان والهدوء اكدر على الاكثر "
كالي " زين قدرتج على المعرفه بشيء اكبر من نظرج لجزء من الشيء ؟؟"
كلتله " المعرفه الزايده مؤذيه "
كالي " لو عندج قدره تحمل مسؤوليه المعرفه والعلم بحول الاشياء بجزء من المكنون تكومين تاخذين سبحه من الرف واذا تشوفين نفسج مو كد المسؤوليه هاي لاتسألين بعد عن الشي الي اجيتي عليه وهو يروح من ذاته ماتلكيله اثر بعد "
- شختاريتي ؟؟
- الصراحه ضليت متردده لان هاي خطوه مصيريه .. الشيخ كلي اتبعي احساسج ..
بعد تفكير طويل رحت كمت للرف واخذت سبحه صفره على حليبي هيج لونهه .. اخذتهه ورحت للحجي ضحك وكالي ..
" هاي اخذيهه الج تذكريني بيهه وتذكري قرارج
انتي تحملتي مسؤوليه استوعبي هالشي واحفظي "
- ليش ماختاريتي تعوفين السالفه !! شني الي خلاج تختارين التعب والحمل هاذ ؟؟؟
- ماكدرت اتجاهل الموقف الي توصلت اله ماحبيت اتراجع لاني ادري بنفسي ماراح انسى
هالشهور الكضيتهه بقلق وخوف على صاحب الصوت كلت لو يكلفني عمري لازم البي .. لان
لو ما عندي حل لراحته وحزنه مايجيني
- صراحه تفكيرج بعيد وبي من الحنيه والمسؤوليه جثير .. متاكد هاذ اختيارج هو الصح وموش ندمانه عليه
- لاا ابد ماندمت بالعكس حمدت ربي مااختاريت الثاني
- شني الصار وراهه حته خلاج هلكد تفرحين باختيارج !!
- من ساعتهه واني حسيت راح اعرفه ..
كلتله للحجي " راح احتاجك بعد هالخطوه ؟؟"
جاوبني " ماتحتاجين بعد غير لله سبحانه وصبرج والثبات ،، توكلي وكلشي تريدينه يجيج "
بس نبهني على شغله كالي ...
" كل نبي حوله ملاك وشيطان لا كثر الملائكه وقوتهم بعدو الشيطان ولا الشيطان بحيلته وقوته بعد الملائكه الي كدر عليهم اثنينهم اراده النبي وعقله واداركه للشيء .. كالي .. خلي حد الحق نصب عينج دائماً ولايغرج بهالدنيا شنو تملكين
لان الي ملكج بلحظه يسلبج ملكج فاحسني حفظه وتسخيره للخير وكلشي تبدين بي اخلصي بي لله
كل عمل خالص لله هو صح اما اذا بي اي نيه دنيويه فهو خاطى ء "
- يعني جان ينبهج خاف تنغرين وترحين تاذين الوادم بشي منهم
- اي هيج قصده
- اي زين كملي وشصار تالي
- رجعنه للبيت وبنفس الليله اني نايمه وشفت رؤيه بطفل كاعد بزاويه ومربىط بسلاسل حديد كبار
ملفوفه على كل جسمه وهو مدنك ويبجي ونفس الصوت هو صوته .. اني بالمنام اشوف نفسي واكفه اباوع عليه وهو يرفع وجهه اسود ومخرمش
ونار تلهب يم اذنه وهو يستنجد بيه فزيت مرعوبه بليلتهه وبس ابجي اهلي كلهم التمو عليه ويهدون بيه بس ماكدرت صوته ضل باذني وشكله مايروح من بالي ... ضليت للصبح كاعده وافكر بي
كمت صليت وبأثناء ما رفعت راسي من اخر ركعه هم صارت صورته كدامي فدعيت الهدايه
والتسهيل ...
ولليل اني تعبانه جسمي بايد مابيه حيل اتحرك وبس افكربي عاد غفيت وهم شفته بنفس الشي
بس هالمره وياه مره سمينه ورجال شايل كرك وواكف يم هاي المره وهي تشمر علي شي اسود ناعم ماعرفت شنو بس شايله بجف ايدهه منه وتشمر عليه وهو عينه بس عليه يستنجد بيه واني واكفه بس صافنه على الي يصير ... عاد فزيت
ورحت كبل رسمت الي شفته وضليت الليل كله صافنه بيهه اريد اعرف منين ابدا !! ومنو هذوله !
جان على هاي صفنتي الرفيق حسيته يمي كالي
" ساعدي " كلتله" بس دليني عليه اساعده "
رجع اختفى وثاني يوم الصبح رحت للشيخ وحجيتله وكلتله هسه تعوف كلشي وتلكالي حل
ماعرف شسوي بعد ... وشوفته الرسم جان
كالي امشي نفر هالسلف ونشوف ... خطيه عاف
الديوان ومشى وياي ضلينه نباوع ع الهور ع النسوان ع الزلم .. سألنه اذا اكو هنا فد عائله عدهم ولد هيج صغير ومريض ماكو ...
من رجعنه لمنطقتنه كلتله خلي نسأل هنا هم
فهو كلي ماكدر اني اروح ادك باب الوادم واسال هنايه زحمه ... كتله لعد اني راح ادبرهه ...
ورحت وصيت امي تسأل منو من نسوان المنطقه عدهه طفل مريض او احد مريض او بي شي
او اهله يعذبوه مو زينين وياه ... راحت هي سألت دلاله المنطقه مالتنه هاي ام المحل كلشي تعرف
و وره يومين اجتي علينه وكالت ...
سمعت اكو بيت بفرعين وراكم عدهم مرت ابنهم
جانت زعلانه ومن جابت اجتي هنا وخطيه ابنهه صارله فتره شلون مريض سوده عليه جسمه هيج طكع طكع حمر وينزف بهالجراحه
اني كبل سألتهه شكد عمره ؟ كالت يطلع سنه ونص سنتين ..ضليت متردده هو لو لا لان الي شفته اكبر من هيج عمر يطلع خمس او اربع سنوات مو هيج صغير بعده !!!!
بس كلت خلي اروح اشوفه ولحيت على امي وتحايلتلهه يلا رضت اروح ويه المره لبيتهم هي ماقبلت تروح لان متعرفهم بس اني لحيت الا اشوف الولد وبحجه ع اساس المره هذيج تشوفهم وتسلم عليهم واني من كرايبهم وهيج دبرتهه
ورحت ....
شهاب ماتدري شنو من صدمه صارتلي من اول ما طبيت عتبه بابهم
- شني ليش!
- كبل شفت هالبيت اسود بعيني رغم هو شلون نضيف ويلمع بكلشي بي بس روحه سوده
ترددت اكمل وافوتلهم بس اجاني صوت يحثني اكمل الي اجيت بي وطبيت بس باوعت بالوجوه
واشوفلك هذيج المره السمينه الي نفسهه شفتهه بالمنام الفرق الرحيد هنا تضحك وترحب وهناك وجهه ينكط سم وشر ... عرفت هاي تصير العمه
ام رجلهه لام الطفل .. وخطيه هي اسمعهه محتاره شلون تسكت بالولد بالغرفه جوه .. واني ضل كل بالي يمهم بس قطع فكري بيهم صوت المره وهي تقدملنه العصير اخذته بس ماشربت ماكدرت نفسي مانطتني اشرب من ايدهه شي ..
ضليت مركزه بيهه لحد ما بردت اطرافي اعرف اني من كلش تبرد اطرافي معناهه هاي راح اشوف بيهه شي وفعلاً شفتهه شلون واكفه على
تله مال تراب وبايدهه جيس وبي غراض وتريد تدفن بيهن وجابت لعابه طفل شمرتهه فوك غراض الدفنتهن بس ماسوتلهه شي اجه هالرجال وصب فوكاهه مي احمر ....
رأساً اني اختنكت هنا وضليت بالكوه اجر النفس ركضت جابتلي كلاص مي شربت شويه وضليت اهدء بنفسي بس اريد اشوف الولد حتى امشي من هالبيت كله سموم وروح سوده ...
عاد شويه والمره كلتلهه اجينه نطمن عله جنتكم وابنهه خطيه خلي نشوفه شلون صار واخذتنه الهه
من طبينه غرفتهه للبنيه واني احس كلبي يدك براسي صرت اسمعه مادري ليش بس شفت البنيه
بوستني وهي دمعتهه على خدهه خطيه وابنهه فارشتله ومخليته ع الجربايه ومصلخته خطيه
وهو يرافس ويبجي وجسمه مطكع واحمر من غير الدم الي بي .. باوعت للبنيه خطيه كاعده وحاطه ايدهه على راسه وتباوعله بعجز متكدر تسويله شي وبس تبجي ...
الحمدلله بهاللحظه عمتهه طلعت صاحهه رجلهه
واحنه بقينه يمهه .. اني رحت للبنيه شاورتهه
كلتلهه " ربج استجاب دعائج بس اطلعي من هالبيت "
باوعتلي ومستغربه اني لزمت ايدهه وباوعت بعينهه شويه وكلتلهه ..
" بس اطلعي من هالبيت ومعليج بالباقي اذا تريدين ابنج يطيب اطلعي منا واني افهمج بعدين كلشي "
كلتلي " وين اروح "
كلتلهه " روحي بيت اهلج اي احد او تعاي لبيتي حتى لو يومين بس لا تبقين هنا هالبيت وصخ وانتي افهميهه بعد "
كلتلي " شمدريج وانتي شتريدين !"
كلتلهه " والله اجيت متعنيه لابنج صارلي شهور ادور عليه بس خلي هالشي سر بينه اذا تريدين شفائه واذا تحجين لاحد كلشي يخرب "
عاد اجتي العمه وضلت بس تريدنه نطلع منا
فاني كمت سلمت على البنيه وشاورتهه ..
" احنه بيت ابو بسام من اصل شيوخ وراكم بفرعين تعاي انتي وامج او احد من اهلج لا تخلين هذوله يعرفون بيج "
كلتلي " ان شاء الله هاليومين اجي "
رحت للطفل لزمت ايده بستهه وتلمست وجهه خطيه جسمه جان نار من الحراره .. بعدين رجعنه للبيت وضلو يسألوني شعندي رحت وشحجيت وياهه ماجاوبتهم اصلا ماحجيت ويه احد اليوم كله
وثاني يوم رحت للشيخ العصر وحجيتله ...
جان يوصيني من يجون لازم اكون متوضيه
ووصاني بصلاه الليل كالي ارجعيلهه تنورلج دربج ....
- زين عله طاري هالسالفه عليش الشيخ يوصي نضل عله وضوء دايماً !!! اله سبب معين لو هيج
- اني اكلك ليش ... شايف ليش اني ارتاح بحضن الشيخ من جنت اتمرض !!
- اي عليش !
- لان هو دائماً دائماً على وضوء هاي الشخص الي دائماً متوضي تصير بي مثل هاله مال نور وطاقه روحانيه جبيره مثل طاقه ايجابيه للروح
تصير فتضل انته بمأمن من الشياطين الي تجلب الطاقه السلبيه .. فهو يوصي بيهه حتى نضل محافظين على هدؤنا ومحميين من كلشي لان حتى العلماء اثبتو ان الوضوء بي طاقه ومثل اشعه هيج تحوط الانسان وتصفي فكره ونفسه تصير خفيفه
- هاااااا اكولن عليش وصاني بي كل مااكربلج من جنت مريضه كالي لا تروح ليهه بلايه وضوء
- اي لان اني ارتاح كلش لهالشي
- زين زين ... كملي بعد شلون اجتج رحتيلهه
- لا وره ٣ ايام اجتي هي وامهه بس شنو متبوشات وحتى الطفل ملفلفاته ... خليت امهه تضل ويه امي واخذتهه وصعدنه لغرفتي
كبل كالتلي ...
" بس فهميني انتي ليش هيج سويتي وشتريدين "
اني طمنتهه وكلتلهه ..
" والله ماعندي شي وياج بس خايفه عليج وعلى ابنج هذيج عمتج مسويتلكم عمل مو زين وبيتكم هذاك كله سواد بسواد .. كلتلهه اكعدي واحجيلي شعدهه عمتج وياج ؟؟واني احجيلج الباقي"
جان تكلي " اني اخاف منهه هي ام وجهين
كدامكم شي وويانه شي .. واني من حجيتيلي كبل كلت الحمدلله لكيت واحد اليصدك بيه وباحساسي هالبيت مو زين وماصدكت بس اريد اطلع منه
وتوسلت برجلي حتى ياخذني لاهلي وهاي جيتي منهم عليج حتى شوفيني مبوشه خاف احد من عيالي يشوفني جايه هنا "
كلتلهه " اطمني انتي بأمان بس فهميني ليش تكرهكم شعدهه وياكم ؟"
كالت" اني متزوجه من خمس سنوات وكل سنه احمل واول شهرين يصير اسقاط عندي بس هذا
شديت بطني كل فتره الحمل بعلك مزور بالامام العباس واكوم واكعد وانتخي ربي تحفظه اليه
وولدته بخير وسلامه وعيني مانشف دمعهه من الفرحه عليه سنين انتظره وتالي ما تطلع الاربعين مالته وهالولد ينكلب جلده احمر وكل يوم ويزيد المرض بي ماخليت دكتور ولا سيد مااخذته كلهم بس اخذ فلوس وكلشي ماكو .."
رجعت كلتلهه " هسه هذا سببه يرجع لو جاوبتي ليش تكرهكم شعدكم وياهه "
كالت " ماعدنه شي اني بنت ابنهه الجبير وهو ابنهم بالتبني من جان عمره ٦ سنين بيتهم احترك وابوه كبل مات اختنك وامه هم .. اخذه عمه الي هو هسه ابوه هذا وتبناه وضل رابي عدهم وبعدين يلا صارت عنده خلفه اثنين ولد واثنين بنات وهو كلش يحبه وهسه عمي مريض وهو عنده املاك هواي ومسجل اله حصه وحصه اهله هم اله وهذني كلهن محفوظات عند عمي من شاف نفسه المرض اخذ بي كاله راح انطيك حصتك من هسه وابري ذمتي منك كبل مااموت .. وهي تخبلت شلون تنطي وماخلت شي ماسوته بس حتى عمي ماينطيههن اله هسه .. فكله عمي اضم لابنك حصه لان هو وريثك يصير فحصه اهلك كلهه حسجلهه اله من يجي سووهه سالفه بس حتى ماينطون الفلوس ... وليش ما ربج قسملنه هالولد بس ماتهنينه بي ولا صفالنه بال نحجي وندور حقنه
التهينه بمرضه "
اني هنا فهمت سالفتهه عدل .. تريد تحرمهم من الجهال حتى تضل الفلوس الهه ولولدهه ...
كفيت عن الحجي واخذت الولد منهه حضنته ولاعبته وهو هادىء خطيه وبس يباوع بعيونه الصفر ..
كلتلهه اكعدي انتي وياه هنا وهسه اجيكم
ونزلت جبتلهه ماعون فواكه وماعون كيك وعصير وصعدته الهه كلتلهه انتي اكلي وعوفيني ويه الولد ...
خطيه كعدت هي تاكل واني جبت هيج دبب صغار والفرش مالتي انطيتهن بايده وهو يلعب بيهن ومنطلق ... جنت اهدء فكري من كلشي اصفي
حتى اركز وياه بس ... وسمعت صوت الرفيق يمي يكلي .. أامر ياعبد انا لك طائع !
تفاجأت هنا هاي اول مره اسمع منه هيج يريد اني اامر بشي رغم دائما هو اليدليني بكل شي
فكلتله.. " كلانا عباد الله لا امر عليك "
كالي " باسم الله ابتدأ ماتريد وانا اعينك "
عاد بديت اتلمس شعر الولد واسمي باسم الله وبعدين وجهه وجسمه ولحد رجليه وطلبت تنفك هذيج السلاسل من عليه ويتحرر من كل شي حواليه والشفاء من الله اله ..
وبعد مادريت شصار ماصار .. ضليت الاعب الطفل واوكله موز وامه خطيه فد فرحانه بي
كل شويه وتجي تحضني وتكلي شلون سكتي
شسويتيله واني اكللهه شسويت قابل دالعب وياه
وهي تلح وتلح وتحلف بيه ...
عاد كلتلهه اذا ابنج صار زين تعاي واكلج
جان تكلي نذر عليه اذا تشافى هالولد اصوغج ذهب وملابس كلتلهه كلشي مااريد بس جيبي الاعبه شويه وضلت هي تحلف واني ماارضى
عاد اخير شي كالت خلي يتشافى والله كريم
وراحت لبيت اهلهه ...
هسه شتتوقع شنو الصار برأيك ؟
- والله هالسالفه من اولهه مصفنتتي اريدن افهم هالحارس وينه من السالفه !!!!!!
- هو هسه اذا توقعت راح تعرف
- يعني شني انتي شفتي بعمر خمس سنين وهاذ بعده سنه !! وين الربط !! زين العمه شسوت ! وشلون بالولد تشافى لاا !!!
- هههههههه اني كتلك توقع مو اسأل !!!
- عذريني بويه انه دماغي ضرب كملي انتي
- امممم لعد اسمع حتى يضرب دماغك فد مره
هاي وره ماراحو باربع ايام سمعنه خبر وفاه
عمتهه هذيج المره السمينه
- عليج علي !!! ماتت !!!
- اي ماتت كالو صاعد ضغطهه مفول وكاتلهه بمكانهه هيج سمعنه ... والولد صار زين من وحده جروح جسمه التئمت ورجع لون جسمه ابيض
والبنيه اجتني تهلهل من الباب واطش الجكليت
وامهه شايله وياهه سله متلتله غراض وذابه عليهه وصله بيضه اجتي وجان تنطيني السله وكالت
"هاي بشاره هالفرحه وربي يرزقج الجنه من كل ابوابهه والولد الصالح الي يسعدج ويداريج بكبرتج"
اني مارضيت اخذ منهه شي بس هي حطت يمين عليه الا اخذهن وطلعت وهي تهلهل واطش بهالجكليت فضحتني بالمنطقه بوكتهه ضلو كلهم يسألوني شكو واني اكللهم صديقتي وفرحانه بابنهه
صار زين واني جنت مدليتهم على دكتور
بس امي ماصدكت بحجيي وضلت تسال وتسأل
عاد اخير شي ذبيتهه براس الشيخ كلتلهه هو منطيني شي اوصله الهه .. يلا سكتت وعافتني
- ههههه بلاويج كلهه براس الشيخ
- لعد شكول ماعندي غير هالجذبه
- كمليلي اريدن تالي شصار
- اي منا صار عندي صديق جديد الكاه صبح وليل وراي وين مااكعد يكعد انام ينام وين ماامشي الكاه يمي ماجنت اخاف منه لاني اعرفه شايفته ..
بس هو باقي بهيئه طفل وتصرفاته هم مال اطفال
بس مؤذي حيييل مؤذي الي يمسني لو بحجايه
يروح يتهجم عليه ويسويله مصيبه
- شلون يتهجم عليه هو اصلاً شلون يكدر هيج
- شوف قبل هذا خلي اكلك شغله عليه ..
هو طلع مو الطفل هذاك وانما هو جان. محبوس
ومتعذب بفعل هذيج الاعمال ماعرف شلون اجه
وليش هيج عمره وهيئته بس الي عرفته انه جان
يتعذب والمه كله يطلع بهالطفل لانه مسلط بقتله وعصى وضال هيج مثل المسجون من اول ما مديتله ايد المساعده وتحرر هو اخذ ثاره بايده
وكتل المره هسه تكلي شلون كتلهه !!!
واكلك ... انه بطبيعته ما يتعامل ويه جنس ادم
بس يتعامل ويه قرينه .. مو كل انسان واله قرين
هذا هناك يروح يتعامل وياهم لان القرين بذات نفسه يعرفه اله نيه مو زينه على صاحبه فيبدا يدافع عنه وهو ماينكدرله الصراحه شرس كلش مايعرف غير القتل او الاذيه يروح ياخذ بثاره من القرين
وكت الي ياذي يتاذى الانسان ويجر بي للموت لحد
مايجي اجله
- الله اكبر شني هااااذ !!!!! وشلون تراهم وياج
- وياي هو طفل مرافقني بكلشي ينطيني امان وياخذ امان لان الرفيق وياه وياه اما اذا تسالني عن قريني فمااعرف بصراحه مادري شي عنه
بس اعرف متوالمين ههههه
- ههههههه لااا عايز مايتوالمون جان صارت حرب اثنين ضد واحد
- ههههههههه مادري اموت اعيش يضل كل واحد يجر من جهه
- والله سالفتج لا ع البال ولا ع الخاطر انه هسه لو موش صاير وياي مواقف كبل جان ماصدكتج لجن لين عشت وياج كلشي وشوفتيني وكربتيني منج صدكت هالشي
- عرفت هسه ليش ماجنت احجيلك قبل لان مراح تصدكني حتى لو احلفلك مليون مره لو ماتشوف بعينك وتسمع باذنك ماتصدك وماتتقبلني هم
- اي صح ماجنت اصدك لو ماجربت بنفسي
زين وشلون تعاملتي وياه
- عادي مالي حجي وياه ولا شي هو بس هيج مثل ضلي وياي احس بي بالليل يضل يسوي اي شي بس حتى اكعد ويضل بس مكابلني وكاعد مرات اكله انته متنام شلون بيك يضل يبتسم ويكعد هادىء
ابد ماسمعته يحجي بس يوصل باحساسه وحركاته كلشي يريده ...
من صارت الحادثه اني مارضيت عليه لان جنت ماخذه عهد على نفسي مااذي احد بشي املكه والي صار خلاني اخلف بهالعهد واخالف الوصيه هم
فكلش مارضيت عليه ومنعته يوصلني بعد وضل هو عايش بحزن وذبلان مثل مضيع امه مايعرف شيسوي لحد اليوم حسيت بي بره طلعت وجانت نظراته كلش حزينه وهيج مليانه ندم واسف ماكدرت كلبي ماانطاني اني كلش معتزه بي
واخاف عليه .. فضحكتله وهوه اختفى وره شويه اجتي هالبزونه ليم رجلي وتتحايل وتتموع شكيت بي هو بيهه شكيت بس بعد مادري اذا صدك او لا
- لا عمي صدك صدك جا هيج من الله تجيج
والله هالنوب علينه يحبهه انه عايز !! ما صدك اخلص من هالوادم النوب علي .. استغفر الله
- ههههه تره ماله دخل بينه حبيبي لا تضوج
- اييي واااضح كلش
- شنو واضح !!! هسه هو مسويلك شي !!
- لاا بس هيج انه ماتحمل احد يحبج غيري
- بس اني الك وحدك واحبك وحدك ابو الشهب
- وانه اعشكنج يارويحتي ... زين كليلي هاذ نفسه الي سوالي هذيج السوالف وكت اول مره تعاركنه
- ههههه بعدك تذكرههه
- لا والله ناسيهه لجن هالساع اجتي بالي
- اي هو نفسه ولو ما تدخلاتي وخوفي عليك جان الله اليعلم وين تصير هسه
- هاااااا اي بله وشني تدخلاتج سولفيلي
- هيج سوالف بسيطه المهم انته بخير هسه وماعليك اي اذى بعد
- لااا كليلي شني الي سويتي احجيلي سالفه الطين شني !!! يلا كبل ضميتيهه وجذبتي علي هسه لااا تجذبين بعد
- باوع اني ماجذب كايلتلك الشي الي ماريد احجي بي مااحجي بس ماطلع بي سالفه جذب
- زين جا كليلي هذيج السالفه شني تفسيرهه
- شوف هو عنده قاعده اذيتني اذيك ماتقبل نقاش
وانته بوكتهه اذيتني فحصلت نصيبك من الاذى بس اني اعرف لو اعوفك هيج وياه يخبلك ويكرهك عيشتك فادخلت بأني اني اذيك وهو راح يبتعد ويكف عنك باعتبار اني اخذت حقي بايدي
وطلبت منه ان مايتدخل بيك بعد لاني راح اتصرف وياك .. فجرحت ايدك هيج بشي بسيط بس حتى بهالاذى تخلص منه وفعلاً هو تركك
بعد واني خليتك تنام وداويته وجان الطين بس حتى يمحي الاثر للجرح لان هو بالطين يختفي وهو جان هيج جرح بسيط كلش
- هااااااا يعني انه موش متوهم !! كلشي كلته صحيح بوكتهه
- اي صحيح
- اهااااااا زين زين عمي انه مااندك بيج بعد
- ههههه لااا انته في حصن حصين لا تخاف
- صدك تذكرت جا من اخر مشكله بينه شو ما صار شي !!! يعني احنه نحبسنه سوه بس لا انه صارلي شي ولا انتي حسيت عليج تحاجين احد منهم او اي شي من هاذ؟؟؟
- لاني جنت نبهه واعرفك اتفادى وجودهم بوجودك .. وشغلتك صارت لسببين .. الاول اني ماخليت فكري بيك وباذيتك والثاني اني جنت مانعته من اي اذى عليك من قبل
- هااااا حلوووو وعليش بله منعتي !
- كونك ابن عمي وتحبني متريد اذايه من صدك
فشلون اخليك بأذى كلبي ماينطيني
- زين ربى انه بالي شي ملاحظه عليج اريدن تكليلي شني السبب
-اي شنو
- كبل جنتي كئيبه مو بس وياي يعني حته ويه اهلج ومبتعده من الكل حياتج كلهه كتب ورسم والشيخ بس هسه انتي غير شكل فرايحيه دايماً
وتكعدين ويه الكل وحته تعاملج واسلوب حجيج تغير !!! شني سبب هالتغيير ؟؟؟
- ههه يعني انتو تلوموني على كأبتي ووحدتي لان ماعايشين الي اعيشه .. انتو وجع راس متتحملو
شلون اذا عندكم الي عندي !!! شهاب تره انته دتعرف بس الي اني احجيه الك بس خلي بالك اني
صارلي ٢٤ سنه اني عايشه وياهم شفت العجايب
لو اكعد احجيلك بعد اسبوع مانخلص ...
وحدتي جانت لاني صراحه ماتحمل تفاهه هالعالم
يعني بعد الي شفته من كوارث ماتحمل اعاشر ناس تافهين وكل همهم يمضون يومهم ويروحون ينامون ماكدرت لان الي حوالينه اكبر من هالعيشه والروتين .. فاختاريت وحدتي وعالمي الخاص لان ماكدر اتأقلم وياهم واتصرف كأن شي لم يكن
يعني شلون اذا اني اشوف هلكد ناس ميته وفلان من الناس بمرض وفلان ينازع بوحدته وفلان السحر ماكل احشائه شلون بعد اكدر اجي واكعد واضحك واسولف بتفاهه وادير ظهري لكل هذا !!
- وشلون جا كدرتي تحملين هالعيشه !!
- تحملتهه لانهه مسؤوليتي وتعودت عليهه وربك ينطي لكل واحد مقدار حمله .. جان تعبي منهه يصير بالمرض وكت الي انهار بمرضي قبل
فاني جنت منهاره من تعب روحي اكثر منا هو جسدي فتشوفني مابيه حيل احاجي احد واكضيهه نوم بدل اليوم يومين و٣ حتى ارتاح للاخير وارجع اكمل مسيرتي
- وهسه جا شني التغير ؟؟؟
- وجودك وياي .. اني من جنت احلم بجيتك سنين
مو بس لخاطر هذاك اليوم الي صار واحتاجيتك بي لااا اني جنت اريدك تشاركني كل هذا كلتك قبل اني ردتك تشوف ربى الي مايعرفهه بس ربها
صح اني ويه الشيخ جنت قريبه منه بس هو مو الي مو تابع الي .. يحاول يسعدني بكل شي يكدر عليه ويسندني دائماً بس لاتنسى هو اله عائلته وديوان وعشيره بركبته ماكدر دائما اجي اشكيله
كل شي يصير وياي واحساسي وكلشي يخطر بالي
اني احاجي بس بالشغلات الي تصعب عليه
- وانه عوضتج عنه !
- انته عوضتني عن الدنيا باكملهه حبيبي
- شني الي سواه وجودي الج
- خلاني احب الحياه والي هدف ثاني بيهه وهو اكون عائله وياك .. صرت اعزل الامور الثانيه عن حياتي وياك كلهه بجهه وانته وحبك وتفكيري بسعادتك بجهه .. اني اطمئنيت من دخلت حياتي
وصار عندي دافع اكملهه حتى اشوف عيونك واضل اسمع سوالفك
- لهدرجه تحبيني !!
- واكثر بعد اكثر من كل حد تتخيله .. انته صرت المرسى الي كل هموم وتعب الدنيا بشوفتك احسهه بسيييطه كلش وحتى من اشاركك بشي متعبني ماحس بي بعد يتعبني مادري شنو السحر الي بيك
وهيج تنسيني كل شي رغم انته لو تشوفه ماتتحمله
- مامش سحر يارويحتي هاذ الحب كلشي يهون
اسأليني انه ياما تهت جدام عينج وضيعت حته حجايتي موش جنت اكلج انه وياج ابرد واهدء ومايكدر عله تعبي غيرج
- اي صح كله من الحب
- هاذ اكو فد واحد منا هوه عزابي بعده وبس يضحك عله العشاك فكل مايحجون ليه بالحب
يكلهم ... الحب يدح يدح ...
فهسه انه هم اكلج اهو الحب يدح يدح
- ههههههههههه ههههههههههههههههههه
- هخخخخخخخخ فضحيتنه يامعزايه
- ههههههههههااااي فضيييييع
- انزووول يالفضيعه شمااالج
- صوتك بهالكلمتين يمووت ضحك
- اي هم زين ضحكتج احبن اشوفنج هيج مرتاحه وضحكتج نابعه من كل كلبج من زمان انه جنت مصمم الا اكسرن هالثلج الي مغلفه بي روحج
- الحمدلله كدرت عليه
- شهاب انه بويه جا شعبالج اكسرنه واكسرن ابوه
- اموتن على الشهاب انه
- هههههه حلوو العميرجي بلسانج
- تذكرررت شي
- شني خير !
- مو كلتلي احجي ويه الريم ومصار مجال هذاك اليوم المهم وره العشه حاجيتهه .. جان تكلي هي والشيخ متزاعلين صار فتره ميحجون
- هااااي شني علييش!!!
- تكول ما يهتملهه ولا يحاجيهه والليل كله كاعد وحده وعايفهه وتكول هو يحب مرته هذيج اكثر مني لان عدهه ولد منه وهي الاولى ومن قبل وياه وصار يتعب منهه ومديرلهه بال
- ايييي عله عياره النسوان بدت رحمه الله
- يعني اني كلتلهه هو جان باله عليه وهيج قلق دائما واعذري منا الديوان وعائلتين بركبته لازم يتعب وانتي تحملي شويه هو يحبج بس هي ابد ماتنقتنع تكلي ماتحمل كلبي نار عليه صاير
- ههههههه هاي تغار صدكيني
- اي والله صح تغار حقهه تره مو هينه تشوف عنده زوجه ثانيه وولد وبنات وهي تضل تحس نفسهه غريبه بينهم
- جا هذيج هم حكهه تغار اشو ماسوت مثل هاي
- هاي تحبه مو مثل هذيج عادي عدهه
- هااا يعني انه لو تزوجت عليج هم هيج تسوين
- اموووتك والله ادفنك بايدي عزززا بعينك ياشهاب هم كاعد تفكر بمره ثانيه والله اسودلك عيشتك
- ههههخخخخخ بويه شجااااج تسودنتي
- والله والله اموتك واموت نفسي وراك وماخليك تتهنى انتقم بيك صدكني بس اشوفك تفكر هيج لو مجرد تفكير بمره غيري والله تندم على عمرك
- شماااااالي تسودنت افكر بغيرج بويه هوه انه عيني تشوفن امي حته تشوفن مره غيرج تهدي حبيبه شمالج اتشاقه وياج شجاااج غديتي ثور هايج
- هسه اني ثور !!!!
- تشبيهه هيج بويه اسحب كلاااامي كله بس اكعدي واهدي اهدي شيخلصني انه بعد
- شهااااب باوع بكلشي تلكاني هادئه وياك وعلى مرامك الا بسوالف البنات هنا تكوم متعرفني شنو
- يااااابويه هيج غيرتج حاركه
- تحركك وعشيرتك هم
- هااا نفس العشيره احنه حبيبه
- اي زين اصلاً اني مرتاحه من هالناحيه
- هاا عليش
- لان اعرف شعندك ماعندك قبل وحياتك وكلشي
ههههه
- انتي علومجيه جنج زهره
- هههههه كل البنات هيج لاعبالك ... هسه كلي شنسوي بسالفتهم
- اييييي سالفتهم ......... عايني باجر جيبيهه لبيتنه
ونسويلنه كعده
- لاااا شنو موخوش حل هذا لان الشيخ اصلا يستحي مايحجي بهيج مواضيع كدامنه وكلساع واحد يجي لا لا
- زين اجتني فكره ... انه اخذ الشيخ وانتي اخذي الريم ونروح للنبكه هناك نلتكي وانه اضبطهه
-شلون تضبطهه فهمني
- انه اخلي يراضيهه بلايه مايحاجيهه ماعليج ادبرنهه انتي عليج بس تجين انتي وياهه وجنكم ماتدرون بينه زين !
- اييي ماااشي زين شوكت الصبح العصر
- انه يمتى مااشوفنه عنده مجال اخابرج واكلج
- اوووووكي
- كومي خلي نفوت نام تاخر الوكت
- اييي هسه امي ادور عليه اكيد راح احصلي رزاله معدله
- عليش بويه ترزلج !!
- مو هي تكلي لاتضلين لازكه بي كافي خليج بعيده وعزيزه
- هههههه والله عليهه سوالف ماتدري انه لو ماشوفنج انجن
- والله اني هم بالكوه تحملت هالايام هواي تعودت عليك يمي
- جاا مدامهه هيج ماتجين هالليله نعوض
- لااا شهاب شلون مو موجودين
- اييييي نسيت وليد هم موجود شلون سالفه نعلى عليهم حسبي حسابج تعوضيني مامشيهه هيج تره
شني كلشي مافهمت اليوم منج
- ههههههههه لعد منو صارله ساعتين وياك يسولف
- موش بالسوالف حبيبه بعد احنه تطورنا نريد فعل
- عيييب كافي لا يسمعنه احد
- ههههههههخخخخخ جا وما يسمعون مريتي حده اليحجي
- هههه احبك
- جيبي بوسه جا مدامج تحبيني
- لك منا لا يجي احد
تكربت وبسوت خدهه وطرف شفتهه وغمزتلهه وهيه اتضرب بجتفي عاد اخذتهه وطبينه جوه
جانو كلهم نايمين ومطفين الاضويه راحت صعدت فوك وانه طبيت لحجرتي لكيت وليد كاعد وكاض تلفونه ويتبسم ...
- هاااا شني ما شني
- خير خيييير
- تراضيتو
- اييي ردتلي روحي والله هالبنيه بكلمه منهه تاخذني للجنه وبكلمه ترجعني للنار
- اي زين يعني فادت الرزاله بيهه
- عشت والله رزالتك هاي رجعتلياهه احسن من قبل
- انته هم لاتضل منطيهه مجال تره صاحبه لسان هاي اختي واعرفنهه لاتنطيهه عين ازيد من اللازم
- لااا بعد راح اعرف شلون اتصرف وياهه بس اني جنت مخليهه على راحتهه لان
- اعرفن علمودي افتهمك بس منا وهيج غير طبعك وياهه صير بين اللين والكوه فهمتني
- اي خيي اي
رحت تمددت وعفته يراسل ..
ثاني يوم كعدنا لكينه جدتي مخليتهم يمدون سفره للريوك حته نلتم كلنه ونتريك بوكت واحد ..
كعدنه اكلنه والحلو بوليد من كاعدين اهلنه ابد مايرفع عينه مدنج وياكل ...
كملنه اكل واخذته ومشينه للهور ولوكت الغدا يلا ردينه تغدينا وهوه سلم ومشى لاهله ...
رحت لديوان الشيخ وضليت انتظر الساعه الي يفرغ بيهه من الوادم .. شفت السالفه ماتفض هيج
عاد رحت ليه ... كعدت بسده وشاورته ..
- شيخنه يمتى تفرغ عندي سالفتين وياك
- خير ان شاء الله
- خير خير لجن لو تعجل شويه
- زين اكعد هالساع يمشون الجماعه
كعدت ووره ساعه راحو الوادم ورحت كلتله لو نتمشى شويه كال اي انه تكسرت من الكعده
واول ما طلعنه انه خابرت ربى وكلتلهه وتالي مشيت ويه الشيخ ...
كالي..
- ها شني سالفتك احجيلي
- شيخنه ولو تدخلن مني لجن ماهجسك مرتاح
كلت اشوفن شمالك شني الي تاعبك اشو ربى وردت لينه بسلامه والسلف اموره طيبه
- ايييه اييه جا شني والكلب موش متعوب !
- انه هم ظنيت هوه تاعبك لجن كلت اسمع منك
- جثير الي بيه يا شهاب جثير
- سولف ياشيخ احنه سرنا واحد
- نوبات مانكدر نسيطر بكل شي .. هالدنيا كلمن يريد من صوب ومحداً يعذر والجتف زاد عليه الحمل وسناد الظهر مال .. مااال وماتحمل ثكلي عليه
- ياشيخ جايز هالحجار الي عليك مايشوفنه هذاك الجدامك وانته جايز ماتشوفن شني عليه مثلك
لازم نعذر شني مانشوفه
- عمك يعذر لجن غيره مايردون العذر
وصلنه النبكه وهوه ضل يعاين للماي وحاط ايده وره ظهره وصافن .. شويه وعاينت ربى اجتي تمشى ويه الريم ... اثنينهن يضون ياسبحان الله
وصلن كريب منه وكلتله ..
- شمسك ياشيخ كربت
اندار وعاين ليه وانه اشرتله عليهن .. عاينلهن وتبسم .. كربن يمنه وكالن ..
- السلام عليكم
- عليييكم السلام
- شلونك شيخي
-الحمدلله ..شجابجن هنايه
- اني ضايجه كلت خلي اتمشى واشم هوا قبل مانرجع لبيتنه ورحت مريت ع الريم هم ماشبعت بشوفتهه انتو شعجب اليوم هنا !
- عدنه فرد سالفه نحجي بيهه
- هاا اي حلو
عاينتلي ربى وترفع بحواجبهه بمعنى يلا ..
والشيخ صاد وجهه من الريم وهيه مبوزه عاد كلتله ...
- ياشيخ هالدنيا تغرب سريع
- كل ايامنه كضت ليل
- اييه .. اجلبنك ياليلي اثنعش تجليبه
اجلبنك ياليلي والدمع يهمل
اله رنه وطجيج يجفل المجبل
زرع غيري حصد ومصوفر السنبل
وانه رويطه وحندكوك اليوم ترتيبه ..
شتكولن شيخنه
- اجلبنك ياليلي والي بينك وبيني
يمين الجان غمضت للصبح عيني
ولك حشم ولك صيح اليعاديني
ولك لا للهوى اخذ كلبي وجيبه
- اجلبنك ياليلي والدمع حمال
بيه يخيف من الهدير ونازل من جبال
عليه احرب زماني بجيش سبع ارتال
مدجج بالسلاح وعالي تدريبه
- اجلبنك ياليلي ومن تطول افرح
لني بيك انوح وبالنهار اسرح
كالو بالفتح اكرا والم نشرح
بلجن كلبك الله يزيل تعذيبه
اجلبنك ياليلي وعود كمت اكرا
باول بسمله وخنكتني العبره
شلون الهج بغيره وناره موجره
بكلبي وصوبن جبدي نشاشيله
جان يعاين للريم ويحجي .. تالي عاينلي كلت..
- اجلبنك ياليلي والدمع يهمل
والحجل بالساك لا يصعد ولا ينزل
عليه احرب زماني بدمع مايبطل
حربه وياي حرب مطير وعتيبه
- اجلبنك ياليلي سااااعه سااعه
وبالع جن رضيع وماله رضاعه
ياليلي الليله ليله كون وداعه
تجيني الكلبي انشلعن جلاليبه
كبل ربى كالت ...
- لااااا اسم الله عليك شيخنه شنو السالفه
- هههه جا تخافين علي من الموت موش احنه كلساعه نموت ومامش من يحيي
- خسرااان الي يموت ضحكتك شيخي
- رابحين بظلي دايمين وعزيزين
عاين للريم وهيه دارت وجهه رد عاينلي جان كلتله
- شيخنه دامهه جمعتنه حلوه هالليله خلنه نتعشى سويه اليوم عله هالماي والكمره
- لااا خلني امشي اشوفن الديوان تاخرت
- لاا شيخنه خلنه نتعشى هالنوبه سويه مانتاخر
شغله ساعه بالزايد انتو خلكم هنايه وانه وربى نجيب الاكل ونجي ليكم
- اي شيخي خلي نكعد هالمره سوه صار هواي ممنجمعين الله يخليك
- يلا زين جا تعجلو لا تبطون
- لا شغله ربع ساعه ونجي
هوه عاينلي وضحك اخذت ربى ومشينه .. ضحكت جان تكلي ...
- منين جبت هالشعر شو كله حزين
- هاذ من زمان جان ابوي والشيخ من يكعدون بلمه كلمن ينطي اربع ابيات وانه حفظتهن وذكرته بيهن هسه
— هااا اجني بوكتهن والله
- اكلج هسه احنه شنجيب اكل !!!
- امممم تلحك تجيبلنه مشاوي بين مااحضر المفرش والغراض لان هسه ساعه الساعه يدزون عليه
- اييي زين جا امشي حضري ولا تخلين احد يعرف بكعدتنه زين
- اي ماشي
وصلتهه للبيت واخذت السياره وطلعت
جان اكو واحد يشوي كباب بالبدايه ... رحتله
وسوالي ماعونين مرتبات كباب وتكه وبصل وطماطه شوي ... خابرتهه وكالت محضره فواكه وطرشي والخبز واللبن والماي كلهن حضرتهن
بالختله من مرت ابوي هيه وزهره ...
اجيت ليهه واخذتهه ومشينه لكيناهم واحد يعاين للثاني ويتبسمون ... حطينه المفرش وصارن هيه والريم يحطن الاكل ... وكعدنه ناكل وربى اخذت تلفوني وكامت اخذتلنه صوره ...
جانت عين الشيخ تضحك وتلالي من يعاين للريم
وهيه ادنج خجلانه
وربى تعاينلي وتضحك فرحانه بيهم ...
كملنه ولمينه الغراض وهو اخذ الريم ومشو
ردينه للبيت احنه هم ...
جان يجي محمد ووجهه يبجي ..
- ها محمد خيرك
- خوويه
.
.
يتبع
# اعتذررر
للتاخير هالايام بس كلمن واله ظروفه وانتو تعذرون اعرفكم حبابين ☺️
هاي بارت راح ينسيكم الانتظار كله
احبكم 💓💓💓
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!