رواية من فجر ديسمبر الفصل التاسع والعشرون 29 - بقلم Zoka 🌷

من فجر ديسمبر
🍁
🍁
رجعنا للبيت والليل كله ضليت افكر بالي صار وبالاخص النظره الي مادري شجاني بيهه
وحاير شلون اعرفن شنهو الضامته ؟؟؟

ضليت يومين الاحكهه وين متروح واتحجج بكل شي وياهه واسويلي مشكله لحد ما بالليل شفتها
نزلت ومغطيه وجهه وراحت كبل للحمام وطلعت
صعدت ركض .. ضل بالي هاي شعدها!!!

جان اصيحها نزلت وضليت اعاين بوجهها مامش شي جا شنهو الجانت ضامته بالخاولي !!
ردت وره يومين هم نزلت هالشكل عاد انه كمت
رجت وراهه وكبل ماتفوت الحمام صحتهه عاد
هيه ضلت واكفه ومنطيتني ظهرها

- شجاي تسوين
- ماكو شي
- عليش صاده هيج انداري احاجيج
- بعدين اريد اغسل هسه
- شووو انداري
- اييي مااا وخر

درتهه عليه وجان عطت بوجهه
- هاااي شمسويه بروحج
- شكووو انته ليش تلح وياي
- شمصخمه بوجهج
- قناااع مال بشره شبيييك
- وهاي ع القناع تختلين مثل المسويتلهه مكسوره
- ياااا شبيك انته شبيك متشووف قناااع ابني شبيك
- استغفرر الله امشي غلسي لعبتي روحي
- محد كلك تعال شوفني
- خاااب امشي امشششي

طبت للحمام وانه رحت كعدت واضحك عليهه
مدري عله روحي من كثر مااشكن بسالفتهه
كمت كلشي اتخيل .. جانت حاطه قناع اسود
عله وجهه وصايره جنيه بي ..

طلعت وتعاينلي بخزره وراحت ركض صعدت وانه اضحك عله هالموقف ...

بس هم ماجزت منهه وره جم يوم جنه كاعدين انه وبسام جوه ونريد تسويلنه شاميه بالليل سهرانين
وماعدنه شي ونريد ناكل ونصيح عليهه وماترد
عاد صعدتلهه دكيت الباب مترد عاد فتحته وهيه
جانت كاعده جدام ميز المرايه راسا جفلت ونزلت
سماعاتهه ...

- شكو شبيك
- مو صار ساااعه نصييح وينج
- ماسمعتكم
- وطررم يمتى تبطلين تحطين هالسماعات صار ساعه صوتنه انبح وانتي ولا يمج
- اييي هسه شصار يعني شتريدون مو خلصت العشه والجاي بعد شكو
- انزلي سوي شاميه
- اممم
- شنيي اممم انزلي يلااا
- ايي ايي نزلت

هيه كامت جان اشوفن وصل هيج صغار ملطخه
باحمر واسود وتخوف كلت هاي اكيد جانت تسوي شي وضامته كبل جريتهه من ايدهه واشرتلهه عليهن ..
- هاااي شمفينه شني هذذذذن هااا
- شهاب تره زودتهه
- لاا تماطلين شني هذذذني هااا شني هاي سحوره لو تحضير جن لو شني
- ياااااااااا عزاااا شكد تفكيرك بعيييد ياسحوره ياجن شبييييك
- جااا شنييي هالدم مدري المصخم هاذ
- مكياااااج مكياااااج كلينس مسحت بي مكيااااج
اعيييط بعد
- هاا
- حتخبلنييي كل يوم طالعلي بشغله شبيييك وياي فهمني
- انتي سوالفج مدري شلونهه
- هييي شنووسوالفج يعني فوك مجاي متهجم لغرفتي وتطلعني ام السحوره وتجي تكلي سوالفج!
- ايييي يله عاد هسه شصار انه شمعرفني هاذ مكياج وبعدين انتي شكو تمكيجين بالليل شعندج عرووس !!
- معللليك والله حلوه هاي تعاي ليش وشكو
شعليك انته بغرفتي اني شسوي اسوي اريد اتمكيج اتصلخ اكسر اصيح معليك غررررفتي بكييفييي
- اكسسسر راسسسج
- كسسسره وخلصني يلللاا
- ربببببى لتلعبين باعصابي
- لو بس افهم شنو سالفتك وياي جان ارتاحيت
ليش تلح وياااي مادري
- تعرفين كلش زين ليش
- شنو ليش
- يمتى ماتحجيلي شني سالفتج اجوز منج
- ههههههههههههه ياااا يعني انته هذا كله عبالك
اني عندي شي وضامته وادور وراي هههههههههه والله ضحكتننني يا شهاااب افكارك
عجيبه .. وخلي اسهلهه عليك خطيه حتى لتضل متعب نفسك بملاحكتي
- اييي بله شني كولي
- هسه لو تكعدني يمك عشر سنين وعينك ماترمش مني ماتلكه شي ولو نقطه من هالبحر ... هههههه
عبالك اني بغرفتي عندي شغلات وتحضير ارواح يعني وسحوره لو شنوو بله اني شكل سحاره ؟!!
- كلشي يطلع منج
- لعد خليك بعيد مني لاا اسحرلك هووووو
- خاااب اذا هسه ماتنزلين جدامي اسكطج والعباس
يلاااا كاعد تتمضحك براسي العوبه
- اسويلك سحررررر بس تضوجني ديربالك
- انه الج يا صخمه اصبررري

اجيت اكضهه ونزلت تركض عاد انه من فشلتي
وتفكيري البعيد بيهه ضليت واكف وخربان ضحك
عله الصار هاي صار جم موقف وموقف وياهه

نزلت وكعدت يم بسام وهيه جابت الشاميه وكعدت
تاكل وتضحك كلساع وانه مطنشهه ...

وره جم يوم بدات عطله زياره الكاظم عليه السلام
اتفقنا انه وبسام نطلع مشي منايه عبن اكرب لينه تصير وكلنه ناخذ ربى ويانه تكيف اكيد ..
ومن كعدنا حجينالهه مارضت تروح فاجأتني
برد فعلها البارد لهالموضوع ولا حته فكرت ولا كالت كبل .. لا ماروح ...
انه لحيت وياهه اريدن اعرف شني السبب مارضت تكول .. عاد خابرنه عمي واجه اخذهه
ثاني يوم واحنه بالليل طلعنه للزياره ..

جان ويانه وليد وجم واحد من جماعه بسام وصارت لمه حلوه لجن الخربهه عينهم الزايغه
يمشون ويصجمون لو يشمرون حجي ويعيبون ع الرايح والجاي ماسلم منهم لا جبير ولا صغير
انه بالاول حجيت نصحت ردت مامش فايده عاد
عفتهم وصرت امشي وراهم ولحكني وليد ..

- شبيك شهاب شو كلبت خلقتك
- بويه ماتشوف هالمصاكيع هذول عبالك كاعدين بسوك هرج واحدهم صوته شعلوه وحجيه مال عفطيه يعني احنه جايين نزورنطلب الرحمه نعزي صاحب الزمان لو نكعد نصجم بنات مو حاله هاي
- هجم بيتك يالمؤمن
- شني بووويه شننني
- لا هيج ماكو شي
- لااا عليك علي شاايفني هاا
- مو قصه ششايفك بس بعد همه هذوله كل الشباب هيج وبسام وجماعته ماتعرفهم يعني بايعين ومخلصين
- عله روحهم انه ماجاي احمل ذنوب
- لا انته تدري شني سالفتك
- شني
- مضروب بوري من الحب
- ههخخ لك هسه هاي شجابهه بهاي
- اي انته كل ماتتمشكل هناك تجي تطلعهه بينه
- لاااا مامش شي
- صدك انته ماحاجيلي شصار مصار مو عايشين سوه ماتزحزت الحجاره البينكم شويه
- كفيلك العباس تكبر ماتصغر
- هاااي شنو
- بويه انه هالبت ماعرفن طينتهه شني لا كلب اليرف ولا عين التلتفت ولا السان الينطك بالطيب
ماعرفنهه شني منين ماجيهه تطلعلي من درب جديد وهاي كاضيهه مثل البزون والفار بس نتناكر
- والله اني اشوف لو تعوفهه وتشيلهه من بالك هواي احسن
- عليش
- لان الظاهر هاي اتعبك واذا تضل هيج تسلك
وماتحصل نتيجه منها فشوف حياتك احسن
على شنو ضال وياهه وهي بس تتعزز عليك عوفهه شنو قحط بنات
- نفسي ماتهوى غيرهه شبيك ماتفهم
- والله ذبحتنه نفسي ونفسي هسه اليسمعك حابلك حوريه
- ترحلها فدوه الحوريه شني يجن بحلاتهه
- هيج حلوه؟
- حِسن رباني اكله
- ااااه يعني تسوه التعب وهالصبر هذا
- جااا شني غير تستاهل روحي لو انهه تطلب
- عمي بخيته هالشمسه مالتكم منين ماتلوف تجيهه عدله
- خمسه بعيونك
- هههههه مانحسد والحمزه

ضلينه نحجي ونوكف كلساع يم موكب ناكل ونرد نكمل مشينه لحد ماوصلنا زرنا بالدفرات وطلعنه
والجماعه كلهم اجوي باتو بالبيت عبن فارغ
وكلنه نمنه من السبعه الصبح لحد العصريه يلا
كعدنا وكلمن مشه لبيته ...

وثاني يوم رحنا للعماره .. جنت ماخذ ملابس لمحمد والبنات وحيل جنت مشتاك لزهره وكضيته كله وياهه وكعدت تحجيلي عله كل امور السلف
عبن زهره تلم الاخبار من كل بيت لليوم انه ماعرفت منهو اليحجيلهه لجن كلشي الكه عدهه
ماتنضم سالفه عليهه لا وحك علي ...

جانت تكلي صايره جم عركه بين نسوان الشيخ
من يتلاكن بالزرع دائماً يتعاركن عاد الشيخ
زعلان عليهن اثنيهن بذاك اليوم وضالات اسبوع يراضن بي ومايرضى وشارط عليهن الا يتصافن بذاك الوكت يحاجيهن وهنه ضالات شهر يحاولن يتفاهمن ويتصالحن لحد ما عمتنه الجبيره جامعتهن
ومخليتهن يتحاضنن ويتباوسن ويروحن ينزلن يبوسن ايد الشيخ ويتعذرن يلا رجع يحاجيهن

بهالروحه الشيخ دز علي وانطاني نص الفلوس الي داينتهن ليه وكت مابنى بيته .. عاد اخذتهن وثاني
يوم ردينه لبغداد .. كعدت حسبت الي عندي ويه هذني وجان يسولهن بس ٤ ملايين مايكفن للمختبر
وانه بزعت روحي من الصبر عليه جان انه هسه
كاعد اجهز الغراض مالته ..

عاد شاركت بسلفه ويه المدرسات بمدرسه الي اداوم بيهه مرت عمي حاتم .. وكمت كل ماروح
انطيهه الفلوس ولنهايه السنه يلا يطلع اسمي
وانه ضال اشتغل بهالمحل شغلته مريحه والولد
مكيف علي جيف امين عله فليساته وبضاعته
وصرنا خوش صحبه كعدتنا واكلنه وطلعتنه سوه

جنت كلما اكول هاي كضيت شي عليهه وراح اصل طرف الخيط وياهه تطلع السالفه عوجه
وصدكت من كالت ماتلكى شي علي .. عبنهه
مضبطه امورهه زين ..

صارت امتحانات اخير السنه وانه كفيت عنهه حته تلتهي بدراستهه وهيه زينه شاطره والهه واهس بالدراسه هاي جيف من هوايتهه .. مرات تستصعب الانكليزي واساعدهه بي ومشيه امورهه

جان بواحد من الامتحانات لازم ارجعهه انه
فضليت انتظرهه بالكليه بين ماتخلص امتحانهه
وجنت اشوفن اشكااال البنات لجن ابد مالفتت نظري وحده بيهن كلهن اهجسهن سراب جدامي
وهيه وحدهه حكيكه .. جان كلبي وياهه وهيه بامتحانهه واهجس الوكت يزيد ماينكص ولحد
ماشفتهه طلعت واجتي ليه يلا بطلت دعاء ليهه
شفتهه تنافخ وتمشي هيه وكعبهه رحت ليهه ..

- شبيهه بنيتي ضايجه شني ممجاوبه !!
- لاا جاوبت
- جا شمالج مبوزه
- عله هاي ام جنطه
- خخخخخ ياهيه
- هاي وحده مايعه وشايفه نفسهه بيتهم بزيونه لو كالبتهه للدينا تكول كاعده بامريكا مو بزيونه
هسه طلعت من الامتحان وواكفين اني ومنى
دنحجي بالماده وهي جان تجي وتوكف ورانه
فااني مستعجله اريد اطلعلك وطخيت بيهه جان
تكوم تتمضيك و اوي شبيج متشوفين خربتي جنطتي .. كلتلهه شدعواج هي جنطه واني بس طخيتج شنو انكلبت الدنيا .. تكلي بنتي انتي شمعرفج بالماركات هاي جنطه برادا مو من هذني المخلكنات مالتجن .. عاد اني كلتلهه ..
اني مااصير دنيئه مثلج واقيسلج نفسي بماركه وممكن تكون مقلده اخليج انتي واخلاقج المخلكنه مثلج وعفتهه ومشيت ..
- هههههههههههه  والله زين ماسويتي بيهه
- خلي تولي جذابه تكلي برادا مو هي هيج حضرتهه تشتري كله بالورق  اكبر جذابات هذني اعرفهن بس فيكه ونفخه لافهم ولا علم حتى اخلاق ماكو عود كاعد تريد تفيك عليه ماتدري الفلوس الي عندي تغطي طولهه
- ههخخخخخخ بويه تروح فدوه للتراب التدوسينه
لا تضوجين يرويحتي
- افففف اكرررره هالنماذج هااي اكرررهم
يعني شكو تتبختر وهالنرجسيه شلهه داعي
ياريت عاد لو عدهه صفه وحده زينه شو حتى جمالهه كله مكياج ايد زركه ووجه ابيض هاي
تتكبر بحمرتهه الطوخ يعني
- هوه الانسان الداخله فارغ يضل يملي نفسه بالمظاهر حته يغطي عز النقص الي بي
- اي والله صحيح
- تعاي كليلي منيلج هلكد فلوس هاا
- شنو منيلي
- اي مو تكلين عندي فلوس تغطي طولهه منيلج
- هههههههه عندي والله
- شكد عليج علي
- عندي حساب بالبنك
- صخااااام الصخمج كووون من يمتى !!!
- من زمان الشيخ وابويه سوو الي لان جان عندي
كم مليون وانطيتهن لابويه يضمهم الي بس هو كالي ينصرفن هيج واتفق ويه الشيخ وسولي حساب وضمهن الي هناك وجنت اجمع لان هذيج
السنين لان اذا اطلع ابويه يصرف فالي عندي اجمعهن وانطيهم يخلوهن وياهن وضل الدفتر
يم الشيخ كالي هاي سند لمستقبلج من يجي وكته
انطيه الج
- والله عمي انتي من هذول اليجوون للدنيا وبحلكهم خاشوكه ذهب
- تره جمعتهن بتعب
- تعبيش بله
- يعني اتلوكلهم شويه هذا مو تعب
- ههخخخخخخ جاا ماتلوك انه هم بلكي عاد احصلي جم فلس من هالتعب اللواكي
- ههههههه ماكو هاي حصراً للشمسه
- بركاتج ست شمسه
- متبارك ابني متبارك
- هخخخخخخ يعني حساب بالبنك وكاع وفلوس ع الجاري بعدهن واثنين حاطيلج يداروج ويحموج
وكل هاي وبعدج هالكد كدج جا من تكبرين شسوين
- عشره بعيونك يمه قل اعوذ برب الفلق قل اعوذ برب الناااس شعندك حاط عينك عليه
- بويه عيون المحب ماتحسد عليش هالمعوذات
- كلشي يصير
- شيصير يعني اطير كاعج لو تنباك فلوسج
- شهاااب كافي لنخليني اندم لان حجيتلك
- بله جم واحد يعرف
- امي وابويه والشيخ وهسه انته
- هاااا زين تسوون لو يدري بسام بيهن جان
فلسج وعلي
- اييي على صاحباته
- كاتلاتج صاحباته
- يضحكن عليه
- لاا هوه اليضحك عليهن لتخافين عله اخوج ماينغلب ملعب
- اممممم
- ما جعتي
- لاا بس اريد شي حلو اكله
- شي مثل شني
- هيج كيييك بالككو وبااارد ووياه عصير كوكتيل اي اهم شي كوكتيل حتى اجمع كل النكهات لان هسه عقلي مديعرف يقرر ياطعم يريد فكلهن احسن
- ههههههههههههااااااااايييي بويه انه همزين ماتزوجتج هسه جان كعدت ع الحديد واضل احلم بمختبري
- معايزه على فلوسك .. هسسسه يلاااا
- شنييي شبيج
- خلي نمشي نشتري هذني
- رادلهن مطعم هذني
- اي يلاا بعد احسن
- ورايه شغل ربى
- اعزمك اعزمك بس امشي الله عليييييك
- هههههه انتي ساعه الساعه تسودنين
- اني انكلبت شهيتي بالاكل ملييون درجه وصار
الاكل يتحكم بعقلي فلا تتفاجىء زين
-  زين عمي زييين
- هسه نروووح
- نروح بس بشرط
- شنووو ياشرط شهاب داكلك عليه اني اريد اعزمك بس امشي
- ماكو هيج انه مو عله الفلوس ماتهمني
- لعد شنو
- هناك اسالج وتجاوبيني الي اريده واجيبلج بدال الكيكه نوعين وحده فروله ووحده ككو ونضل كاعدين شكد متريدين هااا شكلتي
- واحد خبييييث انته شكو هالشروط متجيبلي هيج لو اله تستفاد يلا
- هاي بعد انه عايف شغلي ومسموط بهالشمس منرالصبح وكاعد انتظرج وهسه حطلعج مطعم وكلشي ماحصل ميصير هيج
- افففف والله لو ما هالككو كاعد يدك براسي
وريحه العصير بخشمي دتجي مدري منين فلا اكلك اي
- هههههههه يعني هسه اي
- اي بس يحقلي سؤالين مااجاوبهن
- اي يله ماشي
- يلاا هسه نرووووووح
- اي نروح

كلت هاي فرصه ماتتعوض مدام عرفت نقطه ضعفهه صايره بالاكل والحلويات بالاخص بعد
اضل استغلهه ...

وطلعنه لمطعم بس حلويات وحلو بارد وهادىء
جانت ادور بالمنيو وتكلي ...
- شو هاي كلهه ككو هسه اني شختار
- شوفي بطنج وين ادليج واختاري
- عوفني خلي اتخيل
- شتتخيلين ولج
- اتخيلهن طيبات لا راح يعجبن ذوقي الككوي
- وشنهو ذوقج الككوي بلا زحمه
- هيج كون يذوب بالحلك بسرعه وحلاته وسط وبي شويه طعم مر او من هذا البندق اممممم
- ربببببى
- هاا
- ديري بالج علي شويه
- بشنو
- لتضلين تاممين جدامي هيج
- ههههههه كولهه وسم كوولهه
- لاا يحضي هاي السم بيه يصير بهيج صوت
- امم
- هسه هاي بيهه وسم ،، يلا عاد فضيهه

ضلت تكلب منا ومنا لحد ماختارت وانه ضفتلهه وياهن الفروله مثل ماوعدتهه وكعدت افكر بالاسئله الي تفيديني بين ماجابوهن ..

بس راح النادل نزلت ربى عله العصير وعله حركه شفايفهه انه انسطرت كمت ماعاين لشي
غيرهن لحد ما حسيت عله ضربتهه عله رجلي
- هاااي شبييييج
- شكو صافن هاا
- والثووول دمرتي بنطروني
- تستاهل
- شو طالعه عينج انتي
- اني لو انته
- كافي يلاااا اكلي اكلي
- اممم

صرنا ناكل وانه افكر شسألهه عاد استغليت فرصه
اكلهه وكلتلهه ...
- ربى تأمنين بيه ؟
- اي
- شكد يعني اوصفيلي بشي
- يعني بالحد الي حجيتلك بي على فلوسي وطلعت وياك وارتاح بلبسي كدامك وشاركتك اكلي
- هسه الاكل شعلي هنا
- لا شلون هو الاهم عيني .. يعني هسه اني مااكل ويه ياهو الجان ولا اكعد اطلب من اي واحد يعني انته امن بيك على بطني
- هههههههههه عمي والله وكت كبل جنت اتوسل بيج تاكلين هسه صايره كله بطني وبطني جا ماتسمنين
- هسه بالعطله عود اسمن
- ايي من دبش ،،،، زين مدامج تامنين بيه عليش ماتحجيلي شسالفتج
- ماعندي سالفه
- ها احسبن هاذ سوال الاول الي ماتجاوبي
- اي
- زين زين .. انه شايف بحجرتج جنتي تعلكين رسمات وجوه كل وحده منهن علامه اكس وتاريخ شني هذني ؟؟
- اممممم شجابك عليهن
- هاي بعد صارت
- هذني تواريخ كل يوم رسمتهن بي والاكس هاي
يعني خلصت
- بس هنه كلهن خلصانات وكامل رسمهن
بس اكو بيهن اكس وبيهن لاااا
- اي هاي اكو شغلات بالي اريد اضيفهن عليهن فمااشرهن
- لتجذبين
- مو كتلك خلصن بعد شكو
- زين يلا اجي وياج .. عليش ترسمين الوادم المجرحه ومدري شني
- مرات من الانفجارت الي تصير تضل بالي واحب اعبر عنهه برسمه
- هااا والله انه مادري ليش هيج گلبي حاسني السالفه بيهه انه بس حمشيهه
- اي بكيفك اني الي عليه داجاوبك
- عليش مارحتي ويانه للزياره هذاك اليوم
- ماحب الهوسه
- اكيد لو اكو شي ثاني
- اي ماحب الهوسه وهناك راح اختنك جوه ادري بنفسي فعليمن رايحه
- جوواب مقنع هالمره
- امم
- هذيج المره كلتيلي اذا تختارني تتعب وتتاذى واذا تختار غيري ترتاح يعني بما معناه هيج
- اي اذكرت
- اي شنهو التعب الي بيج فهميني .. يعني انتي بنت عمي وتعرفيني واعرفنج واهلنه متفاهمين
واثنينه ولد عز مايصيرلج كصور بشي من حياتج
وهاي جاي تشوفين شلون مداريج ووياج بالي تريدي وانه اكربلج من اخوتج وابوج بعد شني الخلل فهميني
- اني الخلل
- شني
- اي اني الخلل .. كلشي بمحيطنا ملائم بس اني لا
تعبك وياي اني مو بالاشياء الثانويه
- هوه انه اريدن افهم بشني تتعبيني كليلي انه اريدن اريح فكري بيج
- مادري شكلك
- ربى اذا تعزيني ولو بمكدار ذره جاوبيني تره انه لساعني عله صبري وياج مااستاهل منج ولو جواب يخليني افهم ليش ترفضين ؟؟؟
- لا انته رجال شهم وطيب تستاهل كلشي بس هنا
شهاب يعني هنا بالذات اني ماحب احجي
- ربى
-  شهاب اذا حجيت تتحمل الي تسمعه والك القرار
- انه حاس بالي تردين تكولي فاحجي
- يعني اني انتظر شخص
- ابو نجمه !
- اي
- منهو هاذ ! منين تعرفي !
- مااعرفه ولا شايفته
- جا شلون تنتظري
- احساسي يكلي راح يجي واني اثق باحساسي
- هااا ومن يمتى اجاج هالاحساس
- من زمان
- وشنهو الصفات الشايلهه وهيج حارمه روحج من كلشي لاجل عينه
- هو الشخص الي احتاجه وهذا يكفي
- واذا اجه شنهي انه اخليج ترحيله!!!
- شهاب
- اكطعي نفسج من هالسالفه ضلي لا تصيرين الي بس متصيرين لغيري
- ارجوك شهاب كافي
- امشي خلي نطلع يلا ورايه شغل
- مايصير هيج يعني كاعدين نحجي بتفاهم شكو. تضوج
- من تعيشين الي يعيشه كلبي تفهمين ليش اضوج
- شهاب اسفه بس
- كتلج امشششي شني متسمعين يلاا كومي

كمت وكفت وانه جاي اطلع فلوس هيه مدتلي
خمسه وعشرين عاد جضيت بيهه ..
- ضمي فلوسج بجيبج وامشي جدامي يلا
- تره اني الي عزمتك
- وانه ماتصرف علي مره

رحت دفعت الفلوس وطلعنه اخذت تكسي ووصلتهه للبيت وخابرت بسام حته يجي يضل يمهه وكعدت انتظره لحد مااجه وانه طلعت رحت للمحل ... وضليت اليوم كله كالب خلقتي عبن اعرفن بيهه لو شما اسوي ليهه تضل ماتشوف غير هذاك الملعون الي مدري من اجه بالهه ومسميته
وترسم ليه وتفكر وتحلم بي وانه الكضيت اربع سنين من عمري انتظر منهه النظره مو الجلمه وماحصلتهن اشكال سويت ليهه وتحملت لاجل عينهه ومافكرت ولا حتفكر بيه وانه الضال ذابح روحي عليهه واتصيد وياهه الفرص للحجايه ..
شعور يذبح حبك من طرف واحد يعني بي انه جازم عله نفسي بالموت بيهه وماارضى احيلن عنهه بايدي اجرم بنفسي ويحلى بعيني حبهه ..

ومثل كل مره ادفن كلشي بداخلي وارجع طبيعي وياهه ولا جن صاير شي جيف اعرف مايفيد العتب ولا الحجي ويه واحد مايحس بالي بيك

وخلصت الامتحانات .. وانه اتفقت ويه صاحب المحل بالعطله هاي اترك الشغل واجي وكت الدوام وخليت بدالي صاحب وليد ولين هوه صار صاحبي
قبل بهالشي ... ورحنه لمينه غراضنه وتسوكنه جم شغله لاهلنه وطلعنه  للعماره ....

ورديت عنهه بعيد واهجس فاكدلي شي ..
فاكد شوفتهه كل ساع وصوتهه وضحكهه فاكد عركاتنه الماتخلص وطلباتهه العجيبه عله غفله

بهالاشهر جان نازل موبايل السامسونك والانترنت جان مصايرله جم شهر متوفر بين الناس هواي
فرحت اشتريتلي واحد والمشكله مجان اكو منظومه انترنت كريبه علينه بالسلف فجنت اروحن
للولايه واكعد اكنك هناك بالكهاوي لو يم صاحبي
ابو المكتبه ...

سويت حساب بالفيس وصادقت بي خوالي وولدهم
وجم واحد من جماعتي هم ووره فتره شفت وحده
دازتلي طلب صداقه شفتها مصادقه من خوالي هم
عاد رحت سألت واحد من ولد خوالي وكالي هاي
تصير بنت ابن خالي الجبير عاد وافقت عليهه
بس مابينه اي حجي ...

وصار العيد خلصناه اول يوم ذبايح وعزايم وثاني يوم رحت لخوالي اخذت وياي زهره ورحت
هناك عاد خالي الجبير عرفني عليهه .. بنيه طويله شوي وحنطاويه وملامحهه جاده ومبينه صاحبه شخصيه وقويه ...
كالي هاي تدرس طب اسنان بماليزيا ويه عمتهه ورجل عمتهه هناك عايشه وياهم وهالسنه تخرجت
ورجعت ...
عاد عرفت ليش مشايفهه هنايه عبن صارلهه سنين
بالخارج .. ماحجيت وياهه غير عله كد السلام
وعرفت اسمهه ... ناديه ...

ضلينه يمهم الليله وثاني يوم رجعنه لاهلنه ..
جنت مشتاك لربى حيل صدري مخنوك عليهه
عاد وره يومين من العيد رحتلهم بحجيه جاي عله
صاحبي ومريتلهم ...
ماشفتهه لربى ولا لمحتهه .. عاد رحت للمطبخ
شربت ماي ومرت عمي واكفه ع السنك وطب حيدر يصيح ويحجي ويه امه يدور عله دريسه
جان اطب ربى وكفت بدال امهه ع السنك وامهه
راحت ويه حيدر اجيت اطلع عبنهه حته مااحترمت وسلمت جان حسيت عله ايدهه .. كضت اصبعي
الخنصر وتعاينلي بتعب وعيونهه ذبلانه وجواهن سواد كالتلي والصوت مخنوك ..
- اريد اطلع شهاب ارجوك

نسيت بساعتهه كلشي وروحي لابت عله تعبهه وحزنهه هاذ عاد كبل كلتلهه ..
- امشي البسي وانه هسه اكول لاهلج
- ماشي

راحت صعدت وانه رحت لعمي كلتله ..
- عمي من رخصتك اريدن اخذ ربى زهره متعاركه ويه الجماعه هناك وكالبتهه مناحه
هسه محمد خابرني يكلي جيبلهه ربى خلي بلكي تتلهى وياهه شويه
- اي اي اخذهه انه هم اشوفن ربى مالهه خلك وضايجه بلكن تتغير نفسيتهه ويه زهره هنه خوش متراهمات
- اي ان شاء الله يخفن علينه عاد هواي يتدللن
- ههههههه شعدنه غير هالبنيات اثنينهن ينحطن بلبه الكلب
- اي والله صدكت

شفت ربى اجتي ولابسه جبتهه وبس ذابه الشال عله راسهه تفاجأت يعني هيه موش تريد تطلع
غير تلبس شي مال طلعه !!! شو هاي جنهه رايحه للخبازه !!

ترخصت من عمي وطلعنه وانه جنت جاي بسيارتنه فصعدنا عاد كلتلهه ..
- وين تردين ترحين
- مكان فارغ
- هاا زين تدللين
- شكرا

ماحاجيتهه شي عبن مبين من شكلهه مو مال حجي
ابد .. اخذتهه لبستان بعيد عن سلفنه صاير بدايه
الشارع الي يودي لاهلنه كلت حته تاخذ راحتهه
جان هالبستان صاير ع الشارع وكله نخل عاد
نزلت وكالتلي ..

- اريد اكعد وحدي
- اخذي راحتج انه واكف هنايه
- ماشي

مشت شافتلهه مكان وكعدت وانه شفت واحد من الزلام رحتله وترخصت منه .. كتله حرمتي تعبانه نفسيتهه ورادت تشم هوا شويه ارخصلنه هالساعه بكاعكم عاد هوه ماكصر خطيه كال كل الهلا بيكم
وراح جابلنه دولكه ماي كلت اروح اوديلهه
جان وصلت يمهه واسمعتهه تبجي وهيه كاعده نفس كعدتهه مال الحمام كبل .. هيج تكرفص عله روحهه .. عاد دنجت ليمهه ورفعت ايدهه من وجهه وشفت وجهه احمر من البجي ..

- ربى شبيج شنهو الصاير وياج فهميني ليش هالشكل تعبانه منهو وياج احد مسمعج حجايه
امج مضوجتج شبيج احجي لا توكفين كلبي
- اريد اناااام
- تنامين !!!!
- اي
- بسج بجي خل افهم شسالفتج شنهو تنامين
- شهاب هاي اليوم العاشر راح يصير واني منايمه بس ساعه لو ساعتين بالازيد تعباااانه والله راسي يوجعني وعيوني توجعني اريد انااام تعبت والله تعبت
- اسم الله عليج شجاج هيج بنيتي شنهو اليصيرلج وماتكدرين تنامين
- مادري ماادري كلشي ماادري والله ماادري بس اريد اناام فدوا والله تعبت
- شلون سالفه هاي النوب شجاج غير افتهم
- عفيه سوي شي الله يخليك
- بسج يارويحتي مو زرفتي لكلبي كافي تبجين
كومي وياي كومي
- وين
- مو تريدين تنامين
- اي
- اي يلا كومي وياي حته تنامين
- ماشي

انطتني ايدهه وكومتهه اجيت امسح دموعهه مارضت دارت وجهه عفتهه براحتهه واخذتهه
للسياره وكبل طلعت لاقرب صيدليه واخذت منها
شريط حبوب منوم ومفعوله قوي وبي مهدئات لين انه كلتله عندي ارق وصارلي خمس ايام منايم وضليت امثله انه تعبان ومدري شني يلا انطاني وكالي هاي كل حبايه مال يومين نوم ...

عاد اخذت بطل ماي من محل الي بصفه ورحت
انطيتهه الشريط وهيه كبل اخذت حبايتين مالحكت
اخذهن منهه لين جنت اشغل بالسياره وهيه كبل شربتهن ..
- عليش حبايتين لج هاي مفعولهن قوي
- اي بعد احسن
- حتسودنيني انتي بالله العظيم
- امم

طلعت كبل للسلف وبين ما وصلنه جانت توهه بدت تغفي عاد نزلنه وتلكتنه زهره ..
- يمه هله يالحبيبه شهالمفاجاه هاي كمرين علينه اليوم جايين
- هههه خيه موش وكت هالحجي اخذيهه لحجرتج ترتاح
- يمه اسم الله شبيهه ولج شبيج شكو احجي
- نعسانه اريد انام
- يااه خايبه شني ماعدكم منام هناك
- زهرررره
-اي خويه هاي رايحه تعاي يبعد رويحتي

اخذتهه وراحت جوه وانه طلعت للديوان كعدت
وكل بالي يمهه شصاير وياهه ؟؟ شني المطير نومتهه عشر ايام !!!!
.
.
.
يتببببع

هلووو شلونكم اعزائي المتابعين الكرام 😁😁
هاي البارت من كد مادسسسم صارلي اربع ساعات اكتب بي اتمنى يعجبكم 💜💜