رواية من فجر ديسمبر الفصل الثالث والخمسون 53 - بقلم Zoka 🌷

من فجر ديسمبر
🍁
🍁
- حبيبتي بيج شي !
- لا
- متاكده
- تكدر تحضني مثل قبل مو بحب بامان
- حبي لج هوه الامان يارويحتي

حضنتهه وهيه ضلت مخليه راسهه بركبتي اول مره تنام بحضني وهيج جسمهه مكشف جتافهه وظهرهه كلهه طالعه ..
- شني التغير هالنوبه هاا؟
- بشنو
- بلبسج يمي
- هيج محتره
-هاااا عساج دايماً تحترين هيج
-هههه يلا شويه تغيير
- اي يالله يعني بعد دايماً اشوف التغيير ؟
- لتخاف مااخليك تمل بشي حبيبي
- شكد تحبيني !
- اممممم بكد جمالك ههههه
- هااااا بوااااكه
- هههه احبك والله احبك مثل فرحه الانسان بتفكيره يكون مصيره الجنه هيج اني احبك
-وانه احبنج بكبر فرحه اليتيم .. هواااي انتي

تكربت هيه وباست ركبتي .. جريتهه وخليتهه عله صدري وصرت ارفع بشعرهه واخلي وره اذنهه
وهيه تتلمس بلحيتي .. دنجت وباست شفايفي وانه ماهديتهه بعد .. تلمست جسمهه براحتي مارفضت شي هالمره .. تالي من شافتني كلش نفعلت وياهه
وخرت رأساً
- شني شمالج
- ماكو شي بس كافي هيج
- لا تخافين مني ربى
- ماكدر اكثر من هيج اعذرني

نزلت من الجربايه ورادت تلبس دشداشتهه كمت وجريتهه من ايدهه وذبيتهه .. جانت متوتره وترجف خذيتهه كعدتهه عله رجلي وخليت راسهه عله جتفي ..
- حبيبتي احجيلي ليش تخافين هيج مني بهالناحيه
فهميني يعني للحظه تبادليني الشعور بكلشي وفجاه ترفضين حيرتيني
-مادري
- شوفي يارويحتي يعني هسه انتي بكل شي تسوينه هاذ حلال بينه من هالناحيه تطمني
وانه تدرين بيه ماتجاوز هالحد هسه بس اريدن افهم منج شني الي بالج انه اشوفنج كلش ماتحبين هالشي بينه واحس لو تصير حته ترضيني موش ازيد من هيج لاتجذبين وتكليلي لا انه افهمج عدل
مالج رغبه بيهه مبينه هذيج وينج
- شهااااب
- ماريدن شي وعيونج بس خليني افتهم شني الي بيج واخليج براحتج انه يايوم جبرتج عله شي !
بس احجيلي حته افتهمج اذا اكو عندج خوف او شي يضايكج حته نخلص منه كبل عرسنه
كليلي هسه انه رجلج احجيلي  كلشي بالج بهالناحيه لا تستحين من شي كليلي هيج وهيج عندي
- يعني هو اني اول شي عندي استحي كلش ماتحمل تشوفني هيج يعني بدون ملابس كلش استحي ماكدر يعني شوف حتى هسه صح لابسه كصير بس ضلمه المهم ماشوف نظرتك على جسمي حيل ارتبك
- زين سهله هاي وبعد
- الي رغبه بيك بس ماتتعدى البوسه يعني مادري ليش بس كلش اخاف مجرد ما تتلمس جسمي وهيج صوت نفسك ارتبك احس بعد ماكدر واستحي بمجرد التفكير بالي يصير اكثر بعد تفهمني ؟
- مفتهمج حبيبتي بعد اكو شي !
- لا بس هيج
- زين .. عايني حبيبتي هاذ مستحاج وارتباكج
شي كلش عادي لين بعدج اول مره تمرين بهيج
شي احد يتلمس جسمج ويشوف مفاتنج اكيد تصيرلج رده فعل بالبدايه .. انه اعرفن بهاذ ارتباكج من كبل من جنت ابوسج انتي تكطعين حته نفسج وتتشنجين .. وحته من انتي تجين تبوسيني وتتكربين ليه اعرف كلبج يدك الف الف
وبالكوه تسويهه .. بس تره هيه شغله طبيعيه كلش
وشويه شويه تتعودين عليهه بس شني اريد منج
من تجين بحضني تنسين هاي افكارج وخوفج
- ماكددددر يعني جربت بس استحي كلش
-حبيبتي انتي اسمعيني مابين الزلمه وحرمته خجل ومستحى هنايه .. لين الله خله كل واحد منهم ستر وغطى للثاني .. اثنينهم عدهم رغبات جنسيه المستحى هاذ يكبت عليهه ومايصير هيج لين الزواج صار وسيله ليهم حته يشبعون رغباتهم
انه هسه عندي طلب يمج
- تامر انته
- تسلمين .. اريدنج تحطين بالج دايماً بعد كل حياتج وكلشي بيهه تشاركينه وياي لين انه صرت رجلج وشريك حياتج وروحج يعني اكرب بشر لج
المستحى حلو بالبنيه بس اكو شغلات لازم ينشال منهه يعني بالشي التشاركيني بي مايرهم تفهميني
انه حخليج عله راحتج تهدين وتهيئين نفسيتج حته تشاركيني جسمج هاذ شي ضروري بكل زواج انه مو جاي اجبرج واريدن منج حكوك زوجيه ومدري شني لااا ابد والله بس حته تسهل عليج السالفه منا ليوم عرسنه تتعودين علي ومايصيرلج بعد هالارتباك والخوف وانتي تجين براحتج وبرغبتج الكامله ماتجين علمودي ترضيني ماريدن هالشي اريدن من تحضنيني تبوسيني برغبه موش واجب وتسوي اريدن احس بيج وياي بكلشي
- كلامك حلو وطمني هواي بس اكو شغله
- اي شني
- يعني .. هيج ماكو شي
— لاا كولي شني لتستحين شحجينه هسه انتي افهمي هالشي تشاركينه وياي كلشي بالج عليه انه اجاوبج موش غيري كليلي شني
- هو ردت اكلك يعني اووف يربي احس صخنت
- ههههههه احجيهه عاد بنتي
- ماعرف يعني ماعرف شنو لازم اسوي يعني فهمت مو
- هههههههه والثول عليش مستحيه هيج عبالي شو شكو عادي حبيبتي مابيهه شي
- اي ماعرف شنو الي تريدني اسوي وياك تره اني مامطلعه على هيج اشياء ولا عندي صديقات قبل ومشاركتهن هيج مواضيع تعرف حياتي بعد
- اعرف اي .. بس انتي لازم تكليلي شني الحد التعرفي
- لاااا مو هيج عاد ماكدر
- ربى هسه شحجينه شني الماتكدرين عليه
هوه بس كليلي هيج اعرف وبس مابيهه شي
- شنووو يعني شحجيلك تره عيب يعني شكول
- هم ردينه .. زين ماشي اجي وياج .. تريدين انه اعلمج عله كلشي لو هم تستحين
- عزااا لااااا
- جا شلون
- عوفهه بعدين هي تدبر
- ههههههه شني حتسوين بحث مثلا
- لكككك
- ههههههه حبيبتي انتي يرويحتي اموتج اذا ترحين تسالين وحده من البنات زيين
- شنو ليش يعني
- لين ماريدج تتطبعين بطبايعهن هنه رجولتهن شي وانه شي كلمن اله طريقته وشغلاته الي يحبهه
موش كلنه نفس الشي
- يعني لعد شلون افهم
- تفهمين مني انه بس .. انه الي اعرفج شني الي احبه وشني الاكرهه اعلمج عله طبعي وبنفس الوكت اداري معرفتج بي يعني فوتج لهالمواضيع عله ايدي تصير مفهوووم
- لا مو مفهوم لان ماحب تكعد تحجيلي هيج سوالف ماحبهه ابببد
- خايبه هسه انه جاي اكضي وكت وياج جا غير رجلج اذا انه ماتحبينهه مني جا منين تحبينهه !
- اييي شهاااب ماحبهه استحي يعني عيب شنو نكعد نحجي بهيج سوالف
- بنتي انتي موش دارسه ومتثقفه بهواي مواضيع ليش هنايه تتجبجبين تره عدم معرفتج بي جهاله
وماظنج تحبينهه !!
- اي صح ماحب اجهل بموضوع
- جا هنايه عليش ! موش حاله حال هالمواضيع
هسه انتي عوفي كلشي ويمتى ماتشوفين نفسج جاهزه نحجي بهيج تفاصيل كليلي او لمحيلي اي شي بس حته اعرف انج راضيه
- ماشي حبيبي
- ماريدن لا خوف ولا تفكير مدري شلون انه حرمتي اختاريتهه كويه اشو طلعتي بس حجي لسان كبل جنه نتكافش انه وياج تجيني بكل كوتج وصلابتج شو جن طلع كله تمثيل الصدك غير شي
- ههههههههه بالحب نضعف
- لااا نصير لينين بس مانضعف مدامنه سوه
- اموت عليك تدري ابد ماجنت متوقعه راح تكون هيج متفهم وياي لهدرجه يعني والله اخاف احسد نفسي عليك ههههه
- بويه شكالولج علي اكص ركاب !!!
- لاا بس كلش متفهم من صدك احس نفسي وياك هيج طفله وتتعامل وياهه بكل حذر مو مثل باقي الرياجيل كله يصفطون قوانين على نسوانهم لا انته غيييير عنهم
- جا مدامهه هيج السالفه ريحي كلبي وشيلي المستحى شوفي انه شكد بسيط وياج وعله مايج مخليج هاذ مايعني انه ماكدرن عليج لا بس هيه موش سباعيه وياهو اليغلب ..هنايه انه اسوي هيج لين انه ارتاح من اشوفنج مدللـه ومرتاحه اسوي كل هاذ حته اشوفن بعيونج الامان وياي والكاج تميزيني عن هالوادم كلهه قدري هالشي وخلي ايدج بايدي وماتلكين خاطرج الا طيب
- والنعم منك حبيبي انته حصلت كل هذا واكثر بعد عندي اني اباوعلك كأنك ملكي الوحيد بهالدنيا هيج انته خليتني اشوفك بهذا اسلوبك ربي يديمك الي
- ربي مايحرمني منج يابعد حيلي وهلي انتي

باست خدي واخذتهه نومتهه عله ايدي بين ماانه العب بخصلات شعرهه حسيتهه نامت ضليت اعاينلهه وافكر شلون اكسر هالمستحى والحد المخليته بينه اذا تضل هيج تتعبني هواي بالزواج
هاي اذا رضت اتكربلهه ....

ثاني يوم الصبح بس تريكو ومشو لبيتهم ...
رديت لشغلي اكضي بي وكتي وهم لازم اجمع فلوس المهر .. جانت ماتخليني وحدي دايماً تخابرني ومراسلات بينه كلساع وبالليل هم نسهر نحجي ماخلتني احس  بفراغ ابد بروحتهه ...

صار يوم الاحد وانه جنت واعدهه اخذهه للجامعه بهالاسبوع عاد من الصبح مريت عليهه وطلعنه لبغداد .. جانت متكشخه ع الاخير ومن احاسبهه عله مكياجهه لو كعبهه تكلي مو مخطوبه لازم كشخه والكشخه متكمل الا بهذني ...

وصلنا للجامعه ونزلنه هيه كضت ايدي وتمشي بكل فخر وضحكتهه ماليه وجهه ... خابرت عله صاحبتهه ودلتهه مجانهم ومشينه ليهم ..
اول ما وصلنه ليهم شفت الوجوه تكلبت كلهن تصفنن .. عاد هيه هدت ايدي ومشت ليهن تحضنهن وتسلم عليهن .. جان كالت ..
- هاا شلونهه المفاجاه !
- ابببد متخيلنه هو نفسه ! شعجب بس فهميني
- هههه سالفه طويله
- بس حلوين سوه الله يحفظكم
- تسلمين حبيبتي .. شهاب هذني صديقاتي الوحيدات ..منى وايه وهاي اختهه لايه اسمهه نور
- حياهن الله تشرفنا

كلهن تبسمن واخذن ربى يتبسبسن وياهه عاد شويه وصحتهه حته نمشي نشوف سالفه دوامهه .. اجتي
ومشينه جان تكلي ..
- نعجبن بيك هههههه
- هاا جنج مكيفه
- ايييي مكيفه لان خطيبي حلو ههههه لا والله رزلتهن كلتلهن الي تحط عينهه عله حبيبي افكسهه كلهن كامن يكولن اووي حبيبي من شوكت هاي التطورات مايدرن بالصار خطيه
- هههههه والله ياعكولجن بكد الفصمه
-اممممم

مشينه حاجينه رئيس القسم وكال ماله داعي الدوام بعد همه خلصو امتحانات ومحاضرات بعد متفيدهه لان كلهه حتخلص هالاسبوع خلي تستغل الوكت بالبحث
احسن وتدرس للامتحان ..

بعدين رحنه حاجينه استاذه كالت عليهه متفهمه
ويه الطلاب واستفسرت منهه عله البحث وبعدين
طلعنه سلمت عله البنات ومشينه جان تكول ...

- شهاب كلش ضجتتتت
- ليش ياعيوني
- مسوين حفله الحنه من قبل اسبوعين ومادري بيهه كتلك مانسوي العمليه هسه اففف
- بنتي صحتج اهم من الحفلات بعدين موش اكو حفله القاعه عوضي بيهه
- ضجت ضجت يعني شنو تخرجي وماحضرت الحنه كله منك
- ههخخخ خايبه انه موش بوكتهه ماخذج بالشلالات شني هاي ماتغزر بعينج !
- لا بس يعني ايييي عوف السالفه
- حبيبتي يمتى الحفله الثانيه؟
- السبت
- يا قاعه !
-  شهريار باغصان الزيتون
- ايي حلوو هناك عوضيهه يلاا هسه شيلي هالضوجه عاد وخلي بالج بعد كله دراسه ماضل شي للامتحانات وانتي ماتعرفين شني الماده اصلا
- اففف هالسنه صارت ركض ركض كلشي مفهمت منهه
- يلا موش احسن تخلصين بسرعه
- زين والبحث شلوون بي ماعندي وكت
- انه ادبره ماعليج يجيج كامل مكمل بس خلي بالج عله الامتحانات
- يييي فدوه لكلبك حبيبي خلصني منه صارتلي عقدني وراي وراي
- هههه لا تشيلين همه يجيج .. هسه وين تردين نروح
- اريد نتغدا واذا بيك حيل نفتر نشوف شي مناسب للحفله اذا تقبل يعني
- تدللين

رحنه تغدينا واخذنه صور وبعدين مشنه للمحلات
محلين اربعه ضاك خلكي ماحب فره السوك بس ضليت ساكت شسوي هاي بعد سالفه لازم اتعود عليهه ... يمكن من عاشر محل يله عجبهه شي
وطبت تقيسه وانه كمت ادعي يارب يعجبهه ويجي عليهه فيت واخلص يارب يالله يالله ...
وهمزين الله استجابلي وطلع عله كدهه كبل كتله
ناخذه وحطيت الفلوس ع الميز حته لاتفكر وتكلي نشوف بعد واذا مالكينه نرجعله هاي الجمله تخليني اشيط باعصابي ... كبل خذينه هالفستان ومشينه
والنوب الشال بالنص ساعه انه كاعد بالمحل وحاط ايدي عله خدي وهيه تجيب هاذ ولا لا خلي اشوف هاذ تالي كلتلهه انه حختارلج وكبل اخذتلي نظره سريعه عليهن واشرت لابو المحل ينزله ضلت مو ومو كتلهه لو تاخذي لو نمشي وحيري بنفسج بعد
عاد اخذته ... طلعنه وكتلهه..
- بويه ياخلك خلكجن ماتتعبن !!!
- تره هاي ع السريع انته ششفت بعدك
- حبيبه انه منا وهيج علي بس اورق وانتي اخذي امج وعسى ماتفربن عشر سواكه  ماعلي بعد
- هههههههههههه خطيه انته والله ادري بيك بالكوه متحملني
- شنننني هااااي ادري انتي صارلج ساعه حاطه هالشالات وواكفه اختاري شكو تصفنين شتردين الشال ياشرلج انه مناسب اخذيني
- اييي غير ادقق باللون يرهم لو لا وياهوه الاحلى
- بويه انتي سالفتج طويله هاي لو انه اشتري سبع قوط بهاي صفنتج
- ههههههههه انتم بسرعه تقررون احنه نتردد وبالاخص بالملابس مانقتنع من اول مره مستحيل
- انتي منا وهيج حيري بروحج
- لاااا حلوه الطلعه وياك
- جا تخفين ايدج وبلايه تصفن
- هههه اذا انته تختارلي ايي بس تعوفني وحدي اتصفن للصبح
- هاي ماشي بعد اذا طلعنه تاخذين بذوقي زين
- اي كلش زييين

ردينه للعماره وصلتهه لبيتهم وسلمت عله اهلهه ومشيت لبيتنه .. رحت نمت وثاني يوم خابرت وليد ووصيته يدورلي بالمكاتب بالصناعه عله بحوث لاختصاصهم هناك كلشي موجود عدهم

صرت اخابرهه من الصبح اكعدهه تقرا واعوفهه للظهر يلا اخابرهه اتطمن عليهه واشجعهه واروح انه اكمل شغلي لليل يلا نحجي .. صارت حفله القاعه اخذت ابوهه وامهه ويانه للحفله ..

بالدخوليه اخذت ايدهه وطبينه اخذولنه صور ومشينه هيه راحت وكفت ويه الطلاب وانه كعدت رحت كعدت واعاينلهه بفخر .. هاي البت الي صارلي سنين انتظرهه اليوم كبرت وتخرجت
اجتي وكعدت ويانه ..اخذنه صور جماعيه وضلينه نعاينلهم يركصون الولد فرحانين وحايرين شيسون
جنت اعاين فرحتهه بعيونهه واضحك لضحكتهه عاد شاورتني وكالت ...
- شهاب هاي اني صرت مهندسه واني اصلا مدرست بمدرسه كلهه وحدي تعلمت ممصدكه والله
- صدكي يرويحتي كلمن زرع يحصد انتي تعبتي ودرستي ازيدن من طلاب المدارس تستاهلين هالفرحه
- الحمدلله الي مكمل فرحتي وجودك واشوفك انته وابويه شلون مفتخرين بيه هاي تعادل عندي الف شهاده
- رفعه راسنا انتي عساهه دايمه فرحتج ومن نجاح لنجاح حبيبتي
- ان شاء الله ياعمري فرحتي بيك تكمل

خلصت الحفله ومشينه للبيت .. هناك الشيخ خابرني وكال تمرون علينه بالاول ... ومشينه لبيت الشيخ ..
من نزلت الشيخ تلكاهه من الباب يطك الفشك
ويضحك خذاهه لحضنه ولفهه بعباته .. واجتي الريم هم حضنتهه وباركتلهه .. وانطت للشيخ علاكه صغيره .. طلع منهه علبه حمره بيهه محبس ثكيل كالللها ..
- والله يابنيتي فرحتي بتخرجج مافرحتهه حته بيوم الصرت بي ابو ولا بيوم الخذيت  المشيخه لجن هاليوم انه فرحان بفخر هيج انه راسي مرفوع براحه هاليوم شمس الشيخ تخرجت وصارت مهندسه تستاهل التعب وهالهديه صغيره جدامج
يابنيتي
- لااااا شيخي شنو صغيره انته دائماً مخجلني بكرمك وهداياك وياي بس فرحتك هاي كافيه عندي والله
- يابعد رويحتي يابويه انتي هاليوم ملكتيني هالدنيا خذيهه هالهديه حلال عليج وعله تعبج البسي وتكشخي دام راسي يشم الهوا انتي  تضلين شيخه هالبنات
- الله يخليك النه تاج راسي انته ماصرت لو لا دعمك وسندك الي

باست ايده وهوه لبسهه المحبس وباس راسهه
وضلينه كاعدين نتعلل هالليله سوه وتالي وصلتهم لبيتهم ورديت ...

ثاني يوم كعدتهه من وكت حته تقرا والتهيت بشغلي لليل خابرتني ..
- هلا حبيبتي
- هلا ياروحي شلونك
- الحمدلله بكل خير وياج
- الحمدلله .. شهاب اليوم ابويه كلي ابو البيت الي بغداد يريد نفرغه اله هالاسبوع .. ابويه جان عباله بسام كاعد بي ودافع الايجار طلع اصلا بسام مو هناك والبيت مقفل من زمان والرجال يريد يأجره لغير ناس حاجي ويه الجيران وعارف منهم تاركينه من زمان فمخابر ابويه وكايله هالاسبوع يفرغ البيت
- موش مشكله عيوني خلي بعد احسن عليش تدفعون الايجار ومتحاجوه بعد
- والامتحانات شلووون
- انه اخذج واجيبج هنه شغله اسبوعين ماتسوه
- وشغلك؟
-ماعليه شي يرويحتي لا تشيلين هم .. بس بالي ضل عله بسام وين راح!
- الشيخ كلي يعرف مكانه ويحاجي دائماً يكول بخير مابيه شي بس مقبل يكلي وينه
- وابوج يعرف!
- اي هم يعرف يكول خلي على راحته هو من كيفه يرجع
- زين اذا هيج
- ايي .. شهاب حبيبي مكافي
- شني !
- كافي تشتغل ع الحاسبه عوفهه
- وشدراج انه لساعني اشتغل
- هههههه هو شنو الي مادري عنك
- لااا عليج علي
- والله احجيلك شي بس مو تتفاجىء
- اي
- اني داشوفك شتسوي
- هااااي شلج بيهه
- هسه مو حركت ايدك وسديت اللابتوب
- اي عادي هاي سمعتيهه من سديته
- زين وهسه تريد تطفي الضوا
- هاي تعرفيهه علي من احاجيج اطفي الضرا واتمدد
- ههههه وشكو لعد لحد هسه ممطفي
- طفيته هسه وتمددت
- اممم ليش رافع رجلك هيج ؟
- دخيلك ربي شني انتي انس جان
- هههه انس
- لااا صدك صدك يعني تشوفيني !! ماتدش بعكلي
- زين اكدلك اكثر
-اييي
- ليش دتلعب بشعرك هسه ونزلت رجلك
- ههههههههاااااااااااااي
- هااا صدكت
- خررررب بحظج ولج شلوووون خاف حاطتلي كامرا هنايه
- ايي كامرا متنقله وياك ههههه
- لااا عليج الحسين فهميني حيكف عكلي
- ادري بيك من كعدتك
- هههههههه لج بويه شعررررفج بيه كعدت !!!
- والله كتلك اشوفك كاني يمك .. مادري هاي صار مرتين هيج
- يمتى اول مره
- اول البارحه واليوم .. شوف هسه اني اجيت اخابرك بدلت ملابسي وطفيت الضوا وتمددت
بين ماجاوبتني اني جنت مغمضه من حاجيتك شويه وهيج شفتك كدامي بكل تفاصيلك وشتتحرك وشتسوي كلهه كاني فاتحه وياك كاميرا ولتسألني شلون لان صدك مادري
- يعني هيج من الله !!!!!
- اي والله اصلا متفاجئه باول مره عبالي وهم بس هسه لا تاكدت حقيقه
- انتي شني الي بيج !!!!
- بيه نعااااس قوي بعد لتكعدني من الصبح عوفني اشبع نوم
- هااااا شو غيرتي الموضوع
- من نتشاوف نحجي بي بس هسه صدك نعسانه
- زين زين روحي نامي ولتجسسين عليه بعد
- هههههه هاي اجتني عدله هههههه
- اييي بعلي انطاح حظي رسمي
- بس الييي انته حب .. يلا تصبح على خير
- تلاكين الخير يرويحتي

سديته وضليت صافن هاي شلون هيج !! كنت اخافن يطلع بيه او بيهه شي !!! جان تجيني رساله منهه " نام كافي عاد " ضحكت ورديتلهه" طفي رادارج عليه عوفيني براحتي "
بهالليله كضيتهه اتصفن شلون هيج !!!!! مالكيتلهه تفسير بس كلت اخليهه تحجيلي بعد مابيهه مجال

وره جم يوم صارت عند الشيخ فصل وهالمره هوه الي خذاه اله وجانت الوادم رايحه جايه علينه
من بينهم واحد اجه حاجاني كالي ..
انه واهلي نازلين جديد بهالسلف واحنه ناس من اهل الله وحالنه عله كدنه وسمعت ادور خط كلت اشوفنك ترضى بيه انه عندي تكسي واشتغل بيهه
ومحتاج عندي سلفه واريدن اسددهه حرمتي حامل ومحضرهن ليهه ..

ضليت استفسر منه عله اهله واخذت رقمه وكتله ارجعلك خبر ...

بدت الامتحانات وانه اخذتهه اول يوم وضليت انتظرهه لحد ماطلعت هم رديتهه للبيت عبن امتحانهه بين كل يومين ..

صادف ثاني يوم عدنه شغل ويه بالمحموديه
عاد خابرت الولد ورحت لبيتهم وتفاهمت وياه
ووصيت محمد يروح وياهم بيوم الامتحان
حته يدلي ....

ضليت اسبوع بالمحموديه ويه ولد عمي ومن رديت جانت ربى تكلي ماريد الخط حار ماعنده تبريد ... حاجيت الولد وكال جاي اصلحه وتدللون

باخر يوم امتحان جنت متفق وياهه بالليل ان باجر اجيهه للكليه ونطلع نفتر شويه ونرد للبيت
لجن ساعه تسعه الصبح صار عطل بماطور الماي الي يودي لكاعنه وابوي يتسودن كلشي ولا الماي ينكطع عله هالكيعان ... ضليت اشتغل بي وتالي شفت سالفته تطول خابرتهه وكلتلهه ماكدر اجي
ووعدتهه باجر اعوضهه ...
وره نص ساعه خابرتني كالت راح تطلع اجاهه الخط بس تعبر الشارع اله وتصعد انه موصيهه كل ماتطلع وتصل تخابرني ...

للوحده ومامش مكالمه منهه رحت دكيت عليهه جهازهه مغلق .. ضليت احاول مره مرتين مغلق
رحت دكيت ع السايق ..
- خويه انتو وين
- اني بالتصليح جاي اصلح بالسياره ليش
- وربى وينهه!
- غير وياك !!
- شنننننني وياي
- كالتلي الصبح انته تجيهه واني استغليت هالوكت ورحت للتصليح
- لتجذذذذذب البت كالتلي انته وصلتهه ومخابر عليهه كايللهه وصلت شنننني هالجذب بعد الببببت وينهه لاااا حرك شيب الخلفووووووك احججججي
- موش ويااااي اني بالتصليح ماصعدت وياي ولا رحتلهه
.
.
.
يتببببع
باقي على الختام ٣ او اربع بارتات .. ترقبواااا
شنو توقعاتكم لكل الي صار ؟؟؟؟