رواية من حضرتك عشان قلبي تذله الفصل الحادي والعشرون 21 - بقلم ام عوض

عنان قاعد بالمجلس ومتكي ويشرب قهوة ما طلع برا عشان جيهان قاعدة وجويريا مهددة فيه خايف منها
جا ثامر وقعد بحضنه
عنان :هلا حبيبي ثامر
ثامر :بابا ابغى فلووس
عنان طلع محفظته من جيبه : خذ، وينها امك
ثامر شال الفلوس:الحين بتنزل
عنان ناظر عند الباب مافي احد وهمس له :بشر ما تهاوشو امك وجويريا
ثامر :لا ما تهاوشو صارو يحبون بعض
عنان رفع حاجبه:تكذب علي يا ورعع
ثامر:لا والله ما اكذب اليوم الصبح جت حرمتك وكلمت امي وقالتلها بنطرد جيهان اليوم
عنان رفع حاجبه بدهشة منهم وهو مبتسم
وقرب مرة ثانية من ثامر:كمل كمل وش قالو بعد
ثامر:قالو انهم اليوم
وقعد يقوله وش بيسوون
وعنان انصدم منهم وضحك وهو مصدوم منهم ومن خططهم الخطيرة
ثامر قام :انا راييح
عنان بصوت عالي :لا تلعب مع حمد يا ويلك هااه
وبعده لف وجهه وهو يقول كذا اجل يا جويريا تبين تطلعينها كذا
وحنان اخ يا حنان صدمتني هاذي وراها بلاوي والله وانا مدري
جويريا رجعت البيت بعد ما قعدت عند خواتها شوي
دخلت وشافت جيهان قاعدة وحنان تووها نازلة وام عنان مو موجودة ضربت كف بكف وقالت والله وقتهاا أشرت لحنان بمعنى يالله وقتها
راحت جويريا عند جيهان الي كان قدامها كوب نسكافيه وتتفصح بجوالها خذت وكبت النسكافيه حقها قاصدة
جويريا :اف معليييش بالغلطط
جيهان قامت من مكانها و وقفت :تبين تقنعيني انك كنتي جاية وبالغلط كبيتيهم يالكذاابة
جويريا وقفت لها زي الناس : صحيح اني مشكلجيية بس على كل غلطة بتقولو اني ادور مشااكل لا ذيي ما اسكت عليها حبييبتي
جيهان اساسآ غالة قلبها لجويريا وتبيها من الله مسكتها من شعرها :تعااالي والله اوريك مين هيي جيهاان اجل تبين مشااكل هااه وتقولين عنيي انا الرخيصةة انتي وش هااه انتي وشش
جويريا وهي تمسكها من شعرها وتطالع لو عنان طلع ولا لا :هيين يا بنت ابوتس هييين بتشوفيين منهيي جويريا بنت ابوهاا يالقردةة يالخرووفة
وتخدش فيها وبوجهها
وطلعت خلود من المطبخ وهي تضحك عليهم
وحنان واقفة جنبهم تناظر لو عنان جا وهي قلبها طبوول وخايفة
اخيرآ جا عنان وهو يقول :خييير وشذا الاصواات العاليية
وحنان اول ما سمعت صوته انه جاي مسكت بطنها بسرعةة وهي تقول :ايييي بطنييي
وعنان راح عندها بسرعةة ومسكهاا وهو يقول :حنان اشفييك بخير انتيي وين تحسي بالوجع
حنان ماسكة بطنها للحين :حسبي الله عليهم ضربتني فبطني
عنان يجلسها فوق السرير :للحين متوجعة اخذتس المستشفى؟
حنان :لا لا كذا زين
جويريا قربت من حنان وقالت بمكر:حبيبتي انتي بخير؟
عنان التفت لهم بعصبية :وشذاا انتو بزران تتهاوشو كل شويية على شوية كنتو بتذبحونها مع الولدد
جويريا :انا مالي دخلل جيهان الي بدت وحنان شاهدة وحتى هي الي ضربتها
جيهان طلعت عيونها :الحين حطيتي البلا علي يالككذاابة اسمعني عنان والله كنت قاعدة واشرب
عنان قاطعها :انطميي اندري محد منكم بيقول الصدق "ولف لحنان" قولي وشصار
حنان ناظرت جويريا وجيهان :اقولك الصدق
عنان :اييه
حنان : صدق كلام جويريا جيهان الي ضربتني
جيهان بصدمة:انتي بعدد يا حنان تكذبيين انا ما ضربتك لا تكذبيين
وجويريا ابتسمت بنصر
حنان كملت بسرعة :وجويريا هي الي بدت بالمهاوشة
جويريا انصدمت منها وكانت تبي تتكلم بس عنان تكلم وقال بصوت عالي :اذلفوو اثنينكم من وجهيي ما اسمع لكم اي حسس
جويريا انقهرت من حنان ومشت بقهر
وجيهان بعد مشت وهمست لها :اتفقتو اثنينكم علي وهي سحبت الموضوع لجهتها هه ذكية مرة
جويريا بهمس :هين انتي وياها هين بس
وطلعت لغرفتها ولحقتها خلود
خلود :انتظري بنتت
جويريا بعصبية:وانتي وش تبين بعد
خلود :هدي وشفيتس معصبة
جويريا قعدت فوق السرير :انا اوريها لحنان ام الكرش هاذيي هاذا جزاتيي اني اهتميت فيها تقوم تخوني كذاا
خلود :والله انبعد صدمتني بنت الذين صدق انها داهية بس من تحت لتحت
جويريا :قلتك لتس انها حية تحت التبن بس ما صدقتيني الحين شفتي بعيونك وش سوت معي وكيف ظلمتني اول مرة بحياتي انظلمم صدق شعور مب حلوو
خلود تضربها بكتفها :دعوة المظلوم مستجابة ادعيلي بالزوج الصالح والزين واهمشيي يطقع فلوس
جويريا رفعت يدها لسما :يا رب ارزق هاذي الدلخة الزوج الصالح والزين خلي يتزوجها وافتكك منها
خلود ضربتها بكتفها :وعنده فلووس
جوييرياا :ايه ايه ويطقع فلوس ويا ربب ابي فلوس كثيرة وذهب واهمشي من كل ذا افتك من جيهان وشرهاا
خلود :امين وانبعد ودي افتك منها والله
جويريا تذكرت ام عنان :واييه صحح، اخر طلب يا ربيي ارسل زوج لعمتي مريم وتتزوج وافتك منها
خلود تناظرها هذيك النظرة :لا والله؟ تبين تفتكين مننا كلنا ويفضى البيت لتس وحدس
جويريا :افرحي يا دلخة احسن لها تتزوج وتشوف حياتها تقعد عندنا وشتسوي بيضيع عمرها وهي شحلاتها للحين صغيرة وحلوة
خلود :ايه ايه رقعي
قطع عليهم دخول عنان وهو يقول :خلوود اطلعي برا
خلود وقفت عنده وقالت بخوف وتوتر :اسمع ترا والله حنان كذابة جيهان الي بدت بالمهاوشة وانا شفتها بعيونيي
عنان :تطلعين برا ولا مشتاقة للخيزرانة؟
خلود طلعت برا بسرعة وقفلت الباب وهي تدعي انه ما يضربها
جويريا وقفت قدامه وناظرت فيه وكانت تقول بنظرتها تفضل تبي تضربني؟ اضرب
عنان ناظر فيها لوهلة :من كل عقلتس تبين تطلعينها من البيت كذا
جويريا سكتت وما جاوبت
عنان قرب منها خطوة :اندري انتس انتي الي بديتي المهاوشة وانتي وحنان اتفقتو على جيهان
جويريا رفعت عيونها له بسرعة وهي مصدومة كيف عرف
عنان ابتسم :عجبتيني عرفتي تخططي زين والله
جويريا صدت نظرها عنه وهي مقهورة
عنان قرب منها وهو يبعد شعرها من وجهها :لهدرجة تحبيني ما تتحملين قلبي يدق لاحد من بعدس؟
جويريا قالت بصوت عالي :من قال احبك انت واحد يحبك احد ايه حتى البقر ما يطالع بوجهك
عنان :بس انا احبك
جويريا :طيب لو تحبني روح وقل لبنت عمك الحبيبة تذلف بيتهاا
عنان :ابشري
جويريا وقفت زي الناس وهي تسوي نفسها مو فرحانة :ورييني اجل ولا بس تعطي الكلمة وما تسويها
عنان ابتسم ولف وجهه وطلع برا الغرفة
وجويريا ما صدقت مسكت قلبها بفرحة وراحت عند الباب وهي تسمع وش بيقولو

عنان نزل تحت وشاف امه توها جاية وجيهان عندها تبكي وتقولها وشصار و وش سوو فيها ومصرة تبي تروح وام عنان تقنع فيها انها ما تروح
ام عنان :لا تكفين يا بنتيي لا تروحيين، عنان ما كان يقصد يصارخ عليتس
جيهان تمسح دمعتها :لا يا خالة لاا هو قاصد يصارخ علي حريمه ابتلو علي وهو صدقهم
عنان جا و وقف عندهم وهو يقول :خليها تروح يا امي دام هي تبي
ام عنان انصدمت :تستهبل انت بنت عمك ذيي تبيها تروح كذا زعلانة وضايق خاطرها
عنان :هي الي تبي تروح يا يمه لا حنا طردناها و ولا شي ودامها تبي تمشي خلها تمشي محنا بمانعينها
جيهان يوم سمعت كلامه مشت للغرفة عشان تجمع اغراضها
ام عنان تناظر في عنان :اجل سوتها بنت ابوهاا وعبت راسك على جيهان
عنان :محد عبى راسي يا يمه
ام عنان :تفو عليك بس وخرر
ومشت من عنده وهي تقول جيهان بنتي لا تكفين عنان ما يقصد الي قاله لا تسمعين من جويريا ترا هي بزرة وما تفهمم
وجويريا فوق تسمعهم وشوي وبترقصص من فرحتهاا صحيح ما مشت الامور مثل ما تبي بس الي تبيها صار وجيهان بتمشي
وتذكرت حنان بهاذا اللحظة وقالت وانتي يا حنان هين والله حسابس عندي يا بنت ابوتس كنت طيبة وحبيبة معتس بس انتي الي جبتيها لنفستس
سمعت صوت عنان طالع وعلى طول دخلت لداخل
دخلت عنان عندها وهو يقول :هيا جيهان الحين بتمشي استانستي؟
جويريا ما قدرت تخفي فرحتها وقالت بإبتسامة كلها نصر :ايي استانست وبقووة ولو بيدي برقص
قرب منها عنان وهو يقول :ما بغينا نشوف فرحتس
جويريا ولأول مرة قربت منه بحيث لزق صدرها بصدره وقالت :ابشر بتشوف فرحتي الحين كل يوم
عنان ما صدق عييونه انه ذي نفسها جويريا الي يعرفها والاكثر شاف ابتسامتها غير ابتسامتها المستفزة هذيك ما ظن ابد انه بتجيب راسه بعنادها كذا وهو تقريبا ذاييب فيها ومو مصدق اخيرآ قدر يحصل عليها حاوطها من خصرها وقربها اكثر وهو يبعد شعرها من وجهها
وهي ناظرت فيه وهي مبتسمة وقربت من اذنه وهمست وهي تقول :بقولك شي
عنان ذايب منها :قولي
جويريا :بروح اشوف جيهان
عنان ضحك وهو يقول :روحي وشوفيها وقوليلها انه عنان لتس انتي وبس
جويريا ضحكت وطلعت برا وهي كلها نصرر من الي سوته نزلت تحت وهي تتمايل ومستاانسة
وقفت بنص الدرج واتكت بالحديد وهي تسمع ام عنان تقنع في جيهان
وطلعت جيهان وبيدها شنطتها تجرها وراها وهي تبكي وتقول :لا يا خالة اعذريني ما زعلت منك ولا من عنان بس انا برووح خلاص مقدر اقعد زيادة هنا
ام عنان :بس يا بنتي
قاطعتها جويريا وهي تقول :خليها تروح يا خالة دامها هي تبي كذا "ونزلت درجتين" خلها تعرف انه الي يحط راسه براسي وش يكون مصيره والي سويته فيها قليل
جيهان انقهرت ومسكت شنطتها وطلعت بدون تتكلم
وام عنان حاولت توقفها بس هي قفلت الباب وراها
وجويريا واقفة بمكانها مبتسمة ابتسامتها المستفزة
ام عنان لفت لها وهي الشر يتطاير من عيونها راحت عندها وهي تقول :كله بسبتس يا شيطاانة يا الي ما تستحين على وجهتس
وقربت منها وضربتها كف في وجهها
جويريا انصدمت منها
ام عنان :كله بسبتس انتيي جيتي بيتناا وما عاد شفنا الرااحة منتس انتييي يا شيطانةة تعبين عنان عليناا مو الناقص الا تطردينا حنا بعدد
ومشيت عنها قبل تسوي شي اكبر
وجويريا بمكانها وهي تقول بداخلها والله ما امشيها لتس يا مريم والله ما امشيها
لفت وجهها وطلعت لفوق مرة ثانية وهي ترسم بوجهها ابتسامة ودخلت الغرفة وهي تقفل الباب وراها
وحضنها عنان الي كان محتريها تجي وهمس وهو يقول :ارتحتي الحين
جويريا تذكرت كف ام عنان وقال بإبتسامة :ايه ارتحت وكثيير
عنان قرب من خدها وهو يطبع بوسة لخدها ولاول مرة. جويريا تبادله وباسته في رقبته وهو ذاب ما يقدر يتحمل كل هالدلع منها

باليل
الهنوف طلعت في صالة وهي من اول تبي تطلع ما تدري ليه بس صارت تحب تقعد مع محمد وتسولف معه بس ب نفس الوقت صارت تتوتر كثيير يوم تقعد معه خاصة بعد اخر موقف صارت بينهم وكيف كان قريب منها توها ببداية شعورها اول مرة تحب جاهلة بالمشاعر الي قاعدة تحسه ما تدري هي توتر من انه بيرجعها الديرة ولا هي مزيج من الخوف منه
طلعت وراحت قعدت بالكنبة الي هو قاعد فيها
وهو ما حس عليها لأنه يتفرج بالتلفزيون واصلآ واضح عليه مو مركز يفكر بشي ثاني
نطقت الهنوف وهي تقول :اجيب لك البطانية واللحاف بتنام؟
محمد التفت لها وهو توه يحس عليها :هاه ايه جيبيهم
الهنوف :اشبك سرحان صاير شي؟
محمد :لا مو صاير شي
الهنوف :طيب اشفيك جيت وقعدت وما حسيت علي حتى
محمد ناظر فيها لوهلة وبعد نظره عنها بسرعة :هاه
الهنوف تأكدت فيه شي لانه مو طبيعي ابدد :تكلم؟
محمد تنهد وناظر لها مرة ثانية :ما تحسين بشيء غريب؟
الهنوف توترت :زي وش؟
محمد :شعور حلو يسابقه شعور خوف انك تفقدي شخص معين؟
الهنوف سكتت شوي وبعدها هزت راسها ب لا
محمد لف لتلفزيون وقفله وهو ساكت
الهنوف من توترها قررت تقوم
بس وقفها صوت محمد وهو يقول :وين رايحة اقعدي
الهنوف وقفت بمكانها :ظنيتك تبي تنام
محمد :اقعدي مافيني نوم
الهنوف قعدت. وهي مبتسمة وتربعت بالارض وقالت:طيب دامنا فاضيين وما ورانا شي تعال نسأل سؤال وجواب
محمد :ش كبرنا ونلعب
الهنوف:يالله عاديي محد شايفك من اهل الديرة ترا
محمد ابتسم وما حب انه يكسر بخاطرها ونزل قعد هو بعد بالارض :يالله اسألي
الهنوف تفكر :امممم "وجا ببالها سؤال" اييه
محمد:وشهو
الهنوف :انت اول ما قالو لك انك تجي المدينة وتدور علي وش قلت
محمد مستغرب :قلت ابشر
الهنوف :لاا اقصد وش قلت لنفسك يعني اكيد تحلطمت وكذا
محمد ضحك:ايه والله قلت وش نلعب غميضة حنا اروح ادور بنت انحاشت وشدخلني
الهنوف فطست ضحك :وانت صدق كنه نلعب غميضة والله
محمد سرح في ضحكتها
الهنوف :طييب يالله دورك اسأل انت
محمد قعد لثواني وهو يفكر
الهنوف :يالله
محمد :مدري والله معرف وش اسال
الهنوف :قول واسأل اي شي عاادي
محمد :طيب قولي لي موقف مضحك صار لتس
الهنوف اول ما قال كذا تذكرت وقعدت تضحك
محمد :قوولي وضحكينا معتس
الهنوف للحين تضحك :مرة دخلت المطبخ ابي اشرب موية واختي العنود كانت تمسح بالمطبخ وعااد اختي الله يحفظها سنعةةة تحب النظااافة والي يوسخ يا ويلله سواد ليله
محمد قعد يضحك:المفروض انتي الي تكوني كذا مب هي
الهنوف :ادري بس انا يا تلقاني منخمدة يا تلقاني اكل هاذا شغلي بالبيت
محمد :ايه كملي
الهنوف قعدت تضحك وهي تقول:كنت ابي ادخل اشرب موية و "ودخلت في دوامة ضحك"
محمد :كملي وبعدين اضحكي طيب
الهنوف :ههههههههههههه المهم مسكتنيي و هههههههههههههههه
محمد حط يده براسه من السالفة الي مو راضية تكتمل وهي ميتة ضحك
محمد :كملييي يا بنت النااس
الهنوف مسحت دموعها :المهم دخلت المطبخ ومسكتني من ملابسي و هههههههههههههههه
محمد تنهد منها هي وسالفتها البيض
الهنوف مسكت بطنها :مو قادرة اكمل والله هههههههههههههههه
محمد ناظر فيها كيف تضحك من كل قلبهاا اول مرة يشوف وحدة مجنونة مثلها تضحك زي كذا ابتسم لا إراديآ منها وهو يقول بداخله صح مجنونة بس تجنن هي وضحكتها يا لبيييه انتي وضحكتك يا بنت الناس وش سويتي فيني بسس والله انتس خذيتي كل عقلي وبالي وفكري معقولة سحرتيني

عند اسيل لابسة عبايتها و واقفة عند الباب ما تبي تطلع
نور :اطلعيي يا بنت الناس ولد الحلال يحترييك براا
هيام تدفها عشان تطلع لهم لانه لهم خمس دقايق يحترونها وهي للحين ما طلعت :روحيي يا اسيل ولا تجلطيني معتسس ترا جود معهمم لاا تخافين ما ياكلونتس
اسيل خايفة :خلااص مابي اتزوج بطلت
نور :لا يا حبيبتي بعد وشش تقولين بطلتيي تراه صار رجلتس تدرين وش يعني صار رجلتس يعني صرتي حلاله وهو حلالتس
اسيل رجعت خطوة ورا :خلاص ماابي تكفوون خله يدخل ويطلقني ويمشي
هيام مسكت راسها :لا صدق ناوية تجلطيييني انتي كيف يدخلل ويطلقتس ويروح لعب ومزوح هاذيي والله يا اسيل لو ما طلعتي الحين بيجي عمتس وياخذتس لهم بالخيزراان
اسيل كانت تبي تتكلم بس قاطعتهم جود وهي تجي :خيرر وينها ذيي ما صارت تراا
نور:تعالي اسمعي وشتقووول اختس الحبيبة
جود:وشهو ؟؟
هيام :تقول بطلت تعرس وتبيه يدخل يطلقها ويمشي
جود ضربت صدرها :يويليي وش ذا الكلاام
اسيل متوترة :تكفين جود مو ناقصني هم و وجه راس يعني تخيلي اتزوج واحمل واجيب عشرة بزران واكرف فيهم انا ابي اعيش حياتيي
جود قربت منها وهي تحط يدها بظهرها بحنية :اسمعي يا روحي كل الي تفكرينه ماله داعي صدقيني بعدين يا زين وليدد وشحلاته طيب وحبيب واذا خايفة انه يضربس وما يحترمس صدقييني انه مب كذاا
اسيل رفعت اصبعها :يخسى يرفع يده علي والله
نور ضحكت :كفو والله هاذي اختي
جود :ونسيتي انه هو موافق تكملين دراستس يالعوبة ما فكرتي فيهاا تعالي يا بنت الحلال وتوكلي على الله ولا تخافيين
اسيل اخذت نفس :طيب
جود ابتسمت :هاذي بنت الزينة والسنعة يالله تعالي
وطلعو اثنينهم
وهيام تنهدت وهي تقول :بغت تجلطني اختس هاذي
نور :وانبعد والله شكلها مب صاحية هاذي والله لو عمي سمعها تقول كذا لا يجيها بالعقال
هيام :وانتي صادقة تعالي ندخل
نور:يالله
قفلو الباب ودخلو لداخل

وجود ركبت السيارة وركبت اسيل معها والي كان يسوق هو وليد وجنبه ابوه قاعد وجود واسيل قاعدين ورا
اسيل تهمس لجود :الحين هاذي الي قلتي يا زينه وحلاته
جود :ايه شوفي يا زينه وحلاته ما يعيبه شيء
اسيل :مقربع والله
جود ضربتها :اسكتيي الله يفشلتس والله ما المقربعة الا انتي يالعوبة اص ولا تفضحيناا عند الرجاال
اسيل :ايه قلت الصدق والله
جود :اسكتيي ولا ويلتس تراا
اسيل سكتت وهي ترجع تناظر في وليد الي يسوق
لحظات طويلة لين ما وصلو ونزلو كلهم وجود واسيل نزلو مع بعض و وليد نزل ينزل شنط اسيل من شنطة السيارة
اسيل تناطر البيت :الله بييت شكبره عايشين وحدكم انتو؟
جود :ايه لوحدناا شوفي البيت شحلاته ما شاء الله هاذا لي ولتس وسلفتس
اسيل لفت له منصدمة :بسم الله منهيي سلفتي؟
جود :مدري والله نشوف محمد منهو يختار ونزوجه
اسيل تحمست تشوف البيت :انزين تعالي ندخلل و وريني البيت
جود وقفتها :تعالي وين تبي تمشين تبين تشوفين البيت من اول يوم استحي على وجهتس انتي عروس سوي نفستس مستحية وابكي شوي وش يقول الرجاال ما صدقت تعرس هاذيي
اسيل استغربت :ابكي ليه ؟
جود :عشان فارقتي خواتس
اسيل :كاهو انتي قدامي
جود :ادخلي معي قبل انجلط
واخذتها لغرفتها الي كانت مرة جميلة
اسيل :الله هاذي غرفتي؟
جود:انتي و وليد
اسيل تناظر الغرفة:معلينا اهم شي غرفتي
جود قعدتها فوق السرير وهمست لها :اسمعي اقعدي هنا لين يجي وليد فاهمة ولا لاا ،وسوي نفستس مستحية ولا تفشليني عند الرجال خواتس علموتس وش بيصيير؟
اسيل :اييه علموني
جود :زين انا طالعة برا
اسيل :طيب
جود ابتسمت لها وطلعت برا وقابلت ابو محمد
ابو محمد :هاه كل شي تمام
جود ابتسمت:لا تحاتي تمام تمام
ابو محمد دخلت لغرفته وهو يقول :الله يسعدهم مع بعض يا رب
جود :امين يا رب ويسعدنا
ابو محمد :امين يا روحي
وقعد فوق السرير وهو بيده علبتين :اسمعي
جود:هلا
ابو محمد :هاذي تعطينها لأختس صح دفعنا مهرها بس برضو مقصرين والله وهاذا حقها
جود اخذت العلبة :وشذا
ابو محمد :طقم ذهب لها تستاهل حرمة ولدي
جود ابتسمت :ما تقصر يا ابو محمد ما تقصر والله
ابو محمد طلع من جيبه علبة ثانية بس صغيرة :وهاذي لتس انتي يا بنت الاجواد
جود ابتسمت واخذت العلبة من يده وفتحته وكانت خاتم ذهب وهي من يوم تزوجته ما قصر معها اشترى لها طقمين ذهب وبناجر ذهب والحين خاتم :والله ما كان له داعي يا ابو محمد كثير علي
ابو محمد :لا والله قليل عليتسس تستاهلين اكثر يا ام ضاري
جود سكتت لانها من يوم تزوجته وهو يناديها ام ضاري وهي للحين ما حملت

نهاية البارت
كنت بسحب عليكم ايام بس ما هنتو علي وتعرفون انا كيف قلبي طيب ومقدر على الكلام الحلو🤭وكتبت امس لكم البارت ودامه جاهز قلت بنزله اليوم
يالله قراءة ممتعة لكمم

تشاووو✌️