رواية من حضرتك عشان قلبي تذله الفصل الخامس والأربعون 45 - بقلم ام عوض

جويريا تلف وتدور بالحوش :والله شغلها حلو غصب عليتس وعن امتس
خلود :طيب حنا وشقلنا ما قلنا شيء
جويريا :ما شفتيها تدور غلطة من الصبح بس والله ما بتلقاها
خلود تشرب شاي :عشانها ما تحب احد بشتغل فبيتها
جويريا :اي دافعي دافعي عنها، اقوول انا طالعة. اشوف شموخ خليتها لوحدها بالغرفة مع سلطانة ان شاء الله ما ازعجتها
خلود:زين
طلعت جويريا لغرفتها وهي تغني اول ما دخلت الغرفة استغربت بوجود ام عنان
جويريا رافعة حاجبها :انتي وش تسوين هنا؟
ام عنان قامت :ما اسوي شيء بشوف شغلها كيف
جويريا :معليتس شغلها حلوو وعاجبنيي واهمشيي نظيييف
ام عنان :انتي اخبرر بس ترا ما تعرف تنظف زيين خلود بنتي تعرف تنظفف احسن منهاا
جويريا اخذت نفس بقلة صبر منها وقالت :طيب زين اصلا خلود محدن يجي بقد نظاافتها مااا شاء الله
ام عنان لفت وجهها وطلعت
وجويريا راحت عند شموخ وشالتها وهي تقول :تدور الغلط من تحت الارض بس والله عنادآ فيتس يا مريمووه بتقعد سلطانة يعني بتقعدد
وبعدها لفت لسلطانة : عسى بس ما بكيت يوم رحت
سلطانة لفت لها :لا لا ما بكيت ابد ولا ازعجتني كانت بسريرها تلعب ما شاء الله الله عليها
جويريا تضحك:ما ازعجتس بنتي بس ازعجتس جدتها مو
سلطانة ضحكت بخفة :يعنيي
جويريا :معليتس ما اقولها، اصلا من الصبح وراتس هي وتدور عليتس ب زلة عشان تطلعتس من الشغل انتبهي هاه تراها مب بهينة تضحك عندتس ومن وراتس تحفرر قبرتس هاذي الي قالو تعشي فيها قبل تتغدى عليتس
سلطانة ابتسمت ان شاء الله
و رجعت لفت وجها تكمل شغلها بس وقفت للحظة وهي تطالع لو جويريا ملاحظة عليها وبعدها طلعت السلسال من جيبها وقالت بتمثيل : اوه وش ذا
جويريا استغربت: وش؟
سلطانة لفت لها :هاذا يمكن سلسالتس شفتها طايحة بالارض
جويريا ناظرت السلسال :اي والله سلسالي ذا هاتيه يروحي
اخذته من يدها وهي تقول :شكرآ لتس يا قلبي
سلطانة :العفو
جويريا ابتسمت لها براحة :ارتحت لتس الصراحة يا سلطانة لو غيرتس كان اخذها
سلطانة ابتسمت :استغفرلله ما قد قربت على الحرام ولا بقرب
جويريا :زين يروحي خليتس كذا ابيتس، السارق عمره ما فلح ولا شبع
سلطانة سكتت
جويريا ناظرت فيها من فوق لتحت وقالت: بسألتس سؤال
سلطانة :تفضلي
جويريا : انتي متزوجة؟
سلطانة :لا ارملة
جويريا : اهاه الله يرحمه يا رب، طيب عندتس اولاد؟
سلطانة :عندي بنت وحدة
جويريا :الله يخليها لتس يا رب
سلطانة :امين يا قلبي ويخلي لتي بنتس
ابتسمت جويريا وهي بداخلها تحس مرتاحة واجد لسلطانة وما تدري انها حية تحت التبن والي يميزها تمثيلها الي يخليك تحبها وانت ما تدري وش وراها

محمد والهنوف رجعو البيت والهنوف مستانسة :والله كنهم نفسهم
محمد :ايه شفتي
الهنوف :اقول لا يكوون هذول نفسهم حق اسيل طارو وهم مسكوهم وحطوهم عندهم مو معقولة شوف قد ايش شكلهم نفسه
محمد :لا لا مو نفسهم نسيتي انه سوسو ذبحتهم
سكتت الهنوف بحزن : ايه
محمد :يالله خلاص قلنا لتس مب قصدتس ليه رجعتي زعلتي
الهنوف :انا رايحة احطهم بغرفتها قبل تجي
محمد :يالله بسرعة اجل
مشيت الهنوف ومحمد قعد فوق الكنبة ثواني ورجعت الهنوف وبهاللحظة جت جود بعد وهي بحضنها بنتها :رجعتو ما شاء الله
الهنوف بإبتسامة :ايه رجعنا وتخيلي شرينا عصافير نفسسهم والله لو تشوفينهم يا جوود تقولين نفسهم بدوون اي كلاام
جود :حتى لو نفسه اسيلو ذي داهية بتعرف
الهنوف :صدقيني ما بتعرف شكلله نفسه بضبط بضبط
جود : بعيد عن الشكل هي تسولف معهم بتعرف كذا
الهنوف :عادي لو سألتني بقولها لانتس تروحين الجامعة وتخلينهم يزعلون منتس
جود :ما شاء الله اشوفتس مخططة لكل شيء محدن يجي بقدتس والله
الهنوف بفخر :اييه محد يجي بقدي
جود :الحين شيلي اجوان انا رايحة اجيب صينية الشاي وراجعة
الهنوف شالت منها اجوان وهي تلعب معها
محمد :جيبيها جيبيها حبيبة اخووها
راحت الهنوف وقعدت جنبه وشاله محمد وقعد يلعب معه ويرفعها لفوق ويرجع ينزلها
والهنوف تتأمل فيه مبتسمة
محمد بفرحة لاجوان :شوفي شوفي الهنوف ضحكت توهاا والله ضحكت اففف ليت وليدو هنا اوريه انها تضحك معي بعدد
الهنوف ضحكت عليه:عادي سهلةة انك تضحك الاطفال بس انتو العيال ما تعرفون كيف تضحكونهم
محمد :لا ولا قد لي واجد احاول اضحكها وما تضحك
قطع عليهم دخلة اسيل و وليد
وليد واسيل :السلام عليكم
الهنوف ومحمد :وعليكم السلام
اسيل راحت وقعدت بالكنبة وقعدت تناظر الهنوف الي لابسة عبايتها :ما شاء الله تو راجعة من برا يا الهنوف
الهنوف:ايه توي راجعة رحنا انا ومحمد مشوار ورجعنا
اسيل :ايه زين وينها جود؟
الهنوف :بالمطبخ تسوي شاي
اسيل بصوت عالي شوي : لا ياا شييخة
الهنوف وقفت وهي مستغربة:وشهو؟
اسيل مخلية اختي تشتغل وانتي قاعدة هنا
الهنوف :لا هي قالت
اسيل تقوم :ايه رقعي قولي ما كان لتس حيل وخلص
الهنوف :لا ما اصدق الحين بتسوين سالفة من ولا شيء
اسيل :ايه لانها اختيي وما ابيها تتعب
الهنوف :خلاص ثاني انا مرة انا بقوم كذا زين؟
اسيل بصوت عالي :ايه زييين
وراحت و وليد ناظر لمحمد وهو مبتسم :وعشان ما يصير الي صار معهم ذلحين عطني اختي بالزين
محمد :خذ خذ بس قبل تذبحني ينخاف منكم الله يستر من عيالكم
وليد شال اجوان منه وهو يقول :اييه محدن بقدناا
محمد قرب وهو يهمس ل الهنوف :انا وياتس ما جينا بقدهم بس سوسو يالله طلعت فالحة وقدرت تذبح عيالهم ههخخخخخخ
الهنوف كتمت ضحكتها :لو يدرون بسس هههههخخ

اذن الظهر وسعود قرب من هيام وهو يحركها بشويش عشان تصحى وهيام اصلا نومها خفيف فصحيت بسرعة
سعود :قومي اذن الظهر
هيام قامت وهي تطلع يدها من تحت راس ياسر بشويش عشان ما يصحى وسعود ساعدها عشان تنزل من السرير
هيام :سعود
سعود:هلا
هيام : اشلون اتوضى وانا يديني محروقة وما أدري حتى اذا يجوز ولا لا
سعود :معليه انا اساعدتس واذا على الحرق معليتس يجوز بس تمسحين فوق الشاش
هيام :طيب
راحت هيام الحمام "وانتو بكرامة"
وسعود حط مخدات حول ياسر عشان ما يتحرك ويطيح
وبعدها راح وساعد هيام عشان تتوضى وبعدها ساعدها عشان تلبس جلالة الصلاة ولبس هو ثوبه بعدها قال :انا رايح المسجد قبل يقوم الصلاة
هيام :طيب
سعود شال المفتاح :والمفتاح باخذه معي عشان لا تتعبين نفستس وتفتحين الباب
هيام ابتسمت:طيب
طلع سعود وهيام فرشت السجادة وبدأت تصلي
وبعد ما خلصت اخذت السجادة وطبقته بصعوبة وحطته بمكانه وبعدها توجهت للمطبخ وهي تقول الحين سعود بيرجع ومافي غدا
بس تفاجئت لما شافت انه سعود مجهز الغدا
تنهدت ب حب وهي تقول بداخلها والله انه سعود شخص مافي زيه معقولة للإنسان ان يكون بهاذا الحنيةة ورفعت يدها وهي تقول بخوف يا رب احفظه واحميه من كل شرر
ودخلت وقربت وهي تشوف انه منظف الارض بعد قربت من الطنجرة ورفعت الغطا عنه وضحكت يعني الواضح انه حاول يسوي الكبسة بس مستوي شوي زيادة والموية شوي كثيرة صاير كنه سليق
بس رغم هاذا ما تقدر تغض عن الي سواه وتعبه

سعود طلع من المسجد وهو يسرع في مشيته عشان يرجع البيت خايف هيام تقوم وتسوي شيء وهي يدها مجروحة يدري فيها ما تسمع كلامه
من استعجاله ضرب بواحد وطاحت علبة الموية الي بيده نزل بسرعة وشاله من الارض ومد له وهو يقول :انا اعتذر اخوي ما..
سكت بصدمةة يوم شاف منهو هالشخص
انصدم انه رجع والتقى فيه بعد الي صاارر
علي ناظره وهو يسترجع الي مر
سعود رجع له منظر تميم وغمض عيونه وهو ما يبي يسوي شيء الحين او حتى بقول شيء
علي ما صدق انه شاف سعود قدامه الحين :سعود
سعود رفع يده وسكته :اص ولا كلمة يا علي لا تقول ولا شيء امشي بدربك وخلني امشي بدربي وخلي اليوم تمر على خير
علي ما كان بوجهه هذيك القسوة الي شهدها سعود قبل كان وجهه ذاابل واضح عليه الندم
علي وقف سعود قبل يمشي :اسمعني يا سعود
سعود رجع وقف بمكانه :اسمعك تفضل
علي سكت لانه مو عارف وش يقول حتى :سعود انا دريت انه
سعود كنه عارف وش بيقول فقال بسرعة :دريت انه تميم بريء مو؟؟
علي سكت بحزن وبعدها قال :ايه عمي الي ذبح حمد
سعود بلع ريقه وهو يحاول ما يبكي : وش يفيد الكلاام الحين يا علي وش يفيد الكلاام هااه انت بوقتها لااا سمعتني ولاا سمعته وش يفيد كلاامك الحين اخوي لاخرر نفسس بحياته كان ينطق ويقول انه بريء من صدقه هااه من صدقهه؟؟ ، محد صدقه كلكم ظلمتووه وتفرجتو علييه وهو يمووت مثل كنه قطوة ويموت قداامكم ما رف اي جفن لكم وش يفيد الكلااام الحيين تكلمم
علي كان منزل راسه ودمعة تنزل من عينه وهو الندم قاعد يذبحه يوم عن يوم
سعود :تدري وش يا علي بكل صلاة لي بدعي ربي انه يطول بعمرك تدري ليه؟؟ عشاان تعيش وتشووف كل احبابك يموتو قدام عيوونك وااحد ورا الثااني بدعي يا علي انه بكل مرة تنااظر فيه لعياالك تطيح دمووعك. وتحرق خدك لأنك انت مو بس ذبحت اخوي انت ذبحت كل احبابي معه خليتني اصير يتيم مرتين تفهم. وش يعنيي انتت خليتني اصير يتيم مرتيين كنت فااقد لي اب وام والحين انا فاقد لي اب وام واخ والي سويته يا عليي صدقنييي ماا بسامحك علييه لو كنت عند باب الجنة والله ما اساااامحك يا علييي
ومشى عنه وهو يمسح دموعه والغصة بصدره ذابحته تميم كان له اكثر من اخ صديق الطفولة عاشو وكبرو سوا فقده بيوم واحد والاكثر الي يوجع قلبه انه مات مظلوم مات وهو يصرخ ويقول انه بريء
وصل البيت وهو يحاول يكون طبيعي ويمسح دموعه عشان ما يحسسها لهيام شيء يدري انه هاذا الشيء بياثر فيها واجد وهي اصلآ مو ناقصةة
دق الباب
دقة مرة ومرتين وثلاثة بس مافي اي رد
طلع المفتاح من جيبه وفتح الباب ودخل لداخل وهو يدور هيام وينادي بخوف
هيام طلعت من الغرفة :هلاا
سعود :ادق الباب ليه ما تفتحينه خوفتيني عليتس
هيام ناظرته بإستغراب وقالت :المفتاح معك انت وشلون افتحه لك؟؟
سعود ناظر للمفتاح الي بيده واستوعب ناظر فيها لوهلة وبعدها غمض عينه وهو يحط يده بجبينه و يتنهد
هيام قربت منه :سعود اشفيك؟
سعود :مافيني شيء يا هيام، ياسر للحين نايم؟
هيام ما اقتنعت انه مافيه شيء خاصة انه غير الموضوع بسرعةة :ايه نايم
سعود :انا داخل احط الغدا انتي اقعدي ارتاحي
هيام :طيب
سعود دخل المطبخ وهيام قعدت بمكانها وهي تقول مو من عوايد سعود ينسى كذا اشفيه وشصاير معه؟؟
ما قد شافته كذا ابدد دايم ما يكون مبتسم ورايق وما يزعله كل شيء
دقايق و رجع سعود وهو بيده صينية اكل وجا قعد جنب هيام
هيام :سعود اشفيك فيك شيء؟
سعود ابتسم لها :مافيني شيء صدقيني
هيام سكتت شوي :ضايقتك مني بدون قصد مني؟
سعود :لا لا من قال انتس ضايقتيني ازعل من الدنيا وما ازعل منتس انتي
هيام سكتت وهي متأكدة انه فيه شيء
سعود مسك الملعقة وقربه من عند هيام وهو يأكلها بيده عشان يدينها مجروحة وما تقدر تاكل
وهيام انحرجت منه بهاللحظة وقعدت تاكل من يده وبكل لقمة منه يزيد دقات قلبها ويزيد الحب بقلبها تجاه سعود
وصحيح سعود بدأ يميل لها الا انه ما كان يبين هالشيء بملامحه ويكتم مشاعره بقلبه وما يبينه وان حاول يبينه يتذكر اخوه تميم ويرجع مرة ثانية

صحيت روزا من نومها متاخرةة وما لقت زين جنبها وحمدت ربها مليون مرة انه طلع قبل تصحى لأنها مستحية منه من بعد الي صار امس "الي بالي بالكم"
قامت وتروشت وبعد ما طلعت من الحمام "وانتو بكرامة" رتبت المكان بسرعة وبعدها دخلت المطبخ تجهز شيء على السريع للغدا لانه اصلا صحيت متأخر وبيأذن العصر وهي ما سوت شيء
سمعت صوت الباب يندق وفز قلبها وهي تقول يا ربي ما يكون زين اشلون بقابل وجهه الحين
راحت وهي تقول:ميين؟
جاها صوت زين وهو يقول :رجلتس المزيوون انا افتحي الباب
روزا وقفت شوي وهي تقول وين اودي وجهي الحين
زين :هييه الو ما تسمعين افتحي الباب لا تخافين ما بتموتين من الخقة فيني
روزا تحركت بسرعة وهي تجهز نفسها للنحشة
فتحت الباب وطيران انحاشت
زين ابتسم بس سرعان ما عقد حواجبه يإستغراب دف الباب وهو يطالع وينها روزا ليه ما استقبلته دخل وقفل الباب وراه وهو ينادي :روزاا وينتس وراتس ما استقبلتيني خلاص بغطي وجهي بس اطلعي
استغرب مالها اي صوت عقد حواجبه وهو يقول :روزااا وينتس يا بنت احس نفسي كني داخل بيت مهجور من الهدوء هاذي وينتسس
طلعت وهي بيدها صينية اكل ورافعته بحيث ما يبان وجهها
و زين مستغرب ويناظرها :اشذا؟
روزا :جبت لك غدا
زين :انتي شايفة الساعة كم الله يصلحتس
روزا لفت مرة ثانية :طيب برجعه
وقفتها :لا لا خلاص دامه منتس ما نرفضه
روزا حطت الصينية فوق الطاولة ولفت عشان تمشي بسرعه بس رجع مسكها زين :وين بتروحين نحن نبيتس انتي ما نبي الغداا تعذرنا بالجوع لاجل نشوفتس
روزا :شسمه ذا عطشت وبروح اشرب موية
زين :طيب ارجعي مرة ثانية ابيتس جنبي
روزا :طيب
ومشيت بسرعة و زين فهم انها مستحية بعد الي صار امس وانتظرها لين تدخل المطبخ وهو يبتسم بنذالة
وتوجه لغرفة النوم وقعد يدور بين الادراج روج احمر لقا وحدة وطلعها وفتح ازرار ثوبه وقعد يطبع بصدره على شكل شفايف وهو يضحك
ورجع الصالة وقعد وسمى بالله وبدا ياكل
رجعت روزا بعد ما لفلفت بالمطبخ وهي تفكر اشلون ترقعه بس مافي آمل
وجت قعدت جنب زين وهي تحاول ما تطالع فيه
و زين يفتح ثوبه قاصد عشان تشوف
واخيرآ لاحظت روزا ورفعت حاجبها وهي تقول :زين
زين ما صدق رفع راسه بسرعة :هلاا عيون زين
روزا قربت منه وهي تدقق النظر :وشذا؟
زين ناظر لصدره وبعدها ضرب راسه بتمثيل : اوووه كنت بمسحهم في صبح بس نسييت عسى بس محد شافهم يا فضيحتي
روزا استغربت :وش تقول ليه يا فضحيتك و وش ذا مفهمت
زين :يعني ما تذكرين؟
روزا :وش؟
زين نزل نظره مرة ثانية :لا لا خليني ساكت احسن لي
روزا :تتكلم ولا اشلوون؟
زين يعدل قعدته :خلاص دامتس صدق مو متذكرة بقولتس
رورا :ايه قول
زين :انتي امس بستيني وشفيتس مو متذكرة
روزا رفعت حاجبها له بدهشة :والله؟؟
زين :ايه
روزا ابتسمت له :على فكرة ما كنت حاطة روج احمر امس
زين ناظر لصدره :صدق؟
روزا مبتسمة للحين :ايه كان احمر مايل للوردي
زين ضرب فخذ روزا بخفة وهو يضحك :ههههههههههه مزحة حلوة
روزا :اقول كل كل بس لا يبرد الاكل نسيت انه اطباعك ذي ما بتنساها وانا اصرفك من الصبح احسب بتتغزل فيني وانا بستحي مالت على حظي بس
زين :افااا بس اناا ما انسى اطباعي خلاص خلاص بصير زين الرومانصي لعيونتس اصير قيس وعنتر و روميو
روزا :انت اول شيء انطقها صح بعدين يصير خير
زين عقد حواجبه وهو يفكر:هو مو الرجال كان اسمه روميو ولا انا غلطان يا شيخة والله الخبط بين روميو وجولييت يشيخة كلهم اسامي عيال تحسيهم
روزا مسكت راسها وهي تضحك على غبائه :تكفى يا زين كل وانت ساكت
زين :طيب يا عيونيي
وقعد ياكل وهو يناظرها بإبتسامة

في ليل

حنان دقت باب غرفة جويريا
وجويريا استغربت من يدق باب غرفتها ظنتها سلطانة ف قالت :ادخلي ادخلي يا سلطانة مفتوح الباب
دخلت حنان :هاذي انا حنان من الصبح مافي احد بلسانتس غير سلطانة سلطانة اشوفتس نسيتي اختس حنان من يوم جت هاذي
جويريا :لا ما نسيتس يا اختها بس طفشت من وجهتس قلت اغير وابي اشوف وجيه جديدة
حنان رفعت حاجبها لها دهشة :لا يا شيخة؟؟
جويريا ضربتها بمزح:اشبتس نمزح معتس بعدين انتي الأولى محد ياخذ مكانتس
حنان قعدت فوق السرير:الحين معلينا ابي اسالتس؟
جويريا :تفضلي
حنان:ما تحسين هاذي سلطانة فيها شيء غريب احس مب مرتاحة لها
جويريا عقدت حواجبها :وش يكون فيها الله يصلحتس مَرة مسكينة وارملة تشتغل عشان توفر فلوس لبيتها وبنتها المسكينة
حنان :مدري عاد بس اشوفها تناظر كل شيء بالبيت بدقة كنه وراها شيء
جويريا :لا لا تخافين من هاذي الناحية تخيلي في صبح شافت سلسال الذهب حقتي وعطتني ياها لو غيرها تسرقه والله بس رجعته لي هي
حنان :مدري عاد بس مب مرتاحة لها بعدين انتي الله يهديتس وش حاجة الخدامة ذلحين
جويريا :الحين خلود بنت صغيرة واكيد الحين او بعدين بتتزوج وعاد تدرين انا وياتس مو فالحين غير نتكي ونقعد واذا قمنا لشغل شوية ما عرفنا لها الاحسن نجيب خدامه نحسب حسابنا من بدري وعاد ام عنان خلي نتفائل يمكن تموت عن قريب ونفتك منها ومن رقعة وجهها
حنان :حرام لا تقولين عنها كذا
جويريا تضحك بصدمة:لا انتي اكيد مهبولة نسيتي وش سوت فيتس بسببها كانت بتنخرب بيتس
حنان: هو ايه صح ما قصرت معي من يوم جيت بس بالنهاية هي جدة عيالي شوية تعصب وشوية تكون زينة معنا اذا تحملناها او لا هي طبايعها كذا منقدر نغيره لها ولا نستفيد شيء الاحسن نسايرها
جويريا :اذا انتي تنسين وتسامحين فهاذي الطبع مب فيني والي سوته فيني ما انساه لها لين اموت صح سكتت وما سويت شيء بس حقي منها ربي بياخذه واذا مب اليوم بكره
حنان ناظرت لشموخ الي نايمة وسكتت :الله يصلح الكل
ه
نهاية البارت
اشوفكم بالبارت الجاي ان شاء الله
مع السلامة