رواية من حضرتك عشان قلبي تذله الفصل السادس والأربعون 46 - بقلم ام عوض

اسيل جت وجلست وهي معها شنطتها عشان تبي تذاكر وتشرب شاي معهم
الهنوف :جت الحجة مع كشتها
اسيل :انتي شعليتس من الحجة وعفشهاا خليتس بحالتس احسسن لتس
الهنوف :بسم الله ما قلنا شيء نمزح معتس خلي روحتس مرحة اشفيتس
جود :خلاص يا عرب صرعتوني المفروض نحط جدول في صبح الهنوف تطلع الصالة معي وفي ليل اسيل لا تطلعون سوا
الهنوف :ايه زين والله افتك من شوفتها
اسيل :على اساااس انا ذابحةة نفسي عشان شوفتس مااالت عليتس
جود :يووه وش قلنا تونااا
الهنوف :بس عشانتس انتي يا جود بسكت ولا هاذي اذا سكتي لها تزود وتزيد حطب في الناار
اسيل طلعت كتبها وهي تقول لجود:جود انتي دخلتي غرفتي وانا بالدوام؟
جود ناظرت ل الهنوف وقالت :لا ليه؟
اسيل :مدري في احد حاط للكناري موية واكل ومنظف القفص حقهم بعد
جود:لا مب انا يمكن انتي سويتها ونسيتي
اسيل :لا وين عجوزة انا عشان انسى بعدين انا اذكر في صبح كنت مستعجلة و قلت يوم ارجع بحط لهم بس مدري وشصار
الهنوف :ايه يعني من تقصدين بكلامتس
اسيل :والله اقصد الكل الا انتي ادري فيتس ما تحبينهم ولا تبين الخير لهم
الهنوف :اييه زين بعدت عن التهمة
اسيل :شفتي يا جود انا الحين كنت ساكتة هي الي بدت
جود :ايه شفتها يا قلب اختس وانتي يا الهنوف اهجديي ولا ترا الخيزران معي للحين اجلدتس فيها
الهنوف فطست ضحك:خيزرانة اسيل ههههههه
جود ما قدرت تمسك نفسها وهي بعد ضحكت معها: هههههههههههه ايه اييه
اسيل قفلت كتابها بقوة وقامت وهي تشيل اغراضها :والله انا الي غلطانة شلييت عفشي وتعنييت وجيتكم عشاان اونسكم ليتني قاعدة بغرفتي واونس الكنااري حقتي احسن منكمم ما تستاهلوون
جود تضحك للحين :تعالي تعالي اشفيتس زعلتي اسييل
الهنوف :ماا نقصدد والله يا اسييل وين رحتيي تعاليي يا بنت الحلاال
جود تضحك :خليها تروق وترجع بعدين انتي الله يهديتس لازم تحارشينها
الهنوف:شسوي مقدرت امسك نفسي بعدين هي بعد تحارشني كذا
جود :الله يهديكم كلكم

سلطانة لابسة عبايتها وتسلم على ام عنان وخلود وحنان جت جويريا من المطبخ وهي بيدها كيس :تفضلي يقلبي
سلطانة استغربت :لا وشهو هاذا
جويريا :شوية اكل الحين راجعة البيت ما تلحقي تطبخين
سلطانة اخذته من يدها:شكرآ لتس يا قلبي ما تقصرين والله
جويريا :العفو يا حياتي
سلطانة للكل :يالله مع السلامه اشوفكم بكره ان شاء الله
خلود وحنان وجويريا :مع السلامة
طلعت سلطانة وجويريا قفلت الباب من وراها
وعنان بهاللحظة كان جاي بالطريق و صدفها خرجت من بيتهم وبعد عن طريقها عشان هي تمر وعرفها بإنها هي سلطانة
مرت من عنده وهي تقول بداخلها هاذا هو عنان يعني؟
وابتسمت بعدها وهي تقول :صح متزوج ثنتين بس مو يبين عليه كبير واجد ومزيون
ضحكت بخفة وكملت طريقها
وعنان رجع تذكر شكلها في صبح ما يدري ليه مو راضية تروح من باله ابدد
فتح الباب ودخل لداخل وجويريا قالت بإبتسامة :هلا والله جيت يا عنان
عنان ابتسم يوم شافها وطارت سلطانة من باله :اهلين يا قلبه
جويريا :خلود قومي حطي العشا اكيد جوعان عنان
خلود قامت :اف لو كانت تقعد سلطانة لين تحط العشا ما صدقنا على الله ارتحنا وترجعو تكرفوني
جويريا :قومي وانتي ساكتة بس المسكينة من الصبح تكرف هنا وتأخرت بالرجعة فبيتها وهي مسكينة عندها بنت بالبيت تحتريها
عنان قعد جنب امه وهي يعقد حواجبه :متزوجة هي؟
حنان :لا ارملة وعندها بنت بعد
عنان:الله يعينها
وام عنان تناظر في جويريا وهي بداخلها تقول ان ما طلعتك من هاذا البيت ما يكون اسمي مريم يا جويير
خلود جابت العشا وتعشو كلهم وبعد العشا شربو شاي وقعدو شوي وبعدها قام عنان وهو يقول :انا طالع انام
قامت حنان بسرعة :وانا بعد طالعة تصبحون على خير
وراحت وراه بسرعة
وجويريا تناظرها بصدمة :بنت الذيين تبيه يدخل عندهاا بس والله مو بكيفهاا اليوم دوري يعني دوري
وقامت بسرعة ولحقتهم
وخلود تضحك عليهم
عنان كان داخل بغرفة حنان بس مسكته جويريا من يده :خير خير ويين دااخل اشوفك راييح وانت مستااانس
عنان بإستغراب :داخل عند حنان وين يعني؟
جويريا :لا مبب بكيفهاا ام الشوشة اليووم دوري اناا
حنان مسكت عنان من يده الثاني :بكييييفتس هو ولا بكييفتس اليوم دوري اناااا نام عندتس يومين ورا بعض ما تشبعييين انتيي
جويريا :نام عندييي يوميين ولا ثلااثة ولا اربعةةة انا ماالي دخلل الي يهمني الحين انه ما بينام الا عنديي تفهميين ولا لااا
حنان :لا ما افهمم واذا فيتس خيير وريني وش بتسويين
جويريا شهقت :يعنيي تبين نتهاوش؟ طييييب براااحتس بس بعدين لا تبكين وتقولين جوييير سوت وسووت اخبر فييتس قداميي ملائكيةة و وراي عفريتةة
حنان :عفرييتة تقعد فوق راستس ان شااء الله انا اتكلم من ورااتس اسألي وش اقول من وراتسس اذا تبيين، والحين ضفي وجهتس لغرفتس عنان اليووم ينام عنديي يعني ينام عنديي تفهمييين ولا لاا
عنان صرخ :خلاااص صرعتوووني انتوو
جويريا :عنان حبيبي يرضييك انك تنام عندهاا واليوم دوريي مب عدل كذاا والله
عنان بملل :لا ما يرضيني
حنان قربت منه :طيب يرضييك انك تناام عندها ثلاااث ايام ورا بعض يا نظر عييني وتخلي حرمتك وعيالك الثنتين لوحددهمم
عنان :لا ما يرضيني بعد
جويريا :هي بنفسها طردتك امسس ولدها كان يصييح وجيت عنديي شدخلني تحرموني من حقيي بعدين حنانوو اخبر انه ما عليتس صلاة هاليومين وش تبيين فييه يا شيخةة
حنان حطت يدها بفمها :استحيي على وجهتس يا مَرة استحي على وجهتس
عنان قاطعهم :تتفقون الحين وين ادخل تراني نعسااان وابي اناام يا عرربب ولاااا اقوولكم احسسن حل انتو الاثنين تهاوشو شدو شعور بعض اضربو بعض هنا مثل ما تبون انا نازل انام عند امي تصبحون على خير
ونزل بسرعة
وحنان ناظرت لجويريا :عجبتس كذاا الرجال انحااش بسبتس انتيي
جويريا :هرب بسبتي اناا ولا بسبتس انتيي يا ام الشوشة
حنان رفعت اكمامها:الحين تراويتس ام الشوشة وش بتسوي فيتس يا جوير بنت ياااسر
جويريا :لو فيييتس خيير تعالي و و رينييي يا بنت ابوووتس
وهجمت عليها واثنينهم يشدون شعر بعض ويتهاوشون

ام عنان :يمه بتنام عندي؟
عنان :ايه يمه، انا داخل اتروش خلود جيبي لي المنشفة
خلود :طيب
دخل عنان الحمام "وانتو بكرامة"
وخلود راحت تعطيه المنشفة وام عنان قامت ودخلت غرفتها
ورجعت خلود مرة ثانية بعد ما عطت لعنان المنشفة وقعدت تفرش له
وام عنان تناظر الباب وهي تدقق السمع انه عنان اذا طلع ولا لا
واخيرآ سمعته طلع وتكلمت وهي تمثل الحسرة :يا ويل حااالها المسكينةة يا خلود كسرت خاطريي
خلود استغربت وعقدت حواجبها :من تقصدين يمه؟
ام عنان :سلطاانة المسكينةة يا يمه حظها الشيين زوجها توفي وعندها بنية صغييرة بالبيت وما عندها احد يسندها غير اخوها الصغيير يا حسرتي علييتس يا سلطانة يا حسرتيي علييتس
وعلى كلامها هذول دخل عنان وهو ينشف شعره: يا حسرتس على من يمه؟
ام عنان ناظرت فيه:على سلطاانة المسكينة يمه يا حظها الشيين
خلود مستغربة :يمه اشفيتس مسخنة انتي؟؟ في صبح ما كنتي طايقتها والحين تتحسرين عليها شبلاتس من البلا
ام عنان :انتيي اوصص ولا كلمةة
خلود سكتت وهي تقول شبلاها امي
عنان قعد فوق فرشته وهو مهتم لسيرتها :طيب وين عايشة ذلحين؟
ام عنان :عايشة في بيت ابوها مسكينة يتيمة الاب معندها الا اخو واحد وصغير للحين يدرس
عنان :اهاه
ام عنان ناظرت في وجهه الي واضح عليه الاهتمام فيها وفي موضوعها وابتسمت بداخلها

فوق جويريا رمت نفسها فوق السرير ب تعب وجنبها حنان
حنان:زين ما صحي قصي على اصواتنا ولا كنت سهرت لين الصبح
جويريا رفعت راسها تناظر شموخ :الحمدلله شموخ نايمة بعد بس تبين الصدق يا حنانوو ،صح انتس مصعقلة بس تراك مب بهينة ايه والله كسرتيني كسرر
حنان :احسنن تستاهلين وانتي ما قصرتي فيني بعدد بصير صلعة من وراتس انتي شديتي شعري لين قلت بس
جويريا :معليه معليه تحطين زيت وبكره يرجعون شعرتس بس الا اقوول حنان شرايتس تجيبين وراعينتس وننام كلنا سوا هنا دام عنان نزل عند امه فكة نسهر انا وياتس سوا
حنان :وانتي صادقة انا قايمة اجيب عفشي وجاية
جويريا :زيين جيبي معتس فصفص نحش كذا شوية
حنان راحت وهي تقول طيب طيب
وقامت جويريا وهي تضحك وراحت عند المراية تزبط شوشتها

مرت شهرين بدون اي احداث مهمة
روزا واقفة عند مراية الحمام "وانتو بكرامة وهي مغمضة عيونها وقلبها طبوول خايفة ومتوترة من النتجية الي بيطلع لها مرت الخمس دقايق ومدت يدها المرتجفة وهي تمسكه وفتحت عيونها بتووتر وخوف وسرعان ما ارتسمت الابتسامة بوجهها وهي تشوف خطين
حطت يدها بفمها من الفرحة وهي مو مصدقةة طلعت من الحمام بسرعة" وانتو بكرامة"
وعلى طول راحت لتيلفون وهي تدق على ام زين لانها قالت لها اوول ما تعرفين تقولين ليي
ناظرت للمطبخ وهي تتأكد لو زين يسمعها ولا لا
جاها صوت ام زين وهي تقول بلهفة:بشريي يمتس
روزا بفرحة:ابشررتس يا خالة توني حللت وطلعت صدقق حامل زي ما قلتيي
ام زين زغرطت بفرحة وهي تقول :الله يبشرتس يالخيير والجنةة على هاذي البشااارة يا بنتيي ما تدريين شكثر مستانسةة باللي سمعته ومبرووك يا قلبيي
روزا :الله يبارك فيتس يا خالة
ام زين :علمتي زين؟
روزا :لا يا خالة اول ما شفت على طول جبت لتس انتي
ام زين:طيب وش محترية روحي قوليله يا مَرة خله يسمعع انه بيصير اب عن قريب باذن الله وقوليله يعقل لانه خلااص صار كبيير
روزا ضحكت:ان شاء الله يا خالة
قفلت منه وهي تاخذ نفس ما تدري اشلون تقوله
وقامت من مكانها وتوجهت للمطبخ وهي تشوفه يقطع طماطم عشان يطبخ لانهم لعبو حكم وحكمت عليه هو الي يطبخ خمس ايام
راحت وقعدت فوق الرخام وهي تناظر المطبخ وما تدري اشلون تعلمه
روزا واخيرآ نطقت :زين
زين وهو ما ناظر فيها للحين يطبخ:هلا
روزا :بسألك سؤال
زين :تفضلي
روزا وهي ما عندها سالفة :انت وش تنادي ابوك
زين ناظر فيها :اناديه خالتي
روزا كشرت :صدق تكلمم
زين:اناديه يبه اكيد وش غير كذا
روزا ابتسمت وهي تجهز نفسها لردة فعله : طيب واذا في احد ب يناديك يبه
زين عقد حواجبه للحينه فاهي :مفهمت اشلون يعني؟؟
روزا اخذت نفس بقلة صبر و ورته التحليل وهي تقول بفرحة :انا حاامل يا زين
زين ناظر فيها لوهلة وهو مو مصدق وبعدها ضحك بفرحة :صدقق؟
روزا بفرحة:اييه
زين قرب منه وهو يمسك يدينها بفرحة :اسألتس بالله صدقق يا روزاا؟؟؟ يعني انا بصيير اب
روزا : لا بتصير جد،
زين مسك قلبه :ما توقعتها توجع
ضحكت روزا :اييه بتصيير اب يا زين
زين ضمها على طول وهو يقول بفرحة :يعني انتي حاامل؟
روزا :اييه حامل كم مرة بقولك يا زين
زين بعد عنها وهي يقول بحماس مخلوط مع فرحة :يعني انا بصيير اب ويصير اسمي ابو "وسكت شوي" يصير اسمي ابو من وش بنسميه يا ويل حالي يا روزا انا راييح انا اقول لابوي وامي
روزا :معليك قلت لامك توه
زين رجع ضمها :ما اصددق يا روزاا
روزا ابتسمت لفرحته وهي تبادله الحضن وهي تحس الفرحة مو سايعتها وفرحة زين زاد فرحتها دبل

سلطانة تشطف الحوش وهي ساكتة وتفكر مرت شهرين من يوم وهي تشتغل هنا وسوت كل الي قالته عليه بس مافي اي نتيجة وهي يوم عن يوم تبني احلام بهالبيت وتعيش احلام وترسمه من كلام ام عنان
ام عنان ناظرت الدرج اذا في احد نازل ولا لا ونادت لسلطانة بصوت واطي :سلطانة بسست تعاليي
سلطاننة استغربت وراحت لها وهي تناظر الدرج :هلا وش بغيتي
ام عنان :قولي لي امس وشصار شافتس؟
سلطانة :ايه شافنيي والحيين وش؟؟ لتس شهرين تقولين اسمعي كلامي ويصير الي تبينه وهاه للحين ما صار شيء
ام عنان :انتي اصبري يا مَرة اقولتس ولدي مهتم فيتس بس اكيد خايف من حرمته الملسونة جوير بس معليتس انا بفكر لتس على حاجة اخليه يعرس عليتس قبل يخلص ذا الشهر صدقييني
سلطانة:واذا ما صار هاه وقتها وش بتسوين
ام عنان :لا تفاولين بالشر هاذا ولديي وانا اخبر فيه اهو حاط عينه عليتس يعني حاط عينه عليتس وبكره تشوفيين صح كلاامي
سلطانة:طيب نشووف وش يصيير
و راحت وهي تكمل شغلها
وام عنان قامت وهي تنادي خلود :خلووود جيبي عبايتي بروح عند ام صويلح اونس شويي ضااق صدري من القعدة بالبييت
خلود كانت بالغرفة متسطحة وتتأمل بالخاتم الي بيدها خطبها زبير وامها وافقت صحيح ما كانت مستانسة بس كانت تبين لهم بالغصب وكانت احلى ايام تعيشها خلود
صحت على صوت امها وهي تصارخ وتقول :خلوود وصممغ ما تسمعييين
خلود قامت وهي تقول :هلاا يممه
ام عنان :جيبي عباييتي
خلود:حااضر
وقامت بسرعة واخذت عباية امها وعطته لها
ام عنان :لي نص ساعة اناديتس ما تسمعين انتييي ولا وشهو
خلود:اسفة يمه ما سمعت
ام عنان:زيين انا رايحة الحين اذا جا اخوتس حطي له غدا طيب
خلود:ابشري
ام عنان :الله يبشرتس بالخير يالله يمه ما اتاخر
خلود:الله معتس
طلعت ام عنان وخلود طلعت فوق عند جويريا
دخلت وشافت حنان وجويريا قاعدين سوا
خلود تخصرت:مااا شاء الله اشوفكم مسويين خوي وساحبين علي هالفترة ما تقولون هالمسكينة لوحدهاا نعزمها ونونسها
جويريا :ايه خوي الله يصلحتس لسه قبل كم يوم متهاوشين
حنان:بعدين والله معلينا منتس عادي نحبتس بس امتس تخرب علينا لو ما شافتس تحت
خلود تقعد :وانتي صادقة بس معليه الحين راحت
جويريا :ايه سمعتها وهي تقول بتروح بيت ام صويلح
خلود تقعد :اييه وش تسولفووو
جويريا :سوالف كباار لا تزوجتي بعدين يصير خير
خلود. تناظرهم :من زين سوالفكم الي حق الكبارر اصلا قريب بتزووج وافتك منكم

سلطانه خلصت من شطف الحوش وناظرت اذا في احد ولا لا وبعد ما تأكدت مافي احد دخلت غرفة ام عنان وخلود وتوجهت عند الدولاب وهي تناظر الملابس وتفتش كذا عادة فيها قعدت تفتش وما شافت شيء تقدر تسرقه والخزنة مقفلة فقدت الامل انها تلقى شيء غالي لانه ام عنان مب غبية تترك اغراضها برا وهي قد شافت سلطانة تبي تسرق
وهي فعلا تدري في ام عنان وحفظتها في ذا الشهرين
قعدت وهي تتنهد وطاح عينها على
فستان لخلود شدها ابتسمت وهي تتذكر متى اخر مرة لبست شيء حلو كان بيوم زواجها بعدها حرمت من الحياة بكبرها مو بس من ملابس الحلوة
مسكت الفستان وطلعته من الدولاب و وقفت قدام المراية وهي تناظر نفسها بالمراية
ما قدرت تقاوم جمال الفستان وفصخت جلابيتها ولبست الفستان الي كان لونه عودي وفيه خرز محلي الفستان ناظرت لنفسها بالمراية وابتسمت
لانها فعلا ظالمة نفسها بين ضغوطات الحياة واشغالها
سمعت صوت الباب وفزت من مكانها وعلى طول طلعت الفستان عشان ترجع تلبس جلابيتها
بس عنان كان اسرع منها وفتح الباب وهو ينادي خلود وامه ومستغرب وينهم واول ما شافها تروع وفزع و رجع مرة ثانية ورا وهو يستغفر ربه
وسلطانة لبست جلابيتها بسرعةة ورجعت الفستان بالدولاب وهي تحس بالاحراج فعلا

وعنان غمض عيونه بإحراج وهو مو مصدق انه كل مرة تصير صدفة ويشوفها بس اول مرة يشوفها كذا بلع ريقه وطلع فوق وهو ينادي خلود وحنان
طلعت خلود وهي تضحك :هلا اخوي
عنان :شسمه ذااا وينها امتس ما شفتها تحت
خلود :راحت بيت ام صويلح انت اطلع وانا اجيب الغدا
عنان :طيب
ودخل الغرفة وهي يحس بااله ابد مو معه
جويريا قامت بإبتسامة وهي تقول :جيت حبيبي
وحنان قامت بعد وعنان جا وقعد فوق السرير :ايه رجعت حياتي
حنان تدلك له اكتافه :اجيب لك غدا حبيبي
عنان لف لها:هاه لا لا خلود بتجيب الحين
جويريا تقرب منه :وشفيك يا عنان فيك شيء
عنان :لا مافيني شيء، وينهم العيال؟
حنان :قصي نايم و ثامر يلعب مع فهاد
عنان :زين
بكت شموخ وحنان ضربت جويريا بخفة:روحي شوفي بنتس تبكي
جويريا راحت شالت شموخ بعد ما رمت كم نظره لحنان لانه فضا لها عنان لوحدها
وخلود جت بعد دقايق وجابت الغدا لعنان الي سلطانة مسطرة على افكااره
هه
نهاية البارت
بنات اسمعوو نزلت مقطع في تيك توك ابي كلكم تروحو تشاركون فيها مسوية فعالية قلك
فعالية تخص الرواية تمام
وبالله مع السلامة اشوفكم بالبارت الجاي
اشوفكم بالبارت الجاي