رواية من حضرتك عشان قلبي تذله الفصل التاسع والعشرون 29 - بقلم ام عوض

وصلو المزرعة الي ما كانت تبعد واجد وقريبة تقريبا
نزلت جويريا وهي تناظره من برا ومبهورة :هاذا الحين مزرعتكم كلله؟
عنان يقفل باب السيارة :لا لا شوفي ذا الجانب حقنا وذا الجانب حق ابو جاسم والجانب الثاني حق ابو بدر
جويريا :من ابو جاسم ومن ابو بدر؟
عنان :ابو بدر يصير اخو ابو جاسم
جويريا :ما شاء الله
عنان لف لجهة مزرعة ابو جاسم في اصوات اغاني واصوات ناس :شكله اليوم عندهم عرس
جويريا :ايه والله شكله
دخلو لداخل وعنان ماسك يد جويريا :تعالي اوريتس خيلي
جويريا :تكفى عندك خييل ؟؟
عنان:اييه احب الخيول

وصلو عند الاسطنبل وعنان أشر لها عند خيله الي لونه ابيض :اعرفتس على عنبرر
جويريا تمسح عليه :تكفى يا عناان والله يهببل
عنان يرجع خطوتين ورا وهو يناظر باقي الخيول :وهاذا حق ابو جاسم والثاني حق ابو بدر
جويريا :كلهم يهبلون والله تكفى ابي اركب عليه
عنان :لاا
جويريا :ليييه
عنان :انتي حامل ولا سمح الله يأثر هالشيء على الولد بيتشقلب الولد
جويريا تلمس بطنها:ما يصير له شيء عادي
عنان :لا ممنوع لا ولدتي بنجي واخذتسس جولة فيها
جويريا :اف منك يا عنان تبالغ واجد
عنان حضنها :معليتس مو باقي واجد لين يجي ولدنا
جويريا ابتسمت :تدري يوم حضنت ولد اختي حسيت بشعور حلو واحس لو حضنت ولدي بكون اسعد انسانة بالعالم
عنان ناظر الخيل :ان شاء الله بعلمه ركوب الخيل من بدري عشان يحبه
جويريا :تقدر تعلم ولدك ثامر
عنان ضحك:يحليله هو يخاف منه ما يحبه
جويريا :ولدك ذا خويف كله بسبب حنانو ما تنصحه يصير قد نفسه انا لا جا ولدي والله اعلمه كل شي من بدري واخليه يعرف كيف ياخذ حقه بيده مو يجي يشكي
عنان:يعني مثلتس
جويريا بفخرر :اييه
عنان ناظر للخيل :تم اذا جا ولدنا سالم وغانم بأذن الله وكبر وصار مثل كلامتس قوي وقد نفسه هاذا الخيل له هو وحده
جويريا ناظرته  بصدمة :يعني متشكك انه ما يطلع قوي زي امه؟
عنان:لا بس كتحدي لتس
جويريا :طييب يا عناانو بنشووف
قطع عليهم صقر وهو جاي
عنان لف له :هلا والله ب صقرر اخبارك يا رجال
صقر عمره 11:هلاا والله عم عنان كيفك اخبارك عساك بخير حياك تفضل
عنان :لا والله جاي مع الاهل ما اقدر
صقر يسحبه :لا والله تجي اليوم عرس جاسم ودامك جيت بتتفضل
عنان:ما شاء الله عرس اخوك جاسم
صقر :ايه عرسه تعال والله ابوي لو عرف ما يخليك
عنام استسلم ولف لجويريا
جويريا ابتسمت :روح وانا احتريك هنا معليه
عنان:طيب
ومشى هو مع صقر
وجويريا لمست الخيل وهي مبتسمةة ولمست بطنها وهي تقول معليه حبيبي هاذا الخيل لك وحدك ونوري ابوك انك انت ولد جويريا مب حنانو
وضحكت
فجأة سمعت صوت لفت وراها وهي تحسب عنان رجع يمكن بس ما لقت احد رجعت نظرها للخيل وهي متجاهلة بس رجعت سمعت صوت وهنا لفت وقربت وهي تناظر من وين الصوت قربت من الاسطنبل وانصدمت يوم شافت ولد صغير متخبي هناك
ضحكت وقالت:وش تسوي هنا حبيبي
حيدر قام وهو يناظر لو في احد
جويريا :اشبك تدور من؟
حيدر :محد
جويريا شكت كنه مسوي شيء ومتخبي وقالت بإبتسامة:تعال اطلع من هناك
طلعته من هناك : ويالله جاوبني الحين وش تسوي هنا؟
حيدر يلعب باصابعه :مندس من ابوي
جوريريا:ليه وش مسوي ؟؟
حيدر:ضيعت المفاتيح وهو لو درا بيذبحني
جويريا ضحكت وقالت:تعال اقعد هنا
قعدو عند الكراسي
وحيدر ناظر لبطن جويريا
جويريا ابتسمت وحطت يده فبطنها :هنا في نونو صغير زيك للحين ما طلع للحياة بيعيش كم شهر هناك ويجي للحياة
حيدر ابتسم :حتى امي
جويريا ضحكت :صدق
حيدر:اييه
جويريا :حلو يعني بيولدو سوا ان شاء الله
حيدر ناظر فيها:امي قالت بتجيب بنت انتي وش؟
جويريا توهقت لانها هي ما تدري بس شعور بداخلها يقول انه ولد فقالت:الله اعلم
حيدر ابتسم لجويريا وهي ردت له الابتسامه وهي قلبها اسر للولد الصغير ذا الي متخبي من ابوه وكلامه عسلل

في اخر اليل
ابو محمد قاعد عند محمد ويقرا قرآن
خلص وباس المصحف وحطه فوق الطاولة ولف نظره لولده وتذكر النقاش الي دار بينهم في صبح وهو وش قال نزلت دمعة من عينه ومسحها على طول وهو ندمان للكلام الي قاله قرب منه وباس جبينه ورجع مكانه
وبرا الهنوف قاعدة بالكراسي والممرات كلها فاضية جا وليد قرب منها وهو يقول :يا بنت الحلال تعالي اوصلتس البيت ترا مافي فايدة لقعدتس هنا
الهنوف :والله مانيب راجعةة
وليد:ترا ما بيدخلونتس عنده
الهنوف ناظرت فيه :وليد ترا والله مانيب راجعة انا قاعدة هنا لين يطيب محمد لو ما يدخلوني حتى انا قاعدة هناا
وليد تنهد منها وهو المفروض يرجع البيت من زمان عشان اسيل لوحدها بس بسببها للحين ما رجع
توجه للغرفة الي فيه محمد دخل شاف ابوه قاعد
راح عنده وباس راسه :كيفك يبه
ابو محمد :بخير، رجعت الهنوف للبيت؟
وليد:يا يبه والله مو راضية حالفة تقعد عنده لين يطيب راسها يابس ذي ما تفهم انه مستشفى مب فندقق
ابو محمد تنهد :خلها تقعد وانت ارجع البيت حرمتك لوحدها بالبيت ما يصير كذاا
وليد :و جود؟
ابو محمد :معليك انا اتصلت عليها وقلت لها بكرة اخذتس
وليد رجع باس راس ابوه :طيب يبه انتبه لنفسك واول ما يصحى محمد تتصل علي وتخبرني
ابو محمد :ابشر يبه
طلع وليد بعد ما القى اخر نظرة لاخوه
وطلع برا وركب سيارته ومشى للبيت
واول ما دخل جت اسيل عنده وهي تركض و تبكي
انفجعع من منظرها وقال بسرعة :اسيل اشفييتس وشصايير ليه تبكين
اسيل وهي تبكي :وين كنت والله خفتت لوحديي بغيت انجلطط ليه خليتني وحدي وانت تدري اني اخااف
وليد قرب منها وهو يحط يده بكتفها :لا تخافين انا حدس الحين
اسيل تمسح دموعها :وينهم جود والهنوف ليه ما جاءو وشصايير
وليد تنهد :ابو الهنوف اطلق على محمد
اسيل انصدمت:وشش؟ طيب كيفه الحين هو بخيير؟؟
وليد:الحمدلله بخير وابوي والهنوف الحين معه بالمستشفى وجود عند اختس هيام بتنام عندها في ليل
اسيل انصدمتت وناظرت لوليد الي واضح عليه خايف على اخوه حطت يدها بكتف وليد بتواسي:الحمدلله على سلامته
وليد يقعد فوق الكنبة :الله يسلمتس
اسيل جت قعدت جنبه وهي ساكتةة غير عن عوايدها مراعية حالته الي فيه الحين وكيف واضح من وجهه انه تعبان ومهموم وخايف على اخوه
حطت يدها فوق يده بحنية :لا تخاف ان شاء الله بيصير زين
وليد مسح على وجهه من التعب وهو يقوم :ان شاء الله
اسيل :احط لك عشا؟
وليد :لا شكرآ مالي نفس
اسيل بحزن:طيب

روزا حطت العشا وراحت تنادي زين الي من يوم جا وهو قاعد لوحده
روزا:تعال تعشى العشا جاهز
زين ناظر لها لمدة
واستغربت روزا منه
زين بعد ما ناظر فيها لوهلة رجع نظره :مو جوعان
روزا لفت عشان تمشي بس رجع وقفها صوت زين :روزا
روزا لفت له مرة ثانية :هلا
زين هاادئ غير عن عاادته اشر لها فوق الكنبة جنبه :تعالي اقعدي هنا!
روزا راحت قعدت وهي ساكتة محتريته يتكلم
زين ناظر لعيونها وهو عيونه تلمع :قوليلي الصدق يا روزا انا شخص زين؟
روزا استغربت من سؤاله وما قدرت تنطق بشيء
زين :اسألتس بالله يا روزا انا شخص زين؟ لهدرجةة انا شخص مب زين عشان الهنوف تنحاش مني بيوم زواجنا انا شخص مب زين يا روزا بسببي الهنوف انحاشت وبسببي اليوم محمد كان بيموت وبسببي صار كل شيء كله بسببي اناا
روزا ناظرت فيه وهي تهز راسها بالنفي :لااا مب بسببك انت شخص زين وما صار شيء بسببك لا تلوم نفسك كذا
زين غمض عينه بأسى :حتى انتي حياتس تدمرت بسببي ليتني ما اخترتس هذاك اليوم وخليتس تعيشين كل ذا انتي ما تستاهليني والله ما تستاهلييني
روزا كانت تعرف انه ثقته انهزت بعد هروب الهنوف بس ما ظنت لهدرجةةة هو مجروح من ذا الموضوع وحقه يزعل ويتضايق واي شخص بمكانه يتضايق
ناظرت بعيونه الي تلمع وقربت منه وضمته وهي تغمض عيونها : صدقني يا زين انا محظوظة لانك اخترتني من بين كل البنات والله محظوظة انه ربي رزقني بشخص جمعت فيه كل مواصفات الزينة لا تلوم نفسك على اشياء مالك ذنب فيهاا لا تخلي ثقتك بنفسك تنهز بسبب وحدة ما ظنت فيك الزين وانحاشت والله انها خسرت احن شخص بالعالم، شخص طيب وحنون زيك
زين انصدم من حضنها له بس بنفس الوقت هو كان محتاج للحضن والكلام الي قالته
شد بحضنها وهو يحس وده يدفن نفسه بحضنها وينحاش من كل شيء ويلجأ لها من العالم بكبره

جود فرشت لها وقعدت وهي تقول :والله احس صاير شيء يا هيام ولا لييه يقولي نامي عند اختس اليوم وهو في صبح قايل لي لا اقعد عندتس واخلي اسيل تقعد عشان ما اتعب
هيام ترضع ولدها :لا تفاولين ان شاء الله مو صاير شيء ولو مر مرتاحة اتصلي
جود تناظر الساعة:الحين ابو محمد نايم اكيد بتصل بالتيلفون ان شاء الله اسيل او الهنوف ترد علي
مسكت جوالها واتصلت بس مافي رد
رجعت وحاولت مرة ثانية وهي قلبها ناقزها انه في شيء صاير
جاها صوت اسيل واخيرآ وقالت ب لهفة:الوو اسييل
اسيل :هلا جود حبيبتي وشلونتس اخبارتس
جود :بخير الحمدلله، اسمعيي بسألتس الكل بخير محدن صاير له شيء
اسيل سكتت وعرفت جود ما تعرف وقالت وهي تضحك :هههه كلنا بخيير وشفيتس خايفةة
جود:اسيل قولي الصدق ابو محمد بخير وعياله بخير
اسيل :كلنا بخير وشفيتس
جود تنهدت :مدري قلبي قارصني من يوم ابو محمد قالي نامي عند اختس
اسيل:لا تخافييين كلنا بخيير نامي عند هيام وبكره انا اجي وانتي ترجعين
جو ابتسمت :ان شاء الله
اسيل :بوسيه لي حبيب الخالتو بمووت لين اشوفه والله
جود:ابشري ببوسه
اسيل :فديته بس
جود:يالله مع السلامه حبيبتي انتبهي لنفستس
اسيل:وانتي بعد
وقفلت منها وهيام ناظرتها بإبتسامة:ارتحتي الحين؟
جود ابتسمت :يمكن شوي بالغت
هيام:شفتي
جود ضحكت

جويريا وعنان في سيارة يسولف لها عن ابو جاسم وحسن ضيافته وكرمه
عنان :والله ما خلاني اطلع من عنده الا وانا متعشي
جويريا :ايه وتركتني لوحدي
عنان:والله مقدرت اجي واهو حلف أتعشى عندهم
جويريا ضحكت:تخيل ولده كان عندي
عنان:من صقر؟
جويريا :لا وش كان اسمه نسيت والله، ايييه حيدر صح حيدر
عنان:اييه حيدر ذا كل المصايب من وراه
جويريا فطست ضحك:تصدق انه كان مندس بالاسطنبل لانه مضيع مفاتيح ابوه
عنان ضحك:احلفي
جويريا :والله، ناديته وقعدته معي و ونسته شوي ما بيدي شيء
عنان :الله يعينه على التصفيق الي بياخذه من ابوه
جويريا :وانت صادق
وصلو البيت
وجويريا نزلت قبل عنان ودخلت البيت
وجاها صوت ام عنان النكدية وهي تقول :شرفو واخييرآ
جويريا :خير وشصايير؟
ام عنان :وينتس من يومين طالعة ولا درينا عنتس ولا تحسبين نفستس فبيت ابوتس تروحين وتجين بكيفتس
جويريا قربت وهي تطلع طرحتها :خير وشفيها يا خالة كنت مع زوجي مو مع شخص غريب
ام عنان :حسب ظني اهو طلع من العصر وينكم من وقتهاا
جويريا وقفت عندها بدلع :رحنا مشواار انا و زوجي اخذني للمزرعة حقته الي بيصير لولدي حبيبي بالمستقبل
ام عنان ناظرتها بصدمة :امحقق والله للحين الولد فبطن وصارت تخطط وش بياااخذ ،روحيي يالله روحييي جعله يموت فبطنتس ولا يوولد دام امه زي كذا وش نظن من الولد سحرت ولدي وخذته عندهاا الله يستر لا جا الولد وش يصيير
قاطعها صوت عنان وهو معصب :يمممه
ام عنان لفت له
عنان سمعها وهي تدعي على ولده الي للحين ما ولد صر بسنونه وهو معصبب :الي فبطنهاا يكون ولديي يا يمه واهو بنفس الوقتت يصير حفيدس تدعيين علييه وهو للحين ما ولد؟ وش سوا لتس عشاان تدعين علييه وشش سوااا
ام عنان واقفة ومنصدمةة ولدها عنان الي كل شيء عنده الا امه قاعد ويصارخ عليهاا قالت بصدمة وعدم استيعاب :تصارخ علي يا عنان؟؟ تصارخ عليي انا امكك تصارخ عليي؟.وعشان منوو؟ عشان وحدة رخييصة لا راحت ولا جتت تصارخ عليي عشانهاا؟
عنان صرخ :يمممه ما اسمح لتس تقولين عنها كذاا لا تنسييين انها حرمتيي
ام عنان سكتت وهي مصدومة ما قدرت تنطق من الصدمة
عنان صد وجهه وهو ما يبي يقول كلمة زيادة ويندم لانه عارف نفسه معصب وبيقول الي يجي بباله
لف وجهه وطلع فوق وقال بصوت عالي شوي :جوييرياا الحقييني
جويريا ابتسمت ب نصر لأم عنان وقالت وهي تبعد شعرها بدلع :حااضر يا نور عييني جااية
ولفت وجهها وطلعت ورا عنان للغرفة
وام عنان واقفة مصدومة و وراها خلود الي مصدومة اكثر منها

دخلو الغرفة ولف لجويريا على طول :تسمعييني زيين والله ما يصير طييب لو احتكييتي مع امي يااا جويريا خليها بحاالها تفهميين ولا لاا
جويريا تخصرت: عشتوو والحين صار الحق عليي للعلم ترا هي الي بدت تدعي وانت تدري فيها بس حاط العتب علي وانت تدري بعد
عنان :طيب وشقلتي لها الحين عشان عصبت؟
جويريا :قلت لها الكلام الي قلته لي عن الخيل وهي عصبت ودعت على ولدي اسم الله علييه
عنان تنهد لانه يدري في امه وقرب منها :لا تزعلين مني بس والله ما ارضى امي تقول عن ولدي كذا وانتي لا تعصبيها خلاص خلها بحالها وانتبهي لنفستس زين
جويريا سكتت
عنان باس جبينها :انا رايح اشوف قصي "ولده"
وطلع برا
وجويريا ابتسمت وهي تتذكر كيف صارخ عليها وقالت بداخلها هين يا مريم ما شفتي شي للحيين

اسيل شالت صينية الاكل وراحت لغرفتها هي و وليد ودخلت شافته قاعد في طرف السرير وباله ابد مو معه
راحت وحطت طاولة قدامه وحطت الصينية فوق الطاولة وهي تقول :بتااكل وغصب عليك والله ما اخليك تنام وانت حوعان
وليد ناظر للاكل:صدقيني مالي نفس يا اسيل
اسيل ناظرت له وهي مطلعة عيونها بتهديد :ترا الخيزران للحين موجوودة اندري وين دسته جوود ترااا
وليد ضحك من الذكرى وزبط قعدته ومد يده عشان ياكل
اسيل :زين كذاا ما تمشون انتو الرياجيل الا بالعين الحمراا
وليد :كلي انتي بعد
اسيل :انا اكلت
وليد:تكذبين علي يالكذوب متى اكلتي
اسيل :قبل شوي، الحين معلينا كنت بسألك
وليد:وش
اسيل:اختي جود ما تدري انه محمد بالمستشفى؟
وليد:لا ما تدري ابوي قال لا تقولون لها لا تخاف وتتوتر وهي حامل
اسيل :ايه دقت وما عرفت وش اقولها مثلت عليها بس ما اتوقع مشت عليها
وليد:معليتس تاليها تعرف بعدين
اسيل سكتت شوي وبعدين قامت وهي تدق راسها :يووه نسيت اجيب لك موية الحين اجيب لك وارجع طييب
وقامت بسرعة. عشان تجيب له موية
و وليد ضحك وقال :مجنونة
وبعدها ابتسم بحب :بس حنونة بعد

في صباح اليوم الثاني
ابو محمد كان يصلي وسلم ورفع يدينه وهو يدعي ولده يقوم ب خير وسلامة
بهاللحظة فز محمد من نومه
وابو محمد قام بسرعة من مكانه وراح عنده وهو يقول:اسم الله علييك يولدي
محمد ناظر حوله بصدمة وتدارك الي صار وقال بسرعة :وينها الهنووف وينهاا يببه هي بخيرر فيها شيء ابوهاا ما سواالها شيء
ابو محمد :بخير هيي لا تخااف قولي انت بخير تحس ب وجع انادي لك الدكتور
محمد مسك مكان جرحه وهو يتنهد ويقول:الحمدلله بخير يبه بخير بس وينها الهنوف
ابو محمد تنهد من ولده الي مافي بلسانه الا اسمها :هي برا وبخير لا تخااف
محمد رخى ظهره
وابو محمد ساعده :انا رايح انادي الدكتور
وطلع برا الغرفة وهو يوقف ممرضة ويقولها نادي للدكتور الي مشرف على حالة محمد
راحت الممرضة عنه عشان تنادي الدكتور
وهو لف عشان يمشي وطاحت عينه على الهنوف الي نايمة عند الكراسي تنهد وراح عندها وهو يحركها بشويش :الهنوف الهنووف يا بنتي قومي صار الصبح
الهنوف فتحت عيونها بشويش ويوم شافت ابو محمد فزت بخوف :عمي؟ اشفي محمد فيه شيء
أبو محمد:معليتس ما به الا كل خير وتوه صحي
الهنوف فرحت:صدقق صحي؟؟ وينه تكفى ابي اشووفه
ابو محمد :طيب تعالي ادخلي قبل يجي الدكتور تشوفينه من بعيد لبعيد وتطلعين
الهنوف قامت بسرعة :طييب
ومشيو اثنينهم للغرفة الي فيها محمد الي اول ما فتح الباب قعد ب لهفة محمد وهو مبتسم وناسي انه جرحه ما التأم للحين والمفروض ما يتحرك زي كذا
الهنوف ابتسمت له من عند الباب وهي عيونها تلمع فرحانة انه بخير وما صابه شيء كان بينه وبين الموت خطوة بس
جا الدكتور ودخل الغرفة والهنوف رجعت برا
قال وهو مبتسم لمحمد:الحمدالله على سلامتك كيفك الحين؟
محمد: صرت بخير الحيين
الدكتور قرب منه وهو يشيك على المغذي :تحس ب وجع؟
محمد مبتسم :لا الحمدلله
الدكتور :لازم تنتبه لنفسك جرحك عميق جدآ
محمد :ان شاء الله

نهاية البارت
اتمنى من الكل انهم يعذروني لاني هالايام مررة مشغولة وما يمديني اكتب ابدد وانا ما اكتب الا اذا فضيت مرةة عشان ما استعجل بالكتابة وما اعطي للاحداث حقها و ودي مررة اخلص الرواية قبل يجي الرمضان لاني في رمضان ما بنزل بارتات يمكن اكتب لو فضييت بس ما انزل
وبس والله وشكرآ لدعمكم الحلو والله تفاعلكم مررة حلو🥺❤️منورين الجدد في روايتي واتمنى تعجبكمم❤️❤️❤️