رواية من حضرتك عشان قلبي تذله الفصل الثالث 3 - بقلم ام عوض

عنان عض شفته السفلية
جويريا تمشي عنه :تعال ننزل كني سمعت امك تنادي
ورمت بطرحتها في وجهه وهي قاصدة
عنان حس كل عصبيته تلاشت بهاللحظة
ومشيت جويريا عنه وهو ضل فترة يستوعب وبعدها لحقها هو بعد
نزلو اثنينهم تحت وجويريا كان وجهها فيه ابتسامة مستفزة لام عنان
وام عنان انصدمت ظنت بيضربهاه او يعصب عليها مو تنزل لهم متكشخة ومتزينة ومستانسة
قعدو كلهم بسفرة الغدا مع بعض وثامر قاعد جنب ابوه
وخلود تناظر في وجه جويريا وملاحظة انها حاطة مكياج ومنصدمة انه اخوها ما تكلم ولا شيء
بعد ما خلصو
قامت خلود وهي تقول لروزا :بنتت شفتي اليي شفتييه
روزا:وشهو الي شفتيه
خلود:حرمة اخونا الجديدة كانت حاطة مكياج
روزا:احلفيي؟؟ ما لاحظت وانا اقول سبحان الله عيونها تجنن
خلود:هي تجنن بدون المكياج بعد بس والله حاطة مكياج
روزا:واخوتس ما تكلم؟؟
خلود:شفتيي نحن يحرمنا من كل شيء وحرمته لا هين يا عنان اوريك إن ما رحت وشريت لي مكياج ما يكون اسمي خلود
روزا:روحي جيبي الصحون لا تعصب عليتس امتس الحين
خلود:الله يعيينا اليوم جايين عندنا ضيوف يشوفون حرمة اخونا الملسونة
روزا :يوه لا تضيقين صدري تكفين يمكن جاية ام طلال مع بنتها الملسونة
خلود :الله يعين اختس خديجة عليهاا ما ادري اشلون صابرة عليها لو اني منها ما اسكت لهاا
روزا:اختتس سكتت لها كثير للامانة وعبير تدعس على طرفها اكثر من مرة وهي تسكت لها تستاهل محد قالها اسكتي عن حقتس

قعدو ام عنان و ولدها وجويريا مع بعض
وحنان ضاق صدرها من جويريا وقامت طلعت لغرفتها لين يجو الحريم
ام عنان :تجهزيي في حريم جايين بعد العصر
جويريا :ابشري
ام عنان :لا اشوفتس تحوسين هنا وهناك تدورين مشاكل معهم فاهمة ولا لاا
جويريا :افا انا ادور مشاكل
عنان :يمه انتي كوني حبيبة معها وهي تسمع كلامتس صح جويريا
جويريا تبتسم ابتسامتها المعتادة :ايه
ام عنان تقوم:ان شاء الله
عنان قام:انا طالع يمه بغيتي شيء
ام عنان:سلامتكك
وقام وطلع

بعد ساعة وصلو الحريم
ونزلت جويريا تسلم عليهم والحريم فعلآ مثل ما سمعو عنها بنت فلان واسمها فلان وقوية
وهي مشيتها بكبره قوة وثقة
سلمت وقعدت وجت وحدة جلست جنبها وهي تقول:هلا بحرمة اخوي
جويريا استغربت :انتي اخت عنان؟
خديجة :ايه انا اخت عنان الكبيرة خديجة
جويريا ابتسمت لانه واضح عليها طيبة. وحبيبة :ماشاءالله تبارك الله عنده اخت غير روزا وخلود
خديجة ابتسمت:ايه انا اختهم الكبيرة
بهاللحظة دخلو حرمتين وسلمو وقعدو واضح وحدة منهم هي الام والثاني بنتها وعاد بنتها من زين زينها مكيااج وذهب وفستان والبنت كشخةة وثقتها فوقق الفوق
وكان الواضح بينها وبين خديجة كره من النظرات والنقزات لاكن ما فهمت وشهي
ملت بينهم لانها ما تعرفهم هي ابد و قامت جويريا وانسحبت للمطبخ.
وهي تشرب موية طفشت من الحريم وهي تدري لو تكلمت بتجيب العيد وام عنان موصيتها تنطم ومالها خلص للمشاكل بنفس الوقت
خلود جت تركض عند روزا :سمعتيي جت عبير مع امهاا
روزا:يا ويلي ما يستحوون صدق جوو
خلود:وعاد شوفي وجه اختس خديجة انقلب اصفر احمر اخضرر
جويريا استغربت:ليه منهي
خلود:هاذي وحدة اسمها خطاافة الرجال ضرة خديجة
جويريا :يوه ذكرتيني ببنت عمي روان متزوجة خمس مرات
خلود :شفتيي هاذي زيهاا خطافة الرجال وما لقت الا تزوجت رجل اختي والحين مكرهة اختي بعيشتها وقوية محد يقدر لها تكفين اعطيها كذا كم كلمة وبردي قلبي عليهااا
جويريا ابتسمت وكنها ما صدقت على الله :ابشري والله ما طلبتيي
خلود صدمتت:صدق ؟
جويريا :تعالي وراي وشوفي حرمة اخوتس وش قادرة تسوي
خلود:ورينا شطارتس
روزا:يا مهبولة انتي وياها وش بتسوون
خلود تسحبها معها :تعالي نشوف
دخلت المجلس ورجعت مكانها
وعبير من يوم دخلت وهي طايحة تمدح في نفسها وفي رجلها وقد ايس يحبهاا
عبير تتكلم عن زوجها وشقد يحبها ويموت فيها وطلباتها اوامر عنده وقد ايش مدلعهاا
عبير :و وش اقوولكم زياادة بعد ما يخليني امس شغل البيت وممنوع علي اروح عند الغنم يقول انتي حلووة وما يليق علييتس الا تربعين عند المراية وتتزينين والله يا الرجال تسذا يا مافي رجاال
جويريا :لا لا تكفين لا تضحكيني يا خيتي اي حلا الله يصلحتس وانتي حاطة كيلو مكياج يقولتس المثل يا قلبي الشينة شينة لو مكياجها من باريس والزينة زينة لو تسرح مع الغنم و عاد والله انتي بحجم عقلتس افهميهاا
قامت عبير من مكانها وهي تناظرها
وخلود مسكت فمها من الصدمة وهي تقول :احااا قدها وقدوود والله
عبير كان تناظرها بصدمة ومو مصدقة الي قالتها واحرجتها قدام الكل لانه محد اصلا يتجرا لها
لفت لامها وهي تقول :قومي نمشي يا امي الواضح هي طردة بس بشكل مو مباشر
خديجة برد قلبها وابتسمت انه ردت عليها جويريا
وقامو هي وامها وطلعو
وام عنان تتوعد في جويريا
وروزا تضرب في خلود:كله بسبتس انتييي انتي لو سكتي كان ما صار الي صار الحين شوفي امتس وش بتسوي فيهاا
خلود:حلوو ما شفتي كيف رمت الكلام بوجهها والله انها كفوو وبنت رجال قالت الكلام الي مقدرت امي تقوله لهاا
هنا عرفو الكل انه الي سمعوه عن جويريا بنت ياسر كله صح والاكثر جت كنة لمريم الي محد يقدر لها

جا اليل

وام عنان وبناتها جالسين بالحوش يتقهوون
ام عنان :انتبهو منها تفهموون ولا لا، واضح عليها حية تحت التبن لا اشوفكم قاعدين معها وتطقون الحنك معهاا وبعدين اشوف طبايعكم صارت مثلهاا
خلود:يمه قلتي نفس الشيء عن حنان وشوفي شحلاها وتسمع كلامتس
ام عنان:حنان شرق وذي الملسونة غرب عاد لا اشوف وحدة منكم تقعد معها والله بالخيزران هاه والكلام لتس انتي يا خلوود
خديجة:بس يمه والله بردت قلبي
ام عنان :اسكتي انتي لو منتبهة لرجلتس كان ما تزوج علييتس القردة هاذي دايمني اقوولتس لا تسكتين له ولا تسكتين لها هي لكن من يطيعين وهااتس وشوفي وشلون مشغلينتس شغالة عندهمم
خديجة سكتت منقهرة
سمعو صوت حنان نازلة وسكتو و حنان جت وجلست معهم ساكتة
ام عنان :وينها الملسونة وراها ما نزلت معتس"ورفعت صوتها" ولا ماالها وجه تجي وتقعد معناا بعد سوااد الي سووته
خلود :لا قعدت في غرفتها ما عجبتس وان جت وجلست معنا ما عجبتس شتبين انتي امي والله ما فهمت.
ام عنان :اسكتيي وقومي صبي لي قهوة
دخل عنان ورما السلام وبعدها جا وجلس معهم
عنان:وينه ثامر ما اشوفه
حنان:يا حليله لعب مع البزران وتعب والحين نايم
عنان :طيب
ام عنان :صبي لاخوتس قهوة بعد يا خلود
خلود:ابشري يمه
عنان يناظر جويريا مو موجودة:وينها
ام عنان :اذا قصدك على الملسونة ف هي بغرفتها منقبرة جعلها ما تقوم
عنان:ليه ما تجي وتقعد معكم
ام عنان :مدريي عنها اسألها لا رحت لهاا
سكت عنان فاهم امه نفس السالفة كانت فبدايته مع حنان وهو شاف وشهد على حنان طيوبة مرة
وتقول ابشر قبل تنطق ب طلبك

عند نور كانت قاعدة وتكنس الحوش
دخل عمها عليها وهو يقول بفرحة:البشاارة يا نوور حظتس حلو والله
نور قرصها قلبها :ليه عمي
ابو فيصل:خطبس معاذ ولد عبدالله وبكرى جاي هو و ولده مع الشيخ
نور من الصدمة طاح المكنسة الي بيدها :معااذ ولد عبدالله؟؟؟؟
ابو فيصل:اييه شفتي حظتس يا زينه زيناتت
نور مو مصدقةة معاذ الي كل شغله بالمدينة وكل بنات الديرة طايحين عليه ويبونه زوج لهم
خطبها
واذا تزوجت منه بياخذها للمدينة وهي حلمهاا تعيش المدينة والحياة بنسبة لها هناك حلمم
راحت تركض عند اسيل وهي تقول :اسمعي اسيلووو ما تصدقين وش قالي عمي والله ما تصدقيين
اسيل استغربت :وشهو؟؟؟
نور: تصدقييين انه خطبني معاذ ولد عبدالله بالله تصدقيين يمه قلبيي يااا قلبي قااعد يطيير
اسيل حطت يدها بقلها وبعدها ناظرت لنور بصدمة لانها مستانسة:وانتي ليه مستانسةة؟؟
نور:يا تيسة لو تزوجني بياخذني معه المدينة
اسيل :يعني رااضية؟؟
نور:ايه وش راضية انا مستانسةة اني بتزوجهه اخييرآ ضحك الحظ بوجهي
اسيل:لا صدق مو صاحيةة وانا
نور:وانتي وش انتظري نصيبتس
اسيل :مين قال بتزوجج انا ما يتزووج لو تنطبق السما بالارض
نور:معلينا لا تتزوجين براحتس بس اهمشي اني فرحانة انه معاذ بياخذنيي ما اصدقق

فبيت ابو معاذ
معاذ:يبه والله مابيهاا مابيهاا تبغاني اتزوج هاذي الي شوشتها طايرة
ابو معاذ:يا ولدي انت مو شايف البنت لا تقول عنها كذا وبنات ياسر عاد شحلاهم تربية واخلاق وسناعة وتقدر تسال الناس عنهم
معاذ:يبه اعرفها هاذي نفسها الي تشيل الصراصير بيدها يبه مابيهاا اخطب ابي غيرهاا مابيهاا
ابو معاذ:خلاص تمت الخطبة وبكرى نروح انا وياك مع الشيخ وتاخذها غصب عنك اجل اشوف عمهم يرميهم على اي شخص يجيهم واسكت لاا والله
معاذ:وانا وش ذنبي يبه خل سالم الي يتزوجهاا
ابو معاذ:انت الكبير وانت الي بتتزوجها
معاذ ناظره ابوه وهو راافض رفض تام انه يتزوج لانه مو وجه مسوؤلية والاكثر انه يبي يتزوج وحدة هو يختارها وراسم صفات معينة فباله
قام بقهر و طلع برا وهو ضايق صدره من ابوه
ام معاذ :الله يهديك يا ابو معاذ كذا تزوج ولدك البكر حرام عليك
ابو معاذ:معليتس تشوفينه يوم يزعل يومين ويرضى فيها

هيام من يوم تميم قالها هذاك الكلام وهي مب صاحية وتتخيلهم بأي وقت جاءو وهجمو عليهم هي من عادتها خوافة تخاف من ظلهاا ومن يوم سمعت بإسم المسدس وهي ترجف
دخل تميم عليها وهو يشوفها قاعدة قدام المراية وتمشط شعرها وهي سرحااانة.
جا وهو يضمها من ورا بحنية
وهي ابتسمت يوم شافته
تميم: ب وش تفكر فيه حرمتي
هيام لفت له وبلعت ريقها وبعدها قالت :تكفى يا تميم
تميم :قولي
هيام:تكفى نطلع من الديرة والله اني خايفةةة
تميم :والله ما اطلع من الديرة وانا هربان بطلع منها وانا راسي مرفوع انا ما طلعت منه زمان اطلع منها الحين
هيام :خايفة عليك والله خايفةةة يفز قلبي كل ما سمعت صوت حركة خفيفةة اخاافف والله اخااف
تميم :لا تخافين يا روحي ما عاش من يخوفتس
هيام سكتت وهي تدري مستحيل يقتنع
والخوف الي كان بقلبها منه الحين انقلب للخوف عليه

قام عنان وهو يقول :انا قايم انام نعست
وعيون حنان تلاحقه وهو رايح غرفتها
عنان نادى لخلود :خلوود تعالي وراي.
خلود قامت وراه وهي تدري ليه يناديها
عنان واقف بنص الدرج :اسمعيني
خلود :هلا  سمم
عنان:الكلاام الي قالته امتس صدق ولا لا ما دخل براسي
خلود :يعني نصه صح ونص الثاني لا
عنان:الحين قولي لي السالفة من الألف للياء
خلود قعدت تقوله السالفة كامل
عنان:بس
خلود:ايه
عنان:المفروض امتس تفرح مو تزعل
خلود:مدري عنها والله
عنان :والله مو بهينة بنت ياسر اجل عرفت ترد على المقرودة عبير
خلود:والله وانا اختك مو بهينةة وهي تمشي تطيح النجوم من السماء مثل ما قالت امك
عنان :يالله اذلفي انا طالع لها
خلود تضحك :طيب
نزلت خلود تحت
وام عنان تقول :يالله كل وحدة للنوم واشوف وحدة منكم تهمس وتتكلم مع الثاني بالخيزرانة والله
خلود وروزا قامو يشيلون الاكل عشان ينامون
وحنان طلعت لغرفتها وهي مقهورة ومحترة اول مرة ينام عنان بعيد عنها وهاذا الشيء موجعها اشلون هانت عليه وتزوج غيرها

دخل عنان الغرفة وهو يشوفها لابسة جلابية ولا متزينة مثل ما قالها
عنان:وش هاذاا
جويريا بإستغراب:وش؟
عنان :انا وش قلت في صببح
جويريا:وش قلت
عنان :لا شكلتس انتي ما تفهمين الا بالضرب
جويريا وقفت عنده :وش تبي انت والله ما فهمت
عنان:لا والله انا الي ما فهمت وش تبغين انتي في صبح شكل وفي ليل شكل وشخصية
جويريا :لا تحسب ميتة عليك وقمت تجهزت لك بغت امك انك تكفخني وانا ما بغيت انو يصير الي تبيه
عنان ضحك بخفة :انتي ليه راستس يابس زي كذاا ليه هاه.
جويريا :قلت لك ما تقدر علي
عنان:اقدر عليتس وبكسر راستس ذا الي قاعد يكبرر
ولف عشان يمشي عنها قبل يمد يده عليها مرة ثانية
جويريا:اسمع
عنان وقف
جوييريا:بكرى بروح اشوف خواتي
عنان:مافي تنقبرين في مكانتس وتنطمين
ولف وجهه وطلع
وهي الا مصممة تروح حتى ولو ما اخذها هو بتروح مشي

في صباح
طلع تميم للدكان وبعد ما طلع
جا سعود ودق الباب
هيام خافت لانه توه تميم طلع مين الي يكون يدق الباب الحين قالت بخوف:ميين
سعود :انا سعود وينه تميم
هيام:توه طلع الدكان
سعود:اسمعي اختي
هيام:هلا اخوي
سعود:كلمي تميم حاولي تقنعينه يطلع من الديرة
هيام:والله كلمته مو راضي يسمع مني
سعود تنهد :الله يهديه يا رب
هيام:امين يا رب
راح سعود يلحقه للدكان ما يرتاح لو طلع من البيت لوحده

طلعت ام عنان الحوش وشافت عنان نايم بالحوش
وقالت بصوت عالي:هاذا الناقص عندك حرمتين وتنام بالحووش
عنان صحي :انا بغيت انام بالحوش يا يمه
ام عنان :لا قوول انك مقدرت على حرمتك الملسونة ليه مستحيي
عنان عصب:يمه خلاص قلت لتس انا الي بغيت انام في الحوش جهزو الفطور بسرعة انا طالع البس
ام عنان :خلووود جهزي الفطور بسرعةة
خلود بالمطبخ تجهز وهي تقول:الله ياااخذ وحدة اسمها خلود
روزا :لا تدعين على نفستس
خلود :اخوتس يعصب وامتس تهاوشناا حنا شدخلنا طيب
روزا :كملي كملي شغلتس بسس

بعد شوية كلهم اجتمعو بالسفرة
الا جويريا
ام عنان تناظر في ولدها بمعنى انت جبت المصيبة ذي فوق راسنا :قومي نادي لهاا يا خلود حتى الفطور لازم نقوم ونناديها
خلود قامت وهي رايحة غرفتها تدق الباب ما تفتح فتحت الباب وما لقتها
نزلت :مهي موجودة
ام عنان:شوفيها بالحمام"وانتو بكرامة"
خلود:مو موجودة
عنان تذكر امس قالته انها بتروح تشوف خواتها وهو قالها لا
يعني سوت الي براسها و راحت لهم
قام من مكانه وهو يتوعد عليها وطلع برا

جويريا دقت الباب وفتحت لها اسيل واول ما شافتها ضمتها وهي تقول :جويريا يا روحيي
جويريا :اشلوونتس يا روحي عساتس طييبة ،،وينها نور؟
اسيل :ادخلي واسمعي بسس
جويريا بخوف :وشصاير؟؟
اسيل:معاذ ولد عبدالله خطب نور
جويريا :احلفي متى؟؟
اسيل:امس والمصيبة مو هنا المصيبة اختس التيسة مستانسة واسأليني لييش؟
جويريا بإستغراب :ليش؟؟
اسيل:لانها بتروح المدينة الغبييية
جويريا :مهبوولة تعالي نشوفها اندري فيهاا من يومها تيسة
دخلو لداخل وكانت نور بالمطبخ
جويريا مسكتها من يدها:تعالي يالغبية
نور انصدمت انها موجودة وفرحت يوم شافتها على طول ضمتها
ضمتها :جويريا متى جيتي يا قلبيي
جويريا يوم ضمتها نست عصبيتها وقالت :يا عمري انتي توني جييت
نور:اشتقت لتس يا روحي والله حياتنا بلاكم ما يسوا
جويريا :جود وهيام ما جو؟
نور:لا ما جو وقلبي على جود وهيام خايفة عليهم يا جويريا
جويريا :لا تخافين ان شاءالله كل خير انا كل خوفي على هيام هي مسكينة ما تتحمل وعمتس الظالم زوجها لتميم ذباح حمد
نور:خايفة عليهم
جويريا:لا تخافين يا روحي وانا احاول اروح عندهم واشوف اشلونهم وبجي اطمنكم
نور سكتت بحزن لخواتها الي مجهول وشصار معهم

نهاية البارت
يالله مع السلامة بناتي موعدنا بكرى
احبكم ❤️
تشاوو✌️❤️