رواية من حضرتك عشان قلبي تذله الفصل الثالث عشر 13 - بقلم ام عوض

مرت شهرين بدون اي احداث مهمة
هيام قعدت فبيت عمها ساكتة ومنطمة ومتحملة بس لين تولد وهي للحين الخوف بقلبهاا انه يبعدوها عن ولدها
و مع خوفها ومع التعب طلعت من نفسيتها السيئة ودخلت بنفسية الحامل متعبها الحمل كل شوية تستفرغ "وانتو بكرامة" ومتعبة اختها معها
هيام واقفة عند المغسلة وهي ماسكة قلبها
اسيل واقفة عندها وتمسح على ظهرها:سلامتس يا روحي سلامتك
هيام لفت ومشيت وقعدت في صالة وهي كارهة كل شيء حولها من الوضع ذا
اسيل :تبين اقول لفيصل ياخذتس المستشفى؟؟
هيام :ايه عشان عمتس يعصب عليه
اسيل :طيب تعبانة
هيام:مو تعبانة يا روحي وهاذا الشيء تصير مع كل الحوامل
اسيل متقرفة :يعني يصير كذا مع الحوامل كلهم؟
هيام تناظرها مستغربة:ايه الحين تدرين؟
اسيل تقشعر جسمها :بموت لو اتزوج وش ذا القرف والهم
هيام :قومي قومي بس جيبي لي معتس حبة طماطم
اسيل :طماطم؟ وشتبين فيها
هيام:باكلهاا مشتهيتهاا
اسيل راحت وهي تقول لا لا مستحيل اتزوج انا دام كذاا

روزا صحت من النوم وهي تشوف زين نايم فوق الكنبة وتتنهد من حالهم حالتهم ولا كنهم ازواج طول اليوم يتهاشون الي يشوفهم يقول بزران باول عمرهم بسبب زين الي كنه بزر يتهاوش معها ويحارشها بكل شيء وهي مصدومة للحين انه ذا ولد الشيخ الي يمدحونه وكل بنات الديرة يتمنونه
شافت الساعة صارت 8 والمفروض الحين بدوامه هو رمت عليه المخدة :هييييه زيين قم ترا صارت الساعة 9 وقريب 10 قمم لا يعصب عليك ابووك
زين صحي بسرعة:وش الساعة 9 يا ويل حالي من ابوي وين ثوبي
روزا :قم غسل وجهك وبعدين البس الثووب مب صاحي قسم بالله
قام زين وراح الحمام"وانتو بكرامة" مستعجل خايف من ابوه
وروزا مددت رجلها لانه تشلل
طلع زين من الحمام ولبس ثوبه بسرعة وطالع في رجولها :وانتي وشبلاتس ممدة رجولتس مثل امي
روزا :انطم بس ممدتهم لانهم تشللو
زين قرب وهو يلمس رجلها
روزا :لا تلمسسه يا ويلك تراا "ومسكت المخدة" والله يا ويلك يا زين
زين ضحك و راح مسك شماغه :انا طاالع تبين مني شيء
روزا :مابي شيء ششكرآ
زين:الحرمة الزينة والسنعة تجي تودع رجلها عند الباب وتبوس راسه وتقوله ما ابي الا سلامتك يا روحيي
روزا ترفع حاجبها بدهشة:والله؟؟ اقول روح روح بس قبل ابوك يجيك بالعقال
طلع زين وهو يضحك

انايا صحيت بدري وعلى طول نزلت تنظفف لانه اليوم معاذ و نور جايين وعليها شغلل وبنفس الوقت عيال عمامها وعماتها كلهم جايين
اول شيء مسكت المكنسة ودخلت المجلس وهي تشوف سالم نايم ومغطي نفسه بالبطانية
انايا بدأت ترتب:سالم قمم يالله بسرعةة واذلف برا انا ببدأ انظفف
وقعدت ترتب وهي تشوفه للحين نايم :سالم وجع قووم خلااص ترا وراي شغللل مو فاضيية لك
وقفت وهي تشوفه مغطي نفسه بالبطانية للحين
عصبت وراحت وهي تسحب منه البطانية :بتقوووم وغصب عننكك وقسم مو فاضية لك وراي بزران عمامك يضيقون لي خلقيي
فجاة سمعت صوت سالم وراها وتجمدت بمكانها وهي تطالع الي مغطي نفسه
غمضت عيونها وهي تقول تكفى لاا مو ادهمم لاا مو مرة ثاانيةة
سالم جا عندها وهو مصدوم:وش تسويين هناا
انايا تركت البطانية وهي تقول.بهمس :والله حسبته انتت والله حسسبته انتت
سالم مسك راسه من اخته الغبية
وهي ركضت برا الغرفة بسرعةة قبل سالم يعصب عليهاا وهي متفشللة ومنصدمة كيف المواقف الي تفشل تطيح مع ادهم وبسس

معاذ ياخذ الاغراض للسيارة
نور وقفت وهي تتذكر وش جهزت بعد :يا معاذ والله احس ناسية شيء
معاذ:يا شيخةة صدقيني مو ناسية شي توسوسين نفسك انتيي
نور وقفت :الكواية وقفلته والالغاز برضو تاكدت منه وش باقيي يا ربيي وششش
معاذ:يالله تعالي ننزل تأخرناا عشان لين العصر نوصل
نور :وش اسوي اول مرة اسافر مكان بعيد بعد زواجي شيء اكيد بحس بالمسؤولية
معاذ :انا ناازل لا تتأخرين عليي
نور:طيب لاحقتك
نزل معاذ ونزلت وراه نور وهي تتأكد كل شوية من حاجة ومتوسوسة انها ناسية شيء
واخيرآ نزلت وركبت السيارة
معاذ:ما بغيتي تجين
نور :خلاص حرك لا نتأخر وبعدين تحطها علي
معاذ يحرك:يالله، اعطيني البيبسي الي عندك
نور مدت له :تفضل
ومعاذ تذكر يوم انه قالها هاذا البيبسي اغلى منتس وهي هددته لف لها وهو يضحك :نوور
نور لفت له :هلا
معاذ يضحك
نور عرفت من ضحكته انه تذكر هذيك السالفة:انت جرب تقولها مرة ثانية وشوف وش يجيك
معاذ :طيب صدق هاذا البيبسي اغلى منتس
نور لفت وجهها للشباك بقهر :هين يا معاذ هين بتشوف وش بتسوي بنت ياسر
معااذ قعد يضحك من زعلها
وهو مزحه ثقيل مررة مرات وهاذا الشيء يقهر نور

جويريا تجهز نفسها لأنه اليوم بيجون حريم
لبست فستان لونه بنفسجي ومخصر عليها وفتحت شعرها الي يوصل لين نص ظهرها وهي تبعدهم من وجهها وتربطهم بمسكة من ورا ومسكت الكحل وحطت لعيونها وابتسمت وهي تلقي اخر نظرة لنفسها
لفت تبي تطلع وتوه عنان دخل
جويريا حطت يد بيد وهي تقول :ترا توي تجهزت مالي خلق لك تمام
عنان :لا جانا حريم تحطين كحل لهم وما تحطين كحل لي اناا ؟؟
جويريا:انت لا بغيت تقعد عنديي حطيت لك بس قاعد اربعة وعشرين ساعة عند حنان تلمس كرشتها
عنان فطس ضحك :طييب لو تبين انتي تحملين بعد حطي كحل في اليل وابشري بتحملين اليووم قبل بكرى
جويريا ضربته بخفة :بلا مزحك الثقيل
عنان ضحك وبعدها قعد يتأمل فيها ووقال:تحبيني؟
جويريا صدت وجهها :لا ما احبك ولو حبيتك بيوم اعرف اني كلبة طييب؟
عنان :كل ذا الفترة وانا طيب معتس وما حبيتيني؟
جويريا :لا ولا بيوم بحبك
عنان :ليه؟
جويريا قالت بتمعن:في ثلاث اشياء ما يجتمعون مع بعض
عنان رفع حاجبه:وشهي؟
جويريا : المال، والحب، والكرامة، لازم تتخلى عن شيء وتحصل على اثنين
عنان رفع حاجبه بدهشة لها
جويريا قالت بغرور :وانا مو مستعدة اخسر اي واحد فيهم
عنان انصدم منها وضاق صدره بنفس الوقت
وقام وطلع من الغرفة ساكت
وجويريا لفت مرة ثانية للمراية وهي ما تقنع نفسها انها ما تكن اي شعور لعنان وبداخلها تقول هم فطرتهم كذا جويريا يتعنى لين يحصل عليك واول ما يحصل عليتس يروح لغيرتس لا تحببي قلبتس فيه وبعدها يذله ما عاش الي يذل قلب بنت ياسر

هيام تاكل الطماطم
واسيل تناظرها بإستغراب
هيام لاحظت لنظراتها وقال:تبين؟
اسيل:لا شكرآ
هيام:طيب لا تطالعيني وانا اكل
اسيل :مستغربة منتس والله كيف تاكلين طماطم ني صاحية انتي؟
هيام ناظرت حبة الطماطم الي بيدها :صدق كلامتس والله بس والله اسوي اشتهييته
اسيل قعدت جنبها :طيب اسمعي بنت
هيام:هلا
اسيل:اذا جاتس ولد وش تسمينه؟
هيام ابتسمت من كلمتها وقالت وهي تفكر:والله مدري يمكن اسميه ياسر على اسم ابوي الله يرحمه
اسيل استغربت لانها توقعت بتقول تميم وبعدها ابتسمت وقالت :طيب ولو بنت؟
هيام :مدري والله ما فكرت
اسيل :اذا بنت تسمينه عفاف على اسم امي الله يرحمها
هيام :جبتيها والله
اسيل تلمس بطنها :يييه مو مصدقة يا هيام اني بصير خالة ان شاء الله مو مصدقة متى يمرو السبع شهور هاذي واحضنه
هيام ضحكت لفرحتها :فديتس يا احلى خالة
سمعت صوت فيصل ينادي
اسيل :قايمة اشوف وش يبي
هيام :طيب وانا قايمة اانام نعست
اسيل:طيب
راحت الغرفة وتسطحت وهي يرجع لها ذكري تميم من اول وجديد
كلما تحسست بطنها تتذكره وتخونها دمعتها وتغشاها
معها قرآن تميم الي كان يقرأ فيها كل يوم ويقرآ عليها لمسته وهي تقول الله يرحمك يا تميم الله يرحمك وياخذ حقك منهم يا رب
وحطت راسها فوق المخدة وهي يدها ببطنها
وتقول بداخلها ربي يحفظك يا ضلعي يا جعل الي جا لابوك ما يجيك

وصلو معاذ ونور
وانايا ركضت تضم معاذ وهي تقول :اشتقتلكك
معاذ شالها وهو يقول :الناس تكبر انتي تصغرين
وضحك عليها ونزلها وهو يبوس جبينها :وانا بعد اشتقت لك يا روحي
انايا بعدت عنه وضمت نور :كيفتس يا قلبي
نور تضمها:الحمدلله بخير بشوفتس
دخلو لداخل وام معاذ ضمت ولدها وهي مشتاقة له
وبعدها رحبت في نور وحضنتها ودخلو كلهم لداخل
ونور حبت راس عمها وهي تقول:كيفك عمي
ابو معاذ يمسح براسها :الحمدلله يا بنتي وانتي وشلونتس وكيفه معاذ معتس
نور تطالعه:زين الحمدلله
ابو معاذ الحمدلله
دخل سالم وهو مو ملاحظ لنور وراح ضم اخوه وهو يقول:وينكك يا رجاال تزوجت وصرت تتأخر بالزياراات صار في احد يسليك هناك ولا وشهوو
معاذ يضربه:احترم نفسك ياهوو
سالم يضحك:كيفك يالعضيد اخبارك عساك بخير
معاذ:بخير وانت كيفك
سالم :بخير الحمدلله
وبعدها لف عشان يسلم على نور
ونور سلمت عليه وهي مبتسمة
معاذ قرب وهمس لنور :طرحتس البسيها زي النااس
نور ناظرته بنظرة. دهشة وهي بداخلها تقول بالديرة مسوي لي فيها الزوج الغيور وهو بالمدينة عادي عنده كل شي صدق ما فهمته ذا
بعد كذا شوي وصلو الاهل والاقارب كلهم جايين عشان نور ومعاذ لانه من يوم تزوح معاذ محد جا وشاف زوجته وعشان اليوم رجع الكل مجتمعين عندهم مرة وحدة يشوفون نور
ونور قاعدة وسطهم وتتعرف عليهم لانه اغلبهم جايين من بعيد وهي ما تعرفهم بس يعرفون انه معاذ تزوج وحدة من بنات ياسر
انايا حايسة بالمطبخ دلة ودي و دلة جيب وهي المسكينة لوحدها وما تدري اشلون تلحق على كل ذا
وصلت بنت عمها هنادي واخيرآ وجت لها وهي تقول :وينتس انتيي احتريس تجي تسلمي علي وما اشوفتس
انايا :تكفين والله حايسة بالمطبخ تدرين لوحدي وكذا
هنادي تبوسها :الله يعينتس يا روحي
انايا :كيفتس يا روحي اخبارتس
هنادي ::ثواني اطلع عباتي وارجع
انايا :طيب يقلبي
ورجعت انايا لشغلها وجاها بزر وهو يعطيها دلة فاضية :يبون قهوة
انايا صرخت بقهر:هذول الرجال يحسبون القهوة موية ولا كييف
ورجعت تسوي قهوة مرة ثانية
رجعت هنادي مرة ثاني وهي تساعدها

اندق الباب وراحت جويريا تفتح وهي تقول يووه كل ذا الحريم ولسه في جايين بعد
فتحت الباب ودخلت وحدة وهي تسلم وتبوسها
جويريا مستغربة منهي ذي
دخلت جيهان وهي تنادي بصوت عالي :خلووود وينك يا روزا يا خالة مريم
جت خلود وهي تقول بداخلها مو صوت جيهان اكييد لاا
جيهان ضمتها : خلووود يا روحيي يا عمريي لك وحشةة
خلود :هاه وانتي لتس وحشة يا روحي
جيهان بعدت وهي تقول :وينهاا روزا وامك لهم كوومة وحشةة
خلود اشرت للمجلس :بالمجلس امي
راحت جيهان وسمعو صوت ام عنان وهي ترحب فيها وتضمها
جويريا :منهي ذي
خلود :هاذي بنت العم
جويريا :وشجابها طيب
خلود :مدري عنها
تقدمت خلود وشافت شنطتها وحطت يدها بقلبها :يويليي شوفي شنطتهاا
جويريا ناظرت لشنطتها:هاذي شكلها جاية عمر عندنا
خلود :هاذي الشنطة الي تجيب الهم والغمم
جويريا :معليتس انا بطفشها واطردها
خلود:والله ما تقدرين انتي روحي شوفي نفستس بالمراية قد ايش شيطانة والله هي شيطانة اكثر منتس
جويريا :وي لهدرجة
خلود:اييه
جويريا :حبيبتي انا محد ينافسني وبتشوفين بسس
خلود رايحة تدخل شنطتها :نشووف
راحت جويريا ودخلت المجلس شافت جيهان توها تفصخ عبايتها ولابسة فستان مرة قصير وشعرها طوييل ومسويتهم فير وحاطة مكياج اشكال الوان
جيهان قعدت وهي تقول :والله كلكم لكم وحشة
ام عنان :وينتس يا جيهاان رحتي وما عاد شفناتس
جيهان:والله يا خالة انشغلتت لي كثير اقول اني بجي بس في اخر لحظة يتكنسل كل شيء
ام عنان :معليه يا روحي اهمشي الحين جيتي
جيهان:الا بسألك يا خالة وينها حرمة عنان سمعت انه تزوج الثانية
ام عنان لوت بفمها وقالت :قدامتس قاعدة بلحمهاا وشحمهاا
جويريا كانت قاعدة وحاطة رجل على رجل ومبتسمة ابتسامتها المعتادة
جيهان :هاذي هيي؟ يوه من يوم سمعت عنها وانا متوقعة شيء كبير واخرتها ذي النتفة
جويريا ضحكت :وش سمعتي عني يا عيني ان شاءالله شيء حلو لأنه اغلب الي ينقال عني اشياء مو حلوة
جيهان ابتسمت :سمعت انك شيطانة
جويريا مبتسمة للحين:سبحان الله نفس الي سمعته عنتس
جيهان اطلقت ضحكة طويلة وقالت :يا خفة دمك بس تصدقين سمعت كثير عن قوتك وجمالك بس للاسف خاب ظني يوم شفتك
جويريا :وي ليه خاب ظنتس
جيهان وهي تناظر بوجهها بتدقيق وبشكلها :سمعت عن عيونك قالو عنها تطيح الطير من السما بس انا اشوف عيونك مثل اي عيون مالها اي حكاية وجمالك الي مدحوه عادييي
جويريا مبتسمة :نحن بناات الديرة بشوية كحل ومع الجلابية نحلي والجمال تكون لها آية بس للاسف بعض الناس ما تزين بالكحل وحده ولا الجلابية تضطر تعري عشان تظهر جمالها
جيهان ضحكت وهي تدري وشقصدها :ونعم في بنات الديرة
جويريا قامت بعد اعطتها ابتسامة بمعنى انتبهي مني ولا يوجعك راسك
وطلعت برا

محمد توه راجع من عند خالد وهو يقول برجعها عند اهلها وافتك
اخذ سيارة خالد معه وقال لا جيت الديرة تاخذها مني
توجه لبيت جمان على طول و دق الباب وهو يقول لو ما جت اسحبها من شعرهاا واخذها لابوها والباقي مالي دخل فيه
فتحت جمان وهي تقول :اخيييرآ رجعتيي
بس سكتت يوم شافت محمد
جمان:انت وش جاابك ما صدقنا متى نخلص منك
محمد :نادي البنت بسرعة
جمان:لاا ما بناديهاا وانت ارجع لديرتك وفكنا منك ومن شرك
محمد:مالي كلام معتس ناديها يا بنت الحلال
جمان :قلت لك ما اناديها انت ما تفهم
محمد :مو بكيفتس بتجي معي بالغصب او الطيب
جمان : وش بتسوي يعني تدخل البيت غصب عني وتدورها؟
محمد بعدها من قدام الباب ودخل وهو يقول:خطفتوني وما قلت شيء وش بتسوين يعني لو دخلت
جمان:اطللع برا ولا انادي عليك الشرطة والله اسويها ا تراا
محمد ينادي:الهنوووف وينتس تعاالي
جمان :لا تصاررخ هي مب بالبيت
محمد وقف :وينها طيب؟
جمان :مدري
محمد :قولي يا بنت ابوتس ولا تجلطيني
جمان بخوف :طلعت من ساعة للبقالة وما رجعت مدري والله وينها
محمد يتنهد وهو يضرب رجله :و رجعنا نلعب ل لعبة الغميضة مرة ثاانيةة
جمان :والله تاخرت كثير بديت اخاف عليها
محمد طلع برا وهو يقول :رايح ادورها معليتس بلاقيها
ركب السيارة وحرك وهو يدور بالارجاء القريبة وهو زقت معه من الوضع ذا
بعد نص ساعة وهو يدور لقاها بالطريق واضح عليها مضيعة وتبكي
وقف السيارة عندها ونزل
وهي اول ما شافته فرحت انها شافت شخص تعرفه واخيرآ
من فرحتها ضمته وهي تقول :اخيرآ لقيتنييي ما تصدق قد ايش كنت خايفةة وبغيت انجلطط
محمد تجمد بمكانه اول مرة احد يحضنه بعد زوجته المرحومه افتقد للحضن من بعدها وقف بمكانه مذهول من تصرفها كان جاي ومعصب بس من حركتها نسي عصبيته
بعدت عنه الهنوف وهي تمسح دموعها : والله بغيت اموت يوم شفت نفسي ضعتت خفت في ناس يشوفوني وانخطف وما عاد اشوف احد بحياتي كله خلااص والله التوبة اتلقف واطلع لوحديي قالت لي جماان بس ما سمعت منهاا
محمد للحين يناظر فيها ويشوف وجه زوجته فيها وهو يقول بداخله مستحيل يتجدد لي شعور بعدهاا لا الهنوف مو هيي ولا بتكون اصحى يا محمد اصحى
طرد كل شعور بداخله وقال بقسوة :اركبي السيارة بسرعةة راجعين للديرة
الهنوف كنه توها تتذكر انه محمد جاي يرجعها الديرة بعدت وهي تقول :ما اجيي معكك
محمد مسكها من يدها وركبها السيارة غصب عنها وقفل الباب
وراح هو ركب بعد وهو يقول بخلص من السالفة
الهنوف تصرخ :ما تقدر تاخذني غصب عنيي فااهم
محمد :بغيتس تجيين بالطيب انتي ما تبين براحتس اعرف اخذتس معي بالغصب
الهنوف تضرب الباب والزجاج :ما برجعع الدييرةة ما برجععع "وتصارخ" جماااان يا جماان
محمد يحرك السيارة وهو يصد نظره عنها
يبي يوصلو بسرعةة

نهاية البارت
ابي اشكركم كلكم على دعمكم 🥺🥺والله انكم اطلق بناات احبكم وايد وايد❤️❤️
يالله مع السلامة اشوفكم بكرى بإذن الله

تشاوو✌️